কেন্দ্র মন্ত্রী মন্দলগী ঐহাক্কী মরুপ শ্রী ভুপেন্দ্র য়াদবজী, শ্রী অশ্বিনী কুমার চৌবেজী, অতোপ্পা লৈবাক্তগী লাক্লিবা মীথুংলেন, রাজ্যগী মন্ত্রী, তোঙানবা মীহুৎ কয়া অমসুং ইবেম্মা অমসুং ইবুংঙোশিং!
ঐহাক অয়ুক্কী পুং 6তগী থোকপনি, জংগল য়েংলুরবা মতুংদা লাক্কে হায়না ঐহাক্না খনবনি, অদুবু লাকপদা পুং অমা থেংবগীদমক্তা ঐহাক্না অহানবদা খ্বাই পুম্নমক্না ঙাকপীনবা হায়জরি। অদোম্না ঐহাকপু ঙাইবা তাখিবা অসিগীদমক্তা অদোম্না ঙাকপীনবা হায়জরি। ঐহাক্না হায়জনিংবদি, ঐখোয়না কৈগী মশিং অমা য়ৌবা ঙম্লিবা, ঐখোয়না ঙসি উবা ফংলিবা শক্তম, ঐখোয়গী মসিগুম্বা ইমুং-মনুং অসিনা চাউথোরক্লিবা অসি য়াম্না শীংথানিংঙাই ওইরবা মিৎকুপ অমনি। ঐখোয়না ইশাগী মফমদা লেপ্তুনা কৈশিং অসিবু ইকায় খুম্নবা অমুক্তা উৎসি হায়না ঐহাক্না পুম্নমক্কী মফমদা হায়জরি। পুম্নমকপু থাগৎচরি।
মরুপশিং,
ঐখোয়না পুম্নমক্না ঙসিদি অখন্নবা তাঙ্কক অমগী শাখি ওইরি। প্রোজেক্ত তাইগরনা চহি 50 মপুং ফারে। প্রোজেক্ত তাইগরগী মায় পাকপা অসি ভারত খক্কী নত্তনা মালেম পুম্বগী চাউথোকচনিংঙাই ওইবা মিৎকুপ্নি। ভারতনা কৈ কনবতা নত্তনা মখোয়না মশা মরেং ফন্না হিংবগী অফবা ইকোসীস্তেম অমসু পীরি। ঐখোয়না নিংতম্বগী চহি 75 মপুং ফারকপা মতমদা মালেমগী কৈগী অপুনবা মশিংগী চাউরাকপা 75% ভারত্তা লৈবসি ঐখোয়গী ওইবা হেন্না নুংঙাইবা ৱাফম অমনি। ভারতকী তাইগর রিজর্বশিংগী অপুনবা পাক চাউবনা স্ক্বার কিলোমীতর 75 ওইরিবা, অদুগা মমাংগী চহি 11-12তা কৈগী মশিংনা 75% হেনগৎখিবা অসিসু য়াম্না তান চান্নবা ৱাফম অমা ওইরি। মসিদি ঐখোয়না পুন্না হোৎনমিন্নবদগী ওইথোকপা ঙম্লিবনি অদুনা ঐহাক্না লৈবাক পুম্ববু থাগৎচরি।
লম্লক্কী শা-ঙাশিংবু নুংশিজবা মীয়ামগী মরক্তা ৱাহং অমা তত্তনা হংনরি, ৱাহং অদুদি, কৈ লৈবা লৈবাক কয়াগী কৈগী মশিংনা অসুম অসুম হন্থরক্লিবা তাল্লক অসিদা ভারতকী কৈগী মশিংনা মতৌ করম্না হেনগৎলক্লিবনো হায়বসিনি। মসিগী পাউখুমদি ভারতকী চৎনবী, ভারতকী সংস্কৃতী অমসুং ভারতকী খুন্নাইগী বাইও-দাইবর্সিতীগী মরী লৈনবা ৱাখল্লোন, মহৌশাগী মতাংদা চেনবা ৱাখল্লোন অমসুং ঐখোয়গী নুংগী ৱাখল্লোন অসিনি, ঐখোয়গী মায় পাকপগী মরম খুদিংমক হায়রিবশিং অসিদা লোত্তুনা য়াওরবনি। ঐখোয়না ইকোলোজী অমসুং ইকোনোমীগী মরক্তা খেন্নবা লৈ হায়না খন্দে, অনিসিগী মরক্তা নিংথীনা লৈমিন্নবগী ৱাখল্লোনবু শৌগৎলি। ঐখোয়গী লৈবাক অসিদা কৈগা মরী লৈনবা চহি লিশিং কয়া শুরবা পুৱারী লৈ। মধ্য প্রদেশতা ফংখিবা চহি লিশিং তরা শুরবা নুংদা হকপা লাইয়েকশিংদা কৈগী মমি উবা ফংই। সেন্ত্রেল ইন্দিয়াদা লৈবা ভারিয়া অমসুং মহারাস্ত্রদা লৈবা ৱর্লীশিংনা কৈবু নিংই, লাৎলি। ঐখোয়গী লৈবাক্কী ত্রাইবেল কয়া কৈবু মখোয়গী মরুপ্নি হায়না খল্লি। মচিন মনাওনি খল্লি। অদুগা ইমা দুর্গাদি কৈসু তোংবনি।
মরুপশিং,
ভারত অসিদি মহৌশাবু ঙাক শেনবনা নাৎনি, চৎনবীনি খনবা লৈবাক অমনি। মসিনা মরম ওইদুনা, ঐখোয়না ৱাইল্দলাইফ কঞ্জর্বেসনগী মতাংদা তোপ তোপ্পা মায় পাকপা কয়া ফংলিবনি। মালেমগী অপুনবা লমগী শরুক্কী শুপ্নগী 2.4% লৈবা ভারতনা শকখঙলবা গ্লোবেল বাইওদাইবর্সিতীগী 8%গী শরুক তম্লিবনি। ভারত অসিদি কৈশিংনা মনিং তম্না লৈবা খ্বাইদগী চাউবা লৈবাক্নি। এসিয়াতিক ইলিফেন্ত লিশিং কুনথ্রা লৈদুনা, ঐখোয়না মালেমদা এসিয়াতিক ইলিফেন্তশিং মনিং তম্না লৈবা খ্বাইদগী চাউবা লৈবাক্নি। ঐখোয়গী লৈবাক্তা শমুগন্ধাগী অপুনবা মশিং চাউরাক্না লিশিং অহুম লৈবা অসিনা ঐখোয়বু মালেমদা মচি অমা পানবা শমুগন্ধা খ্বাইদগী য়াম্না লৈবা লৈবাকসু ওইহল্লি। মালেমদা এসিয়াতিক নোংশা লৈবা অমত্তা ঙাইরবা লৈবাক অসি ঐখোয়গী লৈবাক্নি। নোংশা মশিং অসি ইং 2015দা 525 লৈরম্বদগী ইং 2020দা 675 য়ৌখ্রে। ঐখোয়গী কবোকৈ মশিং অসিসু শুপ্নগী চহি 4দা 60% হেনবগী চাংদা হেনগৎলে। গঙ্গা শেংদোকপগুম্বা থবক কয়া পায়খৎলিবা অসিনা বাইও-দাইবর্সিতীদসু তেংবাংলি। খুদোংথীনিংঙাই ওইবা ফিভমদা লৈরে খন্নরম্বা ঈশিংগী জিব খরগী ফিভম হৌজিক য়াম্না ফগৎলে। মায় পাকপশিং অসিদি সবকা প্রয়াস, মীয়াম্না শরুক য়াবা অমসুং ঙাক-শেনবা, য়োকখৎপগী চৎনবী অমা লৈরিবা অসিনা পুরকপনি।
লম্লক্কী শা-ঙাশিংনা মনিং তম্না অমসুং মশিং য়াম্না লৈনবা ইকোসীস্তেমগী ফিভম য়াম্না ফবগী মথৌ তাই। মসিমক ভারত্তা পাংথোক্লি। ভারতনা নিংতম্বগী চহি 75 মপুং ফারকপগী নুংঙাইবা ফোংদোকপা মতমদা, ভারতনা রামসর সাইতশিংগী পরিংদা ৱেতলেন্দ 11 হাপচিনখি। মসিনা রামসর সাইতকী অপুনবা মশিংবু 75 য়ৌহনখি। ভারতকী উমংগী পাক চাউবসু হেনগৎলক্লি। ভারতনা ইং 2019গা চাংদম্নবা মতমদা ইং 2020দা উমং অমসুং উ হৌবা মফমগী স্ক্বার কিম্লোমীতর লিশিং অনিগা চাম্মা হেন্না পাক চাউবা মফম হাপচিনখি। ভারতকী কম্ম্যুনিতী রিজর্ব মশিংনা মমাংগী দিকেদতা নিফু মরিদগী চাম্মা হেন্না হেনগৎখি। ইকো-সেন্সিতিব জোন্নি হায়না খঙনরবা মফমশিংগী অকোয়বদা লৈবা নেস্নেল পার্ক অমসুং সেংচুএরীশিংগী মশিংসু মাপন্দগী চামরি হুম্ফুনিপান্দা দিকেদ অমদা হেনগৎখি।
মরুপশিং,
ৱাইল্দলাইফ কঞ্জর্বেসন মতাংদা হোৎনরবা কয়া অসিদা ঐহাক্না গুজরাত্তা মতম শাংনা লৈরকপগী এক্সপেরিএন্সকী কান্নবসু ফংখি। ঐহাক্না গুজরাতকী মুখ্য মন্ত্রী ওইরিঙৈদা ঐখোয়না নোংশাগী মতাংদা থবক তৌখি। ঐখোয়না জিব অমগী পুন্সি কনগে হায়বরবদি জিওগ্রাফিদা অকক্নবা থমদুনা থবক পায়খৎপনা থোইদোকপা মতেং পাংদে হায়বা ঐহাক্না খঙবা ঙমখ্রবনি। মসিগীদমক্তা ঐখোয়না লোকেল মীয়াম অমসুং শা-ঙাশিংগী মরক্তা তোঙানবা মরী অমা শাগৎপা তাই। মরী অসি থম্মোইগী মরীসু ওইগদবনি, শেন্মিৎলোনগী মরীসু ওইগদবনি। মরম অদুনা ঐখোয়না গুজরাত্তা বন্য প্রানী মিত্র প্রোগ্রাম পায়খৎখি। শাদানবগী থৌওং য়েংশিন্নবা ঐখোয়না খুদোংচাবা শীনখি, শেলগী মনা ফাওবা পীখি। ঐখোয়না গিরগী নোংশাশিংগী রিহেবিলিতেসন সেন্তর অমসু হাংখি। ঐখোয়না গিরগী লমদমদা নুপী বীত গার্দ অমসুং ফোরেস্তর ফাওবা ফোরেস্ত দিপার্তমেন্ততা হাপখি। নোংশা লৈরবদি ঐখোয় লৈগনি, ঐখোয় লৈরবদি নোংশা লৈগনি হায়বা ৱাখল্লোনগী মপাঙ্গল লেপ্তনা কনখৎহনখি। গিরদা হৌজিক তুরিজম, ইকো-তুরিজমগী অচৌবা ইকো সীস্তেম অমা ওইরিবসি অদোমসু ঙসি উরবনি।
মরুপশিং,
গিরদা লৌখিবা খোঙথাং কয়াগা মান্ননা প্রোজেক্ত তাইগরনা মায় পাকপগী মরম কয়া লৈ। মসিদগী তুরিজমগী থবকশিংসু হেনগৎলে অমসুং ঐখোয়না এৱিয়র্নেস প্রোগ্রাম চলায়খিবা অদুনা তাইগর রিজর্বশিংদা মেন-এনিমেল কনফ্লিক থোকপগী মশিংসু য়াম্না হনথখি। বিগ কেৎসনা মরম ওইদুনা তাইগর রিজর্বশিংদা লাকপা লমকোয়বশিংগী মশিং হেনগৎখি, মসিনা লোকেলগী শেন্মিৎলোনসু ফগৎহল্লি। বিগ কেৎস লৈবদগী মফম খুদিংগী লোকেলগী মীয়ামগী পুন্সি অমসুং মফমশিং অসিগী ইকোলোজীদসু অফবা শাফু পীরি।
মরুপশিং,
ভারতকী বাইও-দাইবর্সিতীবু হেন্না ফগৎহন্নবগীদমক্তা ঐখোয়না মশক থোকপা থবক অমসু পায়খৎখি। চীতাহ অসি ভারতগী দিকেদ কয়াগী মমাংদা মাঙখ্রবনি। ঐখোয়না মসিগুম্বা নিংথীরবা বিগ কেৎ অসিবু নামিবিয়া অমসুং খা অফিরকাদগী ভার্তা পুরকখি। মসিদি বিগ কেৎকী খ্বাইদগী অহানবা মায় পাকপা ত্রান্স-কন্তিনেন্তেল ত্রান্সলোকেসনগী থৌওংনি। কুনো নেস্নেল পার্ক্তা নুমিৎ খরনিগী মমাংদা, নুংশিরবা চীতাহ মচা 4 পোকখ্রে। মসিনা হায়বদি, চাউরাক্না চহি 75কী মতুংদা ভারত্তা চীতা অমা পোকএ হায়বনি। মসি য়াম্না য়াইফরবা অহৌবা অমনি। বাইও-দাইবর্সিতী ঙাক শেনবদা মদুবু হেন্না ফগৎহনবা অমসুং মালেম্না তেংবাংনবগী মরু ওইবা কয়া য়াম্না লৈবগে হায়বদু মসিনা খুদম ওইরি।
মরুপশিং,
ৱাইল্দলাইফপু ঙাক শেনবা হায়বসি লৈবাক অমখক্কী মথৌ নত্তে, মসিদি মালেমগী ওইবা হীরম্নি। মসিগীদমক্তা ইন্তর্নেস্নেল এল্লাইএন্স লৈবা হায়বসি হৌজিক মতমগী খ্বাইদগী মথৌ তাবা হীরম অমনি। ইং 2019গী মালেমগী কৈগী নুমিত্তা এসিয়াদা পোচিং অমসুং ইল্লিগেল ৱাইল্দলাইফ ত্রেদ তৌবশিংগী মাইয়োক্তা এল্লাইএন্স অমা শেমসি হায়না ঐহাক্না হৌদোকখি। ইন্তর্নেস্নেল বিগ কেত এল্লাইএন্স অসি ৱাহৌদোক অসিগী মহৈনি। মসিনা বিগ কেতকা মরী লৈনবা অপুনবা ইকোসীস্তেমগীদমক্তা শেল-থুম অমসুং তেক্নিকেলগী তঙাই ফদবশিং খোমগৎপদা লাইহনগনি। ভারত অমসুং অতোপ্পা লৈবাক কয়াগী এক্সপেরিএন্সশিংনা কঞ্জর্বেসন অমসুং প্রোতেক্সনগী এজেন্দাশিং চৎনহনবদা হেন্না লাইহনগনি। ইন্তর্নেস্নেল বিগ কেত এল্লাইএন্সনা মালেমগী মমিং লৈরবা বিগ কেত 7 ঙাক শেনবদা মিৎয়েং চঙগনি। কৈ, নোংশা, কবোকৈ, স্নো লিওপার্দ, প্যুমা, জাগুআর অমসুং চীতা লৈবা লৈবাকশিংনা এল্লাইএন্স অসিদা শরুক য়াগনি। মেম্বর লৈবাকশিংনা এল্লাইএন্স অসিগী খুত্থাংদা মশাগী এক্সপেরিএন্স শেয়র তৌবা য়াগনি, মরুপ লৈবাক্কী মতেং নিংথীনা পাংবা ঙমগনি। মসিগী এল্লাইএন্স অসিনা ত্রেনিং, রিসর্চ অমসুং কেপাসিতী বিলদিংদসু মিৎয়েং চঙগনি। ঐখোয়না পুন্দুনা মখোয়গুম্বা জিবশিংবু মুৎখিবদগী কনসি, মখোয়গীদমক্তা তেক্ত-কায়দবা অমসুং অফবা ইকোসীস্তেম অমা শেমসি।
মরুপশিং,
ঐখোয়গী মহৌশা অমসুং অকোয়বগী ফিভম্না তেক্ত-কায়দবা অমসুং ঐখোয়গী বাইও-দাইবর্সিতীনা লেপ্তনা চাউথোকপা মতমদা ঐখোয় মীওইবগী তুংগী মতম্না অফবা মতম অমা ওইগনি। মসি ঐখোয় পুম্নমক্কী থৌদাংনি, মালেম পুম্বগী থৌদাংনি। ঐখোয়না G20 প্রসিদেন্সী মনুংদা ৱাখল্লোন অসিমকপু লেপ্তনা শৌগৎলি। G20গী মোত্তো, ৱান আর্থ, ৱান ফেমিলী, ৱান ফ্যুচর অসিনসু ৱারোল অসিমক তাক্লি, পাউজেল অসিমক পীরি। ঐখোয়না ইশাগীদমক্তা অচৌবা পান্দম অমসু COP26তা থমখ্রে। পুম্নমক্না তেংবাংনবা মতমদা ঐখোয়না মহৌশা অমসুং অকোয়বগী ফিভম ঙাক শেনবগী পান্দম ফংবা ঙমগনি।
মরুপশিং,
ঙসিগী থৌরম অসিদা মীরমগী মীথুংলেন কয়া অমসু লাক্লি, অতোপ্পা রাজ্যগী মীওই কয়া অমসু লাক্লি, ঐহাক্না মখোয়গী মফমদা করিগুম্বা অমা অমুক্কা হন্না হায়জবা পাম্মি। অদোম পুম্নমক্না মফম অসিগী কান্নবা অমা শোইদনা লৌফম থোকই। সহ্যাদ্রিগী মফম অসি ৱেস্তর্ন ঘাৎকী মফম্নি, মফমসিদা ত্রাইব মশিং য়াম্না লৈ। মখোয়না মতম কয়াগী মমাংদগী কৈগা লোয়ননা বাইও-দাইবর্সিতীবু ঙাক শেন্দুনা লাক্লি। মখোয়গী পুন্সি, চৎনবী অসিদি মালেমগী মফমদা পীবা য়াবা য়াম্না চাউবা খুদম অমা ওইগনি। মহৌশাদগী লৌবা চাংদুমক মহৌশাদা হন্দোকপা, খল অসি মতৌ করম্না ঙাক্কনি, মসিদি ত্রাইবেলশিং অসিগী চৎনবীদা য়েংলুবা মতমদা খঙবা ঙমগনি। ঐহাক্না মফমসিদা লাক্ত্রিঙৈ মমাংদা, মখোয়গুম্বা মরুপ কয়া অমগা ৱারী শারম্বনি, ঐহাক্না থেংলক্লিবা অসিসু মদুগী মরমদগীনি। ওস্কার ফংখিবা দি ইলিফেন্ত হ্বিস্পরর দোক্যুমেন্তরী অদুসু মহৌশা অমসুং জিবগী মরক্তা লৈবা নিংথীরবা মরী লৈনবগী ঐখোয়গী চৎনবী উৎপনি। মিসন লাইফ, হায়বদি লাইফস্তাইল ফোর ইনভাইরনমেন্তকী পান্দম খঙনবা হোৎনবদা ত্রাইবেল খুন্নাইগী পুন্সি মহিংদগী মতেং য়াম্না ফংগনি। ঐখোয়গী ত্রাইবেলশিংগী পুন্সি মহিং অমসুং চৎনবী কয়া অসিদগী করিগুম্বা খরদি ইশাগী লৈবাক, খুন্নাইগীদমক্তা পুদুনা হনবীয়ু হায়না ঐহাক্না হায়জনিংই। ঙসিগী থৌরম অসিদা লাকপীবগীদমক্তা ঐহাক্না পুম্নমকপু অমুক্কা হন্না থাগৎচরি অমসুং কৈগী অনৌবা মশিং অমা ঐখোয়গী মাঙদা লাক্লিবা অসিদগী হেনবা মশিং ঐখোয়না লাক্কদৌরিবা মতমশিংদা ফংগনি অমসুং অনৌবা মায় পাকপা কয়া শোইদনা ফংগনি হায়না ঐহাক্না মালেমগী মফমদা থাজবা পীজরি।
হন্না হন্না থাগৎচরি!
