প্রধান মন্ত্রী শ্রী নরেন্দ্র মোদীনা কোচি-মেঙ্গলুরু নেচরেল গ্যাস পাইপলাইন লৈবাক মীয়ামগী মফমদা ঙসি ভিদিও কন্ফরেন্সিংগী খুত্থাঙদা কত্থোকখ্রে। থৌরম অসিনা ‘ৱন নেসন ৱন গ্যাস গ্রীদ’ শেমগৎপগী মায়কৈদা মরুওইবা মায় পাকপগী য়ুম্বী অমা ওইরে। কর্নাতকা অমসুং কেরলাগী গভর্নর অমসুং মুখ্য মন্ত্রীশিংনা পেত্রোলিয়ম অমসুং নেচরেল গ্যাসকী কেন্দ্র মন্ত্রীগা লোয়ননা থৌরমদুদা শরুক য়াখি।
থৌরমদুদা ৱা ঙাঙলদুনা প্রধান মন্ত্রীনা নুমিৎ অসিবু কেরলা অমসুং কর্নাতকাবু নেচরেল গ্যাস পাইপলাইন্না শমজিন্নহনবগা লোয়ননা স্তেত অনিসিগী মীয়ামগীদমক মরুওইবা মায় পাকপগী য়ুম্বী অমনি হায়না শিংথাখি। স্তেত অনিসিগী শেন্মিৎলোন চাউখৎপদা পাইপলাইন অসিনা অফবা শাফম অমা পীরগনি হায়না মহাক্না হায়খি। মরোমদোম লেপচবা ভারত অমা ফংনবগীদমক গ্যাসতা য়ুম্ফম ওইবা শেন্মিৎলোন খোঙজেল য়াঙনা পাকথোক চাউথোকহনবা হায়বসি মরুওই হায়রদুনা মহাক্না ৱাফম অসিমক লৈঙাক অসিনা ‘ৱন নেসন ৱন গ্যাস গ্রীদ’কী পুরকপগী মরম্নি হায়বা ৱাফম থমখি।
পাইপলাইনগী কান্নবশিং পল্লদুনা মহাক্না হায়খিবদা পাইপলাইন অসিনা স্তেত অনিমক্কী মীওইশিংগী কোম্না হিংবগী চাং হেনগৎহল্লগনি অমদি স্তেত অনিসিগী লায়রবা, মরক্কী থাক্তা লৈরিবা মীওইশিং অমদি ওন্ত্রপ্রিন্যুরশিংগী চাদিং হন্থহল্লগনি। পাইপলাইন অসিনা ময়োল্লম কয়াদা গৃআস দিস্ত্রিব্যুসন সিস্তেমগী য়ুম্ফম ওইরগনি অমদি হায়রিবা ময়োল্লমশিং অসিদা সি.এন.জি.দা য়ুম্ফম ওইবা চত্থোক চৎশিনগী সিস্তেমগী য়ুম্ফমসু ওইগনি। পাইপলাইন অসিনা মেঙ্গলোর রিফাইনরীদা তরু তরুবা ইনর্জী পীগনি অমদি স্তেত অনিমক্তা পোলুসন হন্থহনবদা অচৌবা থৌদাং লৌগনি। পোলুসন হন্থহনবনা উ পাম্বী মিলিয়ন কয়া থাবগা মান্ননা ঈশিং নুংশিৎকী ফীভমদা কান্নবা পীগনি অমদি মসিনা মীয়ামগী হকশেলগী ফীভম ফগৎহন্দুনা হকশেলগা মরী লৈনবা চাদিং হন্থহনগনি। পোলুসন হন্থবা অমদি নুংশিৎ নুংশা শেংবনা ময়োল্লমশিং অসিদা লমকোয়বশিংগী পুক্নিং হেন্না চিংশিনগনি। পাইপলাইন তিংখিবা অসিনা মেন দে মিলিয়ন ১.২গী থবক পীখি অমদি মসিনা থবক হৌরবা মতুংদা হার, পেত্রোকেমিকেল অমসুং পৱার সেক্তরদা মতেং ওইনদুনা থবক পীবগী অমদি মশান মশাবু থবক পীজবগী অনৌবা ইকোসিস্তেম অমা শেমগৎলক্কনি। মসিনা ভারতবু লৈবাকসিগি করোর লিশিং কয়াগী ফোরেন এক্সচেঞ্জ তৌবদগীসু কনগনি হায়না মহাক্না ফোঙদোকখি।
মালেম শিনবা থুংবদা লৈরিবা এক্সপর্তশিংনা ২১শুবা চহীচাসিদা কনেক্তিভিতী অমসুং তরু তরুবা ইনর্জীদা অহেনবা মীৎয়েঙ থম্বা লৈবাকশিংনা অচৌবা চাউখৎপগী পন্দোল য়ৌবা ঙমগনি হায়ৈ হায়না প্রধান মন্ত্রীনা ফোঙদোকখি। লৈবাকসিদা কনেক্তিভিতীগী লমদা হৌজিক পায়খৎলিবা থবক্কী খোঙজেল অসি মমাঙগী দিকেদশিংদা অমুক্তা উখিদ্রি হায়না মহাক্না হায়খি। মহাক্না মখা তাখিবদা ২০১৪গী মমাঙ চহী ২৪দা নেচরেল গ্যাস পাইপলাইন কিলোমিতর লিশিং ১৫ তিংখি। অদুবু হৌজিক্তি গ্যাস পাইপলাইন কিলোমিতর লিশিং ১৬গী থবকশিং হৌজিক পায়খৎলি অমদি মথঙগী চহী ৫-৬সিদা লোইশিল্লগনি। সি.এন.জি. ফ্যুল স্তেসন মশিং হেনগৎলক্লিবা অমদি লৈঙাকসিনা পীরিবা পি.এন.জি. কনেক্সন অমসুং এল.পি.জি. কনেক্সনশিং মমাঙদা হান্না উখিদ্রিবা মওংদনি হায়না মহাক্না পনখি। অসুম্না কনেক্সন মশিং হেনগৎপসিনা কেরোসিন ৱাৎপগী খুদোংচাদবা হন্থহল্লে অমদি স্তেত অমসুং য়ুনিয়ন তেরিতরী কয়া অমনা মখোয় মশাবু কেরোসিন শীজিন্নদ্রবা স্তেতশিংনি হায়না লাউথোকখ্রে হায়না মহাক্না হায়খি।
প্রধান মন্ত্রীনা হায়খিবদা ২০১৪দগী হৌরগা লৈঙাক অসিনা এক্সপ্লোরেসন অমসুং প্রদক্সন, নেচরেল গ্যাস, মার্কেতিং অমসুং দিস্ত্রিব্যুসন য়াওনা থাউ অমসুং গ্যাসকী সেক্তর পুম্বদা তোঙান তোঙানবা অহোংবা কয়া পুরকখ্রে। লৈঙাক অসিনা ‘ৱন নেসন ৱন গ্যাস গ্রীদ’ পুরক্তুনা অকোয়বগী ফীভমদা কান্নবা কয়া লৈরিবা গ্যাসতা য়ুম্ফম ওইবা শেন্মিৎলোন অমা পুরক্নবা থৌরাং তৌরি হায়না মহাক্না লাউথোকখি। ভারতকী ইনর্জী বাস্কেত্তা নেচরেল গ্যাসকী শরুক চাদা ৬তগী চাদা ১৫দা হেনগৎহন্নবা থৌরাং কয়া লৈঙাক অসিনা য়াৎলি। “জি.এ.আই.এল.গী কোচি-মেঙ্গলুরু নেচরেল গ্যাস পাইপলাইন লৈবাক মীয়ামদা কত্থোক্লিবা অসি ৱন নেসন ৱন গ্যাস গ্রীদকী মায়কৈদা চঙশিল্লিবা ঐখোয়গী খোঙচৎকী শরুক অমনি। তরু তরুবা ইনর্জী হায়বসি হেন্না ফবা তুংগীদমক মরু ওই। পাইপলাইন অসিনা তরু তরুবা ইনর্জী ফংহনবদা মতেং ওইগনি,” হায়না প্রধান মন্ত্রীনা হায়খি।
প্রধান মন্ত্রীনা ফোঙদোকখিবদা লৈবাকসিগী তুংগী ইনর্জীগী মথৌ তারক্কদবশিংগীদমক শেম শাননবা থৌরাং পায়খৎলি। হায়রিবা পান্দম অসি ফংনবগীদমক নাকল অমদা নেচরেল গ্যাসতা মায় ওনশিল্লি অদুগা নাকল অমরোমদনা তোঙাত তোঙানবা ইনর্জীগী মচাকশিংসু তাশিল্লি। ৱাফম অদুগী খুদম ওইনা গুজরাত্তা পায়খৎনবা থৌরাং তৌরিবা মালেমগী খ্বাসদগী চাউবা রিনিউএবল ইনর্জী প্লান্ত পনখি অমদি বাইওফ্যুলগী মতাঙদসু ৱাফম কয়া থমখি। মীৎয়েং তারিবা ময়ামদা মহাক্না পাউদমখিবদা চেঙ অমসুং চুদগী ইথানোল শুংনবা পুকচেল শেংনা হোৎনরি। চহী ১০গী মনুংদা পেত্রোলদা ইথানোল চাদা ২০ য়ানশিন্নবা পান্দম থমখ্রে। লৈঙাক অসিনা মীপুম খুদিংদা অহোঙবা, পোলুসন লৈতবা থাউ অমসুং ইলেক্ত্রিসিতী পীননবা খোঙফম চেৎনা লেপ্লি হায়না প্রধান মন্ত্রীনা হায়খি।
সমুদ্র খোঙবালগী স্তেত অনিদুগী মতাঙদা ৱা ঙাঙলদুনা প্রধান মন্ত্রীনা খোঙজেল য়াঙবা অমদি খল কায়হন্দবা সমুদ্র খোঙবালগী চাউখৎ থৌরাংগী মতাঙদা লৈরিবা মহাক্কী মঙলান ফমখি। কর্নাতকা, কেরলা অমসুং অতৈ খা ভারতকী সমুদ্র খোঙবালগী স্তেতশিংদা ব্লু ইকনমী চাউখৎহন্নবা পুম্নমক শুপচিল্লবা থৌরাং অমা হৌজিক পায়খৎলি। ব্লু ইকনমী অসি আত্মনিরভর ভারতকী মরুওইবা হৌরকফম অমা ওইগদৌরিবনি। হিথাংফমশিং অমসুং সমুদ্র খোঙবালগী লম্বীশিং মল্তি-মোদেল কনেক্তিভিতীদা মীৎয়েঙ থমদুনা শমজিন্নবগী থবক চঙশিল্লি। ঐখোয়গী সমুদ্র খোঙবালগী মফমশিং কোম্না হিংবগী অমদি কোম্না লল্লোন ইতিক তৌবগী ফিদম্নফম ওইরবা মফম ওইনা শেমগৎনবা ঐখোয়না থবক পায়খৎলি হায়না প্রধান মন্ত্রীনা ফোঙদোকখি।
প্রধান মন্ত্রীনা সমুদ্রগী লনদা তাংদুনা লৈবখক্তা নত্তনা হায়রিবা লনসিবু ঙাক শেল্লিবা সমুদ্র খোঙবালদা তারিবা ঙামী কাঙলুপকী মতাঙদসু ৱাফমশিং ফোঙদোকখি। মখোয়গী মতাঙদা লৈঙাক অসিনা সমুদ্র খোঙবালগী ইকোসিস্তেমবু ঙাকথোক্নবা অমদি হেন্না মশক থোকহন্নবা খোঙথাঙ কয়া লৌখৎলে। ঙামীশিংবু অরুবা সমুদ্রগী ইরোন্নুংদগী ঙা ফাবা, তোখাইবা ফিসরী দিপার্তমেন্ত, এক্বাকলচরদা থবক চঙশিল্লিবা মীওইশিংদা অরায়বা লোন অমসুং কিসান ক্রেদিত কার্ত পীবনচিংবা খোঙথাঙশিংনা ঙামী মীয়াম অমসুং ওন্ত্রপ্রিন্যুরশিংদা চাউনা মতেং ওইরি।
প্রধান মন্ত্রীনা কেরলা অমসুং কর্নাতকাগী ঙামী লাখ কয়াদা হকথেংননা কান্নবা পীগদবা হন্দক্তা হৌদোকখিবা করোর লিশিং ২০গী মতস্য সমপদ য়োজনাগী মতাঙদসু ৱা ঙাঙখি। ভারতনা ঙাগা মরী লৈনবা এক্সপোর্তকী লমদা খোঙলৈ থুনা খুমাঙ চাওশিল্লক্লি। ভারতপু ক্বালিতী প্রোসেস সী-ফুদ হব অমা ওন্থোক্নবা খোঙথাঙ পুম্নমক লৌখৎলি। সীৱীদকী হেনগৎলক্লিবা দিমান্দ অসি পীননবা লৌমীশিংদা সীৱীদ থাননবা পুক্নিং থৌগত্তুনা ভারতনা অচৌবা থৌদাং লৌবা য়াই।
