য়োর এক্সিলেন্সী মেদাম রাস্ত্রপতি,
উপ রাস্ত্রপতি,
প্রধান মন্ত্রী,
নমিবিয়াগী ইকাই খুম্নরবা মন্ত্রীশিং,
মশক নাইরবা গেস্তশিং,
নামিবিয়াগী খ্বাইদগী ৱাংবা সিভিলিয়ন এৱার্দ - "ওর্দর ওফ দি মোস্ত এন্সিএন্ত ৱেল্ৱিৎছিয়া মিরাবিলিস" অসি রাস্ত্রপতিদগী ফংজবা অসি ঐহাক্কীদমক্তা চাউথোকচনীংঙাই অমসুং ইকাই খুম্ননিংঙাই ওইবা ৱাফম অমনি।
ঐহাক্না রাস্ত্রপতি, সরকার অমসুং নামিবিয়াগী মীয়ামদা থম্মোয় শেংনা থাগৎপা ফোংদোকচরি। ভারত মচা করোর 140গী মায়কৈদগী ঐহাক্না ইকায়খুম্নবা উৎচরি।
মরুপশিং,
এৱার্দ অসিগী মমিং থোনখিবা নামিবিয়াগী "ৱেল্বিৎছিয়া" পাম্বী অসি অচম্বা পাম্বী নত্তে। মসি মতমগী অহোংবা উবা ফংলবা ইমুং অমগী অহলশিংগা মান্নৈ। মসি নামিবিয়াগী মীয়ামগী লান্থেং, থৌনা অমসুং কলচরগী খুদম অমনি। মসি ভারত অমসুং নামিবিয়াগী মরক্তা লৈনরিবা অচেৎপা মরুপ-মপাং ওইবগী খুদম অমনি।
অমসুং ঙসিদি, মসিগা মরী লৈনবদা ঐহাক চাউথোকচবা ফাওই। ঐহাক্না এৱার্দ অসি নামিবিয়া অমসুং ভারতকী মীয়ামদা; মখোয়গী লেপ্তনা খুমাং চাউশিনবা অমসুং চাউখৎপা; অমসুং ঐখোয়গী থোইদোক হেন্দোকপা মরুপ-মপাং ওইবগী অচেৎপা মরীদা কত্থোকচরি।
মরুপশিং,
ঐখোয়গী অশেংবা মরুপশিং অদু কনানো হায়বদু ঐখোয়না খঙবা ঙমগদবা অসি অৱাবা মতমদা খক্তনি। ভারত অমসুং নামিবিয়ানা মখোয়গী নীংতম লানগী মতমদগী অমনা অমবু শৌগৎলি। ঐখোয়গী মরুপ-মপাং ওইবগী মরী অসি রাজনিতীদা য়ুম্ফম ওইদে, অদুবু ঐখোয়গী শরুক য়ামিন্নরিবা লান্থেং, মতেং পীনবা অমসুং অমনা অমবু থাজবা থম্বদা য়ুম্ফম ওইরি।
ঐখোয়গী মরী অসি ঐখোয়গী মান্নবা দেমোক্রেসী ভেল্যুশিং অমসুং হেন্না ফবা তুংলমচৎ অমগী মান্নবা মঙলানশিংনা মপাঙ্গল কনখৎহল্লি। লাক্কদৌরিবা মতম অসিদা, ঐখোয়না চাউখৎপগী লম্বীদা খুৎশম্নদুনা পুন্না চৎমিন্নগনি।
মরুপশিং,
নামিবিয়া অসি মালেমগী খ্বাইদগী চাউবা দাইমন্দ পুথোকপা লৈবাকশিংগী মনুংদা অমনি। অমসুং ভারতকী খ্বাইদগী চাউবা দাইমন্দ পোলিসিং ইন্দস্ত্রী লৈ - মদুসু ঐগী য়ুম ওইরিবা গুজরাতকী রাজ্যদা লৈ! ঐহাক্না থাজবা থম্লি মদুদি তুংলমচৎতা, ঐখোয়গী পার্তনরশিপ অসিনা হায়রিবা দাইমন্দশিং অসিগুম্না মঙাল থোক্কনি।
মরম অদুনা ঐখোয় পুনশিল্লসি অমসুং রাস্ত্রপতিনা পুন্সি শাংনা অমসুং হকচাং ফনা লৈনবা, নামিবিয়াগী মীয়ামগী নুংঙাইবা অমসুং য়াইফবা ওইনবা অমসুং ভারত অমসুং নামিবিয়াগী মরক্তা লৈরিবা মরুপ-মপাং ওইবগী মরী অসি মতম শাংনা চৎনবগীদমক ঐখোয়গী য়াইফ-মঙ্গোল পীরসি।
হন্না-হন্না থাগৎচরি।
