ঙসি লেংবীরক্লিবা কেন্দ্রগী মন্ত্রী কয়া, ইবেম্মা অমসুং ইবুংঙোশিং!
ঙসি, লৈবাক অসিনা বীর সাহিবজাদানা ওমোর ওইরবা মওংদা কত্থোক্লম্বা অদুবু নীংশিংলি, মহাক্কী মফমদগী ইথিল লৌরি। নিংতম্বগী অমৃত কাল অসিদা বীর বাল দিবসকী মওংদা অনৌবা তাঙ্কক অমা হৌদোক্লি। হৌখিবা চহিদা, লৈবাক অসিনা দিসেম্বর 26তা অহানবা ওইনা বীর বাল দিবস পাংথোকখি। মতমদুদা লৈবাক শিনবা থুংবনা অমত্তা ওইনা পুন্দুনা সাহিব্জাদাগী মথৌনাগী ৱারী লিনখি। বীর বাল দিবস হায়বসিদি ভারতকী ঙাক শেন্নবগীদমক্তা পাংথোকফম থোকপা খুদিংমক পাংথোকসি হায়না ৱারেপ্পগী পাংখক্নি। থৌনা লৈবগা চহি নৌবগা মরী অমত্তা লৈনদে হায়না নুমিৎ অসিনা ঐখোয়দা নীংশিংহল্লি। মসিদি গুরুশিংনা হায়বীরম্বা – “সুরা সো পেহচানীয়ে, জো লরে দিন কে হেত, পুর্জা-পুর্জা কত মরে, কবহু না ছাদে খেত” হায়না হায়বীরম্বা অথোইবা হেরিতেজ অদুগী নুংঙাইবা ফোংদোকপগী কুহ্মৈনি। ইমা গুজরী, গুরু গোবিন্দ সিংহজী অমসুং মহাক্কী সাহিবজাদে মরিগী থৌনা অমসুং ৱাখল্লোন্না ভারত মচা খুদিংগী মফমদা থৌনা হাপ্লি। মরম অদুনা, বীর বাল দিবস হায়বসিদি মখোয়গুম্বা তসেংনা থৌনা লৈরবা অমসুং মখোয়বু পোকপীরম্বী মমাশিংদা তসেংবা ইকায় খুম্নবা উৎপগী তাঞ্জা অমনি। ঙসি ঐহাক্না বাবা মোতী রাম মেহরানা অথৌবা ওইখিবা, মহাক্কী ইমুং-মনুং অমসুং দিৱান তোদর মালগী থৱাই চঙবগী মতৌবু নীংশিংলি। মহাক অসি গুরুবু নীংজবা অমসুং ঐখোয়বু মিৎকপ থোকহনবীবা ইথিলগী মাইকৈদা থৱাই চঙবগী খুদম অমনি।
ঐহাক্কী ইমুংগী মীওইশিং,
বাল বীর দিবস অসি মালেমগী ওইনা পাংথোক্লকপা অসিদা ঐহাক্না নুংঙাইবা ফাওই। হন্দক্কী চহিসিদা, অমেরিকা, ব্রিতেন, ওস্ত্রেলিয়া, UAE, অমসুং গ্রীসতসু বাল বীর দিবসকী থৌরম পাংথোক্লি। মালেম পুম্বনা ভারতকী বীর সাহিবজাদেবু শকখঙলগনি, মহাক্কী থোইরবা থবক্তগী তম্নরগনি। চহি চহুমগী মমাংদা চমকোর অমসুং সরহিন্দগী লান্দা থোকখিবা খুদিংমক হন্দোকপা য়াররোইদবা পুৱারী অমনি। মসিদি পুৱারী ওইবা মায় পাকপা অমনি। মসি ঐখোয়না কৈদৌনুংদা খক কাওবা য়াদে। হৌরক্লিবা চারোন শুরোন্দা মসিবু নীংশিংহনবগী মথৌ য়াম্না তাই। মীওৎ-মীনৈ অমসুং নাথৈবনা পীক থনবা মতমদা ঐখোয়না থৱাই নুংঙাইতনা খক লৈথোকখিদে। ঐখোয় ভারত মচাশিংনা ইশাগী ইকায় খুম্নবা মাঙহন্দনা পুম্নমক অসিগী মাইয়োক্তা লেপখিবনি। ঐখোয়গী চহি কাঙলুপ খুদিংগী মীওইশিংনা মশাগী ঙমজবা কত্থোক্নখি। মখোয়না হিংবগী মহুত্তা লৈবাক্কীদমক্তা থৱাই থাবনা হেন্না পামজখিবনি।
মরুপশিং,
ঐখোয়না ইশাগী হেরিতেজপু ইকায় খুম্নদনা লাকখিবদা মালেম্নসু ঐখোয়গী হেরিতেজপু ইকায় খুম্নখিদে। হৌজিক, ঐখোয়না ইশাগী হেরিতেজকীদমক্তা চাউথোকচরকপা অসিদা মালেমগী মিৎয়েংসু হোংলক্লে। লৈবাক অসিনা মীখা পোনবগী ৱাখল্লোন্দগী মপান থোক্লকপা অসিদা ঐহাক্না য়াম্না নুংঙাইবা ফাওই। ঙসিগী ভারতনা মশাগী মীয়াম, মশাগী পাঙ্গল, মশাগী ইথিলশিংদা মপুং ফানা থাজবা থম্লি। ঙসিগী ভারতকী ওইনদি, সাহিবজাদেনা কত্থোক্লম্বা অসিনা লৈবাক মীয়ামদা ইথিল পীনবা হীরম অমা ওইরি। ঙসিগী ভারত্তা ভগ্বান বির্সা মুন্দা অমসুং গোবিন্দ গুরুনা অথৌবা ওইখিবগী থৌওংনা লৈবাক পুম্বগী মফমদা ইথিল পীরি। কদুগা, করিগুম্বা লৈবাক অমনা মশাগী হেরিতেজপু অসুক য়াম্না ইকায় খুম্নদুনা তুংলমচত্তা খোঙদারকপা মতমদা, মালেম্না লৈবাক অদুবু ইকায়সু খুম্নগনি, ইকায় খুম্নবা মিৎয়েংদসু য়েংগনি।
মরুপশিং,
ঙসিদি, মালেম অসিনা ভারত লৈবাকপু খুদোংচাবনা থল্লবা লৈবাকশিংগী মরক্তা খ্বাইদগী থাক ৱাংনা থম্লি। মতমগা খ্বাইদগী চুনবা শিংনবা কয়াগী মতাংদা ভারতনা খোঙথাং কয়া লুচিংবগী থাক অমদা ঙসিগী ভারত অসিনা লৈরে। শেন্মিৎলোন, সাইন্স, লৈঙাকপা, শান্ন-খোৎনবা, রাজনীতি, লৈবাক ঙাকপগী পাঙ্গলগুম্বা হীরম খুদিংদা ঙসিগী ভারতনা মাঙজিল থানা চৎলি। হৌজিক অসিদি ভারতকী মতম্নি। লাক্কদৌরিবা চহি 25 অসিনা ভারতকী রিসোর্সকী তৌবা ঙম্বগী মতিক উৎকনি। মসিগীদমক্তা ঐখোয়না ৱাশক মঙা ঙাক্না চৎপা তাবনি, ঐখোয়গী লৈবাক্কী শক্তাক্কী মপাঙ্গল হেন্না কনখৎহনবা তাবনি। ঐখোয়না মিৎকুপ অমা ফাওবা মতম মাঙহনবা য়ারোই, ঐখোয়না ঙাইদুনা লৈগদবা মতম নত্ত্রে। ঐখোয়গী গুরুশিংনা তাকপীরম্বা লৌশিং খুদিংমক ঐখোয়না ঙসিসু খঙলি। ঐখোয়না লৈবাক্কী মিংচৎ পুরক্নবগীদমক্তা হিংবা তাবনি। লৈবাক অসিবু হেন্না নুংঙাইহন্নবা হোৎননবা হিংবা তাবনি। ঐখোয়না অথোইবা লৈবাক অসিগী মচা অমা ওইনা লৈবাক অসিবু চাউখৎপা লৈবাক অমা ওইহন্নবা অমত্তা ওইনা হোৎনমিন্নবা তাবনি। মসিদগী মায় পাক্লগা থোক্লকপা তাবনি।
ঐহাক্কী ইমুংগী মীওইশিং,
য়ুগ কয়াদা অমুকখক লাকপা মতম অমদা ঙসি ভারতনা খোঙদারি। নিংতম্বগী হৌজিক্কী অমৃত কাল অসিদা সনাগী তুংগী মতম অমা শেম্নবা হীরম কয়া অমা অমত্তা ওইনা পুনশিনখ্রবনি। ঙসিদি, ভারত অসি নহাশিংগী মীশিং খ্বাইদগী য়াম্বা লৈবাকশিংগী মনুংদা চল্লিবনি। মসিগুম্না মশিং য়াম্বা নহা মশিংদি লৈবাক অসিনা নিংতম লানহৌ মনুংদসু উখিদ্রি। মতমদুগী নহাগী পাঙ্গলনা নিংতম্বা ফংহনখিবা ওইরবদি, হৌজিক লৈরিবা য়াম্লবা নহাশিং অসিনা ঐখোয়গী লৈবাকপু কয়া য়াম্না ৱাংবা থাক্তা পুখৎপা ঙমগনি হায়বসিদি ৱাখলনসু লাম্বা ফংলরোই।
ভারত অসিদি নাচিকেতগুম্বা অঙাংনা লৌশিং তানবদা মালেম ওৎপা ঙমখিবা লৈবাক্নি। ভারত অসিদি চহি য়াম্না নৌরিবা অভিমনয়ুনা লুরবা চক্রভ্যু থুগাইরুগে হায়না থোক্লকপা লৈবাক্নি। ভারত অসিদি বালক ধ্রুবগুম্বনা অতৈ কনানা পাংথোকপা ঙম্নদবা মওংদা অরুবা ধ্যান তৌবা ঙমহনবা লৈবাক্নি। ভারত অসিদি চহি য়ামদ্রিবা অঙাং চন্দ্রগুপ্তনা লৈবাক শাশন পায়গে হায়বগী মখোঙ থাংদোকখিবা লৈবাক অমনি। এক্লাব্যাগুম্বা মহৈরোই অমনা মহাক্কী গুরুগী দখিনা পীনবগীদমক্তা মীয়াম্না পাংথোকপা ঙম্লরোইদবা থবক পাংথোকপা ঙমখিবা; খুদিরাম বোস, বত্তুকেশ্বর দত্ত, কনকলতা বরুৱা, রানী গাইদিনল্যু, বাজী রাউতকুম্বা মীওইনা মশাগী লৈজবী খুদিংমক কত্থোকপদা অনিরকশুনা খনখিদে। মখোয়না পীরম্বা ইথিলনা অদুক্কী মতিক চাওই, মদুগুম্বা লৈবাক অসিনা মশাগী পান্দম ফংগে খনবদা ঙমদবা লৈরোই। অদুনা, ঐহাক্না ঙসিগী অঙাং অমসুং নহাশিংদা থাজবা থম্মি। তুংগী মতমগী ভারত অসিদি মখোয়না পানগদৌরিবনি। ঙসি মার্শেল আর্ত উৎখিবা অঙাংশিংনা মখোয়গী তোপ-তোপ্পা স্কিল উৎখি, মসিমক্না ঐখোয়গী নহা অমসুং অঙাংশিংগী তৌবা ঙম্বগী মতিক কয়া য়াম্না লৈ হায়বা উৎলিবনি।
ঐহাক্কী ইমুংগী মীওইশিং,
লাক্কদৌরিবা চহি 25না ভারতকী নহাশিংগীদমক্তা অচৌবা খুদোংচাবা কয়া পুদুনা লাক্কনি। ভারতকী নহাশিংনা মফম অমদবু পোক্লবসু, খুন্নাই অমদা পোক্লবসু, মখোয়গী মঙলান্দি মপান নাইদে। মঙলানশিং অসিবু মঙফাওনহন্নবা মখোয়গী মনাক্তা নীংথিবা রোদমেপ লৈরে, ময়েক শেংবা মিৎয়েং অমসুং থৌশিল থৌরাং লৈরে অদুগা করি পাম্বগে হায়বগী মতাংদদি চিংনবা অমত্তা লৈনদ্রে। ঙসি ভারতনা লৈবাক্কী এজুকেসন পোলিসী শেমখ্রে, মসিনা 21শুবা চহি চাগী নহাশিংগী স্কিল হেনগৎহনগনি। ঙসি, অতল তিঙ্করিং লেব লিশিং তরা হেনবনা ঐখোয়গী মহৈরোইশিংদা ইন্নোভেসন, রিসর্চকী অনৌবা অপাম্বা অমা পোকহল্লি। স্তার্ত-অপ ইন্দিয়া খোঙথাংবুসু অমুক্তা য়েংবীয়ু। ইং 2014গী মমাংদা লৈবাক্কী মীয়াম্না স্তার্ত-অপ কলচরগী মতাংদা কয়া খঙনরমদে। ঙসিদি, ভারত্তা অনৌবা স্তার্ত-অপ লাক্ষ অমগা লিশিং কুনমঙা লৈরে। স্তার্ত-অপশিং অসিদা নহাশিংগী মঙলান, ইন্নোভেসন, অমসুং করিগুম্বা অমা পাংথোক্কে খনবগী খুদোংচাবা য়াওরি। ঙসিদি, মুদ্র য়োজনাগী মতেংদগী নহা করোর 8তগী হেনবগী মফমদা মশাগী কারবার হৌদোকচনবা তেংবাং অহানবা ওইনা পীখ্রে। মসিদা খুঙ্গং, ত্রাইবেল, লাইরবা অমসুং শোত্থরবা কাঙলুপকী মহা কয়া য়াওরিবনি। নহাশিং অসিদা বেঙ্কতা গেরেন্তী ওইনা পীবা য়াগদবা করিগুম্বা অমত্তা লৈরমদে। মখোয়গী গেরেন্তীবু মোদীনা লৌখি, ঐখোয়গী সরকারনা মখোয়গী মরুপ ওইখি। ঐখোয়না বেঙ্কশিংগী মফমদা চিংনবা অমত্তা তৌদনা নহাশিং অসিদা মুদ্র লোন পীনবা হায়খি। লুপা করোর লাক্ষ কয়াগী মুদ্র লোন ফংবদগী নহা করোর কয়ানা মশাগী পুন্সিদা অহোংবা পুরক্তুনা মশাগী লাইবক শেম্নখ্রবনি।
মরুপশিং,
ঐখোয়গে শান্নরোইশিংগী মালেমগী ইভেন্ত খুদিংদা অনৌবা রেকোর্দ থম্লে। মসিগী মনুংদগী অয়াম্বা শান্নরোইদি খুঙ্গং, লাইরবা অমসুং মিদ্দল ক্লাস ইমুংদগী ঙাক্তনি। খেলো ইন্দিয়াগী খুত্থাংদগী মখোয়গী ময়ুম মনাক্তা শান্ন-খোৎনবগী মতিক চাবা খুদোংচাবা ফংহল্লি। নুং পান ফাওনা শান্নরোই খনবা অমসুং মতমগা চুনবা ত্রেনিং ফংহন্নবা হায়দুনা মতিক চাবা থৌরাং কয়া শিল্লি। লোয়ননা, খুঙ্গং অমসুং লাইরবগী মচানুপীশিংনা লৈবাক্কী মিংচৎ পুরকপগী মশিং হেনগৎলক্লি। নহাগী পাঙ্গল লৈরবদি, মদুগী মহৈদি য়াম্না নীংথিজৈ হায়বা মসিনা তাক্লি।
মরুপশিং,
ভারতনা মালেমগী মকোক থোংবা শেন্মিৎলোন অহুমগী মনুংদা চল্লগনি হায়না ঐহাক্না ৱা ঙাঙলি, মসিগী খ্বাইদগী চাউবা কান্নবসু ঐখোয়গী নহাশিংনা ফংগনি। মালেমগী শেন্মিৎলোনগী অহুমশুবা থাক্তা লৈবা হায়বদি অফবা হকশেল, অফবা এজুকেসন ফংলগনি হায়বনি। খুদোংচাবা অমসুং থবক মশিং হেন্না লৈরগনি হায়বনি। ক্বালিতী ওফ লাইফ অমসুং ক্বালিতী ওফ প্রদক্ত হায়বনি। ইং 2047দা ঐখোয়না চাউখৎপা লৈবাক অমা করম্না ওইগনি হায়বগী ৱারোলদি ঐখোয়গী নহাশিংনা অচৌবা কেনভাস অমদা য়াত্থোক্তুনা শেম্বা তাবনি। সরকারনা মরুপ অমসুং খোংলোই অমগুম্না অদোমগীদমক্তা মতম পুম্বদা লেপকনি। চাউখৎপা ভারত অমা ওইহন্নবা নহাশিংগী ৱাখল্লোনবু অমত্তা ওইনা চুংশিনহনবদা তেংবাংগদবা লৈবাক্কী ওইবা খোঙথাং অমা হৌজিক চত্থরি। ঐহাক্না নহা খুদিংনা ভারতপু করম্না চাউখৎহনগদগে হায়বগী মতাংদা মাইগোবতা মশাগী ৱাখল্লোন থাবীরক্নবা হায়জরি। লৈবাক্কী নহাশিংগী পাঙ্গলবু প্লেতফোর্ম অমদা পুরক্নবা অচৌবা ফম্বাক অমা সরকারনা শেম্লবনি। হায়রিবা লুপ, ফম্বাক অদুদি MY ভারত হায়বসিনি। ফম্বাক অসিনা লৈবাক্কী নহা নুপীমচা অমসুং নুপামচাশিংগী ওইবা অচৌবা লুপ অমা ওইরক্লি। বিকশিৎ ভারত সঙ্কল্প য়াত্রা পাংথোক্লিবা মনুংদা, নহা কয়ানা MY ভারত্তা রেজিস্তর তৌনখ্রবনি। মসিদা শোইদনা রেজিস্তর তৌবীয়ু হায়না ঐহাক্না লৈবাক্কী নহাশিংগী মফমদা হায়জরি।
ঐহাক্কী ইমুংগী মীওইশিং,
ঙসিগী বীর বাল দিবস নুমিৎ অসিদা নহা খুদিংনা মশা তেক্ত-কায়দনা লৈনবা অহেনবা মিৎয়েং চঙবীয়ু হায়জনীংই। ভারতকী নহাশিংনা মশা মউ ফদুনা লৈবা মতমদা, মখোয়গী পুন্সি অমসুং কেরিয়রনা সুপর হিৎ ওইগনি। ভারতকী নহাশিংনা মশাগী ওইবা কাঙলোন শেমদুনা মদুবু ঙাক্তুনা চৎপা তাই। হায়বদি, নোংমদা নত্ত্রগা চয়োল অমদা শেজেল কয়ারক তৌই হায়বা খঙনা কাঙলোন শেম্বা তাই। সুপর্ফুদ মিল্লেত - শ্রী অন্নাগী মতাংদা খঙবরা, মদু ইশাগী চিঞ্জাক্কী শরুক ওইরিবরা? দিজিতেল দিতোক্স খঙবরা? দিজিতেল দিতোক্স তৌবদা মতম কয়া য়াম্না কাইথোকই? ইশাগী মেন্তেল ফিৎনেসকীদমক্তা করি পাংথোক্লি? নোংমদা মতিক চানা তুম্লিবরা নত্ত্রগা তুম্বদা কয়া খঞ্জিন্দবরা?
মসিগুম্বা ৱাহং য়াম্না লৈ। মসিনা ঙসিগী মতমগী নহাশিংদা শিংনবা ওইনা লেপ্পসু য়াওরিবনি। শিংনবা অমসু লৈরি অমসুং মসিদি ঐখোয়না লৈবাক অমা ওইনা মাইয়োক্নবা তাবনি। মসিদি নিশাগী অমসুং দ্রগকী শিংনবা অসিনি। ঐখোয়নী লৈবাক্কী নহাশিংবু শিংনবা অসিদগী কলহৌবা তাবনি। মসিগীদমক্তদি, সরকারগা লোয়ননা ইমুং অমসুং খুন্নাইগী পাঙ্গলবুসু শিজিন্নদুনা মখোয়গী থৌদাং হেনগৎহনবা তারি। ঐহাক্না ঙসি, বীর বাল দিবস অসিদা ধর্মগুরু অমসুং সোসিএল ওর্গনাইজেসন খুদিংদা লৈবাক অসিদা নিশাগী মতাংদা অচৌবা ইহৌ অমা হৌবীনবা হায়জরি। পাঙ্গল অমা অমসুং নহাগী পাঙ্গলবু মপাঙ্গল হেনগৎহনবদা সবকা প্রয়াসকী থৌওংগী মথৌ য়াম্না তাই। সবকা প্রয়াসকী লৌশিং অসি ঐখোয়গী গুরুশিংনা তাকপীরম্বনি। সবকা প্রয়াসকী ৱাখল্লোন অসিমক্না ভারতপু চাউখৎপা লৈবাক অমা ওইহনবা ঙমগনি। ঐহাক্না গুরুগী অথোইবা চৎনবী, লৈবাক্কীদমক্তা থৱাই থাখিবশিংবু নৌহৌননা ইকায় খুম্নবা উৎপা, লৈবাকপু অৱাংবা থাক্তা পুখৎপীরম্বা বীর সাহিবজাদেবু অমুক্কা হন্না কোক নোন্দুনা ইকায় খুম্নজরি। অদুগা অদোম খুদিংগী মফমদসু য়াইফ পাউজেল পীজরি।
থাগৎচরি।
ৱাহে গুরুজী খালসা, ৱাহে গুরুজী কী ফতেহ!
