ভারত অমসুং য়ু.এস.এ.গী লেংবীরক্লিবা শক্নাইরবশিংবু
খুরুমজরি,
য়ু.এস. ইন্দিয়া সম্মিৎ ২০২০গীদমক য়ু.এস.-আই.এস.পি.এফ.না তোঙান–তোঙানবা লম্বীদগী মীওই কয়া অমত্তা ওইনা পুনশিনবীবসি উবদা অপেনবা পোকচৈ। য়ু.এস.-আই.এস.পি.এফ.না ভারত অমসুং য়ু.এস.এ.বু হেন্না নকশিন্ননবা হোৎনবদা লৌরিবা থৌদাং অসি শিংথানীংঙাইনি।
ঐহাক্না জোন চেম্বর্সপু চহী কয়াগী মমাংদগী খঙলকখ্রে। মহাক্না ভারতপু অদুক্কী মতিক খঞ্জৈ। চহী খরগী মমাংদা মহাকপু 'পদ্ম শ্রী' মনা পীখ্রে।
মরূপশিং,
হন্দক চহীগী নুংগী ওইবা ৱাফম অসি অদুক্কী মতিক চুন্নৈ – অনৌবা শীংনবশিং মমাই চুম্বা হায়বনি। ইং কুমজা ২০২০না হৌরকপা মতমদা, অসুম ওইরক্কনি হায়বসিবু কনানা থাজরমগনি? মালেমগী পুম্বদা শন্দোক্লিবা লাইচৎ অসিনা মীপুম খুদিংমক্তা চৈথেং পীরে। মসিনা ঐখোয়গী খাঙবা কনবা, ঐখোয়গী মীয়ামগী হকশেলগী কাংলোন, ঐখোয়গী শেন্মিৎলোনগী পথাপ্পু চাংয়েং তৌরি।
হৌজিক ওইরিবা ফিবম অসিনা অনৌবা ৱাখল্লোন অমা পুথোকহন্নবা হোৎনরি। চাউখৎলোন তানবদা মীওইবা খুন্নাইদা মিৎয়েং চঙবা ৱাখল্লোন অমা। অমগা অমগগী মরক্তা মতেং পাংনবগী ইথিল অমা পীনবা হোৎনরি।
মরূপশিং,
ঐখোয়না মাংজিল থানা চঙশিন্নবা হোৎনবা মতমদা ঐখোয়না – ঐখোয়গী তৌবা ঙম্বগী থাকশিং হেনগৎহনবা মথৌ তাই, লাইরবা খুন্নাইবু হেন্না শাফহনবা অমসুং ঐখোয়গী ইরৈচাশিংগী তুংগী পুন্সিবু হেন্না খুদোংচাহন্নবা হোৎনবদা মিৎয়েং চঙবা তাই। মসিনি ভারতনা হৌজিক লৌখৎলিবা খোংথাং অসি। লোকদাউনগী খোংথাং মতিক চানা লৌখৎখিবা লৈবাকশিংগী মনুংদা ভারতনা অহানবা ওইখি। মাস্ক অমসুং মাই খুম্ববু মীয়ামগী হকশেলগী খোংথাং অমা ওইনা লৌখৎখিবা লৈবাকশিংগী মনুংদা ভারতসু অহানবনি। অমগা অমগগী মরক্তা অরাপ্পা থম্নবা খোংথাং লৌখৎখিবা লৈবাকশিংগী মনুংদা ভারতনা অহানবনি। অথুবা মতমদা, অনা লাইয়েংগী ইনফ্রাস্ত্রকচরসু খোংলৈ থুনা লৌখৎখি – কোবিদ হোস্পিতালবু ওইরো, আই.সি.য়ূ. কেপাসিতীশিং অমসুং অতোপ্পা অহেনববু ওইরো। জনুৱারীদা তেস্ত তৌনবা লেব অমখক্তং লৈরম্বদগী লৈরম্বদগী হৌজিক্তি লৈবাক শীনবা থুংনা লেব লীশিং তরা তরুক হেন্না লৈরে।
ঐখোয়না হোৎনরিবশিং অসিগী মহৈনা ঙসিদি মীওই বিল্লিয়ন ১.৩ লৈবা লৈবাক অসিনা মালেমদা মীওই মিল্লিয়ন অমদা শিবগী চাং খ্বাইদগী নেম্লি। নাবা ফগৎলকপগী চাংসু চাং নাইনা হেনগৎলক্লি। ঐখোয়গী লল্লোন ইতীক্কী কাংবুনা মরুওইনা অপীকপা করবার তৌবা কাংবুনা থৌনা লৈনা থবক কয়া লৌখৎলি। করি অমত্তা লৈরমদবদগী মখোয়না মালেমদা পি.পি.ই. কিৎ পুথোকপদা খ্বাইদগী চাউবা অনিশুবা ওইরি।
হায়রিবসিমক খুদোংথীবা কয়া থেংনদুনা হেন্না মপাঙ্গল লৈবা লৈবাক অমা ওইনা হৌরকপা ঙম্বা ভারতকী থৌনা অদুমকনি। হৌখিবা থা খরসিদা লৈবাক অসিনা কোবিদকা লান্থেংনরি, মসিগী মথক্তা ইচাউ, সাইক্লোন ২–২, কৌজেংগী লানসু থেংনখি। অদুবু মসিনা মীয়ামদা হেন্না পাঙ্গল পীখি।
মরূপশিং,
কোবিদ–১৯ অমসুং লোকদাউনগী মনুংদা, ভারত সরকারনা করিগুম্বা অমদি ময়েক শেংনা লেপখি – লাইরবশিংবু ঙাক শেনবীগদবনি। ভারতকী লাইরবশিংগীদমক 'প্রধান মন্ত্রী গরীব কল্যান য়োজনা' অসি লামেগী মফম অমহেক্তদা লৈতবা খ্বাইদগী চাউবা সপ্পোর্ত সিস্তেম অমনি। লেম্না চানবা পোৎলম কয়া অমা মীওই মিল্লিয়ন ৮০০দা পীখি। মসিগী স্কিম অসি থা ৮ চল্লাইখি। মীওই মিল্লিয়ন ৮০০ হায়বসি য়ু.এস.এ.গী মীশিংগী শরুক অনি হায়বনি। মীওই মিল্লিয়ন ৮০দা চাকথোং গ্যাস লেম্না পীখি। লৌমী মিল্লিয়ন ৩৪৫তা অমসুং লৈজদ্রবা মীওই কয়াদা শেলগী তেংবাং পীখি। স্কিম অসিনা মাইগ্রেন্ত ৱার্করশিংদা মীওই মিল্লিয়ন ২০০গী নোংমগী থবক পীখি।
মরূপশিং,
লায়চৎ অসিনা হীরম কয়াদা শোকহল্লে। অদুবু মসিনা ভারত মচা বিলিয়ন ১.৩গী পুক্নিং ইথিলদদি অয়েৎপা পীবা ঙমদ্রি। হন্দক্কী থা খরা অসিদা মশক থোকপা শেমদোকপা কয়া পাঙথোকখ্রে। মসিনা কারবারশিং নুংঙাইহন্দুনা অকক্নবা মীওই খরআ–খক্তদা মরু ওইবা পীবগী থৌওং হন্থহল্লে। মালেমগী খ্বাইদগী চাউবা য়ুম শাবগী প্রোগ্রামগী থবক কন্না পায়খৎলি। নৌনা অমুক হন্না শিজিন্নবা য়াবা ইনর্জীগী ইনফ্রাস্ত্রকচরশিং পাক চাউথোকহল্লে। রেল, শোরোক অমসুং নোঙথক্কী লম্বীশিং হেন্না ফগৎহল্লে। ঐখোয়গী লৈবাক অসিনা তোপ তোপ্পা দিজিতেলগী মওং শিজিন্নদুনা লৈবাক্কী ওইবা হেলথ মিসন অমা শেম্বগী থবক চত্থরি। ঐখোয়না ফিন–তেক্কী খ্বাইদগী ফবা তেক্নোলোজী শিজিন্নদুনা বেঙ্কিং, ক্রেদিৎ, দিজিতেল পেমেন্ত অমসুং ইন্স্যুরেন্সকী খুদোংচাবশিং মীওই মিলিয়ন কয়াদা ফংহল্লি। হায়রিবা খোঙথাংশিং অসি মালেমগী থাক্তা লৈবা তেক্নোলোজী অমসুং থৌওং শিজিন্নদুনা পায়খৎপনি।
মরূপশিং,
মসিগী লায়চৎ অসিনা মালেমগী ওইবা সপ্লাই চেন শেম্বা অসি শেল খক্তদা য়ুম্ফম ওইরগা শেমগদবা নত্তে হায়বা মীয়ামদা তাক্লে। মসি থাজবদা য়ুম্ফম ওইরগা শেমগদবনি। লম্মিত–তুম্মিৎকী হীরমশিংনা শেল পুথোকপা ঙম্বগী মতিক্কা লোয়ন্না কম্পেনীশিংনা থাজবা য়াবা অমসুং পোলিসীগী তংদু লৈতাবগী মওংসু য়েংগদবনি। ভারত্তা হায়রিবসিং অসিগী মগুন লোয়না চেল্লি।
মরমশিং অসিগী মহৈ অমা ওইনা ভারত অসি মীরমগী মীওইশিংনা শেল থাদবদা পুক্নিং চংবগী মফম অমা ওইরক্লি। অমেরিকা নত্ত্রগা গল্ফ, নত্ত্রগা য়ুরোপ নত্ত্রগা ওস্ত্রেলিয়ানা ভারত্তা থাজবা থম্লি। হন্দক্কী চহিসিদা ভারতনা মীরমগী লৈবাকশিংনা থাদরকপা শেনফম বিলিয়ন দোল্লর ২০ হেন্না ফংলে। গুগল, এমাজোন অমসুং মুবাদালানা ভারত্তা তুং কোয়না শেল থাবগী থৌরাংশিং লাউথোকখ্রে।
মরূপশিং,
ভারতনা নুং ফাওনা উবা অমসুং মাংজৌননা হায়বা ঙম্বা তেক্সকী পথাপ অমা ইন্দুনা চৎলি। ঐখোয়গী পথাপ অসিনা পুকচেল শেংবা তেক্স থীবা মীওইশিংবু পুক্নিং থৌগৎলি। ঐখোয়গী জি.এস.তি. অসি পুম্নমক পুনবা, আই.তি.না মপুং ওইনা তেংবাংবা তেক্স থীবগী পথাপ অমনি। ইন্সোলবেন্সী অমসুং বেঙ্ক্রপসি কোদ অসিনা অপুনবা শেলগী পথাপ্তা লৈবা খুদোংথিবগী চাংবু হন্থহল্লে। ঐখোয়গী লেবরগী মতাংদা শেমদোকপগী পাক চাউবা পথাপ অসিনা থবক পীরিবা মীওইশিংগী অৱাবা হন্থহল্লগনি। মসিনা থবক তৌরিবা শিন্মীশিংদা খুন্নাইগী ওইবা ঙাক শেনবগী থৌওংসু পায়খৎলগনি।
মরূপশিং,
শাহৌ লৌনবগীদমক্তা শেল থাদরকপগী মরু ওইবা অসি নাথৈদুনা চৎপা য়ারোই। ঐখোয়না দিমান্দ অমসুং সপ্লাইগী হীরমশিং অসি নীংথিনা শেন্নরি। ভারত অসি মালেমগী তেক্স থীবদা খ্বাইদগী নেম্বা পন্থুংফম অমা ওইহন্দুনা অমসুং পোত্থোক পুথোকপা অনৌবা মফমশিংদা শেলগী ওইবা তেংবাং কয়া অমা পীবগী থবক পায়খৎলি। ‘ফেসলেস এসেসমেন্ত’তা য়ুম্ফম ওইবা শোইদনা পাঙথোক্কদবা ই.-প্লেৎফোর্ম অসিনা মীয়াম্বু তেংবাংবদা তুং কোইনা চৎপা পথাপ অমা ওইরগনি। তেক্স–থীবশিংগী চার্তর অসিনসু মান্নবা মতেং পাংগনি। বোন্দ মার্কেৎকী মতাংদা লেপ্তনা চত্থরক্লিবা শেমদোকপা অসিনা শেল থাদবা মীওইশিংদা খুদোংচাবা কয়া ফংবদা হেনগৎহনবা নুংঙাইবা মওং অমা পীগনি। ইনফ্রাস্ত্রকচরদা শেল থাদবগী ওইনা ‘সোভরেন ৱেলথ ফন্দ’ অমসুং ‘পেন্সন ফন্দ’গী ওইনা তেক্স থীবগী থোংদা কোম্থোকপা কয়া লৈগনি। ভারতকী এফ.দি.আই. অসি ইং ২০১৯দা চাদা ২০গী চাংদা হেনগৎখি। হায়রিবা অসি মালেমগী ওইবা এফ.দি.আই.গী ইনফ্লোদা চাদা ১ হন্থরিঙৈ তাঞ্জাদা থোকখিবনি। মসিনা ঐখোয়গী এফ.দি.আই.গী পথাপকী মাই পাকপগী মতৌ তাক্লি। মথক্তা পনখ্রিবা খোঙথাংশিং অসিনা ময়েক শেংবা অমসুং নুংঙাই য়াইফবা মতম অমা লাক্লগনি হায়বা তাক্লি। মখোয়শিং অসিনা অকনবা মালেমগী শেন্মিৎলোন অমা শেম্বদা শৌগৎকনি।
মরূপশিং,
ভারত মচা বিলিয়ন ১.৩না পান্দম অমনা চংশিল্লি – ‘আত্মানির্ভর ভারত’ নত্রগা মরোমদোম লেপচবা ভারত অমা ওইহন্নবা। ‘আত্মানির্ভর ভারত’না লোকেল অসি গ্লোবেলগা পুনশিল্লি। মসিনা ভারতনা তৌবা ঙম্বশিং অসিনা মালেমদা পীরিবা শাফু হেনগৎহন্নবা অমা ওইহন্নবা ঙম্না থৌদাং লৌরি। তাঙ্কক কয়াদা হন্না–হন্না ভারতনা ঐখোয়গী পান্দম অসিনা মালেমদা কান্নহনগনি হায়বা উৎলি। ঐখোয়গী লোকেলগী মথৌ তারিবশিং অসি য়ামজরবসু ঐখোয়না মালেমগী থৌদাং য়াবদা হনবা লৈতে। মালেমগী ওইনা জেনেরিক মেদিসিনশিং পুথোকপদা মাংজিল থাদুনা থৌদাং লৌরি। ঐখোয়না মালেমদা সপ্লাইশিং লেপ্তনা ফংহন্নবা হোৎরি। কোবিদ–১৯গী হীদাক পুথোকপগী রিসর্চতসু ঐখোয়না মাংজিং থাদুনা হোৎনরি। মরোমদোম লেপচবা অমসুং শান্তী লৈবা ভারতনা অফবা মালেম অমা ওইহনগনিখ।
‘আত্মানির্ভর ভারত’ অসিনা কৈথেলশিং অসি মথৌ তৌদনা লৈরম্বা অদু গগ্লোবেল ভেল্যু চেনগী মথৌ চিনবা মেন্যুফেকচরিং হব অমা ওইহন্দুনা ভারত্তা অওনবা পুরক্লি।
মরূপশিং,
মাংদা লৈরিবা লম্বী অসি খুদোংচাবশিংনা থল্লি। খুদোংচাবশিং অসি সরকারগী অমসুং লনাইগী সেক্তরশিংদা লৈরি। মখোয়না শেন্মীৎলোনগী সেক্তর লোয়ননা সোসিএল সেক্তরগী মপুং ওইবশিংবু কোনশিল্লি। হন্দক্তা হাপচিনখিবা সেক্তরশিংদা কোইলা, মাইনিং, রেলৱেজ, ঙাকশেল, স্পেস অমসুং এতোমিক ইনর্জী য়াওরি।
মোবাইল অমসুং ইলেক্ত্রোনিক্স, মেদিকেল দিভাইসশিং, ফার্মা সেক্তরশিংগী প্রদক্সন লিঙ্ক ইন্সেন্তিব স্কিমশিং হৌদোকখ্রে– মখোয়না মরাং কায়না ফংলি। অসিগুম্বা স্কিমশিং অসি অতোপ্পা চেম্পিয়ন সেক্তরশিংগীসু শেম শারি। এগ্রিকলচরেল মার্কেতিংদা অওনবশিং পুরকপা অমসুং য়ু.এস. বিলিয়ন দোলর ১৪গী এগ্রিকলচরেল ফাইনান্সিং ফেসিলিতীনা খুদোংচাবা কয়ামরুম পুরকখ্রে।
মরূপশিং,
ভারত্তা থেংনবা খুদোংচাদবশিংগীদমক ফলশিং পুরকপা থাজবা অদোমগী সরকার অমা লৈরি। ইজ ওফ লিবিং অসি ইজ ওফ দুইং ব্যুজিনেসকা চপ মান্ননা মরুওইনা লৌবা সরকার অমা। অদোম্না অপুনবা মীশিংগী ৬৫%না চহি ৩৫দগী তাবা মীওইশিং লৈবা নহা ওইরিবা লৈবাক অমদা মীয়েং তারি। অদোম্না লৈবাক অসিবু অৱাংবা থাকশিংদা পুখৎনবা ৱারেপ লৌখ্রবা এস্পিরেস্নেল ওইরিবা লৈবাক অমদা মিৎয়েং তারি। মসি ঐখোয়না নিংতম্বগী চহি ৭৫ শুবা মার্কতনি। অদোম্না রাজনীতিগী তংদু লৈতাবা অমসুং থৌশিলশিং মখা চত্থরিবা লৈবাক অমদা মিৎয়েং তারি। অদোম্না দিমোক্রেসী অমসুং জাতি কয়াদা কত্থোক্লিবা লৈবাক অমদা মিৎয়েং তারি।
লাকলো, ঐখোয়গা লোয়ননা খোঙচৎ অসিগী শরুক অমা ওইবীয়ু।
থাগৎচরি
য়াম্না থাগৎচরি।
