ঐখোয় নীং খা তম্বা ফংখিবা চহি তরাগী খুজিং তরেৎ ফাখ্রে অমসুং সরদার পতেলনা অপুনবা ভারত অমগী পান্দমদা লৈবাক মচা মচা কয়া পুন্সিনবগী থবক পাইখৎপীরম্মি। পোলিতিকেল য়ুনিয়ন অসিদি ঙসি শোইফদ্রবা অমা ওইরে অদুবু ভারত অসি অমত্তা ওইবা কৈথেল অমদা হোংদোকপদি ঙমদ্রি। ঐখোয়গী পোৎ পুথোক্লিবশিং অমদি লৈরিবশিংবু মপাঙ্গল কলহন্নবগীদমক এন.দি.এ. সরকারনা ভারতকী কৈথেলশিং পুন্সিন্নবগী মাইকৈদা মিৎয়েং থম্লদুনা থবক পাইখৎলি। মিৎয়েং অসিগা লোইননা প্রধান মন্ত্রী নরেন্দ্র মোদীগী লুচিং মখাদা এন.দি.এ. সরকারনা লৈবাক অমা, কৈথেল অমগী পান্দম অদু ফংনবগীদমক খোংজং কয়া হৌদোক্লি।
ই-নাম
লৌউ-শিংউগী কৈথেল অসি রাজ্য সরকারশিংনা মখোয়গী লৌউ-শিংউগী কৈথেলগী কাংলোনশিংগী মতুং ইন্না চলাইবনি, মসিগী মখাদা রাজ্যশিংনা কৈথেলগী তোঙান তোঙানবা মফম কয়ামরুম খাইদোক্তুনা থম্মি, অমসুং মখোয় খুদিংমক অদু তোখাইবা এগ্রিকলচরেল প্রদ্যুস মার্কেতিং কমিতী (এ.পি.এম.সি.) অমনা চলাই মখোয়না মশাগী মার্কেতিং রেগুলেসন (ফী য়াওনা) শেমজৈ। কৈথেল তোঙান তোঙান্না খাইদোক্তুনা থম্বা অসিনা রাজ্যগী মনুং মক্তদা লৌউ-শিংউগী পোৎথোকশিং অদু মফম অমদগী অমদা থাদোকপদা অপনবা ওইহল্লি অমসুং লৌউ-শিংউগী পোৎথোকশিংগী তাঙ্কক কয়ামরুমদা মল্তিপল হেন্দলিংনা মরম ওইদুনা লৌমীশিংনা ফংগদবা খুদোংচাবা অদু ফংবা ঙমহন্দে।
ই-নামনা রাজ্য অমসুং জাতিগী থাক্তা ওনলাইন ত্রেদিং প্লেৎফোর্মগী থোংদা অপুনবা কৈথেল অমা ফংহল্লি, মসিনা লৈবা অমসুং য়োনবগী মরক্তা ই-পাও ফাওনবা লাইনা ঙমহল্লি অমসুং মথৌ তাবশিংগী মতুং ইন্না পোৎথোকশিং অদু রিয়েল তাইমগী মমল থিবদা নীলাম লাওবগী থৌওংদা নুং পান উহনবা হেনগৎহল্লি অমসুং লৌমীশিংনা জাতিগী ওইবা কৈথেলদা য়ৌশিনবা ঙমহল্লি, মসিনা লৈবাক অপুনবগী কৈথেলশিংদা লৌমীশিংনা য়ৌশিনবা, মখোয়গী পোৎথোকশিংগী মগুনগী মতুং ইন্না মমল ফংবা, পোৎ লৈবশিংনা ওনলাইন পেমেন্ত তৌবা অমসুং মতিক চাবা মমলদা হেন্না ফবা পোৎথোক খনবদা মতেং ফংহল্লি।
জি.এস.তি.
ঐখোয়গী লৈবাক্তা মখল কয়াগী তেক্স লৌরি। লৈবাক অমদা মখল কয়ামরুমগী তেক্স লৌরবদি পোৎথোকশিং নীংথিজনা পুথোকপা ঙমদে অমসুং ফিভম অসি পোৎ লৈরিবশিংদসু মায়োক্নহল্লি। জি.এস.তি. লাকপদগী মসিগী অৱাবা অসি কোকহল্লগনি। জি.এস.তি.গা লোইননা লৈবাক অপুনবা অসিদা শুপ্নগী তেক্স রেৎ অমখক্তমক লৈরগনি।
জি.এস.তি. অসি মেন্যুফেকচররদগী হৌরগা পোৎ লৈরিবা ফাওবা গুদ্স অমসুং সর্বিস তেক্স সপ্লাই তৌনবগীদমক্তা তেক্স অমখক্তা ওইনা ফংগনি। ভেল্যু এদিসনগী মতুং তারকপা খোংথাংদা স্তেজ খুদিংমক্তা ইনপুৎ তেক্সশিং থিগনি মদু জি.এস.তি.গী স্তেজ খুদিংমক্তা ভেল্যু এদিসনগী তেক্স ওইনসু শেমগৎলি। জি.এস.তি.না মসি লেপথোক্কনি মদুদি লৈবাক অপুনবা অসিদা ইন্দাইরেক্ত তেক্স অসি কমন ওই অমসুং মসিনা ললোন ইতিক তৌবদা লাইথোকহনগনি। ভেল্যু চেনগী থোংদা রাজ্য পুম্নমক্তা মসি লেপথোকপা ঙমহনগনি মদুদি সীমলেস তেক্স-ক্রেদিৎকী সিস্তেম অমনা তেক্সশিংদা খ্বাইদগী তানা ইথিন পিগনি। জি.এস.তি.দা মেজর সেন্ত্রেল অমসুং স্তেৎ তেক্সশিংগী কাংলোন অমগী মখাদা লাকপনা মরম ওইদুনা গুদ্স অমসুং সর্বিসকী ইনপুৎ অসি মপুং ফাহনগনি লোইননা মসিগী ইথিল অসিসু অদুক্কী মতিক পাক চাউগনি অমসুং সেন্ত্রেল তেক্স (সি.এস.তি.) মপুং ফারকপদা লেংদবা ওইনা গুদ্স অমসুং সর্বিস্তা কারক্কদবা কোস্তসু হন্থগনি। মসিনা মরম ওইদুনা ইন্দিয়ন গুদ্স অমসুং সর্বিস অসি মালেমগী কৈথেলদা অথোই অহেন তান্নবা য়াওবা ঙম্লগনি অমসুং ইন্দিয়ন এক্সপোর্ত্তা অদুক্কী মতিক খোংজেল য়াংশিলহল্লগনি। মথৌ তৌবা হেনগৎহনবা অমসুং লিকেজদা অপনবা পীবনা মরম ওইদুনা চাউরাক্না পোৎথোক পুম্নমক্তগী ওভরওল তেক্স বর্দন হন্থরগনি, মসিনা হায়রিবদি পোৎ লৈবশিংদা হকথেংননা কান্নবা ফংহল্লগনি।
লৈবাক অমা, গ্রিদ অমা, মমল অমা
ভারত্তা ত্রান্সমিসনগী মপাঙ্গল অসি মরাং কাইনা লৈজৈ অমসুং য়েন্থোকপদসু হামু হামুনি, মসিনা মরম ওইদুনা পাৱর সপ্লাই অসি কনশিলহল্লি অমসুং রাজ্যশিংগী মথক্তা সরপ্লস লৌবনা মখোয়দা দিফিজিৎ তাহল্লি। খা ভারতকী রাজ্যশিংনা কালেন্থাগী মতমদা ত্রান্সমিসন লাইনশিংদা খ্বাইদগী য়াম্না কঞ্জেসন তৌবনা মরম ওইদুনা পাৱর ককপগী অৱাবা মায়োক্নহল্লি। মসিনা মরম ওইদুনা রাজ্যশিংনা দবল দিজিৎ প্রাইস থিবা তারকই। এন.দি.এ. সরকারনা ফংলিবা ত্রান্সফর কেপাসিতী (এ.তি.সি.) অদু চাউরাক্না ৭১% হেনগৎহন্দুনা কুমজা ২০১৩-১৪গী মেগাৱাৎ ৩,৪৫০গা য়েংনরুবদা মেগাৱাৎ ৫,৯০০ ওইহনখি। মসিনা মরম ওইদুনা মমলদা মশক থোক্না হন্থহনখি।
গ্রিদতা প্রাইস অমদি সরপ্লস ইলেক্ত্রিসিতী ফংহনবগী ই-পাও অসি মোবাইল এপ “বিদ্যুৎ প্রৱাহ”গী থোংদসু পাংথোক্লি। এপ অসিনা রাজ্যশিংনা মৈ কয়া য়াম্না লৈরিবগে হায়বগী ই-পাউসু ফংহল্লি মসিগা লোইননা রাজ্য অদুদা মৈগী অৱাৎপা মফম লৈরে হায়না লাওথোকপরা লাওথোক্তবরা হায়বদুসু খঙহল্লি। বিদ্যুৎ প্রৱাহ এপকী মতুং ইন্না ঐখোয়না রাজ্য পুম্নমক্কীদমক্তা ইলেক্ত্রিসিতীগী রেৎ অদু থৌরম কয়াদা অমত্তা ওইনা মান্নবরা হায়বদু খঙবা ঙমহল্লি। মসি সরকারনা পাইখৎলিবা খোংথাং কয়ামরুম অসিগী ফল অদুনি।
ত্রান্সমিসন কেপাসিতীদা হেনগৎলকপা অসিনা রাজ্য কয়ামরুমগীদমক্তা নেস্নেল গ্রিদতগী শোর্ত তর্ম পাৱর রিক্ব্যারমেন্ত লৈবসু ঙমহল্লে। সরকারনা দিস্ত্রিব্যুসন কম্পেনী (দিস্কোম)শিংগী থোংদা শোর্ত তর্ম পাৱর লৌশিন্নবগীদমক “দীপ (দিস্কোভরী ওফ ইফিসিয়েন্ত ইলেক্ত্রিসিতী প্রাইস) ই-বিদ্দিং অমসুং ই-রিজর্ব ওক্সন পোর্তেল” হৌদোক্লে। মসি শিংননীংঙাই ওইরবা খোমজিনবা অসিদগী মমলশিং অদু হন্থহনবদা মতেং ওইরগনি, মসিগী কান্নবা অসি লৈরিবশিংনা হকথেংননা ফংগনি।
য়ু.এ.এন.
মমাংদদি মীওই অমনা অনৌবা থবক অমা তৌবা মতমদা কম্পেনীগী মাইকৈদগী মাগীদমক্তা ই.পি.এফ. একাউন্ত হাংনরম্মি মদুদা মহাক্কী প্রাইভেৎ ফন্দগী শেনফম অদু থমজিল্লি। মহাক্কী প্রাইভেৎ ফন্দ অদু মাগী একাউন্তা থমজিল্লম্মি অমসুং মীওই অদুনা কম্পেনী অদু থাদোক্তুনা অতোপ্পা কম্পেনী অমদা থবক তৌখিবা মতমদা অনৌবা ই.পি.এফ. একাউন্ত অমা মতৌ অদুম্না অমুক হন্না হাংনরম্মি। মদুদা শুপ্নগী হাই ত্রাঞ্জেক্সন কোস্ত তিংবদা নত্তনা মল্তিপল ফোর্মসু মেনবা তারম্মি। য়ু.এ.এন. অসিদদি শিন্মীশিংগী ত্রাঞ্জেক্সন্দা কম্পেনীগী মথৌ অমত্তা লৈত্রে অমসুং ই.পি.এফ.ও. অমসুং কম্পেনীগী মরক্তা হকথেংননা পাও ফাওদোক্নরে। য়ু.এ.এন. অসি শিন্মী খুদিংমক্কীদমক্তা পুন্সি চুপ্পগী অমখক্তা ওই অমসুং থমজিনখিবা শেনফম অদু য়ু.এন.এ.গা শম্নহল্লি মসিনা পৈশা কাইথোকপা লাইথোকহল্লি। খোংথাংশিং অসিনা ভারতকী কৈথেলবু অমত্তা ওইবগী মশক অদু ফোংদোকই অমসুং মতম শাংনা কান্নবা ওইগদবা খোংথাং অমনি। পুম্নমক্কী পান্দম অসি পোৎ লৈবা মীচম-মীয়ামদা লাইনা থোকহন্নবনি।
