শংহাই কোওপরেসন ওর্গনাইজেসন (এস.সি.ও.)গী কাউন্সিল ওফ হেদ্স ওফ স্তেতকী মীফমদা শরুক য়ারুনবা ২০১৯গী জুন ১৩-১৪দা ঐহাক বিশকেক (কীর্গীজ রিপব্লিক)তা চৎকনি।
লমদম অসিদা মল্তিলেতরেল, পোলিতিকেল, সেক্যুরিতী ইকোনোমিক অমসুং পিপল-তু-পিপল ইন্তরেক্সন প্রমোৎ তৌবদা ঐখোয়না এস.সি.ও.দা অখন্নবা মরুওইবা পীরি।
চহী অনিগী মমাংদা এস.সি.ও.গী মপুংফাবা মীহুৎ ওইরকপদগী তোঙান তোঙানবা এস.সি.ও. দাইলোগ মেকানিজমশিংদা ভারতনা ইচং থৌনা শরুক য়ারি। ঐখোয়না হৌখিবা চহী অমদা কীর্গীজ রিপব্লিক্কী লুচিং মখাদা মপুংফানা মতেং পীরি।
মীফম অসিদা মালেমগী সেক্যুরিতীগী ফিভম, মল্তিলেতরেল ইকোনোমিক কোওপরেসন, পিপল-তু-পিপল একচেঞ্জশিং অমদি অন্তরজাতি অমসুং রিজনেলগী মরুওইবা মকোকথোংবা ৱাফমশিং খন্নরবা য়াই। মীফম অসিদগী নাথৈরগা তোঙান তোঙানবা লুচিংবশিংগা লৈবাক অনিগী ওইবা মীফম পাংথোক্নবসু ঐহাক্না থৌরাং তৌরি।
এস.সি.ও.গী মীফম লোইরবা মতুং কীর্গীজ রিপব্লিক্কী রাস্ত্রপতিগী বার্তন্দা ঐহাক্না ২০১৯গী জুন ১৪দা কীর্গীজ রিপব্লিক্তা লৈবাক অনিগী ওফিসিয়েল খোংচৎ অমসু লৈরি।
পুৱারী অমসুং সভ্যতাগী মরীনা পুন্দুনা থম্লিবা ভারত অমসুং কীর্গীজ রিপব্লিক্না ত্রেদিস্নেলগী ওইবা মওং মতৌ অমসুং মরূপ ওইবগী মরীশিং শেয়র তৌরি। হৌজিক হৌজিকমক ঐখোয়গী মরী অসি ঙাকশেল, সেক্যুরিতী, ত্রেদ অমসুং ইনবেস্তমেন্ত য়াওনা লৈবাক অনিগী ওইবা তোঙান তোঙানবা লমশিংদা পাকথোক চাউথোক্লে।
লৈবাক অনিগী তেংবাং পীনবগী ওইবা ঐখোয়গী খন্ন-নৈনবগী মথক্তা রাস্ত্রপতি জীনবেকোব অমসুং ঐহাক্না ইন্দিয়ান-কীর্গীজ বিজিনেস ফোরমগী অহানবা মীফমদা পুন্না ৱা ঙাংগনি।
ঐহাক্না থাজবা থম্লি মদুদি ঐহাক্কী কীর্গীজ রিপব্লিক্কী খোংচৎ অসিনা এস.সি.ও.গী মীহুৎ লৈবাকশিং অমসুং কীর্গীজ রিপব্লিক্কা লোয়ননা ঐখোয়গী তেংবাং পীনবা মখা তানা হেঙ্গৎলগনি।
