প্রধান মন্ত্রী, শ্রী নরেন্দ্র মোদীনা ঐখোয়না থৌনা ফনা লৈঙাকপা ঙম্নবা ইথিল পীনবগীদমক্তা ঐখোয়না পান্দম অমসুং থৌনা লৈগদবনি হায়বা নেতাজি সুভাস চন্দ্র বোসনা হায়বীরম্বা ৱাফম্বু নৌহৌননা নীংশিংখি। ঙসিগী আত্মানির্ভর ভারত অসিদা, ঐখোয়না হায়রিবা থৌনা অমসুং পান্দম অদু লৈরে। ঐখোয়গী আত্মানির্ভর ওইবগী পান্দম অসি ঐখোয়গী নুংগী পাঙ্গল অমসুং নীংবা চেৎপগী খুত্থাংদগী ফংগনি হায়না শ্রী মোদীনা ফোংদোকখি। নেতাজিনা হায়বীরম্বা ৱাফম্বু পল্লদুনা, প্রধান মন্ত্রীনা ঐখোয়না হুমাং অমসুং ইশাগী ঈবু পাম্মুদনা হোৎনদুনা লৈবাক অসিদা তেংবাংবগী অমত্তা ঙাইরবা পান্দম অমা থমগদবনি অমসুং ঐখোয়গী হোৎনবা কনবা অমসুং অনৌবা থৌওং পাংথোকপগী থৌওংশিং অসিনা ভারতপু আত্মানির্ভর ওইহনগদবনি হায়খি। মহাক্না কোলকতাগী ভিক্তোরিয়া মেমোরিএলদা পাংথোকপা ‘পরাক্রম দিবস’কী থৌরমদা ৱা ঙাংখিবনি।
নেতাজিনা থৌনা লৈনা নান্থোক্তুনা চেনখিদ্রিঙৈগী মমাংদা মহাক্কী মচিন-মনাওশিংগী মচানুপা, সিসির বোসতা থৱাই নুংঙাইতনা হংখিবা ৱাফম অদুদা য়ুম্ফম ওইরদুনা প্রধান মন্ত্রীনা অসুম্না হায়বীখি, “করিগুম্বা, ঙসিগী নুমিৎ অসিদা, ভারত মচা অমনা মহাক্কী থম্মোইদা খুৎ থমদুনা য়েংজবদা নেতাজি লৈরি হায়না ফাউরগদি, ‘নহাক্না ঐহাক্কী করিগুম্বা অমা তৌবিগেরা? মসিগী থবক, মসিগী থৌদাং, মসিগী পান্দম অসিদি ভারতপু মরোমদোম লেপচবা ঙমহনবনি। লৈবাক অসিগী মীয়াম, মফম অমসুং মীওই খুদিংমক অসি মসিগী শরুক অমনি’ হায়বা ৱাহং অমসুং ৱাফম অসি তাবা ফংগনি”।
প্রধান মন্ত্রীনা মালেমগী খ্বাইদগী ফবা পোত্থোক পুথোক্নবগীদমক্তা ‘জিরো দিফেক্ত অমসুং জিরো ইফেক্ত’কা লোয়ননবা পোত্থোক পুথোকপগী মতিক অসি য়ৌনা চাউখৎহনবগী মতাংদা মিৎয়েং চঙখি। নিং-তম্বা ভারত অমগী মঙলান অসি কৈদৌনুংদা মাঙহনগনু অমসুং ভারতপু থুগায়বা ঙমগদবা মালেম অসিদা শক্তি অমত্তা লৈতে হায়না নেতাজিনা হায়বীরম্বনি। তসেংনমক, ভারত মচা করোর ১৩০ অসিনা মরোমদোম লেপচবা ঙম্নবা হোৎনবা মতমদা থিংবা ঙমগদবা শক্তি অমত্তা লৈতে।
নেতাজি সুভাস চন্দ্র বোসনা লায়রবা, ইবা-পাবা থোক্তবা, লায়না অসি লৈবাক অসিগী খ্বাইদগী চাউবা শিংনবশিংগী মরক্তা অমনি হায়না লৌরম্মি হায়না প্রধান মন্ত্রীনা হায়খি। মহাক্না লায়রশিংগীদমক্তা মতম পুম্বদা খনখি অমসুং মখোয়গী মহৈ-তম্বদা মিৎয়েং চাউনা চঙখি। ঐখওয়গী খ্বাইদগী চাউবা শিংনবশিং অসিদি লায়রবা, ইবা-পাবা থোক্তবা, লায়না অমসুং সাইন্তিফিক ওইবা পোত্থোক পুথোকপা ৱাৎপা অসিনি হায়না হন্না হন্না পনবীখি। শিংনবশিং অসিগী ৱারোইশিন পুরকপা ঙম্নবা খুন্নাইনা মাং থাদুনা থোক্লক্কদবনি অমসুং ঐখোয়ন পুন্না মসিগীদমক্তা হোৎনমিন্নগদবনি।
প্রধান মন্ত্রীনা লৈবাক অসিনা শোত্থরবা অমসুং তাথীনা তৌবীরবশিং অমসুং ঐখোয়গী লৌমী অমসুং নুপীশিংগী মপাঙ্গল হাপ্নবা থবক কয়া লেপ্পা লৈতনা পাংথোক্লিবা অসিদা অপেনবা ফাওই হায়না পাউদমখি। ঙসিদি, ঐখোয়গী লায়রবশিংনা লেম্না লায়েংবা অমসুং হকশেলগী ফেসিলিতীশিংগী খুদোংচাবা ফংলি; লৌউবশিংনা পোত্থোক্কী মরুদগী হৌদুনা কৈথেল ফাওবগী মতমগা চান্নবা খুদোংচাবা কয়া অমা ফংলি অমসুং মখোয়না লৌউবদা চঙবা চাদিংসু য়াম্না হন্থরে; এজুকেসনগী ইনফ্রাস্ত্রকচরশিংসু নহাশিংগীদমক্তা মতমগা চান্ননা মগুন লৈহল্লি; ২১শুবা চহি চাগা চুনহন্নবগীদমক্তা নেস্নেল এজুকেসন পোলিসীগা লোয়ননা অনৌবা আই.আই.তি., আই.আই.এম. অমসুং এমস কয়াসু লিংখৎলে।
ঙসিগী ভারত অসিদা লৈরক্লিবা অফবা অহোংবশিং অসিনা নেতাজিবু য়াম্না হরাওহল্লমগনি হায়না প্রধান মন্ত্রীনা হায়খি। লৈবাক অসিনা খ্বাইদগী অনৌবা তেক্নোলোজীশিংগী হীরমদা মরোমদোম লেপচবা ঙম্লকপা; মালেমগী খ্বাইদগী চাউবা কম্পেনীশিং, এজুকেসন অমসুং মেদিকেল সেক্তরদা ভারত মচাশিংনা খুৎকন-পাঙ্গনবগী ফিভম লৈরক্লিবা অসি উবদা নেতাজিনা করম্না খল্লমগনি হায়বা খঙনিঙই হায়না প্রধান মন্ত্রীনা ফোংদোকখি। করিগুম্বা ভারতকী দিফেন্স ফোর্স অসিনা মতমগা চানবা রাফাএলগুম্বা এয়রক্রাফ লৈরক্লবনিনা, ভারতনা মতমগা চানবা ফাইতর প্লেন তেজাসকুম্বসু পুথোক্লি। লৈবাক্কী মপাঙ্গল অমসুং লৈবাক অসিনা লাইচৎ অসিবু থেংনবগী মওং অমসুং লমদম অসিদা ভেক্সিন শাজবগুম্বা মতমগা চানবা সাইন্তিফিক ওইবা ৱারোইশিন পুরকপা ঙম্লিবা অমসুং অতোপ্পা লৈবাকশিংবুসু তেংবাংবা ঙম্লিবা অসি উরবদি নেতাজিনা য়াইফ-মঙ্গোল পীবীরমগনি। এল.এ.সি.দগী হৌদুনা এল.ও.সি. ফাওবা লৈরিবা মপাঙ্গল লৈবা ভারত অমগী মহাক্কী মঙলান অসি ঙসিদি মালেম্না উবা ফংলে। ভারতনা মসিগী অপুনবদা শিংনরকপশিংদসু মতিক চাবা পাউখুম পীরে হায়না প্রধান মন্ত্রীনা হায়খি।
নেতাজি সুভাসকা লোয়ননা আত্মানির্ভর ভারতকী মঙলান অসিনা সোনার বাঙ্গলাগী খ্বাইদগী চাউবা ইথিলনি হায়না শ্রী মোদীনা হায়খি। লৈবাক অসিগী নিং-তম লান্দা নেতাজি সুভাস চন্দ্র বোসনা লৌরম্বা থৌদাং অদুদা মিৎয়েং চঙলদুনা, নোংচুপ বেঙ্গোলসু লৈবাক অসিগী আত্মানির্ভর ওইবগী খোঙজঙ অসিদা চপ মান্নবা থৌদাং লৌগদবনি হায়না প্রধান মন্ত্রীনা হায়খি। আত্মানির্ভর ভারত অসি আত্মানির্ভর বেঙ্গোল অমসুং সোনার বঙ্গলানসু লমজিংগদবনি। বেঙ্গোলনা মাং থানা চত্তুনা মশাগী অমসুং লৈবাক অসিগী নুংঙাই য়াইফবা পুরক্কদবনি হায়না প্রধান মন্ত্রীনা ফোংদোক্লদুনা মহাক্কী ৱারোল লোইশিনখি।
The positive changes taking place in India today would make Netaji Subhas Bose extremely proud. #ParakramDivas pic.twitter.com/mdemUH4tey
— Narendra Modi (@narendramodi) January 23, 2021
The positive changes taking place in India today would make Netaji Subhas Bose extremely proud. #ParakramDivas pic.twitter.com/mdemUH4tey
— Narendra Modi (@narendramodi) January 23, 2021
Announces ex-gratia from PMNRF
