সার্ককী লুচিংবশিং অমসুং মীহুৎশিংগা লোইননা অপুনবা ভিদিও কনফরেন্সিংদা প্রধান মন্ত্রী মোদীনা কোরোনাভাইরসকী লাইচৎতগী ঙাকথোক্নবা ভারতনা হোৎনরিবশিং অদু পনখ্রে। প্রধান মন্ত্রী মোদীনা হায়খি, “শেম-শাদুনা লৈবা, অদুবু পাখৎতবা অসিমক ঐখোয়গী লমজিং-লমতাক্লিবা লাইশোন্নি। মথং-মনাও নাইনা শেম-শাবনা মরম ওইদুনা ভারত্তা কোরোনা ভাইরসকী লাইচৎ শন্দোকপা ঙমদ্রিবনি।”
প্রধান মন্ত্রীনা হায়খ্রে মদুদি সরকারনা জনুৱারীগী ময়াই চল্লকপদগী ভারত্তা লাকপা পুম্নমক্কী মরমদা য়েংশিনবা হৌরকখ্রে অমসুং তপ্না তপ্না চৎথোক-চৎশিন তৌবদা অথিংবা থম্বা হেনগৎখি। প্রধান মন্ত্রীনা হায়খি মদুদি অমমমতা ওইনা থাংজিনখিবা ঐখোয়গী খোংথাংশিং অদুনা পাখৎপদগী ঙাকথোকপদা মতেং ওইখি। মহাক্না সরকারগী তি.ভি., প্রিন্ত মীদিয়া অমসুং সোসিয়ল মীদিয়াগী থোংদা মীয়ামদা খঙহনবশিংগী মতাংদসু পনখি।
প্রধান মন্ত্রী মোদীনা হায়খি মদুদি সরকারনা অশোনবা কাংলুপ ফাওবা য়ৌশিন্নবা অখন্নবা থৌরাং লৌখৎখি। প্রধান মন্ত্রীনা হায়খি, “ঐখোয়না ঐখোয়গী সিস্তেমদা লৈবাক অপুনবগী ঐখোয়গী মেদিকেল স্তাফশিংদা ত্রেনিং পীবা য়াওনা খোংজেল য়াংনা থবক পাইখৎনবা হোৎনখি। ঐখোয়না লাইওং খঙদোকপগী পাঙ্গলসু হেনগৎহনখি। থা অনিগী মনুংদা, ঐখোয়না পান-ইন্দিয়া তেস্তিংগীদমক্তা অচৌবা ফেসিলিতী অমদগী অসিগুম্বা লেব 60 হেনবদা চৎখি।”
প্রধান মন্ত্রী মোদীনা হায়খি মদুদি সরকারনা লাইচৎ অসিদগী ঙাকথোক্নবা তাঙ্কক খুদিংক্কীদমক্তা প্রোতোকোল শেমলে। চংঙকপা য়েংশিন্নবা, চিংনবা কেসশিং খঙদোক্নবা, তোঙান্না থম্বা অমদি আইসোলেসনগী খুদোংচাবশিং, লোইননা ক্লিয়র তৌরবা কেসশিং দিসচার্জ তৌবা।
মসিদা নত্তনা, ভারতনা মীরমদগী ঐখোয়গী মীওইশিংবু তেক্তা কাইদনা হন্না পুরকপগী থবকসু পাইখৎলি। ভারতনা মসিগী ‘নাইবরহুদ ফর্স্ত পোলিসী’গী মতুং ইন্না তোঙান তোঙানবা লৈবাকশিংদগী চাউরাক্না ভারত মচা 1400 অমসুং য়ুমলোন্নবা লৈবাকশিংগী মীওই খরা হন্না পুরকপদা মতেং পাংখি।
