লৈবাক অসিনা চহি অসিগী বজেৎ অসি ২০৪৭ ফাওবদা চাউখৎপা ভারত অমা ওইনবগী পান্দম থুংহন্নবা অহৌবা অমা ওইনা উরিবা অসি ঐখোয় পুম্নমক্কী ওইনা নুংঙাইরবা ৱাফম অমা ওইরি। বজেৎ অসি তুংলমচৎকী অমৃতকালগী ৱাখল্লোন্দগী য়েংখি অমসুং চাংয়েং তৌখি। লৈবাক্কী প্রজাশিংনা পান্দমশিং অসিগা মথংগী চহি ২৫গী ৱাখল্লোনশিংবু মরী লৈনহল্লিবা অসি অফবা খুদম অমনি।
মরুপশিং,
হৌখিবা চহি ৯দা লৈবাক অসিনা নুপীনা লমজিংবা চাউখৎ-খোঙচৎকী মঙলানগা লোয়ননা মাংদা চংশিনখি। মমাংগী চহিশিংগী এক্সপরিয়েন্স য়েংলবদি ভারতনা নুপীগী চাউখৎ-থৌরাংগী খোঙথাংশিংদগী নুপীনা লমজিংবা চাউখৎ-খোঙচৎ অসি মালেমগী ফম্পাক্তা পুখৎনবা হোৎনদুনা লাকখি। হন্দক্তি মসিগী হীরম অসি ভারতনা চিয়র লৌখিবা জি২০ মীফমশিংদা মরু ওইবা মীৎয়েং চংখি। চহি অসিগী বজেৎআ নুপীনা লমজিংবা চাউখৎ-খোঙচৎকী খোঙথাংশিংদা অনৌবা ইনোৎ অমা হাপকনি, অমসুং মসিদা নখোয় পুম্নমক্না অচৌবা থৌদাং অমা লৌগদবনি। ঐহাক্না পুম্নমকপু বজেৎকী ৱেবিনার অসিদা তরাম্না ওকচরি।
মরুপশিং,
নুপীগী শক্তিগী অখাং কনবা শক্তি, মরিংজেল খাবা, মখোয়গী ৱাখল খনবা ঙম্বগী শক্তি, মখোয়গী ৱারেপ লৌবা ঙম্বগী শক্তি, মখোয়গী থুনা ৱারেপ লৌবা ঙম্বগী মতুক-ময়াই, থমখিবা পান্দমশিং ফংনবা মখোয়গী হোৎনবা কনবা, মখোয়গী হোৎনবা কনবগী অপুনবা শক্তি, মসিনা ঐখোয়গী ইমাগী শক্তি মশক তাক্লি, মসিদা মমি তারি। ঐখোয়না নুপীনা লমজিংবা চাউখৎ-খোঙচৎ হায়বা মতমদা শক্তিশিং অসিদা য়ুম্ফম থোল্লি। মা ভারতিগী অফবা তুংলমচৎ অমা পুরক্নবা নুপীগী শক্তি অসিনা ভারতকী মমল নাইদ্রবা শক্তি ওইরি। মসিগী শক্তি অসিনা চহিচা অসিদা ভারতকী স্কেল অমসুং স্পীদ হেনগৎহনবদা অচৌবা থৌদাং অমা লৌরি।
মরুপশিং,
ভারতকী খুন্নাই লোলদা ঙসি ঐখোয়না চাউনা অহোংবা অমা পুরকপা উবা ফংলি। হৌখিবা চহি খরা অসিদা নুপীদা শক্তি পীনবা ভারতনা থবক তৌরিবা মওং অসিগী ফলশিং ঙসি উবা ফংলে। ঙসি ঐখোয়না নুপাগা চাংদম্নবদা নুপীশিংগী মশিংনা হেনগৎলকপা উবা ফংলি। হায় স্কুলদা তম্মিবা নুপীমচাশিংগী মশিং অসি হৌখিবা চহি ৯-১০দা শরুক অহুম হেন্না হেনগৎলকখি। সাইন্স, তেক্নোলোজী, ইঞ্জিনীয়রিং অমসুং মেথস্তা নুপীমচাশিংনা এনরোল তৌবা অসি ঙসিদা ৪৩% য়ৌবা ঙম্লে অমসুং মসি শেল পাইবা লৈবাকশিং, অমরিকা, য়ু.কে., জর্মনী ওইরবসু মখোয়গী মরক্তা খ্বাইদগী ৱাংবা ওইরি। মতৌ অসুম্না মেদিকেলগী লম নত্ত্রগা শান্ন-খোৎনবগী লম, বিজিনেস নত্ত্রগা রাজিতীগী থবক-থৌরমদা ওইরবসু নুপীশিংনা শরুক য়াবা অসি ভারত্তা হেনগৎলকপা খক্তা নত্তনা লম খুদিংমক্তা মখোয়না মাংজিল থারি। ঙসি ভারতকী লম কয়াদা নুপীগী শক্তিগী মতিক-ময়াই অসি উবা ফংলে। মুদ্রা লোনশিং পীথখিবা মীওই করোর কয়াগী মনুংদা বেনিফিসরীশিংগী চাদা ৭০দি লৈবাক অসিগী নুপীশিংনা ওইরি। নুপী করোর কয়া অসিনা মখোয়গী ইমুং-মনুংগী শেন্থোক হেনগৎহনবা খক্তা নত্তনা শেন্মীৎলোবগী অনৌবা দাইমেন্সনশিংসু হাংদোক্লি। পি.এম. স্বনিতি য়োজনাগী খুত্থাংদা গরেন্তী য়াওদনা শেলগী তেংবাং পীবা, এনিমেল হসবেন্দরী থৌগৎপা, ফিশরিজ থৌগৎপা, ভিলেজ ইন্দস্ত্রীশিং থৌগৎপা, এফ.পি.ও.শিং অসিগুম্বদা ইন্সেন্তিবশিং পীখি। মসিগী খ্বাইদগী চাউবা কান্নবা অমসুং ফলশিং অসি নুপীশিংদগী লাকখি। লৈবাক্কী মীশিং তঙ্খাইগী মতেংগা লোয়ননা ঐখোয়না লৈবাক অসিবু করম্না মাংদা পুখৎকনি, নুপীগী শক্তি অসি করমআ হেনগৎহনগনি হায়বগী মমিং অসি বজেৎ অসিদা ময়েক শেংনা তারি। মহিলা সম্মান সেভিং সর্তিফিকেৎ স্কিমগী মখাদা নুপীশিংদা চাদা ৭.৫গী শেন্দোইং পীরগনি। বজেৎ অসিদা পি.এম. আৱাজ য়োজনাগীদমক লুপা করোর লিশিং ৮০গী শেনফম খাক্তুনা থমখি, শেনফম অসি লৈবাক্কী নুপীশিংগী য়ুম শাবদা শীজিন্নগনি। হৌখিবা চহি খরা অসিদা ভারত্তা পি.এম. আৱাজ য়োজনাগী মখাদা য়ুম করোর ৩ হেন্না শাখি, মখোয় অসি অয়াম্বনা নুপীশিংগী মমিংদা লৈখি। মমাংঙৈদা নুপীশিংগী মমিংদা লৌবুক, কৈ, দুকান নত্ত্রগা য়ুম অমত্তা লৈরমখিদে। ঙসি সিস্তেম অসিদগী মখোয়না চাউনা কান্নবা ফংলি। পি.এম. আৱাজনা য়ুমগী ওইবা শেন্মীৎলোনগী ৱারেপশিং লৌবদা অনৌবা হক অমা পীখি।
মরুপশিং,
বজেৎ অসিদা অনৌবা য়ুনিকোর্নশিং শেম্নবা তৌরি, হৌজিক ঐখোয়না স্তার্তঅপকী লমদা য়ুনিকোর্নগী মতাংদা তাখ্রে অদুবু মসি সেল্ফ হেল্প গ্রুপতসু ওইথোকপা য়াব্রা? মঙলান অসি থুংহনবদা শৌগৎলিবা এনাওন্সমেন্ত অমা বজেৎ অসিদা য়াওখি। হৌখিবা চহিশিংগী গ্রোথ স্তোরীদগী লৈবাক অসিগী বিজন অসিগী স্কোপ ঐখোয়না উবা ফংখি। ঙসি লৈবাক্কী নন-ফার্ম বিজিনেস মঙাগী মনুংদা অমদি নুপীশিংনা হেন্দল তৌরি। হৌখিবা চহি ৯দা নুপী করোর তরেৎ হেনবনা সেল্ফ হেল্প গ্রুপশিংদা য়াওশিনখি অমসুং মখোয়না তোঙান-তোঙানবা লমশিংদা থবক তৌরি। নুপী করোর কয়া অসিনা ভেল্যু কয়া য়াম্না শেম্বগে হায়বা নখোয়না মখোয়গী কেপিতেলগী মথৌ তাবদগী হোৎপা য়াগনি। হৌখিবা চহি ৯দা সেল্ফ-হেল্প গ্রুপশিং অসিনা লুপা করোর লাখ ৬.২৫গী লোন লৌখি। নুপীশিং অসি অপীকপা ওন্তপ্রিনোরশিং ওইবতা নত্তনা মখোয়না লম অসিদা রিসোর্স পর্সন ওইনসু থবক তৌরি। বেঙ্ক সখি, এগ্রিকলচর সখি, এনিমেল সখিগী মওংদা নুপীশিং অসিনা খুঙ্গংদা চাউখৎ-থৌরাংগী অনৌবা দাইমেন্সনশিং শেম্লি।
মরুপশিং,
কোওপরেতিব সেক্তরদা নুপীশিংনা মতম চুপ্পদা অচৌবা থৌদাং অমা লৌদুনা লাকখি। ঙসি কোওপরেতিব সেক্তরদা অচৌবা অহোংবা অমা পুরক্লি। লাক্কদৌরিবা চহিশিংদা মলতি-পর্পস কোওপরেতিব দাইরী কোওপরেতিব অমসুং ফিশরিজ কোওপরেতিব লাখ ২ হেন্না শেম্লগনি। লৌমী করোর ১বু মহৌশাগী লৌউ-পথাক পাইখৎহন্নবা পান্দম অমা থমখ্রে। নুপী লৌমীশিং অমসুং প্রদ্যুসর গ্রুপশিংনা মসিদা অচৌবা থৌদাং লৌবা য়াগনি। হৌজিক্কী ওইনা লৈবাক অসিদা খক্তা নত্তনা মালেম পুম্বদা মিল্লেৎ হায়বদি শ্রী অন্নগী মরমদা এৱের্নেস পীরি। মখোয়গী দিমান্দ অসিসু হেনগৎলক্লি। মসি ভারতকী অচৌবা খুদোংচাবা অমনি। মসিদা নুপী সেল্ফ-হেল্প গ্রুপশিংনা লৌবা থৌদাং হেন্না হেনগৎহন্নবা ঐখোয়না থবক তৌবা তাই। নখোয়না ৱাফম অমগা নীংশিংবা তাই। ঐখোয়গী লৈবাক্তা ত্রাইবেল নুপী করোর ১না সেল্ফ-হেল্প গ্রুপশিংদা থবক তৌরি। মখোয়না ত্রাইবেলগী মফমদা শ্রীঅন্ন থাবগী মতমদা অরিবা মতমদগী খঙদুনা লাকখি। শ্রী অন্ন মার্কেৎতিং তৌবদগী মখোয়গী প্রোসেস ফুদকা মরী লৈনবা খুদোংচাবশিং অসি ঐখোয়না তেপ তৌবা তাই। মফম কয়াদা সরকারগী ওর্গনাইজেসনশিংনা মাইনর ফোরেস্ত প্রদ্যুস প্রোসেস তৌবদা মতেং পাংলি। ঙসি অসিগুম্বা সেল্ফ হেল্প গ্রুপ কয়া মনুং হঞ্জিনবা মফমশিংদা শেমখি, ঐখোয়না মসিনা হেন্না চাউবা থাক অমদা পুখৎনবা হোৎনবা তাই।
মরুপশিং,
অসিগুম্বা খোঙথাংশিং অসিদা নহারোল অমদি ইচানুপীশিংগী স্কিল দিবেলপমেন্তনা অচৌবা থৌদাং অমা লৌগনি। বিশ্বাকর্ম য়োজনানা মসিগী অচৌবা থোং অমা ওইনা মথৌ তৌরগনি। বিশ্বাকর্ম য়োজনাদা নুপীশিংগী অখন্নবা খুদোংচাবশিং অদু ঐখোয়না খঙদোক্তুনা মাংদা পুখৎকদবনি। জি.ই.এম. পোর্তেল অমসুং ই-কম্মর্স অসি নুপীগী বিজিনেস পাকথোক চাউথোকহন্নবা অচৌবা পাম্বৈ অমা ওইরক্লি। ঙসি সেক্তর খুদিংমক্না অনৌবা তেক্নোলোজীগী কান্নবা লৌরি। ঐঝোয়না সেল্ফ হেল্প গ্রুপশিংদা ত্রেনিং ফংহনবদা অনৌবা তেক্নোলোজী হেন্না-হেন্না শীজিন্নবাদা মীৎয়েং চংগদবনি।
মরুপশিং,
ঙসি লৈবাক অসিনা ‘সবকা সাথ, সবকা বিকাস, সবকা বিশ্বাস অমসুং সবকা প্রয়াস’কা লোয়ননা মাংদা চংশিল্লি। আর্মীদা য়াওদুনা, রেফেল পাইদুনা ঐখোয়গী ইচানুপীশিংনা লৈবাক ঙাকশেনবা অসি উবা মতমদা মখোয়গী মরমদা খল্লম্বা ৱাখল্লোনশিংদা অহোংবা লাকখি। নুপীশিংনা ওন্তপ্রিনোরশিং ওইরকপা, ৱারেপশিং লৌরকপা, খুদোংথিবা মায়োক্নবা মতমদা মখোয়গী মরমদা খল্লম্বা ৱাখল্লোনশিংদা অহোংবা লাকখি। নুমিৎ খরনিগী মমাংদা অহানবা ওইনা নাগালেন্দদা নুপী অনিনা এম.এল.এ. ওইখি। মখোয় অনিগী মরক্তা অমদা মন্ত্রীগী ফম পীখি। ভারতনা খোঙজেল য়াংনা মাংদা চংশিনবা খক্তা নত্তনা নুপীশিংগী ইকাই খুম্নবা হেনগৎহল্লি অমসুং থোং মান্নবগী ৱাখল্লোন হেনগৎহল্লি। ঐহাক্না পুম্নমক্তা অপীল তৌজনীংই মদুদি নুপী-ইচে-ইচল-ইচানুপীশিং পুম্নমক্না নখোয়গী মাংদা লাকপা খুদোংথিবা খুদিংমক অকাং কনবগা লোয়ননা মায়োক্নদুনা মাংদা চংশিনগদবনি।
মরুপশিং,
মার্চ ৮, নুপীশিংগী নুমিৎতা রাস্ত্রপতি দ্রৌপদি মুর্মুনা নুপীদা শক্তি পীবগী য়াম্না ফজরবা আর্তিকল অমা ইখি। আর্তিকল অসি লোইশিনবদা রাস্ত্রপতি মুর্মুজীনা থমখিবা ৱাখল্লোন অদু মীপুম খুদিংমক্না ভাব তাহন্নীংই। আর্তিকল অদুদগী ঐহাক্না মচেৎ অমা থমজগে। মহাক্না হায়খি – “চাউখৎ-খোঙচৎ অসি খুমাং চাউশিনহনবা হায়বা অসি মীওই অমমমগী খক্তা নত্তনা ঐখোয় পুম্নমক্কী থৌদাংনি”। অদুনা ঙসি ঐহাক্না পুম্নমক্তা হায়জনীংবদি নখোয়গী ইমুং-মনুং, য়ুমলোন-কৈরোন্নবদা অমসুং থবক মফমদা খেন্নবা অমা পুরক্নবা নশানা কত্থোকপগা লোয়ননা হোৎনবীয়ু। অঙাং অমগী মাইথোংদা মমোন মীনোক তমহনগদবা, মহাক্না পুন্সিদা মাংদা চংশিনবা ঙম্নবা অওনবা পুরকপা ঙমগদবা অহোংবা পুরক্লসি। ঐহাক্না নখোয়দা থমজরিবা অসি ঐহাক্কী থমোয়দগী থোরকপা ৱাফমনি। রাস্ত্রপতিনা থমখিবা ৱাহৈ খরা অসি ফোঙদোকচবগা লোয়ননা ঐহাক্না ৱারোল পীবা মতাং অসিদা লোইশিনজরি। ঐহাক্না পুম্নমক্তা য়াইফ-মঙ্গোল পীজরি। হন্না হন্না থাগৎচরি!
