মহারাস্ত্রাগী রাজ্যপাল শ্রী রমেস বাইন্স জি, চীফ মিনিস্তর শ্রী একনাথ সিন্দে জি, দিপুতি চীফ মিনিস্তর দেবেন্দ্র ফদনাবিস জি, অজিত দাদা পাৱার জি, মহারাস্ত্রা সরকারগী অতোপ্পা মিনিস্তরশিং, মীয়ামগী মীহুৎশিং, শ্রী নরসাইয়া অদাম জি অমসুং মহারাস্ত্রাগী ইনাওশিং অমসুং ইচলশিং, খুরুমজরি।
ঐনা পন্ধারপুর্চা বিথাল অমসুং সিদ্ধেশ্বর মহারাজ ইকায়খুম্নবা উৎচরি। মতম অসি হৌজিক ঐখোয় খুদিংমক কৎথোকপা মতমনি। জনুৱারি ২২ দা ঐখোয়গী ভাগবান রাম মহাক্কী অচৌবা লাইশঙদা লেংশিনবা মতম অসি পুৱারি ওইরবা তাঞ্জানি। চহি কয়া ঐখোয়গী ঈশ্বরশিং দম্বুরদা লৈবা উবগী নুংঙাইতবা অদু হৌজিক কোক্লগনি।
রাম মন্দিরদা কৎথোক্ত্রিঙৈ মমাংদা, সাধু খরগী লমজিং মখাদা ঐগী য়ামা নিয়ামসগা লোয়ননা ঐ থবক য়াম্না চিনখি অমসুং ঐনা মখোয় চেকশিন্না পাংথোকখি। মীয়ামগী থৌজালদগী, হায়রিবা নুমিৎ ১১দা ঐনা সাধনা পাংথোকপা ঙমখি অমসুং ঐগী অৱাৎপা অমতা লৈখিদে। মসিগী শেংলবা থবক অসি পাংথোক্নবা ঐনা খুদোংচাবা ফংবদা, অদোমগী থৌজালগা লোয়ননা ঐ মফম অদুদা চৎকনি।
মরুপশিং,
মহারাস্ত্রাগী নাসিক্কী পঞ্চবতিগী লমদমদগী ঐগী লাইনিং-লাইশোনগী থবক হৌরে। ঙসি রামদা কৎথোকপগী তাঞ্জা অসিদা, মহারাস্ত্রাগী ইমুং লাখ ১ হেনবগী য়ুম শঙ্গাবগী থৌরম পাংথোক্লে। ঐগী নুংঙাইবা শরুক কয়া হেনগৎকদরা নত্ত্রগা হেনগৎলোইদ্রা হৌজিক ঐঙোন্দা হায়বীয়ু? অদোমগী নুংঙাইবসু হেনগৎকদরা নত্ত্রগা হেনগৎলোইদরা ? জনুৱারি ২২দা মহারাস্ত্রাগী লায়রবা ইমুং লাখ ১ হেনবনা মখোয়না পাক্কাগী য়ুমশিংদা রাম জয়তি থানগদবা অসিদা ঐ য়াম্না হরাওই। মসি ঐখোয়না পাংথোক্কনি… মীওই খুদিংমক রাম জয়তি থানগদরা? মসি অদোম্না নুমিংদাংৱাইরমদা পাংথোক্কদরা? মসি অদোম্না ভারত শীনবা থুংনা পাংথোক্কদরা ?
হৌজিক রামগী মিংদা অদোমগী মোবাইলগী ফ্লাস অদু থারো অমসুং রাম জয়তিগী ৱাশক লৌরসি। মীওই খুদিংমক্কী মোবাইল ফ্লাস থারো। মহাক্কী খুৎতা মোবাইল পায়রিবা কনাগুম্বা অমা। অরাপ্পা মীওই কয়া লৈরি। ফ্লাস লাইত থারবা মতুংদা, মীয়াম মরক্তা মঙাল অদু উবা ফংগনি। অদোমগী খুৎশিং থাংগৎপীয়ু… জনুৱারি ২২গী নুমিদাংৱাইরমদা রাম জয়তি থানগদরা ? য়াম্না ফরে।
ঙসি, মহারাস্ত্রাগী তোঙান-তোঙানবা সহরশিংদা লুপা করোর ২০০০ রোমগী অমরুত প্রোজেকশিং হৌদোক্লে। ঐনা সোলাপুরগী মীয়াম অমসুং মহারাস্ত্রাগী ইনাওশিং অমসুং ইচলশিং নুংঙাইবা ফোঙদোকচরি। হৌজিক ইকায়খুম্নরবা চীফ মিনিস্তরনা ফোঙদোকখিবা অদু ঐ তারে, মোদীজিনা মরম ওইদুনা মহারাস্ত্রাগী চাউথোকচবা হেনগৎলে হায়না মহাক্না ফোঙদোকখি। সিন্দে জি,মসি তাবদা য়াম্না নুংঙাই অমসুং রাজনিতিৱালানা হেন্না নুংঙাই। অদুবু অশেংবদি মহারাস্ত্রাগী মীয়াম্না থবক শুবা নোম্বা কনবা অমসুং অদোমগুম্বা অফবা সরকার অমা লৈবদগী মহারাস্ত্রা মমিং চৎপনি। মরম অদুনা মহারাস্ত্রা শীনবা থুংনা থাগৎপা ফোঙদোকচরি।
মরুপশিং,
ঐখোয়গী ৱাহৈশিংগী ইকায়খুম্নবা ঙাক্নবা ভাগবান রামনা মতম পুম্নমক্তা ঐখোয়দা তাকপীখি। লায়রবা মীওই লিশিং কয়া অমসুং সোলাপুরগী শিন্মী লিশিং কয়াগী ঐখোয়না ৱাশকখিবা অদু ঙসি থবক ওইনা পাংথোকপদা ঐ হরাওই। ঙসি পি.এম অৱাস য়োজনাগী মখাদা শাবা লৈবাক অসিগী খ্বাইদগী চাউবা সোসাইতি শঙ্গারে। ঐনা অঙাং ওইরিঙৈদা অসিগুম্বা য়ুম অমদা লৈবা ফংলবদি হায়না ঐনা খনখি। ঐনা য়ুমশিং অসি উবদা ঐঙোন্দা অপেনবা ফাওরে। ইমুং লিশিং কয়াগী মঙলানশিং মঙফাওনবা মতমদা, মখোয়গী থৌজালশিং অদু ঐগী খ্বাইদগী য়াম্বা লন-থুম্নি। ঐনা প্রোজেক অসিগী উরেপ-উয়ুং তম্বা লাকপদা মতমদা, অদোমগী য়ুমশিংগী শোশিং খুৎশিন্ননবা ঐ ইশামক লাক্কনি হায়না ঐনা থাজবা অমা পীরমখি। ঙসি মোদীনা মসিগী থাজবা অসি থবক ওইনা পাংথোক্লে। অদোম্না খঙলে, মোদীগী থাজবা হায়বসি থবক ওইনা পাংথোকপগী গরেন্তিনি। মোদী কি গরেন্তি হায়বসি গরেন্তি মপুংফানা পাংথোকপনি।
লুপা লাখ কয়াগী য়ুমশিং অসি হৌজিক অদোমগী ওইরে। য়ুমশিং ফংলবা ইমুংশিংগী মীরোল কয়া য়ুম লৈতনা হিংলিঙৈদা অৱাবা কয়া মায়োক্নখিবা অদু ঐ খঙই। হায়রিবা য়ুমশিং অসি ফংবদগী, অৱাবশিং কোক্লগনি অমসুং অদোম্না উখিবা অদু অদোমগী অঙাংশিংনা উররোই হায়না ঐনা থাজৈ। জনুৱারি ২২ দা অদোম্না থানগদৌরিবা রাম জয়তিনা অদোমগী পুন্সিশিংদা লায়রবগী অমম্বা লৌথোক্নবা ইথিল অমা পীরগনি। অদোমগী পুন্সি হরাওবনা থনবা ওইরসনু, মসি ঐনা ভাগবান রামদা নিজবনি।
ঐনা ২০১৯দা রামজি উনবদা হরাওখি, মতম অদুদা মহাক মশা য়াম্না পাখি। ঙসিদি, উহৈ-ৱাহৈশিং চারবা মতুংদা, মাইপাকপগী ফল অমা ওইনা ঐগী হকচাংগী অরুম্বা হেনগৎলে। মসিসু মোদীগী গরেন্তিগী ফলনি। ঐগী নুংশিরবা ইনাওশিং অমসুং ইচলশিং, অদোম্না য়ুমশিং ফংবা মতমদা, অদোমগী পুন্সি হৌরকপদা, ঐনা খল্লিবদি- “অপ্লে জিবন সুখানে ভারত রহো, হিচ রাম প্রভুজি ইচছা আহে” ।
ঐগী ইমুং-মনুংগী মীওইশিং,
শ্রী রামগী অচুম্বা ফিদমশিং ইন্দুনা অমসুং লৈবাক অসিদা পুকচেল শেংবা লৈহন্দুনা অফবা লৈঙাক লৈহন্নবা অহানবা নুমিত্তগী ঐখোয়গী সরকারনা হোৎনদুনা লাক্লি। রামরাজ্যনা মীওই খুদিংমক্কী মতেং, মীওই খুদিংমক চাউখৎপা, মীওই খুদিংমক থাজবা অমসুং মীওই খুদিংমক্কী হোৎনবগী ইথিল পীরে। সাধু তুলসিদাস জিনা মানাসতা হায়খি মদুদি- মীওইবা লৈরবমখৈ, মখোয় হরাওগনি। করহিন কৃপানিধিনা অদোমগী তুম্বা নুংঙাইহনগনি।
মসিনা তাক্লিবদি, শ্রী রামচন্দ্র জিগী থৌজালগা লোয়ননা, মীয়াম হরাওনবা মহাক্না থবক তৌখি। মীয়ামগী সেবা তৌনবা মসিগী হেন্না চাউবা করি ইথিল লৈরবগে? মরম অদুনা ২০১৪ দা সরকার হেক শেমখিবগা ঐনা হায়খি.. ঐগী সরকার অসি লায়রবশিংদা কৎথোক্লবা সরকার অমনি। মরম অদুনা ঐখোয়না অতোপ্পা স্কিম অমগী মথংদা অতোপ্পা অমা পায়খৎলে, মসিনা লায়রবশিংগী অৱাবা হন্থহল্লে অমসুং মখোয়গী পুন্সিশিং হিংবদা লাইহল্লে।
মরুপশিং,
য়ুম অমা অমসুং তোইলেত অমদা লৈতবদগী, খোঙথাং খুদিং লায়রবশিং ইকায়বা নংলি। মসি মরুওইনা ঐখোয়গী ইমাশিং, ইচলশিং অমসুং ইচানুপীশিংগীদমক অচৌবা চৈরাক অমনি। মরম অদুনা অহানবদা ঐখোয়না লায়রবশিংগী য়ুমশিং অমসুং তোইলেতশিং শানবা মীৎয়েং চঙখি। ঐখোয়না লায়রবশিংগী তোইলেত করোর ১০ হেন্না শাখ্রে। মখোয় শুপ্নগী তোইলেতশিং খক নত্তে… ঐখোয়না ইজৎঘর অমা পীরে, ঐখোয়না ঐখোয়গী ইমাশিং অমসুং ইচলশিংগী ইকায়খুম্নবা পীরে।
ঐখোয়না লায়রবশিংগী পাক্কাগী য়ুম করোর ৪ হেন্না শাখ্রে। মফম অসিদা য়ুম অমা ফংলবা মীওই অমগী পুন্সি কয়া য়াম্না অপেনবা পোক্লমগনি হায়বা অদোম খন্দুনা য়েংউ। মসি শুপ্নগী লিশিং ৩০ খক্তনি, ঐখোয়না হান্না করোর ৪ পীখ্রে… মসিদা কয়া য়াম্না হরাওরমগনি। ৱাখল মখল অনি লৈরি। অহানবদা, মীয়াম শাওহনবা, রাজনিতিগী অরানবশিং পাংথোক্নবা মীয়াম শাওহনবনি। ঐখোয়গী লম্বীদি থবক শুবগী ইকায়খুম্নবা লৈহনবনি, ঐখোয়গী লম্বীদি শিন্মীশিং মশা মরোমদোম হিংজবা ঙমহনবনি, ঐখোয়গী লম্বীদি লায়রবশিং নুংঙাইহনবনি। অনৌবা য়ুমশিংদা লৈগদৌরিবা মীওইশিং, অদোমগী মঙলান অচৌবা ওইগদবনি, অপীকপা মঙলান মঙলোইদবনি। মসি অদোমগী মঙলানশিংগী মোদীগী থাজবনি.. মসি ঐগী ৱারেপনি।
ঙসি ঐখোয়না সহরশিংদা লৈরিবা স্লমশিংদা লৈরিবা মীওইশিং য়ুম ফংহন্নবা থবক পায়খৎলে। খুঙ্গংশিংদগী লাকপা মীওইশিং হিংনবগীদমক স্লমশিংদা লৈতনবা সরকারনা হোৎনরি। ঙসিদি অসিগুম্বা কোলোনিশিং সহরশিংদা শেমগৎলে, খুঙ্গংশিংগী মীওইশিংনা অহোংবা ভারাদা য়ুমশিং ফংলগনি। ঐখোয়না অচৌবা কেম্পেন অমা চৎথরি। মীয়াম্না থবক শুরিবা মফমগা নক্না য়ুম ফংহন্নবা ঐখোয়না থবক পায়খৎলে।
ঐগী ইমুং-মনুংগী মীওইশিং,
চহি কয়াগী মমাঙদগী ঐখোয়গী লৈবাক্তা লায়রবা মুৎথৎনবা খোল্লাউ লাউদুনা লাক্লি। অদুবু খোল্লাউশিং লাউরবসু লায়রবা মুৎথৎপা ঙমদে।
মরুপশিং,
সোলাপুর অসি শিন্মীশিংগী সহর অমা ওইবগুম, ঐগী থবক মফম অসি অহমেদবাদনি। মসিশু তেক্সতাইল শিন্মীশিংগী সহর অমনি। অহমেদবাদ অমসুং সোলাপুর নক্নবা মরী লৈনরি। ঐগা সোলাপুরগা নক্নবা মরী অমা লৈনরি। মফম অসিদগী লাকপা ইমুং কয়া অহমেদবাদতা লৈরি। ঐগী পাদমশালি ইমুংনা থা অমগী মনুংদা ঐঙোন্দা ৩-৪ রক পীজখি। মীওই অহুম ফাওবা লৈনবা মফম লৈতবা অপীকপা কা অমদা, মখোয়না ঐ চারা হেনহনখিদে। নোংমা, সোলাপুরগী পুকচেল চাওরবা মীওই অমনা, ঐঙোন্দা ফজরবা লাই অমা থারকখি। মহারাস্ত্রাগী সাতারাদগী মমিং লৈরবা উকিল অমা, লক্সমন রাওনা ঐগী পুন্সি শেম্লকপদা অচৌবা থৌদাং অমা লৌখি। ঙসি ফাওবা ঐগী থম্মোয়দা সোলাপুরনা মফম অমা কন্দুনা লৈরি।
ঐগী ইমুং-মনুংগী মীওইশিং,
চহি কয়াগী মমাঙদগী ঐখোয়গী লৈবাক্তা লায়রবা কোকহন্নবা খোল্লাউশিং লাউদুনা লাক্লবসু, হায়রিবা খোল্লাউশিং অসিনা লায়রবা কোকহনবা ঙমদ্রি। মসিগী অচৌবা মরমদি লায়রবগী মিংদা শেমখিবা স্কিমশিংগী কান্নবশিং অশেংবা বেনিফিসরিশিংনা ফংদবদগীনি। মমাঙগী সরকারশিংদা, লায়রবশিংগী শেন মিদলমেন্না মৎখি। মসিনা তাকপদি, মমাঙগী সরকারশিংগী ৱাখল্লোনশিং, থৌশিলশিং শোইরে হায়বনি। ঐখোয়গী ৱাখল্লোনদি নাখৈ শেংলে অমসুং ঐখোয়গী থৌশিলদা লায়রবশিংদা শক্তি পীবনি। ঐখোয়গী পান্দমদি ভারত চাউখৎলবা লৈবাক অমা ওইহনবনি।
সরকারগী কান্নবশিং বেনিফিসরিশিংদা হকথেংননা য়ৌহনবা, মিদলমেন য়াওহন্দবা হায়বদি মোদীগী গরেন্তিনি। ঐখোয়না বেনিফিসরিশিংগী মরক্তা মিদলমেন লৌথোক্নবা থবক পায়খৎলে। মরম অসিদগী মীওই খর ক্রিম চাবা ফংদবগী লাউরকপনি। হৌখিবা চহি ১০দা লায়রবশিং, লৌমীশিং, নুপীশিং অমসুং নহারোল বেনিফিসরিশিংগী বেঙ্ক একাউন্তশিংদা ঐখোয়না লুপা করোর লাখ ৩০ হকথেংননা হাপচিল্লে। জন ধন, আধার অমসুং মোবাইল কভচ শেমদুনা হৌজিক ফাওবা পোক্ত্রিবা অমসুং অদোমগী য়াইফ-থৌরাংগী শেনফম চাথোক্লিবা শাশিন্নবা বেনিফিসরি করোর ১০ রোম ঐখোয়না লৌথোক্লে। পোক্ত্রিবা নুপীমচা অমা লুখ্রাবী ওইগনি অমসুং সরকারদগী শেন লৌথোক্কনি। হৌজিক ফাওবা পোক্ত্রিবা মীওই অমা মহাক অনাবা ওইহন্দুনা শেন লৌথোক্কনি।
মরুপশিং,
ঐখোয়গী সরকারনা লায়রবশিংগী য়াইফনবা স্কিম কয়া পায়খৎলে অমসুং মসিগী মহৈ চাবা হৌরে। হৌখিবা চহি ৯দা ঐখোয়গী সরকারনা মীওই করোর ২৫ লায়রবা কোকহল্লে। মসি য়ামদবা মশিং নত্তে, মসি চহি ১০ কন্না হোৎনরকপগী ফলনি। মসি লায়রবশিংগী পুন্সি কৎথোক্নবা অচেৎপা ফিরেপ অমগী ফলনি। করিগুম্বা ঐখোয়না অচুম্বা , কৎথোকপা অমসুং পুকচেল শেংনা থবক তৌরবদি, অফবা ফলশিং ঐখোয়গী মাংদা উবা ফংগনি। মরম অসিনা, মখোয়শু লায়রবা মাইথিবা পীবা ঙমগনি হায়না অতোপ্পা মরুপশিংশু থাজবা ঙমগনি।
মরুপশিং,
লৈবাক অসিগী মীওই করোর ২৫ লায়রবা কোকহনখিবা অসি লৈবাক অসিগী মীয়ামগী অচৌবা মাইপাকপা অমনি। ঐনা মতম পুম্নমক্তা হায়খি মদুদি করিগুম্বা লায়রবা অমনা খুদোংচাবশিং ফংলবদি, মহাক শক্তি য়াম্না লৈদুনা মহাক্না লায়রবা মাইথিবা পীবা ঙমগনি। মরম অদুনা, ঐখোয়না লৈবাক অসিগী লায়রবশিংদা খুদোংচাবশিং পীরে অমসুং মখোয়গী খুদোংচাদবশিং কোকহন্নবা পুকচেল শেংনবা হোৎনরে। লায়রবশিংদা নোংমদা চারা অনি পীজনবগী মতাংদা অচৌবা খুদোংচাদবা অমা মতম অমদা লৈরমখি। ঙসিদা ঐখোয়গী সরকারনা লায়রবশিংদা লেম্না চেঙ পীদুনা লায়রবশিংগী অৱাবা কোকহল্লে। কোরোনা মনুংদা হৌদোকখিবা স্কিম অসি হৌজিক চহি ৫ শাংদোক্লে। মীওই করোর ২৫ লায়রবা কোকপা অসিদা ঐ অপেনবা ফাওই। লাক্লিবা চহি ৫দা, লায়রবা কোক্লবা মীওইশিং মরম কয়াদগী অমুক হন্না লায়রদনবা অমসুং অমুক হন্না অৱাবা তাদনবা ঐখোয়না মখোয়দা থৌনা পীগনি। মরম অদুনা, মখোয়না স্কিমশিংগী কান্নবশিং মখা তানা ফংগনি। মীওই করোর ২৫, খুৎ করোর ৫০ ঙসি ঐগী মরুপ ওইরকপদা ঐ অপেনবা পোকই।
মরুপশিং,
ঐখোয়না লেম্না চেঙ পীনবা থৌরাং তৌবতা নত্তনা রেসন কার্দকা মরী লৈনবা অৱাবশিংশু কোকহল্লে। মমাঙদা, মফম অমদা শেমখিবা রেসন কার্দ অতোপ্পা রাজ্য অমদা চৎনদে। করিগুম্বা মরুপ অমা অতোপ্পা রাজ্য অমদা থবক শুবা চৎপা মতমদা, মফম অদুদা চেঙ ফংবদা মহাক খুদোংচাদবা কয়া মায়োক্নগনি। ঐখোয়না লৈবাক অমা, রেসন কার্দ অমা চৎনহল্লে। মসিগা লোয়ননা রেসন কার্দ অমনা লৈবাক শীনবা থুংনা চৎনরে। করিগুম্বা সোলাপুরগী মীওই অমা চেন্নাইদা চৎলবা, মফম অদুদা ললোন-ইতিক তৌদুনা শেন তান্দুনা লৈবা মতমদা, মহাক্কী অনৌবা রেসন কার্দ অমা পীরোই। চেন্নাইদশু, মহাক্কী হান্নগী রেসন কার্দ অদুনা চেঙ ফংগনি, মসি মোদীগী গরেন্তিনি।
মরুপশিং,
করিগুম্বা মহাক নারক্লবদি মহাক কমদৌনা লায়য়েংগনি হায়না মতম পুম্নমক্তা লায়রবা মীওই খুদিংমক পুক্নিং ৱাদুনা হিংলি। করিগুম্বা লায়রবা ইমুং অমদা লায়না অমা মায়োক্নবা মতমদা, থবক কন্না শুরগা লায়বা কোকহন্নবা ইমুং অমগী থৌরাংশিং কাইরে, লায়ননা মরম ওইদুনা অমুক হন্না লায়রবা ওইহল্লে.. ইমুং পুম্নমক অমুক হন্না অৱাবা তারে। মসি খঙবদগী, ঐখোয়গী সরকারনা লেম্না লুপা লাখ ৫ ফাওবা লায়য়েংনবা অয়ুস্মান স্কিম হৌদোক্লে। ঙসিদি স্কিম অসিনা লায়রবশিংনা চাদিং তৌগদবা লুপা করোর লাখ ১ কনবা ঙম্লে।
অদোম খন্দুনা য়েংউ, করিগুম্বা ঐনা লুপা করোর লাখ ১গী স্কিম অমা লাউথোকপা মতমদা, পাউ-চেশিংদা নত্ত্রগা তি.ভি ফাওদবা নুমিৎ তরুক্নি হেদলাইনশিংদা য়াওগনি। মসি মোদীগী গরেন্তিগী শক্তিনি.. স্কিম অসিনা অদোমগী ফুরিৎখাউগী লুপা করোর লাখ ১ কনবা ঙম্লে অমসুং পুন্সি কয়া কল্লে অমসুং ঙসি সরকার অসিনা পি.এম জন ঔসাধি কেন্দ্রশিংদা হিদাক-লাংথকশিং মমল চাদা ৮০ তানা পীরে। মসিনা মরম ওইদুনা, লায়রবশিংনা চাদিং তৌগদবা লুপা করোর লিশিং ৩০ কনবা ঙম্লে। ঈশিং অমোৎপা থকপনা লায়রশিং লায়না নাহনবগী অচৌবা মরম অমনি। মরম অদুনা ঐখোয়গী সরকারনা জল জিবন মিসন পায়খৎতুনা য়ুমথোং খুদিং তোতি ঈশিং ফংহল্লে।
মরুপশিং,
স্কিমশিং অসিগী মশিং য়াম্লবা বেনিফিসরিশিং লায়রবা অমসুং ত্রাইবেল ফুরুপকী মীওইশিংনি। লায়রবশিং য়ুম অমসুং তোইলেত লৈগদবনি, মৈ শমগদবনি, ঈশিং ফংগদবনি, অসিগুম্বা খুদোংচাবশিং অসি খুন্নাইগী অচুম্বা পুরক্নবা মোদীগী গরেন্তিনি। অসিগুম্বা খুন্নাইগী অচুম্বগী মঙলান অসি সাইন্ত রবিদাস জিনা উখ্রে। মীচং-মীখাই নাইদনা খুদোংচাবা পীবগী মতাংদা কবিরদাস জিনা হায়রমখি। মসিগী খুন্নাইগী অচুম্বগী লম্বী অসি জয়তিবা ফুলে-সাবিত্রি বাই ফুলে অমসুং বাবা সাহেব অম্বেদকারনা তাক্লম্লে।
ঐগী ইমুং-মনুংগী মীওইশিং,
লায়রবশিংগী মনুংদা খ্বাইদগী লায়রবশিং শেন-থুমগী ঙাক্লৌ পীবা হায়বসি মোদীগী থাজবনি। চহি ১০ গী মমাঙদা, লায়রবশিং লাইফ ইন্সুরেসনগী মরমদা খনখিদে। ঙসিদি লায়রবা মীওই অমা লুপা লাখ ২ ফাওবা এক্সিদেন্ত অমসুং লাইফ ইন্সুরেন্সকী খুদোংচাবা ফংলে। মসিগী ইন্সুরেন্সকী খুদোংচাবা অসি ফংলবা মতুংদা, মখোয়গী ইমুং-মনুংগী মীওইশিং অৱাবা নংলবা লায়রবা ইমুংশিং লুপা করোর লিশিং ১৬ ফংখ্রে অমসুং শেনফমশিং অসি ইন্সুরেন্সকী মওংদা মখোয়গী একাউন্তশিংদা হাপচিনখিবনি।
মরুপশিং,
ঙসিদি, বেঙ্কতা গরেন্তি পীনবা লৈতবা মীওইশিং মোদীগী গরেন্তিগী কান্নবা ফংলে। ২০১৪ ফাওবদা বেঙ্ক একাউন্ত অমা ফাওবা লৈতবা মরুপ কয়া লৈরমখি। মখোয়গী বেঙ্ক একাউন্তশিং লৈত্রবদি, কমদৌনা মখোয় বেঙ্কশিংদগী লোন ফংগনি। জন ধন য়োজনা পায়খৎতুনা, ঐখোয়গী সরকারনা লায়রবা মীওই করোর ৫০ লৈবাক অসিগী বেঙ্কশিংগা শম্নহল্লে। ঙসি পি.এম শ্বানিধিগী বেনিফিসরি লিশিং ১০ বেঙ্কশিংদগী মতেং ফংলে অমসুং মফম অসিদা তোকন খর পীনবগী খুদোংচাবা ঐনা ফংলে।
লৈবাক শীনবা থুংনা লম্বীগী মতাইদা মনা-মশিং য়োল্লিবশিং, শঙ্গোম য়োল্লিবা মীওইশিং, পাউ-চে য়োল্লিবশিং, শান্নপোৎশিং য়োল্লিবশিং, লৈ য়োল্লিবা মীওইশিং.. কনাগুম্বনা অসিগুম্বা মরুপ লাখ কয়াগী মরমদা মমাঙদা হংখিদ্রি অমসুং কনা অমতা মখোয়গী মতেং পাংনবা থোরকখিদ্রি। কনা অমতনা হংবীদ্রবা মীওইশিং মোদীনা মখোয় লাৎলি। ঙসিদা অহানবা ওইনা মোদীনা মখোয়গী মরমদা হংলে আমসুং মখোয়গী মতেং পাংনবা থোরক্লে। হান্না হায়রিবা মরুপশিং অসি বেঙ্কতা মখোয়গী গরেন্তি পীনবা লৈতবদগী শেন্দোয় য়াম্না চাউনা কৈথেলদগী লোনশিং লৌখি। মোদীনা মখোয়গী গরেন্তি ওইখি, মসি ঐগী গরেন্তিনি, মখোয়দা লোন পীনবা ঐনা বেঙ্কশিংদা হায়খি, হায়রিবা লায়রবা মীওইশিং অসিনা লোন শিংলক্কনি, ঐনা লায়রবদা থাজবা লৈরি। ঙসিদি লম্বী মতাইদা পোৎফম ফম্লিবশিং গরেন্তি য়াওদনা বেঙ্কশিংদগী লোনশিং ফংলে। অসিগুম্বা মরুপশিংদা হৌজিক ফাওবদা লুপা করোর লিশিং কয়াগী শেনফমশিং পীখ্রে।
ঐগী ইমুং-মনুংগী মীওইশিং,
সোলাপুর উদোগশিংগী সহর অমনি, থবক শুবা নোম্বা কনবা শিন্মী ইনাওশিং অমসুং ইচলশিংগী সহর অমনি। মফম অসিদা মীওই কয়া য়ুম-কৈ শাবা অমসুং অপীকপা অমসুং ময়াই ওইবা উদোগশিংদা থবক তৌরি। সোলাপুরগী তেক্সতাইল উদোগ অসি লৈবাক অসিদা অমসুং মালেমদা মমিং চৎলি। সোলাপুর চাদার মশক খঙদবা কনা লৈরিবগে? লৈবাক অসিদা য়ুনিফোর্ম তুবা এম.এস.এম.ইশিংগী খ্বাইদগী চাউবা ক্লস্তর সোলাপুরদা লৈরি। মপান লৈবাকশিংদগী ফাওবা মফম অসিদা য়ুনিফোর্মশিংগী মশিং য়াম্লবা ওর্দরশিং লাকই হায়বা ঐ খঙলে।
মরুপশিং,
ফি তুবগী থবকশিং মীরোল কয়া পাংথোক্তুনা লাক্লি। মীরোল কয়া হোঙখ্রে, ফেসন হোঙলে, অদুবু ফি তুরিবা মীওইশিংগী মরমদা কনাগুম্বা অমনা খনবীরিবগে? মখোয় ঐগী বিশ্বকর্মা মরুপনি হায়না ঐনা খল্লি। অসিগুম্বা বিশ্বকর্মা মরুপশিংগী পুন্সিদা অহোংবা পুরক্নবা ঐখোয়না বিশ্বকর্মা য়োজনা শেম্লে। করিগুম্বা মতমদা অদোমনা ঐগী ফুরিৎ উরমলগনি, সোলাপুরগী মরুপশিংগী মনুংদা অমনা হায়রিবা ফুরিৎশিং অদু তুবনি অমসুং মখোয়না ঐঙোন্দা থারকপনি। ঐনা লৌররোই হায়রবা ফাওবদা মহাক ফুরিৎ থারকখি। নোংমা ঐনা মহাক্কা ৱারি শানখি অমসুং ইনাও, ঐঙোন্দা ফুরিৎ থারক্কনু হায়খি। সার থারক্কনি হায়খি, ঐনা লৈবগী মহুত্তা ঙসি ফাওবা ঐনা ফুরিৎ ফংলি।
মরুপশি,
বিশ্বকর্মা য়োজনাগী মখাদা হায়রিবা মরুপশিংদা ত্রেনিং পীরে অমসুং অনৌবা খুৎলায়শিং পীরে। মখা তানা মখোয়গী থবক চাউখৎনবা গরেন্তি য়াওদনা বেঙ্কশিংদগী লুপা লাখ কয়াগী লোনশিং পীরে। মরম অদুনা, সোলাপুরগী বিশ্বকর্মা মরুপশিং অথুবদা স্কিম অসি শরুক য়ানবা ঐনা হায়জরি। হৌজিক বিকাস ভারত সংকল্প যাত্রা খুঙ্গং খুদিং অমসুং লৈকায় খুদিং য়ৌরে। মসি মোদীগী গরেন্তি য়াওরবা গারি অমনি। মসিদগী বিশ্বকর্মা য়োজনা য়াওনা সরকারগী স্কিম খুদিংমক অদোম্না ফংবা ঙমগনি।
ঐগী ইমুং-মনুংগী মীওইশিং,
চাউখৎলবা ভারত অমা শেমগৎনবা, মশাগী ওক্নবা পুথোকচবা ভারত অমা ওইবা দরকার ওই। মশা মরোমদোম লেপচবা ঙম্বা ভারত অমা শেমগৎপদা ঐখোয়গী স্মোল, মাইক্রো অমসুং কোতেচ ইন্দস্ত্রিনা অচৌবা থৌদাং অমা লৌরি। মরম অদুনা কেন্দ্র সরকারনা লেপ্তনা এম.এস.এম.ইশিং অমসুং অপীকপা উদোগশিং শৌগৎলি। কোরোনা মনুংদা এম.এস.এম.ইশিং অৱাবা থেংনবা মতমদা, সরকারনা মখোয়দা লুপা করোর কয়াগী মতেং পীখ্রে। মসিনা অপীকপা উদোগশিং মশিং য়াম্লবা থবক মাঙবদগী কনবা ঙমখি।
ঙসি সরকার অসিনা লৈবাক শীনবা থুংনা ৱান দিস্ত্রিক ৱান প্রদক স্কিমশু চৎনরে। ঐখোয়গী অপীকপা উদোগশিংগী মরমদা খঙহন্নবা ভোকেল ফোর লোকেলগী কেম্পেনশু পাংথোক্লি। ঙসিদা মালেমদা ভারতকী মিংচৎ হেনগৎলে অমসুং মেদ ইন ইন্দিয়া পোৎথোকশিংগী থাজবশু হেনগৎলে। কেন্দ্র সরকারনা পায়খৎলিবা কেম্পেনশিং অসিগী কান্নবশিং সোলাপুরগী মীয়াম অমসুং মফম অসিগী উদোগশিং কান্নবা ফংলে।
ঐগী ইমুং-মনুংগী মীওইশিং,
ঐখোয়গী কেন্দ্র সরকারগী অহুমশুবা তার্মদা, ভারত মালেমগী মকোক থোংবা ইকোনোমি অহুমদা য়াওরগনি। লাক্লিবা ঐগী তার্মদা ঐনা ভারত মালেমগী মকোক থোংবা লৈবাক অহুমগী মনুং চনহল্লগনি হাবনা লৈবাক অসিগী মীয়ামদা ঐনা থাজবা পীরি, মোদীনা মসিগী থাজবা পীরি। অদোমগী থাজবগা লোয়ননা মসিগী ঐগী থাজবা অসি থবক ওইনা পাংথোক্কনি হায়না ঐনা খল্লি। অদোমগী বরশিংগী শক্তি অমা লৈরি। শেন-থুমগী ফিবম ফগৎহনবদা মহারাস্ত্রাগী সোলাপুরগুম্বা ঐখোয়গী সহর কয়াগী অচৌবা থৌদাং অমা লৈরি।
দবল ইঞ্জিন সরকারনা হায়রিবা সহরশিং অসিদা মখা তানা ঈশিং অমসুং সিৱেজগুম্বগী খুদোংচাবশিং ফগৎহল্লে। সহরশিং অফবা লম্বীশিং, রেলৱেশিং অমসুং এয়রৱেজশিংনা শম্নহনবগী থবক য়াংনা পায়খৎলি। সান্ত দ্যানেশ্বর মহারাজ পালখি মার্গ নত্ত্রগা সান্ত তুকারাম পালখি মার্গ ওইগেরা, হায়রিবা সহরশিংদা থবক য়াংনা পায়খৎলি। রত্নগিরি, কোলহাপুর অমসুং সোলাপুরগী মরক্তা লেন মরিগী হায়ৱে শেমগৎপগী থবক অথুবা মতমদা লোইশিল্লগনি। অদোমগী ইমুং-মনুংগী মীওই খুদিংমক্না অসিগুম্বা থবক্কী ঐখোয়দা বর পীরে।
অসিগুম্বা থৌজালশিং অসিগা লোয়ননা, মসিগী থাজবা অসিগা লোয়ননা, ঙসি লেংদ্রবা য়ুমশিং ফংলবা মরুপশিংগী মফমদা নুংঙাইবা ফোঙদোকচরি। ঐগা লোয়ননা হায়মিন্নসি, অদোমগী খুৎ অনিমক থাগৎসি অমসুং হায়সি-
ভারত ইমানা য়াইফরে- খোঞ্জেল অসি মহারাস্ত্রা শীনবা থুংনা তাহনগদবনি-
ভারত ইমানা য়াইফরে
ভারত ইমানা য়াইফরে
ভারত ইমানা য়াইফরে
অদোম্না জয়কারা লাউবা মতমদা, মসিগী জয়কারা অসিনা লৈবাক অসিগী লায়রবা মীওই খুদিংমক্তা অনৌবা থাজবা অমা লৈনবা শক্তি পীরে।
অদোম ঙমখৈ লৈতনা থাগৎচরি।
