ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଭିଡିଓ କନଫରେନ୍ସିଂ ମାଧ୍ୟମରେ ଦେଶବାସୀଙ୍କୁ ସମ୍ବୋଧିତ କରିଛନ୍ତି। ସେ ଶକ୍ତି ଉପାସନାର ପର୍ବ ନବରାତ୍ରୀ ପ୍ରାରମ୍ଭରେ ସବୁ ନାଗରିକଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଇଛନ୍ତି । ପ୍ରଧାନମନ୍ତ୍ରୀ କହିଛନ୍ତି ଯେ ନବରାତ୍ରୀର ପ୍ରଥମ ଦିନରୁ ଦେଶ ଆତ୍ମନିର୍ଭର ଭାରତ ଅଭିଯାନରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଉଛି। 22 ସେପ୍ଟେମ୍ବର ସୂର୍ଯ୍ୟୋଦୟ ଠାରୁ ଦେଶ ପରବର୍ତ୍ତୀ ପିଢ଼ିର ଜିଏସଟି ସଂସ୍କାର କାର୍ଯ୍ୟକାରୀ କରିବ। ଏହାସହିତ ସମଗ୍ର ଭାରତରେ ‘ଜିଏସଟି ବଚତ’ ଉତ୍ସବ (ସଞ୍ଚୟ ମହୋତ୍ସବ)ର ଆରମ୍ଭ ହେବ ବୋଲି ପ୍ରଧାନମନ୍ତ୍ରୀ କହିଥିଲେ । ସେ ଜୋର ଦେଇ କହିଥିଲେ ଯେ ଏହି ପର୍ବ ସଞ୍ଚୟକୁ ବୃଦ୍ଧି କରିବ ଏବଂ ଲୋକଙ୍କ ପାଇଁ ସେମାନଙ୍କର ପସନ୍ଦର ଜିନିଷ କିଣିବାକୁ ସହଜ କରିବ। ଏହି ସଞ୍ଚୟ ମହୋତ୍ସବର ଲାଭ ଗରିବ, ମଧ୍ୟବିତ୍ତ, ନବମଧ୍ୟବିତ୍ତ ବର୍ଗ, ଯୁବକ, କୃଷକ, ମହିଳା, ଦୋକାନୀ, ବ୍ୟବସାୟୀ ଏବଂ ଉଦ୍ୟୋଗୀମାନଙ୍କ ନିକଟରେ ପହଞ୍ଚିବ। ସେ ଆହୁରି କହିଛନ୍ତି, ଏହି ପାର୍ବଣ ଋତୁରେ ପ୍ରତ୍ୟେକ ପରିବାରର ସୁଖ ଏବଂ ମଧୁରତା ବୃଦ୍ଧି ପାଇବ। ପ୍ରଧାନମନ୍ତ୍ରୀ ଦେଶର କୋଟି କୋଟି ପରିବାରକୁ ପରବର୍ତ୍ତୀ ପିଢ଼ିର ଜିଏସଟି ସଂସ୍କାର ଏବଂ ଜିଏସଟି ସଞ୍ଚୟ ମହୋତ୍ସବ ପାଇଁ ଶୁଭକାମନା ଜଣାଇଥିଲେ। ସେ କହିଥିଲେ, ଏହି ସଂସ୍କାରଗୁଡ଼ିକ ଭାରତର ଅଭିବୃଦ୍ଧି କାହାଣୀକୁ ତ୍ୱରାନ୍ୱିତ କରିବ, ବ୍ୟବସାୟିକ କାର୍ଯ୍ୟକୁ ସରଳ କରିବ, ନିବେଶକୁ ଅଧିକ ଆକର୍ଷଣୀୟ କରିବ ଏବଂ ବିକାଶ ଦୌଡ଼ରେ ପ୍ରତ୍ୟେକ ରାଜ୍ୟ ସମାନ ଅଂଶୀଦାର ହେବ।
ଭାରତ 2017ରେ ଜିଏସଟି ସଂସ୍କାର ଦିଗରେ ପ୍ରଥମ ପଦକ୍ଷେପ ନେଇଥିବା କଥା ମନେ ପକାଇ ପ୍ରଧାନମନ୍ତ୍ରୀ କହିଥିଲେ, ଜିଏସଟି ଆଇନ ଲାଗୁ ହେବା ସହିତ ଏକ ପୁରୁଣା ଅଧ୍ୟାୟର ଶେଷ ହୋଇଥିଲା । ଦେଶର ଆର୍ଥିକ ଇତିହାସରେ ଏକ ନୂତନ ଅଧ୍ୟାୟର ଆରମ୍ଭ ହୋଇଥିଲା। ଶ୍ରୀ ମୋଦୀ ଉଲ୍ଲେଖ କରିଥିଲେ ଯେ ବହୁ ଦଶନ୍ଧି ଧରି ନାଗରିକ ଏବଂ ବ୍ୟବସାୟୀମାନେ ଏକ ଜଟିଳ କର ଜାଲରେ ଫସି ରହିଥିଲେ । ପ୍ରବେଶ ଶୁଳ୍କ, ବିକ୍ରୟ କର, ଉତ୍ପାଦ କର, ଭାଟ୍ ଏବଂ ସେବା କର ଭଳି ସାରା ଦେଶରେ ଅନେକ ଡଜନ ଶୁଳ୍କ ବ୍ୟବସ୍ଥା ଥିଲା। ଗୋଟିଏ ସହରରୁ ଅନ୍ୟ ସହରକୁ ସାମଗ୍ରୀ ପରିବହନ ପାଇଁ ଅନେକ ଚେକପୋଷ୍ଟ ପାର କରିବା, ଅନେକ ଫର୍ମ ପୂରଣ କରିବା ଏବଂ ପ୍ରତ୍ୟେକ ସ୍ଥାନରେ ଭିନ୍ନ ଟିକସ ନିୟମର ଚକ୍ରକୁ ପାର କରିବା ଆବଶ୍ୟକ ଥିଲା। ସେ 2014 ମସିହାରେ ପ୍ରଧାନମନ୍ତ୍ରୀ ଭାବରେ ଦାୟିତ୍ୱ ଗ୍ରହଣ କରିବା ସମୟର ଏକ ବ୍ୟକ୍ତିଗତ ସ୍ମୃତି ବିଷୟରେ କହିଥିଲେ । ଗୋଟିଏ ବିଦେଶୀ ଖବରକାଗଜରେ ପ୍ରକାଶିତ ଏକ ଚମତ୍କାର ଉଦାହରଣର ସେ ଉଲ୍ଲେଖ କରିଥିଲେ। ଏହି ଲେଖାଟି ଗୋଟିଏ କମ୍ପାନୀ ଦ୍ୱାରା ସମ୍ମୁଖୀନ ହେଉଥିବା ସମସ୍ୟା ବିଷୟରେ ବର୍ଣ୍ଣନା କରିଥିଲା। ସେତେବେଳେ ବେଙ୍ଗାଲୁରୁରୁ ହାଇଦ୍ରାବାଦକୁ ସାମଗ୍ରୀ ପଠାଇବା ଏତେ କଷ୍ଟକର ଥିଲା ଯେ ବ୍ୟବସାୟୀ ଜଣଙ୍କ ବେଙ୍ଗାଲୁରୁରୁ ୟୁରୋପ ଏବଂ ତା'ପରେ ହାଇଦ୍ରାବାଦକୁ ସାମଗ୍ରୀ ପଠାଇବାକୁ ପସନ୍ଦ କରିଥିଲେ।
ପ୍ରଧାନମନ୍ତ୍ରୀ କହିଥିଲେ, ଟିକସ ଏବଂ ଟୋଲର ଜଟିଳତା ଯୋଗୁଁ ଏପରି ପରିସ୍ଥିତି ସୃଷ୍ଟି ହୋଇଥିଲା। ଏହି ଉଦାହରଣ ଅଗଣିତ ଉଦାହରଣ ମଧ୍ୟରୁ ଗୋଟିଏ। ଲକ୍ଷ ଲକ୍ଷ କମ୍ପାନୀ ଏବଂ କୋଟି କୋଟି ନାଗରିକ ବହୁସଂଖ୍ୟକ ଟିକସର ଜଟିଳ ଜାଲ ଯୋଗୁଁ ଦୈନନ୍ଦିନ କଷ୍ଟର ସମ୍ମୁଖୀନ ହେଉଥିଲେ। ଗୋଟିଏ ସହରରୁ ଅନ୍ୟ ସହରକୁ ସାମଗ୍ରୀ ପରିବହନର ବର୍ଦ୍ଧିତ ଖର୍ଚ୍ଚ ଶେଷରେ ଗରିବ ଲୋକ ବହନ କରନ୍ତି। ଏହି ଖର୍ଚ୍ଚକୁ ସାଧାରଣ ଜନତାଙ୍କ ଭଳି ଗ୍ରାହକମାନଙ୍କଠାରୁ ଆଦାୟ କରାଯାଏ ବୋଲି ଶ୍ରୀ ମୋଦୀ ଜୋର ଦେଇ କହିଥିଲେ ।
ଦେଶକୁ ପୁରୁଣା ଟିକସ ଜଟିଳତାରୁ ମୁକ୍ତ କରିବା ଅତ୍ୟନ୍ତ ଜରୁରୀ ଥିଲା ବୋଲି ଗୁରୁତ୍ୱାରୋପ କରି ଶ୍ରୀ ମୋଦୀ ସ୍ମରଣ କରିଥିଲେ ଯେ 2014 ମସିହାରେ ଜନାଦେଶ ପାଇବା ପରେ, ସରକାର ଜନତା ଏବଂ ଦେଶର ସ୍ୱାର୍ଥ ପାଇଁ ଜିଏସଟିକୁ ପ୍ରାଥମିକତା ଦେଇଥିଲେ। ସେ ଉଲ୍ଲେଖ କରିଥିଲେ ଯେ ସମସ୍ତ ଅଂଶୀଦାରଙ୍କ ସହିତ ବ୍ୟାପକ ପରାମର୍ଶ କରାଯାଇଥିଲା, ରାଜ୍ୟଗୁଡ଼ିକ ଦ୍ୱାରା ଉଠାଯାଇଥିବା ପ୍ରତ୍ୟେକ ବିଚାରକୁ ଗ୍ରହଣ କରାଯାଇଥିଲା ଏବଂ ପ୍ରତ୍ୟେକ ପ୍ରଶ୍ନର ସମାଧାନ ଖୋଜାଯାଇଥିଲା। ସବୁ ରାଜ୍ୟକୁ ଏକାଠି କରିବା ଦ୍ୱାରା ସ୍ୱାଧୀନ ଭାରତରେ ଏପରି ଏକ ମହାନ ଟିକସ ସଂସ୍କାର ସମ୍ଭବ ହୋଇପାରିଥିଲା। ପ୍ରଧାନମନ୍ତ୍ରୀ କହିଥିଲେ, କେନ୍ଦ୍ର ଏବଂ ରାଜ୍ୟଗୁଡ଼ିକର ମିଳିତ ପ୍ରୟାସର ଫଳସ୍ୱରୂପ ଦେଶ ବହୁବିଧ ଟିକସର ଚକ୍ରବ୍ୟୁହରୁ ମୁକ୍ତ ହୋଇଥିଲା ଏବଂ ସମଗ୍ର ଦେଶରେ ଏକ ସମାନ ବ୍ୟବସ୍ଥା ପ୍ରତିଷ୍ଠିତ ହୋଇଥିଲା। ଫଳରେ ଏକ ରାଷ୍ଟ୍ର-ଏକ ଟିକସର ସ୍ୱପ୍ନ ସାକାର ହୋଇଥିଲା ବୋଲି ସେ ଦୃଢ଼ୋକ୍ତି ପ୍ରକାଶ କରିଥିଲେ ।
ପ୍ରଧାନମନ୍ତ୍ରୀ କହିଥିଲେ, ସଂସ୍କାର ଏକ ନିରନ୍ତର ପ୍ରକ୍ରିୟା। ସମୟ ବଦଳିବା ଏବଂ ଜାତୀୟ ଆବଶ୍ୟକତା ପରିବର୍ତ୍ତିତ ହେବା ସହିତ ପରବର୍ତ୍ତୀ ପିଢ଼ିର ସଂସ୍କାର ସମାନ ଭାବରେ ଅତ୍ୟାବଶ୍ୟକ ହୋଇପଡୁଛି। ଦେଶର ବର୍ତ୍ତମାନର ଆବଶ୍ୟକତା ଏବଂ ଭବିଷ୍ୟତର ଆକାଂକ୍ଷାକୁ ଦୃଷ୍ଟିରେ ରଖି, ଏହି ନୂତନ ଜିଏସଟି ସଂସ୍କାର କାର୍ଯ୍ୟକାରୀ କରାଯାଉଛି। ନୂତନ ଢାଞ୍ଚା ଅଧୀନରେ, କେବଳ 5% ଏବଂ 18% ଟିକସ ସ୍ଲାବ୍ ମୁଖ୍ୟତଃ ରହିବ। ଏହାର ଅର୍ଥ ହେଉଛି ଅଧିକାଂଶ ନିତ୍ୟ ବ୍ୟବହାର୍ଯ୍ୟ ସାମଗ୍ରୀ ଅଧିକ ସୁଲଭ ହେବ। ଖାଦ୍ୟ ସାମଗ୍ରୀ, ଔଷଧ, ସାବୁନ, ଟୁଥବ୍ରସ୍, ଟୁଥପେଷ୍ଟ, ସ୍ୱାସ୍ଥ୍ୟ ଏବଂ ଜୀବନ ବୀମା ଭଳି ଅନେକ ସାମଗ୍ରୀ ଏବଂ ସେବା ଟିକସମୁକ୍ତ ହେବ କିମ୍ବା କେବଳ 5% ଟିକସ ଲାଗୁ ହେବ। ପୂର୍ବରୁ 12% ଟିକସ ଲାଗୁଥିବା ସାମଗ୍ରୀ ମଧ୍ୟରୁ 99% ସାମଗ୍ରୀ ଅର୍ଥାତ୍ ପ୍ରାୟ ସମସ୍ତକୁ ଏବେ 5% ଟିକସ ପରିଧି ମଧ୍ୟକୁ ଅଣାଯାଇଛି ବୋଲି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ।
ପ୍ରଧାନମନ୍ତ୍ରୀ ଆହୁରି କହିଥିଲେ, ଗତ ଏଗାର ବର୍ଷ ମଧ୍ୟରେ 25 କୋଟି ଭାରତୀୟ ଦାରିଦ୍ର୍ୟ କବଳରୁ ମୁକ୍ତ ହୋଇଛନ୍ତି। ଏମାନେ ଦେଶର ପ୍ରଗତିରେ ଉଲ୍ଲେଖନୀୟ ଭୂମିକା ଗ୍ରହଣ କରୁଥିବା ଏକ ଗୁରୁତ୍ୱପୂର୍ଣ୍ଣ ନବମଧ୍ୟବିତ୍ତ ବର୍ଗ ଭାବରେ ଉଭା ହୋଇଛନ୍ତି । ପ୍ରଧାନମନ୍ତ୍ରୀ ଗୁରୁତ୍ୱାରୋପ କରି କହିଛନ୍ତି ଯେ ଏହି ନବ ମଧ୍ୟବିତ୍ତ ବର୍ଗର ନିଜସ୍ୱ ଆକାଂକ୍ଷା ଏବଂ ସ୍ୱପ୍ନ ଅଛି। ଚଳିତ ବର୍ଷ, ସରକାର 12 ଲକ୍ଷ ଟଙ୍କା ପର୍ଯ୍ୟନ୍ତ ଆୟକୁ କରମୁକ୍ତ କରି ଟିକସ ରିହାତି ଉପହାର ଦେଇଛନ୍ତି, ଯାହା ମଧ୍ୟବିତ୍ତ ବର୍ଗଙ୍କ ଜୀବନକୁ ଯଥେଷ୍ଟ ସହଜ ଏବଂ ସୁବିଧାଜନକ କରିଛି। ଶ୍ରୀ ମୋଦୀ କହିଛନ୍ତି, ଏବେ ଗରିବ ଏବଂ ନବ ମଧ୍ୟବିତ୍ତ ବର୍ଗଙ୍କ ଲାଭ ପାଇବାର ପାଳି। ସେମାନେ ଦ୍ୱିଗୁଣିତ ଲାଭ ପାଉଛନ୍ତି - ପ୍ରଥମେ ଆୟକର ରିହାତି ମାଧ୍ୟମରେ ଏବଂ ଏବେ ଜିଏସଟି ହ୍ରାସ ମାଧ୍ୟମରେ। ପ୍ରଧାନମନ୍ତ୍ରୀ ଗୁରୁତ୍ୱାରୋପ କରି କହିଥିଲେ, କମ ଜିଏସଟି ହାର ସହିତ, ନାଗରିକମାନଙ୍କ ପାଇଁ ବ୍ୟକ୍ତିଗତ ସ୍ୱପ୍ନ ପୂରଣ କରିବା ସହଜ ହୋଇଯିବ । ଘର ନିର୍ମାଣ ହେଉ, ଟିଭି କିମ୍ବା ରେଫ୍ରିଜରେଟର କିଣା ହେଉ, କିମ୍ବା ସ୍କୁଟର, ବାଇକ୍ କିମ୍ବା କାର କିଣା ହେଉ, ସବୁକିଛି ଏବେ କମ ଖର୍ଚ୍ଚରେ ହେବ। ଅଧିକାଂଶ ହୋଟେଲ ରୁମ ପାଇଁ ଜିଏସଟି ହ୍ରାସ କରାଯାଇଥିବାରୁ ଭ୍ରମଣ ମଧ୍ୟ ଅଧିକ ସୁଲଭ ହେବ। ଶ୍ରୀ ମୋଦୀ ଜିଏସଟି ସଂସ୍କାର ପ୍ରତି ବ୍ୟବସାୟୀମାନଙ୍କ ଉତ୍ସାହୀ ପ୍ରତିକ୍ରିୟାରେ ଖୁସି ପ୍ରକାଶ କରିଥିଲେ। ସେ ଉଲ୍ଲେଖ କରିଥିଲେ ଯେ ସେମାନେ ଗ୍ରାହକମାନଙ୍କୁ ଜିଏସଟି ହ୍ରାସର ଲାଭ ପ୍ରଦାନ କରିବା ପାଇଁ ସକ୍ରିୟ ଭାବରେ କାର୍ଯ୍ୟ କରୁଛନ୍ତି। ଅନେକ ସ୍ଥାନରେ ସଂସ୍କାର ପୂର୍ବରୁ ଏବଂ ପରେ ଲାଗୁ ତୁଳନାତ୍ମକ ଦର ଉଲ୍ଲେଖ ଥାଇ ସୂଚନାଫଳକ ପ୍ରଦର୍ଶିତ ହୋଇଥିବା ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ।
ପରବର୍ତ୍ତୀ ପିଢ଼ିର ଜିଏସଟି ସଂସ୍କାରରେ ‘ନାଗରିକ ଦେବୋଭବ’ ମନ୍ତ୍ର ସ୍ପଷ୍ଟ ଭାବରେ ପ୍ରତିଫଳିତ ହେଉଥିବା ପ୍ରଧାନମନ୍ତ୍ରୀ କହିଥିଲେ । ସେ କହିଥିଲେ, ଆୟକର ରିହାତି ଏବଂ ଜିଏସଟି ହ୍ରାସକୁ ମିଶାଇ ଦେଖିଲେ, ଗତ ଗୋଟିଏ ବର୍ଷ ମଧ୍ୟରେ ନିଆଯାଇଥିବା ନିଷ୍ପତ୍ତିଗୁଡ଼ିକ ଭାରତର ଜନସାଧାରଣଙ୍କ ପାଇଁ 2.5 ଲକ୍ଷ କୋଟି ଟଙ୍କାରୁ ଅଧିକ ସଞ୍ଚୟ କରିବ। ଏହି କାରଣରୁ ସେ ଏହାକୁ ‘ବଚତ ଉତ୍ସବ’ (ସଞ୍ଚୟ ଉତ୍ସବ) ବୋଲି ଅଭିହିତ କରିଥିବା କହିଥିଲେ।
ବିକଶିତ ଭାରତର ଲକ୍ଷ୍ୟ ହାସଲ ପାଇଁ ଆତ୍ମନିର୍ଭରଶୀଳତାର ପଥ ପ୍ରତି ଅତୁଟ ପ୍ରତିବଦ୍ଧତା ଆବଶ୍ୟକ ବୋଲି ଗୁରୁତ୍ୱାରୋପ କରି ଶ୍ରୀ ମୋଦୀ କହିଥିଲେ ଯେ ଭାରତକୁ ଆତ୍ମନିର୍ଭରଶୀଳ କରିବାରେ ଏକ ପ୍ରମୁଖ ଦାୟିତ୍ୱ ଏମଏସଏମଇ ବା ଦେଶର ସୂକ୍ଷ୍ମ, କ୍ଷୁଦ୍ର ଏବଂ ମଧ୍ୟମ ଶିଳ୍ପ, କୁଟୀର ଉଦ୍ୟୋଗ ଉପରେ ରହିଛି । ଯେଉଁ ଜିନିଷ ସବୁ ଲୋକଙ୍କ ଆବଶ୍ୟକତା ପୂରଣ କରିବ ଏବଂ ଦେଶ ମଧ୍ୟରେ ଉତ୍ପାଦିତ ହୋଇପାରିବ ତାହା ଘରୋଇ ଭାବରେ ଉତ୍ପାଦନ କରାଯିବା ଉଚିତ ବୋଲି ପ୍ରଧାନମନ୍ତ୍ରୀ ଦୃଢ଼ତାର ସହିତ କହିଥିଲେ।
ଜିଏସଟି ହାର କମିବା ଏବଂ ସରଳୀକୃତ ପ୍ରକ୍ରିୟା ଭାରତର ଏମଏସଏମଇ, କ୍ଷୁଦ୍ର ଶିଳ୍ପ ଓ କୁଟୀର ଉଦ୍ୟୋଗଗୁଡ଼ିକୁ ଯଥେଷ୍ଟ ଲାଭ ଦେବ ବୋଲି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ । ସେ କହିଥିଲେ, ଏହି ସଂସ୍କାରଗୁଡ଼ିକ ସେମାନଙ୍କର ବିକ୍ରି ବୃଦ୍ଧି କରିବ ଏବଂ ସେମାନଙ୍କର ଟିକସ ବୋଝ ହ୍ରାସ କରିବ, ଯାହାଫଳରେ ଦ୍ୱିଗୁଣିତ ଲାଭ ହେବ। ଶ୍ରୀ ମୋଦୀ ଏମଏସଏମଇଗୁଡ଼ିକୁ ନେଇ ଉଚ୍ଚ ଆଶା ପ୍ରକଟ କରିଥିଲେ । ସମୃଦ୍ଧିର ଶିଖର ସମୟରେ ଭାରତୀୟ ଅର୍ଥବ୍ୟବସ୍ଥାର ମେରୁଦଣ୍ଡ ଭାବରେ ସେମାନଙ୍କର ଐତିହାସିକ ଭୂମିକା ଉପରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ। ସେ କହିଥିଲେ, ଭାରତର ଉତ୍ପାଦନ ଏବଂ ଉତ୍ପାଦ ଗୁଣବତ୍ତା ଏକଦା ବିଶ୍ୱ ସ୍ତରରେ ସ୍ୱୀକୃତିପ୍ରାପ୍ତ ଏବଂ ଉତ୍କୃଷ୍ଟ ଥିଲା। ସେହି ଗୌରବକୁ ପୁନର୍ବାର ହାସଲ କରିବାର ଆବଶ୍ୟକତା ଉପରେ ଶ୍ରୀ ମୋଦୀ ଗୁରୁତ୍ୱାରୋପ କରିଥିଲେ। କ୍ଷୁଦ୍ର ଶିଳ୍ପ ଦ୍ୱାରା ନିର୍ମିତ ଉତ୍ପାଦଗୁଡ଼ିକ ସର୍ବୋଚ୍ଚ ବିଶ୍ୱସ୍ତରୀୟ ମାନଦଣ୍ଡ ପୂରଣ କରିବା ଉଚିତ ବୋଲି ସେ ଆହ୍ୱାନ ଦେଇଥିଲେ। ସେ କହିଥିଲେ, ଭାରତର ଉତ୍ପାଦନ ମର୍ଯ୍ୟାଦା ଏବଂ ଉତ୍କର୍ଷତା ସହିତ ସମସ୍ତ ମାନଦଣ୍ଡକୁ ଅତିକ୍ରମ କରିବା ଉଚିତ। ଭାରତୀୟ ଉତ୍ପାଦର ଗୁଣବତ୍ତା ଦେଶର ବିଶ୍ୱସ୍ତରୀୟ ପରିଚୟ ଏବଂ ପ୍ରତିଷ୍ଠାକୁ ବୃଦ୍ଧି କରିବା ଉଚିତ। ସମସ୍ତ ଅଂଶୀଦାରଙ୍କୁ ଏହି ଲକ୍ଷ୍ୟକୁ ମନରେ ରଖି କାର୍ଯ୍ୟ କରିବାକୁ ପ୍ରଧାନମନ୍ତ୍ରୀ ଆହ୍ୱାନ କରିଥିଲେ।
ପ୍ରଧାନମନ୍ତ୍ରୀ କହିଥିଲେ, ସ୍ୱଦେଶୀର ମନ୍ତ୍ର ଯେପରି ଭାରତର ସ୍ୱାଧୀନତା ସଂଗ୍ରାମକୁ ସଶକ୍ତ କରିଥିଲା, ଠିକ୍ ସେହିପରି ଏହା ସମୃଦ୍ଧି ଆଡକୁ ଦେଶର ଯାତ୍ରାକୁ ଶକ୍ତିଶାଳୀ କରିବ। ସେ ଉଲ୍ଲେଖ କରିଥିଲେ ଯେ ଅନେକ ବିଦେଶୀ ଜିନିଷ ଜାଣତରେ ହେଉ କିମ୍ବା ଅଜାଣତରେ ଆମ ଦୈନନ୍ଦିନ ଜୀବନର ଅଂଶ ପାଲଟିଛି। ନାଗରିକମାନେ ପ୍ରାୟତଃ ଜାଣିପାରନ୍ତି ନାହିଁ ଯେ ସେମାନଙ୍କ ପକେଟରେ ଥିବା ପାନିଆ ବିଦେଶୀ ନା ସ୍ୱଦେଶୀ। ନିଜକୁ ଏପରି ନିର୍ଭରଶୀଳତାରୁ ମୁକ୍ତ କରିବାର ଆବଶ୍ୟକତା ଉପରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ। ଦେଶର ଯୁବପିଢ଼ିଙ୍କ କଠିନ ପରିଶ୍ରମ ଦ୍ୱାରା ଏବଂ ଭାରତରେ ନିର୍ମିତ ଉତ୍ପାଦ କିଣିବାକୁ ସେ ଲୋକମାନଙ୍କୁ ଆହ୍ୱାନ କରିଥିଲେ। ପ୍ରତ୍ୟେକ ପରିବାରକୁ ସ୍ୱଦେଶୀର ପ୍ରତୀକ ହେବାକୁ ଏବଂ ପ୍ରତ୍ୟେକ ଦୋକାନକୁ ସ୍ୱଦେଶୀ ସାମଗ୍ରୀରେ ସଜ୍ଜିତ କରିବାକୁ ସେ ନିବେଦନ କରିଥିଲେ। ପ୍ରଧାନମନ୍ତ୍ରୀ ନାଗରିକମାନଙ୍କୁ ସ୍ୱଦେଶୀ ପ୍ରତି ସେମାନଙ୍କର ପ୍ରତିବଦ୍ଧତା – ‘‘ମୁଁ ସ୍ୱଦେଶୀ କିଣେ,’’ ‘‘ମୁଁ ସ୍ୱଦେଶୀ ବିକ୍ରୟ କରେ’’- ବାର୍ତ୍ତାକୁ ଗର୍ବର ସହିତ ଘୋଷଣା କରିବାକୁ ଉତ୍ସାହିତ କରିଥିଲେ। ସେ କହିଥିଲେ ଯେ ଏହି ମାନସିକତା ପ୍ରତ୍ୟେକ ଭାରତୀୟଙ୍କ ମଧ୍ୟରେ ରହିବା ଉଚିତ। ଏପରି ପରିବର୍ତ୍ତନ ଭାରତର ବିକାଶକୁ ତ୍ୱରାନ୍ୱିତ କରିବ ବୋଲି ସେ ଦୃଢ଼ୋକ୍ତି ପ୍ରକାଶ କରିଥିଲେ। ସେ ସମସ୍ତ ରାଜ୍ୟ ସରକାରମାନଙ୍କୁ ପୂର୍ଣ୍ଣ ଶକ୍ତି ଓ ଉତ୍ସାହ ସହିତ ନିଜ ନିଜ ଅଞ୍ଚଳରେ ଉତ୍ପାଦନକୁ ବୃଦ୍ଧି କରିବାକୁ ପରାମର୍ଶ ଦେଇଥିଲେ । ନିବେଶ ପାଇଁ ଏକ ଅନୁକୂଳ ପରିବେଶ ସୃଷ୍ଟି କରି ଆତ୍ମନିର୍ଭର ଭାରତ ଏବଂ ସ୍ୱଦେଶୀ ଅଭିଯାନକୁ ସକ୍ରିୟ ଭାବରେ ସମର୍ଥନ କରିବାକୁ ସେ ଆହ୍ୱାନ କରିଥିଲେ। ଯେତେବେଳେ କେନ୍ଦ୍ର ଏବଂ ରାଜ୍ୟଗୁଡ଼ିକ ଏକାଠି ଆଗକୁ ବଢ଼ିବେ, ସେତେବେଳେ ଏକ ଆତ୍ମନିର୍ଭରଶୀଳ ଭାରତର ସ୍ୱପ୍ନ ପୂରଣ ହେବ। ପ୍ରତ୍ୟେକ ରାଜ୍ୟ ବିକଶିତ ହେବ ଏବଂ ଭାରତ ଏକ ବିକଶିତ ରାଷ୍ଟ୍ର ହୋଇପାରିବ ବୋଲି ସେ ଦୃଢ଼ୋକ୍ତି ପ୍ରକାଶ କରିଥିଲେ। ନିଜ ଅଭିଭାଷଣର ସମାପନ କରି ପ୍ରଧାନମନ୍ତ୍ରୀ ‘ଜିଏସଟି ବଚତ’ ଉତ୍ସବ ଏବଂ ନବରାତ୍ରୀର ପବିତ୍ର ଅବସର ପାଇଁ ହାର୍ଦ୍ଦିକ ଶୁଭେଚ୍ଛା ଜଣାଇଥିଲେ।
ସମ୍ପୂର୍ଣ୍ଣ ଅଭିଭାଷଣ ପଢିବା ପାଇଁ ଏଠାରେ କ୍ଲିକ କରନ୍ତୁ
PM @narendramodi extends Navratri greetings. pic.twitter.com/4XZVg4xJ39
— PMO India (@PMOIndia) September 21, 2025
From 22nd September, the next-generation GST reforms will come into effect. pic.twitter.com/XfROd215rP
— PMO India (@PMOIndia) September 21, 2025
A new wave of GST benefits is coming to every citizen. pic.twitter.com/y7GXC9S3vo
— PMO India (@PMOIndia) September 21, 2025
GST reforms will accelerate India's growth story. pic.twitter.com/GJj2h7Jbbo
— PMO India (@PMOIndia) September 21, 2025
New GST reforms are being implemented. Only 5% and 18% tax slabs will now remain. pic.twitter.com/Yy7rynnh6E
— PMO India (@PMOIndia) September 21, 2025
With lower GST, it will be easier for citizens to fulfill their dreams. pic.twitter.com/NFzPI5YCHI
— PMO India (@PMOIndia) September 21, 2025
The essence of serving citizens is reflected clearly in the next-generation GST reforms. pic.twitter.com/VM8eNtx5Qp
— PMO India (@PMOIndia) September 21, 2025
What the nation needs and what can be made in India should be made within India itself. pic.twitter.com/4UllVk42pK
— PMO India (@PMOIndia) September 21, 2025
India's prosperity will draw strength from self-reliance. pic.twitter.com/4si5mDH4Zd
— PMO India (@PMOIndia) September 21, 2025
Let's buy products that are Made in India. pic.twitter.com/Mb1j7gtv7h
— PMO India (@PMOIndia) September 21, 2025
