“ঙসি থবক হাপ্লিবা অসিনা য়ু.পিদা ইমুং লিশিং ৯ হরাওরগনি অমসুং লৈতানা হিংলগনি হায়বগী ৱাখল্লোন হেনগৎহল্লগনি”
“ৱাখল লৈতাবা অমসুং থবক ফংবগী অপুনবা শক্তি অসিনা য়ু.পিগী ইকোনোমিদা অনৌবা ইথিল পীরে”“২০১৭দগী অনৌবা থবক লাখ ১.৫ হেন্না হাপতুনা, থবক ফংবা অমসুং ৱাখল লৈতাবা অনিমক্কী ফিবম ফগৎলে”“অদোম্না পুলিসকী থবক ফংবদা, অদোম লিচৈ অমা ফংলে, অদুবু ঈশ্বরনা নহাক্কী থম্মোয় অমা পানহল্লে। নহাক মিকুপ-নাহুম শিংগদবনি অমসুং থবকশিং খঙগদবনি”“অদোম মীয়ামগীদমক থবক অমসুং মপাঙ্গলগী মমি অমনি”হন্দক মরক্তি রোজগার মেলা অসি ঐগীদমক্তদি মরুওইবা থৌরম অমা ওইরে। ঐনা শুম য়েংবদা হৌখিবা খরসিদা বি.জে.পি.না পানবা স্তেৎশিংদা রোজগার মেলাশিং পাঙথোক্তুনা নহা লিশিং কয়াদা থবক্কী এপোইন্তমেন্ত লেত্তরশিং য়েন্থোক্লি। হায়রিবা থৌরমশিং অদুগী শাখি ওইবা ফংজবা ঐগী লাইবক ফবনি। মতিং লৈরবা নহাশিং অসিনা লৈঙাক্কী সিস্তেমদা অনৌবা ৱাখল্লোন পুদুনা লাক্লি, ইফিসিএন্সী হেনগৎহনবদা মতেং পাংলি।
মরূপশিং,
উত্তর প্রদেশতা পাঙথোক্লিবা ঙসিগী রোজগার মেলাগী অখন্নবা মরুওইবা অমা লৈরি। রোজগার মেলা অসিনা ইমুং লিশিং ৯গী নুংঙাইবগী মীকুপ পুদুনা লাকপা নত্তে, তশেংবদি য়ু.পি.দা ঙাকশেলগী ৱাখল্লোন হেন্না চেৎশিলহনবনি। নৌনা থবক চঙলক্লিবশিংসিনা উত্তর প্রদেশ পুলিস ফোর্সপু হেন্না মপাঙ্গল কলহনগনি অমদি হেন্না ফগৎহল্লগনি। ঙসি এপোইন্তমেন্ত লেত্তর ফংলিবা নহাশিংগী মফমদা মখোয়গী অনৌবা খোঙহৌগী অমদি অনৌবা থৌদাংশিংগীদমক ঐগী মায়কৈদগী নুংঙাইবা ফোঙদোকচরি। ঐঙোন্দা খঙহল্লকপদা, ২০১৭দগী হৌরগা হৌজিক ফাওবদা, য়ু.পি. পুলিসতা নহা লাখ অমা মখায় হেন্না থবক পীখ্রে হায়রি, মদুসু শুপ্নতগী দিপার্তমেন্ত অমখক্না। মসিনা তাকপদি বি.জে.পি.গী লৈঙাক মখাদা থবক পীবা অমদি ঙাকশলেগী লম অনিমক্তা খুমাঙ চাওশিল্লি হায়বনি।
মরূপশিং,
য়ু.পি.বু মাফিয়াশিং অমদি লো অমসুং ওর্দরগী ফীভম ফত্তবগীদমক খঙনরম্বা মতম অমা লৈরম্মী। ঙসিদি য়ু.পি.বু ফীভম ফবা লো অমসুং ওর্দরগীদমক, চাওখৎপগী অমদি ইচঙ থৌবা স্তেতশিংগী মরক্তা অমা ওইনা খঙনরে। বি.জে.পি. লৈঙাক্না মীয়ামগী ঙাকশেলগী ৱাখল্লোনবু হেন্না মপাঙ্গল কনহল্লে। লো অমসুং ওর্দরগী ফীভম ফরবদি, মফমদুদা থবক পীবগী ওইথোকপা শরুক কয়া হেনগৎলকই হায়বা ঐখোয় পুম্নমক্না খঙই। বিজিনেস তৌবদা শাফগদবা ফীভম লৈরবদি ইনভেস্তমেন্তসু হেনগৎলকই। অদোমসু য়েংবিয়ু তুরিজম হায়বসি ভারতকী মীয়ামগী খ্বায়দগী চাউনা থাজবা থম্লিবা লম অমনি। মফমসিদা লাই খুরুম্ফম য়াম্না লৈ। ঐখোয়গী নাৎ চৎনবীবু লুনা খঞ্জবশিংগীদমক্তদি উত্তর প্রদেশতা পুম্নমক লৈরে। লো অমসুং ওর্দরগী ফীভম ফগৎলক্লবদা অসিগুম্বা পাউ অসি লৈবাকসিগী কাচিন কোয়া শিন থুংনা য়ৌদুনা, উত্তর প্রদেশতা লাকপা মীশিংসু হেনগৎলক্লি, অদুগা বি.জে.পি.গী দবল ইঞ্জিন লৈঙাক্না য়ু.পি.দা চাওখৎ থৌরাংগী লমদা মীৎয়েঙ থম্লিবা অসিনা সেক্তর খুদিংমক্তা থবক পীবগী খুদোংচাবা অসুম অসুম হেনগৎলক্লি। মতমগা চুনবা এক্সপ্রেসৱে অমগী মথঙদা অমা শেমগৎলক্লিবা, অনৌবা এয়রপোর্ত, দেদিকেতেদ ফ্রৈৎ কোরিদোর, অনৌবা দিফেন্স কোরিদোর, অনৌবা মোবাইল মেনুফেকচরিং য়ুনিৎশিং, মতমগা চুনহল্লবা ঈশিং লম্বী, য়ু.পি.গী মতমগা চুনহল্লবা ইনফ্রাস্ত্রকচর হায়রিবশিং অসিনা কাচিন কোয়া থুংনা অনৌবা থবক কয়া পীরি।
মরূপশিং,
য়ু.পি.দা এক্সপ্রেসৱে মশিং খ্বায়দগী হেন্না লৈ, মফমসিদা হায়ৱেশিং লেপ্পা লৈতনা শেমগৎলি। হৌজিক ইমুং অমগী মীওইশিংনা উনবা লক্লম্মী, মখোয়গী মচানুপী অমসু য়াওরকই। মঙোন্দা, অদোম উত্তর প্রদেশতগীরা হংবদা মহাক্না “নত্তে, ঐদি এক্সপ্রেস প্রদেশতগীনি” হায়না খুম্লকখি। য়েংবিয়ু, মসিনা উত্তর প্রদেশকী শক্তম ওইরক্লবনি। ময়োল্লম খুদিংদগী হায়ৱেগা শম্নহন্নবা লম্বীশিং শেমগৎলি। চাওখৎ থৌরাংগী প্রোজেক্তশিং অসিনা থবকসু পীরি, অদুগা অতোপ্পা প্রোজেক্তশি য়ু.পি.দা লাক্নবগী লম্বীসু শেম্লি। য়ু.পি. লৈঙাক্না মফমসিদা তুরিজম ইন্দস্ত্রীদা পায়খৎলিবা থৌরাংশিং অসিনা অনৌবা খুদোংচাবশিং শেমগৎলিবা অসিনা, থবক পীবগী চাংসু নীংথিনা হেনগৎলে। নুমিৎ খরনিগী মমাঙদা ঐনা পাখিবদা, মীয়াম্না খৃস্তমাসকী মতমদা গোৱাদা চৎনৈ। গোৱা মপুং ফানা বুক তৌদুনা লৈ। হন্দক ফংবা দেতাদা গোৱাদগী কাসীদনা বুকিং মশিং হেল্লি হায়বা উৎলি। কাসীগী এম.পি. অমা ওইনা ঐ য়াম্না নুংঙাই। ঙসিদগী নুমিৎ খরনিগী মমাঙদা পাঙথোকখিবা গ্লোবেল ইনভেস্তর সম্মিত্তা ঐনা ইনভেস্তরশিংনা ইনভেস্ত তৌনিংবগী মতৌ উবা ফংখি। করোর লিশিং কয়াগী ইনভেস্তমেন্তনা মফমসিদা লৈঙাক্কী অমদি লৈঙাক্কী নত্তবা সেক্তর অনিমক্তা থবক পীবগী খুদোংচাবা হেনগৎহনগদৌরিবনি।
মরূপশিং,
ঙাকশেল অমদি থবক্কী অপুনবা পাঙ্গলনা য়ু.পি.গী শেন্মিৎলোন্দা অনৌবা খোঙজেল হাপ্লি। গরেন্তী য়াওদনা লুপা লাখ ১০ ফাওবগী লোন পীরিবা মুদ্রা য়োজনানা য়ু.পি.গী নহা লাখ কয়াগী মঙলানদা মশা পানবিরি। ৱন দিস্ত্রিক্ত ৱন প্রদক্তনা দিস্ত্রিক্ত খুদিংদা থবক পীবগী অনৌবা খুদোংচাবশিং শেমগৎলি। মসিনা নহাশিংবু মখোয়গী হৈশিংববু অচৌবা কৈথেলদা পুথোক্নবগী তাঞ্জা পীরি। য়ু.পি.দা রেজিস্তর তৌরবা এম.এস.এম.ই. লাখ কয়া লৈদুনা ভারতকী কোত্তেজ ইন্দস্ত্রীগী খ্বায়দগী চাউবা মফম ওইরি। অনৌবা ওন্ত্রপ্রিন্যুরশিংগী স্তার্ত-অপ ইকোসিস্তেম শেমগৎপদা উত্তর প্রদেশ লৈঙাক্না লুচিংবগী শক্লোন লৌরি।
মরূপশিং,
ঙসি এপোইন্তমেন্ত লেত্তর ফংলিবশিং অসিনা মতম পুম্নমক্তা ৱাফম অমা কাউরোইদবনি। অদোমগী পুন্সিদা অনৌবা থৌদাং, অনৌবা শিংনবা অমদি অনৌবা খুদোংচাবা কয়া লাক্কনি। নুমিৎ খুদিং অনৌবা খুদোংচাবা কয়ানা অদোমবু ঙাইদুনা লৈরিবনি। মসি ওইদুনসু, ঐনা অদোমবু হকথেংননা, উত্তর প্রদেশগী এম.পি. অমা ওইনা, শাংলবা চহি কয়া মীয়াম মরক্তা তিল্লকপদা থেংনরকপশিংদগী হায়নিংবা ৱাফমদি, ঙসি অদোম্না এপোইন্তমেন্ত লেত্তর ফংলবসু অদোমগী নুংদা লৈরিবা মহৈরোয় অদুদি কৈদৌঙৈদসু মাঙহনখিগনি হায়বসিনি। মীকুপ খুদিং অনৌবা তমশিল্লু, মতিং হেনগৎহল্লু, কেপেবিলিতী হেনগৎহল্লু। হৌজিক্তি ওনলাইন্দসু তম্নবগী খুদোংচাবা য়াম্না লৈরে, হীরম অমা হেক্তদা তম্বা য়ারে। অদোমগী খুমাঙ চাওশিন্নবগীদমক মসি য়াম্না মরু ওই। অদোমগী পুন্সিবু কৈদৌঙৈদসু পন্দুনা লৈহনগনু। পুন্সিবু খোঙজেল হাপ্তুনা চৎলু। পুন্সিগী অনৌবা পন্দোলশিং লোমদুনা চৎকদবনি। মসিগীদমক মতিক চাবা হেনগৎহনগদবনি। অদোম লৈঙাক্কী সর্ভিসতা চঙবা ফংলে, মসিনা অদোমগী পুন্সিগী অহৌবা অমনি। মসিবু অদোমগী খোঙহৌ অমনি হায়না খল্লু। অদোম্না অদোমগী মী অমা ওইবগী মওং মতৌ, মফোঙদোক্তসু পুক্নিং চঙবা মথৌ তাই, অদোমগী ৱাখল লৌশিং হেনগৎহনবা মথৌ তাই। অদোম্না সর্ভিস অসিদা চঙলকপা মতমদা এপোইন্তমেন্ত লেত্তর ফংলি। অদোম পুলিসকী ফিজোল শেৎলগদবনি অদুনা অদোমগী খুত্তা চৈ পায়রকপা মতমদা অদোম্না কাউরোইদবদি লৈঙাক্তি কোন্না লাকপনি, মমাঙদা তাইবঙ শেম্বা মপুনা অদোমদা থম্মোয় পাল্লম্মি। মরম অসিনা অদোম্না চৈতুপ্তগী থম্মোয়বু হেন্না মশক খঙবা মথৌ তাই। অদোম্না ইহুল খঙনা চৎকদবনি অমদি লৈরিবা ফীভমসু ইহল খঙবা ফীভম ওইহনগদবনি। ঙসি এপোইন্তমেন্ত লেত্তর ফংলিবা নহাশিংনা মখোয়গী ত্রেনিং মনুংদসু ৱাফম অসি পুক্নিংদা থমগদবনি। য়ু.পি. লৈঙাক্না পুলিস ফোর্সকী ত্রেনিংদা অহোংবা কয়া পুরক্তুনা ফীভম ফগৎহন্নবা থবক পায়খৎলি। য়ু.পি.দা স্মার্ত পুলিসিং য়োকখৎনবগীদমক নহাশিংবু সাইবর ক্রাইম, ফোরেন্সিক সাইন্স অমদি মতমগা চুনবা তেক্নোলোজীগী ত্রেনিংসু পীগদৌরি।
মরূপশিং,
ঙসি এপোইন্তমেন্ত লেত্তর ফংলিবা নহাশিংদা মীচম মীয়ামগী ঙাকশেলগা লোয়ননা খুন্নাইগী মায়কৈ তাক্নবগী থৌদাংসু লৈরি। অদোমদা মীয়ামগী থৌগল অমদি পাঙ্গল অনিগী মমি তাগদৌরিবনি। অদোম্না অদোমগী মপু নিংবা অমদি অচেৎপা ফীরেপ্না মরাল লৈবা মীওইশিংদা অকিবা ফাওহনবা অদুগা মরাল লৈতবা কাঙলোন ঙাক্না চৎচবা মীওইশিংনা অকিবা লৈতনা হিংজবা ঙম্নবা ফীভম অমা পুরক্কদবনি। অমুক্কা হন্না ময়ামগী মফমদা য়াইফ-পাউজেল পীজরি। অদোমগী ইমুং মনুংগী মফমদসু য়াইফ-পাউজেল পীজরি। হন্না হন্না থাগৎচরি।
