ଇଣ୍ଡୋନେସିଆ, ମାଲେସିଆ ଓ ସିଙ୍ଗାପୁର ଗସ୍ତ ପୂର୍ବରୁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ବିବୃତି ନିମ୍ନରେ ପ୍ରଦାନ କରାଗଲା ।
“2018 ମେ 29ରୁ ଜୁନ 2 ମଧ୍ୟରେ ମୁଁ ଇଣ୍ଡୋନେସିଆ, ମାଲେସିଆ ଓ ସିଙ୍ଗାପୁର ଗସ୍ତ କରିବି । ଏହି 3 ଟି ଯାକ ରାଷ୍ଟ୍ର ସହ ଭାରତର ବଳିଷ୍ଠ ରଣନୈତିକ ଭାଗିଦାରୀତା ରହିଛି ।
ଇଣ୍ଡୋନେସିଆ ରାଷ୍ଟ୍ରପତି ଜୋକୋ ୱିଡୋଡୋଙ୍କ ନିମନ୍ତ୍ରଣ ରକ୍ଷା କରି ମେ 29 ତାରିଖରେ ମୁଁ ଜାକର୍ତ୍ତାରେ ଥିବି । ପ୍ରଧାନମନ୍ତ୍ରୀ ଭାବେ ଏହା ହେଉଛି ମୋର ପ୍ରଥମ ଇଣ୍ଡୋନେସିଆ ଗସ୍ତ । ମେ 30 ରେ ରାଷ୍ଟ୍ରପତି ୱିଡୋଡୋଙ୍କ ସହ ହେବାକୁ ଥିବା ଆଲୋଚନା ଓ ଭାରତ-ଇଣ୍ଡୋନେସିଆ ସିଇଓ ମଂଚ ସହ ହେବାକୁ ଥିବା ମିଳିତ ଭାବ ବିନିମୟ କାର୍ଯ୍ୟକୁ ନେଇ ମୁଁ ଅତ୍ୟନ୍ତ ଆଗ୍ରହୀ । ମୁଁ ମଧ୍ୟ ଇଣ୍ଡୋନେସିଆରେ ରହୁଥିବା ଭାରତୀୟ ସମ୍ପ୍ରଦାୟକୁ ସମ୍ବୋଧିତ କରିବି ।
ଭାରତ ଏବଂ ଇଣ୍ଡୋନେସିଆ ମଧ୍ୟରେ ଦୃଢ଼ ଓ ବନ୍ଧୁତ୍ୱପୂର୍ଣ୍ଣ ସମ୍ପର୍କ ରହିଛି ଏବଂ ଉଭୟ ଦେଶ ମଧ୍ୟରେ ଗଭୀର ଐତିହାସିକ ଏବଂ ସଭ୍ୟତାଗତ ସମ୍ପର୍କ ରହିଛି । ଉଭୟ ଦେଶର ସଂସ୍କୃତି ଏବଂ ଧର୍ମ ବହୁବିଧ ଏବଂ ଏଠାରେ ବିବିଧ ମୁକ୍ତ ସମାଜ ରହିଛି । ମୋର ଦୃଢ଼ ବିଶ୍ୱାସ ରହିଛି ଯେ ମୋର ଏହି ଇଣ୍ଡୋନେସିଆ ଗସ୍ତ ଫଳରେ ଏସିଆର ଏହି ଦୁଇ ବୃହତ ଗଣତାନ୍ତ୍ରିକ ରାଷ୍ଟ୍ର ମଧ୍ୟରେ ସହଭାଗିତା ବୃଦ୍ଧି ପାଇବ ଏବଂ ପୁନଶ୍ଚ ଏହା ଆମର ଦ୍ୱିପାକ୍ଷିକ ସମ୍ପର୍କକୁ ଦୃଢ଼ୀଭୁତ କରିବ ।
ମେ 31 ରେ ସିଙ୍ଗାପୁର ଯିବା ବାଟରେ ମୁଁ ସ୍ୱଳ୍ପ ସମୟ ପାଇଁ ମାଲେସିଆ ଯାଇ ସେଠାକାର ନୂତନ ନେତୃତ୍ୱକୁ ଅଭିନନ୍ଦନ ଜଣାଇବି । ପ୍ରଧାନମନ୍ତ୍ରୀ ଡଃ ମହାଥିର ମହମ୍ମଦଙ୍କୁ ଭେଟିବା ଲାଗି ମୁଁ ଖୁବ ଆଗ୍ରହୀ ।
ସିଙ୍ଗାପୁରରେ ମୁଁ ଭାରତ ଓ ଏହି ଦେଶ ମଧ୍ୟରେ ଫିନଟେକ, ଦକ୍ଷତା ବିକାଶ, ସହରୀକରଣ ଯୋଜନା ଏବଂ କୃତ୍ରିମ ଧୀଶକ୍ତି କ୍ଷେତ୍ରରେ ଭାଗିଦାରୀତା ବୃଦ୍ଧି ନେଇ ଗୁରୁତ୍ୱାରୋପ କରିବି । ସହରୀକରଣ ବିକାଶ, ଯୋଜନା ପ୍ରସ୍ତୁତି, ସ୍ମାର୍ଟ ସିଟି ଏବଂ ଭିତ୍ତିଭୂମି ଉନ୍ନୟନ କ୍ଷେତ୍ରରେ ସିଙ୍ଗାପୁରର ବିଭିନ୍ନ ଅନୁଷ୍ଠାନ ଭାରତ ସହିତ ପ୍ରମୁଖ ଅଂଶୀଦାର ହୋଇଛନ୍ତି । ଉଭୟ ଦେଶ ପରସ୍ପର ମଧ୍ୟରେ ସହଭାଗିତାକୁ ପୁନଶ୍ଚ ବୃଦ୍ଧି କରିବା ପାଇଁ ମୋର ସିଙ୍ଗାପୁର ଗସ୍ତ ଏକ ସୁଯୋଗ ପ୍ରଦାନ କରୁଛି ।
ମେ 31ରେ ମୁଁ ଭାରତ-ସିଙ୍ଗାପୁର ଉଦ୍ୟୋଗ ଓ ନବସୃଜନ ପ୍ରଦର୍ଶନୀରେ ଭାଗନେବି । ମୁଁ ମଧ୍ୟ ସେଠାରେ ଏକ ବ୍ୟବସାୟିକ ସମୁଦାୟକୁ ଉଦବୋଧନ ଦେବା ପରେ ସିଙ୍ଗାପୁରର କେତେକ ବଛା ବଛା ପ୍ରମୁଖ ସିଇଓଙ୍କ ସହ ବ୍ୟବସାୟ ଏବଂ ପୁଞ୍ଜିନିବେଶ ସୁଯୋଗ ସମ୍ବନ୍ଧରେ ଆଲୋଚନା କରିବି ।
ଜୁନ 1ରେ ମୁଁ ସିଙ୍ଗାପୁର ରାଷ୍ଟ୍ରପତି ହାଲିମା ୟାକୋବଙ୍କୁ ଭେଟିବି । ମୁଁ ମଧ୍ୟ ସିଙ୍ଗାପୁର ପ୍ରଧାନମନ୍ତ୍ରୀ ଲିଙ୍କ ସହ ଏକ ପ୍ରତିନିଧିସ୍ତରୀୟ ଆଲୋଚନାରେ ଭାଗନେବି । ମୁଁ ନାନ୍ୟାଙ୍ଗ ବୈଷୟିକ ବିଶ୍ୱବିଦ୍ୟାଳୟକୁ ଯିବି ଏବଂ ସେଠାରେ ଛାତ୍ରଛାତ୍ରୀଙ୍କ ସହ ଭାବ ବିନିମୟ କରିବି ।
ସେହିଦିନ ସଂଧ୍ୟାରେ ସାଙ୍ଗ୍ରି-ଲା ସମ୍ମିଳନୀରେ ପ୍ରମୁଖ ବକ୍ତା ଭାବେ ମୁଁ ଉଦବୋଧନ ପ୍ରଦାନ କରିବି । ପ୍ରଥମ ଥର ପାଇଁ ଜଣେ ଭାରତୀୟ ପ୍ରଧାନମନ୍ତ୍ରୀ ଏହି ସମ୍ମିଳନୀକୁ ସମ୍ବୋଧିତ କରିବେ । ଆଂଚଳିକ ସୁରକ୍ଷା ବିଷୟ ଏବଂ ଏଠାରେ ଶାନ୍ତି ଏବଂ ସ୍ଥିରତା ବଜାୟ ରଖିବା ନେଇ ଭାରତର ପକ୍ଷ ରଖିବା ପାଇଁ ଏହା ଏକ ସୁଯୋଗ ପ୍ରଦାନ କରିବ ।
ଜୁନ 2ରେ ମୁଁ କ୍ଲିଫୋର୍ଡ ପିଏରରେ ଏକ ଫଳକ ଉନ୍ମୋଚନ କରିବି, ଯେଉଁଠାରେ ସମୁଦ୍ରରେ 1948 ମାର୍ଚ୍ଚ 27 ରେ ଗାନ୍ଧିଜୀଙ୍କ ଚିତାଭସ୍ମ ବିସର୍ଜନ କରାଯାଇଥିଲା । ମୁଁ ମଧ୍ୟ କେତେକ ପୂଜା ସ୍ଥଳକୁ ଗସ୍ତ କରିବି ଯାହାର ସଭ୍ୟତାଗତ ସମ୍ପର୍କ ଭାରତ ସହିତ ରହିଛି ।
ଗସ୍ତର ଶେଷ କାର୍ଯ୍ୟକ୍ରମ ରହିବ ସିଙ୍ଗାପୁରର ଚାଙ୍ଗି ନୌଘାଟି ପରିଦର୍ଶନ ଯେଉଁଠାରେ କି ମୁଁ ଭାରତୀୟ ନୌସେନା ଜାହାଜ ଆଇଏନଏସ ସାତପୁରାକୁ ଯିବି ଏବଂ ପଦାଧିକାରୀ ଓ ଭାରତୀୟ ନୌସେନା ଏବଂ ରୟାଲ ସିଙ୍ଗାପୁର ନୌସେନାର ନାବିକମାନଙ୍କ ସହ ଭାବ ବିନିମୟ କରିବି ।
ମୋର ଦୃଢ଼ ବିଶ୍ୱାସ ଯେ ଇଣ୍ଡୋନେସିଆ, ମାଲେସିଆ ଏବଂ ସିଙ୍ଗାପୁରକୁ ମୋର ଏହି ଗସ୍ତ ଆମର ପୂର୍ବାଂଚଳ ନୀତି ନିର୍ଦ୍ଧାରଣକୁ ଅଧିକ ଶକ୍ତି ପ୍ରଦାନ କରିବା ସହ ଏହି ତିନୋଟି ରାଷ୍ଟ୍ର ସହ ଆମର ସମ୍ପର୍କ ଓ ସହଭାଗିତା ଆହୁରି ଅଧିକ ବୃଦ୍ଧି ହେବ ।”
