وزیر اعظم جناب نریندر مودی نے آج لوک کلیان مارگ پر گھریلو ٹیکہ ساز کمپنیوں کے ساتھ بات چیت کی۔
وزیر اعظم نے ٹیکہ ساز اداروں کی کوششوں کی تعریف کی، جس کے نتیجے میں ملک نے 100 کروڑ ٹیکہ کاری کا سنگ میل عبور کیا، اور کہا کہ انھوں نے بھارت کی کامیابی کی اس کہانی میں بڑا کردار ادا کیا ہے۔ انھوں نے عالمی وبا کے دوران ان کی محنت اور ان کے ذریعے دیے گئے اعتماد کی ستائش کی۔
وزیر اعظم نے زور دیا کہ ملک کو گزشتہ ڈیڑھ سال کے دوران سیکھے گئے بہترین طریقوں کو ادارہ جاتی بنانے کی ضرورت ہے، انھوں نے مزید کہا کہ یہ عالمی معیارات کے مطابق ہمارے طریقوں میں تبدیلی کرنے کا موقع ہے۔ انھوں نے کہا کہ پوری دنیا ٹیکہ کاری مہم کی کامیابی کے پس منظر میں بھارت کی طرف دیکھ رہی ہے۔ انھوں نے یہ بھی کہا کہ ٹیکہ بنانے والوں کو مل کر کام کرنا چاہیے تاکہ ہم مستقبل کے چیلنجوں کا مقابلہ کرنے کے لیے تیار رہیں۔
دیسی ٹیکہ ساز اداروں نے ٹیکے کی تیاری کے لیے مسلسل رہنمائی اور مدد فراہم کرنے پر وزیر اعظم کے وژن اور متحرک قیادت کو سراہا۔ انھوں نے ستائش کرتے ہوئے کہا کہ حکومت اور صنعت کے درمیان ایسا تعاون و اشتراک پہلے کبھی نہیں دیکھا گیا، اور اس کوشش کے دوران انضباطی اصلاحات، آسان طریقہ کار ، بروقت منظوریاں اور حکومت کی مددگار اور تعاون دینے والی نوعیت تعریف کی۔ انھوں نے کہا کہ اگر ملک پرانے اصولوں پر عمل پیرا ہوتا تو کافی تاخیر ہوجاتی، اور ہم ٹیکہ کاری کی اس سطح تک نہیں پہنچ پاتے جو ہم نے اب تک حاصل کی ہے۔
جناب ادار پونا والا نے حکومت کی طرف سے لائی گئی انضباطی اصلاحات کی ستائش کی۔ جناب سائرس پونا والا نے عالمی وبا کے دوران وزیر اعظم کی قیادت کی تعریف کی۔ ڈاکٹر کرشنا ایلا نے کوویکسین اور اس کی تیاری کے دوران مسلسل تعاون اور حوصلہ افزائی کے لیے وزیر اعظم کا شکریہ ادا کیا۔ جناب پنکج پٹیل نے اقوام متحدہ کی جنرل اسمبلی میں ڈی این اے پر مبنی ٹیکہ کے بارے میں بات کرنے پر وزیر اعظم کا شکریہ ادا کیا۔ محترمہ مہیما داتلہ نے وزیر اعظم کے وژن کی تعریف کی جس کی وجہ سے ملک کو ٹیکہ کاری کے اس سنگ میل تک پہنچنے میں مدد ملی۔ ڈاکٹر سنجے سنگھ نے ٹیکے کی تیاری کے میدان میں جدت طرازی اور بیک ورڈ انٹیگریشن کی اہمیت کے بارے میں گفتگو کی۔ جناب ستیش ریڈی نے اس کوشش میں حکومت اور صنعت کے درمیان اشتراک و تعاون کو سراہا۔
اس گفت و شنید میں جناب سائرس پونا والا اور جناب ادار پونا والا، سیرم انسٹی ٹیوٹ آف انڈیا نے شرکت کی؛ نیز ڈاکٹر کرشنا ایلا اور محترمہ سوچترا ایلا، بھارت بائیوٹیک انٹرنیشنل لمیٹڈ مسٹر پنکج پٹیل اور ڈاکٹر شیرویل پٹیل، زیڈس کیڈیلا؛ محترمہ مہیما داتلا اور جناب نریندر مانٹیلا، بائیولوجیکل ای لمیٹڈ؛ ڈاکٹر سنجے سنگھ اور جناب ستیش رام لال مہتا، جینووا بائیو فارماسیوٹیکل لمیٹڈ، جناب ستیش ریڈی اور جناب دیپک سپرا، ڈاکٹر ریڈی لیب اور ڈاکٹر راجیش جین اور جناب ہرشیت جین، پناسیا بائیوٹیک لمیٹڈ، صحت کے مرکزی وزیر اور کیمیکلز اینڈ فرٹیلائزرس کے مرکزی وزیر مملکت بھی اس گفت و شنید کے دوران موجود تھے۔
India’s #VaccineCentury has drawn widespread acclaim. Our vaccination drive wouldn’t be successful without the efforts of our dynamic vaccine manufacturers, who I had the opportunity to meet today. We had an excellent interaction. https://t.co/IqFqwMP1ww pic.twitter.com/WX1XE8AKlG
— Narendra Modi (@narendramodi) October 23, 2021
