ইকায় খুম্ননিংঙাই ওইরবা চেয়রমেনজী,
রাস্ত্রপতিগী ৱারোল থাগৎপগী মোসনগী মতাংদা হৌজিক ৱারী শান্নরি। ঐহাকসু মদুদা শরুক য়াদুনা ইকায় খুম্নিংঙাই ওইরবা রাস্ত্রপতিজীবু থাগৎচবা পাম্মি। ঐহাক্না ইকায় খুম্নিংঙাই ওইরবা রাস্ত্রপতিবু ইকায় খুম্নজরি। ইকায় খুম্নিংঙাই ওইরবা চেয়রমেন, মহাক্না হাউস অনিমকপু ইকায় খুম্নবা উৎচদুনা চাউখৎপা ভারত অমগী রোদমেপ অমা লান্থোকপীরে।
ইকায় খুম্ননিংঙাই ওইরবা চেয়রমেনজী,
ৱারী শান্নবা অসিদা শরুক য়াখিবা মীপুম খুদিংবু ঐহাক্না থাগৎচরি। মখোয়না মশাগী ৱারোল ফোংদোকখিবগীদমক্তা ঐহাক্না হাউস্তা লৈবীরিবা অমসুং ৱারী শান্নবা অসিদা শরুক য়াবীখিবা হাউসকী অতোপ্পা মীহুৎশিংবুসু থাগৎচরি।
ইকায় খুম্ননিংঙাই ওইরবা চেয়রমেনজী, হাউস অসি রাজ্যশিংগী হাউসনি। মমাংগী দিকেদশিংদা মহৈ-মশিং মীওই কয়ানা লৈবাক্কী মাইকৈ তাকখি, লৈবাক্তা অনৌবা থাজবা উহনখি। মশাগী পুন্সিদা মায় পাকপা কয়া ফংখ্রবা মীওই কয়া হাউস অসিগী মনুং চল্লি, মরম অদুনা মখোয়না হাউস অসিদা থম্বা ৱাফম খুদিংমক লৈবাক্না মুন্না তাই অমসুং লুনাসু লৌই।
ঐহাক্না হাউস্কী ইকায় খুম্নিংঙাই ওইরবা মীওইশিংদা হায়জনিংবদি, খোয়গী মনাক্তা লৈখোম লৈবনি, ঐহাক্কী নাক্তনা গুলাল লৈবনি, অদুনা মখোয়গী লৈখোম ঐঙোন্দা লংশিল্লকখি। অদুগা মসিগী ফবা অমনা, লৈখোম লংশিল্লক্লবমখৈ, ঐখোয় থম্বালনা নিংথীনা শাৎপা হেল্লি। মরম অদুনা, অদোম্না থম্বাল শাৎহনবদা ঐখোয়দা হকথেংননা নত্ত্রগা নাকোইননা তেংবাংলি হায়নিংই, অদুনা ঐহাক্না অদোম্বু থাগৎচরি।
ইকায় খুম্ননিংঙাই ওইরবা চেয়রমেনজী,
ঐখোয়গী ওপোজিসনগী সেনিয়র মরুপ, খার্গেজীনা মখোয়না চহি ৬০দা মপাঙ্গল লৈবা ফম্বাক অমা শেম্লে হায়না ঙরাং হায়খি, অদুগা থবক্না মখোয়না তৌরগা মোদীনা মনা লৌরে হায়নসু মহাক্না ৱাক্তখি। অদুবু ইকায় খুম্ননিংঙাই ওইরবা চেয়রমেনজী, ঐহাক্না ইং ২০১৪দা লাক্তুনা হীরম খুদিংবু য়েংশিন্নবা অমসুং পর্সনেল ওইবা ই-পাউ খোম্নবা হোৎনখিবা মতমদা চহি ৬০গী কংগ্রেস ইমুংনা অকনবা ফম্বাক শানবা হোৎনবগী অনিংবা অপাম্বা লৈরম্বা য়াবগী ৱাফমদি উবা ফংলে, অদুবু মসিগী মতাংদা ঐহাক কম্মেন্ত পীবদি পামদ্রে। অদুবু, ইং ২০১৪গী মতুংদা ঐহাক্না তসেংনা লাকপা মতমদদি মখোয়না কোম তৌরম্বা খক্তমক উবা ফংখি। মখোয়না ফম্বাক শেম্বদি পাম্লম্বা য়াই, অদুবু কোম ওইনা তৌরম্লে। মখোয়না কোম তৌদুনা লৈরম্মি, দিকেদ ৬ মাঙহনখ্রে, মতমদুদা মালেমগী অতোপ্পা লৈবাক মচা কয়ানা মায় পাকপগী ঙমখৈ খম থেংনা য়ৌনখিবা মতমনি।
ইকায় খুম্ননিংঙাই ওইরবা চেয়রমেনজী,
মখোয়গীদি পঞ্চায়ত্তগী হৌরগা পার্লিয়ামেন্ত ফাওবা মখোয়গী অপাম্বা খক চৎহনবা ঙম্বা অকোয়বগী ফিভম চহিশিং অদুদা লৈরম্মিবনি। লৈবাক্নসু মখোয়গী অনিংবা অপাম্বা খাঙজিন্দুনা মমিৎ উইশিন্দুনা মখোয়বু শৌগৎলম্মিবনি। অদুবু মখোয়না চাউখৎপা পুরকপগী মহুত্তা অদুগুম্বা থৌওং অমসুং চৎনবী খরা শেমখি, মদুনা মরম ওইরগা শিংনবা কয়াগী পর্মানেন্ত সোল্যুসন পুরকপসু ঙমদ্রে, পুরক্কে হায়না খনবসু ঙমদ্রে, পুরক্কে হায়নসু হোৎনদ্রে। মখোয়দি য়াম্না লাও-খোংই, হীরম কয়া পনগনি, তোতেলিজম তৌগনি অদুগা অদুমক চৎখিগনি। মসি মখোয়গী শিংনবা কয়াগী ৱারোইশিন পুরকপগী থৌওংনি। লৈবাক মীয়াম খুদোংচাদবনা থল্লম্মি, মদুগী ৱারোইশিন পুরকপনা মখোয়দা কান্নবা কয়া য়াম্না ফংগনি হায়বা লৈবাক মীয়াম্না খঙনরম্মিবনি। অদুবু মখোয়গী প্রাইওরিতীদি তোঙানবনি, মখোয়গী ৱাখলদি তোঙানবনি, মদুনা মরম ওইদুনা মখোয়না পর্মানেন্ত সোল্যুসন পুরক্কে খনখিদ্রিবনি।
ইকায় খুম্ননিংঙাই ওইরবা চেয়রমেনজী,
ঐখোয়গী সরকারগী শক্তাক অমা লৈরিবসি ঐখোয়গী হোৎনজমন্ননি, অমগী মথংদা অমা পায়খৎখিবা খোঙথাংনা মরম ওইরগা লৈরিবনি, অদুনা ঐখোয়না ঙসিদি পর্মানেন্ত সোল্যুসনগী মাইকৈদা চঙশিল্লি। ঐখোয়দি হীরম অমা পল্লম্লগা চেনখিগদৌবা মীওই নত্তে, লৈবাক্কী তঙাই ফদবা কয়াগী পর্মানেন্ত সোল্যুসন পুরকপা হায়বসিদা অহেনবা মিৎয়েং থমদুনা ঐখোয়না তুংলমচত্তা চঙশিল্লি।
ইকায় খুম্ননিংঙাই ওইরবা চেয়রমেনজী,
ঐহাক্না ঈশিংগী খুদম থমগে, মতমদুদা খুঙ্গং অমদা হেন্দপম্প অমা খিনবা মতমদা মদুগীদমক্তা চয়োল চুপ্না হরাওবা ফোংদোকপনি অদুগা মদুগুম্বা তোকনিজমগী থৌওং পাংথোক্তুনা ঈশিংগী থবক তৌবগী গারি থৌরম্বনি। ঙরাং মফমসিদা গুজরাতকী মতাংদা পন্নখি, সিত খ্বাইদগী য়াম্না ফংদুনা মায় পাকপা অদুগুম্বা মুখ্য মন্ত্রী অমনা শহর অমদা ঈশিং তেঙ্কী অমা শঙ্গাবা চৎখি তাবদা অদোম ঙক্কনি। অদুগা মদুমক ফ্রন্ত পেজতা লাকখি। হায়বদি, শিংনবশিংগী তোকনিজম করম্না তৌই, অদুগা মদুবু করম্না কাওহল্লি হায়বা তাকপনি। মসিগী চৎনবী অসি লৈবাক্না উদুনা লাকখি। ঈশিংগী ৱারোইশিন পুরক্নবা ঐখোয়সু হোৎনৈ। ঐখোয়না ঈশিং য়োকখৎপা, মাইনর ইরিগেসন্দা অহেনবা মিৎয়েং থমখি। ঐখোয়না মীয়ামগা কেৎচ দি রেন খোঙথাংগা মরী লৈনহনখি। মসিদা নত্তনা, নিংতম্বা ফংদ্রিঙৈ মতমদগী ঐখোয়গী সরকার লাক্ত্রিবা ফাওবদা য়ুম করোর ৩দা তোতি ঈশিং ফংলম্মি।
ইকায় খুম্ননিংঙাই ওইরবা চেয়রমেনজী,
মমাংগী চহি ৩-৪দগী ঙসি ফাওবদা য়ুম করোর ১১দা তোতি ঈশিং ফংহনখ্রে। ঈশিংগী খুদোংচদবদি ইমুং খুদিংনা থেংনৈ, ঈশিং য়াওদনা পুন্সি চলায়বা য়াদে, অদুগা তুংগী মতমগী য়েংদুনা ঐখোয়না মসিগী ৱারোইশিন পুরক্নবা লম্বী থিবা হৌখি।
ইকায় খুম্ননিংঙাই ওইরবা চেয়রমেনজী,
মীচম মীয়াম্বু মপাঙ্গল হাপ্পা হায়বা হীরমসিদা ঐহাক চঙজনিংই। বেঙ্কশিংবু নেস্নেলাইজ তৌখি, মীয়াম্না বেঙ্কিং তৌবগী হক ফংহনগদবনি হায়বা মরম শাগৎতুনা মসি পাংথোকখি। অদুবু, লৈবাক্কী মীওই তংখাই অমনা বেঙ্ককী থোংজিল ফাওবা য়ৌবা ঙমদে। ঐখোয়না মসিগী পর্মানেন্ত সোল্যুসন পুরকখি অমসুং জন ধন একাউন্তকী খোংজং চঙশিনখি। বেঙ্কশিংবু পুক্নিং থৌগৎখি, মখোয়বু খোঙজং অসিদা ওনবোর্দ তৌখি। মমাংগী চহি ৯মক্তদা জন ধন একাউন্ত করোর ৪৮ হাংদোকখি। মসিগী মনুংদগী করোর ৩২দি খুঙ্গং অমসুং শহর মচাশিংদা লৈবশিংগীনি। মসিনা হায়বদি, লৈবাক্কী খুঙ্গংদা চাউখৎপগী মঙাল য়ৌহন্নবা থবক পায়খৎখি হায়বনি। মোদীজীনা মহাক্কী মীরেপ মফমদা হন্না হন্না লাকই হায়না ঙরাং খার্গেজীনা ৱাকৎখি। মোদীজী গুলবার্গতা হেক্তা লাকই হায়না মহাক্না হায়খি। মহাক্না ৱাক্তত্রিঙৈ মমাংদা, কর্নাতকাদা জন ধন বেঙ্ক একাউন্ত করোর ১গা লাখ ৭০ হাংখ্রবনি হায়বসি অমুক্তা য়েংবীয়ু হায়না ঐহাক্না খার্গেজীদা হায়জনিংই। মসিদা নত্তনা, মহাক্কী মফম গুলাবার্গমক্তগী একাউন্ত লাখ ৮ হেন্না হাংই হায়বসি খঙবীয়ু। ঐহাক্না লাক্লিবসি মসিগীদমক্তনি।
অদুনা চেয়রমেনজী অমুক্তা হায়বীয়ু, অসুক য়াম্বা মীয়ামগী মপাঙ্গল হাপ্লবা, হান্নদগী খঙবা য়াম্না হেনগৎলবা অমসুং মদুনা মরম ওইরগা কনাগুম্বা মীওই অমগী চহি কয়াদগী হাংদুনা লাক্লবা একাউন্ত অমা থিংজিনখিবদা মখোয়না কয়াম ৱাগনি হায়বা ঐহাক খঙই। মদুগী অৱাবা অসি হঞ্জিন-হঞ্জিন্না উবা ফংলি, ঐদি য়াম্না ঙকই। দলিত মায়থীবা পীরে হায়না করিগুম্বা মতাংদসু মখোয়দি হায়বা ঙম্মি, মসিদা ঐদি য়াম্না ঙকই। মরুপ, মফমদুগী মীয়ামদি জনার্দন্নি, অতোপ্পা দলিত অমবু মায় অমুক পাকহনখ্রবনি। মীয়াম্না হৌজিক অদোম্বু য়াদ্রে, অদোম্বু তান্থোক্লে, অদোমগী একাউন্ত থিংজিনবীরে, অদুগা কপ্পনা মফমসিদা কপ্লি।
ইকায় খুম্ননিংঙাই ওইরবা চেয়রমেনজী,
জন ধন, আধার, মোবাইলগী ত্রিশক্তি অসিনা দাইরেক্ত বেনেফিত ত্রান্সফর স্কিমগী খুত্থাংদা লৈবাক্কী মীয়ামগী বেঙ্ক একাউন্ততা অতেনবা চহি খরগী মনুংদা করোর লাখ ২৭ ত্রান্সফর তৌখ্রবনি। বেনেফিশরীশিংগী একাউন্ততা হকথেংননা হাপখ্রবনি। মসিগুম্বা থৌওং শিজিন্নবদগী মসিগুম্বা তেক্নোলোজী অসিনা লুপা করোর লাখ ২দগী হেনবা শেনফম্বু ইকোসীস্তেম অমগী পামদবা মীওইশিংদা য়ৌবা ঙমহনখিদবা অসিদা ঐহাক নুংঙাইবা ফাওই। মসিনা লৈবাক্কী অচৌবা সেবা অমা তৌরে। অদুগা মসিগুম্বা শেনফম ফংলম্বা ইকোসীস্তেমগী মীওই য়াম্না শাওনরে হায়বসু ঐহাক খঙই।
ইকায় খুম্ননিংঙাই ওইরবা চেয়রমেনজী,
ঐখোয়গী লৈবাক অসিদা অচৌবা প্রোজেক্ত পন্দুনা লৈবা, লান্না লমজিংবগী চৎনবী লৈদুনা লাক্লি, মসিমক মখোয়গী তৌবগী থৌওং ওইখি। পুকচেল শেংনা তেক্স থীজবা মীওইশিংগী শেন্দান্দা অকায়বা ফংনৈ। ঐখোয়না পি.এম. গতিশক্তি মাস্তর প্লানগী তেক্নোলোজীগী প্লেতফোর্ম শেমখি, মরোল ১৬০০কী দেতাগী খুত্থাংদগী ইনফ্রাস্ত্রকচর প্রোজেক্তশিংগী খোঙজেল হেনগৎনবা হোৎনখি। স্কিম অমা শেম্বদা থা কয়া চঙলম্বা অদু, হৌজিক্তি চয়োল অমগী মনুংদা চৎনবা হৌবগী অয়াবা পীরে। মোদর্ন ইন্দিয়া অমা শেমগৎনবা ইনফ্রাস্ত্রকচরগী মথৌ কয়া তাই হায়বদি অদোম্না নিংথীনা খঙলে। স্কেলগী মরু ওইবসু খঙলে। স্পীদকীসু খঙলে। অদুনা ইকায় খুম্ননিংঙাই ওইরবা চেয়রমেনজী, ঐখোয়না পর্মানেন্ত সোল্যুসন অমসুং পর্মানেন্ত এস্পিরেসন্দা মিৎয়েং চঙনবগীদমক্তা তেক্নোলোজী শিজিন্নদুনা কন্না হোৎনরি।
ইকায় খুম্ননিংঙাই ওইরবা চেয়রমেনজী,
মীওই অমনা সরকারদা চঙলকপা হায়বসি লৈবাক্কীদমক্তা করিগুম্বা খরা পাংথোক্কনি হায়না ৱাশক্তুনা লাক্নবনি। মীয়ামগী কান্নবা তৌগনি ৱাশক্তুনা লাকপনি। অদুবু ৱাহৈ খক্তনা য়ারোই। ঐখোয়না মসি পাম্মি, মদু পাম্মি হায়না অদোম্না হায়খি, লাইরবা লৈহল্লোই হায়খিবা দিকেদ ৪-৪ হৌখ্রে, হৌজিক ফাওবা করিমত্তা তৌদ্রি। অদুনা চাউখৎপগী খোঙজেল করি ওইরে, মাইকৈ করি ওইরে, করি হোৎনরে, করি ফংলে, মসি য়াম্না মরু ওই। ঐখোয়সু তৌরম্মিনা হায়দুনা লৈবনা করিসু কান্নবা পুরক্কদৌবা নত্তে।
ইকায় খুম্ননিংঙাই ওইরবা চেয়রমেনজী,
ঐখোয়দি মীয়ামগী তঙাই ফদবশিংদা অহেনবা মিৎয়েং চঙদুনা থবক তৌই। অদুনা প্রেসর লৈবসু হেল্লি। থবক হেন্না তৌবগী তঙাই ফদবসু লৈরকই, অদুনা হেন্না হোৎনদবসু য়াদে। শ্রেয় অমসুং প্রিয় হায়না মহাত্মা গান্ধীজীনা হায়বীরম্মি। ঐখোয়না শ্রেয়গী লম্বী খল্লে, প্রিয়দি থনম্লে। হোৎন্দবা য়াদ্রে হায়রবসু ঐখোয়না হোৎনগনি। অহিং-নুংথিল কয়া হোৎনগনি অদুবু জন্তা জনর্ধনগী অপাম্বদা কৈদৌনুংদা অকায়বা লাকহল্লোই। মসিগুম্বা মঙলানগা লোয়ননা ঐখোয় চৎলি, অদুগা ঐখোয়না মসিমক তৌদুনসু উৎখ্রবনি।
ইকায় খুম্ননিংঙাই ওইরবা চেয়রমেনজী,
লৈবাক্না নিংতম্বা ফংলবা মতুংদগী ইং ২০১৪ ফাওবদা এল.পি.জি. কন্নেক্সন করোর ১৪ খক লৈরম্মি, লৈবাক্নসু কন্নেক্সন হেন্না পাম্লম্মি হায়বা অদোম খঙবীয়ু। এল.পি.জি. কন্নেক্সন ফংলবদি হায়দুনা মীয়াম্না এম.পি.শিংগী নাক্তা চৎনরম্মি, মতমদুদা য়ুম করোর ১৪দদি লৈরবনি অদুনা দিমান্দসু য়াম্লমদে, প্রেসরসু য়াম্লমদে, গ্যাস লৌবা চৎপগী চাদিং অদোম্না তৌদ্রবসু য়ারম্মি, অদোমগী য়ুমদা গ্যাস য়ৌহনবগী খুদোংচাবা লৈরম্মি, অদোমগী খুদোংচাবা ঙাক্তনি, অদুবু থবক ওইনদি পাংথোক্লমদে। মীয়াম্না ঙাইদুনা লৈনরম্মি। অদুবু ঐখোয়গী সরকারনা মাং থানা থোক্তুনা য়ুম্থোং খুদিংদা এল.পি.জি. পীগনি লাউথোকখি। ঐখোয়না শোইদনা তৌগনি অমসুং মসিগীদমক্তা হোৎনবগী মথৌ তাই হায়বা ঐখোয় খঙই। ঐখোয়না মসিগীদমক্তা শেল চঙগনি হায়বসু খঙই। মালেমগী মফম খুদিংদগী গ্যাস লৌদবা য়ারোই হায়বসু ঐখোয় খঙই। প্রেসর কয়া অমুক্তদা লাক্কদবা ময়াম খঙলবা ফাওবদা ঐখোয়না লৈবাক মীয়ামগী অপাম্বদা প্রাইওরিতী থমখি। ঐখোয়গী প্রাইওরিতীদি লৈবাক্কী মীচম মীয়াম্নি, অদুনা ঐখোয়না করোর ৩২ হেনবা ইমুংদা গ্যাস কন্নেক্সন য়ৌহনখি। অনৌবা ইনফ্রাস্ত্রকচর শেম্বা তাখি, শেল কয়া থাদবা তাখি।
ইকায় খুম্ননিংঙাই ওইরবা চেয়রমেনজী,
মসিগী খুদম অমা অসিদগী ঐখোয়না কয়া য়াম্না হোৎনবা তাখি হায়বা অদোম্না খঙলম্লগনি। অদুবু ঐখোয়না মসিমক য়াম্না নুংঙাইনা, চাউথোকচবা ফাওনা অমসুং অপেনবগা লোয়ননা হোৎনখি, অদুগা মসিনা মীচম মীয়ামদা খুদোংচাবা পীবসিদা ঐহাক নুংঙাইবা ফাওই। সরকার অমগীদমক্তা মসিদগী হেন্না নুংঙাইবা করি ওইগনি।
ইকায় খুম্ননিংঙাই ওইরবা চেয়রমেনজী,
নিংতম্বা ফংলবা ফাওবদা মৈ ফংদবা খুঙ্গং কয়া লৈরমদবা নত্তে। মসিগী মনুংদা চনবা অয়াম্বা মীওইদি ঐখোয়গী ত্রাইবেল মফমশিংনি। ঐখোয়গী চিংমীশিংনি। অৱাং নোংপোক্কী ইচিল ইনাওশিংনি। অদুবু মফমশিং অসি মখোয়গী ভোত বেঙ্ককী মনুং চল্লমদে। মরম অদুনা মখোয়গী মফমদা অহেনবা মিৎয়েং চঙলমদে। মসিগুম্বা অরুবা থবক মখোয়না থাদোকখ্রে হায়বা ঐখোয় খঙই। ঐখোয়দি মকখন্দা লৈই চিংবা মীওই নত্তে, নুংদা লৈই চিংবা মীওইনি হায়না ঐখোয়দি হায়রি। ঐখোয়না শিংনবা অসিগা মাইয়োক্নগনি। ঐখোয়না মদুমক পাংথোকখি অমসুং খুঙ্গংশিংদা মৈ য়ৌহনগে ৱাশকখি। অকক্নবা মতমগী মনুংদা ঐখোয়না খুঙ্গং লিশিং ১৮দা মৈ য়ৌহনখি অদুগা শিংনবা অসিগী ৱারোইশিন পুরকপনা খুঙ্গংশিং অসিনা অনৌবা পুন্সি ফংখি। মসিগুম্বা চাউখৎপা অসিগী খ্বাইদগী কান্নবা মতৌ অমদি মখোয়না লৈবাক্কী ফেসিলিতীশিংদা থাজরকপা অসিনি। মসিগুম্বা থাজবা অসি লৈবাক্কী অচৌবা পাঙ্গল অমনি। লৈবাক মীয়াম্না থাজবা থম্লকপা মতমদা লৈবাক্না অচৌবা ইমুং-মনুং অমগী শক্তম লৌরকই। মসিগী থাজবা অসি ঐখোয়না ফংখি, মসিগীদমক্তা কন্না হোৎনবা তাখি। অথাপা খুঙ্গংশিং অসিদা ঐখোয়না নিংতম্বা ফংলবগী কুইরবা মতমদা থাজবগী অনৌবা মঙাল ফংহনখি, মখোয়গী থৌজাল ঐখোয়না ঙসি ফংজরি।
ইকায় খুম্ননিংঙাই ওইরবা চেয়রমেনজী,
মমাংগী সরকারগী মতমদা পুং খরখক মৈ লাক্লম্মি। মৈ ফংলেদি হায়বা, খুঙ্গং ময়াইদা পোস্ত অমা য়ুংবা, অদুগা মদুগী এন্নিভর্সরী অমুক পাংথোকপা। পোস্ত অমা মতম অদুদা য়ুংলে হায়নদি পংহায়দা হায়বা অদুবু মৈদি শুকলাক লাক্লমদে। হৌজিক্তি মৈসু য়ৌরে, অদুগা পুং ২২ মপুং ফানা মৈসু ফংহল্লে। মসিগীদমক্তা ঐখোয়না ত্রান্সমিসন লাইন কয়া অমা তিংবা তাখি। অহেনবা ইনর্জী পুথোক্নবা থবক তৌবা তাখি। সোলর ইনর্জীগী মাইকৈদা মায় ওন্সিনবা তাখি। রিন্যুএবল ইনর্জীগী সোর্স কয়া অমা থীদোকপা তাখি। ঐখোয়না মীয়াম্বু মখোয়গী মরাইবক্তা থাদোক্তুনা খক থমখিদে। রাজনিতীগী কান্নবা অমাঙবগী মতাংদা করিমত্তা খনখিদে। লৈবাক্কী হয়েংগী অফবা মতম লৈহনবগী লম্বী খনখি। ঐখোয়না মসিগীদমক্তা ইশাগী প্রেসর হেনগৎহনখি। মীয়ামগী অপাম্বা হেনগৎলকখি, প্রেসর হেনগৎলকখি। ঐখোয়না হোৎনবা কনবগী লম্বী খনখি অমসুং মসিগী মহৈ অদোম্না উরি। লৈবাক্কী ইনর্জী সেক্তরনা চাউখৎপগী অৱাংবা থাক্তা য়ৌবা ঙম্লে।
ইকায় খুম্ননিংঙাই ওইরবা চেয়রমেনজী,
ঐখোয়না লৈবাক্কী অমৃত কালদা থৌনা লৈবা খোঙথাং অমা পায়খৎখি। মসি লাইরোই হায়বা ঐহাক খঙখি, হোৎনবা কনবগী মথৌ তাগনি খঙখি। ঐখোয়না খল্লিবা লম্বী অসিদি সেচ্যুরেসনগীনি। স্কিম খুদিংগী কান্নবা মদুগী বেনিফিশরীশিংদা শোইদনা য়ৌহনবা, ১০০% ফংহনবা হায়না লেপখি অমসুং মদুমক পাংথোকপসু ঙমখি।
ইকায় খুম্ননিংঙাই ওইরবা চেয়রমেনজী,
ঐখোয়গী লৈবাক্কী নিংতম্বগী মতাংদা ইং ১৮৫৭কী ইহৌদগী হৌরগা দিকেদ অমা হেক্তগী নিংতম ইহৌ অমা হেক্তদা য়েংবীয়ু, মসিগুম্বা ইহৌশিংদা লৈবাক্কী ত্রাইবেল খুন্নাইগী থৌদাং য়াম্না লৈখিবনি। ত্রাইবেল ইচিল ইনাওশিংনা নিংতম্বগী মরু ওইবা খঙলম্বসিদা নুংঙাইবা ফাওই। অদুবু, ঐখোয়গী ত্রাইবেল মীয়াম্বু দিকেদ কয়াদগী মীরায়বীদুনা লাকখি, মখোয়দা থাজবা থম্বীরমদে, খুদোংচাদবা ফিভমদা অদুমক থম্বীরম্মি। মখোয়গুম্বা নহাশিংগী ৱাখলদা সরকারদা পেন্দবা কয়া লৈদুনা লাকখি। মমাংগী সরকারনা মখোয়গীদমক্তা পুকচেল শেংনা হোৎনবীরম্লবদি, ২১শুবা চহি-চাগী অহুমশুবা দিকেদ অসিদা ঐহাক্না কন্না হোৎনরিবা অসিগী মথৌ তারম্লোই, অদুবু মখোয়না তৌরমদে। অতল বিহারী ভাজপায়গী সরকার লৈরম্মি। মহাক্না ত্রাইবেলশিংগী য়াইফ য়ুম্বালগীদমক্তা খ্বাইদগী অহানবা মন্ত্রালয় শেম্লমখি, মখোয়গী য়াইফ য়ুম্বালগীদমক্তা বজেতকী খুদোংচাবা শিনখি।
ইকায় খুম্ননিংঙাই ওইরবা চেয়রমেনজী,
ঐখোয়না চাউখৎপগী হীরমদা শোত্থরবা জিলা ১১০বু এপ্সিরেস্নেল ভিলেজ হায়না শকখঙখি। মখোয় অসি সোসিএল অমসুং জিওগ্রাফিক হীরমদসু শোত্থরবনি, অদুনা মখোয়দা সোসিএল জস্তিস য়ৌহনবগী মথৌ তাই। জিলা ১১০গী তংখাই হেনবদা ত্রাইবেল লৈ। এস্পিরেস্নেল দিস্ত্রিক্ত প্রোগ্রাম অসিদগী ত্রাইবেল করোর অহুম হেনবনা হকথেংননা কান্নবা ফংখি। মখোয়গী পুন্সিদা অহোংবা লাকখি। মফমশিংগী অসিগী এজুকেসন, হকশেল, ইনফ্রাস্ত্রকচর য়াম্না ফগৎখি। ঐখোয়না মসিদা অহেনবা মিৎয়েং থম্লি অমসুং লেপ্তনা য়েংশিনবগী থবকসু পায়খৎলি।
ঐখোয়গী হাউসকী মীওই খরনা ত্রাইবেল-সব প্লানগী মতাংদা ৱাফম খরা পন্নখি। বজেতপু নিংথীনা খঙবা অমসুং ইবা পাবা হৈবা মীওই অমগা অমুক্তা ফম্মিন্নবীয়ু হায়না ঐহাক্না মখোয়গুম্বা মরুপশিংগী মফমদা থমজরি। অদোম্না মুন্না য়েংলবদি, বজেত্তা য়াওরিবা সেদ্যুল ত্রাইব কম্পোনেন্ত ফনদগী মখাদা ইং ২০১৪গা চাংদমনবদা হন্দক্কী বজেত্তা শরুক মঙা হেন্না হেনগৎলে হায়না উবা ফংগনি।
ইকায় খুম্ননিংঙাই ওইরবা চেয়রমেনজী,
ইং ২০১৪গী মমাংদা পাল্লম্বা মখোয়গী সরকারগী মনুংদা লৈরম্বা এলোকেসন অসি চাউরাক্না করোর লিশিং ২০-২৫গী ময়াদনি, য়াম্না লিবা মতম নত্তে, শুপ্নগী করোর লিশিং ২০-২৫ খক্তনি। অদুগা ঙসিনা মফমসিদা লাক্লগা ঈশৈ তৌরি। ঐখোয়না লাক্লবা মতুংদা হন্দক্কী চহিসিদা লুপা করোর লাখ ১গা লিশিং ২০গী শেনফম কাইথোক্লে। ঐখোয়না মমাংগী চহি ৯দা ঐখোয়গী ত্রাইবেল ইচিল ইনাওশিংগী অফবা তুংগী মতমগীদমক্তা, মখোয়গী অঙাংশিংগীদমক্তা অনৌবা এক্লাব্যা মোদেল স্কুল ৫০০গী অয়াবা পীরে, মসিদি হান্নদগী শরুক মরি হেনগৎলবনি। মসিদা নত্তনা, ঐখোয়না স্কুলগী স্তাফ, ওজাগী মতাংদসু অনৌবা মীওই লিশিং ৩৮ লৌনবা বজেত্তা ৱাফম হাপখ্রে। ত্রাইবেলশিংগী য়াইফ য়ুম্বালগীদমক্তা খন্দুনা ঐখোয়গী সরকারনা ফোরেস্ত রাইত এক্তকী মতাংদা থম্বা ৱাফম খরগী মতাংদা পনজগে।
ইকায় খুম্ননিংঙাই ওইরবা চেয়রমেনজী,
লৈবাক অসিনা নিংতম্বা ফংবদগী ঐখোয়গী সরকার লাক্ত্রিঙৈ ইং ২০১৪ ফাওবদা ত্রাইবেল ইমুংশিংগী লমগী পত্তা লাখ ১৪ পীরম্লে। ঐখোয়না মমাংগী চহি ৭-৮দা লমগী অনৌবা পত্তা লাখ ৬০ পীথোকখি। মসিদি য়াম্না মশক থোকপা থবক অমনি। ঐখোয়না লাক্ত্রিঙৈদা, খুন্নাইগী লমগী পত্তা লিশিং ২৩ পীরম্লে, ঐখোয় লাক্লবা মতুংদা লিশিং ৮০ হেন্না পীথোকখ্রে। মখোয়গীদমক্তা য়াম্না খল্লি হায়জিন্নদুনা মখোয়গী অপাম্বগা শান্নবগী মহুত্তা তসেংনা থবক তৌরম্লবদি ঐহাক্না ঙসি অসুক য়াম্না হোৎনরিবা অসিগী মথৌ তারম্লোই। অদুবু, মদুদি মখোয়গী প্রাইওরিতী ওইরমদে।
ইকায় খুম্ননিংঙাই ওইরবা চেয়রমেনজী,
অদোমদি লৌউবগী মচা ঙাক্তনি, অদুগা ঐখোয়গী লৈবাক্কী লৌমীশিংগী মফমদা করি থোক্লি? মথক্তা লৈবা মীওই খরা পেন্নবা তৌদুনা রাজনিতী শান্নবগী চৎনবী অসি অদুমক মখা তাদুনা লাক্লি। লৈবাক অসিগী লৌউ-শিংউগী তসেংবা পাঙ্গলদি অপীকপা লৌমীশিংগী নাক্তা লৈবনি। একর অমা, একর অনিগী লমদা লৌ-উবা মীওই চাউরাকপা ৮০-৮৫%না মখোয়গুম্বা কাঙলুপকী মনুং চল্লি। অপীকপা লৌমীশিংবু মীরাইবীরি, মখোয়গী ৱা কনামত্তনা তাবিদে। ঐখোয়গী সরকারনা অপকীপা লৌমীশিংদা মিৎয়েং চঙখি। অপীকপা লৌমীশিংবু বেঙ্কিংগী ফোর্মেল সেক্তরগা মরী লৈনহনখি। হৌজিক্তি, মখোয়গী মফমদা পি.এম. সম্মান নিধীগী মখাদা মখোয়গী বেঙ্ক একাউন্ততা চহিদা অহুম্লক দি.বি.তি. তৌরি। মখোয়খক্তা নত্তনা, শা-য়েন লোইবা মীওইশিংবুসু ঐখোয়না বেঙ্কিং সেক্তরগা মরী লৈনহনখি। ঙামীশিংবুসু মরী লৈনহনখি অমসুং অপীকাপ শেন্দোইগী লোন পীদুনা মখোয়গী মপাঙ্গল হাপখি।
ইকায় খুম্ননিংঙাই ওইরবা চেয়রমেনজী,
নোংগী ঈশিংগী মখা পোনবা লৈবাক্কী লৌমী কয়া অমা লৈ হায়বা ঐখোয়না খঙই। মমাংগী সরকারগী মতমদা ইরিগেসনগী খুদোংচাবা লৈরমদে। নোংগী ঈশিং শিজিন্নদুনা লৌউবা অপীকপা লৌমীশিংনা কোর্স গ্রেন থাই হায়বা ঐখোয়না উরে। মখোয়শিংবু ঐখোয়না অখন্নবা থাক্তা থমখি। ঐখোয়না য়ু.এন.দা মিল্লেতকী চহি লাউথোকপীনবা হায়জখি। মালেম পুম্বদা ভারতকী কোর্স গ্রেনগী মমিং লৈনবা, মার্কেতিং তৌবা য়ানবা অমসুং কোর্স গ্রেন অসিবু শ্রী অন্না ওইহন্নবা, অপীকপা লৌমীশিংগী পোত্থোক হেনগৎহন্নবা, মালেমদা অফবা ফংবা ঙমহন্নবা, লৈবাক অসিগী ক্রোপ-পেত্তর্ন্দা অহোংবা লাকহনবতা নত্তনা মসিগী মিল্লেত অসিনা সুপর্ফুদ ওইহন্নবা ঐখোয়না কন্না হোৎনখি। মসিনা ন্যুত্রিএন্ত ফংদম অমসু ওইরিবনি। ঐখোয়গী লৈবাক্কী তুংগী চারোন-শুরোনগী ন্যুত্রিসনগী ৱারোইশিন পুরকপদা মসিনা য়াম্না তেংবাংগনি, মসিমক ঐখোয়গী অপীকপা লৌমীশিংনা পাংথোক্কনি। ঐখোয়না ফর্তিলাইজরগী মতাংদসু অনৌবা ওপ্সন কয়া অমা পুথোক্লে অমসুং মসিগী কান্নবসু ঐখোয়না ফংলে।
ইকায় খুম্ননিংঙাই ওইরবা চেয়রমেনজী,
অদোম ইশামকসু শাইনিক স্কুলগী মহৈরোইনি। নুপীমচা তম্বা য়ারমদবা অদুসু ঐখোয়না ঙসি য়াহল্লে। মসিদা নত্তনা, ঐখোয়গী নুপীমচাশিংনা অম্বালা শেন্নরি, মখোয়না আর্ম্দ ফোর্স্তা চঙবা পাম্লি, ওফিসর ওইবা পাম্লি। ঐখোয়না ইচানুপীশিংগীদমক্তা থোঙ কয়া অমা হাংদোক্লে। ঐখোয়গী ইচানুপীশিংনা লৈবাক ঙাক্নবগীদমক্তা শিয়াচেন্দা লৈরকপা মতমদা ঐখোয়না তসেংনা নুংঙাইবা পোক্কনি।
নুপীশিংনা খুঙ্গংশিংদা শেন্দানফম লৈহন্নবগীদমক্তা ঐখোয়না নুপীশিংগী সেল্ফ হেল্প গ্রুপ্তা ভেল্যু এদিসন তৌরে, মখোয়না বেঙ্কতগী ফংবা য়াবা শেনফমসু হেনগৎহল্লে, ঐখোয়গী ইমা অমসুং ইচে ইচলশিংবু মৈখুদগী মনিং তমহন্নবগীদমক্তা উজ্বালা স্কিমগী মখাদা গ্যাস কন্নেক্সন ফংহল্লে। ঐখোয়গী নুপীশিংনা থক্নবা ঈশিংগী খুদোংচাদবা থেংনহন্দনবগীদমক্তা, কিলোমীতর কয়া থাপ্না ঈশিং শোকপা চৎপদগী মনিং তমহন্নবগীদমক্তা, য়ুম্থোং খুদিংদা তোতি ঈশিং ফংহনবগী খোঙজং চঙশিনখি, নুপীশিংনা অমম্বদা পুন্সি লেনবা তোকহন্নবগীদমক্তা ঐখোয়না সৌভাগ্যা য়োজনাগী মখাদা লাইরবা ইমুংশিংদা মৈ ফংহল্লে। ইমা, ইচে-ইচলশিংনা অরুবা লাইনা নারবসু হাইদোক্তে, অঙাংশিংদা অমসুং ইমুংদা শেলগী পোৎলুম ওইগনি মখোয়না পাখৎচৈ। ঐখোয়না মখোয়গুম্বী নুপীশিংদা অয়ুশমান কার্দ পীদুনা অরুবা লাইনা কয়া হোস্পিতালদা চত্তুনা লাইয়েংবগী লম্বী য়াৎপীরে।
ইকায় খুম্ননিংঙাই ওইরবা চেয়রমেনজী,
ঐখোয়না নুপীশিংদা মশাগী লনগী মপু ওইবগী হক পীরে, মখোয়গী মিংদা প্রোপর্তী কার্দ খুৎশিন্নরে। নুপীশিংনা শেল খজিক খজিক তুংশিনবগী মতৌদা হেন্না তেংবাংনবগীদমক্তা মখোয়গীদমক্তা জন ধন একাউন্ত হাংদোক্লে। বেঙ্কতা শেল তুংশিনবা হৌরে হায়না লাউথোক্লে।
অদুগা ইকায় খুম্ননিংঙাই ওইরবা চেয়রমেনজী,
নুপী রাস্ত্রপতিনা বজেত সেসন হৌদোকপা অমসুং নুপী ফাইনান্স মন্ত্রীনা ফোর্মেল ওইনা বজেত লাউথোকপা হায়বসি ঐখোয়গীদি লাইবক ফবনি, চাউথোকচনিংঙাইনি। মসিগুম্বা থৌদোক অমত্তা লৈবাক অসি থোকখিদ্রি। মসিগুম্বা য়াইফরবা পুংফম কয়া তুংদসু উবা ফংজনবা ঐখোয়না খৌরাংনা ঙাইজরি।
ইকায় খুম্ননিংঙাই ওইরবা চেয়রমেনজী,
লৈবাক অসিনা মোদর্ন ওইগে অমসুং অনৌবা ৱারেপ কয়া ফংগে হায়রবদি ঐখোয়না সাইন্স অমসুং তেক্নোলোজী মীরায়বা য়াদে। সাইন্স অমসুং তেক্নোলোজী চাউখৎপদা ঐখোয়গী সরকারগী অহেনবা মিৎয়েং থম্মি। অদুনা ঐখোয়না অচোয়বা ৱাখল খনবা য়াদে, তোকনিজমদা ৱাখল খনবা য়াদে। ঐখোয়না লৈবাক অসিবু মাইকৈ অসিদা মাংজিল থানা পুশিন্নবা হোৎনবা য়াবা লম্বীদা থবক পায়খৎলি। অঙাং ওইরিঙৈদগী হৌনা সাইন্তিফিক তেম্পরেমেন্ত লৈহন্নবগীদমক্তা অতল তিঙ্করিং লেবকুম্বা সাইন্তিফিক ৱাখল্লোন চেনবা থৌরাং কয়া স্কুলগী অঙাংগী থাক্তা পায়খৎলি। মসিদগী অমুক হেন্না থোক্লক্তুনা করিগুম্বা অনৌবা পাংথোক্লকপা মতমদা তেংবাংনবা ঐখোয়না অতল ইনক্যুবেসন সেন্তর শেমগৎলি। ঐখোয়না সাইন্সকী পোলিসী কয়াদা অহোংবা পুরক্লে, স্পেস সেক্তরদা প্রাইভেত প্লেয়রশিংনা শরুক য়াবা য়াহল্লে। ঐখোয়গী লৈবাক্কী নহাশিংনা প্রাইভেত সেতিলাইত থাগৎপা ঙম্বগী মতিক লৈরকপসিদা ঐহাক্না তসেংনা নুংঙাইবা ফাওই। স্তার্তঅপকী মালেমগী ওইনসু ঐখোয়গী য়ুনিকোর্ন মশিং য়াম্না হেনগৎলে অমসুং ঐখোয়না ঙসিদি মালেমগী অহুমশুবদা লৈরে।
ইকায় খুম্ননিংঙাই ওইরবা চেয়রমেনজী,
মালেমগী ওইনা পেতেন্ত, ইন্নোভেসন অমসুং মালেমগী কৈথেলদা পাম্নবা খ্বাইদগী য়াম্বা পেতেন্ত অসি ঐখোয়গী নহাশিংনা পুথোকপসি ঐখোয় পুম্নমক্কী চাউথোকচনিংঙাইনি।
ইকায় খুম্ননিংঙাই ওইরবা চেয়রমেনজী,
আধারগী তসেংবা মপাঙ্গল করিনো হায়বা ঐখোয়না সরকারদা লাক্লবা মতুংদা তাকখি। অধার অমসুং তেক্নোলোজীগী মতাংদা ৱাহং হংলম্বা মীওইশিংনা মসিগী তসেংবা কান্নবশিং ইং ২০১৪গী মতুংদগী উরে। কোবিদ মনুংদা কোৱিন প্লেতফোর্ম্না ভেক্সিনেসন দোজ করোর ২০০ হেনবগী সর্তিফিকেতপু ঐখোয়গী মোবাইলদা সেকেন্দ খরগী মনুংদা য়ৌহনখিবা ঐখোয়না উখ্রে। অদুবু, ভারতনা মশাগী কোবিদ ভেক্সিন পুদুনা থোক্লকখিবদা মালেম্না খ্বাইদগী য়াম্না ঙক্নখি। মালেম্না ঐখোয়গী চাউরবা মার্কেত অসিদা মখোয়গী ভেক্সিন য়োন্নবা য়াম্না কন্না হোৎনরম্মি, প্রেসর য়াম্না লৈরম্মি, আর্তিকল কয়া ইনখি, তি.ভি.দা ইন্তর্ব্যু কয়া পীনখি, সেমিনার কয়া পাংথোকখি। মসিদা নত্তনা, ঐখোয়গী সাইন্তিস্তশিংবু হন্থনা উহন্নবা অমসুং মমায় থীহন্নবা থবক কয়াসু পাংথোকখি। অদুগা, ঐখোয়গী নহা ওইবা সাইন্তিস্তশিংনা লৈবাক্কী অপাম্বা ফংহনবতা নত্তনা মীরম লৈবাক্কী তঙাই ফদবা কয়াসু মনিং থুংহনবা ঙমখি।
ইকায় খুম্ননিংঙাই ওইরবা চেয়রমেনজী,
মখোয়শিং অসি সাইন্সকী মাইয়োক্তা লৈবনি, তেক্নোলোজীগী মাইয়োক্তা লৈবনি, ঐখোয়গী সাইন্তিস্তশিংবু মমায় থীহন্নবা খুদোংচাবা অমত্তা থাদোক্তে। ঐখোয়গী লৈবাক্না ফার্মাসীগী মালেমদা অনৌবা পাঙ্গল ওইনা থোক্লক্লি। মালেমগী ফার্মাসীগী হব অমা ওইরে। ঐখোয়গী নহাশিংনা অনৌ-অনৌবা ইন্নোভেসন পাংথোক্লি। মখোয়গী মিংচৎ থীহন্নবা লম্বী কয়া থীনরিবা মীওইশিংনা লৈবাক্কীদমক্তা খন্দে, মশাগী রাজনিতীগী কান্নবতমক খল্লি। মসি লৈবাক্কী লাইবক থীবনি।
ইকায় খুম্ননিংঙাই ওইরবা চেয়রমেনজী,
ঐহাক্না ঙসি বালিদা লৈবা মতমদা জি.২০ লৈবাকশিংনা দিজিতেল ইন্দিয়া করিনো খঙনবা খৎনরম্মি। মালেম পুম্বনা ঐখোয়গী মায় পাকপা উরে অমসুং ভারতনা দিজিতেল ত্রাঞ্জেক্সন্দা মালেমগী মকোক ওইরে।
ইকায় খুম্ননিংঙাই ওইরবা চেয়রমেনজী,
ঙসিগী মতমসিদা মোবাইল ফোন করোর ১০০ হেনবসি ঐখোয়গী লৈবাক মীয়ামগী খুত্তা লৈবসিদা ঐহাক্না নুংঙাইবা ফাওই।
ইকায় খুম্ননিংঙাই ওইরবা চেয়রমেনজী,
ঐখোয়না মীরমদগী মোবাইল লৈবগী মতম অমা লৈরম্মি, ঙসিদি ঐখোয়না মীরমদা মোবাইল থাদোক্লি। ৫জি., এ.আই., আই.ও.তি. ওইরো, মালেম্না মসি শিজিন্নবগী চাং য়াম্না থুনা হেনগৎলক্লি, মসিগী শিজিন্নফম কয়া পাকথোক চাউথোকহল্লি।
দ্রোন, মসি মীচম মীয়ামগী পুন্সিদা কান্নবা পুরক্নবা শিজিন্নগদবনি। ঐখোয়না মসিগী পোলিসীদা অহোংবা পুরক্লে, থাপ্লবা মফমশিংদা হিদাক য়ৌহন্নবা ঐখোয়না দ্রোন শিজিন্নরি। সাইন্স অমসুং তেক্নোলোজী শিজিন্নদুনা ঐখোয়না লৌমীশিংদা দ্রোন করম্না শিজিন্নগনি হায়বগী মতাংদা কিসান দ্রোনগী ত্রেনিং পীরি, শিজিন্নরি। দ্রোনগী হীরমদা অনৌবা চাউখৎপা লাক্নবা ঐখোয়না লম্বী য়াৎখি। মালেমসিদা মশাগী লম অমসুং য়ুমগী মপু ওইজবগী চে পায়দবা লৈরিবা অসিগী মতাংদা, ঙসি, য়ু.এন. য়াওনা লৈবাক অসিদা ৱারী কয়া শারি। য়ু.এন.না মালেমগীদমক্তা ৱারি। ভারতনা দ্রোন শিজিন্নদুনা স্বামিত্ব য়োজনাগী মখাদা লমশিং অসিগী মেপ য়েকপা অমসুং মপু ওইবগী হক ফংহল্লি। মখোয়বু কোর্তা কোইচৎ চৎপগী অৱাবসু কোকহল্লে। কনামত্তা লাক্তুনা লম মুনগনি হায়বগী পাখৎপসু কোকহল্লে। ঐখোয়না মীচম মীয়ামদা তেক্নোলোজীগী মতেংদগী অফবা পুন্সি অমা লৈহন্নবা হোৎনখিবশিং অসিদা মায় পাকপা কয়া ফংলে।
লৈবাক অসিনা ঙসিদি তেক্নোলোজীগী মতাংদা চাউখৎপা ভারত অমগী মঙলান থম্বা য়াম্না মরু ওইরি, অদুনা ঐখোয়না হ্যুমেন রিসোর্স দিভেলপমেন্ত, ইন্নোভেসনবু য়াম্না মরু ওইনা লৌরি। অদুনা, মালেমগী অমত্তা ঙাইরবা ফোরেন্সিক সাইন্স য়ুনিভর্সিতী ঐখোয়গী লৈবাক্তা লৈরিবনি। ঐখোয়না গতিশক্তি য়ুনিভর্সিতী শাদুনা ইনফ্রাস্ত্রকচরগী মালেমদা অনৌবা খোঙথাং পায়খৎখি। ঐখোয়না ইনর্জী য়ুনিভর্সিতী শাদুনা লৈবাকপু রিন্যুএবল ইনর্জীগী সেক্তরদা অচৌবা খোঙ্কাপ থাংহল্লে, ঐখোয়গী নহারোল খুদিংমক্না ঙসিদি শেম-শাদুনা লৈহন্নবগীদমক্তা ঐখোয়না থবক কয়া পায়খৎলে। ঐখোয়গী লৈবাক অসিদা তেক্নোক্রাফ, ইঞ্জিনিয়র, সাইন্সপু হেন্না তুক্কৎচবা পোকহন্নবা কংগ্রেসকী মতমদা পাংথোকখিদবা থৌওং অমত্তা লৈরমদে। অদুগা ঐখোয়গী মতমদনা সাইন্স অমসুং তেক্নোলোজী চাউখৎহন্নবা থবক অমত্তা চিত্থহনখিদে।
ইকায় খুম্ননিংঙাই ওইরবা চেয়রমেনজী,
মফমসিদা থবক পীবগী মতাংদসু খন্নখি, অদোম্না মতম শাংলবা অসিদা মেয়ামগী পুন্সিগীদমক্তা থবক পাংথোকই হায়না লাউখিবদু ঐদি ঙকই। নৌক্রি অমসুং রোজগারদা খেন্নবা লৈ হায়বসি মখোয় খঙদে। মসিগী মতাংদা নিংথীনা খঙদবা মীওইশিংদা ঐখোয়না করি থাজবা থমগদৌরিবনো।
ইকায় খুম্ননিংঙাই ওইরবা চেয়রমেনজী,
স্তার্তঅপ লিশিং ৯০ অসিনা থবক্কী থোঙ কয়া অমা হাংখ্রে। ইং ২০২২গী এপ্রিলদগী নবেম্বর ফাওবদা ই.পি.এফ.ও. পেরোলদা করোর অমদগী হেন্না মিং চনখি। করোর অমদগী হেন্ননিকো।
ইকায় খুম্ননিংঙাই ওইরবা চেয়রমেনজী,
আত্মানির্ভর ভারত রোজগার য়োজনাগী মখাদা মীওই লাখ ৬০ হেনবনা কান্নবা ফংনখি। আত্মানির্ভর ভারত অভিয়ানগী মখাদা ঐখোয়না প্রাইভেত ইন্দস্ত্রীশিংদা স্পেস, দিফেন্স, দ্রোন, মাইনিং, কোয়লা অমসুং অতোপ্পা সেক্তর কয়া হাংদোকখি। মসিদগী থবক হেন্না পীবা ঙমবগী ওইথোকপসু লৈরে। অদুগা, ঐখোয়না অসুক য়াম্বা খোঙথাং পায়খত্তুনা নহাশিংদা থবক্কী কান্নবা কয়া অমা ফংহনখ্রে।
ইকায় খুম্ননিংঙাই ওইরবা চেয়রমেনজী,
লৈবাক ঙাক-শেনবগী মতাংদা লৈবাক অসিনা মরমদোম লেপচবা ঙমহনবা হায়বসি লৈবাক অসিগীদমক্তা য়াম্না তঙাই ফদবনি। হীরম অসিদা আত্মানির্ভর ওইবা হায়বা মিসনগা লোয়ননা ঐখোয়না চৎলিবা অসিদা ঐহাক য়াম্না নুংঙাইবা ফাওই। প্রাইভেত কম্পেনী কয়া অমা দিফেন্সকী সেক্তরদা লাকখ্রে, অদুগা করোর লাখ অমমুক্কী দিফেন্স এক্সপোর্ত পাংথোক্লি অমসুং মসিদগী থবক্কী খুদোংচাবা কয়া অমসু লৈরক্লি।
ইকায় খুম্ননিংঙাই ওইরবা চেয়রমেনজী,
ইকায় খুম্ননিংঙাই ওইরবা চেয়রমেনজী,
লৈবাক্কী শেন্মিৎলোনগী মপাঙ্গল, রাজ্যশিংগী শেন্মিৎলোনগী মপাঙ্গলগা মরী লৈননা দিসিপ্লিনগী লম্বী খনবা তাবনি। মসি পাংথোক্লবা মতমদা ঐখোয়গী রাজ্যশিংনা কান্নবা ফংগনি, অমসুং রাজ্যশিংগী মীয়ামগীদমক্তা খুদোংচাবা ফংহনবা ঙমগনি।
ইকায় খুম্ননিংঙাই ওইরবা চেয়রমেনজী,
ইং ২০৪৭ ফাওবদা চাউখৎপা ভারত অমা ওইহনবা হায়বগী ৱারেপ লৌরিবা অসিদা লৈবাক মীয়াম করোর ১৪০গী ৱারেপসু য়াওরিবনি। লৈবাক্না হৌজিক তুং হন্দুনা য়েংলরোই। লৈবাক্না অশাংবা খোঙথাং থাংনবা শেম শারে। নোংমগী চরা অনি তানবা মীওইশিংগী অপাম্বুদি উবিদে। সোসিএল জস্তিস ফংবা পাম্লিবশিংগীসু করিসু খনবীখিদে, অদুবু ঐখোয়না পুম্নমক অসি পাংথোকখি। মসিদা নত্তনা অতোপ্পা খুদোংচাবা কয়া অমসু মীয়ামদা য়ৌহনখি। অদুগা নিংতম্বা ভারতকী মঙলান মঙফাওনহন্নবগীদমক্তা ঐখোয়না ৱারেপ লৌদুনা চঙশিল্লি।
ইকায় খুম্ননিংঙাই ওইরবা চেয়রমেনজী,
মীওই অমনা মীওই কয়া অমগী মফমদা কয়া য়াম্না শিংনবা ঙম্মি হায়বা লৈবাক্না ঙসি উরি। ঐহাক্তি কনভিক্সন লৈখিবগীদমক্তা অসুক কুইনা চৎলিবনি। লৈবাক্কীদমক্তা হিংবনি, লৈবাক্কী করিগুম্বা খরা পাংথোক্কে হায়না থোক্লকপনি। মরম অদুনা, মসিগুম্বা রাজনিতীগী মশান্না শান্নবা মীওইশিং অসিদি মপাঙ্গল লৈতবনি, মথৌনা লৈতবনি, মখোয়দি করম্না নান্থোকসিগে হায়বগী লম্বী থিদুনা লৈরিবনি।
ইকায় খুম্ননিংঙাই ওইরবা চেয়রমেনজী,
রাস্ত্রপতিগী ফজরবা ৱারোলবু ঐহাক্না হাউস্তা ইকায়খুম্নবা উত্তুনা, থাগৎচরদুনা, অদোম খ্বাই খিবিকপুসু থাগৎচরি। মসিগা লোয়ননা ঐহাক্না ঐহাক্কী ৱারোল লোইশিঞ্জরি।
