ആന്ധ്രാപ്രദേശിലെ കർണൂലിൽ വിവിധ വികസന പദ്ധതികളുടെ ഉദ്ഘാടന വേളയിൽ പ്രധാനമന്ത്രി നടത്തിയ പ്രസം​ഗം

സഹോദരീ സഹോദരന്മാരേ, നിങ്ങൾക്കെല്ലാവർക്കും ആശംസകൾ!

ആന്ധ്രപ്രദേശ് ഗവർണർ എസ്. അബ്ദുൾ നസീർ ജി; ജനപ്രിയനും കഠിനാധ്വാനിയുമായ മുഖ്യമന്ത്രി ശ്രീ ചന്ദ്രബാബു നായിഡു ജി; കേന്ദ്ര മന്ത്രിമാരായ കെ. റാംമോഹൻ നായിഡു ജി; ചന്ദ്രശേഖർ പെമ്മസാനി ജി; ഭൂപതിരാജു ശ്രീനിവാസ വർമ്മ ജി; ഉപമുഖ്യമന്ത്രി പവൻ കല്യാൺ ജി; സംസ്ഥാന ​ഗവൺമെന്റിലെ മന്ത്രി നാരാ ലോകേഷ് ജി; മറ്റ് എല്ലാ മന്ത്രിമാരും ; ബിജെപി സംസ്ഥാന പ്രസിഡന്റ് പി.വി.എൻ. മാധവ് ജി; പാർലമെന്റ് അംഗങ്ങളേ, എംഎൽഎമാരേ, ഞങ്ങളെ അനുഗ്രഹിക്കാൻ ഇവിടെ ഇത്രയധികം ഒത്തുകൂടിയ എന്റെ പ്രിയപ്പെട്ട സഹോദരീ സഹോദരന്മാരേ!

ഒന്നാമതായി, അഹോബിലത്തിലെ നരസിംഹ സ്വാമിയുടെയും മഹാനന്ദീശ്വര സ്വാമിയുടെയും മുമ്പിൽ ഞാൻ വണങ്ങുന്നു. നമുക്കെല്ലാവർക്കും വേണ്ടി മന്ത്രാലയത്തിലെ ഗുരു ശ്രീ രാഘവേന്ദ്ര സ്വാമിയുടെ അനുഗ്രഹവും ഞാൻ തേടുന്നു.

സുഹൃത്തുക്കളേ,

ദ്വാദശ ജ്യോതിർലിംഗ സ്തോത്രം പാരായണത്തിൽ ഇങ്ങനെ പറയുന്നു: सौराष्ट्रे सोमनाथं च श्रीशैले मल्लिकार्जुनम्। അതായത്, പന്ത്രണ്ട് ജ്യോതിർലിംഗങ്ങളിൽ, ആദ്യത്തേത് ഭഗവാൻ സോമനാഥനും രണ്ടാമത്തേത് ഭഗവാൻ മല്ലികാർജുനനുമാണ്. ഗുജറാത്തിലെ സോമനാഥഭൂമിയിൽ ജനിച്ചതും, ബാബ വിശ്വനാഥന്റെ വാസസ്ഥലമായ കാശിയുടെ പുണ്യഭൂമിയിൽ സേവനമനുഷ്ഠിക്കാൻ അവസരം ലഭിച്ചതും, ഇന്ന് ശ്രീശൈലത്തിന്റെ അനുഗ്രഹം സ്വീകരിക്കുന്നതും എന്റെ ഭാഗ്യമാണ്.

സുഹൃത്തുക്കളേ,

ശ്രീശൈലം സന്ദർശിച്ച ശേഷം, ശിവാജി സ്പൂർത്തി കേന്ദ്രം സന്ദർശിക്കാനും അവിടെ ശ്രദ്ധാഞ്ജലി അർപ്പിക്കാനും എനിക്ക് അവസരം ലഭിച്ചു. ഈ വേദിയിൽ നിന്ന് ഞാൻ ഛത്രപതി ശിവാജി മഹാരാജിനെ വണങ്ങുന്നു. അല്ലാമ പ്രഭു, അക്കമഹാദേവി തുടങ്ങിയ ശിവഭക്തർക്ക് ഞാൻ എന്റെ ശ്രദ്ധാഞ്ജലികൾ അർപ്പിക്കുന്നു. ശ്രീ ഉയ്യലവാഡ നരസിംഹ റെഡ്ഡി ഗാരു, ഹരി സർവോത്തമ റാവു തുടങ്ങിയ മഹാനായ സ്വാതന്ത്ര്യ സമര സേനാനികളെയും ഞാൻ ആദരപൂർവ്വം വണങ്ങുന്നു.

സുഹൃത്തുക്കളേ,

ആന്ധ്രപ്രദേശ് അഭിമാനത്തിന്റെയും സംസ്കാരത്തിന്റെയും നാടാണ്, അതേസമയം, ശാസ്ത്രത്തിന്റെയും നവീകരണത്തിന്റെയും കേന്ദ്രം കൂടിയാണ്. അനന്തമായ സാധ്യതകളുടെയും അപാരമായ യുവശക്തിയുടെയും നാടാണിത്. ആന്ധ്രയ്ക്ക് ആവശ്യമായത് ശരിയായ കാഴ്ചപ്പാടും ശരിയായ നേതൃത്വവുമായിരുന്നു. ഇന്ന്, ചന്ദ്രബാബു നായിഡു ഗാരു, പവൻ കല്യാൺ ഗാരു എന്നിവരുടെ രൂപത്തിൽ ആന്ധ്രയ്ക്ക് ആ ദീർഘവീക്ഷണമുള്ള നേതൃത്വമുണ്ട്, അതോടൊപ്പം കേന്ദ്ര ​ഗവൺമെന്റിന്റെ പൂർണ്ണ പിന്തുണയും ഉണ്ട്.

സുഹൃത്തുക്കളേ,

കഴിഞ്ഞ 16 മാസമായി, ആന്ധ്രാപ്രദേശിൽ വികസനത്തിന്റെ വേഗത വളരെ വേഗത്തിലാണ്. ഇരട്ട എഞ്ചിൻ ​ഗവൺമെന്റിനു കീഴിൽ അഭൂതപൂർവമായ പുരോഗതി നടക്കുന്നു. ഇന്ന്, ഡൽഹിയും അമരാവതിയും ഒരുമിച്ച് ദ്രുതഗതിയിലുള്ള വികസനത്തിലേക്ക് മുന്നേറുകയാണ്. ചന്ദ്രബാബു ശരിയായി പറഞ്ഞതുപോലെ, ഈ വേഗത കാണുമ്പോൾ, 2047 ആകുമ്പോഴേക്കും, ഭാരതം സ്വാതന്ത്ര്യത്തിന്റെ 100 വർഷം ആഘോഷിക്കുമ്പോൾ, "വികസിത് ഭാരത്" (വികസിത ഇന്ത്യ) തീർച്ചയായും യാഥാർത്ഥ്യമാകുമെന്ന് എനിക്ക് ആത്മവിശ്വാസത്തോടെ പറയാൻ കഴിയും. അൽപ്പം മുൻപാണ് ചന്ദ്രബാബു വളരെ വികാരഭരിതനായി സംസാരിച്ചത്, 21-ാം നൂറ്റാണ്ട് ഭാരതത്തിന്റേതാണെന്ന് എനിക്ക് പൂർണ്ണ ബോധ്യത്തോടെ പറയാൻ കഴിയും. ഈ നൂറ്റാണ്ട് ഭാരതത്തിലെ 140 കോടി ജനങ്ങളുടേതാണ്.

സുഹൃത്തുക്കളേ,

ഇന്നും റോഡുകൾ, വൈദ്യുതി, റെയിൽവേ, ഹൈവേകൾ, വ്യാപാരം എന്നിവയുമായി ബന്ധപ്പെട്ട നിരവധി പദ്ധതികൾ ഉദ്ഘാടനം ചെയ്യപ്പെടുകയോ തറക്കല്ലിടൽ നടത്തുകയോ ചെയ്തിട്ടുണ്ട്. ഈ പദ്ധതികൾ സംസ്ഥാനത്തെ കണക്റ്റിവിറ്റി ശക്തിപ്പെടുത്തുകയും വ്യവസായത്തെ പ്രോത്സാഹിപ്പിക്കുകയും ജനങ്ങളുടെ ജീവിതം സുഗമമാക്കുകയും ചെയ്യും. കർണൂൽ മേഖലയ്ക്കും സമീപ പ്രദേശങ്ങൾക്കും ഈ സംരംഭങ്ങളിൽ നിന്ന് വളരെയധികം പ്രയോജനം ലഭിക്കും. ഈ പദ്ധതികൾക്ക് സംസ്ഥാനത്തെ എല്ലാ ജനങ്ങളെയും ഞാൻ അഭിനന്ദിക്കുന്നു.

സുഹൃത്തുക്കളേ,

ഏതൊരു രാജ്യത്തിന്റെയോ സംസ്ഥാനത്തിന്റെയോ വികസനത്തിന് ഊർജ്ജ സുരക്ഷ നിർണായകമാണ്. ഇന്ന്, ഊർജ്ജ മേഖലയിൽ ഏകദേശം 3,000 കോടി രൂപയുടെ ഒരു പ്രസരണ പദ്ധതി ഇവിടെ ആരംഭിച്ചു. ഇത് രാജ്യത്തിന്റെ ഊർജ്ജ ശേഷി കൂടുതൽ വർദ്ധിപ്പിക്കും.

സുഹൃത്തുക്കളേ,

ദ്രുതഗതിയിലുള്ള വികസനത്തിനിടയിൽ, മുൻകാല സ്ഥിതി നാം മറക്കരുത്. ഏകദേശം 11 വർഷം മുമ്പ് കോൺഗ്രസ് ​ഗവൺമെന്റ് കേന്ദ്രത്തിലായിരുന്നപ്പോൾ, രാജ്യത്തെ പ്രതിശീർഷ വൈദ്യുതി ഉപഭോഗം ശരാശരി 1,000 യൂണിറ്റിൽ താഴെയായിരുന്നു. രാജ്യം പലപ്പോഴും വൈദ്യുതി തടസ്സങ്ങൾ നേരിടേണ്ടി വന്നു, പല ഗ്രാമങ്ങളിലും വൈദ്യുതി തൂണുകൾ പോലും ഉണ്ടായിരുന്നില്ല. ഇന്ന്, സംശുദ്ധ ഊർജ്ജം മുതൽ മൊത്തം ഊർജ്ജ ഉൽപ്പാദനം വരെയുള്ള എല്ലാ മേഖലകളിലും ഭാരതം പുതിയ റെക്കോർഡുകൾ സൃഷ്ടിക്കുകയാണ്. രാജ്യത്തെ എല്ലാ ഗ്രാമങ്ങളിലും വൈദ്യുതി ഇപ്പോൾ എത്തിയിരിക്കുന്നു. പ്രതിശീർഷ വൈദ്യുതി ഉപയോഗം 1,400 യൂണിറ്റായി ഉയർന്നു, വ്യവസായങ്ങൾക്കും വീടുകൾക്കും ആവശ്യമായ വൈദ്യുതിയുണ്ട്.

സുഹൃത്തുക്കളേ,

ആന്ധ്രപ്രദേശ് ഈ ഊർജ്ജ വിപ്ലവത്തിന്റെ പ്രധാന കേന്ദ്രങ്ങളിലൊന്നാണ്. ചന്ദ്രബാബുവിന്റെ നേതൃത്വത്തിൽ, ശ്രീകാകുളം മുതൽ അംഗുൾ വരെയുള്ള പ്രകൃതിവാതക പൈപ്പ്ലൈൻ പദ്ധതി ഇന്ന് ആരംഭിച്ചു. ഈ പൈപ്പ്‌ലൈൻ ഏകദേശം 15 ലക്ഷം വീടുകളിലേക്ക് ഗ്യാസ് വിതരണം ചെയ്യും. പ്രതിദിനം 20,000 സിലിണ്ടറുകൾ നിറയ്ക്കാൻ ശേഷിയുള്ള ഒരു എൽപിജി ബോട്ട്ലിംഗ് പ്ലാന്റ് ഇന്ന് ചിറ്റൂരിൽ ഉദ്ഘാടനം ചെയ്തു. ഇത് പ്രാദേശിക ഗതാഗത, സംഭരണ ​​മേഖലകളിൽ പുതിയ തൊഴിലവസരങ്ങൾ സൃഷ്ടിക്കുകയും യുവാക്കൾക്ക് പുതിയ അവസരങ്ങൾ നൽകുകയും ചെയ്യും.

സുഹൃത്തുക്കളേ,

ഇന്ന്, 'വികസിത് ഭാരത്' എന്ന ലക്ഷ്യം വേഗത്തിൽ കൈവരിക്കുന്നതിനായി രാജ്യത്തുടനീളം മൾട്ടി-മോഡൽ ഇൻഫ്രാസ്ട്രക്ചർ വികസിപ്പിച്ചുകൊണ്ടിരിക്കുന്നു. ഗ്രാമങ്ങളിൽ നിന്ന് നഗരങ്ങളിലേക്കും നഗരങ്ങളിൽ നിന്ന് തുറമുഖങ്ങളിലേക്കും കണക്റ്റിവിറ്റിയിൽ ഞങ്ങൾ ശ്രദ്ധ കേന്ദ്രീകരിക്കുന്നു. സബ്ബാവാരത്തിനും ഷീലാനഗറിനും ഇടയിലുള്ള പുതിയ ഹൈവേ കണക്റ്റിവിറ്റിയെ കൂടുതൽ ശക്തിപ്പെടുത്തും. റെയിൽവേ മേഖലയിലും ഒരു പുതിയ യുഗം ആരംഭിച്ചു. പുതിയ റെയിൽവേ ലൈനുകൾ ആരംഭിക്കുകയും റെയിൽ ഫ്ലൈഓവറുകൾ നിർമ്മിക്കുകയും ചെയ്യുന്നതോടെ യാത്ര എളുപ്പമാകും, ഈ മേഖലയിലെ വ്യവസായങ്ങൾ പുതിയ ഗതിവേഗം നേടും.

സുഹൃത്തുക്കളേ,

ഇന്ന്, 2047 ഓടെ ഒരു 'വികസിത് ഭാരത്' നിർമ്മിക്കാനുള്ള ദൃഢനിശ്ചയം നമുക്കുണ്ട്. "സ്വർണ്ണ (സുവർണ്ണ) ആന്ധ്ര" എന്ന ദർശനത്തിൽ നിന്ന് ഈ ദേശീയ ദൗത്യം പുതിയ ഊർജ്ജം നേടുകയാണ്. സാങ്കേതികവിദ്യയുടെ കാര്യത്തിൽ, ആന്ധ്രാപ്രദേശും അവിടുത്തെ യുവാക്കളും എപ്പോഴും മുൻപന്തിയിലായിരുന്നുവെന്ന് നമുക്കെല്ലാവർക്കും അറിയാം. ഇരട്ട എഞ്ചിൻ ​ഗവൺമെന്റിനു കീഴിൽ ആന്ധ്രയുടെ അപാരമായ സാധ്യതകൾ ഞങ്ങൾ കൂടുതൽ വികസിപ്പിക്കുകയാണ്.

സുഹൃത്തുക്കളേ,

ഇന്ന്, ഭാരതത്തിലെയും ആന്ധ്രാപ്രദേശിലെയും വികസനത്തിന്റെ വേഗതയും വ്യാപ്തിയും ലോകം മുഴുവൻ അംഗീകരിക്കുന്നു. രണ്ട് ദിവസം മുമ്പ്, ഗൂഗിൾ ആന്ധ്രാപ്രദേശിൽ ഒരു പ്രധാന നിക്ഷേപം പ്രഖ്യാപിച്ചു. ആന്ധ്രാപ്രദേശിൽ ഗൂഗിൾ ഭാരതത്തിന്റെ ആദ്യത്തെ ആർട്ടിഫിഷ്യൽ ഇന്റലിജൻസ് ഹബ് സ്ഥാപിക്കാൻ പോകുന്നു. ഇന്നലെ ഞാൻ ഗൂഗിളിന്റെ സിഇഒയുമായി സംസാരിച്ചപ്പോൾ, അദ്ദേഹം എന്നോട് പറഞ്ഞു, “യുണൈറ്റഡ് സ്റ്റേറ്റ്സിന് പുറത്തുള്ള നിരവധി രാജ്യങ്ങളിൽ ഞങ്ങൾക്ക് നിക്ഷേപങ്ങളുണ്ട്, പക്ഷേ വരാനിരിക്കുന്ന ഞങ്ങളുടെ ഏറ്റവും വലിയ നിക്ഷേപം ആന്ധ്രാപ്രദേശിലായിരിക്കും.” ഈ പുതിയ എഐ ഹബ്ബിൽ ശക്തമായ എഐ അടിസ്ഥാനസൗകര്യം, ഡാറ്റാ സെന്റർ ശേഷി, വലിയ തോതിലുള്ള ഊർജ്ജ സ്രോതസ്സുകൾ, വികസിപ്പിച്ച ഫൈബർ-ഒപ്റ്റിക് നെറ്റ്‌വർക്ക് എന്നിവ ഉൾപ്പെടും.

സുഹൃത്തുക്കളേ,

ഗൂഗിളിന്റെ എഐ ഹബ് നിക്ഷേപത്തിന്റെ ഭാഗമായി, ഒരു പുതിയ ഇന്റർനാഷണൽ സബ്സീ ഗേറ്റ്‌വേയും  നിർമ്മിക്കും. ഭാരതത്തിന്റെ കിഴക്കൻ തീരത്തെ വിശാഖപട്ടണവുമായി നേരിട്ട് ബന്ധിപ്പിക്കുന്ന ഒന്നിലധികം അന്താരാഷ്ട്ര സബ്‌സീ കേബിളുകൾ ഇതിൽ ഉൾപ്പെടും.

സുഹൃത്തുക്കളേ,

ഈ പദ്ധതി വിശാഖപട്ടണത്തെ AI-യുടെയും കണക്റ്റിവിറ്റിയുടെയും ഒരു ആഗോള കേന്ദ്രമായി സ്ഥാപിക്കും. ഇത് ഭാരതത്തിന് മാത്രമല്ല, മുഴുവൻ ലോകത്തിനും സേവനം നൽകും. ഈ നേട്ടത്തിന് ആന്ധ്രാപ്രദേശിലെ ജനങ്ങളെ ഞാൻ ഹൃദയപൂർവ്വം അഭിനന്ദിക്കുന്നു, ചന്ദ്രബാബുവിന്റെ ദീർഘവീക്ഷണമുള്ള നേതൃത്വത്തെ ആഴത്തിൽ അഭിനന്ദിക്കുന്നു.

സുഹൃത്തുക്കളേ,

ഭാരതത്തിന്റെ വികസനത്തിന് ആന്ധ്രാപ്രദേശിന്റെ വികസനം അത്യന്താപേക്ഷിതമാണ്. ആന്ധ്രയുടെ വളർച്ചയ്ക്ക് രായലസീമയുടെ വികസനം ഒരുപോലെ പ്രധാനമാണെന്ന് ഞാൻ ഉറച്ചു വിശ്വസിക്കുന്നു. കർണൂലിന്റെ ഭൂമിയിൽ ഇന്ന് ആരംഭിച്ച പദ്ധതികൾ രായലസീമയിലെ എല്ലാ ജില്ലകളിലും തൊഴിലവസരങ്ങളുടെയും സമൃദ്ധിയുടെയും പുതിയ വാതിലുകൾ തുറക്കും. ഈ പദ്ധതികൾ മുഴുവൻ മേഖലയിലും വ്യാവസായിക വളർച്ചയെ ത്വരിതപ്പെടുത്തും.

സുഹൃത്തുക്കളേ,

ആന്ധ്രാപ്രദേശിന്റെ ദ്രുതഗതിയിലുള്ള പുരോഗതി ഉറപ്പാക്കാൻ നാം പുതിയ വ്യാവസായിക ഇടനാഴികളും കേന്ദ്രങ്ങളും സൃഷ്ടിക്കണം. ഇക്കാര്യത്തിൽ, ആന്ധ്രാപ്രദേശിന്റെ പുതിയ വ്യാവസായിക സ്വത്വം എന്ന നിലയിൽ ​ഗവൺമെന്റ് ഓർവക്കലിനെയും കൊപ്പർത്തിയെയും വികസിപ്പിക്കുന്നു. ഓർവക്കലിലും കൊപ്പർത്തിയിലും നിക്ഷേപങ്ങൾ വർദ്ധിക്കുന്നതിനനുസരിച്ച്, യുവാക്കൾക്കായി പുതിയ തൊഴിലവസരങ്ങൾ നിരന്തരം സൃഷ്ടിക്കപ്പെടുന്നു.

സുഹൃത്തുക്കളേ,

ഇന്ന്, ലോകം ഭാരതത്തെ 21-ാം നൂറ്റാണ്ടിലെ പുതിയ നിർമ്മാണ കേന്ദ്രമായി കാണുന്നു. ഈ വിജയത്തിന്റെ ഏറ്റവും വലിയ അടിത്തറ 'ആത്മനിർഭർ ഭാരത്' (സ്വയം പര്യാപ്തമായ ഇന്ത്യ) എന്ന ദർശനമാണ്. നമ്മുടെ ആന്ധ്രാപ്രദേശ് ആത്മനിർഭർ ഭാരതിന്റെ പ്രധാന കേന്ദ്രങ്ങളിലൊന്നായി മാറുകയാണ്.

സുഹൃത്തുക്കളേ,

ആന്ധ്രപ്രദേശിന്റെ യഥാർത്ഥ സാധ്യതകളെ അവഗണിച്ചുകൊണ്ട് കോൺഗ്രസ് ​ഗവൺമെന്റുകൾ സംസ്ഥാനത്തിന് മാത്രമല്ല, മുഴുവൻ രാജ്യത്തിനും ദോഷം വരുത്തിവച്ചു. രാജ്യത്തിന്റെ വളർച്ചയ്ക്ക് നേതൃത്വം നൽകാൻ കഴിയുമായിരുന്ന ഒരു സംസ്ഥാനം സ്വന്തം വികസനത്തിനായി പോരാടേണ്ടിവന്നു. എൻ‌ഡി‌എ ​ഗവൺമെന്റിന് കീഴിൽ ആന്ധ്രാപ്രദേശിന്റെ ചിത്രം മാറുന്നതിൽ ഞാൻ സന്തുഷ്ടനാണ്. ചന്ദ്രബാബു ജിയുടെ നേതൃത്വത്തിൽ, ആന്ധ്രാപ്രദേശ് 'ആത്മനിർഭർ ഭാരത്' എന്ന പുതിയ ശക്തികേന്ദ്രമായി ഉയർന്നുവരുന്നു. ആന്ധ്രയിലുടനീളം ഉൽ‌പാദനം അതിവേഗം വികസിച്ചുകൊണ്ടിരിക്കുന്നു. നിമ്മലുരുവിൽ അഡ്വാൻസ്ഡ് നൈറ്റ് വിഷൻ ഫാക്ടറിയുടെ ആരംഭം പ്രതിരോധ മേഖലയിൽ സ്വയംപര്യാപ്തത കൈവരിക്കുന്നതിനുള്ള മറ്റൊരു ചുവടുവയ്പ്പാണ്. നൈറ്റ് വിഷൻ ഉപകരണങ്ങൾ, മിസൈൽ സെൻസറുകൾ, ഡ്രോൺ ഗാർഡ് സംവിധാനങ്ങൾ എന്നിവ നിർമ്മിക്കാനുള്ള ഇന്ത്യയുടെ കഴിവിനെ ഈ ഫാക്ടറി ശക്തിപ്പെടുത്തും. ഇവിടെ നിർമ്മിക്കുന്ന ഉപകരണങ്ങൾ ഭാരതത്തിന്റെ പ്രതിരോധ കയറ്റുമതിക്ക് വലിയ ഉത്തേജനം നൽകും. ഓപ്പറേഷൻ സിന്ദൂരിൽ ഭാരതത്തിൽ നിർമ്മിച്ച സാങ്കേതികവിദ്യകളുടെ ശക്തി നാം ഇതിനകം കണ്ടിട്ടുണ്ട്.

സുഹൃത്തുക്കളേ, 

കർനൂളിനെ ഭാരതത്തിന്റെ ഡ്രോൺ ഹബ്ബാക്കി മാറ്റാൻ ആന്ധ്രാ ​ഗവൺമെന്റ് തീരുമാനിച്ചതിൽ എനിക്ക് സന്തോഷമുണ്ട്. ഡ്രോൺ വ്യവസായത്തിലൂടെ, കർണൂലിലും ആന്ധ്രാപ്രദേശിലുടനീളവും നിരവധി പുതിയ ഭാവി സാങ്കേതിക മേഖലകൾ ഉയർന്നുവരും. ഞാൻ സൂചിപ്പിച്ചതുപോലെ, ഓപ്പറേഷൻ സിന്ദൂരിൽ ഡ്രോണുകളുടെ ശ്രദ്ധേയമായ പ്രകടനം ലോകത്തെ അത്ഭുതപ്പെടുത്തി. വരും കാലങ്ങളിൽ, ഡ്രോൺ മേഖലയിൽ കർണൂൽ ഭാരതത്തിന് ഒരു പ്രധാന ശക്തിയായി മാറും. 

സുഹൃത്തുക്കളേ,

പൗര കേന്ദ്രീകൃത വികസനമാണ് നമ്മുടെ ​ഗവൺമെന്റിന്റെ ദർശനം! ഇതിനായി, ജനങ്ങളുടെ ജീവിതം എളുപ്പമാക്കുന്നതിനായി ഞങ്ങൾ തുടർച്ചയായി പരിഷ്കാരങ്ങൾ കൊണ്ടുവരുന്നു. ഇന്ന് രാജ്യത്ത് പ്രതിവർഷം 12 ലക്ഷം രൂപ വരെയുള്ള വരുമാനം പൂർണ്ണമായും നികുതി രഹിതമാണ്. താങ്ങാനാവുന്ന വിലയുള്ള മരുന്നുകൾ, കുറഞ്ഞ ചെലവിലുള്ള ആരോഗ്യ സംരക്ഷണം, മുതിർന്ന പൗരന്മാർക്കുള്ള ആയുഷ്മാൻ കാർഡുകൾ തുടങ്ങിയ സംരംഭങ്ങൾ ജീവിത സൗകര്യത്തിന്റെ ഒരു പുതിയ അധ്യായം ആരംഭിച്ചു.

സുഹൃത്തുക്കളേ,

നവരാത്രിയുടെ ആദ്യ ദിവസം മുതൽ തന്നെ ജിഎസ്ടി നിരക്കുകളും ഗണ്യമായി കുറച്ചിട്ടുണ്ട്. നാരാ ലോകേഷ് ​ഗാരുവിന്റെ നേതൃത്വത്തിൽ ഇവിടെയുള്ള ആളുകൾ ജിഎസ്ടി ബചത് ഉത്സവ് (സമ്പാദ്യം ഉത്സവം) ആഘോഷിക്കുന്നത് കാണുന്നതിൽ എനിക്ക് വളരെ സന്തോഷമുണ്ട്. നിങ്ങൾ "സൂപ്പർ ജിഎസ്ടി - സൂപ്പർ സേവിംഗ്സ്" കാമ്പെയ്‌നും വിജയകരമായി നടത്തുന്നു. അടുത്ത തലമുറ ജിഎസ്ടി പരിഷ്കാരങ്ങളിലൂടെ ആന്ധ്രാപ്രദേശിലെ ജനങ്ങൾ 8,000 കോടിയിലധികം രൂപ ലാഭിക്കുമെന്ന് എനിക്ക് വിവരം ലഭിച്ചു. ഈ സീസണിൽ ഈ സമ്പാദ്യം ഉത്സവത്തിന്റെ ആഘോഷത്തിന് ആക്കം കൂട്ടി. പക്ഷേ എനിക്ക് ഒരു അഭ്യർത്ഥന കൂടിയുണ്ട്. ഈ ജിഎസ്ടി ബചത് ഉത്സവ്, വോക്കൽ ഫോർ ലോക്കലിന്റെ ആവേശത്തോടെ നമുക്ക് ആഘോഷിക്കാം!

സുഹൃത്തുക്കളേ,

ഒരു 'വിക്സിത് ആന്ധ്ര' (വികസിത ആന്ധ്ര)യിലൂടെ മാത്രമേ നമുക്ക് 'വിക്സിത് ഭാരത്' (വികസിത ഇന്ത്യ) എന്ന സ്വപ്നം സാക്ഷാത്കരിക്കാൻ കഴിയൂ. വീണ്ടും, ആന്ധ്രാപ്രദേശിലെ എല്ലാ പുതിയ പദ്ധതികൾക്കും സംരംഭങ്ങൾക്കും ഞാൻ എന്റെ ഹൃദയംഗമമായ അഭിനന്ദനങ്ങൾ അറിയിക്കുന്നു. ഭാരത് മാതാ കീ ജയ് എന്ന് പറയുന്നതിൽ എന്നോടൊപ്പം ചേരൂ! ആ രണ്ട് കുട്ടികളും കുറച്ചുകാലമായി അവരുടെ ചിത്രങ്ങൾ ഉയർത്തിപ്പിടിക്കുന്നു. നമ്മുടെ എസ്‌പി‌ജി ടീം, ദയവായി അവരിൽ നിന്ന് അത് ശേഖരിക്കുക. അതെ, ദയവായി അവ ശേഖരിക്കുക. ഇപ്പോൾ, എന്നോടൊപ്പം പറയുക: ഭാരത് മാതാ കീ ജയ്! ഭാരത് മാതാ കീ ജയ്!

വളരെ നന്ദി!