উত্তর প্রদেসকী রাজ্যপাল অনন্দি বেন পতেল, চীফ মিনিস্তর য়োগী অদিত্যানাথ জি, মন্ত্রীমন্দলগী ঐগী মরুপ দিফেন্স মিনিস্তর রাজনাথ জি, উত্তর প্রদেসকী দিপুতি চীফ মিনিস্তর, লেজিসলেতিপ এশেমব্লিগী স্পিকর, অতোপ্পা শক্নাইরবশিং, ভারত অমসুং মপান লৈবাকশিংদগী লাকপা উদোগকী মীহুৎশিং অমসুং ঐগী ইমুং-মনুংগী মীওইশিং।
চাউখৎলবা ভারত অমগীদমক চাউখৎলবা উত্তর প্রদেস অমা শেমগৎনবা ৱাশক্কা লোয়ননা ঙসি ঐখোয় মফম অসিদা পুল্লে। তেক্নোলোজিগী খুৎথাংদা উত্তর প্রদেসকী এশেমব্লি সিত ২০০ হেনবগী মীওই লাখ কয়া থৌরম অসিদা শরুক য়ারে। তেক্নোলোজিগী মতেংদগী ঙসিগী থৌরম অসি শরুক য়ারিবা ঐগী ইমুং-মনুংগী মীওইশিং ঐনা তরাম্না ওকচরি। উত্তর প্রদেসতা শেন থাদবা অমসুং থবকশিং ফংহনবগী মতাংদা অসিগুম্বা ফিবম অমা লাক্কনি হায়বা ঙসিদগী চহি ৭-৮গী মমাঙদা ৱাখলদা ফাওবা শাগৎখিদে। মফম খুদিংমক্তা মমাঙদা উত্তর প্রদেসতা মীহাৎ-মীপুনগী থৌদোকশিং চাং য়াম্না ৱাংনা থোকখি। মতম অদুদা, কনাগুম্বা অমনা উত্তর প্রদেস চাউখৎহনগদবনি হায়বদা, কনাগুম্বা অমতনা তাবীখিদে, থাজখিদে। ঙসিদি উত্তর প্রদেসতা লুপা করোর লাখ কয়া থাদরক্লে। ঐ উত্তর প্রদেসকী এম.পি অমনি। ঐগী উত্তর প্রদেসতা করিগুম্বা খর পাংথোকপদা ঐ হরাওই। ঙসি প্রোজেক লিশিং কয়াগী থবকশিং হৌদোক্লে। শেমগৎকদৌরিবা উদোগশিং অমসুং ফেক্তরিশিংনা উত্তর প্রদেসতা অহোংবা পুরক্লগনি। ঐনা ইনভেস্তরশিং অমসুং মরুওইনা উত্তর প্রদেসকী নহারোলশিংদা হরাওবা ফোঙদোকচরি।
মরুপশিং
উত্তর প্রদেসতা চহি ৭ দবল ইঞ্জিন সরকার লৈরক্লে। হৌখিবা চহি ৭গী মতম অসিগী মনুংদা ‘রেদ তেপ কলচর’গী মহুৎ ‘রেদ কার্পেত কলচর’না শীল্লে। হৌখিবা চহি ৭তা উত্তর প্রদেসতা মীহাৎ-মীপুন হন্থরে অমসুং ললোন-ইতিক চাউখৎলে। হৌখিবা চহি ৭ তা, উত্তর প্রদেসতা ললোন-ইতিক, চাউখৎপা অমসুং থাজবগী ফিবম অমা শেমগৎলে। করিগুম্বা তশেংনা অহোংবা পুরক্কে হায়না চপ য়ুংনা খল্লবদি মসি কনাগুম্বা অমতনা থিংবা ঙম্লোই হায়বা দবল ইঞ্জিন সরকারনা উৎলে। হায়রিবা মতম অসিগী মনুংদা রাজ্য অসিদগী মপান্দা পোৎ-চৈ থাদোকপা শরুক অনি হেনগৎলে। ঙসি উত্তর প্রদেসতা মৈ পুথোকপা নত্ত্রগা ত্রান্সমিসনগী থবক শিংথাবা য়ানা য়াম্না ফগৎলে। লৈবাক অসিদা উত্তর প্রদেস অসি এক্সপ্রেসৱেশিং অমসুং ইন্তরনেসনেল এয়রপোর্তশিং মশিং খ্বাইদগী য়াম্না লৈবা রাজ্যনি। ঙসি উত্তর প্রদেসতা লৈবাক অসিগী অহানবা রেপিদ রেল চেল্লে। রাজ্য অসিদা ইস্তর্ন অমসুং ৱেস্তর্ন পেরিফেরেল এক্সপ্রেসৱেগী অয়াম্বা শরুক উত্তর প্রদেস ফাওদুনা চৎলে। উত্তর প্রদেসকী মশিং য়াম্লবা তুরেলশিং কার্গো জহাজশিং হোল্লে। মসিনা মরম ওইদুনা রাজ্য অসিদা তুরেলগী ঈশিং লম্বীশিং শীজিন্নবদগী চৎথোক-চৎশিনগী খুদোংচাবা হেনগৎহল্লে অমসুং চৎথোক-চৎশিন হেন্না লাইহল্লে।
মরুপশিং,
ঙসিগী থৌরম অসি ঐনা শেন থাদরকপগী ৱাফম খক্তদা য়েংদে। শেন্দোং হেন্না ফংগনি হায়বগী থাজবশিং মফম অসিদা শরুক য়ারিবা ইনভেস্তর ময়ামগী মরক্তা লৈরিবা থাজবা অদু উবা ফংলে। প্রোজেকশিং অসিদা তুংগী য়াইফনবা অফবা পান্দম অমা য়াওরি অমসুং ইনভেস্তরশিংগী থাজবগী মঙাল অমা ওইরি। ঙসি অদোম্না মালেমগী লৈবাক অমদা চৎলুবা মতমদা, হান্না ওইখিদ্রিবা মওংদা ভারতকী মরমদা থাজবা উবা ফংগনি। মালেমগী ওইনা, মমাঙদা অমুক্তা ওইখিদ্রিবা মওংদা ভারতকী মরমদা ফনা খল্লে। ভারতকী চাউখৎপগী ৱারিদা লৈবাক খুদিংমক থাজবা ফাওরে। ঙসি লৈবাক শীনবা থুংনা ‘মোদী কি গরেন্তি’ পাক-শন্না ঙাংনরবশু, মালেম্না ভারত অসি হেন্না শেন্দোং ফংনবগী গরেন্তি অমা ওইনা উরে। মীখল মতম য়ৌরকপদা সরকারনা নৌনা শেন থাদবা তোকপগী চৎনবী অদু ঐখোয়না উরে। ঙসিগী ভারতনা মদুগী চৎনবী অদু থাদোক্লে। ঙসিদি মালেম শীনবা থুংবগী ইনভেস্তরশিংনা সরকারগী থৌশিলশিং অমসুং তুংদু-লৈতাবদা মপুংফানা থাজবা লৈরে। মসিগা চপ মান্নবা থাজবা অসি উত্তর প্রদেস অমসুং লাখনৌদশু উবা ফংলে।
ঐগী ইমুং-মনুংগী মীওইশিং,
ঐনা চাউখৎলবা ভারতকী মরমদা ৱারি শারকপা মতমদা, মসিদা অনৌবা ৱাখল্লোন অমসুং অনৌবা মাইকৈ দরকার ওই। নিংতম্বা ফংলবা চহি কয়াগী মতুংদা ফাওবা লৈবাক অসিদা অসিগুম্বা মখলগী ৱাখল্লোন অসি লৈখিদে। মদুগী ৱাখল্লোন অদু করিনো? মীয়াম মমিংতগী ওইনা হিংহনবা অমসুং চাউখৎপা থোং মান্নদবা হান্নগী ফিবম অদু লৈবাক অমা চাউখৎনবগীদমক চুনদে। উত্তর প্রদেসশু মসিগী থৌওং অসিগী অৱাবা নংখি। মমাঙগী সরকারশিংনা খনখি মদুদি করিগুম্বা মখোয়না খুদোংচাবশিং শেমগৎলবদি মদু অচৌবা সহর ২-৪ দা ওইগদবনি, করিগুম্বা মখোয়না থবক ফংহল্লবদি মদু খনগৎলবা সহর খর ওইগদবনি। মসিদা য়াম্না কন্না হোৎনবগী দরকার ওইদবনা মসি য়াম্না লাইনা পাংথোকখি। থৌওং অসিদগী লৈবাক অসিগী য়াম্লবা শরুক চাউখৎতনা লৈখি। মসি উত্তর প্রদেসতশু মমাঙদা থেংনখ্রে। অদুবু অরিবা ৱাখল্লোন অসি দবল ইঞ্জিন সরকারনা হোঙদোক্লে। উত্তর প্রদেসকী ইমুং খুদিংমক্কী পুন্সি হিংবদা লাইনবা ঐখোয়না থবক পায়খৎলে। পুন্সি অসি হিংবদা লাইবা মতমদা, মশা মরোমদোম ললোন-ইতিক পাংথোকপা লাইহনগনি। পি.এম অৱাস য়োজনাগী মখাদা পাক্কাগী য়ুম করোর ৪ শারে অমসুং মশাগী য়ুম লৈনবগী মখোয়গী মঙলানশিং মঙফাউন্নবা সহরগী মিদল-ক্লাস ইমুংশিংদা লুপা করোর লিশিং ৭গী শেন্থং পীখ্রে। মসিগী খুৎথাংদা উত্তর প্রদেসগী ইমুং লাখ ১.৫ য়াওনা বেনিফিসরি ইমুং লাখ ২৫ শেন্দোয়গী রিবেত ফংলে। ২০১৪দা ইনকম তেক্স কোমথোক্নবগী লিমিত লুপা লাখ ২ ওইরম্বা অউ হৌজিক লুপা লাখ ৭ ওইহন্দুনা মিদল ক্লাসশিং মতেং পাংলে।
মরুপশিং,
ঐখোয়না উত্তর প্রদেসতা হিংবদা লাইহনবা অমসুং ললোন-ইতিক চৎথবদা লাইহনবা অনিমক চপ মান্ননা মরুওইনা লৌরে। দবল ইঞ্জিন সরকারগী পান্দমদি সরকারগী স্কিম অমগী কান্নবশিং বেনফিসিরি খুদিংমক ফংহনবনি। হন্দক পাংথোকখিবা বিকসিত ভারত সংকল্প যাত্রাদা উত্তর প্রদেসকী বেনফিসরি লাখ কয়াগী মখোয়গী থোংজিলদা স্কিমশিংগী কান্নবশিং য়ৌহল্লে। খুঙ্গংশিং অমসুং সহর খুদিংমক মোদী কি গরেন্তি গারি য়ৌরে। সরকারগী স্কিমশিংগী কান্নবশিং চাদা ১০০ ফংহনবা হায়বসি খুন্নাইগী অচুম্বগী খ্বাইদগী অচুম্বা মওংনি। মসি অচুম্বা সেকুলারিজমনি। মমাঙগী সরকারশিংদা শেঞ্জা-থুমজা অমসুং মীচং-মীখাই নাইবগী অচৌবা মরমশিং অদোম নিংশিংলমগনি? মমাঙগী সরকারশিংদা, মখোয়গী খুদোংচাবশিং ফংনবা মীয়াম্না পরেং শাংনা লেপ্নখি। চে-চাংশিং পায়দুনা থোঙনাউ অমদগী থোংনাউ অমদা চেন্নখি। হৌজিক ঐখোয়গী সরকারনা হায়রিবা খুদোংচাবশিং অদু লায়রবশিংগী থোংজিলদা য়ৌহল্লে। বেনিফিসরি খুদিংমক্না মখোয়গী ফংফম থোকপশিং ফংদ্রি ফাওবা ঐখোয়গী সরকার পোথারোই হায়বসি মোদীগী গরেন্তিনি। পাক্কাগী য়ুমশিং, মৈ, গ্যাস নত্ত্রগা তোতি ঈশিং, লেম্না লায়য়েংবা অমসুং লেম্না চেঙ পীবা ওইবা য়াই, বেনিফিসরি খুদিংমক মসি ফংগদবনি।
মরুপশিং,
মমাঙদা কনা অমতনা হংবীরমদ্রবা মীওইশিং ঙসিদি মোদীনা হংলে। মমাঙদা, সরকার অমতনা সহরশিংগী লম্বীগী নাকলশিংদা পোৎ-চৈ য়োল্লিবা ঐখোয়গী ইনাওশিং অমসুং ইচলশিং মতেং পাংনবা ৱাখল খনখিদে। হায়রিবা মীওইশিং অসিগীদমক ঐখোয়গী সরকারনা পি.এম শ্বানিধি য়োজনা হৌদোক্লে। হৌজিক ফাওবদা পি.এম শ্বানিধি য়োজনাগী মখাদা লম্বী মতাইদা পোৎ য়োল্লিবশিংদা লুপা করোর ১০,০০০গী মতেং পীখ্রে। উত্তর প্রদেসতা, লম্বী নাকলদা পোৎ-চৈ য়োল্লিবা মীওই লাখ ২২ রোম স্কিম অসি কান্নবা ফংলে। লায়রবশিং শৌগৎপীবা মতমদা মখোয়না থবক খুদিংমক পাংথোকপা ঙম্মী হায়বা পি.এম শ্বানিধি য়োজননা উৎলে। পি.এম শ্বানিধি য়োজনা থিজিনবদগী য়াম্না মরুওইবা অমা খঙলে মদুদি য়োজনা অসিগী কান্নবা ফংলবা মরুপশিং চহিগী ওইনা লুপা লিশিং ২৩গী অহেনবা শেনফম ফংলবা ঙম্লে। পি.এম শ্বানিধি য়োজননা লম্বী নাকলদা পোৎ-চৈ য়োল্লিবা মীওইশিংগী পোৎ লৈবা ঙম্বগী শক্তিশু হেনগৎহল্লে। অতোপ্পা থিজিনবা অমদগী পি.এম শ্বানিধিগী বেনিফিসরিশিংগী চাদা ৭৫ দি এস.সি.এস.তি অমসুং ত্রাইবেল ফুরুপশিংনি অমসুং তঙ্খায় অমনা নুপীশিংনি হায়বা খঙলে। মমাঙদা বেঙ্কশিংগী মখোয়গী গরেন্তি অমতা লৈরমদে, মরম অদুনা মখোয় বেঙ্কশিংদগী করিগুম্বা মতেং অমতা ফংলমদে। ঙসি মখোয় মোদীগী গরেন্তি লৈরে অমসুং মরম অদুনা মখোয় বেঙ্কশিংদগী মতেং ফংলে। মসি করিগুম্বা মতমদা জয় প্রকাস নরায়ন অমসুং রাম মনোহর লোহিয়ানা মঙ মঙজরম্বা খুন্নাইগী অচুম্বা অদুনি।
মরুপশিং,
ঐখোয়গী দবল ইঞ্জিন সরকারগী থৌশিলশিং অমসুং ৱারেপশিংনা খুন্নাইগী অচুম্বা অমসুং শেন্মিৎলো অনিমক কান্নবা ফংলে। অদোম লাখপতি দিদিগী ৱাশক্কী মতাংদা তারম্লগনি। হৌখিবা চহি ১০দা,ঐখোয়না লৈবাক অসিগী নুপী করোর ১০ হেন্না সেল্ফ-হেল্প গ্রুপশিংদা শরুক য়াহল্লে। মখোয়গী মনুংদা, হৌজিক ফাওবদা, উদোগকী মীওইশিং, মশিং অসি তাবীয়ু, হৌজিক ফাওবদা, নুপী করোর ১ হেন্না লাখপতি দিদি ওইরে। লাখপতি দিদি করোর ৩ শেমগৎনবা সরকারগী ৱারেপ লৌরে। ঐখোয়গী লৈবাক অসিদা গ্রাম পঞ্চয়াত লাখ ২.৫ রোম লৈরি। করিগুমবা লাখপতি করোর ৩ শেম্লবদি গ্রাম পঞ্চয়াত খুদিংমক্কী পোৎ-চৈ লৈবা ঙম্বগী শক্তি কয়া য়াম্না হেনগৎলক্কনি হায়বা খন্দুনা য়েংউ। মসিনা ইচলশিং অমসুং খুঙ্গংগী শেন্মিৎলোন মপাঙ্গল কনখৎহনগনি।
ইনাওশিং অমসুং ইচলশিং,
ঐখোয়না চাউখৎলবা উত্তর প্রদেসকী ৱারি শানবা মতমদা, মসিগী তুংদা অতোপ্পা শক্তি অমা লৈরি। মসি মফম অসিগী এম.এস.এম.ইশিংগী থৌনা অদুনি, হায়বদি স্মোল, মাইক্রো অমসুং কোতেচ ইন্দস্ত্রিশিং অদুনি। দবল ইঞ্জিন সরকার শেম্লবা মতুংদগী, উত্তর প্রদেসকী স্মোল, মাইক্রো অমসুং কোতেচ ইন্দস্ত্রিশিং মপাঙ্গল কনখৎহন্নবা থবক পায়খৎলে। রাজ্য অসিগী এম.এস.এম.ইশিংদা লুপা করোর লিশিং কয়াগী মতেং পীরে। দিফেন্স কোরিদোর শেমগৎলে অমসুং শেমগৎলিবা অনৌবা ইকোনোমিক কোরিদোরশিংনা এম.এস.এম.ইশিংদা কান্নবা য়াম্না পীরগনি।
মরুপশিং,
উত্তর প্রদেসকী জিলা খুদিংমক্তা য়ুমগী উদোগশিংগী অরিবা চৎনবী অমা লৈরি। মফম খরদা শো শারি, মফম খরদা ব্রাসকী থবক তৌরি, মফম খরদা কার্পেত শারি, মফম খরদা খুজি শারি, মফম খরদা ক্লে আর্ত পুথোক্লি, মফম খরদা চিনকানকারি পাংথোক্লি। ঐখোয়না মসিগী চৎনবী অসি ৱান দিস্ত্রিক ৱান প্রদক স্কিমগী মখাদা মপাঙ্গল কনখৎহল্লে। কমদৌনা ৱান দিস্ত্রিক ৱান প্রদক স্কিম পুক্নিং থৌগৎলে অমসুং য়োকখৎলে হায়বা অদোম্না রেলৱে স্তেসনশিংদা উবা ফংগনি। হৌজিক ঐখোয়না লুপা করোর লিশিং ১৩গী পি.এম বিশ্বাকর্মা য়োজনা হৌদোক্লে। বিশ্বকর্মা স্কিম্না উত্তর প্রদেসকী বিশ্বকর্মা ইমুং লাখ কয়া মতমগা চুনবা থবকশিং পায়খৎহল্লগনি। মখোয়না অতাবা শেন্দোয়দা অমসুং গেরেন্তি য়াওদনা বেঙ্কশিংদগী লোনশিং লৌদুনা মখোয়গী ললো-ইতিক পাকথোক-চাউথোকহনবদা য়োজনা অসিনা মতেং পাংগনি।
ইনাওশিং অমসুং ইচলশিং,
শান্নপোৎ শাবগী লমদা কমদৌনা ঐখোয়গী সরকারনা থবক পায়খৎলিবগে হায়বা অদোম খঙলগনি। কাসিগী এম.পি অমা ওইনা, মফম অসিদা উগী শান্নপোৎশিং শাবগী থবক ঐনা য়োকখৎলি।
মরুপশিং,
চহি খরগী মমাং ফাওবদা, লৈবাক অসিগী অঙাংশিংগী শান্নপোৎশিংনা ভারতনা মপান লৈবাকশিংদা পুশিল্লকখি। মসি শান্নপোৎশিং শাবগী ইনাকখুল্লবা চৎনবী অমা লৈরিবা ভারতকী ফিবমনি। মীরোল কয়া শান্নপোৎশিং শাবগী হৈথোই-শিংথোইবা লৈরি। অদুবু, ভারতকী শান্নপোৎশিং য়োকখৎতবা অমসুং মালেমগী অহোংবশিং চুশিন্নবা ঙম্নবা শান্নপোৎ শাবা খুৎহৈবশিং মতেং পাংদবদগী মপান লৈবাকশিংদা শাবা শান্নপোৎশিনা ভারতকী শান্নপোৎশিং কৈথেল নমথবনি। মসিদা অহোংবা পুরক্নবা অমসুং লৈবাক শীনবা থুংনা লৈরিবা শান্নপোৎ শাবশিংগী লেপ্নবা অমসুং মখোয় মতেং পাংনবা ঐনা ৱারেপ লৌরে। লৈবাক শীনবা থুংনা লৈরিবা শান্নপোৎ শারিবশিংনা মপান্দা শান্নপোৎশিং থাদোকপা হেনগৎহন্নবা মতেং পাংগদবনি। ঙসিদি ঐখোয়না মপান লৈবাকশিংদগী পুশিল্লকপা শিংথাবা য়ানা হন্থরে অমসুং শান্নপোৎশিং মপান্দা থাদোকপা শরুক কয়া হেনগৎলে।
মরুপশিং,
ভারতকী খ্বাইদগী চাউবা তুরিজমগী মফম অমা ওইনবা খুদোংচাবশিং উত্তর প্রদেসতা লৈরি। লৈবাক অসিগী মীওই খুদিংমক বরানাসী অমসুং অযোধ্যা য়েংবা পাম্মী। ঙসিদি মীওই লাখ কয়া হায়রিবা মফমশিং অসিদা লাক্লে। মসিনা মরম ওইদুনা, উত্তর প্রদেসতা অপীকপা ওন্ত্রেপ্রেনিউয়রশিং, এয়রলাইন কম্পেনিশিং অমসুং হোতেল-রেসতুরান্ত মপুশিং মমাঙদা অমুক্তা ফংখিদ্রিবা খুদোংচাবশিং ফংলে। ঐ করিগুম্বা অমতা হায়জগে, ঐনা লৈবাক অসিগী লমকোয়বা মীওইশিংদা হায়জরি, অদোম্না লমকোয়নবা বজেত অমা শেম্বা মতমদা, বজেতকী চাদা ১০ অদোম্না য়েংবা চৎকদৌরিবা মফম অদুগী থমগদবনি। করিগুম্বা খর লৈনবা থমগদবনি। অদোম্না লুপা লিশিং কয়া চঙনা লমকোয়গদৌরিবা মরমনা মসি অদোমগী অরুবা অমা ওইরোই। বজেতকী চাদা ১০ অদুনা লমকোয়বা চৎলিবা মফম অদুগী পোৎথোকশিং লৈরিবদি, মফম অদুগী শেন্মিৎলোন অতিয়া ফংনা চাউখৎকনি। লাইবক থিবদি, হৌজিক, ইনাকখুনবশিং মপান্দা কোয়বা চৎপা অমসুং মখোয়গী মচা-মশুশিং মপান লৈবাকশিংদা লুহোংবগী চৎনবী অমা লৈবাক অসিদা লৈরে। ভারতগুম্বা অচৌবা লৈবাক অমদা, অদোমগী ইচাশিং লুহোংবা য়াদবরা? মী কয়া য়াম্না থবক ফংগনি? ঐনা ৱেদ ইন ইন্দিয়া হৌদোকপদগী, ঐনা চিথি কয়া ফংলে। সার, ঐখোয় মপান লৈবাক্তা লুহোংনবা থৌরাং তৌরম্বনি, অদুবু অদোম্না হায়বদগী মদু তোক্লে অমসুং হৌজিক ঐখোয় ভারত্তা লুহোংলগনি। ভাগত সিংহগুম্বা মশামক থৌরি য়াল্লগা লৈবাক অসিগী সেবা তৌবা অচুম্বা নত্তে।
মরুপশিং,
লৈবাক্কীদমক থবক তৌদুনা লৈবাক্কী সেবা তৌবা য়াগনি। মরম অদুনা ঐনা হেন্না ফবা লোকেল, নেসনেল অমসুং মালেমগী লম্বী-থোংগী মরমদা ফোঙদোক্লিবা, হৌজিক উত্তর প্রদেসতা চৎথোক-চৎশিন তৌবা য়াম্না লাইরে। হন্দক, ঐখোয়না বরানাসী ফাওরবা মালেমদা খ্বাইদগী শাংবা ক্রুইজ সর্বিস হৌখ্রে। ২০২৫ দা পাংথোক্কদৌরিবা কুম্ভ মেলা অসি রাজ্য অসিগী শেন্মিৎলোনগী য়াম্না মরুওইগনি। তুংদা তুরিজম অমসুং হোস্পিতেলিতি সেক্তরদা রাজ্য অসিদা মশিং য়াম্লবা থবকশিং ফংহনগনি।
মরুপশিং,
ঐখোয়গী থবক্তি ঐখোয়গী থৌনাশিং মতমগী অনৌবশিংগা পুনশিনবা, মখোয় মপাঙ্গল কনখৎহনবা অমসুং অনৌবা হিরমশিংদা অঙকপা থবকশিং পাংথোকপনি। ঙসিদি ভারতনা ইলেক্ত্রিক মোবিলিতি অমসুং গ্রিন ইনর্জিদা মীৎয়েং চঙলে। অসিগুম্বা তেক্নোলোজি অমসুং মেনুফেকচরিংগী লমদা ভারত মালেমগী মফম অমা ওইহন্নবা সরকারনা মীৎয়েং চঙলে। ঐখোয়গী থবক্তি লৈবাক অসিগী ইমুং খুদিংমক অমসুং য়ুম খুদিংমক সোলার পৱার পুথোকপা জেনেরেতর অমা ওইহনবনি। পি.এম সুর্য়াঘর স্কিমগী মখাদা ইলেক্তিসিতি য়ুনিত ৩০০ লেম্না পীগনি অমসুং মীয়াম্না অহেনবা মৈ সরকারদা য়োনবা য়াগনি। স্কিম অসিগী মখাদা হৌজিক ইমুং করোর ১ শরুক য়ারে অমসুং ইমুং খুদিংমক্কী বেঙ্ক একাউন্তশিংদা হকথেংননা লুপা ৩০,০০০ দগী লুপা ৮০,০০০ ফাওবা হাপচিনগনি। থা অমদা মৈ য়ুনিত ১০০ পুথোকপা ইমুংশিং লুপা ৩০,০০০গী শেন্থং ফংগনি অমসুং মৈ য়ুনিত ৩০০ নত্ত্রগা মসিদগী হেন্না পুথোকপা ইমুংশিংনা লুপা ৮০,০০০ ফংগনি। মসিগী মথক্তা, বেঙ্কশিংদগী য়াম্না লাইনা অমসুং অতাবা শেন্দোয়দা লোনশিং ফংহনগনি। হায়রিবা ইমুংশিং অসিনা লেম্না মৈ ফংবা খক নত্তনা, মখোয়না চহি অমদা লুপা লিশিং ১৮গী মৈ য়োন্দুনা অহেনবা শেন তাবা ঙমগনি। মসি খক নত্তনা, পানখৎপা, সপ্লাই চেন অমসুং শেমজিন-শাজিনবগা মরী লৈনবা হিরমশিংদা য়োজনা অসিনা থবক লাখ কয়া ফংহনগনি। মসিগা লোয়ননা, য়োজনা অসিনা মীয়ামদা য়াম্না লাইনা পুং ২৪ মৈ ফংহনগনি অমসুং অকক্নবা য়ুনিত মশিং খরগী মৈ লেম্না পীগনি।
মরুপশিং,
সোলার পৱারগুম, ঐখোয়না ইলেক্ত্রিক গারিশিংগী মতাংদা মিসন মোদতা থবক তৌরি। সরকারনা ই.ভি সেক্তর চাউখৎনবা মীৎয়েং চঙলে অমসুং ইলেক্ত্রিক গারিশিং লৈবদা তেক্স লৌদনবা গারি শারিবশিংগী পি.এল.আই স্কিম হৌদোক্লে। মসিগী ফল ওইনা, হৌখিবা চহি ১০দা ইলেক্ত্রিক গারি লাখ ৩৪.৫ য়োনখ্রে। ঐখোয়না খোঙজেল য়াংনা ইলেক্ত্রিক বসশিং শীজিন্নবা হৌরে। মসি সোলার নত্ত্রগা ই.ভি ওইগেরা, হিরম অনিমক উত্তর প্রদেসতা খুদোংচাবা কয়া লৈরি।
মরুপশিং,
নুমিৎ খরগী মমাঙদা, লৌমীশিংগী ঈশ্বর চৌধুরি চরন সিংহদা ভারত রত্ন পীনবা সরকারনা ৱারেপ লৌখ্রে। উত্তর প্রদেসকী মপারি চৌধুরি চরন সিংহ জি ইকায়খুম্নবা উৎপা অসি লৈবাক অসিগী লৌমী করোর কয়া ইকায়খুম্নবা উৎপনি। লাইবক থিবদি কংগ্রেস অমসুং মসিগা চৎমিন্নরিবশিংনা মসি খঙখিদে। সংসদতা চৌধুরি চরন সিংহগী মতাংদা খন্নরকপা মতমদা, কমদৌনা কংগ্রেসকী মীওইশিংনা চৌধুরি সাহেবকী মরমদা ফোঙদোকপদা ৱাখিবা অদু অদোম উরে। ইমুং অমা খক্তনা ভারত রত্না ফংগদবনি হায়বা কংগ্রেসনা খল্লি। মরম অদুনা চহি কয়া কংগ্রেসনা বাবা সাহেব অম্বেদকারদা ভারত রত্ন পীখিদে। মীওইশিং অসিআন মখোয়গী ইমুং-মনুংগী মীওইশিং খক্তদা ভারত রত্ন পীখি। তশেংনা, কংগ্রেসনা লায়রবা, দলিতশিং, তোল্লবা মীওইশিং, লৌমীশিং অমসুং শিন্মীশিং ইকায়খুম্নবা পামদে, মসি মখোয়গী ৱাখলদা য়াওদে। চৌধুরি চরন সিংহগী মতমদা ফাওবা, কংগ্রেসনা মহাক মনতিক্নখি। চৌধুরি চরন সাহেবনা প্রধান মন্ত্রীগী ফম থাদোকখি অদুবু মহাক্কী অচুম্বা ফিদমশিং শন্তাইনখিদে। মহাক্না রাজনিতিগী মন্তিক্নবা তুগৎচখি। অদুবু মহাক্কী মিংদা রাজনিতি তৌরিবা উত্তর প্রদেসকী দল খুদিংমক চৌধুরি সাহেবকী ৱাহৈশিং য়াখিদে। চৌধুরি চরন সিংহনা লায়রবা লৌমীশিংগী য়াইফনবা থবক কয়া পাংথোক্লমখিবা অদু লৈবাক অসিদা কৈদৌঙৈদা কাউবা ঙম্লোই। চৌধুরি সাহেবনা ইথিল পীদুনা ঐখোয়না লৈবাক অসিগী লৌমীশিংগী য়াইফনবা ঐখোয়না লেপ্তনা থবক পায়খৎলি।
মরুপশিং,
লৈবাক অসিগী লৌউ-শিংউগী থবক অনৌবা লম্বী অমদা চৎনবা সরকারনা লৌমীশিং শৌগৎলি অমসু পুক্নিং থৌগৎলি। ওর্গানিক লৌউ অমসুং মিল্লেতশিংদা সরকারনা মীৎয়েং চঙলে। উত্তর প্রদেসতা গঙ্গা মপান্দা পাক-শন্না মহৌশাগী লৌউ মখল পায়খৎপা অসিনা লৌমীশিং খক কান্নবতা নত্তনা ঐখোয়গী শেংলবা তুরেলশিং লু-নান্না থম্বদা মতেং পাংগনি। ফুদ প্রোসেসিং ওন্ত্রেপ্রেনিউয়রশিংনা মখোয়গী থবকশিংদা “জিরো ইফেক, জিরো দিফেক”গী লাইৱা মরুওইনা লৌগদবনি। মালেম শীনবা থুংবগী দাইনিং তেবলশিংদা ভারতকী চীঞ্জাকশিং য়াওহন্নবা চপ মান্নবা পান্দম অমগী মখাদা থবক তৌবা মরুওই। সিদ্ধার্থ নাগরগী কালা নমক রাইজ অমসুং চান্দাউলিগী চাকহাও হৌজিক শিংথাবা য়ানা মপান লৈবাকশিংদা থাদোক্লে। মিল্লেতশিং হায়বদি শ্রী অন্নগী মতাংদা অখন্নবা অনৌবা চৎনবী অমা ঐখোয়না উরে। মিল্লেতশিং সুপরফুদশিং ওইনা শীজিন্নবা হেনগৎলক্লিবা অসিদগী হিরম অসিদা শেন থাদবা দরকার ওইরে। মিল্লেতশিংগুম্বা সুপরফুদশিংদা শেন থাদবা চপ চারবা মতমনি। অদোম্না লৌমীশিংদা মখোয়গী পোৎথোকশিংগী মগুন হেনগৎহন্নবা, মসি কমদৌনা য়োমগনি, ঐগী লৌমীশিংনা পুথোক্লিবা পোৎথোকশিং কমদৌনা মালেমগী কৈথেলশিং য়ৌহনগনি হায়বগী মতাংদা মখোয়দা খঙহনগদবনি। অপীকপা লৌমীশিং অচৌবা কৈথেলগী শক্তি অমা ওইহন্নবা ঙসি সরকারনা কন্না হোৎনরি। ওন্ত্রেপ্রেনিউয়রশিংনা লৌমীশিংগা পুন্না থবক তৌমিন্নগদবনি অমসুং ফার্মর প্রদুসর ওর্গনাইজেসন(এফ পি ও) অমসুং কোওপরেতিপ সোসাইতিশিংগী খুৎথাংদা অপীকপা লৌমীশিংগী ফিবম ফগৎহন্নবা সরকারনা থবক পায়খৎলে। লৌমীশিং অমসুং লৌউ-শিংউদা কান্নবা ফংহনবা হায়বসি অদোমগী ললোন-ইতিক্কীশু অফবনি। ভারতকী খুঙ্গংগী শেন্মিৎলোন অমসুং লৌউ-শিংউদা য়ুম্ফম ওইবা শেন্মিৎলোন চাউখৎহনবদা উত্তর প্রদেসনা মতম পুম্নমক্তা অচৌবা থৌদাং লৌরি। মরম অদুনা মরী লৈনবশিংনা মসিগী খুদোংচাবা অসি খ্বাইদগী য়াম্না লৌনবা হোৎনগদবনি। উত্তর প্রদেসকী মীয়ামগী তৌবা ঙম্বা অমসুং দবল ইঞ্জিন সরকারগী থবকশিংদা মহাক্না থাজবা থম্লি। ঙসি উরেপ-উয়ুং তম্লিবা অসিনা রাজ্য অসিগী অমসুং লৈবাক্কী চাউখৎনবা য়ুম্ফম থোল্লে। ঐনা য়োগী জি অমসুং উত্তর প্রদেস সরকারদা হরাওবা ফোঙদোকচরি। উত্তর প্রদেসনা ত্রিল্লিয়ন দোল্লার ইকোনোমি অমা শেমগৎনবা ৱারেপ লৌরে হায়না ঐখোয়না তাবদা ভারতমচা খুদিংমক চাউথোকচবা ফাওরে।
লৈবাক অসিগী রাজ্যশিং মখোয় মশাগী মফমদা রাজনিতি থাদোক্তুনা উত্তর প্রদেসতগী তম্নবা অমসুং মখোয় মশাগী রাজ্যগী ত্রিল্লিয়ন দোল্লার ইকোনোমি অমা শেমগৎনবা ঐনা তকশিল্লি। ৱাশক অমগা লোয়ননা থবক তৌরকপা মতমদা, লৈবাক অসি মাঙলোমদা চঙশিনগনি। উত্তর প্রদেসগুম্না, রাজ্য খুদিংমক অচৌবা মঙলানশিং অমসুং অচৌবা ৱারেপশিংনা হৌখি অমসুং ঐগী উদোগকী মরুপশিংগীশু মপান নাইদ্রবা খুদোংচাবশিংগী মতম অমা লাক্লে। লাক্লো, ঐখোয় শেম-শাদুনা লৈরে।
মরুপশিং,
ঙসি উত্তর প্রদেসকী মীওই লাখ কয়া তারি। মফম ৪০০দা মীওই লিশিং কয়া ফম্লি, ঐনা অদোমদা থাজবা পীরি, উত্তর প্রদেসনা মসিগী ৱাশকশিং অশুক্কী মতিক য়াংনা থবক ওইনা পাংথোক্কনি হায়বা অদোম কৈদৌঙৈদা খল্লম্লোই। ঐখোয় অমতা ওইনা মাঙলোমদা চঙশিনমিন্নরসি। মসিগী য়াইফ-পাউজেল অসিগা লোয়ননা, ময়াম পুম্নমক থাগৎচরি। অদোম থাগৎচরি!
