লৈবাক্কী অমসুং মালেমগী পুক্নীং চীংশিন্নবা প্রধান মন্ত্রী শ্রী নরেন্দ্র মোদীনা য়ুনাইতেদ নেসন্সতা মমাংদসু ৱা ঙাংখ্রে। অদুবু হন্দক্কী মতাং অসিদা মহাক্না ফম্বাক অসিদা ভারতকী হক্কী মতাংদা মশাদা য়াম্না থাজবগা লোয়ননা ঙাংখিবা অসিদি মমাংদা অমুক্তা তৌখিদ্রি। মহাক্না কোরোনাগী লুরবা মতম অসিদা মফম অসিদা ৱা ঙাংখিবগী মওং অদুনা তোঙান তোঙানবা অতোপ্পা লৈবাকশিংবুসু ইথিল হাপখি। থৌওং অসিনা ভারত মচা করোর ১৩০গী অপুনবা খোঞ্জেল অমা ওইখি। মহাক্না হায়খিবদা, লুপ অসিনা শেমখিবদগী হৌদুনা মসিগী পান্দম খুদিংমক ফংহন্নবা হায়দুনা ভারতনা মতম পুম্বদা শৌগত্তুনদা লাক্লিবা অসি য়েংলুরগা, মসিগী মওং-মতৌ অমসুং ৱারেপ লৌবগী থৌওংশিংদা ভারতপু কয়াম কুইনা য়াওহন্দনা থমখিগনি হায়খি। মহাক্না মখা তানা হায়খিবদা ঙসিগী থৌওং অসিগী মমাংদা ভারতকী প্রধান মন্ত্রী অমত্তনা অসিগুম্বা মওংদা অকনবা ৱাফম কয়া মালেমগী মাংদা থমখিবা অসি অমুক্তা থোকখিদ্রি হায়বগী থাজবা লৈ হায়না মহাক্না হায়খি।
মোদীনা হায়খিবদা চহি ৭৫গী মমাংদা মালেম অসি য়াম্না তোঙাল্লম্মি, মসিগী থৌওংশিংসু য়াম্না তোঙাল্লম্মি হায়খি
চহি ৭৫গী মমাংদা য়ুনাইতেদ নেসন্স শেমখিবা মতমদা মালেম, মসিগী মওং মতৌ, শিংনবশিং অমসুং মসিগী তঙাই ফদবশিং অসি য়াম্না তোঙাল্লম্মি হায়না প্রধান মন্ত্রীনা হায়খি। হিরোশিমা অমসুং নাগাসাকীদা ন্যুক্লিয়র বোম্ব অমা থাদখিবদগী জাপানখক্ত নত্তনা মালেম শিনবা থুংনা অকিবগী অকোয়বা অমা লৈহল্লুরবা মতুংদা মালেম অসিনা মালেমগী অনিশুবা লাঞ্জাওদগী ফগৎলকপদা ঙাইরম্মি। লান অসিনা মালেমগী শেন্মিৎলোনবু মাংহন তাকহল্লুরে। লোইলম লৈঙাক্কী চৎনবী অসি মালেমগী মেপ্তগী মাঙশিল্লকপা মতম্নি। ভারতনা নীং-খা তম্বা ফংবগী পুঙফমদা লৈরম্মি। মতম অসিদা য়ুনাইতেদ নেসন্সকী পান্দম অসি পুম্নমকপু পুন্সিনবনি। মসিদগী হৌদুনা মালেম অসি য়াম্না হোংলে। মালেম অসিনা ভারত অমসুং চাইনানা মচিন তুমখৎলকপসু উখি। মসিনা সোভিএৎ য়ুনিয়ন্না মচেৎ তাখিবা অমসুং জর্মনীনা পুন্সিবসু উখি। মীনায় লৈঙাক লৈরম্বা লৈবাক কয়া অমসু নীং-খা তম্বা ফংখি। লৈবাক কয়া অমনা সিবিল লানগী মরম ওইদুনা অৱা-অনা কয়া অমসু নঙনখি। লৈবাক অনি নত্ত্রগা হেনবশিংগী মরক্তা অচৌবা লাঞ্জাও কয়া অমসু থোকখি।
য়ুনাইতেদ নেসন্স লৈরকপগী মতম অসিদা খুৎয়েক পীনবা লৈবাক ৫০ খক্তং লৈরম্মি, অদুবু ঙসিদি মশিং অসি ১৯৩দা হেনগৎলে।
ইং ১৯৪৫দা য়ুনাইতেদ নেসন্স শেমখিবা মতমদা মসিগী চার্তরদা খুৎয়েক পীনবা লৈবাক ৫০তমক লৈরম্মি। ঙসিদি মশিগী মশিং অসি ১৯৩দা হেনগৎলে অদুবু মসিগী মওং–মতৌদদি অহোংবা লৈত্রি। সেক্যুরিতী কাউন্সিলগী ভেতোগী শক্তি লৈবা লৈবাক মঙা অসি ঙসিসু হান্নগুম্না অদুমক লৈরি। প্রধান মন্ত্রীনা তশেং-তশেংবা ওইনা হায়খিবদা হৌখিবা থা ৭ অসিদা মালেম অপুনবা অসিনা কোরোনাগী অকিবা মতৌ অসিগা লান্থেংনদুনা লাক্লি অদুবু য়ুনাইতেদ নেসন্সনা করিসু নাচুংদনা লৈরি হায়খি। মসিগী মনুং চনবা লুপ, ৱর্ল্দ হেল্থ ওর্গনাইজেসন, অসিনা ৱারেপ অমফাওবা লৌবা ঙমদনা লৈরি। ঙসিদি মসিনা থাজবগী ইরাং অমা কন্না থেংনরি। মসিদা করিগুম্বা অমত্তগী অহোংবা লাকপা উদ্রি। মরম অসিনা প্রধান মন্ত্রীনা হায়খিবদা য়ুনাইতেদ নেসন্সনা মসিগী ৭৫শুবা চহি অসিদদি মালেমগী খল অমা পুরক্নবা অমসুং মসিবু হেন্না মপাঙ্গল হাপ্নবা শেমদোকপগী তঙাই ফদবা লৈরে হায়খি।
প্রধান মন্ত্রীনা হায়খি – ঐখোয়না বাসুধৈবা কুতুম্বকমদা থাজবা থম্মি
ভারতকী নাকল অসিদা মপাঙ্গল কন্না থমদুনা প্রধান মন্ত্রীনা হায়খিবদা য়ুনাইতেদ নেসন্সকী পান্দম অমসু ওইরিবা বাসুধৈবা কুতুম্বকমদা ঐখোয়না থাজবা থম্মি হায়খি। ঐখোয়না মীয়ামগী য়াইফ-য়ুম্বালগীদমক্তা জগ কল্যান্দা থাজৈ। ভারতনা শান্তি লৈবা, সেক্যুরিতী অমসুং মালেমগী নুংঙাই য়াইফবদা খোঙফম চেৎলি। ভারতনা মীওইবা খুন্নাইগী য়েক্নবশিংবু মুথৎপগী ওইনদি ভারতনা য়ুনাইতেদ নেসন্সকী নাকলদা লৈরি হায়খি। ভারতনা য়ুনাইতেদ নেসন্স শেমগৎলকপা শরু য়ারকপা লৈবাক অমা ওইনা য়ুনাইতেদ নেসন্সতা য়াম্না চাউবা থাজবা থম্মি। মালেমদা নুংঙাই-য়াইফবা পুরক্নবা তঙাই ফদবা অমা হেক লৈরকপা মতমদা ভারতনা মতম পুম্বদা মাংজিল থাদুনা থোক্লক্তুনা লাক্লি। য়ুনাইতেদ নেসন্সকী হায়জবা অমা হেক লাকপদা ভারতনা মসিগী লান্মীশিংবু মালেমগী তোঙান-তোঙানবা মফমশিংদা য়ামদ্রবদা ৫০লক থাদুনা লাক্লি। ভারতকী থৌনাফবশিংনা মালেমগী ওইনা খ্বাইদগী য়াম্না কত্থোক্তুনা লাক্লি।
মোদীনা শেমদোকপা, থবক পাঙথোকপা অমসুং লৈবাক অসিগী চাউখৎনবা শেমদোকপগীদমক্তা খোল্লাও অমা পীরি।
প্রধান মন্ত্রীনা ভারতনা হৌখিবা তরুক অসিদা মালেমগী থাক্তা মফম কনবা ঙমখিবা অমসুং লৈবাক অসিগী মীয়ামগীদমক্তা মশিং য়াম্লবা য়াইফ-য়ুম্বালগী স্কিম কয়া অমা চলায়খিবশিংগী মতাংদা পাউদমখি। লৈবাক অসিগী চাউখৎনবা হায়দুনা প্রধান মন্ত্রীনা শেমদোকপা, থবক পাঙথোকপা অমসুং অহোংবা পুরকপগী লাইশোল পীখি। মসিনা হায়বদি, অহানবদা শেমদোকপগী থৌরাং য়াৎপা, মতুংদা মসিবু থবক ওইনা পাঙথোকপা অমসুং অকোনবা ওইনা থৌওংশিং অসিনা ভারত্তা অহোংবা পুরকপা হায়বনি। ভারতনা চহি ৫ অসিদা ভারতকী লায়রবা করোর ৪০বু বেঙ্কিংগী থৌওংশিংদা পুন্সিনখি। মসিনা য়ুম করোর ১৫দা থক্নবা ঈশিং ফংহনবা অমসুং খুঙ্গং লাখ ৬পু ব্রোদ-বেন্দনা শম্নহন্নবা লেপখি। লৈবাক শিনবা থুংনা লু-নানবগী কেম্পেন পাঙথোকখি। ঙসিদি, লৈবাক অসিনা তি.বি.দগী নীং-খা তম্বা ফংনবা লম্বী অমগীদমক্তা খোঙশানবা হৌরে। মীওই মিলিয়ন কয়া অমনা লেম্না হকশেল য়েংশিনবগী খুদোংচাবা লৌনরি। লায়রবশিংদা অহোঙবা মমলদা হিদাক-লাংথকশিং ফংহল্লি। থৌওংশিং অসি মশা মথন্তনা হেক্তা ওইরকখিবা নত্তে।
লৈবাক ১৯০গী মনুংদা ১৮৭না ভারতপু প্রোবিজনেল মেম্বর ওইনা খনবদা শৌগৎখি
মরোমদোম লেপচবা ঙম্বা ভারত অমা ওইবগী মঙলান অসিনা লৈবাক্কী মীয়াম খুদিংদা মপাঙ্গল হাপ্পা পাম্মি। মসিগী থৌওং অসিনা মালেম্বুসু কান্নহনগনি। ভারতনা চাউখৎপদা মালেমসু চাউখৎলিবনি। মরম অসিনা ভারতনা য়ুনাইতেদ নেসন্সপু চাউখৎহন্নবা পাংখিবা তেংবাংশিং অসিগী মমল হঞ্জিনবা ওইনা য়ুনাইতেদ নেসন্সকী থৌরমশিংদা ভারতকী মফম অমা পাম্লিবনি। ইং ২০২১দগী হৌদুনা ভারতনা সেক্যুরিতী কাউন্সিলগী মতম খরগী ওইবা মেম্বর ওইরগনি। অসিগুম্বা ফম অসিগী ওইনা ভারত অসি ৮লক খনখ্রবনি। ভারতকী মমিং চৎপা অমসুং মীয়াম্না য়াবগী মতৌ অসি লৈবাক ১৯০গী মনুংদগী ১৯৭না ভারতপু প্রোবিজনেল মেম্বর ওইনা খনবদা শৌগৎলিবা অসিনা তাক্লি।
ভারতনা য়ুনাইতেদ নেসন্সকী চাউখৎ-থৌরাং অমসুং নুংঙাই য়াইফবগী থৌরাংশিংবু থবক ওইনা পাঙথোক্লি
ভারতনা য়ুনাইতেদ নেসন্সকী চাউখৎ-থৌরাং অমসুং নুংঙাই য়াইফবগী থৌরাংশিংবু খোঙজেল য়াংনা থবক ওইনা পাঙথোক্লিবা অসিগুম্না অতোপ্পা লৈবাক অমত্তনা তৌখিদ্রি। ভারত অসি মালেমগী ন্যুক্লিয়রগী লৈবাকশিংগী মনুংদা অমনি। মসিনা ন্যুক্লিয়র খুৎলায়শিং মশিং হেনগৎপগী মায়োক্তা লৈনবা খোঙফম চেৎলি। মালেমগী খ্বাইদগী চাউবা গনতন্ত্রা চৎপা লৈবাক অমা ওইনা ভারত অসি মালেমগী শক্তি লৈরবা শেন্মিৎলোনগী লুপ খুদিংমক্কী থৱাই য়াওবা মেম্বর অমা ওইরি। মালেমগী অপুনবা মীশিংগী ১৮% অসি ভারত্তা লৈ।
জি.৪ য়াওনা শক্তি লৈরবা লুপ কয়ানা য়ু.এন.দা শেমদোকপা পুরকপা পাম্মি
য়ুনাইতেদ নেসন্সকী পর্মানেন্ত মেম্বর অয়াম্বসি য়ুরোপ্তা লৈ, অমসুং মখোয়গী অপুনবা মীশিং অসিনা মালেমগী মীশিংগী ৫%নি। অফ্রিকা, খা-অমেরিকা অমসুং ওস্ত্রেলিয়াগুম্বা মহাদেশশিংদি মখোয়গী মীহুৎ ওইনা অমত্তা য়ুনাইতেদ নেসন্সতা লৈতে। মসিনা মরম ওইদুনা জি.৪ য়াওনা শক্তি লৈরবা লুপ কয়ানা য়ু.এন.দা শেমদোকপা পুরকপা পাম্লিবনি।
লৈবাক কয়া অমনা প্রধান মন্ত্রী মোদীনা য়ুনাইতেদ নেসন্সতা ৱা ঙাংখিবগী মওং অদুবু শৌগৎলি
লৈবাক কয়া অমনা প্রধান মন্ত্রী মোদীনা য়ুনাইতেদ নেসন্সতা ৱা ঙাংখিবগী মওং অদুবু শৌগৎলি। অমেরিকা অমসুং য়ুরোপকী লৈবাকশিংনা ঙসিদি ভারতকীদমক্তা লেপ্লি। কোবিদ-১৯না মালেম পুম্বা অসিবু মিৎ-না শিংহল্লিবা অসিগী মতম অসিদদি য়ুনাইতেদ নেসন্সসু শেমদোকপগী মথৌ তারে।
