কেরলাগী রাজ্যপাল শ্রী অরিফ মোহমদ খান, কেরলাগী চীফ মিনিস্তর শ্রী পিনরায়ী বিজয়ান, ঐগী মরুপ রাজ্য মন্ত্রী ভি. মুরালীধরন অমসুং ইসরোগী ইমুং-মনুংগী মেম্বর খুদিংমক, খুরুমজরি !
এস্ত্রোনোতশিং ওইনা খল্লবশিং ইকায়খুম্নবা উৎপা ওইনা ঐখোয় লেপখৎতুনা থাগৎপা ফোঙদোকসি। ভারত মাতা কি জয়!
ভারত মাতা কি জয় !
ভারত মাতা কি জয় !
ভারত মাতা কি জয় !
অদোম থাগৎচরি !
লৈবাক অমগী চাউখৎপগী খোঙচত্তা হৌজিক্কী অমসুং তুংগী মীরোলশিং মশক তাকপা তাঞ্জা খর লৈরি। হৌজিক অসিগী ভারতকী অদুগুম্বা তাঞ্জানি। হৌজিক্কী মতম খক্তগী মশক তাকপতা নত্তনা তুংগী মীরোলশিংগীশু মশক তাক্কনি। ঐখোয়গী হৌজিক্কী মীরোল অসি লাইবক য়াম্না ফরে, ঙসিগী নুমিৎ অসি পুৱারি ওইনা লৈবাক অসিনা কংফাল, অতিয়া, ঈশিং অমসুং সুন্দ্রংদা মাইপাকপগীদমক হৌজিক্কী মীরোলনা চাউথোকচগদবা থৌরম অমনি। মতম খরগী মমাঙদা অযোধ্যাদগী অনৌবা ‘কাল চক্র’ অমা হৌরে অমসুং অনৌবা কাল চক্রদা, মালেমগী থবক-থৌরমশিংদা ভারতনা মখা তানা লৈবাকশিংগী তৌবা ঙম্বা হেনগৎলক্লি অমসুং মসি ঐখোয়গী স্পেসকী থবক্তা ময়েক শেংনা উরে।
মরুপশিং,
হৌখিবা চহিদা ভারতকী চন্দ্রয়ান মাইপাক্তুনা ভারতনা মালেমদা থাগী খা মেরুদা তাবা অহানবা লৈবাক ওইরে। ঙসি সিবশক্তি পোইন্তনা মালেম শীনবা থুংনা ভারতকী তৌবা ঙম্বা উৎলে। হৌজিক বিক্রম সারাভাই স্পেস সেন্তরদা অতোপ্পা পুৱারি ওইরবা খোঙচৎ অমা উরে। মতম খরগী মমাঙদা, পুৱারি ওইরবা থৌরম অমা ওইনা গগনয়ান পেসেঞ্জর মরি এস্ত্রোনোত ওইনা খল্লে। এস্ত্রোনোত ওইনা খল্লবা মরি শুপ্নগী মমিং মরি নত্ত্রগা লনাই মীওই মরি নত্তে, মখোয় ভারতমচা করোর ১৪০গী অনিংবশিং স্পেসতা পুরিবা ‘শক্তি’ মরিনি। চহি ৪০গী মতুংদা, ভারতমচা অমা স্পেসতা চৎলগনি। হৌজিক, মতম মশিং থিবা হৌরে অমসুং রোক্কেত অসি ঐখোয়গীনি। এস্ত্রোনোতশিং ওইনা খল্লবশিং উনবা অমসুং মীয়ামদা মশক তাকপদা অপেনবা ফাওই। লৈবাক শীনবা থুংবগী মহুৎশীন্দুনা প্রধান মন্ত্রীনা মখোয়দা য়াইফ-পাউজেল পীখি। ২১শুবা চহিচাদা ভারতকী মাইপাকপদা ঙসি অদোমগী মিংশু য়াওরে।
অদোম ঙসিগী ভারত্তা থাজবা লৈরে। এস্ত্রোনোত ওইনা খল্লবশিং অসি ঙসিগী ভারতকী থাজবা, থৌনা, কৎথোকপা অমসুং থকশি-খাসিগী খুদমনি। ভারত চাউথোকচবা পোক্নবা অমসুং স্পেসতা ভারতকী মচু অহুমগী ফিরাল পাইহন্নবা অদোম্না চহি কয়া অহিং অমসুং নুংথিল থবক তৌরক্লি। শিংনবা খুদিংমক মায়োক্নবগী থৌনা উৎলিবা অমসুং কৈদৌঙৈদা মাই লৈদুনা চেন্দবা ভারতকী অমৃত মীরোলগী নখোয়না মহুৎ শীল্লি। অদোমগী অকনবা ত্রেনিংদা য়োগনা মরুওইবা থৌদাং অমা লৌরি। মিসন অসিগী হকচাং অমসুং পুক্নিং-ৱাখল ফবা দরকার ওই। লৈবাক অসিনা অদোমগী মফমদা য়াইফ-পাউজেল পীরি অমসুং বর পীরি। গগনয়ান প্রোজেক্কী থবক তৌরিবা ইসরোগী স্তাফ ত্রেন্নরশিংদা ঐগী য়াইফ-পাউজেল পীজরি।
মসিগা লোয়না নুংনাঙবা খর ফোঙদোকপা ঐনা পাম্মী। ৱাফম খর মীওই খরগী ওইনা লাংতক্নবা ওইগনি। মসি লৈবাক অসিগী মীয়াম অমসুং লৈবাক অসিগী মেদিয়াদা ঐনা পুকচেল শেংনা হায়জবনি, মরুপ মরি অসি হৌখিবা চহি খরদগী লেপ্তনা সাধনা পাংথোক্তুনা লাকপনি। মালেমদা মখোয়গী মাইথোং উত্তনা লাকপনি। মসিদগী হেন্না পাংথোক্কদবা লৈরি। মখোয় খুদোংথিবা চাংয়েং কয়া পাংথোক্কদবা লৈরি। মখোয়গী হকচাং অমসুং পুক্নিং-ৱাখ। চেকশিন্না লৈগদবনি। মখোয় মরি হৌজিক সেলেব্রিতিশিং ওইরে, মসি ঐখোয়গী লৈবাক্কী হৌনবীনি।
মহাক্না চৎলুবা মফমশিংদা, মীওই খরনা মহাক্কী ওতোগ্রাফ লৌনবা, মহাক্কা সেলফি নম্নবা হায়রক্কনি। হৌজিক ফাওবা মেদিয়াগী মীওই খর স্তিকশিংগা লোয়ননা লেপখৎলক্লগনি। অদোমগী অঙাং ওইরিঙৈদা করি তৌরকখি, কমদৌনা অদোম মফম অসিদা চঙলকখি? করি স্কুলদা তম্লকখি। অসিগুম্বা ফিবম অসিনা অদোমগী সাধনাগী মফম অদুদা অপনবা পীগনি।
হৌজিক অশেংবা ৱারি হৌরে হায়বসি শেংলবা ৱাফমনি। পুক্নিং চোইথোক্তনা মখোয়না মখা তানা ত্রেনিং চৎথবা ঙম্নবা এস্ত্রোনোত ওইনা খল্লবশিং অমসুং মখোয়গী ইমুং-মনুংগী মীওইশিংদা মতেং পাংগদবনি। মখোয়গী খুত্তা মচু অহুমগী ফিরাল পাইরে, ভারতমচা করোর ১৪০গী মঙলান লৈরে, ঐখোয় পুম্নমক্কী ৱাশক লৈরে। লৈবাক অসিনা মতেং পীবা য়াম্না মরুওই হায়না ঐনা খল্লি। ঐগী মেদিয়াগী মরুপশিংগী মতেংশু য়াম্না দরকার ওই। ঐখোয়না মখা তানা ফজনা থবক পাংথোকপা য়ানবা হৌজিক ফাওবা মখোয়গী মমিং লাউথোক্ত্রি। হৌজিক মখোয়দা করিগুম্বা খুদোংচাদবা খর হেনগৎলকপা য়াই। লাক্লো, ঐখোয় সেলফি অমা নমসি হায়রপা য়ারি- অদু ওইরবদি করি তৌগনি ? অসিগুম্বা থবকশিংদগী ঐখোয় লাপ্না লৈগদবনি।
মরুপশিং,
থৌরম অসিগী মমাঙদা,গগনয়ানগী মরমদা ঐঙোন্দা অকু্প্পা মরোলশিং পাউদম্লে। তোঙান-তোঙানবা খুৎলায়শিংগী মরমদা ই-পাউ খঙহল্লে। মখোয়গী থবকশিংগী মরমদা খঙহল্লে। গগনয়ানগী খুৎলায় অয়াম্বা ভারত্তা শাবদা ৈ ঐ হরাওই। গগনয়ানগী শেম-শাবগী হরাওবা অসিগা ভারতনা মালেমদা ৩শুবা খ্বাইদগী চাউবা ইকোনোমি ওইগদৌরিবা অসিগা মপা চানরে। ঙসি মীয়ামদা কৎথোক্লিবা প্রোজেকশিং অসিনা অনৌবা থবকশিং ফংহল্লগনি অমসুং ভারতকী মিংচৎ হেনগৎহল্লগনি।
মরুপশিং,
ঐখোয়গী স্পেস সেক্তরদা ভারতকী নারী শক্তিগী মরুওইবা মফম অমা পীবদা ঐ হরাওই। চন্দ্রয়ান নত্ত্রগা গগনয়ান ওইগেরা, নুপী সাইন্তিস্তশিং য়াওদনা অসিগুম্বা প্রোজেক অমতা পায়খৎপা ওইথোক্লোই। ইসোরদা নুপী ৫০০ হেন্না লুচিংবগী থৌদাং লৌরি। মফম অসিদা তিল্লিবা নুপী সাইন্তিস্তশিং, তেক্নিসিয়ানশিং অমসুং ইঞ্জিনিয়ারশিং ঐনা থাগৎচরি। মসিগীদমক নুপাশিং শাওরোইদবনি, মখোয় থাগৎচরি।
মরুপশিং,
ভারতকী স্পেস সেক্তরনা লৌরিবা অচৌবা থৌদাং মফম অসিদা য়াম্না খন্নদ্রি। স্পেস সেক্তরদা ভারতকী মাইপাকপা অসি লৈবাক অসিগী হৌরক্লিবা নহারোলশিংদা বিগ্যানগী ৱাখল্লোন চেলহন্নবা মরু হুনবনি। ইসরোগী মাইপাকপশিং অসিনা ঙসিগী অঙাংশিংদা কমদৌনা সাইন্তিস্ত অমা ওইরক্কনি হায়বগী অনৌবা ৱাখল্লোন অমা পীরে। রোক্কেতকী কাউন্দাউন্না ভারতকী অঙাং লাখ কয়া ইথিল পীরে অমসুং ঙসি চেগী প্লেনশিং শারিবশিং অদোমগুম্না সাইন্তিস্তশিং ওইরক্নবা মঙ মঙলি। নহারোলশিংগী খাংবা কনবা অসি লৈবাক অমগী লন্নি।
করম্বা মতমদা চন্দ্রয়ান-২ তাখিবগে হায়বা ঐ নিংশিংলি। চন্দ্রয়ান-২ তাখিবা মতমদা লৈবাক অসিগী অঙাং খুদিংমক পারা অমা তমখি, অদুগা হৌখিবা চহিগী ওগস্ত ২৩ দা চন্দ্রয়ান-৩ মাইপাক্না তাখিবদা নহারোলশিং অনৌবা থৌনানা পীক থনখি। নুমিৎ অসি হৌজিক স্পেস দে হায়না থৌরম পাংথোক্লে। লৈবাক অসিনা স্পেস সেক্তরদা রেকোর্দ কয়া থম্লে। অহানবা হোৎনবদা লৈবাক অসিনা মার্স য়ৌবা ঙম্লে, মিসন অমদা সেতেল্লাইত ১০০ হেন্না থাগৎপা ঙম্লে অমসুং মাইপাক্না সোলার প্রোব অদিত্যা এল-১ পৃথিবীদগী কিলোমিতর লাখ ১৫ লাপ্না নুমিৎকী ওর্বিত্তা থমখ্রে। অসিগুম্বা থবক মাইপাকপা অসি লৈবাক খর খক্তনি। ২০২৪গী অহানবা চয়েলদা এক্সপো-সেত অমসুং ইন্সাত-৩দিএস মাইপাকখ্রে।
মরুপশিং,
ইসরো তিম্না তুংগী ওইথোকপা য়াবশিংগী অনৌবা থোংশিং হাংদোক্লে। ইস্তিমেত অমগী মতুংইন্না, মথং চহি ১০দা ভারতকী স্পেস ইকোনোমি শরুক মঙা হেনগৎলগনি অমসুং দোল্লর বিল্লিয়ন ৪৪ য়ৌরগনি। ভারত স্পেসকী লমদা মালেমগী ললোন-ইতিক্কী মফম অমা ওইরক্লে। লাক্লিবা নুমিৎ খরনিদা, ভারত অমুক হন্না থাদা চৎলগনি। থাগী লৈমায়দগী সেম্পলশিং পুরক্নবা অনৌবা অশা লৈরি। ভেনসতা চৎনবা পান্দম থম্লি। ২০৩৫ ফাওবগী মনুংদা ভারতনা মশাগী স্পেস স্তেসন লৈরগনি। অমৃত কাল অসিদা, ভারতকী রোক্কেত অমদা ভারতমচা অমা থাগী লৈমায়দা তারগনি।
মরুপশিং,
২১শুবা চহিচাদা ভারতকী চাউখৎলকপদা, ঙসিদি ভারতকী তৌবা ঙম্বা উবদা মালেম্না ঙক্নরে। ২০১৪গী মমাঙগা চাংদম্নবদা হৌখিবা চহি ১০দা স্পেসকী লমদা ভারতকী অনৌবা মাইপাকপা কয়া লৈরে। মমাঙগী সরকারশিংগী মতমদা সেতেল্লাইত ৩৩ থাগৎপদা লৈবাক অসিনা সেতেল্লাইত ৪০০ থাগৎখি অমসুং নহারোলশিংগী স্পেস স্তার্দঅপশিং মশিং ২-৩ দগী হৌজিক ২০০ হেন্না লৈরে। নহারোলশিং অসিগী পান্দম, হৈথোই-শিংথোইবা অমসুং মখোয়গী ওন্ত্রেপ্রেনিউয়রশিং থাগৎনিঙাইনি। স্পেসকী লমদা অওনবশিং পুরকপা অসিনা সেক্তর অসিদা ইথিল পীরে অমসুং হন্দক স্পেস সেক্তরদা এফ.দি.আই চাদা ১০০ অয়াবা পীরে। মসিগী অওনবা অসিগা লোয়ননা, মালেমদা খ্বাইদগী চাউবা স্পেস ইন্সতিতুৎশিং ভারত্তা মখোয়গী ইন্সতিতুৎশিং লিংখৎপা য়ারে অমসুং মখোয়গী হৈথোই-শিংথোইবা উৎনবা নহারোলশিংদা খুদোংচাবা অমা পীরে।
মরুপশিং,
২০৪৭ দা ভারত চাউখৎলবা লৈবাক অমা ওইহন্নবা ঐখোয় পুন্না ৱাশক লৌগদবনি। মসিগী ৱাশক অসি থবক ওইনা পাংথোকপদা স্পেস সেক্তরগী অচৌবা থৌদাং লৈরি। বিকসিত ভারত অমা ওইহন্নবদা স্পেস সেক্তরনা মরুওইবা থৌদাং লৌগনি। স্পেস সাইন্স অসি শুপ্নগী রোক্কেত সাইন্স খক নত্তে, মসি খ্বাইদগী চাউবা সোসিএল সাইন্স অমশুনি। খুন্নাইনা স্পেস তেক্নোলোজিদগী কান্নবশিং ফংলে। লৌউ-শিংউ, নোং-চিং, কলামেতি ৱার্নিং, ইথৈগা মরী লৈনবা, নেভিগেসন মেপশিং অমসুং ঙামীশিংগী নেভিক সিস্তেমদা স্পেস তেক্নোলোজি শীজিন্নরে। ঙমখৈ ঙাক-শেনবা, লাইরিক-লাইশু অমসুং হকশেলগী লমদা স্পেস সাইন্স শীজিন্নরে। অদোম, ইসরো অমসুং অপুনবা স্পেস সেক্তরনা বিকসিত ভারত অমা শেমগৎপদা অচৌবা থৌদাং অমা লৌরি। ঐনা অমুক হন্না ময়াম পুম্নমক থাগৎচরি। ভারতমচা করোর ১৪০গী মহুৎশীন্দুনা ঐনা তিম গগনয়ান থাগৎচরি। ঐনা অমুক হন্না ঐগী য়াইফ-পাউজেল পীজরি। অদোম থাগৎচরি।
