প্রধানমন্ত্রী শ্রী নরেন্দ্র মোদীনা ঙসি লক্ষদ্বীপ, তমিল নাদু অমসুং কেরলগী সাইক্লোন ‘ওখী’না শোকহল্লবা মফমশিংদা য়েংশিনখ্রে অমসুং সাইক্লোন্না শোকহল্লবা মীওইশিং, ঙা ফাবশিং লোইননা লৌমীশিংগা ৱারি শান্নখ্রে। প্রধানমন্ত্রীনা চৈরক অসিদা কবারত্তী অমসুং কন্যাকুমারীদা মীয়ামগা ৱারি শান্নখি। মহাক্না তিরুঅন্তপুরমগী মনাক্তা লৈবা সাইক্লোন্না শাথিনা শোকহল্লবা মফমশিংগী মনুংদা অমা ওইরিবা পুন্থুরা খুঙ্গংদসু চৎখি। সাইক্লোন্না নংহল্লিবা অৱাবশিং অদুগী মতাংদা মীয়াম্না প্রধানমন্ত্রীদা পাউদমখি। প্রধানমন্ত্রীনা মীয়ামদা অঙম্বা মতেং পাংগনি হায়বগী থাজবা ফোংদোকখি অমসুং মহাক্না হায়খি মদুদি কেন্দ্র সরকারনা অসিগুম্বা খুদোং থিরবা পুংফম অসিদা রাজ্যগা লোইননা লেপ্লি।
প্রধানমন্ত্রীনা কাবারত্তী, কন্যাকুমারী অমসুং তিরুঅন্তপুরমদা হৌজিক্কী ওইরিবা ফিভম অমসুং তেংবাং পীবগী থবকশিং য়েংশিন্নবগীদমক তোঙান তোঙানবা মীফমশিং পাংথোকখি। কেরল অমসুং তমিল নাদুগী রাজ্যপালশিং, মুখ্য মন্ত্রীশিং, তমিল নাদুগী উপমুখ্য মন্ত্রী, লোক সভাগী দিপুতী স্পিকর, অমসুং লক্ষদ্বীপকী এদমিনিস্ত্রেতরগা লোইননা অতৈ সেনিয়র ওফিসিএলশিংনা মীফম অদুদা শরুক য়াখি।
প্রধানমন্ত্রীনা হায়খি মদুদি কেন্দ্র সরকারনা সাইক্লোন্না শোকহল্লবা রাজ্যশিংদা তেংবাংগী পোৎলমশিং পীদুনা মতেং পাংগনি।
- কেন্দ্র সরকারনা কেরল, তমিল নাদু অমসুং লক্ষদ্বীপকীদমক্তা খুদক্কী ওইনা লুপা কোতি ৩২৫গী শেলগী তেংবাং পীরগনি।
- প্রধানমন্ত্রীনা ঙসি লাওথোকখিবা শেলগী তেংবাং অসি থা অসিগী হৌরকপদা তমিল নাদুদা লুপা কোতি ২৮০ অমসুং কেরলদা লুপা কোতি ৭৬ পীখিবা শেলগী তেংবাং অদুদগী তোঙাল্লি।
- প্রধানমন্ত্রী আৱাস য়োজনাগী মখাদা কেন্দ্র সরকারনা সাইক্লোন ওখীনা মরম ওইদুনা মাং-তাক্লবা চাওরাক্না য়ুম ১৪০০ রোম শেমজিনবদা মতেং পাংগনি। স্কিম অসিগী মখাদা কান্নবা ফংলবা খুদিংমক্তা অনৌবা য়ুম শাননবা লুপা লাখ অমগা মখাই ফাওবগী তেংবাং পীগনি।
- ইন্সুরেন্স কম্পেনীদা সাইক্লোন ওখীনা শোকহল্লবা মীওইশিংগী ক্লেম অদু খুদক্তা পীথোক্নবা খঙহনখ্রে।
- সাইক্লোন্না মরম ওইদুনা থৱাই মাংখ্রবশিংগী ইমুং-মনুংদা লুপা লাখ অনিগী এক্স-গ্রেসিয়াগী শেনফম অমসুং কা হেন্না শোক্লবশিংদা লুপা ৫০,০০০ প্রধানমন্ত্রী নেস্নেল রিলিফ ফন্দ (পিএমএনআরএফ)দগী পীনবা অয়াবা পীখ্রে।
মসিগী মমাংদা য়েংশিনবগী মীফম অদুদা প্রধানমন্ত্রীদা সাইক্লোন ওখীগী শাফুগী মরমদা শন্দোক্না পাউদমখি। লমদম অসোমদা মসি হৌখিবা চহি ১২৫ অসিদা অসিগুম্বা মখলগী অহুমশুবা সাইক্লোন্নি। সাইক্লোন অসি নবেম্বর ৩০, ২০১৭তা লাকখি অমসুং নুমিৎ অদুমক্তদা থিবা অমসুং মী কনবগী থবক পাইখৎপা হৌখি। ভারতকী কোস্ত গার্দনা পুন্না ঙা ফাবা ৮৪৫ মাই পাক্না কনবা ঙমখি।
প্রধানমন্ত্রীদা খঙহনখি মদুদি তোর্বান্দগী নাউতিকেল মাইল ৭০০দগী হেনবা মফম ফাওবা শেন্নবগী থবক পাইখৎখি।
