وزیراعظم جناب نریندر مودی 28 مارچ 2026 کو اتر پردیش کا دورہ کریں گے۔ تقریباً صبح 11:30 بجے وہ گوتم بدھ نگر کے جیور میں واقع نوئیڈا انٹرنیشنل ایئرپورٹ کے ٹرمینل عمارت کا معائنہ کریں گے۔ اس کے بعد تقریباً دوپہر 12 بجے وزیراعظم نوئیڈا انٹرنیشنل ایئرپورٹ کے پہلے مرحلے کا افتتاح کریں گے اور اس موقع پر ایک عوامی اجتماع سے خطاب بھی کریں گے۔
نوئیڈا انٹرنیشنل ایئرپورٹ کا افتتاح بھارت کے عالمی ہوا بازی مرکز بننے کے سفر میں ایک اہم سنگ میل ہے۔ قومی دارالحکومت علاقہ (این سی آر) کے لیے ایک بڑے بین الاقوامی دروازے کے طور پر تصور کیا گیا یہ ایئرپورٹ ملک کے ہوائی اڈوں کے بنیادی ڈھانچے کو مضبوط بنانے اور علاقائی و بین الاقوامی رابطے کو فروغ دینے کی سمت ایک بڑا قدم ہے۔ نوئیڈا انٹرنیشنل ایئرپورٹ کو دہلی این سی آر کے لیے دوسرے بین الاقوامی ہوائی اڈے کے طور پر تیار کیا گیا ہے، جو اندرا گاندھی بین الاقوامی ہوائی اڈے کی تکمیل کرے گا۔ یہ دونوں ہوائی اڈے مل کر ایک مربوط ہوا بازی نظام کے طور پر کام کریں گے، جس سے بھیڑ کم ہوگی، مسافروں کی گنجائش بڑھے گی اور دہلی این سی آر کو عالمی سطح کے نمایاں ہوا بازی مراکز میں شامل کیا جائے گا۔
نوئیڈا انٹرنیشنل ایئرپورٹ بھارت کے سب سے بڑے گرین فیلڈ ہوائی اڈہ منصوبوں میں شامل ہے۔ اس کے پہلے مرحلے کو تقریباً 11,200 کروڑ روپے کی لاگت سے پبلک پرائیویٹ پارٹنرشپ (پی پی پی) ماڈل کے تحت تیار کیا گیا ہے۔ ابتدائی طور پر اس ایئرپورٹ کی سالانہ مسافر سنبھالنے کی صلاحیت 12 ملین (ایک کروڑ بیس لاکھ) ہوگی، جسے مکمل ترقی کے بعد 70 ملین (سات کروڑ) مسافروں تک بڑھایا جا سکے گا۔ اس میں 3,900 میٹر طویل رن وے شامل ہے جو بڑے طیاروں کو سنبھالنے کی صلاحیت رکھتا ہے، جبکہ جدید رہنمائی نظام جیسے انسٹرومنٹ لینڈنگ سسٹم (آئی ایل ایس) اور جدید فضائی روشنی کے نظام کے ذریعے ہر موسم میں دن رات مؤثر آپریشن ممکن بنایا گیا ہے۔
ایئرپورٹ میں ایک مضبوط کارگو نظام بھی شامل ہے، جس میں کثیر جہتی کارگو مرکز، مربوط کارگو ٹرمینل اور لاجسٹک زونز شامل ہیں۔ یہ کارگو سہولت سالانہ 2.5 لاکھ میٹرک ٹن سے زائد سامان سنبھالنے کے لیے تیار کی گئی ہے، جسے بڑھا کر تقریباً 18 لاکھ میٹرک ٹن تک کیا جا سکتا ہے۔ اس کے علاوہ 40 ایکڑ پر محیط مرمت، دیکھ بھال اور اوورہال (ایم آر او) کی مخصوص سہولت بھی شامل ہے۔
ایک پائیدار اور مستقبل کے تقاضوں سے ہم آہنگ بنیادی ڈھانچے کے منصوبے کے طور پر تیار کیا گیا نوئیڈا انٹرنیشنل ایئرپورٹ نیٹ زیرو اخراج کی بنیاد پر چلانے کا ہدف رکھتا ہے، جس میں توانائی کی بچت کے نظام اور ماحول دوست طریقہ کار شامل کیے گئے ہیں۔ اس کے تعمیراتی ڈیزائن میں ہندوستانی ورثے سے متاثر عناصر شامل کیے گئے ہیں، جن میں روایتی گھاٹ اور حویلیوں کی جھلک نظر آتی ہے، یوں ثقافتی خوبصورتی اور جدید انفراسٹرکچر کا حسین امتزاج پیش کیا گیا ہے۔
یمنا ایکسپریس وے کے ساتھ اسٹریٹجک مقام پر واقع یہ ایئرپورٹ ایک کثیر جہتی نقل و حمل مرکز کے طور پر منصوبہ بند کیا گیا ہے، جہاں سڑک، ریل، میٹرو اور علاقائی ٹرانزٹ نظاموں کے درمیان ہموار رابطہ فراہم کیا جائے گا تاکہ مسافروں اور کارگو دونوں کے لیے مؤثر آمد و رفت یقینی بنائی جا سکے۔
Tomorrow, 28th March is a day of immense importance for the people of Uttar Pradesh and the NCR. Phase I of Noida International Airport will be inaugurated. This will boost commerce and connectivity. It will ease congestion at the IGI Airport in Delhi.
— Narendra Modi (@narendramodi) March 27, 2026
The Noida airport is… pic.twitter.com/oZZAs6tUk6
