খুরুমজরি,
ময়াম্বু কমদৌবিরিবগে?
ঐ ইশানা লাকচরমগদবনি৷ করিগুম্বা ঐ ইশানা হকথেংননা লাকচরম্বা তারবদি ঐনা ময়াম পুম্নমকপু উনরমগদবনি৷ অদুম ওইনমক, মতমগী অৱাৎপা লৈবনা অমদি তেক্নোলোজী শিজিন্নদুনা, ঙসিদি, অসিগুম্লবা প্রোগ্রাম অসিদা শরুক য়াবা ফংজবা অসি ঐগী লাইবক ফবনি৷ ঐগী ৱাখলদদি, ময়াম পুম্নমক্না হোৎনবিদুনা মসিগী থবক-ব্রহুদ সেভা মন্দির প্রোজেক্ত অসি মল্তি-ফেসিতেদকী মরু ওই হায়না লৈরি৷
রেদ ফোর্তকী রমপার্ত্তগী ঐনা হায়খি, “সবকা প্রয়াস” (মীপুম খুদিংমক্কী হোৎনজমলনি)৷ ইমা উমিয়া সেভা সনকুলগা মরী লৈননা ইমা উমিয়া ধামগী চাওখৎ-থৌদাংগী ওইবা থবকশিংগীদমক ময়াম পুম্নমক পুনশিনগদবনি অমদি সোসিএল সর্ভিসতগী হেন্দোক্তুনা রিলিজিয়র্স পর্পোস অমদি স্পিরিচুএলগী ওইবা হিরমশিংগীদমক অনৌবা পান্দম অমা থমগদবনি৷ মদু অশেংবা লম্বীনি৷ ঐখোয়গী লমদমদা অসুম্না হায়নরি মদুদি “নর কর্নি করে তু নরায়ন হো জায়ে” (মীওইবনা তৌরিবা কর্মগী মতুং ইন্না দিবাইনিতী ফংবা ঙমগনি)৷ ঐখোয়গী লমদমদা অসুম্নসু হায়নরি “জন সেভা ইজ জগ সেভা” (মীওইবু মতেং পাংবা হায়বসি মালেম অসিবু মতেং পাংবগা ফবা চপ ইমান্নৈ)৷ হিংলিবা থৱাই পানবা জীবা খুদিংমক্তা ইশ্বরবু উরিবা অসি ঐখোয় মীয়াম্নি৷ মতৌ অসুম্না, সমাজ অসিনা কোওপরেসন পীদুনা অমদি তুংদা লাক্কদৌরিবা মীরোনশিংবু, নহাশিংবু শেম-শাদুনা থম্নবগীদমক মফম অসিদা শেম্লিবা প্লানিং অসি অদুক্কী মতিক থাগৎনিংঙাই ওই অমদি তরাম্না ওকপা য়াবা খোংথাং অমনি৷ কোতি ৫১রক হন্না অদোম্না “ইমা উমিয়া শরানম মমা”গী (মীওই অমবু মশানা ইমা উমিয়াদা কৎথোকচবা)মন্ত্র অসি থিনবা অমদি ইনবা কেম্পেন্দ অমা হৌদোকখি হায়না ঐঙোন্দা হায়রকপা লৈখি৷ মসিনা মশামক্কী ইনর্জীগী হৌরকফম অমা ওইরি৷ অমদি অদোম্না ইশাবু ইমা উমিয়াদা কৎথোকচদুনা পাক-চাওরবা মওং অমদা প্রঝা মীয়ামগী সেভা তৌনবগী লম্বী অদু খনখ্রে৷ সর্ভিসকী অচৌবা কেম্পেন্দ অমা ওইরিবা ইমা উমিয়া ধাম দিবেলপমেন্ত প্রোজেক্ত অসি লাক্কদৌরিবা মীরোনশিংগী ওইনদি কা-হেন্না কান্নবা ওইরগনি৷ অদুনা ময়াম পুম্নমক থাগৎ-ৱাহৈ অমা তাফম থোকই৷
অদুবু অদোম্না নহাদা খুদোংচাবা কয়া অমা ফংহল্লিবা অমদি মখোয়গীদমক খুদোংচাবা কয়া অমা শেমগৎতুনা লাক্লবসু হৌজিক লৈরিবা মতমশিং অসিদা স্কিল দিবেলপ তৌবগী তঙাই ফদবা লৈ হায়বদু উৎখ্রে হায়বসি নহাশিংদা ঐনা ফোংদোকপা পাম্মী৷ অদোমগী ওর্গনাইজেসনগী এস্পেক্ত খুদিংমক্কা লোইননা অদোম্না স্কিল দিবেলপ তৌনবা শোইদনা হোৎনগদবনি৷ মদুগী মতাংদা অদোম্না শোইদনা খঙগদবনি৷ অদুম ওইনমক, স্কিলশিং হৈবা হেনগৎনবা হোৎনবা অসিনা মতম অসিগী তঙাই ফদবা ওইরি৷ ঐখোয়গী ঙল্লিঙৈ মতমশিংদা, ইমুং অমনা ইমুং অদুনা হৈরিবা স্কিল অদু লাক্কদৌরিবা মীরোনশিংদা লিগেসী অমা ওইনা মখা শমথনবগী চৎনবা অমা লৈরম্মী৷ হৌজিক্তি সমাজকী ওইবা মওং অসি চাওনা অহোংবা লাক্লে৷ অদুনা হায়রিবা অসিগীদমক দরকার ওইরিবা মেকানিজম অদু শেমগৎতুনা ঐখোয়না মসি পাংথোক্কদবনি৷ লৈবাক অসিনা “অজাদি কা অমিৃত মহোতসব” পাংথোক্লিঙৈ মতম অসিদা; অমদি গুজরাত্তা ময়াম পুম্নমকপু ঐনা সেভা তৌবা ফংখিবগী মতম অদু ফাওবা; অমদি লৈবাক অসিগী সেভা তৌনবগী খুদোংচাবা অমা হৌজিক ঐঙোন্দা ফংহনখ্রবা মতম অসিদা, ঐনা “অজাদি কা অমিৃত মহোতসব”কী মতম অসি ফাওবদা ঐগী ৱাহৈশিং অদু নিংশিংজরি, মফম অসি থাদোক্ত্রিঙৈ মাংওইননা লৈবাক অমসুং সমাজ অসি শেমগৎপদা ঐখোয়না করম্বা থৌদাং লৌগদগে হায়বদুগী মতাংদা ঐখোয়না শোইদনা অফবা রিজোলুসন অমা লৌগদবনি৷ ঐনা অদোমগী নাক্তা লাকখিবা মতমদা, ঐখোয়না হিরম কয়া অমা খন্ন-নৈনখি হায়বসি অচুম্বা ৱারোল অমনি৷ হিরম কয়ামরোমগীদমক ঐনা অদোমগী কোওপরেসন অমদি কম্পেনিয়নশিপ নিজখ্রে৷ ময়াম পুম্নমক্নসু ঐনা নিজরিবা অদু পীবিরকখ্রে৷
“বেতি বচাউ”(নুপীমচাবু কল্লু) কেম্পেন্দ অসি চৎনরিঙৈ মতমদা, ঐনা উনঝাদা অমুকরক লাকখি অমদি ময়াম পুম্নমক্কা লোইননা ঐনা হিরম কয়া অমদা ৱারি শানখিবা অদু ঐনা নিংশিংলি৷ ইমা উমিয়া ধামগী মফম ওইরিবা অমদি নুপী পোকপগী চাং কা-হেন্না নেম্না উরিবা উনঝা অসি ঐখোয়গী ওইনদি ইকাই-ফিরুপ খুম্নিংঙাই ওইবা য়াই হায়না ঐনসু তেল্লপনা ফোংদোকখি৷ মতম অসিমক্তদা, ঐখোয়না ফিভম অসি ফগৎহনবা দরকার ওইরিবা অসিদা ময়াম পুম্নমক্না হোৎনগনি হায়বগী ৱাশক অমা ঐনা হংজখি৷ ঙসিদি, মীয়াম্না চেলেঞ্জ অদু লৌশিনবিদুনা নুপী মশিং অসি নুপা মশিংগা মান্নরকপগী ফিভম অমদা লাকহল্লিবা অসিগীদমক ঐনা ময়াম পুম্নমকপু থাগৎচরি৷ অসিগুম্বা অহোংবা অসি সমাজ অসিদা লাকহনবা দরকার ওই হায়বা অসিসু ময়াম্না শোইদনা খঙনরমগনি৷ অমদি অদোম্নসু নিংথিনা তৌবিরকখি৷
“সুজালম সুফালম” স্কিমগী মখাদা নর্মদা তুরেলগী ইশিং সপ্লাই তৌবা ঐখোয়না হৌদোকখিবা মতম অদু ঐনা নিংশিংলিবা অসিগুম্না, ইশিং অসিনা য়ৌরকখ্রবা তারবসু, ইশিংগী মরু ওইবা অদুদি ঐখোয়না কাওরোইশি হায়না ঐনা অৱাং-থংবা গুজরাত অমদি সৌরাস্ত্র রিজনগী লৌমীশিং অমসুং ইমা উমিয়াদা থৱাই লুপচরিবা মীওইশিংদা অখন্ননা হায়জখি৷ লৈহৌরিবা প্রজাগীদমক, “জল ইজ জীবন চে” (ইশিংনা পুন্সিনি) অসিনা অতোপ্পা স্লোগান ওইহনসি৷ অদুবু ইশিং য়াওদনা ঐখোয়না কয়ামুক য়াম্না অৱাবা চৈথেং ইমাইয়োক্নৈ হায়বা অসিদি ঐখোয় পুম্নমক্না খঙনখিবা ৱাফম্নি৷ নোং মতম চাদনা থিন্থনা চুবনা মতম ওইদুনা নুমিৎ কয়ানি নত্রগা চহি অমা ফাওবগী মতম মাংখিবগী থেংনরিবা অৱাবা চৈথেং অদু ঐখোয়না খঙই৷ মরম অধুনা, ইশিংবু কন্নবা ঐখোয়না হোৎনখিবনি৷ ময়াম পুম্নমক্না পাম্নখিবা অমদি তরাম্না ওকখিবা অৱাং থংবা গুজরাত্তা পাংথোক্লিবা দ্রিপ ইরিগেসন অসি শিজিন্ননবা ঐনা তকশিনখিবনি৷ মফম কয়া অমদা দ্রিপ ইরিগেসন সিস্তেম অসি পাংথোকখ্রে অমদি মসিনা মরম ওইদুনা ইশিং মাংখিগদবা অদুদগী কনবা অমদি অফবা মহৈ-মরোং পুথোকপা ঙম্লে৷
মতৌ অসিগুম্না, ঐখোয়গী ইমা-লৈবাক অসিগী মতাংদা ঐখোয়না য়েংশিন্নিংঙাই ওইরিবা অদু ঐখোয়না খন্নখি৷ ঙসি লৈবাক পুম্বনা মতুং ইল্লিবা সোইল হেল্থ কার্দকী সিস্তেম অসিবু ইহান হান্না শেমগৎখিবা লমদম অসি গুজরাতনা ওইখি৷ থৱাই পানবা জীবা পুম্নমক্কী হিংনবগী সোর্স অমা ওইরিবা ঐখোয়গী ইমা লৈবাক্কী হেল্থকী মতাংদা য়েংশিনবনা সিস্তেম অসিগী মথৌ ওইখি৷ সোইল হেল্থ কার্দ সিস্তেম অসিগী মতেংদগী ঐখোয়না সোইলগী হকশেল য়েংশিল্লম্মী, মসিনা সোইল অদুগী অশোইবশিং, অৱাৎ-অপাশিং অদু উৎলকখি৷ হায়রিবা থবক পুম্নমক অসি ঐখোয়না তৌখি৷ অদুম ওইনমক, পোত্থোক হেন্না পুথোক্নিংবা, অফবা রিজল্তশিং উনিংবগী খৌরাংবা পুম্নমক অসি মীওইবগী হৌনাশানি৷ অদুনা, ইমা লৈবাক্কী হকশেলবু করিসু থৌশাদনা ঐখোয়না তোঙান তোঙানবা মফমগী কেমিকেলশিং, ফর্তিলাইজরশিং অমসুং হিদাক-লাংথকশিং অসি শিজিন্নবা হৌখিবনি৷ ঙসিদি, হায়জরকপা অমগা লোইননা ময়ামগী মরক্তা ঐনা লাকখিবনি৷ ইমা উমিয়াগী থৌগল তৌনবা ঐখোয়না হোৎনখিবা মতমদা, ইমা লৈবাক অসিবু ঐখোয়না কাওথোকপা য়ারোই৷ ইমা উমিয়াগী মচা-মশুশিংনা ইমা লৈবাকপু কাওথোকপগী হক অমতা লৈতে৷ ঐখোয়গী ওইনদি মখোয় অনিমক চাং-চপ ইমান্ননা মরু ওই৷ ইমা লৈবাক্না ঐখোয়গী পুন্সিনি অমদি ইমা উমিয়ানা ঐখোয়গী স্পিরিচুএল গাইদনি৷ মরম অদুনা, ইমা উমিয়াগী মমাংদা অৱাং-থংবা গুজরাত লমদম অসি ওর্গানিক ফার্মিংদা ইমাই ওনশিন্নবা ঐখোয়না মতম চানা রিজোলুসন অমা লৌরসি হায়না ঐনা ময়াম পুম্নমক্তা হায়জরি৷ ওর্গানিক ফার্মিংবু জিরো বদজেৎ ফার্মিং হায়না কৌরসু য়াই৷ মোদীজীনা লৌউ-শিংউবগী মতাংদা করিসু খঙবা নত্তে, অদুবু মহাক্নদি ঐখোয়বু লেপ্প-লৈতনা পাউতাক পীরি হায়না ঐখোয় পুম্নমক্না খল্লমগনি৷ হোই ফরে, করিগুম্বা ঐনা হায়জরিবা অসি অদোম্না চান্দে হায়না খনবিবা থোক্লবদি, অতোপ্পা অল্তর্নেতিব অমা ঐনা হায়জরি মদুদি করিগুম্বা অদোমগী একর ২ চাওবা ফার্মগী লম অমা লৈবা থোক্লবদি, লৈরিবা লম অদুগী মনুংদা য়ামদ্রবদা একর অমদি ওর্গনিক ফার্মিং তৌবিয়ু অদুগা লৈহৌরিবা একর অমা অদুনা হান্নগী মতৌগুম্না মহৈ-মরোং থাবিয়ু৷ হায়রিবা অদুমক মথংগী চহিদসু তৌবিয়ু৷ করিগুম্বা অদোম্না কান্নবা ফংবিবা তারবদি, অদোম্না অদোমগী লম একর অনি অদু ওর্গানিক ফার্মিংদা ইমাই-পাক্না ওনশিনবা য়াগনি৷ মসিনা শেল চংবগী চাং হন্থহনগনি অমদি ঐখোয়গী ইমা লৈবাক্কী লৈহাউবু অমুক-হন্না ফগৎহনবা ঙমগনি৷ লাক্কদৌরিবা মীরোনশিংগীদমক অদোম্না অফবা থবক অমা তৌরমগনি হায়না ঐনা চেৎনা থাজৈ৷ হায়রিবা পুম্নমক অসি সাইন্তিফিকেল্লী প্রুব তৌখ্রবা ঙাক্তনি৷ দিসেম্বর ১৬তা অমুল দাইরীনা শিল্লিবা প্রোগ্রাম অমদা ঐনা ৱা ঙাংগনি৷ মফম অদুদা ঐনা ওর্গানিক ফার্মিংগী মরমদা কুপথনা খন্ন-নৈনরগনি৷ ময়াম পুম্নমক্না ওর্গানিক ফার্মিংগী মরমদা নিংথিনা খঙবিনবা, পাম্বিনবা অমদি শিজিন্নদুনা ইমা উমিয়াগী মঙ্গোলগা লোইননা চংশিল্লক্নবা ঐনা অমুক্কা হন্না ময়ামদা হায়জরি৷ অদুগা ঐখোয়না য়েংশিন্নিংঙাই ওইরিবা অদুদি “সবকা প্রয়াস” অসিখক্তনি৷ “সবকা সাথ, সবকা বিকাস, সবকা বিস্বাস”, হৌজিক্না “সবকা প্রয়াস”৷
মতৌ অসিগুম্না, মরু ওইনা বনাসকন্থাসু ক্রোপ পেত্রনশিংদা অহোংবা অমা লাকখিবা অদু ময়াম্না শোইদনা উরম্লগনি৷ অনৌবা এগ্রীকল্চরেল প্রদ্যুস কয়া অমা শিনজিন্নখ্রে৷ কতচ জিলাদা য়েংবিয়ু৷ কতচনা ইশিং লৌখি অমদি দ্রিপ ইরিগেসন সিস্তেম পাংথোকপা হৌখি৷ ঙসিদি কতচকী উহৈ-ৱাহৈশিং অদু মপান লৈবাকশিংদা য়োল্লি৷ মতৌ অসিগুম্না ঐখোয়সু তৌবা ঙমগনি৷ মসিদা ঐখোয়না শোইদনা ৱাখল অমা খনশি৷ মরম অদুনা, ঙসিদি ময়াম পুম্নমক্না ইমা উমিয়াগীদমক থবক কয়া অমা পাংথোকপা হৌরিবা অসিদা ঐনা অমুক্কা হন্না মতেং পাংলিবনি; অদুগা ইশ্বরগী মশাইগোনগীদমক ঐখোয়না ইমা উমিয়া নিংলিবনি হায়বসি অচুম্বা ৱারোল অমনি; অদুম ওইনমক, ইমা উমিয়াদা কৎথোকপগা লোইননা অদোম্না সর্ভিস অসি পাংথোকখ্রে, মরম অদুনা ইশ্বরগী মশাইগোনগীদমক খন্ন-খন্না, ইমা-মালেম অসিগীসু খনবিগদবনি৷ ইমা উমিয়াগী থৌজালগা লোইননা, হৌজিক লৈরিবা মীরোনশিংগী তৌবা ঙম্বা অসি হেনগৎনবা অমদি মখোয়গী পুন্সিবু ফগৎহন্নবগীদমক, ঙসি হৌদোক্লিবা অনৌবা ইফর্তশিং অমদি স্কিমশিং অসিনা গুজরাত অমদি লৈবাক অসি চাওখৎহনবগদা মশক থোকপা থৌদাং অমা শোইদনা লৌরগনি হায়বসি ঐগী থাজবনি৷
লৈবাক অসিনা “অজাদি কা অমিৃত মহোতসব” পাংথোক্লিবা অমদি ইমা উমিয়াগী মন্দির শেম-শাগৎলিবা মতম অসিদা, ঐখোয় পুম্নমক্না অনৌবা রিজোলুন কয়া অমগা লোইননা খুৎশম্নদুনা মখা শমথনবা হোৎনগদবনি৷
অমুক্কা হন্না, ময়াম পুম্নমকপু হন্না-হন্না থাগৎপা ফোংদোকচরি৷ ঐখোয়না হকথেংননা উনবা ঙম্বগী মীকুপ অমা ফংবা মতমদা, থবক্কী প্রোগ্রেস অসিগী মতাংদা ঐখোয়না খন্ন-নৈনরসি৷ ময়াম পুম্নমকপু কাইনবগী বিদাই লৌজরি৷
উমিয়া ইমানা য়াইফরে৷
