ছাৰ্ক নেতৃত্ব আৰু প্ৰতিনিধিসকলৰ সৈতে অনুষ্ঠিত হোৱা যুটীয়া সংবাদ মেলত প্ৰধানমন্ত্ৰীয়ে ক’ৰনা ভাইৰাছৰ প্ৰাদুৰ্ভাৱক ৰোধ কৰাৰ বাবে ভাৰতে গ্ৰহণ কৰা পদক্ষেপসমূহ আলোকপাত কৰে৷ প্ৰধানমন্ত্ৰী মোদীয়ে কয়, ‘‘প্ৰস্তুত হওক কিন্তু আতংকিত নহ’ব, এয়াই হ’ল আমাৰ মাৰ্গদৰ্শী মন্ত্ৰ৷ আমি এই সমস্যাক উলাইয়ো কৰিব নোৱাৰো আৰু ইয়াৰ প্ৰতিক্ৰিয়াসমূহ পৰিহাৰো কৰিব নোৱাৰো৷ আমি প্ৰতিক্ৰিয়াশীল প্ৰণালীৰ সৈতে সক্ৰিয় পদক্ষেপ গ্ৰহণ কৰাৰ বাবে প্ৰয়াস কৰিছো৷’’
প্ৰধানমন্ত্ৰীয়ে কয় যে চৰকাৰে জানুৱাৰী মাহৰ মাজৰ সময়ছোৱাৰ পৰাই ভাৰতত প্ৰৱেশ কৰোঁতাসকলৰ নিৰীক্ষণ আৰম্ভ কৰিছে আৰু ভ্ৰমণসমূহত ক্ৰমাগতভাৱে নিষেধাজ্ঞা জাৰী কৰিছে৷ তেওঁ কয় যে পৰ্যায়ক্ৰমে গ্ৰহণ কৰা পদক্ষেপসমূহৰ বাবে আতংকময় পৰিস্থিতি উদ্ভৱ হোৱাৰ পৰা ৰক্ষা পৰা হৈছে৷ চৰকাৰে টিভি, ছপা মাধ্যম আৰু ছ’চিয়েল মিডিয়াৰ জৰিয়তে জনসজাগতামূলক কাৰ্যসূচীৰ পদক্ষেপ গ্ৰহণ কৰা বুলিও তেওঁ উল্লেখ কৰে৷
প্ৰধানমন্ত্ৰী মোদীয়ে কয় যে অসুৰক্ষিত গোটসমূহক নিৰীক্ষণৰ আওতালৈ অনাৰ বাবে চৰকাৰে বিভিন্ন ধৰণৰ প্ৰয়াস কৰিছে৷ ‘‘আমি সমগ্ৰ দেশত নিজৰ চিকিৎসা কৰ্মীসকলক প্ৰশিক্ষিত কৰাৰ লগতে আমাৰ আন্তঃগাঁথনিৰ ক্ষমতা বৃদ্ধি কৰাৰ দিশত দ্ৰুত গতিত অগ্ৰসৰ হ’লো৷ দুমাহৰ ভিতৰত আমি সমগ্ৰ দেশৰ ৬০ত কৈও অধিক গৱেষণাগাৰত পৰীক্ষণৰ ব্যৱস্থা কৰিলো’’, প্ৰধানমন্ত্ৰী মোদীয়ে এইদৰে কয়৷
প্ৰধানমন্ত্ৰী মোদীয়ে কয় যে চৰকাৰে ক’ৰনা ভাইৰাছ মহামাৰীৰ প্ৰাদুৰ্ভাৱ ৰোধ কৰাৰ বিভিন্ন পৰ্যায়ৰ বাবে বিভিন্ন প্ৰট’ক’ল বিকশিত কৰিছে৷ যেনে- প্ৰৱেশ পথত পৰীক্ষণ কৰা, সন্দেহযুক্ত পৰিঘটনাৰ সন্ধান কৰা, আচুতীয়া সুবিধাৰ ব্যৱস্থা কৰা আৰু সন্দেহমুক্তসকলক মুকলি কৰি দিয়া আদি৷
ইয়াৰোপৰি ভাৰতে বিদেশৰ পৰা দেশৰ নাগৰিকসকলক উদ্ধাৰৰো ব্যৱস্থা কৰিছে৷ ভাৰতে বিভিন্ন দেশৰ পৰা ১৪০০ ভাৰতীয় নাগৰিকক উদ্ধাৰ কৰি অনাৰ লগতে ‘‘চুবুৰীয়া সৰ্বপ্ৰথম’’ নীতিৰ আধাৰত চুবুৰীয়া দেশসমূহৰ কিছু নাগৰিককো উদ্ধাৰ কৰিছে৷
