ইকায়খুম্নরবা,
ভারতমচা করোর ১৪০ গী মহুৎশীন্দুনা, ঐ অমসুং ঐগী মীহুৎ কাংবু তরাম্না ওকপগীদমক ঐনা তৌবীমল খঙবা ফোঙদোকচরি। ভারত-জোরদানগী মরীশিং অনৌবা থাকশিংদা পুখৎকনি হায়বগী থাজবা ঐনা থম্লি। অদোমগী মরুপ-মপাং ওইবা অমসুং অদোম্না ভারত্ত অচেৎপা থাজবা থম্বগীদমক ঐনা অদোম থম্মোয় শেংনা থাগৎপা ফোঙদোকচরি। চহি অসিদা, ঐখোয় কুতিনিগী মরী লৈনরকপা চহি ৭৫ মপুংফারকপগী থৌরম পাংথোক্লি। মসিগী খুমাঙচাউশিনবা অসিনা লাক্লিবা চহি কয়াদা অনৌবা থৌনাগা লোয়ননা মাঙলোমদা চঙশিন্নবা মখা তানা ঐখোয়দা ইথিল পীগনি। ঙসিগী মীফম অসিনা ঐখোয়গী মরীশিংদা অনৌবা ইনোৎ পীগনি হায়না ঐনা থাজৈ। ঐখোয়না মখা তানা ললোন-ইতিক, হার, দিজিতেল তেক্নোলোজি, ইনফ্রাষ্ট্রকচর অমসুং মীগা মীগা লৈনবা মরীশিংদা মতেং পাংনগনি।
ইকায়খুম্নরবা,
মালেমগী থাক্ত ঐখোয় অচেৎপা মরীশু লৈনরি। হেক হৌবদগী হৌনা গজাগী ফিবমদা অদোম্না মরুওইবা থৌদাং অমা লৌদুনা লাক্লি। লমদম অসিদা শান্তি অমসুং তুংদু-লৈতাবা লাক্কনি হায়বগী থাজবা ঐখোয়না থম্লি। ঐখোয়না অমতা ওইনা নাখৈ শেংনা তেরোরিজমগী মায়োক্ত লৈরি। অদোমগী লুচিংবা মখাদা, তেরোরিজম, এক্সত্রিমিজম অমসুং রেদিকেলাইজেসনগী মায়োক্ত মীওইবা খুন্নাইদা অদোম্না অকনবা পাউজেল অমা পীরে। মরুওইবা হিরম অসিদা মখা তনা মতেং পাংনবা হেনগৎহন্নবা ঐখোয় খন্নরে। ২০১৮ দা অদোমগী ভারত খোঙচৎ মনুংদা, ইস্লামিক হেরিতেচগী মীফম অমা ঐখোয় শরুক য়াখি।
এক্সত্রিমিজম থেংন্নবা মীৎয়েং থম্বা ২০১৫ দা য়ু.এনদা পাংথোকপা থৌরম অমগী নাকলদা ঐখোয় অহানবা ওইনা উনখিবা অদু ঐ নিংশিংলি। মতম অদুদা, অদোম্না হিরম অসিদা পুক্নিং থৌগৎপা ৱাফমশিং ফোঙদোকখি। ময়াই ওইনা চৎনবা অদোমগী থবকশিং অসি লমদম অসি খক্তগী নত্তনা মালেমগী শান্তি পুরক্নবসু য়াম্না মরুওই। মাইকৈ অসিদা পুন্না ঐখোয় মখা তানা মাঙলোমদা চৎমিন্নগনি। হিরম কয়াদা ঐখোয় মতেং পাংনবা ঐখোয় মখা তানা ফগৎহনগনি। অমুক হন্না, ঐনা অদোম্না তরাম্না ওকপগীদমক অদোম অমসুং জোরদানগী মীয়াম ঐনা থম্মোয় শেংনা থাগৎপা ফোঙদোকচরি।
