ସାଙ୍ଘାଇ ସହଯୋଗ ସଂଗଠନ (ଏସସିଓ)ର ରାଷ୍ଟ୍ରମୁଖ୍ୟମାନଙ୍କ ପରିଷଦ ବୈଠକରେ ଯୋଗ ଦେବା ଲାଗି 13-14 ଜୁନ 2019ରେ ମୁଁ ବିଶକେକ (କିର୍ଗିଜ୍ ସାଧାରଣତନ୍ତ୍ର) ଗସ୍ତ କରୁଛି ।
ଏହି କ୍ଷେତ୍ରରେ ବହୁପକ୍ଷୀୟ ରାଜନୈତିକ, ନିରାପତ୍ତା, ଅର୍ଥନୈତିକ ଏବଂ ଜନ ଯୋଗାଯୋଗକୁ ପ୍ରୋତ୍ସାହିତ କରିବା ଲାଗି ଆମେ ଏସସିଓ ପ୍ରତି ସ୍ୱତନ୍ତ୍ର ଗୁରୁତ୍ୱାରୋପ କରୁଛୁ ।
ଦୁଇ ବର୍ଷ ତଳେ ଏସସିଓର ପୂର୍ଣ୍ଣ ସଦସ୍ୟତା ହାସଲ କରିବା ପର ଠାରୁ ଏସସିଓର ବିଭିନ୍ନ ଆଲୋଚନା ବ୍ୟବସ୍ଥାରେ ଭାରତ ସକ୍ରିୟ ଭାବେ ଅଂଶଗ୍ରହଣ କରିଛି । କିର୍ଗିଜ ସାଧାରଣତନ୍ତ୍ରର ଅଧ୍ୟକ୍ଷତା ପ୍ରତି ଗତବର୍ଷ ଆମେ ଆମର ସମ୍ପୂର୍ଣ୍ଣ ସହମତି ବ୍ୟକ୍ତ କରିଥିଲୁ ।
ଏହି ଶିଖର ସମ୍ମିଳନୀରେ ବୈଶ୍ୱିକ ସୁରକ୍ଷା ପରିସ୍ଥିତି, ବହୁପକ୍ଷୀୟ ଅର୍ଥନୈତିକ ସହଯୋଗ, ଜନ ସମ୍ପର୍କ ଏବଂ ଅନ୍ତର୍ଜାତୀୟ ତଥା କ୍ଷେତ୍ରୀୟ ଗୁରୁତ୍ୱ ବହନ କରୁଥିବା ବିଷୟ ଆଧାରିତ ପ୍ରସଙ୍ଗରେ ଆଲୋଚନା ହେବ ବୋଲି ଆଶା କରାଯାଉଛି । ଶିଖର ସମ୍ମିଳନୀ ଉପଲକ୍ଷେ ଦ୍ୱିପାକ୍ଷିକ ଭାବେ ମୁଁ ବିଭିନ୍ନ ନେତୃବୃନ୍ଦଙ୍କୁ ଭେଟିବାର କାର୍ଯ୍ୟକ୍ରମ ରହିଛି ।
ଶିଖର ସମ୍ମିଳନୀ ପରେ, କିର୍ଗିଜ ସାଧାରଣତନ୍ତ୍ରର ରାଷ୍ଟ୍ରପତିଙ୍କ ନିମନ୍ତ୍ରଣକ୍ରମେ ମୁଁ ମଧ୍ୟ 14 ଜୁନ, 2019ରେ ଦ୍ୱିପାକ୍ଷିକ ସରକାରୀ ଗସ୍ତରେ କିର୍ଗିଜ ସାଧାରଣତନ୍ତ୍ରରେ ଉପସ୍ଥିତ ରହିବି ।
ଭାରତ ଏବଂ କିର୍ଗିଜ ସାଧାରଣତନ୍ତ୍ର ମଧ୍ୟରେ ଐତିହାସିକ ଏବଂ ସଭ୍ୟତାଗତ ସମ୍ପର୍କ ରହିଛି । ଦୁଇ ଦେଶ ମଧ୍ୟରେ ପାରମ୍ପରିକ, ସୌହାର୍ଦ୍ଦ୍ୟପୂର୍ଣ୍ଣ ଏବଂ ବନ୍ଧୁତ୍ୱପୂର୍ଣ୍ଣ ସମ୍ପର୍କ ରହିଆସିଛି । ନିକଟ ଅତୀତରେ, ପ୍ରତିରକ୍ଷା, ନିରାପତା, ବାଣିଜ୍ୟ ଏବଂ ନିବେଶ ସମେତ ଦ୍ୱିପାକ୍ଷିକ ସମ୍ପର୍କର ବିଭିନ୍ନ କ୍ଷେତ୍ରରେ ଆମର ସମ୍ପର୍କ ଅଧିକ ସମ୍ପ୍ରସାରିତ ହୋଇଛି ।
ଦ୍ୱିପାକ୍ଷିକ ସହଯୋଗର ସାମଗ୍ରୀକ ବିଷୟରେ ଆଲୋଚନା କରିବା ସହିତ ରାଷ୍ଟ୍ରପତି ଜିନବେକୋଭ ଏବଂ ମୁଁ ମିଳିତ ଭାବେ ଭାରତ-କିର୍ଗିଜ ବ୍ୟବସାୟ ମଞ୍ଚର ପ୍ରଥମ ବୈଠକକୁ ସମ୍ବୋଧିତ କରିବୁ ।
ମୋର ବିଶ୍ୱାସ ରହିଛି ଯେ କିର୍ଗିଜ ସାଧାରଣତନ୍ତ୍ରଙ୍କୁ ମୋର ଏହି ଗସ୍ତ ଏସସିଓ ସଦସ୍ୟ ରାଷ୍ଟ୍ର ଏବଂ କିର୍ଗିଜ ସାଧାରଣତନ୍ତ୍ର ସହିତ ଆମର ସହଯୋଗକୁ ଆହୁରି ସୁଦୃଢ଼ ଏବଂ ସଂଗଠିତ କରିବ ।
