জেনেরেল এসেমব্লীগী ইকায়খুম্নরবা প্রসিদেন্ত। য়ুনাইতেদ নেসন্সকী ৭৫সুবা মপোক কুমওনদা ভারতকী মীওই বিল্লিয়ন ১.৩গী মহুৎশীন্দুনা মেম্বর লৈবাক খুদিংমক থাগৎপা ঐনা পাম্মী। য়ুনাইতেদ নেসন্স লিংখৎখিবা লৈবাকশিংগী মনুংদা লৈবাক অমা ওইবদা ভারতনা চাউথোকচবা পোক্লি। পুৱারি ওইরবা থৌরম অসিদা, ভারতকী মীওই বিল্লিয়ন ১.৩গী অনিংবশিং ফোঙদোক্নবা মালেমগী ফিদা অসিদা ঐ শরুক য়ারে।
য়োর এক্সলেন্সী
ঙসিগী মালেম অসিগা ১৯৪৫গী মালেমদা ফজনা খেন্নরে। মালেমগী ফিবম, লন-থুমশিং-ফংফমশিং, ৱাথোকশিং-পাম্বৈশিং;খুদিংমক তশেংনা তোঙাল্লে। হায়রিবা মতম অদুদা লৈখিবা ফিবমশিং অদুগা চুন্নবা, মালেমগী য়াইফনবা পান্দমদা ইন্সতিতুসন অসি শেমখিবনি। ঙসিদি ঐখোয় তশেংনা ইতোপ-তোপ্পা মতম অমদা লৈরে। ২১সুবা চহিচা অসিদা, ঐখোয়গী হৌজিক লৈরিবা মতম অসিদা দরকার ওইরিবা অমসুং শিংনবশিং অমসুং ঐখোয়গী তুংদা লাক্কদবা ফিবমশিং অসি হৌখ্রবা মতম অদুদগী তশেংনা খেন্নরে।
মরম অদুনা, ঙসি মালেমগী মীয়াম্না মরুওইবা ৱাহং অমা মায়োক্নরে: ১৯৪৫গী ফিবমশিং অদু য়েংলগা শেমখিবা ইন্সতিতুসন অসিগী মচৎশিং ঙসি ফাওবা চুনরিবরা? করিগুম্বা চহিচা কয়া অহোংবা লাকখ্রবসু অমসুং ঐখোয়দি হোংদ্রি, মদুদি অহোংবা পুরক্নবা থৌনা অদু শোন্থরে। করিগুম্বা ঐখোয়না য়ুনাইতেদ নেসন্সকী হৌখিবা চহি ৭৫ অসি নৈনরবদি, ঐখোয়না মাইপাকপা কয়া উবা ফংলে।
অদুবু মসিগা লোয়ন্না, য়ুনাইতেদ নেসন্স হেনগৎনা য়েংবগী তঙাইফদবা লাকপা থৌদোক কয়া লৈখ্রে। ঐখোয়না মাইপাক্না মালেমগী অহুমশুবা লাঞ্জাউ শোক্নহন্দ্রে হায়না কনাগুম্বা অমনা হায়গনি, অদুবু ঐখোয়না লাল কয়া অমসুং সিবিল ৱারশিং থিংবদি ঙমদে। তেরোরিস্তশিংনা লান্দারকপা থৌদোকশিংনা মালেম অসি নিকহনখ্রে অমসুং ঈমু-নাইমু তানবা থৌদোকশিং লৈখ্রে। হায়রিবা লালশিং অমসুং খুৎ থারকপা থৌদোকশিংদা লৈখিদ্রবশিং অসি অদোম অমসুং ঐগুম্বা মীওইবা ঙাক্তনি।
মালেম অসি ফহনগদবা অঙাং লিশিং কয়া মতম চাদনা ঐখোয় থাদোক্তুনা চৎখ্রে। মীওই কয়া পুন্সি চুপ্পা তুংশিঞ্জরকপা লন-থুমশিং মাঙখ্রে অমসুং য়ুম লৈতবা রিফুজিশিং ওইরে। হায়রিবা মতমশিং অদুদা য়ুনাইতেদ নেসন্সকী থবকশিং কদাইদা চৎখ্রবগে নৎত্রগা ঙসি পায়খৎলিবা থবকশিং অসি মতিক চারিবরা ? হৌখিবা থা ৮-৯ অসিদা মালেম শীনবা থুংনা কোরোনা লাইচৎ মায়োক্নরি। অপুনবা ওইনা লাইচৎ থেংনরিবা অসিদা য়ুনাইতেদ নেসন্স কদাইদা লৈখ্রবগে? মসিগী মতিক চাবা থবকশিং কদাইদা পাংথোকখ্রবগে?
য়োর এক্সলেন্সী
থবক পাংথোকপদা অওনবা পুরকপা অসি য়ুনাইতেদ নেসন্সকী তঙাইফদবা অমা ওইরে। ভারতনা য়ুনাইতেদ নেসন্সদা থম্লিবা থাজবা অমসুং ইকায়খুম্নবা অসি লাম্বা লৈতে। অদুবু য়ুনাইতেদ নেসন্স মপুংফানা অওনবশিং পুরক্নবা মতম কয়াগী মমাংদগী ভারতকী মীয়াম্না ঙাইদুনা লৈরক্লি। মসিগী অওনবা পুরক্নবা থবকশিং অসিগী অচুম্বা ৱারোইশিন অমা ফংবা ঙমগদরা হায়বা অসিদা ঙসিদি ভারতকী মীয়াম লাংতক্নরে?
য়ুনাইতেদ নেসন্সকী ৱারেপ লৌবগী থবকশিংদগী কয়া য়াম্না কুইনা ভারত নাথৈদুনা থমগনি। মালেমদা খ্বাইদগী চাউবা গনতন্ত্র চৎপা লৈবাক অমনি, মালেমগী অপুনবা মীশিংগী চাদা ১৮ লৈবা লৈবাক অমনি, লোল কয়া অমসুং দাইলেক চা কয়া ঙাংনরিবা লৈবাক অমনি, লাইনিং কয়া লৈরি, ৱাখল্লোল কয়া লৈরি, চহিচা কয়া মালেমগী শেন-থুমদা মাংজিল থাখিবা লৈবাক অমনি অমসুং চহি চা কয়া মপান লৈবাকশিংনা পানখিবা লৈবাকশিংগী মনুংদা অমনি।
য়োর এক্সলেন্সী
ঐখোয়না মপাঙ্গল কনবা মতমদা, ঐখোয়না মালেমদা অৱাবা পীদে; ঐখোয়না শোনবা মতমদা, ঐখোয় মালেমগী পোৎলুম অমা ওইদে।
য়োর এক্সলেন্সী
লৈবাক অমদা লাকপা অহোংবশিং অদুনা মালেমগী য়াম্লবা শরুকশিং অকায়বা পীরবদা লৈবাক অমনা কয়া য়াম্না কুইনা ঙাইদুনা লৈখিগনি?
য়োর এক্সলেন্সী
য়ুনাইতেদ নেসন্সকী ফিদমশিং অসি ভারতকা য়াম্না মান্নৈ অমসুং লৈবাক অসিগী মশাগী ৱাঙুলোনশিংদগী তোঙান্দে। বসুধাইব কুতুমবাকম হায়বদি মালেম অসি ইমুং অমনি হায়রিবা ৱাহৈ অসি য়ুনাইতেদ নেসন্সকী হোল অসিদা তোইনা খোন্থাং য়ৈদুনা লৈরি। ঐখোয়না মালেম পুম্বা অসি ইমুং অমনি হায়না লৌরি। মসি ঐখোয়গী কলচর, ৱাখল্লোল অমসুং লমচৎকী শরুক অমনি। য়ুনাইতেদ নেসন্সদসু ভারতনা মতম পুম্নমক্তা মালেমগী য়াইফনবা মিৎয়েং চঙলি। শান্তি থম্নবা মিসন ৫০ রোমদা মসিগী থৌনা ফরবা লান্মীশিং থারিবা লৈবাক অমনি ভারত। শান্তি থম্নবা মিসনশিংদা থৌনা ফরবা লান্মী মশিং য়াম্না শিখিবা ভারতনি। ঙসি ভারতমচা খুদিংমক্না য়ুনাইতেদ নেসন্সকী থবকশিংদা মতেং পাংবা পাম্লি অমসুং য়ুনাইতেদ নেসন্সদা ভারতকী থৌদাং হেনগৎহনবা পাম্লি।
ইকায়খুম্নরবা চিয়রমেন
ভারতনা ওক্তোবর ২ অসি ‘মালেমগী অহিংসা নুমিৎ’ অমসুং জুন ২১দা ‘মালেমগী য়োগা নুমিৎ’ পাংথোকপা ভারতনা হৌদোকখি। ভারতনা হোৎনদুনা কোলিএসন ফোর দিজাস্তর রিসিলিয়েন্ত ইনফ্রাস্ত্রকচর অমসুং ইন্তরনেসনেল সোলার এল্লাইন্স থবক ওইনা পাংথোক্লে। ভারতনা মতম পুম্নমক্তা মীওইবা খুন্নাইগী য়াইফনবা খল্লি অমসুং লৈবাক মশা খক্তগী য়াইফনবা খক খন্দে। মসিগী ৱাঙুলোন অসি মতম পুম্নমক্তা ভারতকী থৌশিলশিংগী ইথিল ওইরি। মসিগী ৱাখল্লোল অসি ভারতকী য়ুম্লোন্নবনা অহানবা থৌশিল অমসুং এক্ত ইস্ত পোলিসিদা মসি উবা ফংগনি। লমদম অসিগী ঙাক-শেন অমসুং চাউখৎ-থৌরাং অমসুং ইন্দো-পেসিফিক লমদমদা ঐখোয়গী মিৎয়েং অসিদা মসিগী ফিবম অসি উবা ফংগনি। লৈবাক অমদা ভারতনা উৎলিবা মরুপ-মপাং ওইবা মওং অসি কনাগুম্বা অমগী মায়োক্তা লৈবা নত্তে। ভারতনা মসিগী মরুপ-মপাং ওইবগী মরী মপাঙ্গল কনখৎহনবা মতমদা, মসিনা মরুপ ওইরিবা লৈবাক অদু ভারতকী মখা পোন্নবা হিংনবা ফত্তবা ৱাখল অমতা লৈতে। ঐখোয়গী চাউখ-থৌরাংগী লৌশিং পীথোকপদা ঐখোয় কৈদৌঙৈদা চিংনবা লৈতে।
য়োর এক্সলেন্সী
লাইচৎকী অৱাবা তারবা মতম অসিদা ফাওবা লৈবাক ১৫০ হেনবদা ভারতকী ফর্মা ইন্দস্ত্রিনা তঙাইফদবা হিদাক-লাংথকশিং থাখ্রে। মালেমদা তিকা খ্বাইদগী য়াম্না পুথোকপা লৈবাক অমা ওইনা, মসিগী অৱাবা অসি থেংনবদা মীওইবা খুদিংমক মতেং পাংনবা ভারতকী তিকা পুথোকপা ঙম্বগী থৌনা অসি মপুংফানা শীজিন্নগনি হায়না ঐনা ঙসি মালেমগী মীয়ামদা থাজবা অমা পীবা পাম্মি। হৌজিক ভারত্তা অমসুং ঐখোয়গী য়ুম্লোন্নবশিংদা ঐখোয়না ফেজ ৩গী ক্লিনিকেল ত্রাইয়েলশিং পাংথোক্লি। তিকাশিং ফংহন্নবা লিদুনা থম্নবা খুদোংচাবশিং অমসুং কোল্দ চেনগী থবকশিংদা ভারতনা লৈবাক খুদিংমক মতেং পাংগনি।
য়োর এক্সলেন্সী
মথং চহিগী জনুৱারিদগী, সেকুরিতি কাউন্সিলদা নন-পর্মনেন্ত মেম্বর অমা ওইনা ভারতনা থবক পাংথোক্লগনি। ভারত্তা মসিগী থাজবা অসি শীন্নখিবা ঐখোয়গী মরুপ লৈবাকশিংদা ঐনা ঐগী থাগৎপা ফোঙদোকচরি। মালেম অসি য়াইফনবা ঐখোয়না খ্বাইদগী চাউবা গনতন্ত্র চৎপা লৈবাক অমগী মিংচৎ অমসুং হৈশিংবা অদু শীজিন্নগনি।ঐখোয়গী লম্বীদি মীওইবা য়াইফনবদগী মালেম য়াইফনবা লম্বীদা চৎকনি। শান্তি, সেকুরিতি অমসুং নুংঙাই-য়াইফবা শৌগৎনবা ভারতনা মতম পুম্নমক্তা ৱা ঙাংগনি। মীওইবা খুন্নাই, মীওইবগী মগুনশিংগী য়েক্নবশিং-তেরোরিজম, আইন্না য়াদবা খুৎলায়শিং নারোন্দা ললোনবা, দ্রগশিং অমসুং লান্না শেন শান্নবশিংগী মায়োক্তা ভারতনা চিংনবা লৈতনা লাউগনি। ভারতকী কলচর, চৎনবীশিং অমসুং চহি লিশিং কয়া শুরবা হৈশিংবা কয়া অসি চাউখৎলক্লিবা লৈবাকশিংগী য়াইফনবা শীজিন্নগনি। অকা-অকুম নাইবা ভারতকী চাউখৎ-থৌরাংগী খোঙচৎ অসিনা মালেমগী য়াইফনবা লম্বীশিং থৌনা পীগনি।
য়োর এক্সলেন্সী
হৌখিবা চহি খর অসিদা রিফোর্ম-পর্ফোম-ত্রান্সফোর্মগী লাইৱা শীজিন্নদুনা লৈবাক অসিগী মীওই মিল্লিয়ন কয়াগী পুন্সিদা অহোংবা পুরক্নবা ভারতনা অকনবা থবকশিং পায়খৎলে। হায়রিবা থবকশিং অসি মালেমগী লৈবাক কয়া কান্নবা পীগনি। চহি ৪-৫গী মনুংদা মীওই মিল্লিয়ন ৪০০ বেঙ্কগা শম্নবা অসি অরাইবা থবক অমা নত্তে। মসি পাংথোকপা ঙম্মি হায়বা ভারতনা উৎলে। চহি ৪-৫গী মনুংদা মীওই মিল্লিয়ন ৬০০ লমহাংদা খোঙহামহনদবা অসি অরাইবা নত্তে। অদুবু মসি ভারতনা ফংবা ঙম্লে। চহি ২-৩গী মনুংদা মীওই মিল্লিয়ন ৫০০ হেনবদা লেম্না অনা-লায়েংগী থবকশিং ফংহনবা অসি অরাইবা নত্তে। অদুবু ভারতনা মসি পাংথোকপা ঙম্লে। ঙসি ভারত দিজিতেল ত্রান্সসেক্সনগী মাংজিল থাবশিংগী মনুংদা অমা ওইরে। লৈবাক অসিগী মীওই মিল্লিয়ন কয়াদা দিজিতেলগী খুদোংচাবশিং ফংহন্দুনা ঙসি ভারতনা শক্তি পীরে অমসুং অরোন-অথুপ লৈহন্দ্রে। খুঙ্গংগী য়ুমথোং মিল্লিয়ন ১৫০দা তোতি ঈশিং ফংহন্নবা থবক অমা ঙসি ভারতনা পায়খৎলি। লৈবাক অসিগী খুঙ্গং লাখ ৬ ব্রোদবেন্দ ওপ্তিকেল ফাইবর শম্নবা অচৌবা প্রোজেক অমা হন্দক ভারতনা পায়খৎলে।
য়োর এক্সলেন্সী
লাইচৎ মতুংদা “মশাগী ওক্নবা পুথোকপা ভারত”গী পান্দমদা ঐখোয়না থবক পায়খৎপা হৌরে। মশাগী ওক্নবা পুথোকপা ভারত অমা শেমগৎপা অসিনা মালেমগী শেন-থুমদা অচৌবা কান্নবা পীগনি। লৈবাক অসিগী মীওই খুদিংমক্তা স্কিমশিংগী কান্নবা ফংহনবদা মীচং-মীখাই নাইদনা থবক পায়খৎলে। নুপীশিংগী ইন্তরপ্রাইজ অমসুং লুচিংবা য়োকখৎনবা ভারতনা পাক-শন্না থবকশিং পায়খৎলে। ঙসিদি ভারতকী নুপীশিং মালেমদা খ্বাইদগী চাউবা মাইক্রো ফাইনান্স স্কিমগী কান্নবা ফংলবশিং ওইরে। তোলোপ কক্তনা নুপীশিংদা অঙাং উনবগী চয়োল ২৬ ছুতি পীবা লৈবাকশিংগী মনুংদা ভারত অমনি। আইনগী অওনবশিং পুরক্তুনা ত্রান্সজেন্দরশিংগী হকশিং ফংহল্লে।
য়োর এক্সলেন্সী
লৈবাক অসিগী চাউখৎপগী খোঙচৎ অসিদা, ভারতনা মালেমগী তম্বা পাম্মী অমসুং লৈবাক অসিগী থবকশিং মালেমদা পীবা পাম্মী। য়ুনাইতেদ নেসন্সকী ৭৫সুবা মপোক কুমওন অসিদা অমসুং মসিগী মেম্বর লৈবাকশিংনা অচৌবা ইন্সতিতুৎ অসি মগুন অদু ঙাক্কনি হায়বগী থাজবা ঐনা থম্লি। য়ুনাইতেদ নেসন্সকী তংদু-লৈতাবা অমসুং য়ুনাইতেদ নেসন্সকী শক্তি অসি মালেমগী য়াইফনবা তঙাইফদবনি। য়ুনাইতেদ নেসন্সকী ৭৫সুবা মপোক কুমওন অসিদা মালেমগী য়াইফনবা ঐখোয় খুদিংমক কৎথোক্নবা ঐখোয় অমুক হন্না ৱাশক লৌরসি।
অদোম্বু থাগৎচরি
