অপুনবা ৱারোল : ভারত-য়ু এসকী মালেমগী থাক্ত লৈনরিবা অচেৎপা মরিগী পান্দমশিং অমসুং ফিদমশিং

প্রধান মন্ত্রী শ্রী নরেন্দ্র মোদীনা চেবাউ পীবদগী য়ু এস এগী প্রসিদেন্ত দোনাল্ড ত্রম্প ২০২০গী ফেবুৱারি ২৪-২৫দা সরকারগী ওইবা খোঙচৎ অমদা ভারত্তা লাকখি ।

মালেমগী থাক্ত লৈনবা অচেৎপা মরুপ-মপাংগী মরি

অমনা অমবু থাজনবা, নুংশিনবা, অপাম্বশিং শরুক য়ামিন্নবা অমসুং মখোয়গী মীয়াম উনবা হেনগৎহনবদা য়ুমফম ওইদুনা ভারত অমসুং য়ু এসকী মরক্ত মালেমগী থাক্ত লৈনবা অচেৎপা মরুপ-মপাংগী মরি হেন্না কনখৎহন্নবা প্রধান মন্ত্রী নরেন্দ্র মোদী অমসুং প্রসিদেন্ত ত্রম্পনা ৱাশক লৌখি ।  

ঙাকশেন, চেকশিন-থৌরাং, সমুদ্রা অমসুং স্পেসগী লমদা ই-পাউ শরুক য়ামিন্নবা, মতেং পীনবা, লান্মীগী মীওইশিং চৎথোক-চৎশিন তৌনবা, সর্বিসশিং অমসুং স্পিসিয়েল সর্বিসশিংগী মরক্ত অৱাংবা থাক্কী ত্রেনিং পীবা, অফবা মখলগী লানগী খুৎলায়শিং পুন্না পুথোকমিন্নবা অমসুং ঙাকশেনগী ইন্দস্ত্রিশিংগী মরক্ত মতেং পীনবা হেনগৎহনবা হায়না প্রধান মন্ত্রী মোদী অমসুং প্রসিদেন্ত ত্রম্পনা ৱাশকখি ।

ইন্দো-পেসিফিক লমদমদা শান্তি থম্নবা ভারত্ত অৱাংবা থাক্কী য়ু এস মিলিতরি তেক্নোলোজি পীবা হায়না প্রসিদেন্ত ত্রম্পনা মহাক্কী ৱাশক অমুক হন্না থমখি, এম ঐচ-৬০আর অমসুং এঐচ-৬৪ই অপাচে হেলিকোপ্তরশিং লৈনবা ভারতনা ৱারেপ লৌখিবা অদু প্রসিদেন্ত ত্রম্পনা তরাম্না ওকখি । হায়রিবা থবকশিং অসিনা লৈবাক অনিগী মরক্ত ঙাকশেনগী মতেং পীনবা, থবক ফংবা অমসুং ইন্দস্ত্রিশিং মতেং পীনবা হেনগৎহনগনি ।

খুৎলায় লৈবা অমসুং তেক্নোলোজি পীবগী মতাংদা ভারত অসি মরুওইবা মরুপ অমনি হায়না প্রসিদেন্ত ত্রম্পনা অমুক হন্না থাজবা থমখি ।

হুমেন ত্রাফিক্কিং, তেরোরিজম, এক্সত্রিমিজম, দ্রগ-ত্রাফিক্কিং অমসুং সাইবর ক্রাইমশিং য়াওনা মালেমগী ক্রাইমশিং পুন্নবা থেংন্নবা মতেং পীনবা হেনগৎহনবা হায়না প্রধান মন্ত্রী মোদী অমসুং প্রসিদেন্ত ত্রম্প ৱারেপ লৌখি । য়ু এস হোমলেন্দ সেকুরিতি দিপার্তমেন্ত অমসুং ভারতকী হোম এফেয়ার্স মিনিস্ত্রিনা হোমলেন্দ সেকুরিতি দাইলোগ অমুক পাংথোক্নবা ৱারেপ লৌবদা মখোয় অনিনা তরাম্না ওকখি । লৈবাক অনিগী লো ইনফোর্সমেন্ত এজেন্সিশিংগী মরক্ত অনৌবা কাউন্তর-নার্কোতিক্স ৱার্কিং গ্রুপ শেমদুনা মখোয়গী নাগরিকশিং দ্রগ শীজিন্নবা থিংনবা থবক পায়খৎপা হায়না য়ানখি ।
ভারত-য়ু এস মরিদা ললোন-ইতিক অমসুং ইনভেস্তমেন্তগী মরুওইবা অদু পি এম মোদী অমসুং প্রসিদেন্ত ত্রম্পনা শকখঙখি অমসুং অমেরিকা অমসুং ভারতকী ইকোনোমিশিং কান্নবা ফংনবা মতম লেংদবা ললোন-ইতিককী থবক চৎথবগী তঙাইফদবা থমখি । লৈবাক অনিমক্ত নুংঙাই-য়াইফবা, ইনভেস্তমেন্ত, থবক ফংবা মপুংফানা লৈনবা নাকলগী অনিগী ললোন-ইতিক্কী য়ানবা অমা পুরক্নবা হৌজিক চৎথরিবা ৱারি শানবা অসি লোইশিনবা হায়না লুচিংবা অনিনা য়ানখি ।

ভারত অমসুং য়ু এসকী মরক্ত হায়দ্রোকার্বোনশিংগী ললোন-ইতিক অমসুং ইনভেস্তমেন্ত হেনগৎলকপদা পি এম মোদী অমসুং প্রসিদেন্ত ত্রম্পনা তরাম্না ওক্লি । ইনর্জিগী সেক্তর খুদিংমক্ত লৈবাক অনিগী মরক্ত ইন্দস্ত্রি অমসুং মরি লৈনবা খুদিংমক মতেং পীনবা হেনগৎহনবা হায়না য়ানখি । ভারতকী কৈথেলদা এল এন জি শীজিন্না হেনগৎহন্নবা ভারতনা কোকিং/মেতালুরজিকেল কোয়েল অমসুং নেচরেল গ্যাস লৈনবা পান্দম থম্লিবা অসি পি এম মোদী অমসুং প্রসিদেন্ত ত্রম্পনা খঙজিনখি । ভারত্ত নিউক্লিয়র রিয়েক্তর ৬ শানবা তেক্নো-কর্ম্মসিয়েলগী মতেং পীন্নবা নিউক্লিয়র পৱার কোরপোরেসন ওফ ইন্দিয়া লিমিতেদ অমসুং ৱেস্তিংহাওস ইলেকত্রিক কম্পেনি অনিগী মরক্ত অরোইবা ৱারেপ অমা লৌনবা পি এম মোদী অমসুং প্রসিদেন্ত ত্রম্পনা পুক্নিং থৌগৎখি ।

মখোয়না মতম শাংনা সাইন্স, তেক্নোলোজি অমসুং ইন্নোবেসনগী লমদা মতেং পীনবদা পি এম মোদী অমসুং প্রসিদেন্ত ত্রম্পনা অপেনবা ফোংদোকখি । মালেমগী অহানবা দুয়েল-ফ্রিকেন্সি সিন্থেতিক এপরচর রাদর সেতিলাইতগা লোয়ন্না ২০২২দা ইসরো অমসুং নাসানা অপুনবা মিসন অমা হৌদোকনবা থৌরাং তৌরিবা অসিদা মখোয় অনিনা তরাম্না ওকখি । আর্থ ওবজারবেসন, মার্স অমসুং প্লানেতরি এক্সপ্লোরেসন, হেলিওফিসিক্স, হুমেন ফ্লাইত অমসুং শেন তান্নবা স্পেসকী থবক্ত মতেং পাংনবগী মতাংদা মতেং পীন্নবা ৱা খন্নখি ।

 “য়ুং ইন্নোভেতরস” ইন্তনসিপ য়াওনা অৱাংবা থাক্কী মহৈ-মশিং তম্বা অমসুং লাইরিক-লাইশু তমবগী মতাংদা চৎথোক-চৎশিন তৌনবা হেনগৎহন্নবা পি এম মোদী অমসুং প্রসিদেন্ত ত্রম্পনা মখোয়গী অপাম্বশিং ফোংদোকখি অমসুং হন্দক ভারতকী মহৈরোয়শিং য়ু এসতা মশিং হেনগৎলকপদা তরাম্না ওকখি ।

নোবেল কোবিদ-১৯ য়াওনা লায়নাশিং লায়চৎ ওইনা শন্দোরকপা থেংন্নবা , মাংজৌন্না ঙাকথোক্নবা অমসুং ঙন্না মশক খঙদোকপগী থবকশিংদা লৈবাকশিংনা মাইপাক্না পায়খৎলিবা থবকশিং লৈবাক অনিনা মখা তানা পায়খৎপা হায়না পি এম মোদী অমসুং প্রসিদেন্ত ত্রম্পনা থাজবা থমখি । অনৌবা থৌরাংশিংগী মখাদা লৈবাক অনিনা থেংনরিবা মেন্তেল হেল্থগী শিংনবশিং থেংন্নবা মতেং পীন্নবা এম ও য়ু অমা খুৎয়েক পীনবদা লুচিংবা অনিনা তরাম্না ওকখি ।

ইন্দো-পেসিফিক্ত মতেং পীনবা

মনিংতম্বা, অপুনবা , শান্তি লৈবা অমসুং নুংঙাই-য়াইফবা ইন্দো-পেসিফিক লমদম অমা লৈহনবদা ভারত অমসুং য়ুনাইতেস স্তেদকী মরক্ত অচেৎপা মরি লৈনবা অসি য়াম্না মরুওই । মসিগী মতেং পীনবা অসি অসিয়াননা মশক খঙবা, মালেমগী লোশিং ইনবা অমসুং অফবা লৈঙাক লৈবা; মনিং তম্না সমুদ্রগী শরুক্ত চৎথোক-চৎশিন তৌনবা, ওভরফ্লাইত য়াহনবা, মালেমগী লোগী মতুংইন্না সমুদ্রগী য়েৎনবশিং শান্তি ওইনা ৱারোইশিন পুরক্নবা থাজবা থমখি ।

ভারতমহাসাগর লমদমদা অপুনবগী ওইনা চেকশিন-থৌরাং পায়খৎপা লোয়ন্না চাউখৎ-থৌরাং অমসুং মীওইবগী মতেং পাংবদা ভারতকী থৌদাং য়ুনাইতেদ স্তেদনা থাগৎলি । লমদম অসিদা তুংকোইনা চৎনগদবা, অরোন-অথুপ লৈতবা চাউখৎ-থৌরাংগী থবক পায়খৎনবা ভারত অমসুং য়ু এসনা থাজবা থম্লি । ভারত্ত রিনিউয়েবল ইনর্জি প্রোজেকশিংদা য়ু এসকী ইন্তরনেসনেল দিবলপমেন্ত ফাইনান্স কোরপোরেসন(দি এফ সি)না দোল্লর মিল্লিয়ন ৬০০গী মতেং পীনবা লাউথোকখিবা অমসুং চহি অসিদগী ভারত্ত থবক হৌনবা দি এফ সিগী ৱারেপ অদু পি এম মোদী অমসুং প্রসিদেন্ত ত্রম্পনা তরাম্না ওকখি ।

মালেমগী ওইনা অমসুং ইন্দো-পেসিফিক লমদম চাউখৎনবা মখোয়গী লৈবাকশিংনা পীরিবা থাজবশিং অদু খঙজিল্লদুনা, চাউখৎত্রিবা লৈবাকশিংদা মতেং পাংনবা য়ু এস এ আই দি অমসুং ভারতকী মরক্ত অনৌবা মরি অমা শেমগৎনবা পি এম মোদী অমসুং প্রসিদেন্ত ত্রম্পনা য়ানখি ।

সাউথ চাইনা সিদা ৱাহন্থোক লৈনবা চৎন-কাংলোন অমা লৈনবা থবকশিংগী মতাংদা ভারত অমসুং য়ু এসনা খঙজিনখি অমসুং মালেমগী আইনগী মতুংইন্না লৈবাক পুম্নমক্কী ফংফম থোকপা হকশিং অমসুং অপাম্বশিং মাংহন্দনবা তকশিনখি ।

ভারত-য়ু এস-জপান নাকল অহুমগী মীফমশিং , ভারত অমসুং য়ু এসগী ফোরেন অমসুং দিফেন্স মিনিস্তরশিংগী ২+২ মীফমশিং, ভারত-য়ু এস-জপান-অস্ত্রেলিয়া নাকল মরিগী মীফমশিং পাংথোক্তুনা ৱা খন্নবা হেনগৎহন্নবা পি এম মোদী অমসুং প্রসিদেন্ত ত্রম্পনা ৱারেপ লৌখি ।

মালেমগী ওইনা লুচিংনবা মরুপ-মপাং ওইবা

য়ুনাইতেদ নেসন্স অমসুং মালেমগী অতৈ লুপশিং অওনবা পুরক্নবা অমসুং মপাঙ্গল কনখৎহন্নবা পুন্না থবক তৌমিন্নবা হায়না পি এম মোদী অমসুং প্রসিদেন্ত ত্রম্পনা থাজবা পীনখি । শেমদোক্লবা য়ু এন সেকুরিতি কাউন্সিলদা ভারতনা লেংদবা মেম্বর ওইবদা য়ু এসনা ভারতনা শৌগৎকনি হায়না প্রসিদেন্ত ত্রম্পনা অমুক হন্না থাজবা পীখি । ভারতনা নিউক্লিয়র সপ্লয়র গ্রুপতা থেংথদনা য়াওবদসু ভারত শৌগৎকনি হায়না মহাকনা অমুক হন্না থাজবা পীখি ।

চাউখৎলক্লিবা অমসুং চাউখৎত্রিবা লৈবাকশিংগী সোভরেন দেব অমা লিংখৎপগী মরুওইবা অদু ভারত অমসুং য়ু এসনা খঙখি ,মসিনা শেন পুরিবশিং অমসুং শেন শান্দোক্লিবশিং অরোন-অথুপ লৈতনা থবক তৌবা ঙমহনগনি । মালেমগী ওইনা অফবা মগুন লৈবা ইনফ্রাস্ত্রকচর শেমগৎনবা সরকার, লনাই অমসুং সিবিল সোসাইতি য়াওবা ব্লু দোত নেতৱার্ক শেমগৎনবা ৱাখল্লোল অদু পি এম মোদী অমসুং প্রসিদেন্ত ত্রম্পনা অপাম্বা ফোংদোকখি ।

ফাইনান্স, ত্রেনিং অমসুং লমজিংবগী খুৎথাংদা নুপীশিংগী লাইরিক তম্বা, শেন-থুমগী কান্নবা ফংহনবা অমসুং ওন্ত্রেপ্রেনিউয়রসিপকী থবকশিং ফংহনবগী মরুওইবা অদু পি এম মোদী অমসুং প্রসিদেন্ত ত্রম্পনা খঙজিনখি । ভারতকী বেতি বচাও বেতি পরাও অমসুং য়ু এসকী ৱুমেন গ্লোবেল দিবলপমেন্ত এন্দ প্রোসপেরিতিগী খুৎথাংদা নুপীশিংগী য়াইফনবা পায়খৎলিবা থবকশিং খঙজিনখি ।

অফগান মশানা লুচিংবা অমসুং অফগান মশাগী শান্তি অমসুং ৱাখল তামিন্নবগী থৌরাংশিংনা মরম ওইদুনা তুংকোইনা শান্তি থম্বা, হিংশা লৈহন্দবা, তেরোরিস্তশিং চংজফম পীদবা অমসুং হৌখিবা চহি ১৮দা ফংলকপশিং মাংহন্দনা থম্নবা থবকশিং ভারত অমসুং য়ু এসনা শৌগৎলি । অফগানিস্থানদা চাউখৎপা অমসুং শান্তি পুরক্নবা ভারতনা পায়খৎলিবা থবকশিং অদু প্রসিদেন্ত ত্রম্পনা তরাম্না ওকখি ।

মখল খুদিংমক্কী ঙমখৈ লান্না চৎথরকপা তেরোরিজমগী থবকশিং পি এম মোদী অমসুং প্রসিদেন্ত ত্রম্পনা কন্না য়ানিংদবা ফোংদোকখি । মখোয়গী লমদগী তেরোরিস্তশিংনা অতোপ্পা লৈবাক্ত খুৎথানবা থবক অমতা পায়খৎহন্দনবা মখোয়না পাকিস্থানদা খঙহনখি । অল-কাইদা, আইসিস, জাইস-ই-মোহমদ, লাস্কার-ই-তাইবা, হিজব-উল-মুজাহিদিন, হাক্কনি নেতৱার্ক , তি তি পি , দি-কম্পেনি অমসুং মখোয়না চৎমিন্নরিবশিংগী মথক্ত অকনবা থবক লৌখৎনবা লুচিংবা অনিনা য়ানখি ।

ললোন-ইতিক অমসুং ই-পাউগী থবকশিংগীদমক মনিংতম্বা অমসুং অশোই-অঙাম লৈতবা ইন্তরনেত লৈহন্নবা ভারত অমসুং য়ু এসনা য়ানখি । ই-পাউ অমসুং দেতা অশোই-অঙাম লৈতনা পীথোক পীশিন য়ানবা অনৌবা দিজিতেল সিস্তেম অমা লৈহনবগী মরুওইবা অদু ভারত অমসুং য়ু এসনা খঙজিনখি । নৌনা থোরক্লিবা তেক্নোলোজিশিং শীজিন্নবা মতমদা থেংনগদবা খুদোংচাদবশিং অদু মায়োক্ননবা মতেং পীনবা হেনগৎহনবা হায়না লুচিংবা অনিনা য়ানখি ।