থৌরম অসিদা শরুক য়ারিবা ঐহাক্কী কেবিনেৎকী মরুপ, অনুরাগ থাকুরজী, রাজ্যশিংগী য়ুথ এফিয়র্স অমসুং স্পোর্ত মন্ত্রী পুম্নমক, অতোপ্পা মীথুংলেন অমসুং ইবেম্ম অমদি ইবুংঙোশিং!
হন্দক চহিগী স্পোর্ত মন্ত্রীশিংগী কনফরেন্স, মসিগী চিন্তন শিবির অসি মনিপুরদা পাংথোক্লিবা অসিদা ঐহাক্না নুংঙাইবা ফাওই। অৱাং নোংপোক্তগী থোক্লকপা শান্নরোই কয়ানা ভারতকী তিরঙ্গাগী মায় ঙাকখি, লৈবাক্কীদমক্তা মেদল কয়া লৌখি। লৈবাক্কী শান্ন-খোৎনবগী চৎনবী অসিবু হেন্না খুমাং চাউশিলহনবদা অৱাং নোংপোক লমদম অমসুং মনিপুরগী মশক থোকপা থৌদাং লৈরি। মফমসিগী শগোল কাংজৈ, থাং তা, য়ুবী লাকপী অমসুং হিয়াং তান্নবনচিংবা য়েলহৌমীগী মশান্না অসিসু য়াম্না তোপ-তোপ্পি। ঐখোয়না মনিপুরগী উ-লাওবী য়েংবা মতমদা ঐখোয়না কবদ্দীগী শক্তম উবা ফংই। মফমসিগী হিয়াং তান্নবনা কেরলাগী হি লমজেল নিংশিংহল্লি। অদুগা পোলোগা মনিপুরগা পুৱারী ওইরবা মরী অমসু লৈনরি। মসিনা হায়বদি, অৱাং নোংপোক্না ভারতকী সংস্কৃতীগী তোঙান-তোঙানবা মচু লৈরিবা অসিদা অনৌবা মচু অমা হাপ্পগুম্না, লৈবাক্কী স্পোর্তকী দাইবর্সিতী অসিদা তোঙানবা মথেল অমা হাপ্লি। লৈবাক্কী মফম খুদিংদগী লাক্লিবা স্পোর্ত মন্ত্রী খুদিংনা মনিপুরদগী য়াম্না তম্লগা হনগনি হায়না ঐহাক্না থাজবা থম্লি। মনিপুর মীয়ামগী থৌগল্লোনশিংনা অদোম্না মফমসিদা নুংঙাইনা লৈগনি হায়বগী ঐহাক্না থাজবসু থম্লি। ঙসিগী চিন্তন শিবির অসিদা শরুক য়ারিবা মীথুংলেনশিংবু ঐহাক্না তরাম্না ওকচরি অমসুং ইকায় খুম্নবা উৎচরি।
মরুপশিং,
চিন্তন শিবির খুদিংমক চিন্তন্দগী হৌই, ৱাখল মুন্না খন্দুনা মখা চত্থৈ অমসুং ৱাখল নিংথীনা খন্নদুনা লোইশিল্লি। মসিনা হায়বদি, অহানবদা মমি উই, মথংদা নিংথীনা খঙলকই, অদুগা অরোয়বদা থবক্তা ওন্থোকই হায়বনি। মরম অদুনা, চিন্তন শিবির অসিদা তুংগী পান্দমশিংগী মতাংদা খন্ন-নৈনবুদি পাংথোক্লগনি, লোয়ননা মমাংগী কনফরেন্সপুসু হঙ্গৎনা নৈনগনি। অদোম্না নিংশিংলমগনি, ঐখোয়না মমাঙদা ইং 2022দা কেবরিয়াদা উন্নখিবা মতমদা, মরু ওইবা হীরম কয়াগী মতাংদা ঐখোয়না খন্ন-নৈনখি। ঐখোয়না তুংগীদমক্তা খন্দুনা রোদমেপ শেম্বা অমসুং শান্নবগী অফবা ইকোসীস্তেম শেম্নবা য়ানবা পুরকখি। ঐখোয়না স্পোর্ত সেক্তরদা কেন্দ্র অমসুং রাজ্য সরকারগী মরক্তা শরুক য়াবা হেনগৎহনবগী মতাংদা ৱারী শাখি। ঐখোয়না মাইকৈ অসিদা কয়া য়াম্না চঙশিল্লে হায়বা ইম্ফালদা অদুমক য়েংবীরো। অদুগা ঐখোয়না হঙ্গৎনা য়েংশিল্লিবা অসি পোলিসী অমসুং প্রোগ্রামখক্তদা অখন্নবা থম্লোইদবনি হায়বসি নিংশিংবীয়ু। ঐখোয়না ইনফ্রাস্ত্রকচর শেমগৎপদসু মিৎয়েং চঙগদবনি অদুগা মমাংগী চহি অসিদা শান্ন-খোৎনবগী লমদা চাউখৎলকখিবশিংদসু মিৎয়েং চঙগদবনি।
মরুপশিং,
মমাংগী হৌখিবা চহি অমসিদা ভারতকী এথলেতিক্স অমসুং শান্নরোইশিংনা মালেমগী শান্ন-খোৎনবগী তৌরমশিংদা মশক থোকপা পরফোর্মেন্স উৎখি। ঐখোয়না মায় পাকপশিং অসিগীদমক্তা নুংঙাইবা ফোংদোকপগা লোয়ননা ঐখোয়গী শান্নরোইশিংদা অহেনবা মতেং করম্না পীগনি হায়বগী মতাংদা খন্নবা য়াই। লাক্কদৌরিবা স্ক্বাশ ৱর্ল্দ কপ, হোক্কী এসিয়ন চেম্পয়নশিপ ত্রোফী, এসিয়ন য়ুথ অমসুং জুনিয়র ৱেৎলিফতিং চেম্পিয়নশিপকুম্বা থৌরমশিং অসিদা অদোমগী মন্ত্রালয় অমসুং বিভাগশিংনা হোৎনরিবশিং অসিগী পরিক্ষা লৌগদৌরিবনি। হোই, শান্নরোইশিংনা মশাগী ওইনা শেম শাজরি, অদুবু মসিগুম্বা তুর্নামেন্ত অসিগা মরী লৈননা ঐখোয়গী মন্ত্রালয়সু তোঙানবা এপ্রোচ অমদা থবক তৌবা তাবনি। হোক্কী অমসুং ফুতবোলগুম্বা মশান্নদা মেন-তু-মেন মার্কিং তৌবগুম্না, অদোমসু মেৎচ তু মেৎচ মার্কিং তৌবা তাবনি, তুর্নামেন্ত খুদিংগী অনৌবা থৌরাং, লাল্লোং য়াৎপা তাবনি। অদোম্না তুর্নামেন্ত খুদিংগী মতুং ইন্না ইনফ্রাস্ত্রকচর, স্পোর্ত ত্রেনিংদা মিৎয়েং চঙবা তাবনি। অতেনবা, ময়াই ওইরপ অমসুং অশাংবা মতমগী পান্দমশিং থম্বা তাবনি।
মরুপশিং,
মশান্না খুদিংগী অখন্নবা ৱাফম লৈজৈ। শান্নরোই অমনা মশানা হোৎনদুনা ফিত্নেস ফংবদি য়াই, অদুবু অফবা পরফোর্মেন্স পাংথোক্নবগীদমক্তা মহাক্না লেপ্তনা শান্নবগী মথৌদি তাই। মরম অদুনা। লোকেল লেভেলদা তুর্নামেন্ত য়াম্না শীনবগী মথৌ তাই। মসিদগী শান্নরোইশিংনা অনৌবা ৱাফম কয়া তম্বা ফংগনি। স্পোর্তিং তেলেন্ত অমত্তা মিৎয়েংদগী চিত্থহন্দবা হায়বসি স্পোর্ত মন্ত্রীগী থৌদাংনি।
মরুপশিং,
ঐখোয়গী লৈবাক্কী অফবা শান্নরোইশিংদা ক্বালিতী স্পোর্ত ইনফ্রাস্ত্রকচর পীবা হায়বসি ঐখোয় পুম্নমক্কী থৌদাংনি। মসিগীদমক্তা কেন্দ্র অমসুং রাজ্য সরকারনা পুন্না হোৎনমিন্নবা তাই। খেলো ইন্দিয়া স্কিম্না জিলাগী থাক্তা স্পোর্ত ইনফ্রাস্ত্রকচরবু য়াম্না ফগৎহল্লে। অদুবু, ঐখোয়না মসিমক ব্লোক লেভেলদসু পাংথোকপা তাবনি। মসিদা প্রাইভেত সেক্তর য়াওনা স্তেকহোলদর পুম্নমক্না শরুক য়াবা হায়বসি য়াম্না মরু ওইরি। নেস্নেল য়ুথ ফেস্তিবেলগী ৱাফম অমসু লৈ। মসিবু হেন্না কান্নহন্নবগীদমক্তা ঐখোয়না অনৌবা মিৎয়েংগা লোয়ননা ৱাখল খনবা তারে। রাজ্যশিংদা মসিগুম্বা থৌরম পাংথোক্লিবশিং অসি পাংথোক্তবা য়াদে হায়না পাংথোকপখক্তি ওইহল্লোইদবনি। ঐখোয়না হীরম অসিদা মাইকৈ খুদিংদগী হোৎনশনবা মতমদা, ভারতনা শান্ন-খোৎনবদা মকোক থোংবা লৈবাক অমা ওইরকপা ঙমগনি।
মরুপশিং,
অৱাং নোংপোক লমদমদা স্পোর্তকীদমক্তা পায়খৎলিবা থবকশিং অসিদগী অদোম্না ইথিল য়াম্না ফংবা য়াই। স্পোর্ত ইনফ্রাস্ত্রকচরগা মরী লৈনবা লুপা করোর 400কী প্রোজেক্তশিংনা ঙসিদি অৱাং নোংপোক লমদম্বু চাউখৎপগী অনৌবা মাইকৈদা পুশিল্লি। ইম্ফালগী নেস্নেল স্পোর্ত য়ুনিভর্সিতীনা লাক্কদৌরিবা মতমশিংদা ভারত পুম্বগী নহাশিংদা অনৌবা খুদোংচাবা পীগনি। খেলো ইন্দিয়া স্কিম অমসুং TOPSকুম্বা খোংথাংশিংনা হীরমসিদা অচৌবা থৌদাং য়ারি। অৱাং নোংপোক্কী জিলা খুদিংদা য়ামদ্রবদা খেলো ইন্দিয়া সেন্তর 2, অমসুং রাজ্য খুদিংদা খেলো ইন্দিয়া স্তেত সেন্তর ওফ এক্সলেন্স শেমগৎলি। মসিগুম্বা হোৎনজমনশিং অসিনা শান্ন-খোৎনবগী লমদা অনৌবা ভারত অমগী ফম্বাক ওইরগনি, লৈবাক্কী অনৌবা শক্তাক অমা পীগনি। অদোম্না ইশা ইশাগী রাজ্যশিংদা মসিগুম্বা চাউখৎ থৌরাং পুরকপা তাবনি। ঙসিগী চিন্তন শিবির অসিনা মাইকৈ অসিদা মশক থোকপা থৌদাং য়াগনি হায়না ঐহাক্না থাজবা লৈ। থাজবা অসিগা লোয়ননা ঐহাক্না পুম্নমকপু থাগৎচরি।
