জি-২০ সন্মিলনত অংশ লোৱাৰ বাবে মই জাপানৰ অছাকা ভ্ৰমণ কৰিম৷ এই সন্মিলনত গোলকীয় নেতাসকলৰ সৈতে মই সাম্প্ৰতিক বিশ্বই সন্মুখীন হৈ থকা মুখ্য প্ৰত্যাহ্বান আৰু সম্ভাৱনা সমূহৰ বিষয়ে আলোচনা কৰিম৷ মহিলা সৱলীকৰণ, ডিজিটেলকৰণ, কৃত্ৰিম বুদ্ধিমত্তা আদি বিষয়ৰ লগতে সন্ত্ৰাসবাদ আৰু জলবায়ু পৰিৱৰ্তনৰ দৰে গোলকীয় সমস্যাৰ সমাধানৰ ক্ষেত্ৰত আমাৰ উমৈহতীয়া প্ৰচেষ্টাসমূহ সন্মিলনত বিস্তৃতভাৱে আলোচনা হ’ব৷
সন্মিলনখনে বহুপক্ষীয় সম্পৰ্ক পুনৰ গঠনৰ প্ৰতি আমাৰ শক্তিশালী সমৰ্থনক নতুন গতি প্ৰদান কৰাত গুৰুত্বপূৰ্ণ ভূমিকা পালন কৰিব৷ বিগত পাঁচ বছৰৰ ভাৰতৰ শক্তিশালী উন্নয়নমূলক অভিজ্ঞতা বিনিময়ৰ ক্ষেত্ৰতো এই সন্মিলন এক উপযুক্ত মঞ্চ হ’ব৷
২০২২ত ভাৰতে জি-২০ সন্মিলন আয়োজন কৰাৰ প্ৰতি লক্ষ্য ৰাখিও অছাকা সন্মিলন ভাৰতৰ বাবে অধিক গুৰুত্বপূৰ্ণ বিবেচিত হৈছে৷ দেশৰ স্বাধীনতাৰ ৭৫ বৰ্ষপূৰ্তিৰ উক্ত সময়ছোৱাক আমি নতুন ভাৰতৰ ৰূপত চাব বিচাৰিছো৷
সন্মিলনৰ আজৰি সময়ত মই আমাৰ গুৰুত্বপূৰ্ণ সহযোগী ৰাষ্ট্ৰৰ মূৰব্বীৰ সৈতে দ্বিপাক্ষিক আৰু গোলকীয় দিশত বিভিন্ন আলোচনাত মিলিত হ’ম৷
ইয়াৰ পৰৱৰ্তী কাৰ্যসূচী হিচাপে মই ৰাছিয়া, ভাৰত আৰু চীনৰ(আৰআইচি)মাজত অনানুষ্ঠানিক সন্মিলনৰ নেতৃত্ব দিম আৰু ব্ৰিকছ(ব্ৰাজিল, ৰাছিয়া, ভাৰত, চীন আৰু দক্ষিণ আফ্ৰিকা) তথা জাই(জাপান, আমেৰিকা আৰু ভাৰত)নেতাসকলৰ সৈতে মিলিত হয়৷
