ইকায়খুম্নরবশিং,
খুরুমজরি!
১৭শুবা ব্রিক্স মীফম মপুংফানা শীনবগীদমক ঐনা রাষ্ট্রপতি লুলা থাগৎপা ফোঙদোকচরি। ব্রাজিলনা ব্রিক্সকী চিয়ারমেন ওইবগী মখাদা, ঐখোয় ব্রিক্স মতেং পাংনবা অনৌবা থাক অমা য়ৌরে। ঐনা হায়জরি-ঐখোয়না ফংলিবা থৌনা অসি ইসপ্রেসো অমা খক্ত নত্তে; মসি দবল ইসপ্রেসোনি। মসিগীদমক ঐনা রাষ্ট্রপতি লুলা অমসুং মহাক্কী থবক থাগৎপা ফোঙদোকচরি। ভারতকী মহুৎশীন্দুনা, ব্রিক্স ইমুং-মনুংদা ইন্দোনেসিয়া শরুক য়ারকপদা ঐগী মরুপ রাষ্ট্রপতি প্রাবোৱো ঐনা থাগৎপা ফোঙদোকচরি।
মরুপশিং,
গ্লোবেল সাউথনা মতম পুম্নমক্ত দবল ষ্টেন্দার্দ মায়োক্নরি। মসি চাউখৎপা, লন-থুম য়েন্থোক্নবা নত্ত্রগা সেকুরিগা মরী লৈনবা থবকশিংদা ওইবা য়াই, গ্লোবেল সাউথকী অপাম্বশিং লুম্না লৌদে। ক্লাইমেত ফাইনান্স, স্তেনেবল দিবলপমেন্ত অমসুং তেক্নোলোজি ফংহনবগুম্বা হিরমশিং নত্তনা গ্লোবেল সাউথনা করি অমতা ফংদে।
মরুপশিং,
২০শুবা চহিচাদা মীওইবা খুন্নাইগী শরুক অহুমগী শরুক অনি মালেমগী লুপশিংদা শরুক য়াবা ফংদে। ঙসিগী মালেমগী শেন্মিৎলোন্দা লৈবাক কয়ানা মরুওইবা থৌদাং লৌরে অদুবু হৌজিক ফাওবা ৱারেপ লৌবগী থবকশিংদা শরুক য়াহন্দ্রি। মসি শরুক য়াবা খক্তগী নত্তে, মসি থবক ফজনা পাংথোক্নবনি। গ্লোবেল সাউথ য়াওদনা, হায়রিবা লুপশিং অসি নেতৱার্ক ফংদবা সিম খক্ত য়াওদবা মোবাইল ফোন অমগা মান্নৈ। ২১শুবা চহিচাগী অৱাবশিং মায়োক্নবা ঙম্নবা মখোয়না মপুংফানা থবক তৌবা ঙমদ্রে। মালেম শীনবা থুংবগী মুক্নবা, লাইচৎ, শেন-থুমগী অৱাবশিং নত্ত্রগা সাইবর নত্ত্রগা স্পেসকী অৱাবশিং কোক্নবা পাম্বৈশিং হায়রিবা লুপশিং অসিনা পুথোকপা ঙমদ্রে।
মরুপশিং,
ঙসিগী মালেম্না কাংলুপ কয়া শরুক য়াবা অমসুং খুদিংমক কোনশিনবা মালেমগী চৎন-কাংলোন অমা দরকার ওইরে। থবক অসি মালেমগী লুপশিংদা অওনবা পুরক্তুনা হৌগদবনি। অওনবশিং অদু মমিংতগী ওইরোইদবনি, মখোয়গী কান্নবা ইঙান ঙান্না উবা ফংগদবনি। লৈঙাক্কী থবকশিং, ভোৎ পীনবগী হকশিং অমসুং ফমশিং পায়বদা অহোংবা পুরক্কদবনি। থৌশিল শেম্বদা গ্লোবেল সাউথকী লৈবাকশিংনা থেংনরিবা অৱাবশিং মরুওইনা লৌগদবনি।
মরুপশিং,
ব্রিক্স চাউথোকহনবা অমসুং অনৌবা লৈবাকশিং শরুক য়াহনবা অসিনা মতমগী মতুংইন্না মসিদা অওনবা পুরকপগী মমি তারে। হৌজিক ঐখোয়না য়ু.এন.এস.ই, দব্লিউ.তি.ও অমসুং মালেমগী চাউখৎ-থৌরাংগী বেঙ্কশিংগুম্বা মালেমগী লুপশিংআ অওনবা পুরক্নবা অকনবা ফিরেপ উৎকদবনি। চয়োল খুদিংগী তেক্নোলোজি অনৌবা থোক্লক্লবা এ.আইগী মতম অমদা, মালেমগী লুপশিংনা চহি ৮০ অওনবা অমা পুরক্তবা হায়বসি য়ারোই। অদোম্না ২০শুবা চহিচাগী তাইপরাইতরদা ২১শুবা চহিচাগী সোফৱায়র শীজিন্নবা য়ারোই।
মরুপশিং,
মীওইবা খুন্নাগী য়াইফনবা মশাগী ওইজবা থাদোকপা অমসুং থবক তৌবা অসি থৌদাং অমনি হায়না ভারতনা মতম পুম্নমক্ত খল্লি। হিরম খুদিংমক্ত ব্রিক্স লৈবাকশিংগা থবক তৌমিন্ননবা অমসুং ঐখোয়না মতেং পাংনবা ঐখোয়না থাজবা পীরি। অদোম থাগৎপা ফোঙদোকচরি।
