খুরমজরি!
অহলান ৱা সহলান !!!
নখোয়গী নহা ওইরিঙৈগী থৌনা অমসুং ইনর্জীনা মফম অসিগী এত্মোস্ফিয়রবু তশেংনা থৌনা হাপখি। ঐহাক্না হোল অসিদা লাকপা ঙমখিদ্রবা অমসুং মনাক নকপদা লৈবা হোল অমদা স্ক্রীন্দা প্রোগ্রাম অসি য়েংলিবা ইচিল-ইনাও পুম্নমকপুসু তরাম্না ওকচরি। মখোয়না অসুক শাংনা লাক্লবসু হোল অসিদা চঙবা ঙমদনা লৈবনা মখোয়দা করম্না ফাওগদগে হায়বদু অদোম্না খল্লমগনি।
মরুপশিং,
ঐগী মমাংদা মিনি-ইন্দিয়া অমা উবা ফংলি; মফম অসিদা মালায়ালি কয়া অমসু লৈ হায়না ঐনা খল্লি।
সুখম আনো ?
অমসুং মলয়ালম ঙাংবশিং খক্তা নত্তনা, মফম অসিদা তমিল, তেলুগু, কন্নরা অমসুং গুজরাতি ঙাংবশিংসু লৈ।
নলমা?
বাগুনারা?
চেন্না-গিদ্দিরা?
কেম শো?
মরুপশিং,
ঙসি ঐখোয়না ইমুং অমগুম্না পুল্লি। ঙসি ঐখোয়না ঐখোয়গী লৈবাক, ঐখোয়গী তীম ইন্দিয়াবু ইকাই খুম্নবা উৎলি।
মরুপশিং,
ভারত্তা, ঐখোয়গী খেন্নবসি ঐখোয়গী কলচরগী মপাঙ্গল কনবা য়ুম্ফম অমনি। নোংমগী পুন্সিদা অনৌবা মচু অমা হাপচিল্লি, চহি খুদিংগী কুমহৈ অমা ওইরকই, অমসুং চৎনবী খুদিংগী অনৌবা মিৎয়েং অমা লৈ।
মরম অসিনা, ভারত মচাশিংনা ঐখোয়না চৎপা মফম খুদিংমক্তা অমসুং ঐখোয়না হিংলিবা মফম খুদিংমক্তা, ঐখোয়না মখল-মখা কয়াবু ইকায় খুম্নবা উৎলি। ঐখোয়না মফম অদুগী চৎনবীগস চান্নহল্লগনি। ঐহাক্না ঙসি ওমানদা চপ মান্নবা ৱাখল্লোন অসি উরি।
হায়রিবা ভারত মচাশিং অসি পুন্না হিংমিন্নবা অমসুং পুন্না থবক তৌমিন্নবগী পুন্সিগী ওইবা খুদম অমা ওইরক্লি।
মরুপশিং,
ভারতকী কলচরেল হেরিতেজ অসি অথোইবা মওংদা শকখঙনখ্রে। অদোম্না খংজিনবা য়াই, য়ু.এন.ই.এস.সি.ও.না দীপাবলীবু মীওইবা খুন্নাইগী ইন্তিরেতিব কলচরেল হেরিতেজকী লিস্ততা য়াওহনখ্রে।
হৌজিক, দিৱালীগী মৈরা অসি ঐখোয়গী য়ুমশিং খক্তা নত্তনা মালেম পুম্বদা মঙাল পীগনি। মসি মালেম শীনবা থুংনা লৈরিবা ভারত মচা খুদিংমক্কী চাউথোকচনীংঙাই ওইবা তাঞ্জা অমনি। দিৱালীবু মালেমগী ওইনা শকখঙবা অসিনা ঐখোয়না শরুক য়ামিন্নরিবা মঙাল অদুবু ইকায় খুম্নবা উৎলি। মঙাল অসিনা আশা, অপুনবা অমসুং মীওইবা খুন্নাইবু শন্দোক্লি।
মরুপশিং,
ঙসি, ঐখোয় পুম্নমক্না ভারত-ওমান "ফ্রেন্দশিপ ফেস্তিবেল (মৈত্রী পর্ব)" অসি পাংথোক্নবগীদমক মফম অসিদা উনখ্রে।
MAITRI হায়বসিনা তাক্লিঃ
M না মেরিতাইম হেরিতেজ
A না এস্পিরেসনশিং
I না ইন্নোবেসন
T না ত্রস্ত অমসুং তেক্নোলোজী
R না রেস্পেক্ত
I না ইনক্লুসিব গ্রোথ
অতোপ্পা ৱাহৈ অমদা হায়রগদি, "মৈত্রী পর্ব" অসিনা ঐখোয়গী লৈবাক অনিগী মরক্তা লৈনরিবা মরী, ঐখোয়গী পুৱারী অমসুং ঐখোয়গী চাউখৎপা তুংলমচৎকীদমক থৌরম পাংথোক্লি। ভারত অমসুং ওমাননা চহি চা কয়াগী মমাংদগী নুংশি চান্নবা মরী লৈনদুনা লাক্লি।
ইন্দিয়ন ওসিনগী মোন্সুনগী নুংশিৎনা লৈবাক অনিগী মরক্তা ললোন-ইতিক তৌবদা মতেং পাংই। ঐখোয়গী ইপা-মপুশিংনা লোথাল, মান্দভি, অমসুং তাম্রালিপ্তিগুম্বা পোর্তশিংদগী মাস্কাত, সুর, অমসুং সালালাদা উগী জহাজশিংদা চৎলম্মি।
অমসুং মরুপশিং,
ঐখোয়গী এম্বেসেদরনা মান্দবী অমসুং মুস্ কেৎকী মরক্তা লৈরিবা পুৱারী ওইরবা মরীশিং অদু লাইরিক অমদা ইদুনা থম্লিবা অসিদা ঐহাক নুংঙাইবা ফাওই। মফম অসিদা লৈরিবা মীওই খুদিংমকপু, মরুওইনা নহারোলশিংবু, মসিবু পাবা অমসুং ওমানগী মখোয়গী মরূপশিংগা শরুক য়ামিন্নবা ঐনা পুক্নিং থৌগৎলি।
হৌজিক্তি, অদোম্না ওজাশিংনা স্কুলদা হোমৱার্ক পীগনি হায়না খনবা য়াই, অমসুং মফম অসিদা, মোদী জীনা হোমৱার্কসু পীখ্রে!
মরুপশিং,
লাইরিক অসিনা ভারত অমসুং ওমান অসি জিওগ্রাফীনা শম্নহনবতা নত্তনা, জেনরেসনশিংনা শম্নহল্লি হায়বসি উৎলি। অমসুং অদোম পুম্নমক অসি চহি চা কয়াগী মরীশিং অসিগী খ্বাইদগী ফবা ঙাক্লৌশিংনি।
মরুপশিং,
ঐহাক্না ওমানদগী "নো ইন্দিয়া" ক্বিজদা শরুক য়াখিবগী মতাংদসু খংখি। ওমানদগী মীওই লিশিং তরা হেনবনা ক্বিজ অসিদা শরুক য়াখি। ওমাননা মালেমগী ওইনা মরিশুবা মফমদা লৈরে।
অদুবু ঐহাক্না হৌজিকমক্কীদি খুবাক খুখিরোই। ওমান অসি নম্বর ৱান ওইগদবনি! ঐহাক্না মীশিং য়াম্লবা মীওই কয়া শরুক য়াদুনা হেন্না চাউনা উবা পাম্মি। ভারতকী অঙাংশিংনা তশেংনা শরুক য়াগদবনি, অদোম্না অদোমগী ওমানগী মরুপশিংবুসু ক্বিজ অসিদা শরুক য়ানবা পুক্নিং থৌগৎকদবনি।
মরুপশিং,
ললোন-ইতিক্তগী হৌরকখিবা ভারত-ওমানগী মরী অসি হৌজিক এজুকেসনগী থোংদা হেন্না চেৎশিল্লক্লি। ওমানদা লৈরিবা অতোপ্পা কম্ম্যুনিতীশিংগী অঙাং লিশিং কয়া য়াওনা চাউরাক্না মহৈরোই ৪৬,০০০না মফম অসিদা লৈরিবা ভারতকী স্কুলশিংদা মহৈ তম্বা ফংলি হায়না ঐনা খঙলে ।
ওমানদা ভারতকী মহৈ-মশিং তম্বনা চহি ৫০ মপুং ফারক্লি। মসিনা ঐখোয়গী লৈবাক অনিগী মরক্তা লৈনরিবা মরীদা মরুওইবা মাইলস্তোন অমা ওইরি।
মরুপশিং,
ভারতকী স্কুলশিংগী মাইপাকপা অসি হিজ মেজেস্তী দি লেৎ সুলতান কাবুসনা হোৎনরমদ্রবদি ওইথোক্লোই। মহাক্না ইন্দিয়ন স্কুল, মসকাৎ য়াওনা ইন্দিয়ন স্কুলশিংগীদমক লম অমসুং মথৌ তাবা তেংবাং পুম্নমক পীখি। মহারাজ সুলতান হাইথামনা চৎনবী অসিবু মখা চত্থরি।
মফম অসিদা লৈরিবা ভারত মচাশিংবু মখোয়না মতেং পাংলিবা অমসুং ঙাক-শেনলিবা অসিগীদমক্তা ঐহাক্না অখন্নবা থাগৎপা ফোংদোকচরি।
মরুপশিং,
অদোম পুম্নমক্না "পরিক্ষা পে চর্চা" প্রোগ্রাম অসি খঙনরক্কনি। ওমানদগী মহৈরোই কয়া অমসু মসিদা শরুক য়াখি। ঐহাক্না থাজবা থম্লি মদুদি হায়রিবা খন্ন-নৈনবশিং অসি মহৈরোয় অমসুং মমা-মপা পুম্নমক্কী মতেং ওইগনি মরমদি মখোয়না ঐখোয়বু স্ত্রেস য়াওদবা মওংদা চাংয়েং পাংথোক্নবা লমজিং-লমতাকপীগনি।
মরুপশিং,
ওমানদা লৈরিবা ভারত মচাশিংনা ভারতকী মপান্দা তোইনা চৎলি অমসুং লৈবাক অসিদা ওইরক্লিবা চাউখৎ-থৌরাং খুদিংমক্কী মতাংদা খঙবা ঙম্মী। ভারতনা চাউখৎপগী অনৌবা খোঙজং অমা চংশিল্লক্লিবা অসি অদোম পুম্নমক্না উবা ফংলি। মসিগী খোঙজেল অসিনা ঐখোয়গী ৱাখল্লোনশিং অদু উৎলি অমসুং মসি ঐখোয়গী থবক তৌবদা উবা ফংই।
নুমিৎ খরনিগী মমাংদা, ইকোনোমিক গ্রোথকী মশিং থাদোরকখি, অমসুং অদোম্না খঙলিবমখৈ, ভারতকী গ্রোথ অসি ৮%দগী হেনখ্রে। মসিনা তাক্লিবদি ভারত অসি মালেমদা খ্বাইদগী য়াংনা চাউখৎলক্লিবা মরুওইবা ইকোনোমী অমা ওইরি। মালেম পুম্বনা অৱাবা মায়োক্নরিবা মতম অসিদা মসি থোক্লি। খ্বাইদগী চাউবা শেন্মিৎলোনগী লৈবাকশিংনা চাদা খরা হেনগৎনবা হোৎনরি, অদুম ওইনমক ভারতনা অৱাংবা থাক্কী গ্রোথকী লম্বীদা লেপ্তনা চৎলি। মসিনা ঙসি ভারতকী শক্তি উৎলি।
মরুপশিং,
ঙসিদি, ভারতনা সেক্তর খুদিংমক্তা অমসুং ফ্রন্ত খুদিংমক্তা মমাংদা লৈখিদ্রিবা মওংদা থবক তৌরি। হৌখিবা চহি ১১গী মশিং খরা ঐহাক্না অদোমগা লোয়ননা শরুক য়ামিন্নবা পাম্মি, মদুদি অদোমসু চাউথোকচবা পোক্কনি হায়না ঐহাক্না থাজৈ।
মফম অসিদা মহৈরোইশিং অমসুং মমা-মপা কয়ানা শরুক য়াদুনা লৈবনা, ঐহাক্না এজুকেসন অমসুং স্কিল সেক্তরদা খন্ন-নৈনদুনা হৌরগনি। হৌখিবা চহি ১১দা ভারত্তা অনৌবা কোলেজ লিশিং কয়া লিংখৎখ্রে।
আই.আই.তি.শিংগী মশিং অসি তরামাপলদগী তরাহুমদা হেনগৎলে। চহি তরামরিগী মমাংদা, ভারত্তা আই.আই.এম. ১৩ লৈরম্মি; ঙসিদি ২১ লৈরে। অসিগুম্বা মওংদা, AIIMSগী মতাংদা, 2014গী মমাংদা মসিদা মীওই তরেৎখক লৈরম্মি, ঙসিদি, ভারত্তা AIIMS 22 লৈরে।
ভারত্তা মেদিকেল কোলেজশিংগী মশিং অসি ৪০০দগী তানা লৈরম্মি। ঙসিদি, লৈবাক শীনবা থুংনা চাউরাক্না মেদিকেল কোলেজ ৮০০ লৈরে।
মরুপশিং,
ঙসি ঐখোয়না চাউখৎলবা ভারত অমগীদমক ঐখোয়গী এজুকেসন অমসুং স্কিল ইকোসিস্তেম শেমগৎলি। অনৌবা এজুকেসন পোলিসী অসিনা মসিদা মরু ওইবা থৌদাং অমা লৌরি। মসিগী পোলিসী মোদেল অসিগী শরুক অমা ওইনা, পি.এম. শ্রী স্কুল লিশিং ১৪ হেন্না লিংখৎলি।
মরুপশিং,
স্কুলশিং, কোলেজশিং, অমসুং য়ুনিভর্সিতীশিং অসি পাকথোক চাউথোকপা মতমদা, বিলদিংশিং শাবখক্তমক নত্তনা; লৈবাক্কী তুংলমচৎ অসি মপাঙ্গল কনখৎহল্লি।
মরুপশিং,
ভারতকী চাউখৎপগী খোঙজেল অমসুং পাক-চাউবা অসি এজুকেসন খক্তদা নত্তনা অতোপ্পা সেক্তরশিংদসু উবা ফংই। হৌখিবা চহি ১১ অসিদা, ভারতকী ইনস্তোল তৌরবা সোলার ইনর্জী কেপাসিতী অসি শরুক তরা হেনগৎখ্রে, অমসুং সোলার মোদুল মেনুফেকচরিংনা শরুক তরা হেনগৎখ্রে। অসুম্না ভারতনা গ্রীন গ্রোথকী মায়কৈদা খোঙজেল য়াংনা চংশিল্লি।
ঙসিদি, ভারত অসি মালেমগী খ্বাইদগী চাউবা ফিনতেক ইকোসিস্তেমগী য়ুম্ফম ওইরে, খ্বাইদগী চাউবা স্তীল পুথোকপা অনিশুবা লৈবাক ওইরে, অমসুং খ্বাইদগী চাউবা মোবাইল পুথোকপা অনিশুবা লৈবাক ওইরে।
মরুপশিং,
ঙসিদি, ভারত্তা লাকপা মীওই খুদিংমক্না ঐখোয়গী মোদর্ন ইনফ্রাস্ত্রকচরদা পুক্নিং চিংশিন্দুনা লৈরি। মসি হৌখিবা চহি ১১ অসিদা ঐখোয়না ইনফ্রাস্ত্রকচরদা শরুক মঙা হেন্না ইনবেস্ত তৌবনা ওইথোকহল্লে।
এয়রপোর্ত মশিং অসি শরুক অনি হেনগৎখ্রে। ঙসিদি, মমাংগী চাংদগী শরুক অনি হেনবা হাইৱেশিং শেমগৎলি, রেলৱে লাইনশিং খোঙজেল য়াংনা শেমগৎলি, অমসুং রেলৱেজ ইলেক্ত্রিফিকেসন চৎথরি।
মরুপশিং,
অসিগুম্বা মশীংশিং অসি মায় পাকপা খক্তা নত্তে, মখোয় অসি চাউখৎলবা লৈবাক অমা ওইবগী ভারতকী মঙলান অদু ফংবা ঙম্নবগী খোংথাংনি। ২১শুবা চহি চাগী ভারতনা থৌনা ফরবা ৱারেপ লৌরি, খোঙজেল য়াংনা থবক পায়খৎলি, মায় পাক্নবা পান্দম থম্লি অমসুং লেপখ্রবা মতমগী মনুংদা মহৈশিং ফংহল্লি।
মরুপশিং,
ঐহাক্না অতোপ্পা চাউথোকচনীংঙাই ওইবা ৱাফম অমগা লোয়ননা শরুক য়াজরি। ঙসিদি, ভারতনা মালেমগী খ্বাইদগী চাউবা দিজিতেল পব্লিক ইনফ্রাস্ত্রকচর শেমগৎলি।
ভারতকী য়ু.পি.আই. নৎত্রগা য়ুনিফাইদ পেমেন্ত ইন্তরফেস অসি মালেমগী খ্বাইদগী চাউবা রিএল-তাইম দিজিতেল পেমেন্ত সিস্তেমনি। পেমেন্ত সিস্তেম অসিগী স্কেলগী ৱাখল্লোন অমা পীনবগীদমক, ঐহাক্না অপিকপা খুদম অমা পীজগে।
ঐহাক মফমসিদা মিনিত ৩০ রোম লৈরে। হায়রিবা মিনিত ৩০ অসিদা, ভারতনা য়ু.পি.আই.গী খুত্থাংদা রিএল-তাইম দিজিতেল পেমেন্ত মিলিয়ন ১৪রোম প্রোসেস তৌখ্রে। হায়রিবা ত্রাঞ্জেক্সনশিংগী অপুনবা ভেল্যু অসি লুপা বিল্লিয়ন ২০ হেনখ্রে। অচৌবা শো রুমশিংদগী হৌরগা অপীকপা ভেন্দরশিং ফাওবদা, ভারতকী মীপুম খুদিংমক অসি পেমেন্ত সিস্তেম অসিগা শম্নরি।
মরুপশিং,
মফম অসিদা মহৈরোই কয়া অমা লৈরি, অমসুং ঐহাক্না অতোপ্পা নুংঙাইবা খুদম অমা শমজিন্নবা পাম্মি। ভারতনা মোদর্ন দিজিলোকর সিস্তেম অমা শেমগৎলে। ভারত্তা বোর্দ একজাম পাংথোকপা মতমদা, মার্ক শীৎশিং অসি মহৈরোয়শিংগী দিজি-লোকর একাউন্তশিংদা হকথেংননা অপলোদ তৌই। পোকপদগী হৌরগা চহি য়াম্লবা ফাওবদা, সরকারনা ইসু তৌবা দোক্যুমেন্ত খুদিংমক দিজি-লোকরদা স্তোর তৌবা য়াই। অসিগুম্বা দিজিতেল সিস্তেম কয়ানা ঙসিদি ভারত শীনবা থুংনা পুন্সি মহিং লাইথোকহল্লি।
মরুপশিং,
অদোম পুম্নমক্না ভারতকী চন্দ্রয়ান মিসনগী অঙকপা অদু উবা ফংলে। ভারত অসি থাগী খা থংবা পোলদা য়ৌখিবা মালেমগী অহানবা লৈবাকনি। মসি খক্তমক নত্তে, ঐখোয়না মিসন অমখক্তদা সেতেলাইত ১০৪ অমুক্তংদা থাগৎতুনা রেকোর্দসু থম্লে।
ভারতনা হৌজিক গগনয়ান প্রোগ্রামগী মখাদা অহানবা হ্যুমেন স্পেস মিসন হৌদোক্নবা শেম-শারি। ভারতকীসু মশাগী স্পেস স্তেসন অমা ওরবিৎতা লৈরকপা মতম অদু লাপত্রে।
মরুপশিং,
ভারতকী স্পেস প্রোগ্রাম অসি মসিগী মশাগী ঙমখৈ খক্তদা অকক্নবা ওইদে। ঐখোয়না ওমানগী স্পেস এস্পিরেসনশিংদসু মতেং পাংলি। চহি তরুক নৎত্রগা তরেৎকী মমাংদা ঐখোয়না স্পেস কোওপরেসনগী মতাংদা এগ্রীমেন্ত অমা সাইন তৌখি। ইজরোনা ইন্দিয়া-ওমান স্পেস পোর্তেল শেমগৎলে হায়না ঐহাক্না নখোয়দা খঙহনবদা নুংঙাইবা ফাওই। স্পেস পার্তনরশিপ অসিদগী ওমানী নহারোলশিংসু কান্নবা ফংগনি হায়না ঐখোয়না লেপ্পা লৈতনা হোৎনরি।
মফম অসিদা লৈরিবা মহৈরোয়শিংগা লোয়ননা ঐহাক্না অতোপ্পা পাউ খরা শিন্নবা পাম্মি। ইসরোনা "YUVIKA" কৌবা অখন্নবা প্রোগ্রাম অমা পায়খৎলি। মসিনা ভারতকী মহৈরোয় লিশিং কয়াবু স্পেস সাইন্সকা মরী লৈনহল্লি। হৌজিক ঐখোয়না হোৎনরিবদি ওমানগী মহৈরোয়শিংদসু প্রোগ্রাম অসিদা শরুক য়াবগী খুদোংচাবা পীবনি।
ওমানগী মহৈরোই খরনা বেঙ্গলোরদা লৈবা ইসরো সেন্তরদা চৎতুনা মফম অদুদা মতম কুইনা লৈহন্নবা ঐহাক্না হায়জরি। মসিনা ওমানী নহারোলশিংগী স্পেস এস্পিরেসনশিংবু অনৌবা অৱাংবা থাক্তা পুখৎনবা অফবা হৌরকফম অমা ওইগনি।
মরুপশিং,
ঙসিদি, ভারতনা মশাগী অরুবা শিংনবশিং অসিগী ৱারোইশিন পুরকপা খক্তা নত্তনা ৱারোইশিনশিং অসিনা মালেমগী মীওই কোতি কয়াগী পুন্সিদা করম্না ফগৎহনগনি হায়বগী মতাংদা থবক তৌরি।
সোফৱেয়র দিবেলপমেন্ততগী হৌরগা পেরোল মেনেজমেন্ত ফাওবা, অমসুং দেতা এনালাইসিসতগী হৌরগা কস্তমর সপোর্ত ফাওবা, মালেমগী ব্রান্দ কয়া অমা ভারতকী তেলেন্তশিংগী পাঙ্গলনা মাংলোমদা চংশিল্লি।
দিকেদ কয়াগী মমাংদগী ভারত অসি আই.তি. অমসুং আই.তি.গা মরী লৈনবা সর্বিসশিংদা মালেমগী পাৱরহাউস অমা ওইদুনা লাক্লি। হৌজিক ঐখোয়না মেন্যুফেকচরিংবু আই.তি.গী পাৱরগা পুনশিন্নরি। মসিগী ৱাংঙুলোল অসি 'ভাসুধৈব কুতুম্বকম'না ইথিল পীবনি, মালেম অসি ইমুং অমনি হায়বা ৱাখল্লোন অসিদা য়াওরি: মেক ইন ইন্দিয়া, মেক ফোর ৱার্ল্দ।
মরুপশিং,
ভেক্সিন ওইগেরা নৎত্রগা জেনেরিক হিদাক ওইগেরা, মালেমনা ঐখোয়বু মালেমগী ফার্মাসি কৌই। ভারতকী মমল হোংবা অমসুং অৱাংবা থাক্কী হেল্থকেয়র সোলুসনশিংনা মালেম শীনবা থুংনা মীওই লাক্ষ কয়াগী পুন্সি কনবা ঙমহল্লি।
কোবিদকী মতমদা, ভারতনা মালেমদা ভেক্সিন মিলিয়ন ৩০০ রোম থাদোকখি। ভারতনা শেম্বা কোবিদ ভেক্সিন চাউরাক্না লিশিং অমা ওমানগী মীয়ামদা মতেং পাংলিবা অসিদা ঐহাক নুংঙাইবা ফাওই।
অমসুং মরুপশিং,
নীংশিংবীয়ু, মীপুম খুদিংমক্না মশাগীদমক্তা মীৎয়েং চংলিবা মতম অদুদা ভারতনা থবক অসি পায়খৎখি। ঐখোয়না মালেমগী মরমদা খনবা হৌখি। ভারতনা মালেমগী তঙাই ফদবশিং কোকহন্দুনা রেকোর্দকী মতমদা মসিগী নাগরিক বিল্লিয়ন ১.৪দা ভেক্সিন কাপথোকখ্রে।
মসি ভারতকী মোদেলনি, ২১শুবা চহিচাদা মালেমদা অনৌবা আশা পীরিবা মোদেলনি। মরম অদুনা, ঙসিদি, ভারতনা 'মেক ইন ইন্দিয়া' চিপশিং পুথোক্লি অমসুং এ.আই., ক্বান্তম কম্প্যুতিং, অমসুং গ্রীন হাইদ্রোজেনদা মিসন মোদতা থবক তৌরি। মসিনা অতোপ্পা লৈবাকশিংদা ভারতকী মাইপাকপা অসিনা মখোয়দা মতেং পাংগনি হায়বগী থাজবা পোকহল্লি।
মরুপশিং,
অদোম্না ওমানদা মহৈ তম্লি অমসুং থবক তৌরি। লাক্কদৌরিবা চহিশিংদা, অদোম্না ওমান অমসুং ভারত অনিমক্কী চাউখৎপদা মরু ওইবা থৌদাং অমা লৌরগনি। অদোম্না মালেম অসিদা লুচিংবা ওইগনি।
ওমানদা লৈরিবা ভারত মচাশিংনা খুদোংচাদবা অমত্তা মায়োক্নদনবা, ওমান সরকারনা য়ারিবা মতেং পুম্নমক পীরি। ভারত সরকারনসু অদোমগী খুদোংচাবদা মপুং ফানা পুক্নিং চিংশিল্লি। ওমান শীনবা থুংনা কন্সুলার সর্ভিস সেন্তর তরামঙা লিংখৎখ্রে।
মরুপশিং,
হৌখিবা চহী তরা অসিদা, মালেমগী ওইবা অৱাবা খুদিংমক্তা, ঐখোয়গী সরকারনা ভারত মচাশিংদা মতেং পাংনবা খোঙজেল য়াংনা থবক পায়খৎলি। মালেমগী মফম খুদিংমক্তা ভারত মচাশিংনা লৈরি, ঐখোয়গী সরকারনা মখোয়গী খোঙথাং খুদিংমক্তা মতেং পাংলি। মখোয়বু মতেং পাংনবা ইন্দিয়ন কম্ম্যুনিতী ৱেলফিয়র ফন্দ, দেদিকেতেদ হেল্প পোর্তেলশিং অমসুং প্রভাসী ভারতী বীমা য়োজনাগুম্বা ইনিসিয়েতিবশিং পায়খৎলি।
মরুপশিং,
হায়রিবা লমদম অসি ভারতকীদমক্তা অখন্নবা মফম অমা ওইরি অমসুং ওমান অসি ঐখোয়গীদমক্তা হেন্না মরু ওই। ভারত-ওমানগী মরী অসি হৌজিক্তি স্কিল দিবেলপমেন্ত, দিজিতেল লর্নিং, মহৈরোইশিং এক্সচেঞ্জ অমসুং ওন্ত্রপ্রিনরশিপকুম্বা হিরমশিংদা পাকথোক চাউথোকপা অসিদা ঐহাক নুংঙাইবা ফাওই।
ঐহাক্না থাজবা থম্লি মদুদি নহা ওইরিবা নহারোলশিং অসি লাক্কদৌরিবা চহিশিংদা ভারত-ওমানগী মরীবু অনৌবা থাক্তা পুখৎকনি। মফম অসিদা লৈরিবা ভারতকী স্কুলশিংনা মখোয়গী ৫০ ফারকপগী থৌরমশিং পাংথোকখ্রে। হৌজিক ঐখোয়না মথংগী চহি ৫০গী পান্দমগা লোয়ননা মাংলোমদা চংশিনবা তাই। মরম অদুনা, ঐহাক্না নহা ওইরিবা মীওই খুদিংমক্তা হায়জনীংই:
অচৌবা মঙলান থম্বা।
মপুং ফানা তমশিনবা।
থৌনা লৈনা অনৌবা খোংথাংশিং লৌখৎপা।
মরমদি অদোমগী তুংলমচৎ অসি অদোমগী খক্তগী নত্তে, মসি মীওইবা খুদিংমক্কী তুংলমচৎনি।
ঐহাক্না অমুক্কা হন্না অদোম পুম্নমক্কী চাউখৎপা তুংলমচৎকীদমক ঐহাক্কী থম্মোয়দগী য়াইফ-পাউজেল পীজরি।
অদোমবু থাগৎচরি!
