ঐগী নুংশিরবা ইরৈচাশিং,
ঙসিগী নীং-খা তম্বা ফংবগী নুংঙাইরবা নুমিৎ অসিদা লৈবাক মীয়াম পুম্বদা য়াইফ পাউজেল পীজরি।
ঐখোয়গী ইমা লৈবাক অসিগী থৌনা ফরবা অমসুং ফরবী মচাশিংনা কত্থোক্লম্বদগী ঙসিদি ঐখোয়না নীং-খা তম্বা ভারত্তা লৈবা ঙম্লিবনি। ঙসিগী নুমিৎ অসি ঐখোয়গী অথৌবা নীং-তম লান্মীশিংদা ইকায় খুম্নবা উৎপা নুমিৎনি।
ঐখোয়গী লান্মীশিং, পুলিস্কী মীওইশিং অমসুং সেক্যুরিতী ফোর্সকী মীওইশিংনা ইমা লৈবাক অসিবু ঙাক শেন্দুনা থম্লি। মখোয়না মীয়াম পুম্ববু ঙাক শেন্দুনা তেক্ত কায়দনা থম্লি। ঙসিগী নুমিৎ অসিদা ঐখোয়না থমোয় শেংনা মখোয়গী কত্থোকপশিংবু নীংশিংবগী নুমিৎনি।
পনবা য়াবা মিং অমসু লৈরিঃ ঔরোবিন্দো ঘোস। ঙসি অসি য়াওল্লোয় অমা ওইরম্বদগী স্পিরিচুএলিতীগী লম্বীদা খোঙদাখিবা মহাক্কী মপোক নুমিৎনি। মহাক্কী অমসুং ঐখোয়গী অনীংবশিংবু থুংবা ঙম্নবা ঙসিদি মহাক্কী মফমদা য়াইফ থৌনীজরসি।
ঐখোয়না য়াম্না তোঙানবা মতম অমগী মনুংদা চৎলি। ঙসিদি কোরোনাগী লাইচৎ লৈবনা ঐহাক্কী ইমাংদা ভারতকী তুংগী য়ুম্বী ওইগদৌরিবা অঙাং অমত্তা উবা ফংদ্রে। হৌজিক্কী কোরোনাগী মতম অসিদা দাক্তর, নর্স, সেনিতেসনগী থৌমীশিং, এম্ব্যুলেন্স থৌবশিংনচিংবা ‘সেবা পর্মো ধর্ম’, হায়বদি সেবা তৌবা অসিনা খ্বাইদগী অহেনবা লাইনীংনি খন্দুনা ইমা লৈবাক অসিগী অঙাংশিংবু থৱাই য়াওনা সেবা তৌরিবা মীওই কয়াবু ঐহাক্না ইকায় খুম্নবা উৎলি।
কোরোনাগী মতম অসিদা লাইচৎ অসিনা মীওই কয়া, ইমুং কয়াদা চৈথেং কয়া পীবতা নত্তনা পুন্সি কয়া অমসু মাংনরে। মখোয় পুম্নমকী অৱাবদা ঐহাক্না শরুক য়ারি অমসুং ঐখোয়গী লৈবাক মচা কোতি ১৩০গী শক্তি অমসুং খাংবা কনবা অসিনা মরম ওইদুনা ঐখোয়বু কোরোনাগী মায়োক্তা শোইদনা মায় পাকহনগনি হায়বগী ঐঙোন্দা থাজবা লৈ।
ঐহাক্না হন্দক্তা হৌখিবা মতম খরা অসিদা খুদোংচাদবা কয়া থেংনখ্রে। অৱাং-নোঙপোক, নোঙপোক, খা অমসুং নোঙচুপ থংবা ভারতকী মফমশিংদা ঈশিং ইচাউ থোকখিবা, মফম কয়া অমদা লৈবাক নীংখায়খিবা অসিনা অৱাবা কয়া অমা থোকহনখি। মীওই কয়া অমগী পুন্সি মাংখি। মখোয়গী ইমুংগী অৱাবদসু ঐহাক্না শরুক য়ারি।
লৈবাক অসিনা অসিগুম্বা অৱাবগী মতম অসিদা রাজ্য সরকারশিংগা অমত্তা ওইনা লেপ্লি। মতেং পাংফম থোকপা মীওইশিংদা তেংবাংনবা ঐখোয়না মখল খুদিংগী থবক পায়খৎলি।
লৈবাক মচাশিং, নীং-খা তম্বা নুমিৎ অসি নীং তম্বগী হরাও নুংঙাইবা ফোঙদোকপনি। মসি ঐখোয়গী নীং-তম লান্মীশিংবু নীংশিংদুনা অনৌবা ইনোৎ হাপ্পনি। মসিনা অনৌবা ইথিল হাপ্পগী মতমনি। অসিগুম্বা মতম অসিদা ঐখোয়না ৱাখল চেৎনা লৈবা হায়বসি য়াম্না মরু ওইবনি। মসি য়াম্না নুংঙাইবা নুমিৎ অমনি অমসুং মথংগী চহিদা উন্নবা মতমদদি ঐখোয়না নীং-খা তম্না লৈরকপগী ৭৫শুবা চহিদা চংশিল্লকপা ওইগনি। ঙসিদি ভারত মচা কোতি ১৩০না মথংগী চহি অনিসিদা পাঙথোক্কদবা ৱাশক কয়া লৌগনি। ঐখোয়না নীং-খা তম্বগী চহি ৭৫শুবা মতমদা ঐখোয়গী ৱাশকশিং অসিগী হরাও তয়াম্বা ফোঙদোক্কনি।
ঐগী নুংশিরবা ইরৈচাশিং,
ঐখোয়গী ইপা-ইপুশিংনা থমোয় শেংনা, অমত্তা ওইনা, কত্থোকপা কয়াগা লোয়ননা ইমা লৈবাক্কীদমক্তা থৱাই থাদুনা নীং-খা তম্বা ফংহল্লম্লিবা অসি ঐখোয়না কৌদৌনুংদা কাউথোক্লোইদবনি। ঐখোয়না মীনায় ওইনা লৈরম্বগী কুইরবা মতমশিং অসিদা নীং-তম্বা ফংনীংদবগী মিৎকুপ অমত্তা য়াওখিদে। ঙসিগী নুমিৎ অসি ফংনবা লৈবাক মচা অমত্তনা তুমিন্না লৈথোকখিবা নত্তে। মীওই কয়া অমনা মখোয়গী নহা ওইবগী পুন্সি অসি জেলদা লোইশিনখি। মীওই কয়া অমনা মখোয়গী মঙলান খুদিংমক তুংদা থনমদুনা থৌরী য়ানফমদা কাখি। মশাগী পুন্সিবু ঈশ্বরদা কত্থোকখিবা অথৌবা কয়া অসিবু ঐহাক্না ঙসি ইকায় খুম্নবা উৎলি। মাইকৈ অমদা মীয়াম পুন্না খোঙজং চংশিনমিন্নখিবা অমসুং মাইকৈ অমদনা খুৎলায় পায়দুনা লাল হৌখিবা অসি তসেংনা অঙকপনি।
নুংশিরবা বাপুগী লুচিং মখাদা লৈবাক অসিদা মীয়াম পুন্না খোঙজং কয়া চংশিন্নবগী অচৌবা অওনবা অমা লাক্তুনা নীংতম্বগী ইহৌবু অনৌবা মাইকৈদা পুখি। মরম অদুনা ঐখোয়না ঙসি নীং-খা তম্বগী নুমিৎ অসি হরাও তয়াম্না পাঙথোক্লি।
নীংতম লালহৌগী মনুংদা ভারতকী নাৎ, চৎনবী কয়াবু মাঙহন্দুনা লালহৌ অসিগী মৈরী অমসুং থৱাইবু মুত্থত্তুনা ইমা লৈবাক নীংবগী ইথিল অসি থুগাইনবা থৌরাং কয়া তৌরকখি। মতম অসি চহি চা কয়াদগী চৎনরক্লবা ‘সাম দাম দন্দ ভেদ’ (ফত্তবা থৌশিল শিজিন্নবা)গী মতম্নি। মীওই কয়া অমনা লৈবাক অসিবু চহি চা কয়া লোইলম থমদুনা চলায়গনি হায়বগী থাজবগা লোয়ননা লাকখি। তৌবতবু নীং-খা তম্নিংবগী অকনবা ইথিলনা মখোয় পুম্নমকপু মায়থিবা পীখি। মখোয়না ভারতকী লোল, শক, চিঞ্জাক, নাৎ অমসুং চৎনবী য়াম্বা অসিনা তোখায়না তাহন্দুনা লৈগনি খন্দুনা লাকখি। তৌবতবু মখোয়না হায়রিবশিং অসিনা ভারত মচা খুদিংমকপু থৱাই অমত্তা ওইনা পুন্সিল্লিবনি হায়বদুদি খঙবা ঙমখিদে অমসুং হায়রিবা অসিনা ভারত মচাশিংদা অপুনবা ইথিল পীদুনা নীংতম লান থেংনবদা মরু ওইবা ইথিল অমা ওইদুনা মীনায় ওইরম্বদগী নীং-খা তম্বা ফংহনখ্রিবনি।
মতম অসিদা মালেমগী মফম খুদিংদা লোয়লম লৈঙাক শন্দোকপগী চৎনবী লৈরম্মি অমসুং ভারতকী নীংতম ইহৌ অসিনা মফম খুদিংদা হায়রিবা মীওইশিং অসিগী মায়োক্তা লেপ্পগী ইথিল পীখি অমসুং মালেম পুম্বগী ওইনা ভারতনা নীংতম্বগী য়ুম্বী ওইদুনা নীংতম ইহৌ কয়াগী মৈরী চুখি।
অসিগুম্বা লম চাউথোক্নিংবা কয়া অসিনা মরম ওইদুনা মালেম্বু অচৌবা লাঞ্জাও অনিদা ইন্থদুনা মীওই কয়াগী পুন্সি মাংহন্দুনা মখোয়গী অপাম্বা ফংনবা মালেম্বু অমাং অতা কয়া তাহনখি। অসিগুম্বা মতম অসিদা ফাওবা ভারতকী নীংতম্বা তানবগী ইথিলদি মুৎনাইদনা অদুমক লৈখি। অমসুং ভারতকী নীংতম লান অসিনা মালেম শিনবা থুংবদা নীংতম্বা পাম্বগী ইথিল পীখি। মসি পুৱারিদা মুৎনাইদনা লৈহৌরগদবা ৱাফম অমনি।
ঐগী নুংশিরবা ইরৈচাশিং,
কোরোনাগী লাইচৎ মনুংদসু ভারত মচা কোতি ১৩০না মরোমদোম লেপচবা ঙম্নবা ৱারেপ লৌখ্রে অমসুং মসি ভারত মচা খুদিংগী পুক্নীংদা হক্তুনা লৈখ্রবনি। ঐখোয়না মঙলান (আত্মনির্ভর ভারত ওইবগী) অসিনা মঙফাওনবগী মওংসু উবা ফংলে। “মরোমদোম লেপচবা ঙম্বা” অসি শুপ্নগী ৱাহৈ নত্তে, মসি ভারত মচা খুদিংগী লাইশোন্নি।
ঐহাক্না মরোমদোম লেপচবা ঙম্বা হায়না হায়বা মতমদা হৌজিক মশাগী চহি ২৫-৩০ শুরবা মীওইশিংনা ইমা ইপাশিংনা ইশাগী চহি ২০-২১ শুবা মতমদা নশানা লেপ্নবা ঙম্নবা হোৎনৌ হায়না হায়খিবশিং অদু শোইদনা নীংশিংলমগনি। ঐখোয়গী নীংতম্বা ফংবগী চহি ৭৫শুগদবা খোঙ্কাপ অমখক্তা ঙাইরবা মতমসিদা ঐখোয়গী লৈবাক অসিনা মরোমদোম লেপচবা ঙম্বা অসি য়াম্না তঙাই ফদ্রবনি। ইমুং অমগী তঙাই ফদবা অসি লৈবাক অমগী তঙাই ফদবগা চপ মান্নৈ। ঐখোয়গী ভারত্তা হৈ-শিংবা মীওই কয়া অমা লৈবা অসিনা পাঙ্গল ওইদুনা ঐখোয়না মঙলান অসি শোইদনা মঙফাওনহনগনি হায়বগী থাজবা ঐঙোন্দা লৈ। ভারতনা করিগুম্বা অমা তৌগে খনখ্রবদি তৌদনা তোক্তে হায়বসি পুৱারীনা তাক্লি। মসিদা ঐহাক্না চাউথোকচবা ফাওই।
হীরম অসিগী মতাংদা ঐখোয়না পনবা মতমদা মালেমগী মফম খুদিংনা লাংতক্নবা ফাওদুনা ভারত্তগী থাজবা কয়া অমসু থম্লি। মরম অদুনা ঐখোয়না মসিবু ওইথোকহন্নবগীদমক্তা শেম-শাদুনা লৈবা য়াম্না তঙাই ফদে।
ভারত্তা নহাশিংনা তৌবা ঙম্বা মতিক কয়া অমা লৈ। অমসুং মসিনা মশাদা থাজবা লৈহন্দুনা অনৌবা মঙলান অমসুং চাউখৎপা পুরকপদা অঙকপা ফংনা তেংবাংগনি।
মালেম অসি ইমুং মনুং অমনি হায়না ঐখোয়না মতম পুম্বদা থাজবা থমদুনা লাক্লি। মরম অসিনা ঐখোয়না মালেম অসি ইমুং মনুংনি হায়না খল্লি। মসিনা মরম ওইদুনা শেন্মিৎলোন চাউখৎহনবতা নত্তনা মীওইবা খুন্নাইসু মান্ননা মরু ওইনা খনগদবনি। অমসুং ঐখোয়না মতম পুম্বদা মসিবু ইন্দুনা লাক্লি।
ঙসিদি মালেম অসি শম্নরে অমসুং অমা অমগী মখা পোন্নরি। মরম অদুনা ঐখোয়গী চাউরবা ভারত অসিবু “আত্মনির্ভর” ওইহন্দুনা মালেমগী শেন্মিৎলোন অমসুং য়াইফ য়ুম্বালদা তেংবাংবা ঙম্নবা হোৎনবা তাই। করিগুম্বা ঐখোয়গী মরা অসিনা অচেৎপা অমসুং অকনবা ওইরবদি ঐখোয়না মালেমগী য়াইফনবা খোঙথাং কয়া থাংবা ঙমগনি।
ঐখোয়গী লৈবাক্তা মহৌশাগী রিসোর্স কয়া লৈ। হায়রিবশিং অসিদা বেল্যু এদিসনগী থৌওং পাঙথোক্তুনা মহৌশাগী অমসুং মীওইবগী রিসোর্স কয়া অসি মপাঙ্গল হাপ্তুনা লৈবাক অসিবু অৱাংবা থাক্তা পুরকপগী মতম য়ৌরবনি। ঐখোয়না কয়াম কুইনা মীরমদগী পোত্থোক পুশিন্দুনা লৈগদৌরিবনো? রো মেতরিএল থাদোক্তুনা শাবা লোইরবা পোত্থোকশিং অসি কয়াম কুইনা মীরমদগী লৈগদৌরি? মরম অদুনা ঐখোয় ইরোমদোম লেপচবা ঙম্বা তাবনি। মালেমগী তঙাই ফদবশিং অসিগী মতুং ইন্না ঐখোয়গী থৌদাংনি খন্দুনা বেল্যু এদিসন তৌবা তাবনি। ঐখোয়না মতম অমদা মীরমদগী গেহু লৈরম্মি, হৌজিক্তি লৈদ্রে। হৌজিক্তি ঐখোয়গী লৌমীশিংনা ইশাগী কোন্ননবা পোত্থোক পুথোকপদা নত্তনা মীরমদসু তেংবাংবা ঙম্লে।
মসিনা ঐখোয়গী পাঙ্গল ওইরবসু সেক্তর অসিদা বেল্যু এদিসন তৌবগী তঙাই ফদবদি লৈরি। ঐখোয়গী ফার্মগী সেক্তর অসি মালেমদা লৈরিবা মওংগা মান্নহনবা তারি।
ঙসিদি লৈবাক অসিনা অনৌবা খোঙথাং কয়া পায়খৎলি। ঐখোয়না স্পেস সেক্তর হাংদোক্লে। লৈবাক অসিগী নহাশিংনা খুদোংচাবা কয়া ফংলি। আইন্না পুন্দুনা থম্লম্বা লৌউবগী সেক্তর অসি নীং তমহন্দুনা মরোমদোম লেপচহনখ্রে। ভারতনা স্পেস সেক্তরদা চাউখৎলক্লি অমসুং য়ুম্লোন্নবা লৈবাকশিংনা মসিগী কান্নবা লৌরি। ঐখোয়না ইনর্জী সেক্তরদা হেন্না চাউখৎলবদি অমম্ববু লাপহন্নিংবা লৈবাকশিংদা তেংবাংবা ঙমগনি। লৈবাক অসিগী হকশেলগী ইনফ্রাস্ত্রকচরশিং অসি মরোমদোম লেপচবা ঙম্লবদি ভারত অসি হেলথ তুরিজমগী পাম্নরবা মফম ওইগনি। মরম অসিনা ‘মেক ইন ইন্দিয়া’গী পোত্থোকশিং অসি মালেম্না থাগৎহনবা তাই। ভারতকী হৈ-শিংলবা মীওইশিংনা শাবা পোত্থোক কয়া অমা মালেম শিনবা থুংবনা পাম্নদুনা শিজিন্নরম্মি হায়বসি পুৱারিনা উৎলি।
ঐখোয়না মরোমদোম লেপচবা হায়বা মতমদা মীরমদগী পোত্থোক পুশিল্লকপা হন্থবা খক্তা নত্তে, মসি ঐখোয়গী হৈ-শিংবা অমসুং হ্যুমেন রিসোর্সপু মীয়ামদা তাকপনি। ঐখোয়না মীরমদগী পোৎ লৈবা হৌবা মতমদা ঐখোয়গী তৌবা ঙম্বা অসিসু হন্থরকই অমসুং মমৈথংদদি চারোন শুরোন কয়াগী মতুংদা পুম্নমক মাঙখিগনি। মরম অদুনা ঐখোয়না মসিবু তুংশিন্দুনা থম্বা তাই। ঐখোয়না অনৌবা অৱাংবা থাক্তা য়ৌনবা ঐখোয়গী মহৈ-মশিং অসি ফগৎহনবা তাই। ঐখোয়না অতোপ্পগা চাংয়েংনবা ঙম্নবা হৈ-শিংবশিং অসি হেন্না ফগৎহন্দুনা মরোমদোম লেপচবা ঙম্বা ভারত অমা ওইহনবা তাই।
নুংশিরবা ঐহাক্কী ইরৈচাশিং,
মরোমদোম লেপচবা লৈবাক অমা ওইহনবা হায়বা মতমদা মীয়ামদা চমম্নবা পোক্লে হায়বসি ঐহাক খঙই। মরোমদোম লেপচনবগী লম্বীদা চৎপা মতমদা খুদোংথীবা কয়া থেংনগনি অমসুং চাংদম্নরিবা মালেম অসিদদি অমুক হেন্না হেনগৎলক্কনি হায়বসি ইশানা য়াজৈ। ঐখোয়না থেংনরিবা খুদোংচাদবশিং অসিগী মনুংদগী ঐখোয়গী লৈবাক্না উপাই লাখ কয়া পুথোক্নবগী শক্তি লৈ। ঐগী ইরৈচাশিংদা ইশ্যুশিং লোইশিনবগী শক্তি লৈ।
অদোম্না কোরোনাগী ৱারবা মতমসিদা ঐখোয়দা তঙাইফদবা লৈদবা য়াদবা পোৎশিং ফংলমদে। ঐখোয়গী নহাশিং, ওন্ত্রপ্রিনর, ইন্দস্ত্রীশিংনা শিংনবসিবু লৌশিনলদুনা হান্না শারমদবা পি.পি.ই. ভেন্তিলেতর শাবা হৌখি। মসিনা ঐখোয়গী তঙাইফদবা ফংহনবদা নত্তনা মালেমগী অতোপ্পা লৈবাকশিংদা পীবসু ঙমহনলে। মরোমদোম লেপচবা ভারতনা মালেম্বুসু মতেং পাংবা ঙম্লে। মরম অসিনা মালেম য়াইফনবগীদমক হোৎনবা হায়বসি ভারতকী থৌদাং ওইরে।
লেপ্পসি। মনীং তম্লবা ভারতকী ৱাখল্লোন অসি করি ওইগনি? মসি, ‘ভোকেল ফোর লোকেল’ ওইগনি। ঐখোয়না লমদমসিগী পোত্থোকশিংদা চাউথোকচগদবনি। ঐখোয়গী লমগী পোত্থোকশিংবু শৌগত্ত্রবদি করম্না চাউখৎচবা ঙমগনি, মখোয়দা পাঙ্গল করম্না হেনগৎকনি? ঐখোয় পুন্না নীংতমখিবা চহি ৭৫ শুবরোমদা চঙশিন্দুনা ‘ভোকেল ফোর লোকেল’গী মন্ত্র অসি শোন্দুনা ইশানা ইশাবু পাঙ্গল হাপকৎনবা ৱাশকমিন্নরসি।
নুংশিরবা ইরৈচাশিং, ঐখোয়গী লৈবাক অসিনা কদাইফাওবা য়ৌনা চাউখৎলোনগীদমক তৌবা ঙম্বগে হায়বদু ময়েক শেংনা উখ্রে। লুপা কোতি-কোতি কয়া লাইরবশিংগী জন ধন একাউন্তা হকথেংননা থাবা ঙমগনি হায়বসি কনানা মংদফাও মংলমগদগে? এ.পি.এম.সি. এক্তদা লৌমীশিংগীদমক কদাইফাওবা শেমদোকপা য়াগদগে হায়বসি কনা থাজনি? চহি কয়াগী মতুংদা ইসেন্সিএল কম্মোদিতীজ এক্তকী মখাদা ৱানা লেল্লম্লবা লৌমীশিং মনীং তম্বা ফংলকখিনি হায়বসি কনানা খল্লমগনি? স্পেস সেক্তর অসি লৈবাক অসিগী নহাশিংগীদমক হাংদোক্লকখিগনি হায়বসি ঐখোয়না খল্লুবরা? ঙসিদি ঐখোয়না নেসনেল এজুকেসন পোলিসী, লৈবাক অমা রাসন কার্দ অমা, লৈবাক অমা-গ্রিদ অমা, লৈবাক অমা তেক্স অমা, ইন্সোলবেন্সী অমসুং বেঙ্ক বেঙ্ক্রপসি কোদ অমসুং বেঙ্কশিংবু পুনশিনবা হায়বসি তশেংননা উরে।
ভারত্তা শেমদোক শাদোক্লিবশিং অসিগী মহৈ য়েংগদৌগী লৈবাক কয়ানা ঙাইরি। অমগী মথংদা অমা শেমদোক শাদোক্লিবসি লৈবাক কয়ানা মুন্না য়েংলি। মসিগী মহৈনা ফোরেন দাইরেক্ত রেকোর্দসু মমাং চহিদা রেকোর্দ পুম্নমক থুগাইখ্রে।
মমাং চহিদা ভারত্তা এফ.দি.আই. চাদা ১৮ হেনগৎলে। কোরোনা লাইচৎকী মনুংদফাওবদা, অফাওবা কম্পেনী কয়ানা ভারত্তা চঙলক্লি, মসি মরম চাদনা হেক্তা য়াবা নত্তে। মসিগী চাউখৎপসি ভারত্তা পোলিসী, দিমোক্রেসী অমসুং শেন্মিৎলোনগী য়ুম্ফম পাঙ্গল কলহন্নবা কন্না হোৎনখিবশিংদুনা ওইহল্লক্লিবনি।
মালেমগী করবার ৱালাশিং ভারতপু সপ্লাই চেনগী হব অমা ওইনা উরে। মরম অসিনা ‘মেক ইন ইন্দিয়া’গী নাকন্দা ‘মেক ফোর ৱার্ল্দ’সু য়াওহনগদবনি।
হন্দক নৌনা করি থোকখ্রবগে নীংশিংসি, অমসুং ইরৈচা কোতি ১৩০গী তৌবা ঙম্বদা ঐখোয়না চাউথোকসি। লাইচৎ অসিগী মনুংদা, নোংপোক অমসুং নোংচুপ থংবা ভারতকী কোস্ততনা সাইক্লোন, ব্রজ অমসুং লৈবাক কিন্থবদা মীওই কয়া লৈখিদ্রে, অমসুং অপীকপা য়ুহা কয়া হাখ্রে। মসিনা লোইদ্রিবগী মতৌগুম, কৌজেংশিং লৌমীশিংবু ৱাহল্লি। অমগী মথংদা অমনা অৱাবা কয়া পীরবসু ঐখোয়গী লৈবাক্না মরোমদোম লেপচনবগী আসা মাঙদ্রি।
ঙসিদি কোরোনা লাইচৎ অসিদগী মীপুম খুদিংমক অমসুং শেন্মিৎলোন চিংথোক্লকপা হায়বসি ঐখোয়গী পান্দম্নি। নেসনেল ইনফ্রাস্ত্রকচর পাইপ্লাইন প্রোজেক্তনা খোংচৎ অসিদা মরুওই ওইবা থৌদাং লৌরি। প্রোজেক্ত অসিগীদমক লুপা কোতি লাখ ১১০ কাইথোক্লি, তোঙান-তোঙানবা হীরমশিংদা প্রোজেক্ত লিশিং তরেৎ শেম্লে। মসিনা লৈবাক অসিগী ইনফ্রাস্ত্রকচর চাউখৎনবা হোৎনবদা মওং অমা পুরক্লগনি। ক্রাইসিসকী মতমদদি ইনফ্রাস্ত্রকচরদা মীৎয়েং থমদুনা প্রজাশিংবু থবক পীবা অমসুং শেন্মিৎলোনগী থবকসু খোংজেল য়াংহন্দুনা ফত্তবা শাফুদা হন্থহল্লি। অপীকপা অমসুং অচৌবা ইন্তর্প্রাইজ, লৌমীশিং অমসুং মিদল ক্লাস্না কান্নবা ফংগদৌরিবনি।
ঙসিসি থৌদোক অমখক তমজগে। অতল বিহারী ভাজপায়ীনা প্রধান মন্ত্রী ওইরিঙৈ মতমদা মহাক্না গোল্দন ক্বাদ্রিলেতরেল কৌবা কাচিন কোয়া য়ৌবা প্রোগ্রাম অমা হৌদোক্লম্মি। মহাক্না লম্বী থোংগী ফিবম্বু মথংগী মীরোলফাওবা য়েংদুনা থম্লম্মি। ঙসিফাওবদা লৈবাক অসিনা গোল্দন ক্বাদ্রিলেতরেলবু চাউথোকচবা অমগা লোইননা য়েংলি।
নুংশিরবা ইরৈচাশিং,
অতলজিনা মহাক্কী মতমদা তৌরম্বা থবকসি ঐখোয়না মথৌ হাপতুনা মখা তাহনগদবনি। ইনফ্রাস্ত্রকচর, রোদ সেক্তরনা লম্বীগীদমক অমসুং রেল সেক্তরনা রেল খক্তদা শীজিন্নবগী থবক তোক্লসি। রেলৱে অমসুং রোদৱে, এয়রপোর্ত অমসুং হিথাংফম অমসুং রেলৱে স্তেসন অমসুং বস স্তেসনগী মরক্তা মরী অমত্তা লৈতসি পামদে। ঐখোয়না ইনফ্রাস্ত্রকচর অসি পুনশিন্নদুনা অমগা অমগা মতেং পাংনহনগদবনি। রেলগা রোদকা, রোদতগী সমুদ্র হিথাংফম অমসুং হিথাংফমদগী এয়রপোর্ত তম্না। ঐখোয়না অনৌবা লৈবাক অমগীদমক মলতি মোদেল ওইবা িনফ্রাস্ত্রকচর অমদা চঙশিল্লি। অমসুং মসিনা অনৌবা মাইওন অমা পীরি। ঐখোয়না থবক অসি অচৌবা মংলানগা লোইননা হৌদোকখি অমসুং ঐখোয়না অপুনবা ওইনা হোৎনদুনা সিস্তেম অসি মপাঙ্গল কলহনগনি।
মসিগা লোইননা ঐখোয়গী কোস্তলাইন অসি মালেমগী লল্লোন ইতিক্তা মরুওইবা থৌদাং লৌরি। হিথাংফম চাউখৎনবগী হোৎনরিঙৈদা, কোস্তলাইন থুংনা লম্বী মরি ফাংবা অনৌবা ইনফ্রাস্ত্রকচর শাগৎলগনি।
নুংশিরবা ইরৈচাশিং,
ঐখোয়গী অরিবা ময়েকশিংদা ময়েক লানা হক্লম্লে। অসুনা ইদুনা থম্লম্মি – ‘সমর্থ্যা মুলম স্বাতন্ত্রিয়ম, শ্রম মুলম ভাইববম’ হায়বদি, ‘তৌবা ঙম্বগী শক্তি হায়বসিনা নীংতম্নবগী পাম্বৈনি অমসুং শিন্মীগী পাঙ্গল হায়বসিনা লৈবাক অমগী ফজবা, লন অমসুং চাউখৎপগী পাম্বৈনি।
মরম অসিনা শহরদবু ওইরো খুঙ্গংদবু ওইরো অচম্বা মীওই অমনা হোৎনবা কনবা হায়বসিগা চাংদম্ননীংঙাই লৈতে। থবক শুরিবা খুনাই অমনা খুদোংচাবা ফংবা মতমদা পুন্সিসে লাইহল্লি, অৱাবা হন্থৈ অমসুং মসিনা মখোয়গী পাঙ্গল হেনগৎলি।
হৌখিবা চহি তরুক্লোমসিদা ৱানা হোৎনরিবা ইরৈচাশিংগীদমক বেঙ্ক একাউন্ত হাংবা, পক্কা য়ুম পীবা, তোইলেৎ শাবা, মৈ ফংহনবা, ঐখোয়গী ইমা অমসুং ইচলশিংবু মৈখুদগী কন্নবগীদমক গ্যাস কন্নেক্সন লেম্না পীবা, লাইরবা লৌমীশিংদা ইন্সুরেন্স পীবা, হোস্পিতালশিংদা লুপা লাখ মঙাফাওবগী লাইয়েংদা শেল ওইনবা অয়ুশ্মন ভারত, দিজিতেল তেক্নোলোজীগী খুথাংদা রাসন দুকান শম্নবনচিংবা কেম্পেন কয়া অমা হৌদোকখ্রে। হৌখিবা চহি তরুকসিদা মনুং মপান ফাওনা উবা, হন্থনা পীবা কোক্নবা লাইরবশিংগী থৌরাং কয়া পুথোকখ্রে।
মসিগী ইন্সত্রুমেন্তশিং অসিনা কোরোনাগী মনুংদা থবক কয়া পায়খৎহল্লে। মতম অসিগী মনুংদা, ঐখোয়না লাইরবা ইমুং কয়াদা গ্যাস সিলিন্দর লেম্না পীরি, রাসন কার্দ লৈত্রবসু ইমুং কোতি ৮০দা চানবা পোৎলম পীদুনা চাখুম মৈ মুৎহন্দ্রি; চাউরাক্না লুপা কোতি লিশিং ৯০ বেঙ্ক একাউন্তশিংদা হকথেংননা হাপখ্রে। হৌখিবা চহি খরগী মমাংদা থাদখিবা লুপা চাম্মদো লাইরবা অমগী একাউন্ততা য়ৌহনগনি হায়বসি থাজবা পোক্লম্লোই।
গরীব কল্যান রোজগর য়োজনা অভিয়ানসু মখোয়-মখোয়গী খুঙ্গংশিংদা থবক ফংজনবগীদমক হৌদোকখ্রে। ঐখোয়গী শিন্মী ওইরিবা মরুপশিংনা মখোয়গী স্কিলশিংবু মথৌ হাপকৎকনি হায়বসি থাজৈ। মখোয়না হোৎনরিবসিদা থাজবা থম্লদুনা ঐখোয়না ক্লারিয়ন কোল ‘ভোকেল ফোর লোকেল’ অমসুং ‘রিস্কিল অমসুং অপ স্কিল’ হায়বসি ঐখোয়গী লাইরবশিং অমসুং শিন্মীশিংবু পাঙ্গল হাপনবগীদমক হৌদোক্লি।
শহরনা শেন্মিৎলোনগী ময়াই ওইবনা, খুঙ্গংদগী শেল তানাবা লাকপা স্ত্রীৎ ভেন্দরশিংদা বেঙ্কশিংনা হকথেংননা শেল পীনবা স্কিম অমসু হৌদোক্লে। অতেনবা মতমদা লাইচৎ মনুং অসিদা মীওই লাখ কয়ানা খুদোংচাবসি লৌনরি। হৌজিক্তি মখোয়না মথোই চাউনা শেল পুররোই। হৌজিক্তি শিন্মীশিং অসিনা ইজৎ লৈনা অমসুং শক্তি লৈনা শেল লৌবা য়ারগনি।
মসিগা মান্ননা, ঐখোয়গী শিন্মীশিংনা শহরদা লাকপা মতমদা, করিগুম্বা মখোয়দা লৈফম মতীক চানা পীবীরবদি থবক পাংবসু হেল্লি। অমসুং মসিবু ৱাখলদা থম্লদুনা, শিন্মীশিংনা শহরদা হাইগৎলকপা মতমদা থবক্তা মাই ওইশিনবা ঙম্নবগীদমক শহরদা য়ুম পীবীনবা স্কিম অমা হৌদোক্লে।
নুংশিরবা ইরৈচাশিং,
ঐখোয়গী খুনাই অসিদা হন্না য়েংবীদ্রবা কাংলুপশিংনা লাইরবনা মরম ওইদুনা চাউখৎলোন্দা খোংদাবা ঙমদে হায়বসি ঐখোয়না খঙই অমসুং চুম্মি। মসিগা মান্ননা, মফম খরা অমসু ঐখোয়না হুদোক্তুনা থম্বীরি। ভারতপু মরোমদোম লেপ্পা ঙমজনবগীদমক থোং মান্ননা চাউখৎমিন্নবা হায়বসি তঙাইফদে। ঐখোয়না শোত্থরবা খুঙ্গং ১১০ খনগৎলে অমসুং হায়রিবা খুঙ্গংশিং অসিদা লাইরিক লাইশু, হকশেলগী ফেসিলিতী, অমসুং লোকেল ইমপ্লোইমেন্তকী খুদোংচাবা হেন্না ফংহন্নবা হোৎনরি।
নুংশিরবা ইরৈচাশিং
মরোমদোম লেপচবা ভারত অমগী মাংদা থম্লিবা পান্দমদি লৌউ-শিংউগী সেক্তর অমসুং লৌমীশিংনা মরোমদোম লেপচবা অসিনি। ঐখোয়না মখোয়বু নাথৈবা য়ারোই। লৌমীশিংগী ফিবম ঐখোয়না উরে। নীংখা তমখিবা মীৎকুপতগী ঐখোয়না থৌরাং কয়া লৌখৎখ্রে অমসুং অৱাবা কয়া কোকহন্নবা হোৎনখ্রে অমসুং তৌসু তৌখ্রে।
অদোম্না কৈদৌনুংদা ভাপ্না শাগৎলম্লোই মদুদি, করিগুম্বা অদোম্না শাপোন, ফি নত্ত্রগা চিনি শাবা তারবা লৈবাক অসিগী মফম অমদা হেক্তা অদোম্না য়োনবা য়াগনি। অদুবু লৌমী অমনা মহাক্না লোকচবা পোত্থোক অদ্দু লৈবাক অসিগী মফম অমদা হেক্তমক মানা য়োন্নিংই হায়দনা য়োনবা য়াদে হায়বসি মী কয়ানা খঙনদে। মহাক্কী পোথোক অদু অকক্নবা মফম অমদা য়োনগদবনি। মসিসু ঐখোয়না মুথৎখ্রে।
হৌজিক্তি ভারতকী লৌমীশিংনা মশানা লোকচবা পোত্থোক অদু মানা য়োন্নিংবা মওংদা লৈবাক অসিগী মফম অমদা হেক্তা য়োন্দুনা নীংশা চনীং তানা হোনবা ঙম্লগনি। ঐখোয়না লৌমীশিংগী আই হেনগৎনবগী থৌরাং কয়া লৌখৎনবা কন্না হোৎনরি। ঐখোয়না লৌউবদা চঙবা শেল হন্থনবা হোৎনরি। মখোয়দা করম্না দিজল পম্পগী মহুত্তা সোলার পম্প পীগনি, করম্না চীঞ্জাক পুথোক্লম্বদগী ইনর্জী পুথোক্কনি? ঐখোয়না মখোয়দা খোই য়োকপা, ঙা য়োকপা, য়েন লোইবা অসিনচিংবশিংবু পায়খৎহন্দুনা মখোয়গী ইঙ্কম অদু শরুক অনী হেনগৎহনগনি হায়বসিদা কন্না হোৎনরি।
ঐখোয়গী লৌউ শিংউগী থবক অসি অনৌবা মওং অমা ওইহনবা চঙলি অমসুং মসিদা মমল অমসু হাপকদবনি, ফুদ প্রোসেসিংসু য়াওহনগদবনি, ফুদ পেকেজিংসু লৈহনগদবনি। অমসুং মসিদা ইনফ্রাস্ত্রকচর ফহনবা অমসু চঙলি।
ভারত সরকারনা কোরোনা লাইচৎ মনুংদা লুপা কোতি ১,০০,০০০ লৌউ-শিংউগী ইনফ্রাস্ত্রকচরগীদমক কাইথখ্রে হায়বসি অদোমসু খঙলম্লনি। ইনফ্রাস্ত্রকচরশিং অসি লৌমীশিংগী য়াইফনবগীদমক্তনি, অমসুং মখোয়না মখোয়গী পোত্থোকশিং মমল চানা য়োঞ্জবা ঙম্লগনি, অমসুং মপানগী কৈথেলদা থাদোকপসু ঙমজরগনি।
খুঙ্গংগী ইন্দস্ত্রীবুসু মপাঙ্গল কলহনবা তঙাইফদে। খুঙ্গংগী মফমশিংদা অখন্নবা ইকোনোমিক জোন শেম্লগনি। লৌউ-শিংউ অমসুং নত্তবশিংগী ৱেব অমসু শেম্লগনি। মখোয়গী শেন্মিৎলোন মপাঙ্গল কনখৎনবগী লম্বীদা তুং কোইনা চৎপা য়াবা এফ.পি.ও. শেম্নবসু হোৎনখি।
ইচিল ইনাওশিং,
মমাংদা, ঐহাক্না জল জীবন মিসনগী মতাংদা লাউথোকখি। মদুসু চহি অমা ফারক্লে। মীপুম খুদিংমক্তা থক্নবা ঈশিং ফংহনগনি হায়বগী মংলান মংফাওনবদা য়াম্না হরাউজৈ। লাইনা কয়া কোক্নবগী উপাইসি থক্নবা ঈশিং অফবনি। মসিনা লৈবাক অসিগী শেন্মিৎলোন্দসু মতেং পাংলি। মরম অসিননি ঐখোয়না জল জীবন মিসন হৌদোক্লিবসু।
ঙসিদি, ইমুং লাখ অমা হেনবদা নুমিৎ খুদিংগী পাইপ ৱাতর ফংহল্লি হায়বসিদা হরাউবা পোকচৈ। হৌখিবা চহি চহি অমসিদা ঐখোয়না ইমুং কোতি ২দা থক্নবা ঈশিং ফংহল্লি, মরুওইনা ত্রাইবেল অমসুং অথাপ্পা খুঙ্গংশিংদা। অচৌবা কেম্পেন অমসু ঐখোয়না চলাইখ্রে। অমসুং ঙসিদি ‘জল জীবন মিসন; অসিনা লৈবাক অসিদা কম্পিতিসন অমা ওন্থোক্লে। জিল্লা শহর অমসুং খুঙ্গংশিংগী মরক্তা চাংদম্নরে। মীপুম খুদিংমক্না প্রধান মন্ত্রীগী জল জীবন মিসন অসি অপীবা মতমদগী ঙনখৎনা মাই পাক্লে হায়না আসা তৌনরি। কোওপরেতিব অমস্নগ কম্পিতিতিব ফেদরেলিজমগী থৌনা অসি ‘জল জীবন মিসন’গা মরী শম্নহল্লে অমসুং ঐখোয়না মসিগা লোইননা মাংজিল থানা চৎলি।
লৌউ-শিংউগী সেক্তরবু ওইরো, অপিকপা স্কেলগী ইন্দস্ত্রীশিং ওইরো নত্ত্রগা সর্ভিস সেক্তরদা লৈবা মীওইশিং ওইরো লম্বি অমদা ভারতকী য়াম্লবা ময়ায় ওইবা থাক অমা ওইরি। ময়ায় ওইবা থাক্তগী লাকপা প্রোফেস্নেলশিংনা মালেম অসিদা মখোয় মশানা মমিং অমা শেমজখ্রে। ঐখোয়গী দোক্তরশিং, ইঞ্জীনিয়রশিং, উকীলশিং, বৈজ্ঞানিকশিং ময়ায় থংবা থাক্কী মীশিংনা মালেম অসিদা মফম অমা শেমখ্রে। মরম অসিনা ময়ায় থংবা থাক্কী মীশিংনা ফংলিবা খুদোংচাবা অসিনা ফংলিবশিং অদুগী মনুংদগী খ্বাইদগী ফবা অদু ওইহল্লি হায়বসি চুম্মি অমসুং মরম অসিনা সরকারনা খুৎ চংশিল্লকপদগী মনীং তমহনবগী মথৌ তাই। ময়ায় থংবা থাক্কী মীশিংনা হেন্না খুদোংচাবা অমদি অহাংবা অকোয়বশিং ফংই অমসুং ঐখোয়গী সরকারনা ময়ায় থংবা থাক্কী মীশিংগী মংলানশিং অদু মপুং ফাহন্নবলা লেপ্তনা থবক তৌরি। ময়ায় থংবা থাক্কী মীশিংদা অঙকপশিং অসি তৌবা ঙম্বগী পাঙ্গল লৈ। মরম অদুনা ময়ায় থংবা থাক্কী মীশিংগী ইমুংশিংনা খ্বাইদগী চাউনা অরাইবা পুন্সি মহিং হিংনবগী কান্নবা অদু ফংই। অহোংবা ইন্তর্নেত, অহোংবা স্মার্তফোন নত্ত্রগা উরান স্কীমগী মখাদা অহোংবা ফ্লাইত তিকেৎশিং নত্ত্রগা ঐখোয়গী হাইৱেশিং নত্ত্রগা ইনফোর্মেসনগী লম্বিশিং-পুম্নমক অসি ময়ায় থংবা থাক্কী মীশিংগী ওইনা কনখৎপা হেনগৎহল্লগনি। ঙসি লাইরবদগী ইমুংদগী থোরকপা ময়ায় থংবা থাক্কী মীশিংগী অথোইবা মংলান অসি য়ুম অমা লৈবনি হায়বসি অদোম্না শোইদনা উবিরম্লগনি; মহাক্না মান্নবা পুন্সি অমা পাম্মি। ঐখোয়না লৈবাক অসিদা ই.এম.আই.গী লমদা থবক কয়া অমা তৌখ্রে অমদি মসিগী মহৈনা হোম লোনগী রেতশিং অসি হোংথরক্লে। কনাগুম্বা অমনা য়ুমগী লোন অসি লৌবা মতমদা মীওই অদুনা শেল থীবা মতমদা লুপা লাক্ষ ৬গী শেন্নিং ফংগনি। হন্দক্তা চৈথেং ফংলবা ময়ায় থংবা থাক্কী ইমুংশিংনা মখোয়গী শেল (য়ুম অমা লৈনবগী) কয়া অমা তিংই তৌইগুম্বসুং স্কীমশিং অসি লৈতবনা ময়ুম লৌবা ঙম্লমদে অমসুং মখোয় হৌজিকসু ভারাগী য়ুমশিংদা লৈরি। ভারত সরকারনা য়ুমশিং অসি লোইশিন্নবা লুপা কোতী লিশিং ২৫ কাইথদুনা ময়ায় থংবা থাক্কী মীশিংগী ময়ুম শোইদনা লৈহল্লগনি হায়বগী থাজবা পীখ্রে। জি.এস.তি. অমসুং ইনকম তেক্সকী রেতশিং অসি তাথরক্লে। ঙসি মসিগী খ্বাইদগী মশিং য়ামদবা খুদোংচাবশিং অসি লৈহন্দুনা ঐখোয়গী লৈবাক অসি মমাংলোমদা চংশিন্নবা হোৎনরি। আর.বি.আই.গী অম্বিৎকী মখাদা কো-ওপরেতিব বেঙ্কশিং অসি পুরক্তুনা মদুদা ময়ায় থংবা থাক্কী ইমুংশিংগী শেল শোই-ঙাম্লোইদবশিংগী গরেন্তী অমা মশানা পুজরকখ্রে।
এম.এস.এম.ই.গী সেক্তর অমসুং লৌউ-শিংউগী সেক্তরগী মখাদা পায়খৎপা অনৌবা য়াওলশিং অসিনা কন্না শুজ-নোমজদুনা হংলিবা ময়ায় থংবা থাক্কী ইমুংশিংদা হকথেংননা কান্নবা ফংহল্লগনি। মসিগী মথংদা ঐখোয়গী কারবার তৌরিবশিং অমদি অপিকপা ওন্তপ্রিনরশিংনা লুপা কোতী লিশিংগী অখন্নবা ফন্দ অসিদগী কান্নবা ফংলগনি। ঐখোয়গী মীচমশিংগী পাঙ্গল অমদি থৌনা অসি আত্মনির্ভর ভারত অভিয়ানগী অচৌবা য়ুম্ফম অমনি। মসিগী পাঙ্গল অসি মাংহন্দনা অদুম্মক লৈহন্নবা চোকথবা লৈতনা থাক খুদিংমক্কী থবক চত্থরি। ঐহাক্কী নুংশিজরবা ইরৈবাক্কী মচাশিং,
এদজুকেস হায়বসি খুঞ্জাউ-লৈচাউনা অমদি নুংঙাইবা ভারত অমা ওইনা মীপাল তাংদনা হিংবা ঙম্বা, অনৌবা, অনৌবা ভারত অসি শেমগৎপদা খ্বাইদগী মরুওই। মসিগী ৱাখলোলন অসিগা লোয়ননা ঙসি ঐখোয়না লৈবাক অসিদা চহি ৩০গী মতুংদা অনৌবা এদজুকেসন্নেল পোলিসী অমা ফংহনবদা মায় পাক্লে। ভারতকী কাচিন-কোয়া খুদিংদমসিগী নৌনা শেমদোক্লবা থৱায় য়াওবা অমসুং অনৌবা লিংজেল অসি তরম্না ওক্লি। অমদি মসি মহৈরোইশিংবু মখোংদগী হৌনা শমজিন্নগদবা নেস্নেল এদজুকেসন পোলিসীনি। মসিগা লোয়ননা মসিনা মখোয়বু মালেমগী নাগরিক ওইহনবদা মতেং পাংগনি। মহৈরোইশিং অসি নীংথিনা মখোং শেংহনগনি অদুগা অনৌবা মায় পাকপশিং ফংহনগনি।
নেস্নেল এদজুকেসন পোলিসীদা অখন্নবা পাঙ্গল-নেস্নেল রিসর্চ ফাউন্দেসন্দা অমা পীশিনখি হায়বসি অদোম্না উবিরম্লগনি। মরমদি চাউখৎনবগীদমক্তা লৈবাক অসিনা ইনোবেসন তৌবগী মথৌ তাই। ইনোবেস্নদা অদুক্কী মতিক পাঙ্গল হাপকৎলিবমখৈ রিসর্চতসু পাঙ্গল ফংগনি, লৈবাক অসি অদুক্কী মতিক মাংজিল থানা চংশিলহনবদা হিদান্নবা মালেমদা চংসিনবদা পাঙ্গল য়াম্না ফংগনি। খুঙ্গংশিংদা অসুক থুনা ওনলাইন ক্লাসশিংগী মওংদা অসুক য়াম্না লৈহল্লক্কদ্রা হায়না অদোম্না খনবিরমগনি। করিগুম্বা খুদোংথিবা লাকপা মতমদসু অসিগুম্বশিং অসিসু ওইরকই, অনৌবা থৌনা হাপ্পি অমসুং মরম অসিনা কোরোনাগী মতম অসিদসু ওনলাইনগী ক্লাসশিং তৌবগী চৎনবি অমগী মওংদা লৈবা অসি অদোম্না উবিরম্লগনি।
ওনলাইন দিজিতেল ত্রাঞ্জেক্সন অসিসু করম্না হেনগৎলক্লিবগে হায়বসিসু অদোম্না য়েংবিয়ু। ভীম য়ু.পি.আই. অসি থা অমদা, হায়বদি ভারতকুম্বা লৈবাক অসিদা য়ু.পি.আই.গী ভীমদগী থা অমদা লুপা কোতী লাক্ষ ৩ ত্রাঞ্জেক্সন তৌখ্রে হায়বসিদা অদোম্না চাউথোকপা ফাওগনি। ভিম ঙসি অসি মশা মথন্তা হোংলক্লিবা মওংশিং অসি য়ানা লৌশিল্লিবগে হায়বসিনা মসিগী খুদম্নি।
২০১৪গী মমাংদা লৈবাক অসিদা পঞ্চায়েৎ দর্জন ৫দা ওপ্তিকেল ফাইবরশিং লৈরমখি হায়বসি অদোম্না উবিরম্লগনি। হৌখিবা চহি ৫সিদা গ্রাম পঞ্চায়েৎ লাক্ষ অমা মখায়দা ওপ্তিকেল ফাইবর লৈহনখিদুনা অসুক্কী মতিক য়াম্না মতেং পাংলি। পঞ্চায়েৎ খুদিংমক্তা য়ৌহন্নবগী পান্দমগা লোয়ননা ঐখোয়না থবক অসি পাংথোকপা হৌকিবনি। পঞ্চায়েৎ লাক্ষ অমা ৱাৎলিবা অসিদসু থবক য়াংনা চত্থরি। অদুবু হোংলক্লিবা ফীভমসিদা খুঙ্গংগীসু দিজিতেল ইন্দিয়াদা শরুক ওইহনবা হায়বসিসু তঙাই ফদবা ওইরে। খঙ্গংগী মীশিংদসু অসিগুম্না ওনলাইনগী খুদোংচাবশিং অসিগী মথৌ তাবা অসি হেনগৎলক্লি। মসিগী য়েংলগা ঐখোয়না অহানবা প্রোগ্রাম শেমখিবা অদুদা পঞ্চায়েৎ খুদিং য়ৌহনগনি অদুবু ঙসি ঐহাক্না অদোমদা ঐখোয়না খুঙ্গং লাক্ষ তরুক্তগী হেনবদা ওপ্তিকেল ফাইবর নেতৱর্ক লৈহন্নবা লেপ্নরে হায়বসি হায়বা পামজৈ। মথৌ তাবশিং অসি হোংলবদি ঐখোয়না হান্না মথৌ তাবশিং অদুসু হোংদোকপা তাবনি। খুঙ্গং লাক্ষ তরুক্তগী হেনবদা কিলোমিতর লিশিং-লাক্ষকী ওপ্তিকেল ফাইবরগী থবক পাংথোকহল্লগনি অদুগা নুমিৎ ১০০গী মনুংদা খুঙ্গং লাক্ষ তরুক্তগী হেনবদা ওপ্তিকেল ফাইবর নেতৱর্ক লৈহন্নবগী থবক অসি মপুং ফাহনগনি।
হোংলক্লিবা তেক্নোলোজীসিদা সাইবর স্পেসতা মখা পোনবা অসি হেনগৎলক্কদৌরি অদুবু সাইবর স্পেস অসিদগী খুদোংথিবশিংসু লৈরি। মালেম অসি নীংথিনা খঙনরবনি অমসুং মসিদগী লৈবাক অসিগগী সোসিএল ফেব্রিক, ঐখোয়গী শেন্মিৎলোন অমসুং ঐখোয়গী লৈবাক অসি চাউখৎহনবদা লায়না খুদোংথিহনবা ঙম্বা লম্বিসু ওইবা য়াই। অদুনা মরম অসিনা ভারতনা মসিদগী য়াম্না চেকশিন্না লৈরি। ভারত অসি য়াম্না চেকশিল্লি অমসুং অসিগুম্বা খুদোংথিবশিং অসিগী মায়োক্ননবা ৱারেপ লৌরগনি। মসিদা নত্তনা অনৌবা সিস্তেমশিংসু লেপ্তনা শেমগৎলি। য়াম্না অতেনবা মতমদা অনৌবা সাইবর সেক্যুরিতী পোলিসীগী দ্রাফ অমা লৈবাক অসিগী মমাংদা থোরক্লগনি। লাক্কদৌরিবা মতমসিদা য়ুনিৎ খুদিংমক শমজিন্নদুনা মসিগী সাইবর সেক্যুরিতী অসিগী মনুংদা ঐখোয় খুদিংমক পুন্না চৎমিন্নবা তাবনি। মসিগীদমক্তা মাংজিল থানা চংশিন্নবগীদমক্তা লাল্লোং য়াৎকনি।
ঐগী নুংশিরবা ইরৈচাশিং,
ভারত্তা নুপীশিংদা থৌনা পীবা মতমদা, মখোয়না লৈবাক অসিগী মিংচৎ পুরকই অমসুং লৈবাক অসি মপাঙ্গল কনখৎহল্লি। ঙসিদি লৈবাক অসিনা থবক পীবা অমসুং মশানা মশাবু থবক পীজবদা নুপীশিংদা চপ মান্নবা খুদোংচাবা পীরে। ঙসিদি ভারতকী নুপীশিং কয়লাগী খনিশিংদা থবক শুরে। ঙসিদি, ঐগী লৈবাক্কী ইচানুপীশিংসু ফাইত্তর প্লেনশিং পাইরে অমসুং অতিয়া য়ৌবা ঙম্লে। নেভি অমসুং এয়র ফোর্সতা নুপীশিং লান্মী ওইনা শরুক য়াহনবা মালেমগী লৈবাকশিংগী মনুংদা ভারত য়াওরে। মীরোনবীশিংদা তোলোব কক্তনা থা ৬ ছুতি পীনবা ঐখোয়না ৱারেপ লৌরে, ঐখোয়গী মুস্লিম নুপীশিং ত্রিপল তালাগকী অৱাবদগী মনীংতমহল্লে অমসুং নুপীশিংদা শেন-থুমগী শক্তি পীরে।
জন ধন একাউন্ত করোর ৪০গী মনুংদা একাউন্ত করোর ২২ ঐখোয়গী ইচলশিংগীনি। কোরোনা মনুংদা, হায়রিবা ইচলশিং অসিনা একাউন্তশিংদা লুপা করোর লিশিং ৩০ থমজিনখি। চাউরাক্না মুদ্রা লোন করোর ২৫ রোম পীখ্রে, লোনশিংগী চাদা ৭০ ঐখোয়গী ইমাশিং অমসুং ইচলশিংদা পীখি। প্রধান মন্ত্রী অৱাস য়োজনাগী মখাদা নুপীশিংগী মমিংদা রেজিস্তার খ্বাইদগী য়াম্না তৌরে।
ঐগী নুংশিরবা ইরৈচাশিং,
লায়রবা ইচলশিং অমসুং ইচানুপীশিংগী অনা-লায়েংগী থবক ফগৎহন্নবা সরকার অসিনা পুক্নীং চঙলি। জনঔসাদি কেন্দ্রশিংদা লুপা ১ পীবা সেনিতরি পেদশিং ফংহন্নবা ঐখোয়না থবক পায়খৎলে। তেল্লবা মতম অমদা, জনঔসাদি কেন্দ্র ৬০০০দগী হায়রিবা লায়রবা নুপীশিংদা সেনিতরি পেদ করোর ৫ হেন্না য়েন্থোকখ্রে।
ইচানুপীশিং মচি ওইবা চীঞ্জাক ৱাৎপগী খুদোংচাদবা মখা তানা লৈতনবা অমসুং মখোয় চহি মতাং চানা লুহোংনবা ঐখোয়না কমিতি অমা শেম্লে। রিপোর্ত হেক পীখৎলকপগা, ইচানুপীশিং লুহোংনবগী চহি লেপ্নবা চুনবা ৱারেপ লৌরগনি।
ঐগী নুংশিরবা ইরৈচাশিং,
কোরোনা লাইচৎ মনুংদা হকশেলগী থবকশিং পুক্নীং চঙলে। মসিগী অৱাবা মনুং অসিদা হকশেলগী থবকশিংনা ঐখোয়দা ইশাগী ওক্নবা পুথোক্নবগী অচৌবা পারা অমা তম্বীরে। মসিগী পান্দম অসি ফংবা ঙম্নবা ঐখোয় মাঙলোমদা চঙশিনগদবনি।
মমাংদা ঐখোয়গী লৈবাক্তা লেবোরেতোরি অমা খক লৈরম্বা অদু নহাক খঙলে। ঙসিদি লৈবাক শীনবা থুংনা লেব ১৪০০ লৈরে। কোরোনা লাইচৎ অহানবা হৌরকপদা, নোংমদা তেস্ত ৩০০ খক পাংথোকখি, অদুবু অতেনবা মতমগী মনুংদা , ঙসিদি নোংমদা তেস্ত লাখ ৭ হেন্না পাংথোকলে। ঐখোয়না ৩০০দগী হৌখিবা অদু লাখ ৭ য়ৌরে।
লৈবাক অসিদা অনৌবা এ.আই.আই.এম.এসশিং অমসুং অনৌবা মেদিকেল কোলেজশিং শানবা ঐখোয়না লেপ্তনা থবক পায়খৎলি। চহি মঙাদা মহৈরোয় লিশিং ৪৫গী এম.বি.বি.এস অমসুং এম.দি সিতশিং হেনগৎলে। খুঙ্গংশিংদা ৱেলনেস সেন্তর লাখ ১.৫ হেন্না লৈরে অমসুং মখোয়গী শরুক অহুম থোকপগী শরুক অমা কোরোনা লাইচৎ মনুংদা মতেং পাংলি। কোরোনা মতমদা ৱেলনেস সেন্তরশিংনা খুঙ্গংশিংদা মতেং য়াম্না পাংলে।
ঙসিদগী হকশেলগী লমদা অচৌবা ইহৌ অমা হৌরে অমসুং মসিদা তেক্নোলোজিনা মরুওইবা থৌদাং অমা লৌগনি। ঙসিদগী নেসনেল দিজিতেল হেল্থ মিসন হৌদোক্লে। মসিনা ভারতকী হকশেলগী লমদা অচৌবা অওনবা অমা পুরক্কনি। লায়েংবদা থেংনরিবা অৱাবশিং হন্থহন্নবা তেক্নোলোজি শীজিন্নগনি।
ভারতমচা খুদিংমক হেল্থ আই.দি অমা পীগনি। হেল্থ আই.দি অসিনা ভারতমচা খুদিংমক্কী হেল্থ একাউন্ত ওইনা থবক তৌগনি। নহাক্কী তেস্তশিং, লায়নাশিং, নহাক্না উনখিবা দোক্তরশিং, নহাক্না চাখিবা হিদাকশিং অমসুং দাইগনোস তৌখিবশিংগী অকুপ্পা মরোলশিং মসিগী একাউন্ত অসিদা য়াওগনি। করম্বা মতমদা করি রিপোর্ত লৈখি হায়বা অসিগুম্বা ই-পাউশিং হেল্থ আই.দি অসিদা য়াওগনি।
দোক্তর অমা উনবদা, শেন থমজিনবদা, হোস্পিতাদা স্লিপ অমা শেম্বদা থেংনরিবা খুদোংচাদবশিং নেসনেল দিজিতেল হেল্থ মিসন্না কোকহনগনি। মীওই খুদিংমক ফজনা ৱারেপ লৌবা ঙম্নবা অমসুং অচুম্বা পাউ ফংবা ঙম্নবা থৌরাং অমা ঐখোয়না পায়খৎলে।
ঐগী নুংশিরবা ইরৈচাশিং,
কোরোনাগী তিকা থৌরাং তৌরগনি হায়বদা মীয়ামগী মরক্তা হরাওনরে। মসি মহৌশানি। মসিগী লাংতক্নবা অসি মী খুদিংমক্কীনি অমসুং মালেমগী মফম পুম্নমক্তনি।
ঐখোয়গী সাইন্তিস্তশিং লেবশিংদা মথৌ মশক খঙনা থবক তৌরি হায়না ঐগী ইরৈচাশিং হায়বা ঐনা পাম্মি। হৌজিক লৈবাক অসিদা তিকা অহুম চাংয়েংগী তোঙান-তোঙানবা তাঙ্ককশিংদা লৈরে। ঐখোয়গী সাইন্তিস্তশিংদগী অয়াবা হেক ফংবগা ঐখোয়না তিকা পাক-শন্না পুথোক্কনি। ঐখোয়না থৌরাং তৌবা লোইরে। তিকা য়াম্না পুথোক্নবা অমসুং অতেনবা মতমগী মনুংদা মী খুদিংমক ফংহন্নবা ঐখোয়না লম্বী অমা শেম্লে।
ঐগী নুংশিরবা ইরৈচাশিং,
ঐখোয়গী লৈবাক্কী তোঙান-তোঙানবা মফমশিং চাউখৎপগী তোঙান-তোঙানবা ফিবমশিংদা লৈরি। মফম খরনা চাউখৎলে, মফম খরনা অতৈদগী য়াম্না শোৎথরি। মসিগী থোঙ মান্নদবা অসি মশাগী ওক্নবা পুথোকচবা ভারত অমা শেমগৎপদা শিংনবা ওইরি। ঐনা মমাংদা হায়খ্রে, ঐখোয় জিলা ১১০দা পুক্নীং চঙলি। হায়রিবা জিলাশিং অসি চাউখৎলবা জিলাশিংগুম শেমগৎপা ঐখোয়না পাম্মি। ঐখোয়গী পান্দমদি চাউখৎনবা অমসুং লম্বী-থোঙ ফগৎহন্নবা থৌরাং অমা পায়খৎপনি।
হৌজিক নহাক খঙলে। উত্তর প্রদেস, বিহার, অৱাং-নোংপোক নৎত্রগা ওরিসা ওইগেরা লৈবাক অসিগী নোংচুপ,ময়াই অমসুং নোংপোক থংবা শরুকশিংদা মহৌশাগী পোৎথোকশিং লৈনুংদা মরাংকাইনা লৈরি। হায়রিবা মফমশিং অসিগী মীয়াম মপাঙ্গল কনবা অমসুং লৌশিং লৈবা ঙাক্তনি ,অদুবু খুদোংচাবশিং ৱাৎপদগী হায়রিবা মফমশিং অসি চাউখৎতনা লৈরি। মরম অদুনা ঐখোয়না থৌরাং কয়া পায়খৎলে। ঐখোয়না ইস্তর্ন দেদিকেদেত ফ্রেদ কোরিদোর শেমগৎলে, নোংপোক থংবা লমদম গ্যাস পাইপলাইনগা শম্নরে, অনৌবা রেল লম্বীশিং অমসুং অনৌবা পোর্তশিং শেমগৎলে।
লেহ-লাদাখ, জম্মু-কশ্মীর আর্তিকল ৩৭০দগী মনীংতম্লে। মসি চহি অমা ফারে। মসিগী চহি অমা অসি জম্মু-কশ্মীরগী অনৌবা চাউখৎপগী খোঙচৎকী অনৌবা অচৌবা মাইপাকপা অমনি। নুপীশিং অমসুং দলিতশিংদা ফংফম থোকপা হকশিং ফংহনখিবা চহি অমা ফারে। ঐখোয়গী রিফুজিশিং চিংলেম্না হিংবা চহি অমা ফারে। ঐখোয়না খুঙ্গংদা অমুক হল্লসি হায়বা ইহৌশিং হৌদোক্তুনা খুঙ্গংশিং কান্নবা ফংলে। ঙসিদি অয়ুসমান স্কিম জম্মু-কশ্মীর অমসুং লাদাখ লমদমদা খ্বাইদগী ফবা মওংদা শীজিন্নরে।
ঐগী নুংশিরবা ইরৈচাশিং,
ঐখোয়গী গনতন্ত্রগী অশেংবা মপাঙ্গল মীখল পাংথোক্তুনা শেমখিবা লোকেল বোদিশিংদা লৈরে। জম্মু অমসুং কশ্মীরদা লোকেল য়ুনিতশিংগী মীয়ামগী মীহুৎশিংনা চাউখৎ-থৌরাংগী থবকশিংদা থৱায় য়াওনা শরুক য়াবা অসি ঐখোয়গী চাউথোকচনীংঙাইনি। মসিগী চাউখৎপগী খোঙচৎ অসিদা শরুক য়াবগীদমক ঐনা মখোয়গী “পঞ্চ, সরপঞ্চ” থাগৎলি।
সুপ্রিম কোর্তকী থবক্তগী পোথারবা জস্তিস অমনা লুচিংদুনা জম্মু-কশ্মীরদা দিলিমিতেসনগী থবক চৎথরি। ঙন্না মীখল পাংথোক্তুনা জম্মু-কশ্মীরগী এম.এল.শিং,মশাগী মন্ত্রীমন্দল, রাজ্যগী চীফ মিনিস্তর লৈনবা দিলিমিতেসনগী থবক অথুবদা লোইশিনবা ঐখোয়না পাম্মি। মসিনা অনৌবা থৌনা অমগা লোয়ন্না চাউখৎ মাইকৈদা চঙশিনবা ঙমগনি। ভারতনা মসিদা থাজবা থম্লি অমসুং মসিগী মতাংদা থবক খুদিংমক পায়খৎলি।
হৌখিবা চহি কয়াদগী লদাখ মীয়াম্না য়ুনিয়ন তেরিতরী অমা ওইনবা অপাম্বশিং অদু ঐখোয়না মঙফাওন্নবা অচৌবা খোঙথাং অমা লৌখৎলি। হিমলয়গী মথক্তা লৈরিবা লদাখ অসি অনৌবা মায়োলদা চংশিল্লি। সেন্ত্রেল য়ুনিভর্সিতী অমা, অনৌবা রিসর্চ সেন্তরশিং লিংখৎনবা, হোতেল এন্দ মেনেজমেন্তগী অনৌবা কোর্সশিংগী থবক কয়া লৌখৎলি। ৭,৫০০ এম.দবল্যু. সোলর পার্ক শেম্নবা থবক লৌখৎলি। অদুবু নুংশিরবা ইরৈবাকচাশিং লদাখকী মগুন কয়া লৈজৈ। ঐখোয়না মখোয়বু য়োখৎপা খক নত্তনা ঐখোয়না মখোয়বু শেম্বীবা তাই। সিক্কিমনা অৱাং নোংপোক্কী ওর্গানিক রাজ্য অমা ওইবগুম্না, লদাখ. লেহ অমসুং কার্গিলনা মখোয় মশাগী কার্বোন ন্যুত্রেল য়ুনিৎ অমা শেমজবা য়াই। লমদম অসিগী মীয়াম্না মখোয়গী মথৌ তাবগী মতুং ইন্না অনৌবা চাউখৎ থৌরাংগী মোদেল অমা শেম্নবা ভারত সরকারগা খুৎশম্নগনি।
ঐহাক্কী নুংশিজরবা ইরৈবাকচাশিং, ভারতনা চাউখৎপগী মায়কৈদা চংশিনবদা মহৌশাগা লোয়ননা চৎমিন্নবা মথৌ তাই উৎখ্রে। ঙসি ভারতনা মরু ওইনা সোলর ইনর্জীগী লমদা মালেম পুম্বদা ৱান নেসন, ৱান সন এন্দ ৱান গ্রিদকী ৱাখল্লোন অসিনা ইথিল পীরি।
মালেম পুম্বগী রিন্যুএবল ইনর্জী পুথোকপা লৈবাক মঙাগী মনুংদা ভারতনা মফম অমা কনবা ঙমখ্রে। ভারতনা পোলুসন থোকহন্দনবা লোয়ননা মসিগী সোলুসনশিং ফংহন্নবা হৌৎনরি। স্বচ্ছ ভারত কেম্পেন, মৈখু চেন্নদবা চাক থোং গ্যাস, এল.ই.দি. কেম্পেন, সি.এন.জি.-বেজ ত্রান্সপোর্তেসন, নত্ত্রগা ইলেক্ত্রিক মোবিলিতীগী হীরমশিং অসিদা ঐখোয়না খুদোংচাবা অমত্তা লেম্না মাংহন্দে। পেত্রোল শীজিন্নবনা মরম ওইরগা পোলুসন থোকহনবা হন্থহনবা ইথানোল শীজিন্নবা হেনগৎনবা ঐখোয়না মীৎয়েং চংলি। ঐখোয়গী লৈবাক্তা চহি মঙাগী মমাংদা ইথানোলগী ফীভম কমদৌরম্মি? চহি মঙাগী মমাংদা ইথানোল পুথোকপা অসি লিতর কোতি ৪০ খক্তা ওইরমখি। হৌখিবা চহি মঙা অসিদা পুথোকপা শরুক মঙা হেনগৎলে। ঙসি, ঐখোয়না ইথানোল লিতর কোতি ২০০ পুথোক্তুনা মহৌশা কানবদা মতেং চাউনা পাংলি।
ঐহাক্কী নুংশিজরবা ইরৈবাকচাশিং, ঐখোয়না মীয়াম য়াওদুনা খনগৎলবা শহর ১০০দা অপুনবগী খোঙথাং অমসুং অনৌবা তেক্নোলোজীগী খুত্থাংদা পোলুসন হন্থনবা পুন্না চংশিল্লি।
ঐহাক্কী নুংশিজরবা ইরৈবাকচাশিং,
উমংগী লম চাউথোকহল্লিবা লৈবাক খরগী মনুংদা ভারতসু য়াওরে হায়না চাউথোক্না হায়বা য়াই। ভারতনা মহাক্কী বাইওদাইভর্সিতী য়ৌখৎনবা হৌৎনরি। ঐখোয়না মায় পাক্না প্রোজেক্ত তাইগর অমসুং প্রোজেক্ত ইলিফেন্ত লৌখৎখ্রে। ভারত্তা কৈগী মশিং অসি হেনগৎলক্লি। লাক্কদৌরিবা চহি অসিদা ঐখোয়না এসিয়াতিক লাইয়নশিংগী ‘প্রোজেক্ত লাইয়ন’ হৌরগনি। অমসুং প্রোজেক্ত লাইয়নগী মখাদা, ইন্দিয়ন লাইয়নশিং য়ৌখৎনবগী অমসুং ঙাকশেন্নবা মথৌ তাবা ইনফ্রাস্ত্রকচরগী থবক পায়খৎনবা থবক লৌখৎকনি অমসুং মরু ওইনা, অখন্নবা হকশেলগী ইনফ্রাস্ত্রকচরগী মথৌ তাবা অদুসু লৌখৎকনি। অমসুং প্রোজেক্ত লাইয়নদা মীৎয়েং থমগনি।
লোয়ননা ঐখোয়না খুমাং চাউশিনহনবা পাম্বা থবক অমনা – প্রোজেক্ত দোলফিন্নি। তুরেলশিং অমসুং সমুদ্রদা লৈবা দোলফিন মখল অনিমক্তা ঐখোয়না মীৎয়েং চংগনি। ঐখোয়না বাইওদাইভর্সিতী ফগৎহন্দুনা থবক্কী খুদোংচাবশিং ফংহনগনি। মসিনা তুরিজমগী সেন্তর অমা ওইবা ঙমহনগনি। মরম অসিনা ঐখোয়না মায়কৈ অসিদা চংশিনগদৌরিবনি।
ঐহাক্কী নুংশিজরবা ইরৈবাকচাশিং,
ঐখোয়না তোপ তোপ্পা পান্দম অমগা লোয়ননা তোপ তোপ্পা লম্বী অমদা চৎপা মতমদা, লম্বী অসিদা শীংনবশিংনা থনগনি অমসুং হায়রিবা শীংনবশিং অসিসু তোপ তোপ্পা ওইগনি। হন্দক থোকহন্নিংদবা কয়া ঙমখৈদা থোকপা অসিনা লৈবাক অসিদা শীংনবা অমা ওইহল্লি। অদুবু ঐখোয়গী লৈবাক অসিগী অপুনবগী শক্তমদা শীংনরকপদা এল.ও.সি.দগী এল.এ.সি. ফাওবদা ঐখোয়গী লৈবাক অসিগী থৌনা ফারবা লান্মীনা মতিক চাবা পাওখুম পীখি।
লৈবাক পুম্বনা থৌনা লৈনা, অপুনবগী শক্তম ঙাক্নবা কত্থোকপগা লোয়ননা মাংলোমদা চংশিল্লি। মালেম পুম্বনা ঐখোয়গী থৌনা লৈরবা জৱানশিংনা করি তৌবা ঙম্বগে অমসুং লৈবাক অসিনা মখোয়গী থৌদাং ঙাক্নবা করি তৌবা ঙম্বগে হায়বা অদু লদাখনা উৎখ্রে। ঙসি, ঐহাক্না লাল কিলাদগী লৈবাক অসিগীদমক থৱায়না পোন্থা পীখ্রবা থৌনা লৈরবা মীওইশিং অমসুং লান্মীশিংদা ইকাই খুম্নবা উৎলি।
তেরোরিজম নত্ত্রগা লম লৌশিনবা ওইরবসু ভারতনা মখোয়গী মায়োক্তা থৌনা লৈনা থেংনরি। ঙসি, মালেমনা ভারত্তা থাজবা থম্বা হেনগৎলে। হন্দক্তা, য়ুনাইতেদ নেস্নেন্স সেক্যুরিতী কাউন্সিলগী নন-পর্মিনেন্ত মেম্বর অমা ওইনা লৈবাক ১৯২ মনুংদা লৈবাক ১৮৪না ভারতপু শৌগৎখি। মসি ভারত মচা খুদিংমক্কী ওইনা য়াম্না চাউথোকচনীংঙাইনি। মসিনা ঐখোয়না মালেমদা ঐখোয়গী মফম কল্লি হায়বগী খুদম অমনি। মসি পুম্নমক অসি ভারতনা মপাঙ্গল কনবা, ভারতনা শক্তি লৈবা অমসুং শাফনা লৈরবা মতম খক্তদা ওইথোক্কনি। ৱাখল্লোন অসিগা লোয়ননা ঙসি হীরম কয়াদা থবক পায়খৎলি।
ঐহাক্কী নুংশিজরবা ইরৈবাকচাশিং,
লম্বী নত্ত্রগা ঈশিংগী লম্বীদা ফাওনরিবা ঐখোয়গা য়ুম্লোন্নবা লৈবাকশিংগা লোয়ননা ঐখোয়না ঙাকশেল, চাউখৎ থৌরাং অমসুং থাজনবদা অফবা মরীশিং থম্বা ঙম্লি। ভারতনা য়ুম্লোন্নরিবা লৈবাকশিংগা লোয়ননা চহি কয়া শাংনা লৈনরক্লবা চৎনবী, ইকোনোমিক অমসুং খুন্নাইশিংগী মরী লেপ্তনা ফগৎনবা হোৎনরি।
মালেমগী মীশিংগী শরুক মরি থোকপগী মনুংদা অমদি খা এসিয়াদা লৈরি। ঐখোয়না পুন্না অমসুং চুংশিন্নদুনা য়াম্লবা মীশিং অসিগী য়াইফনবা খুদোংচাবশিং মশিং খঙদনা ফংহনবা য়াই। চাউখ্রবা মীশিং অসিগী খুমাং চাউশিন্নবা অমসুং চাউখৎ থৌরাংগী ওইনা লমদম অসিদা লৈরিবা লৈবাকশিংঈ লুচিংবশিংগী থৌদাং য়াম্না চাউনা লৈ। ঐহাক্না মীপুম খুদিং. রাজনিতিগী লুচিংবশিং, পার্লিয়ামেন্তগী মীহুৎশিং অমসুং খা এসিয়াগী খঙহৈরবশিংদা মখোয়গী থৌদাংশিং পাঙথোক্নবা হায়জরি। লমদম পুম্বা অসিদা শান্তি অমসুং ইংচিক্না লৈবনা মীওইবগী য়াইফ থৌরাংদা চাউনা কান্নবা ওইগনি। মালেম পুম্বা অসি লমদম অসিগী খোঙথাংগা মরী য়াম্না লৈনৈ।
ঙসিদি, লৈবাক্কী ঙমখৈ লোন্নরিবশিং খক্তনা য়ুম্লোনবশিং নত্তে, ঐখোয়গা শান্তিগী মরী থম্লিবশিং অসুবু য়ুম্লোনবা কৌই। হৌখিবা চহি খরা অসিদা ভারতনা মহাক্কী মরূপ মপাং ওইবগী মরী অসি মালেম পুম্বদা শন্দোক্লি অমসুং মপাঙ্গল কনখৎলক্লি। নোংচুপ এসিয়াদা লৈবা লৈবাকশিংগা রাজনিতিগী, শেন্মীৎলোন অমসুং মীওইবগী মরী হেনগৎলক্লি। থাজনবসু য়াম্না হেনগৎলে। মরু ওইনা ইনর্জী সেক্তরদা লৈবাকশিং অসুগা লৈনরিবা মরী অসি য়াম্না মরু ওই। লৈবাকশিং অসিদা ভারত্তগী মশিং য়াম্লবা মীওই কয়ানা থবক তৌদুনা লৈরি। ভারতনা হায়জবা তাবীদুনা লৈবাকশিং অসিনা মখোয়দা লৈরিবা ভারত মচাশিংবু কোরোনাগী খুদোংথিবা তারিবা মতম অসিদা মতেং পাংবগীদমক ভারতনা লমন তোনশিল্লে। ঐহাক্না মখোয়বু ইশানা হকথেংননা থাগৎপা ফোঙদোকপা পাম্মি।
চপ মান্ননা ঐখোয়গী নোংপোক্তা লৈবা সমুদ্রগী য়ুমথংনবা লৈবাক ওইরিবা এসিন লৈবাকশিংসু মরুওইবা থৌদাং লৈ। বুদ্ধিজমগী চৎনবীনা মখোয়গা শম্নরী। ঙসিদি ভারতনা মসিগী লৈবাকশিং অসিগা সেক্যুরিতীগী লমখক্তা নত্তনা সমুদ্রগী ললশিংদসু অফবা মরী থম্লি।
নুংশিরবা প্রজাশিং ভারতনা শান্তি অমসুং ইংতপ্পা পুরক্নবা সেক্যুরিতীগী খুৎশু খুলায় অমসুং আর্মীশিং মপাঙ্গল কলহন্নবা কন্না হোৎনরী। মরোমদোম লেপ্পা ঙম্বা ভারত অমা ওইহন্নবা ঙাকশেলগী খুলায় শাবগী লমদা অচৌবা খোঙথাংশিং লৌখৎলি। হন্দক্তা মিলিতরীগী খুৎশু খুলায় ১০০ হেন্না মীরৈবাক্তগী লৈবা লেপখ্রে। মিসাইলশিংদগী অয়াংবা মিলিতরী হেইকোপ্তরশিং, এসোল্ত রাইফলদগী ত্রান্সপোর্ত এয়রক্রাফ ফাওবা পুম্নমক ভারত্তা শারগনি। ঐখোয়গী তেজাস অসি মসিগী তৌবা ঙম্বা, খোংজেল অমসিং মপাঙ্গল উৎনবা মতমগী মতুং ইন্না শেমদোক্নবা শেম শারে। ঐখোয়গী ঙমখৈ অমসুং সমুদ্র মপানগী ইনফ্রাস্ত্রকচরনা নেস্নেল সেক্যুরিতীদা অচৌবা থৌদাং অমা লৌরি। ঙসিদি হীমালয় চিংশিং নত্ত্রগা ইথৎশিং, ইন্দিয়ন ওক্সিন্দা অহেনবা মীয়েং অসি লম্বী থোংদা পীরি। নেস্নেল সেক্যুরিতীনা পুক্নীংদা থম্লা লাদাখতগী অরুনাচল প্রদেশ ফাওবা মফম খুদিংমক্তা অনৌবা লম্বেলশিং শেমলি।
নুংশিরবা প্রজাশিং ঐখোয়গী অচৌবা সমুদ্র তোর্বান লৈ। মসিগী মথক্তা ঐখোয়গী ইথৎ ১৩০০ হেন্না লৈ। খনগৎলবা ইথৎ খরগী মরু ওইবা অদু ৱাখলদা থম্লদুনা য়াম্না থুনা শেমগৎলি। অদোম্না উরম্লগনি হৌখিবা চয়োলগী নুমিৎ মঙাগী মমাংদা অন্দমান অমসুং নিকোবার আইলেন্দদা লৈবা সবমেরিন ওপ্তিকেল ফাইবর কেবল প্রোজেক্ত লৈবাক অসিদা শিন্নখ্রে। অন্দমান অমসুং নিকোবার আইলেন্দদা হৌজিক দিল্লী অমসুং চেন্নাইগুম্না ইন্তর্নেৎকী খুদোংচাবা ফংলগনি। চপ মান্নবা মওংদা লহ্মদ্বীপ আইলেন্দগা শম্ননবা হোৎনরগনি।
লাক্কদবা নুমিৎ ১০০০গী মনুংদা লহ্মদ্বীপ আইলেন্দদা আই স্পীদ ইন্তর্নেৎ কন্নেক্তিবিতী পীনবা পান্দম থমলি। সিক্যুরিতী অমসুং দিবেলপমেন্তগা লোয়ননা সমুদ্র মপান অমসুং মনাক নকপা ঙমখৈগী মফমশিংগী নহাশিংগী অচৌবা কেম্পেন অমা হৌদোকনবা শেম শারি।
ঐখোয়গী ঙমখৈগী, সমুদ্র তোর্বানগী দিস্ত্রিক্ত ১৭৩না অতোপ্পা লৈবাক্কী ঙমখৈ নত্ত্রগা সমুদ্রগী ঙমখৈগা বাউন্দরী থংনরি। লাক্কদবা নুমিৎশিংদা ঙমখৈগী দিস্ত্রিক্তশিং অদুদা নহাশিংগীদমক এন.সি.সি. লিংখৎলগনি। ঐখোয়না চাউরাক্না এন.সি.সি. কেদেৎ লাখ অমারোম ঙখৈগী মফমশিং অসিদগী ত্রেন তৌরগনি অমসুং হায়রিবশিং অসিগী মনুংদা শরুক অহুম থোকপগী অমদি ঐখোয় ইচানুপীশিং ওইহন্নবা ৱাখল্লোন্দা থবক তৌরগনি। মসিগী ঙমখৈগী মফমগী কেদেৎশিং অসি আর্মীনা ত্রেন তৌগনি। সমুদ্র মপানগী মফমশিংগী কেদেৎশিংদি নেভীনা ত্রেন তৌগনি অদুগা এয়র বেজ লৈবা মফমদনা এয়র ফোর্সনা মসিগী ঙমখৈগী কেদেৎশিং অসি ত্রেন তৌগনি। ঙমখৈ অমসুং সমুদ্র মপানগী মফমশিংগী দিজাস্তর মেনেজমেন্তকী ত্রেন তৌরা মেনপাৱরশিং ফঙলগনি অমসুং নহাশিংনা আর্ম ফোর্সতা মখোয়গী লম্বী য়াৎপগী স্কিল ত্রেনীং ফঙলগনি।
নুংশিরবা প্রজাশিং মমাং চহিদা ঐনা লাল কিলাদগী পীখিবা ৱারোলদা মমাংগী চহি মঙা অসি মমাংগী শোত্থরম্বশিং অদু মেনখৎনবনি অদুগা লাক্কদবা চহি মঙা অসিনা নীংজবশিং মঙফাওনহন্নবনি। হৌখিবা চহিমক্তদা লৈবাক অসিনা অচৌবা অমসুং মরুওইবা মায় পাকপা কয়া পুরকখ্রে। গান্ধীগী ১৫০শুবা মপোক নুমিত্তা ভারতনা লমহাংদা অমাং অশোয় তৌশিনবা লেপখ্রে। মখোয়গী থাজবনা মরম ওইরগা অৱাবা তারিবা রিফ্যুজীশিংগী সিতিজনশীপ এমেন্দমেন্দ এক্ত, দলিৎশিং/শোত্থরবা কাংলুপশিং/এস.সি.শিং/এস.তি.শিং/ও/বি.সি.শিংগী রিজর্বেসনগী হকশিং, অসম অমসুং ত্রিপুরাগী ইতিহাসিক ওইরবা শান্তীগী য়ানা-চে, লান্মীশিংগী মপাঙ্গল হেন্না কনখৎহন্নবা চীফ ওফ দিফেন্স স্তাফ খনবা, অতেনবা মতমদা কর্তাপুর সাহিব কোরিদোর শাদুনা ভারতনা পুৱারী শেমখ্রে, মসিনা পুৱারী শেম্বা উৎলি, থোইদোক হেন্দোকপা পান্দমশিং ফঙখ্রে।
নুমিৎ তরানিগী মমাংদা, মপু রামগী মশক নাইরবা মন্দির অয়োধ্যাদা শাগৎপা হৌখ্রে। চহি কয়া চয়েৎনদুনা লৈরক্লবা রাম জন্মভুমীগী ৱাথোক অসি ইং-তপ্না লোইশিনবা ঙমখ্রে। ইন্দিয়াগী প্রজাশিংনা য়াম্না অখাং কনবা অমসুং লৌশিং লৈবা অমদি মথৌ মশক খঙবা উৎখ্রে। মসি মমাংদা অমুক্তা তৌখিদ্রিবা অমসুং তুংগী পুক্নীং থৌগৎনীংঙাই ওইবা মচাক অমনি। সান্তি, অপুনবা অমসুং অমত্তা ওইবগী ৱাখল – হায়রিবা অসিনা ইন্দিয়াবু মরোম্দোম লেপচবদা পাঙ্গল ওইরি। মসিগী অমত্তা ওইবগী ৱাখল, মতেং পাংনবগী ৱাখল – মসিনা ইন্দিয়াগী তুংগী ওইবা হেন্না মাই পাকপগী থাজবনি। ঐখোয়না অমত্তা ওইবগী ৱাখল অসিনা মাংলোম্দা চংশিন্বা মথৌ তাই। ইন্দিয়া মচা পুম্বা চাউখৎপা অমা পুরক্নবগীদমক করিগুম্বা অমা নত্ত্রগা অমদা অমগা অমগা কাওথোক্নদুনা কৎথোক্নবা চংই।
ইন্দিয়ানা মসিগী দিকেদ অসিদা অনৌবা পোলিসি অমা, অনৌবা ইথৌ অমগা লোয়ননা মাংলোম্দা চংশিল্লগনি। হৌজিক্তি তনথবা য়াদ্রে। হান্নগী তন্থবগী মতম হৌখ্রে। ঐখোয়না মালেমসিদা লৈরিবা কনাগুমবা অমদগী তাবা লৈতে। ঐখোয়না ঐখোয়গী ঙমজবা থাক্তা চাউখৎনবা হোৎনগনি। মসিগীদমক্তা ঐখোয়না ঙমজবা থাক্তা থবক শুদুনা হায়বদি পোৎ-চৈ শুংবা, খ্বাই ফবা মীওইবগী রিসোর্স, লৈঙাক চুম্না তৌবা অমসুং মকোক থংনবা হোৎনবা মদুদি ৭৫শুবা ঐখোয়গী নীং-খা তম্বগী কুমোন লাকপসিদা লম খুদিংদা খ্বাইদগী ফবা ফংনবা হোৎনবা।
ঐখোয়গী পোলিসি, থৌওংশিং, পোত্থোকশিং- পুম্নমক খ্বাইদগী ফনবা হোৎনবনা ‘এক ভারত শ্রেস্থ ভারত’কী ৱাখল্লোন ফংবা ঙমগনি। ঙসিদি, ঐখোয়না ঐখোয়গী নীং-খা তম্বগীদমক থৱায় কৎখ্রবশিংগী মংলানশিংবু মংফাওহন্নবা ৱারেপ লৌবা মথৌ তারে। মসিগী ৱাশক অসি নাগরিক বিলিয়ন ১.৩গী ওইগদবনি মদুদি ঐখোয়গী তুংগী মীরোলগীদমক, মখোয়গী তুংগী য়াইফনবগীদমক, মরোম্দোম লেপচবা ঙম্বা ইন্দিয়াগীদমক। ঐখোয়না ৱাশক লৌগদৌবনি মদুদি মপাল লমগী পোত্থোক্তা মিপাল তাংবা হন্থনবা, ঐখোয়না ঐখোয়গী ইন্দস্ত্রী মচাশিং চাউখৎহনবা, ঐখোয় পুম্বা অমগা অমগা পাউ ফাউনবা। ঐখোয়না পুক্নীং থৌগৎকনি মদুদি নহাশিং, নুপীশিং, সেদ্যুল ত্রাইব, সেদ্যুল কাস্ত, মরুওইনা নাম্মা শোইরবশিং, ইকোনোমিদা শোৎথরবা,খুঙ্গং, অতৈ।
ঙসিদি ইন্দিয়া অসি ঙম্লোইদবা থবকশিং অসি অঙম্বা থাক্তা থবক্তা ওন্থোরক্লি। চপ মান্নবা শক্তিনা, কৎথোকপা, মান্নবা ইহুলনা ইন্দিয়া মচা পুম্বা মাংলোম্দা চংশিল্লগনি।
অথুবদা ঐখোয়না ৭৫শুবা ইন্দিপেন্দেন্সগী কুম্হৈ ২০২২দা পাংথোক্লগনি। ঐখোয়গী খোঙথাং অমা খক্তা ঙাইরে। ঐখোয়না নুমিদাংদা মৈ থানগনি। ২১শুবা সেনচুরি অসিগী অহুমশুবা দিকেদ অসি ঐখোয়গী মংলান অসি থুংবগা ওইগনি। কোরোনা অসি খোংয়েৎ অমনি অদুবু ইন্দিয়ানা মরোম্দোম লেপচনবা হোৎনবদা অথিংবা পীবা ঙমগদবা নত্তে।
ঐনা ইন্দিয়াগী অনৌবা য়াওল অমা উরি, ইশানা ইশাবু থাজবা, অনৌবা মিয়েংগী ইন্দিয়া। অমুক হন্না, ঐনা ইন্দিপেন্দেন্স দে অসিদা থম্মোয়নুংদগী য়াইফ পাউজেল পীজরি। পুম্নমক লাক্লো, খুৎ থাগৎতুনা, পুন্না হায়রসি:
ভারত মাতা কী জয়, ভারত মাতা কী জয়, ভারত মাতা কী জয়,
বন্দে মাতরম, বন্দে মাতরম, বন্দে মাতরম,
জয় হিন্দ, জয় হিন্দ।
