প্রধান মন্ত্রী শ্রী নরেন্দ্র মোদীনা ঙসি লৈবাকসিগী অচৌবা অমদি অপিকপা ময়োল্লম খুদিংমক ভারতকী শেন্মিৎলোনগী মকোন ওইরক্লগনি, অদুম ওইনমক, দিল্লীনা লৈবাক্কী কোনুং ওইনা ভারতবু মালেমদা মফম কল্লিবা ২১ শুবা চহীচাগী মতিংগী মমি তাহনগদবনি হায়না ফোঙদোকখ্রে। লিরবা ময়োল্লম অসি অনৌবা মতমগা চুননবা শেমগৎপগী থৌরাং কয়া পায়খৎলি হানা মহাক্না হায়খি। ৱাফমসি ভিদিও কন্ফরেন্সিংগী খুত্থাঙদা লৈবাকসিগী অহানবা দ্রাইভর য়াওদবা শঙ্গাবা অমদি দিল্লী মেত্রোগী এয়রপোর্ত এক্সপ্রেস লাইন্দা নেসনেল কম্মন মোবিলিতী কার্দ হৌদোক্লবা মতুংদা ৱা ঙাঙবদা ফোঙদোকখিবনি।
শ্রী মোদীনা হায়খিবদা ইলেক্ত্রিক মোবিলিতীবু তেক্স রিবেত পীদুনা ইন্সেন্তিভাইজ তৌরে। কোনুং অসিগী অরিবা মচাক মথুমশিং অনৌবা তেক্নোলোজীদা য়ুম্ফম ওইদুনা অহোংবা পুরক্লি। ৱাখল্লোন অসি কোল্লুপ কয়া রিগুলরাইজ তৌদুনা স্লমদা লৈবা মীওইশিংগী পুন্সি মহিং ফগৎহনবা অমদি লৈঙাক্কী অরিবা শঙশিংবু অকোয়বগী ফীভমগা চুনবা অনৌবা স্ত্রকচর ওন্থোকপসিদা মমি তারি হায়না মহাক্না হায়খি।
দিল্লী অসি লিরবা লম কোয়বশিংগী লমথুংফম ওইবগা লোয়ননা ময়োল্লম অসিদা ২১শুবা চহীচাগী পুম্নিং চিংশিনগদবা মচাকশিং শেমগৎনবা থবক পায়খৎলি হায়না প্রধান মন্ত্রীনা ফোঙদোকখি। দিল্লী অসি মালেমগী কন্ফরেন্স, মালেমগী একজিবিসন অমদি মালেমগী বিজিনেস তুরিজমগী পাম্নবা লমথুংফম ওইরকপগা লোয়ননা লৈবাকসিগী খ্বাইদগী চাউবা সেন্তর কোনুংগী দ্বারকা লোকেলিতীদা শাগৎলি। মতৌ অসুম্না অনৌবা পার্লিয়ামেন্ত বিল্দিংগী থবক য়াম্না চাউবা ভারত ভন্দনা পার্ক্কা লোয়ননা শেমগৎনবা থবক হৌখ্রে। মসিনা দিল্লীদা লৈবা মীওই লিশিং কয়াদা থবক পীবতা নত্তনা ময়োল্লম অসিগী শক্তমসু হোংহল্লগনি।
কোনুংদা লৈরিবা মিয়ামদা অহানবা দ্রাইভর য়াওদবা মেত্রো ওপরেসনগী অমদি দিল্লী মেত্রোগী এয়রপোর্ত এক্সপ্রেস লাইন্দা নেসনেল মোবিলিতী কার্দ হৌদোকপগী য়াইফ পাউজেল পীরদুনা প্রধান মন্ত্রীনা “দিল্লী অসি মীওই করোর ১৩০ হেনবগী শেন্মিৎলোন অমসুং মরুওইবা শক্তিগী কোনুংনি, মসিগী মতিং ফুদোকহনগদবনি” হায়না ফোঙদোকখি।
