প্রধান মন্ত্রী শ্রী নরেন্দ্র মোদীনা দিশেম্বর ১১,২০২৪ গী নুংথিল পুং ৪:৩০ রোম তাবদা, ভিদিও কনফরেন্সকী খুৎথাংদা স্মার্দ ইন্দিয়া হেক্কাথোন ২০২৪ গী গ্রান্ত ফিনালেদা নহা ওইরিবা ইন্নোবেতরশিংগা ৱারি শান্নগনি। গ্রান্ত ফিনালে অদুদা মহৈরোয় ১৩০০ হেন্না শরুক য়াগনি। থৌরম অদুদা প্রধান মন্ত্রীনা মীয়ামদা ৱা ঙাংগনি।
দিশেম্বর ১১,২০২৪ দগী লৈবাক শীনবা থুংবগী নোদেল সেন্তর ৫১ দা ৭শুবা স্মার্দ ইন্দিয়া হেক্কাথোন হৌগনি। সোফৱায়র ইদিসন পুং ৩৬ লেপ্তনা পাংথোক্কনি অদুগা হার্দৱায়র ইদিসন্না দিশেম্বর ১১ দগী দিশেম্বর ১৫,২০২৪ ফাওবা মখা চৎথগনি। হৌখিবা ইদিসনশিংগুম, মিনিস্ত্রিশিং নত্ত্রগা দিপার্তমেন্তশিং নত্ত্রগা ইন্দস্ত্রিশিংনা পীবা খুদোংচাদবশিংদা মহৈরোয়শিংগী কাংবুনা থবক তৌগনি নত্ত্রগা জাতিগী ওইনা মরুওইবা হিরমশিংগী থিম ১৭ গী মতাংদা স্তুদেন্ত ইন্নোবেসন কেতেগোরিদা মখোয়গী অনৌবা ৱাখলশিং পীশিনগনি। হায়রিবা সেক্তরশিং অদুদি অনা-লায়েং সপ্লাই চেন অমসুং লোজিস্তিক্স, স্মার্দ তেক্নোলোজিশিং, হেরিতেচ অমসুং কলচর, স্তেনেবিলিতি, লাইরিক-লাইশু অমসুং স্কিল হেনগৎহনবা, ঈশিং, লৌউ-শিংউ অমসুং চীঞ্জাক, নৌবা থোক্লকপা তেক্নোলোজিশিং অমসুং দিজাস্তর মেনেজমেন্তনি।
চহি অসিগী ইদিসনগী য়াম্না নুংঙাইবদা খুদোংচাদবা ৱারোল খরগী মনুংদা ইসরোগী ‘থাগী অমম্বা শরুক্কী মমিশিং হেন্না শেংহনবা’, জল শক্তি মিনিস্ত্রিগী ‘এ.আই, সেতেল্লাইত দেতা, আই.ও.তি অমসুং দাইনামিক্স মোদেলশিং শীজিন্নদুনা খুদক্ত গঙ্গাগী ঈশিংগী ফিবম ওন্নবা থবকশিং পায়খৎপা’ অমসুং অয়ুস মিনিস্ত্রিগী ‘এ.আইগা লোয়ননা স্মার্দ য়োগ মেত অমা পুথোকপা’ য়াওরি।
চহি অসিদা, মিনিস্ত্রিশিং, দিপার্তমেন্তশিং, রাজ্য সরকারশিং, পি.এস.য়ুশিং অমসুং উদ্যোগশিংনা খুদোংচাদবা ৱারোল ২৫০ হেন্না পীশিল্লক্লে। স্মার্দ ইন্দিয়া হেক্কাথোন ২০২৩ দা ৯০০ পীশিল্লকপদগী স্মার্দ ইন্দিয়া হেক্কাথোন ২০২৪ দা ২২৪৭ পীশিল্লক্তুনা, চহি অসিদা লোয়শঙগী থাক্ত ইন্তরনেল হেক্কাথোনশিং পাংথোকপা চাদা ১৫০ হেনগৎলে, হৌজিক ফাওবদা মসিনা খ্বাইদগী চাউবা ইদিসন ওইরে। স্মার্দ ইন্দিয়া হেক্কাথোন ২০২৪ মহৈ লোয়শঙগী থাক্ত তিম ৮৬,০০০ হেনবনা শরুক য়াখি অমসুং জাতি থাক্কী রাউন্দগীদমক মহৈরোয় তিম ৪৯,০০০( তিম অমদা মহৈরোয় ৬ অমসুং মেন্তর ২) রিকমেন্ত তৌখ্রে।
