প্রধান মন্ত্রী, শ্রী নরেন্দ্র মোদীনা ঙসি ভিদিও কনফরেন্সিংগী খুত্থাংদা রোজগার মেলাদা ৱা ঙাংখ্রে অমসুং নৌনা থবক খল্লবা মীওইশিংগী মফমদা থবক খনবগী চাউরাকপা চিথী 51,000 য়েন্থোকখ্রে। লৈবাক শিনবা থুংবগী নৌনা থবক খল্লবা মীওইশিং অসিনা পোস্ত বিভাগ, ইন্দিয়ন ওদিৎ অমসুং একাউন্ত বিভাগ, এতোমিক ইনর্জী বিভাগ, রেভেন্যু বিভাগ, হাইয়র এজুকেসন বিভাগ, দিফেন্স বিভাগ, হকশেল অমসুং য়াইফ য়ুম্বাল বিভাগশিং য়াওনা সরকারগী তোঙান-তোঙানবা বিভাগ/মন্ত্রালয়দা চঙগনি। রোজগার মেলা অসি লৈবাক শিনবা থুংবগী মফম 46তা পাংথোক্লি।
প্রধান মন্ত্রীনা ঙসি তিনখিবা মীয়ামদা ৱা ঙাংবদা, ঙসি থবক খনবগী চিথী ফংখ্রবা মীওইশিংগী মফমদা থাগৎপা ফোংদোকখি। মখোয়না ঙসি থবক ফংলিবসি মখোয়না হোৎনবা কনখিবা অমসুং খোঙফম চেৎখিবা অদুননি অমসুং মখোয়শিং অসি কেন্দিদেত মিলিয়ন কয়াগী মরক্তগী খনবনি হায়না মহাক্না ফোংদোকখি। লৈবাক শিনবা থুংবদা পাংথোক্লিবা গনেশ উতসব কুহ্মৈগী মতাংদা পল্লদুনা, য়াইফরবা মতমসিগী মনুংদা থবক খল্লবা মীওইশিংগী অনৌবা পুন্সিগী ‘শ্রী গনেশ’ অমা ঙসিগী থৌওং অসিনা ওইরিবনি হায়না প্রধান মন্ত্রীনা হায়খি। “ভগ্বান গনেশ হায়বসিদি মায় পাকপগী ইশ্বরনি”, থবক খল্লবা মীওইশিংনা মশাগী সর্ভিস্তা থৱাই য়াওবনা লৈবাক অসিনা মশাগী পান্দম ফংবদা তেংবাংগনি হায়বগী থাজবগা লোয়ননা প্রধান মন্ত্রীনা হায়খি।
লৈবাক অসিনা হৌজিক পুৱারী ওইরবা মায় পাকপা কয়া উবা ফংলি হায়না প্রধান মন্ত্রীনা হায়খি। লৈবাক্কী অপুনবা মীশিংগী তংখায়বু মপাঙ্গল হাপখ্রবা নারিশক্তি বন্দন অভিয়ানবুসু মহাক্না পনখি। “চহি 30দগী পন্দুনা লৈরক্লবা নুপীগী ফম খাকপগী হীরম অসিবু হাউস অনিমক্না রেকোর্দ ওইরবা ভোত মশিং ফংদুনা অয়াবা পীখ্রে। ৱারেপ অসি অনৌবা পার্লিয়ামেন্তকী অহানবা সেসন্দা লৌখিবনি। মরম অদুনা, মসিনা অনৌবা পার্লিয়ামেন্ত অসিদা পাংথোকপা লৈবাক্কী অনৌবা খোঙথাং অমা ওইরি”, প্রধান মন্ত্রীনা মিৎয়েং চঙখি।
নৌনা থবক খল্লবশিংগী মরক্তা নুপীশিংনা মশিং য়াম্না য়াওরিবা অসিবু শকখঙলদুনা, প্রধান মন্ত্রীনা ঐখোয়গী লৈবাক্কী ইচানুপীশিংনা সেক্তর খুদিংদা মশাগী শক্তাক শেম্লি হায়না ফোংদোকখি। “ঐখোয়গী নারিশক্তিগী মায় পাকপশিংদা ঐহাক্না চাউথোকচরি অমসুং মখোয়গী শাহৌগীদমক্তা অনৌবা থোঙ কয়া হাংদোকপা হায়বসি সরকারগী পোলিসীনি”, মহাক্না হায়খি। সেক্তর অমা হেক্তদা নুপীনা শরুক য়াবা মতমদা সেক্তর খুদিংদা অফবা অওনবা কয়া লাকই হায়বা ৱাফম্বু প্রধান মন্ত্রীনা শকখঙখি।
প্রধান মন্ত্রীনা অনৌবা ভারতকী অচৌবা অপাম্বশিংগী খুদম পীরদুনা অনৌবা ভারত অসিগী মঙলান্দি য়াম্না ৱাংই হায়না মহাক্না হায়খি। “ভারতনা ইং 2047 ফাওবগী মনুংদা চাউখৎপা লৈবাক অমা ওইগনি হায়বগী ৱারেপ লৌখ্রবনি”, প্রধান মন্ত্রীনা হায়খি। মথংগী চহি খরগী মনুংদা, লৈবাক অসিনা মালেমগী খ্বাইদগী অহুমশুবা চাউবা শেন্মিৎলোন ওইরগনি, মসিগীদমক্তা ইমপ্লোয়ীশিংনা লাক্কদৌরিবা মতমশিংদা য়াগদৌবা থৌদাং য়াম্না লৈগনি হায়না মহাক্না মীয়ামগী পুক্নিং চীংশিনখি। মখোয়না ‘মীয়াম্না মাঙদা’ হায়বা ৱাখল্লোন ইনগদবনি হায়না মহাক্না হায়খি। ঙসিগী থবক খল্লবা মীওইশিংদি তেক্নোলোজীগা শাগোন্নদুনা চাউরকপনি হায়বা ৱাফম থম্লদুনা, প্রধান মন্ত্রীনা মখোয়না মশাগী থবক অমসুং লৈঙাকপগী থৌওং হেন্না ফগৎহনবদা তেক্নোলোজী শিজিন্নসি হায়না থমখি।
প্রধান মন্ত্রীনা লৈঙাকপগী থৌওংদা তেক্নোলোজী শিজিন্নবগী মতাংদা মখা তানা পাউদম্লদুনা, মহাক্না ওনলাইন্দা রেল তিকেত রিজর্বেসন তৌবা, আধার কার্দ, দিজিলোক্কর, e-kyc শিজিন্নদুনা চে-চাং শেন্নবা লুবগী থৌওং হন্থহনবা, গ্যাস বুক তৌবা, বিল থীবা, DBT অমসুং দিজিয়াত্রাগী মতাংদা পনখি। “তেক্নোলোজীনা শেঞ্জা থুমজা মুত্থৎলে, ক্রেদিবিলিতী হেনগৎহল্লে, কমপ্লেক্সিতী হন্থহল্লে অমসুং নুংঙাইবা হেনগৎহল্লে”, প্রধান মন্ত্রীনা হায়রদুনা নৌনা থবক খল্লবশিংনা মাইকৈ অসিদা মখা তানা চঙশিন্নবা হায়খি।
হৌখিবা চহি 9দা, সরকারগী পোলিসীশিং অসিদি অনৌবা ৱাখল্লোন, লেপ্তনা য়েংশিনবা, মিসন মোদতা থবক পাংথোকপা অমসুং মীয়াম্না শরুক য়াবগী মতৌদা য়ু্ফম ওইবনি, মসিনা মশক নাইরবা পান্দম কয়া ফংনবা লম্বী য়াৎলে হায়না প্রধান মন্ত্রীনা হায়খি। প্রধান মন্ত্রীনা স্বচ্ছ ভারত অমসুং জল জীবন মিসনগুম্বা কেম্পেনগী খুদম পীরদুনা, সেচ্যুরেসন ফংবগী পান্দমগা লোয়ননা সরকারনা মিসন মোদতা থবক পায়খৎপগী থৌওংদা মীয়ামগী পুক্নিং চীংশিনখি। লৈবাক শিনবা থুংবদা পায়খৎলিবা প্রোজেক্তশিং অসি লেপ্তনা য়েংশিল্লি হায়না মহাক্না পাউদম্লদুনা প্রধান মন্ত্রী মশামক্না শিজিন্নরিবা প্রগতী প্লেতফোর্মগী খুদম পীখি। সরকারগী স্কিমশিংবু গ্রাউন্দ লেভেল ফাওবদা নীংথিনা পায়খৎপগী খ্বাইদগী চাউবা থৌদাংদি সরকারগী থবক তৌরিবা মীওইশিংগীনি হায়না মহাক্না হায়খি। নহা লাখ কয়া অমনা সরকারগী থবক্তা চঙলক্লবা মতমদা, পোলিসীবু থবক্তা ওন্থোকপগী থৌওংদা খোঙজেল য়াঙখৎলকই, পাক শন্না পাংথোকপা ঙমহল্লি হায়না মহাক্না ফোংদোকখি। মসিনা অমুক মরম ওইরগা, গবর্নমেন্ত সেক্তরগী মপান্দা থবক হেন্না লৈহল্লি অমসুং থবক পীবগী অনৌবা ফ্রেমৱর্ক অমসু শেমগৎপা ঙমহল্লি হায়না মহাক্না মখা তাখি।
প্রধান মন্ত্রীনা GDPগী গ্রোথ অমসুং পোত্থোক পুথোকপা অমদি একপোর্তকী চাং য়াম্না ৱাংখৎলক্লিবা অসিগী মতাংদা ঙাংবদা, মোদর্ন ইনফ্রাস্ত্রকচরদা মমাংদা অমুক্তা পাংথোকখিদ্রিবা মওংদা ইনভেস্ত তৌরিবা অসিগী মতাংদা পনখি। অনৌবা মতিক কয়া উৎলক্লিবা রিন্যুএবল ইনর্জী, ওর্গানিক ফার্মিং, দিফেন্স অমসুং তুরিজমগুম্বা সেক্তরগী মতাংদসু মহাক্না ৱা ঙাংখি। ভারতকী আত্মানির্ভর অভিয়ান্না মোবাইল ফোন্দগী এয়রক্রাফ কেরিয়র, অমসুং কোরোনা ভেক্সিন্দগী ফাইতর জেৎ ফাওবগী লমদা অপাম্বা মহৈ উবা ফংলে। অনৌবা খুদোংচাবা কয়া নহাশিংগী মরক্তা ঙসিদি হাংদোক্লে হায়না মহাক্না হায়খি।
অমৃত কালগী মথংগী চহি 25 অসিনা লৈবা অমসুং নৌনা থবক খল্লবা মীওইশিংগী পুন্সিদা কয়া য়াম্না মরু ওইবগে হায়বা প্রধান মন্ত্রীনা অমুক্কা হন্না নীংশিংখি। মখোয়না তীমৱর্ক্তা খ্বাইদগী অহেনবা মিৎয়েং চঙগদবনি হায়না মহাক্না হায়খি। G20না ঐখোয়গী চৎনবী, ৱারেপ অমসুং মীথুংলেনগী সেবা তৌবগী থৌরম অমা ওইখ্রে হায়না প্রধান মন্ত্রীনা হায়খি। মসিগী মায় পাকপা অসিদি পব্লিক অমসুং প্রাইভেতকী তোঙান-তোঙানবা বিভাগশিংগী মায় পাকপনি। মীপুম খুদিংনা G20না মায় পাক্নবগীদমক্তা তীম অমা ওইনা থবক তৌমিন্নখি। “ঙসিগী নুমিৎ অসিদগী অদোম খুদিংসু সরকারগী থবক তৌবা থৌমীশিংগী তীম ইন্দিয়াগী শরুক অমা ওইরকপা অসিদা ঐহাক্না য়াম্না নুংঙাইবা ফাওই”, প্রধান মন্ত্রী মোদীনা হায়খি।
নৌনা থবক খল্লবশিংনা মখোয়গী সরকারগা হকথেংননা থবক তৌমিন্নবগী খুদোংচাবা ফংগনি হায়রদুনা, মখোয়গী মহৈ তাশিনবগী খোঙচৎ মখা চত্থবীয়ু অমসুং মশাগী অপাম্বা লমদা লৈরিবা মখোয়গী লৌশিং হেনগৎহন্নবা iGOT কর্ময়োগী পোর্তেল শিজিন্নবীয়ু হায়না প্রধান মন্ত্রীনা হায়খি। প্রধান মন্ত্রীনা মহাক্কী ৱারোল লোইশিল্লদুনা, থবক ফংলবা অমসুং মখোয়গী ইমুংবু থাগৎপা ফোংদোক্লদুনা মথংগী চহি 25 অসিদা চাউখৎপা লৈবাক অমা ওইহন্নবা মখোয়না ৱারেপ লৌবীয়ু হায়খি।
বেকগ্রাউন্দ
রোজগার মেলা অসি লৈবাক্কী মফম 46তা পাঙথোকখি। রিক্রুত্মেন্ত অসি থৌরাং অসিবু শৌগৎপা কেন্দ্র সরকারগী বিভাগ অমসুং রাজ্য সরকার/য়ু.তি.শিংদা পাক শন্না পাঙথোক্লি। লৈবাক অসিগী মফম কয়াদগী খল্লক্লবা অনৌবা রিক্রুতশিংনা দিপার্ত্মেন্ত ওব পোস্ত, ইন্দিয়ন ওদিত এন্দ একাউন্তস দিপার্ত্মেন্ত, দিপার্ত্মেন্ত ওব এতোমিক এনর্জী, দিপার্ত্মেন্ত ওব রেভিন্যু, দিপার্ত্মেন্ত ওব হাইয়র এজুকেসন, ঙাকশেল মন্ত্রালয়, হকশেল অমসুং য়াইফ-য়ুম্বাল মন্ত্রালয় অমসুং অতৈ কয়া য়াওনা তোঙান-তোঙানবা মন্ত্রালয়/বিভাগশিংদা চঙগনি।
রোজগার মেলা অসি প্রধান মন্ত্রীনা থবক পীনবগীদমক খ্বাইদগী চাউনা থমখিবা মরুওইবা পান্দম ফংনবগী মায়কৈদা চঙশিল্লিবা খোঙথাং অমনি। রোজগার মেলা অসিনা মখা তানা নহাশিংদা থবক পীনবা হোৎনবদা অমসুং মখোয়বু মশানা মশাবু শক্তি লৈহন্নবা অমসুং লৈবাক্কী চাউখৎ থৌরাংদা শরুক য়াবা ঙমজনবা মরুওইবা পোৎলম অমা ওইরি।
নৌনা ইন্দক্ত তৌরবা এপ্পোইন্তীশিং অসিনা মখোয় মশানা মশাবু 'এনিৱেয়র এনি দিভাইস' লর্নিং ফোর্মেতকীদমক ই লর্নিং কোর্স 680 হেন্না ফংহল্লিবা iGOT কর্ময়োগী পোর্তেলদা ওনলাইন মোদ্যুল অমা ওইরিবা কর্ময়োগী প্ররম্বগী খুত্থাংদা ত্রেন তৌজবা য়াবগী খুদোংচাবা ফংলি।
