“শান্নরোইশিংগী মশক থোকপা হোৎনজমন্দগী, লৈবাক অসিনা ইথিল পীনিংঙাই ওইরবা মায় পাকপা কয়াগা লোয়ননা নীংতম্বগী অমৃত কালদা খোঙদারি”
“শান্নরোইশিংনা লৈবাক্কী নহারোলশিংদা শান্ন-খোৎনবখক্তা নত্তনা অতোপ্পা সেক্তরশিংদসু মীথোই মীহেন্নবা ইথিল পীরি”
“ঐখোয়গী নীংতম ইহৌগী খ্বাইদগী অথোইবা পাঙ্গল অমসু ওইখিবগুম্না অদোম্না লৈবাকপু ৱাখল্লোন অমসুং পান্দমগী হীরমদা লৈবাকপু অমত্তা ওইহল্লি”
“মচু অহুমগী ফিরালগী মপাঙ্গল অসিদি ঐখোয়না য়ুক্রেন্দা উখ্রে, মসিনা ভারত মচা খক্তগী নত্তনা অতোপ্পা লৈবাক্কী মীয়ামশিংনা লানফম অসিদগী থোক্লকপদা ঙাক্লৌ চুংগোই ওইখিবনি”
“ঐখোয়দা মালেমগী ওইনা অফবা, ইনক্লুসিব, তোঙানবা মতৌ চেনবা অমসুং মতিক লৈবা স্পোর্ত ইকোসীস্তেম অমা শেম্বগী থৌদাং লৈ। তেলেন্ত অমত্তা চিত্থহনবা য়াদে”

ঐহাক্না অদোম পুম্নমক্কা ৱারী শাববুদি য়াম্না পাম্বনি, অদুবু অদোম খুদিংগা ৱারী শাবদি ওইথোক্তবা য়াওই। অদুবু, অদোমগা তোঙান-তোঙানবা মতমদা অমমম ওইনা ৱারী শাবগী খুদোংচাবদি ফংজখি। অদুবু, অদোম্না ইশাগী মতম কাইথোকপীদুনা ঐহাক্কী লৈফমদা লাকপীরি অমসুং ইমুং অমগী মীওইগুম্না লাকপীরিবা অসিদা ঐহাক্না নুংঙাইবা ফাওই। ভারত মচা খুদিংনা অদোমগী মায় পাকপদা নুংঙাইবা ফাওবগুম্না ঐহাকসু মান্ননা নুংঙাইবা ফাওরি। অদোম্বু ঐহাক্না তরাম্না ওকচরি।

নুমিৎ নিনিগী মতুংদা লৈবাক অসিনা নীংতম্বগী চহি ৭৫ মপুং ফারগনি। অদোমগী মশক থোকপা হোৎনজমন্দগী, লৈবাক অসিনা ইথিল পীনিংঙাই ওইরবা মায় পাকপা কয়াগা লোয়ননা নীংতম্বগী অমৃত কালদা খোঙদাগদৌরিবসি য়াম্না চাউথোকচনীংঙাইনি।

মরুপশিং,

হৌখিবা চয়োল খরসিদা লৈবাক্না শান্ন-খোৎনবগী লমদা অচৌবা মায় পাকপা অনি ফংখ্রে। কম্মনৱেল্থ গেম্সতা পুৱারী ওইরবা থৌওং পাংথোকখিবগা লোয়ননা, লৈবাক অসিনা চেস ওলিম্পিয়াদসু অহানবা ওইনা য়ুম্বু ওইদুনা পাংথোকখি। চেস ওলিম্পয়াদ নীংথিনা পাংথোকখিবতা নত্তনা, ঐখোয়গী লিরবা চেসকী চৎনবী ঙাক্তুনা মশক থোকপা পরফোর্মেন্সসু উৎপা ঙমখি। ঐহাক্না চেস ওলিম্পিয়াদতা শরুক য়াখিবা শান্নরোই অমসুং মেদল লৌখিবশিংদা ঙসিগী থৌরমসিদা থাগৎপা ফোংদোক্লি।

মরুপশিং,

ঐহাক্না কম্মনৱেল্থ গেম্স হৌদ্রিঙৈদা অদোমগী মফমদা অদোম্না হল্লক্লবা তুংদা মায় পাকপগী থৌরম পাংথোক্কনি হায়না ৱাশকখি। ঐহাক্না অদোম্না শোইদনা মায় পাক্কনি থাজখি অমসুং ঐহাক্কী মেনেজমেন্তকী মফমদসু ঐহাক্না কয়া য়াম্না চিল্লবসু মতম কাইথোক্তুনা মায় পাকপগী নুংঙাইবা ফোংদোক্কনি খনখিবনি। ঙসিদি থৌরম অসি ওইথোক্লে। ঐহাক্না অদোমগা ৱারী শান্নবা মতমদা অদোমগী ইশাদা থাজবগী মতৌ উবা ফংই, মসিনা অদোমগী শক্তাক্নি। মেদল ফংলক্লবা অমসুং তুংদা মেদল ফংলক্কদৌরিবশিং খুদিংমক থাগৎপগী হক লৈ।

মরুপশিং,

ঐহাক্না অদোমগী মফমদা করিগুম্বা খরা হায়বা পাম্মি। অদোম্না মফমদুদা চাংয়েংনদুনা লৈবনি, অদুবু হিন্দুস্তান্দা মতমগী খেন্নবা লৈবনা, মফমসিগী মীওই করোর কয়ানা নুমিদাং তুমদনা লৈনখি। থেংলবা অহিং ফাওবদা অদোমগী শান্নবা য়েংদুনা লৈনখি। মীওই কয়া অমদি অদোমগী অপদেত লৌনবগীদমক্তা এলার্ম থমদুনা তুম্নখি। স্কোর কয়াদা লৈরে হায়দুনা হন্না হন্না য়েংনখিবা ঙাক্তনি। মশান্না অসিগীদমক্তা থৱাই হেন্না য়াওহনবদা মখোয়গী অচৌবা থৌদাং লৈখিবনি। মখোয় পুম্নমকসু থাগৎনীংঙাই ওইবা ঙাক্তনি।

মরুপশিং,

হন্দক্কী মতাংদা ঐখোয়না উৎখিবা পরফোর্মেন্স অসিদি শুপ্নগী মেদল মশিংনা তাকপা য়ারোই। শান্নরোই কয়া অমনা য়াম্না নক্না চাংয়েংনবগী মতৌ উখি। মসিমক মেদল ফংবদগী তাবা নত্তে। পোইন্ত সেকেন্দ অমা, পোইন্ত সেন্তিমীতর অমগী চাংদা ৱাৎপা ওইরগসু, মসিদি ঐখোয়না তুংদা অদুমক মেনখৎপা ঙমগনি। মসি ঐহাক্না অদোমগী মফমদগী থাজবা থম্মি। ঐখোয়গী পাঙ্গল লৈবা মশান্নশিংবু হেন্না মপাঙ্গল হাপ্পা অমসুং অনৌবা মশান্নশিংদা মশক থোকপা পরফোর্মেন্স উৎপা ঙমখিবদা ঐহাক্না নুংঙাইবা ফাওই। হোক্কী মতাংদা ঐখোয়না ঐখোয়গী মিংচৎ হন্না পুরকপা ঙমখিবা অসিগীদমক্তা ঐহাক্না তীম অনিমক্কী হোৎনজমন, পরফোর্মেন্সকীদমক্তা থাগৎচরি। মমাংগী মতমগা চাংদম্নবদা, ভারতনা অনৌবা মশান্না মরিদা মায় পাকপা ঙম্বগী অনৌবা পাম্বৈ কয়া খঙখি। শান্নরোইশিংনা লোন বোলদগী এথলেতিক্স ফাওবদা নীংথিনা শান্নখি। মসিগুম্বা পরফোর্মেন্স অসিদগী ভারতকী নহারোলশিংনা অনৌবা মশান্নদা মায় ওনশিনবগী থৌওং কয়া লৈবাক অসিদা য়াম্না হেনগৎলগনি। অনৌবা মশান্নশিংদা ঐখোয়না মসিগুম্বা পরফোর্মেন্স উত্তুনা অমসুং হান্নদগী হেন্না ফগৎহন্নবা হোৎনদুনা চৎকদবনি। মমাংগী মায়থোং কয়া অমা ঐহাক্কী মাঙদা লৈবা ঐহাক্না উরি। শরত, কিদম্বী, সিন্ধু, সৌরব, মিরাবাই, বজ্রঙ্গ, বিনেশ, সাক্ষী, অদোম্না খুদিংনা থাজবা ঙাক্লি। মীপুম খুদিংবু পুক্নিং থৌগৎলি। অদুগা ঐখোয়গী নহা ওইরিবা শান্নরোইশিংনসু মশক থোক্না শান্নখি। ঐহাক্না গেম্স মমাংদা ৱারী শান্নখিবা শান্নরোই খুদিংনা মখোয়গী ৱাশক ঙাক্লে। খ্বাইদগী অহানবা ওইনা শরুক য়াখিবা শান্নরোইশিংদগী মেদল ৩১ লাকখিবা অসিনা নহারোলশিংনা মশাদা থাজবা হেনবগী মতৌ তাক্লি। এক্সপেরিএন্স লৈরবা শরতনা অতোপ্পদগী খ্বাইদগী হেনবতা নত্তনা, অভিনাশ, প্রিয়ঙ্কা অমসুং সন্দীপ্না মালেমগী থাক্কী এথলিতশিংগা অহানবা ওইনা মাইয়োক্নখিবদা অনৌবা ভারতকী ইথিলগী শক্তম ঐখোয়না উবা ফংখি। লমজেল খুদিংদা, চাংয়েংনবা খুদিংদা ঐখোয়না নীংথিনা শেম শাদুনা লৈরে হায়বগী ইথিল হাপ্লি। এথলেতিক্স পোদিয়মগী মফম অনিদা পাইরিবা তিরঙ্গাদা ইকায় খুম্নদুনা ভারতকী শান্নরোইশিংনা লেপ্পগী শক্তম ঐখোয়না উবা ফংখি। অদুগা মরুপশিং, ঐখোয়গী ইচানুপীশিংগী মশান্না উবদা লৈবাক পুম্বনা চাউথোকচখি। ঐহাক্না পুজাগা হৌজিক্তা ৱারী শাবদা নীংথিনা হায়খিবনি, মহাক্কী পুক্নিং নুংঙাইবা ভিদিও য়েংলবা তুংদা মহাক্না ঙাকপীয়ু হায়বগী মথৌ তাদে হায়না ঐহাক্না সোসিএল মীদিয়াদা হায়খ্রে হায়না তমখিবনি। অদোম অসিদি লৈবাক্না মায় পাক্লে হায়না উই, অদোমগী পুকচেল শেংবা অমসুং হোৎনবা লেপ্তগী মতৌ কীদৌনুংদা মাঙহনগনু। ওলিম্পিক্সকী মতুংদা ঐহাক্না বিনেশতা মসিমক হায়খিবনি, অদুগা মহাক্না নুংঙাইতবগী ৱাখল থাদোক্তুনা নীংথিবা পরফোর্মেন্স উৎপদা ঐহাক্না নুংঙাইবা ফাওই। ভারতকী মচানুপীশিংনা বোক্সিং, জুদো, রেস্তলিং মশান্নদা মায় পাকখিবা অসি শীংথানীংঙাইনি। নীতুনদি মহাক্কী মাইয়োক্নরিবশিংবু লম্পাক থাদোক্তুনা চৎখিনবা শীনবগা মান্নখ্রে। হর্মনপ্রীতকী লুচিং মখাদা ভারতনা ক্রিকেত্তা মশক থোকপা পরফোর্মেন্স উৎখি। শান্নরোই খুদিংনা মশক থোক্না শান্নখি, অদুবু রেনুকাগী স্বিং মাইয়োক্নবা ঙম্বা হৌজিক ফাওবদা কনা অমত্তা লৈত্রি। শক্নাইরবশিংগী মরক্তা ৱিকেত খ্বাইদগী লৌবা মীওই ওইবা হায়বসি অচম্বা থৌওংদি নত্তে। মহাক্কী মাইথোংদা শিম্লাগী শান্তি ওইবা শক্তমগী মমি তারবসু, চিংগী অইং-অশাগী মোমোন মিনোক উরবসু, মহাক্কী অঙম-তানবা মতৌদা অফবা বেত্তর কয়া মাইথীখি। মসিগুম্বা পরফোর্মেন্স অসিনা লৈবাক্কী মনুং হঞ্জিনবা নুপীমচাশিংদা ইথিল পীগনি, পুক্নিং থৌগৎকনি।

মরুপশিং,

অদোম খুদিংনা লৈবাক্কী মফমদা মেদল পীবা খক্তা নত্তনা, পুম্নমক্কী নুংঙাইবা ফোংদোক্নবা, চাউথোকচনবা তাঞ্জা পীবা খক্তা নত্তে। মসিনা এক ভারত, শ্রেস্থ ভারতকী ৱাশকপুসু মপাঙ্গল হেনগৎহল্লিবনি। অদোম্না শান্ন-খোৎনবতা নত্তনা অতোপ্পা সেক্তরশিংদসু লৈবাক্কী নহারোলগী মফমদা মীথোই মীহেনবা ঙম্নবা ইথিল পীরিবনি। অদোম্না ৱাখল্লোন অমা অমসুং পান্দম অমগীদমক্তা লৈবাকপু অমত্তা ওইনা পুরক্লি, মসিমক ঐখোয়গী নীংতম ইহৌগী খ্বাইদগী অথোইবা পাঙ্গল ওইখিবনি। মহাত্মা গান্ধী, নেতাজী সুভাস চন্দ্র বোস, মঙ্গল পান্দে, তাত্যা তোপে, লোকমান্য তিলক, সর্দার ভগৎ সিংহ, চন্দ্রসেখর আজাদ, অশফাক উল্লা খান অমসুং রামপ্রসাদ বিসমিলগুম্বা মশিং থীঙমদ্রবা নীংতম লান্মীশিংগী থৌওংনা খেন্নরবসু, পান্দমদি অমত্তা ওইখিবনি। রানী লক্ষমীবাই , ঝলকারী বাই, দুর্গা ভাভী, রানী চেনম্মা, রানী গাইদিনল্যু অমসুং বেলু নচিয়ারগুম্বী মশিং থীঙমদ্রবী নুপীশিংনা চৎনবী খুদিং থুগাইদুনা নীংতম্বগীদমক্তা লান্থেংনখি। বির্সা মুন্দা ওইরো, অল্লুরী সীতারাম রাজু ওইরো, নত্ত্রগা গোবিন্দ গুরু ওইরো, মখোয়গুম্বা শক্নাইরবা ত্রাইবেল নীংতম লান্মীশিংনা মশাগী থৌনা খক্কী খুত্থাংদা চাউরবা অমসুং মপাঙ্গল লৈরবা লান্মীশিংগা মাইয়োক্নখিবনি। দাক্তর রাজেন্দ্র প্রসাদ, পন্দিত নেহরু, সর্দার পতেল, বাবা সাহেব অম্বেদকর, আচার্য় বিনোবা ভাবে, নানাজী দেশমুখ, লালবহাদুর সাস্ত্রী, শ্যামা প্রসাদ মুখর্জীগুম্বা মশিং য়াম্লবা শক্নাইরবশিংনা নীংতম্বা ভারতকী মঙলান মঙফাওনহন্নবগীদমক্তা মশাগী পুন্সি কত্থোকখি। নীংতম্বদগী হৌদুনা নীংতম্বা ভারতকী অপাম্বা ফংহন্নবগীদমক্তা মখোয়না অমত্তা ওইনা হোৎনমিন্নখিবগী ৱাখল্লোনগা লোয়ননা অদোম খুদিংনা শান্নবুংদা খোঙদাখি। অদোমগী খুদিংগী রাজ্য, জিলা, খুঙ্গং, লোল তোঙাঞ্জরবসু, অদোম খুদিংনা ভারতকী মিংচৎ অমসুং ইকায় খুম্নবগীদমক্তা ইশাগী খ্বাইদগী হৈজবী উৎখি। অদোম্বু তিরঙ্গানা ইথিল অমসুং পাঙ্গল হাপখি। মচু অহুমগী ফিরালগী মপাঙ্গল অসিদি ঐখোয়না য়ুক্রেন্দা উখ্রে, মসিনা ভারত মচা খক্তগী নত্তনা অতোপ্পা লৈবাক্কী মীয়ামশিংনা লানফম অসিদগী থোক্লকপদা ঙাক্লৌ চুংগোই ওইখিবনি।

মরুপশিং,

হৌখিবা মতমশিংদা ঐখোয়না অতোপ্পা তুর্নামেন্তশিংদসু মশক থোকপা পরফোর্মেন্স উৎখি। ৱর্ল্দ এথলেতিক্স চেম্পিয়নশিপ্তা ঐখোয়না হৌজিক ফাওবগী ওইবা খ্বাইদগী নীংথিবা অমসুং মায় পাকপা পরফোর্মেন্স উৎখি। ৱর্ল্দ অন্দর ২০ এথলেতিক্স চেম্পিয়নশিপ অমসুং পেরা বেদমিন্তন ইন্তর্নেস্নেল তুর্নামেন্ততসু অনৌবা রেকোর্দ কয়া থমখি। মসিদি ভারতকী শান্ন-খোৎনবগী ওইনা খ্বাইদগী চাউথোকচনীংঙাই ওইবা পুংফম্নি। ঙসি, মফমসিদা কোচ কয়া অমসু য়াওরি, কোচিং স্তাফকী মেম্বর অমসুং স্পোর্ত এদমিনিস্ত্রেসনগী মীওই কয়াসু লৈবীরি। মায় পাকপশিং অসিদা অদোমগী চাউরবা থৌদাং য়াওরি। অদোমগী থৌদাংসু য়াম্না মরু ওইবনি। ঐহাক্না খনবদা মসিদি হৌরকপদা ঙাইরি, ঐখোয়না তুমিন্না ফমদুনা খক লৈথোক্লোই। ভারতকী শান্ন-খোৎনবগী সনাগী মতম্না থোঙজিন্দা হৌজিক থীল্লরে। খেলো ইন্দিয়াগী থাক্তগী থোক্লক্তুনা মালেমগী থাক্তা মশক থোকপা থৌওং পাংথোকখিবদা ঐহাক্না নুংঙাইবা ফাওই। তি.ও.পি.এস. (তার্গেত ওলিম্পিক পোদিয়ম স্কিম)গী কান্নবা মহৈসু ঐখোয়না উরে। অনৌবা তেলেন্ত খঙদোক্তুনা মখোয়বু মীয়ামগী ফম্বাক্তা পুথোক্নবা ঐখোয়না হেন্না হোৎনফম থোকপগী তঙাই ফদবা লৈরে। ঐখোয়দা মালেমগী ওইনা অফবা, ইনক্লুসিব, তোঙানবা মতৌ চেনবা অমসুং মতিক লৈবা স্পোর্ত ইকোসীস্তেম অমা শেম্বগী থৌদাং লৈ। তেলেন্ত অমত্তা চিত্থহনবা য়াদে, মরমদি মখোয়না লৈবাক্কী লন্নি, মমায়নি। ঐহাক্না শান্নরোইশিংগী মফমদা লাক্কদৌরিবা এসিয়ন গেম্স অমসুং ওলিম্পিক্সকীদমক্তা নীংথিনা শেম-শানবা ৱাফম থমজরি। ঐহাক্না নীংতম্বগী চহি ৭৫ মপুং ফারকপসিদা ৱাফম অমা থমজনীংই। নীংতম্বগী অমৃত মহোৎসবকী পুংফম অসিদা লৈবাক্কী স্কুল, অমসুং এজুকেসনগী ইন্সতিত্যুসন ৭৫দা চত্তুনা অঙাংশিংদা ইথিল পীনবা ঐহাক্না মমাংদসু হায়খ্রবনি। খোঙজং অসিবু ঐখোয়না মখা চত্থহনগদবনি। হৌজিক চৎপা ফংখিদবা মরুপশিংনা তুংদা শোইদনা চৎপীয়ু হায়জরি। অদোম্বু নহারোলশিংনা রোল মোদেল ওইনা য়েংনরিবনি, অদুনা অদোমগী ৱাফম্বু মখোয়না থৱাই তানা তাগনি। লৈবাক্কী হৌরক্লিবা চারোন-শুরোন্দা কান্নবা পীনবগীদমক্তা মীয়াম্না অদোম অমদি অদোমগী মতিকপু শকখঙবা, অমসুং পাম্নবা হেনগৎলক্লিবা অসিগী কান্নবা লৌসি। ঐহাক্না ঙসিগী বিজয় য়াত্রা অসিগীদমক্তা অদোম খুদিংবু অমুক্কা হন্না থাগৎচরি অমসুং য়াইফ পাউজেলসু পীজরি। পুম্নমকপু থাগৎচরি!

Explore More
৭৭শুবা নিংতম্বা নুমিৎ থৌরমদা লাল কিলাদগী প্রধান মন্ত্রী শ্রী নরেন্দ্র মোদীনা ৱা ঙাংখিবগী মপুংফাবা ৱারোল

Popular Speeches

৭৭শুবা নিংতম্বা নুমিৎ থৌরমদা লাল কিলাদগী প্রধান মন্ত্রী শ্রী নরেন্দ্র মোদীনা ৱা ঙাংখিবগী মপুংফাবা ৱারোল
India sets sights on global renewable ammonia market, takes strides towards sustainable energy leadership

Media Coverage

India sets sights on global renewable ammonia market, takes strides towards sustainable energy leadership
NM on the go

Nm on the go

Always be the first to hear from the PM. Get the App Now!
...
সোসিয়েল মিদিয়াগী মফম 27 মে, 2024
May 27, 2024

Modi Government’s Pro-People Policies Catalysing India’s Move Towards a Viksit Bharat