ইকায়খুম্নরবা,
লৈবাক অনিমক্কী মীহুৎ কাংবুশিং,
অদোম ভারত্তা তরাম্না ওকপদা ঐঙোন্দা অপেনবা পোকই।
ঙসি অসি ভারত অমসুং ওমানগী মরক্তা লৈনরিবা মরীশিংগী পুৱারি ওইরবা নুমিৎ অমনি।
ঙসি চহি ২৬গী মতুংদা, ওমানগী সুলতান্না সরকারগী খোঙচৎ অমদা ভারত্তা লাক্লে।
ঐগা লোয়ননা ভারতমচা করোর ১৪০না অদোম তরাম্না ওক্নবগী খুদোংচাবা অমা ফংলে।
লৈবাক অসিগী মীয়ামগী মহুৎ শীন্দুনা, ঐনা অদোম থম্মোয় শেংনা থাগৎপা ফোঙদোকচরি।
মরুপশিং,
চহিচা কয়া ভারত অমসুং ওমান তৎনবা ঙমদ্রবা অচেৎপা মরুপ-মপাংগী মরী লৈনরক্লি।
অরাবিয়ান সমুদ্রগা অরোইবা অমদা ভারত লৈরি অমসুং অতোপ্পা অরোইবা অমদা ওমান লৈরি।
অমগা অমগা নকশিন্নবা হায়বসি লম্মিৎ-তুমৎকী মখা পোন্দে, চহি চহি লিশিং কয়া শুরবা ঐখোয়গী ললোন-ইতিক, ঐখোয়গী নাৎ অমসুং ঐখোয়গী মান্নবা মরুওইবশিংদা মমি তারে।
মশেক মঙাল নাইরবা পুৱারি অসিগী মপাঙ্গলদা, ঐখোয়না অফবা তুংলমচৎ অমা শেমগৎলি।
ঙসি ঐখোয়না অনৌবা ‘ইন্দিয়া-ওমান জোইন্ত ভিজন- এ পার্তনরশিপ ফোর ফিউচর’ অমা চৎনরে।
মসিগী অপুনবা পান্দম অসিদা, তোঙান-তোঙানবা হিরম ১০দা চপ চাবা এক্সন-পোইন্তশিং য়ানরে।
মসিগী জোইন্ত ভিজন অসিনা ঐখোয়গী মরীদা অনৌবা অমসুং মতমগা চুনবা মওং অমা পীগনি হায়না ঐনা থাজৈ।
নাকল অনিগী মরক্তা হৌজিক সেপা এগ্রিমেন্তগী খন্ন-নৈনবা চৎথরিবা অসিদা ঐ হরাওই।
হায়রিবা ৱারি শানবা অসিগী তাঙ্কক অনি মাইপাক্না লোইশিনখ্রে অমসুং মরুওইবা হিরম কয়াদা য়ানবা পুরকখ্রে।
মসিগী য়ানবা অদু অথুবা মতমদা ঐখোয় খুৎয়েক পীনবা ঙমগনি অমসুং মসিনা ঐখোয়গী শেন-থুমগী মতেং পাংনবদা অনৌবা পন্দুপ অমা হাংদোক্কনি হায়না থাজবা থম্লি।
মালেমগী থাক ফাওবদা, ভারত অমসুং ওমান নক্না মতেং পাংনবদা খুমাঙচাউশিল্লি।
ওমান্না গেস্ত লৈবাক অমা ওইনা ভারতনা মাইপাক্না জি-২০গী প্রসিদেন্ত ওইবদা মরুওইবা থৌদাং অমা লৌখি।
মশিং য়াম্লবা ভারত্তগী হৌখিবা মীওই কয়া ওমান অসি মখোয়গী অনিশুবা য়ুমনি হায়না লৌরি।
হায়রিবা মীওইশিং অসি ঐখোয়গী অচেৎপা মরীশিং অমসুং ঐখোয়গী মরুপ-মপাং ওইবগী অহিংবা খুদমশিংনি।
মখোয়গী য়াইফনবা থবক তৌবগীদমক ঐনা সুলতান হাইথম থাগৎপা ফোঙদোকচরি।
ঙসিগী মীফম অসিনা হিরম কয়াদা ঐখোয় মতেং পাংনরিবা অসি মখা তানা মপাঙ্গল কনখৎহনগনি হায়না ঐনা থাজৈ।
ইকায়খুম্নরবা,
অমুক হন্না অদোম ভারত্তা তরাম্না ওকচরি।
হৌখিবা থাদা ওমান ২০২৪ তি-২০ ক্রিকেত ৱার্ল্দ কপ ক্বাইলিফাই ওইরে। মসিগীদমক ঐনা অদোম থাগৎপা ফোঙদোকচরি অমসুং অদোমগী মফমদা য়াইফ-পাউজেল পীজরি।
অদোমগী হৌদোকপগী ৱারোল পীনবা অদোমগী মফমদা ঐনা হায়জরি।
