এন.আই.দি. ফাউন্দেসনগী লুচিংবা অমসুং চান্দিগর য়ুনিভর্সিতীকী চাঞ্চেলর ঐগী মরূপ শ্রী সতনাম সিংহসংঘুজী, এন.আই.দি. ফাউন্দেসনগী লূপ্লোয় পুম্নমক অমসুং অতৈ ইকায় খুম্ননিংঙাই ওইরবা মরূপ পুম্নমক, অদোম ময়ামগী মরক্তগী মীওই খরদি হান্না উনবগী, শকখঙনবগী তাঞ্জা ফংখ্রে। গুরুদ্বারাদা চৎপা, থৌগলদা মতম লেনবা, লঙ্গরদা চৎপা, সিখ ইমুংশিংগী য়ুমদা লৈবনা ঐগী পুন্সিগী মরুওইবা অচৌবা শরুক অমা ওইরকখি। মফমসিদা, প্রধানমন্ত্রী আৱাস অসিদসু মরক-মরক্তসু সিখ লাইনীংবশিংগী মখোঙ শোক্না খুরুমজবা ফংজদুনা ঐগী লাইবক ফবা ওইদুনা লাক্লি। লাইবক ফদুনা মখোয়গা লোয়নবা ফংজরি।
ইচিল ইনাউশিং,
ঐনা মীরমগী খোঙচৎ অমা চৎপা মতমদা মফমদুদা সিখ ফুরূপকী মরূপশিং থেংনবদা পুক্নিংদা চাউথোকচবা ফাওই। ২০১৫গী ঐগী কনাদা খোঙচৎ অদোম ময়ামগী মরক্তগী কয়া অমদি নীংশিংবিরমগনি। অদুগা দলাই জীদি ঐনা মুখ্য মন্ত্রী ওইদ্রিঙৈ মতমদগী খঙজৈ। খোঙচৎ অদু চহি ৪০রোমসিদা কনাদাদা ভারতকী প্রধান মন্ত্রীগী নাকল অনিগী মরীদা য়ুম্ফম ওইদুনা নাইতোম চৎপা খোঙচৎ অহানবা ওইরমগনি অমদি ঐনা শুপ্নতগী ওত্তাৱা অমসুং তোরোন্তোখক্তদা চৎখিদে। ঐনা ভেনকুবরদা চৎকনি, মফমদুদা চৎপা পাম্মি হায়খিবা ঐ নীংশিংলি। ঐ মফমদুদা চৎখি, গুরুদ্বারা খালসা দীৱানদা খুরুমজবগী তাঞ্জা ফংখি। লূপকী লূপ্লোয়শিংগা নীংথৎনা ৱারী ৱাতায় শানখি। মতৌ অসুম্না ২০১৬দা ঐনা ইরান চৎপা মতমদা মফমদুদসু তেহরান্দা লৈবা ভাই গঙ্গা স ইংহ গুরুদ্বারাদা চৎপগী খুদোংচাবা ফংখি। ফ্রান্সতা লৈবা নব-সপেল ইন্দিয়ন মেমোরিএলদা চৎখিবা খোঙচৎ অদুসু ঐগী পুন্সিগী কাউঙম্লরোইদবা মীকুপ অমনি। নীংশিং খুফম অসি মালেমগী লাঞ্জাও মতমদা ভারত লান্মীনা থৱায় কত্থোকখিবদুগী নীংশিং খুদম্নি অমসুং মখোয়শিংদুগী মরক্তা য়াম্লবা শরুক অমদি ঐখোয়গী সিখ ইচিল ইনাওশিংনি। মসিনা মতৌ কমদৌনা ঐখোয়গী সিইখ ফুরূপ্না ভারতকী অমসুং অতোপ্পা লৈবাকশিংগী মরী চেৎশিনহন্নবা থবক তৌদুনা লাকপগে হায়বদু তাক্লি। ঐগী লাইবক ফবদি অসিগুম্বা থৌদাং অসিবু হেন্না কনশিলহন্নবা তাঞ্জা ফংজবসিনি অ্রদুগা ঐনা মসিগীদমক তৌবা য়াবা থৌরাং তৌগনি।
মরূপশিং,
ঐখোয়গী গুরুশিংনা ঐখোয়দা থৌনা অমসুং থৌগলগী পারা তম্বিখি। মালেমগী তোঙান তোঙানবা শরুকশিংদা থোইদোকপা চৎন-কাঙলোন য়াউদনা ভারতকী মীওইশিং চৎখি অমদি মখোয়গী হোৎনজমলনা মায় পাক্লি। হায়রিবা থৌনা অসিনা ঙসিগী অনৌবা ভারতকী থৌনা ওইরি। অনৌবা ভারতনা অনৌবা পন্দোলশিং য়ৌরি, মালেম পুমবদা মাগী খোঙফম শেম্লি। কোরোনা লাইচৎকী মতমসিনা মদুগী খ্বাইদগী চাওরবা খুদম্নি। লাইচৎ হৌরকপদা হান্নগী ৱাখল্লোন্দগী হেন্দোকপা ঙমদবা মীওইশিংনা ভারতকীদমক্তা নুংনাংখি। মীপুম খুদিংমক্না করিগুম্বা খরা অদুমক হায়রম্মি। অদুবু হৌজিক্তি মীয়াম্না ভারতপু খুদম ওইনা মালেমসিদা তাক্তুনা ভারতনা অসুম তৌখ্রে হায়না তাক্লি। ভারতকী য়াম্লবা মীশিং অসিদা ভারতনা কদায়দগী ভেক্সিন ফংগদৌরিবনো কমদৌনা মীয়ামগী পুন্সি কনগদৌরিবনো হায়রম্মি। অদুবু ঙসি ভারত ভেক্সিনগী খ্বাইদগী চাউরবা চুঙ্গোয় পুথোক্লিবা লৈবাক ওইরে। ভেক্সিন দোজ করোর কয়া ঐখোয়গী লৈবাকসিদা কাপথোকখ্রে। লৈবাকসিদা কাপ্লিবা ভেক্সিনগী চাদা ৯০দি ভারত্তা পুথোকপা ভেক্সিন্নি হায়বসি অদোমসু তারগা চাউথোকচবা ফাওবিরমগনি। অসিগুম্বা লাংফমগী মতমসিদা মালেমগী খ্বাইদগী চাউবা স্তার্তঅপ ইকোসিস্তেমশিংগী মরক্তা অমা ভারতনা ওইরক্লি। ঐখোয়গী য়ুনিকোর্নগী মশিং লেপ্পা লৈতনা হেনগৎলক্লি। ভারতকী মাঙদা থাংজিল্লক্লিবা খোঙথাঙ, মাঙদা চঙশিল্লক্লিবা খোঙহৌ অসিনা খ্বাইদগী হেন্না চাওথোকচবা ফাওহল্লিবদি ঐখোয়গী মীরমদা লৈখ্রবা মীওইশিং অসিনি। মরমদি, লৈবাক্কী ইকায়খুম্নবা হেনগৎলক্লিবমখৈ মশিং য়াম্লবা ভারত মচাশিংগী ইকায় খুম্নবসু অসুম অসুম হেনগৎলক্কদৌরিবনি। মখোয়গী মফমদা লৈরিবা মালেমগী মীৎয়েঙ হোংলকই। হায়রিবা ইকায়খুম্নবসিগা লোয়ননা অনৌবা তাঞ্জা অমসু লাকই, নৌনা শরুক য়াবগী খুদোংচাবা অমসু লাকই অমদি ঙাকশেলগী ৱাখল্লোন হেন্না চেৎশিনহল্লি। ঐখোয়গী মীরমদা লৈখ্রবা মীওইশিংবু মতম পুম্নমক্তা ভারতকী রাস্ত্রদুত ওইনা লৌদুনা লাক্লি। লৈঙাক্না থারিবা মীদুবু রাজদুত কৌই। অদুগা অদোমদি রাস্ত্রদুতনি। অদোম পুম্নমক ভারতকী মপান্দা লৈবা ইমা ভারতকী মপাঙ্গল কল্লবা খোঞ্জেলনি, মপাঙ্গল কল্লবা শক্তম্নি। ভারতনা চাওখৎলকপা উরগা অদোমগী পুক্নিংদসু চাউথোকচরিবনি, অদোমগী ঙক চাউথোকচনা থাঙ্গৎচবা ঙম্লিবনি। মীরমদা লৈরগসু অদোম্না লৈবাকসিগীদমক নুংনাংবা ফাওরি। মরম অসিনা মীরমদা লৈরগা ভারতকী মায় পাকপবু মাঙদা পুখৎপদা, ভারতকী শক্তমবু চেৎশিনহনবদসু অদোমগী চাউরবা থৌদাং য়াওরি। ঐখোয়না মালেমগী মফম অমদা হেক্তা লৈরবসু, অহানবদা ভারত মচা অমা ওইনা ইরৈবাক্কী য়াইফনবা খনবগী ইহুল লৈগদবনি।
মরূপশিং,
ঐখোয়গী গুরু তরামক্না লৈবাকসিবু পুম্নমক্কী মথক্তা থমদুনা ভারতপু থাক অমদা থাঙ্গৎলম্মি। গুরু নানকদেব জীনা লৈবাক পুম্বগী ৱাখল্লোন শাগৎলম্মি, লৈবাক পুম্ববু অমমবদগী পুথোরক্তুনা অঙানবগী লম্বী তাক্লম্মি। ঐখোয়গী গুরূশিংনা নোংপোক্তগী নোংচুপ ফাওবা, অৱাংদগী খা ফাওবা ভারত পুমবগী খোঙচৎ চৎখি। মফম খুদিংদা চৎপদা মখোয়গী খুদম চাংদমশিং লৈরমগনি, মখোয়গী পুক্নিং থৌগৎপগী মতৌ, মখোয়বু নীংজবগী ফীভম উবা ফংগনি। পঞ্জাবতা লৈবা গুরুদ্বারা হরমন্দির সাহিবতগী হৌরগা উত্তরাখন্দদা লৈবা গুরুদ্বারা শ্রী হেমকুন্দ সাহিব ফাওবদা, মহারাস্ত্রগী গুরুদ্বারা হুজুর সাহিবতগী হৌরগা হিমাচলগী গুরুদ্বারা পোন্তা সাহিব ফাওবা, বিহারদা লৈবা শ্রী পত্না সাহিবতগী হৌরগা গুজরাতকী কচ্ছতা লৈবা গুরুদ্বারা লখপত সাহিব ফাওবা, ঐখোয়গী গুরুশিংনা মীয়ামগী পুক্নিং থৌগৎলম্মি, মখোয়গী মখোঙনা লৈতাদুনা মালেম অসিবু অশেংবা মফম ওইহল্লম্মি। মরম অসিনা সিখ চৎনবীদা ‘এক ভারত, শ্রেস্থ ভারত’কী চঙ-চঙ লাউবা চৎনবী লৈরিবনি।
ইচিল ইনাওশিং,
নীংতম লান্দা অমদি নীংতম্লবা মতুংদা সিখ ফুরূপ্না লৈবাক্কীদমক কত্থোকখিবা, মদুগীদমক ভারত পুম্বনা মখোয়বু নীশিংলি। মহারাজ রঞ্জিৎ সিংহগী থৌদাং, অংগ্রেজশিংগী মায়োক্তা শোক্নখিবা লান, নৎত্রগা জালিয়ানৱালা বাগকী থৌদোক ওইরবসু, মখোয় য়াওদনা ভারতকী নৎত্রগা হিন্দুস্তানগী পুৱারী মপুং ফারোই। ঙসিসু ঙমখৈদা লেপ্লিবা সিখ লান্মীশিংনা লৌরিবা থৌদাংদগী হৌরগা লৈবাক্কী শেন্মিৎলোন্দা সিখ ফুরূপ্না লৌরিবা থৌদাং অমসুং সিখ এন.আর.আই.শিংগী থৌদাং, সিখ ফুরূপ্না লৈবাকসিদা হাপ্লিবা থৌনাশিংনা লৈবাকসিগী পান্দম, লৈবাকসিগী শক্তমগী মরুওইবা পরম ওইদুনা লাক্লি।
মরূপশিং,
নীংতমবগী অমৃৎ মহোৎসব, ঐখোয়গী নীংতম লালহৌগা লোয়ননা ঐখোয়গী নাৎ, চৎনবী অমসুং ইপা ইপুনা থমবিরমবা লনথুম ময়ামসিবু হরাও তয়াম্না পাঙথোকপগী তাঞ্জানি। মরমদি নীংতম্বগীদমক ভারতনা হৌখিবা ইহৌ শুপ্নতগী অকক্নবা মতম অমতগী ইহৌ নত্তে। মসিগী মরুমদা চহি লিশিং কয়াগী ইহুল অমসুং চৎনবী য়াওরি। মসিগী মরুমদা নুংগী ওইবা মশক অমসুং কত্থোকপা কয়া য়াওণি। মরম অসিনা ঙসি লৈবাকসিনা মায়কৈ অমদা নীংতমবগী অমৃৎ মহোৎসব পাঙথোকপগা লোয়ননা লালকিলাদসু গুরু তেগবহাদুর জীগী চহি ৪০০শুবা মপোক কুমওন থৌরম পাঙথোক্লি। গুরু তেগবহাদুর জীগী ৪০০ শুবা মপোক কুমওনগী মাঙওইননা গুরু নানকদেব জীগী চহি ৫৫০ শুবা মপোক কুমওনসু লৈবাকসিদা অমদি অতৈ লৈবাকশিংদা মপুং ফানা পাঙথোক্লি। গুরু গোবিন্দ সিংহ জীগী চহি ৩৫০শুবা মপোক কুমওন পাঙথোক্নবগী তাঞ্জাসু ঐখোয়দা ফংলি।
মরূপশিং,
মসিগা লোয়ননা মতম অসিদা করতারপুর সাহিব কোরিদোরসু হৌদোকখি। ঙসি মতুং ইনবা মীওই লাখ কয়া অমনা মফমদুদা চত্তুনা খুরুমজনবগী তাঞ্জা ফংলে। লঙ্গরবু তেক্স ফ্রী ওইহনবদগী হৌরগা হর্মিন্দর সাহিবপু এফ.সি.আর.এ.গী অয়াবা পীবা ফাওবা, গুরুদ্বারাগী অকোয়বদা লু-নান্নবা থমবদগী হৌরগা মখোয়বু হেন্না ফবা ইনফ্রাস্ত্রকচরগা শম্নহনবা ফাওবা, লৈবাকসিনা ঙসি তৌবা য়াবা থৌরাং খুদিংমক তৌরি অমদি ভিদিও অসিবু মওং তানা উৎপিরিবা সতনাম জীবু ঐনা তৌবিমল খঙবা উৎচরি। পুক্নিং লুপ্তুনা হীরম খুদিংদা কমদৌনা থবক তৌরিবগে হায়বদু খঙবা ঙম্মি। অদোমগী মফমদগী মতম মতমগী ওইনা পাউতাকশিং ফংলি, ঙসিসু অদোম্না ৱাফম কয়া হৌদোকপিরম্মি। মখোয়শিংদুদা য়ুম্ফম ওইরগা লৈবাকসিনা থৌগলগী মায়কৈদা মাঙদা চঙশিনবা ঙম্নবা ঐনা হোৎনরি।
মরূপশিং,
ঐখোয়গী গুরুশিংগী পুন্সিগী খ্বাইদগী চাউবা ইথিলদি ঐখোয়গী থৌদাং মশক খঙবদুনি। নীংতমবগী অমৃৎকাল অসিদা লৈবাকসিনা ঙসিসু থৌদাং য়াবদা অহেনবা মীৎয়েঙ থম্নবগী ৱাফম ফোঙদোক্লি। ‘সবকা সাথ, সবকা বিকাস, সবকা বিস্বাস অমসুং সবকা প্রয়াস’ হায়বা লাইৱাসিনা ঐখোয় পুম্নমকপু ভারতকী তরং তরংবা তুংলমচৎকী মায়কৈদা লমজিংলি। থৌদাং হায়বসি ঐখোয়গী মীরোলসিখক্তগী নত্তে, মসি ঐখোয়গী অমদি লমদমসিগী তুংগীদমক্তসুনি। থৌদাং হায়রিবসি ঐখোয়গী তুংগী মীরোলশিংগীদমক্তনি। খুদম ওইনা ঙসিদি অইং-অশাগী ফীভম লৈবাকসিগী অমদি মালেম পুমবগী ওইনা অচৌবা লাংফম ওইদুনা লৈরে। মসিগী পাম্বৈ ভারতকী নাৎ অমসুং চৎনবীদা লৈ। সিখ ফুরূপ মসিগী চঙ-চঙ লাউবা খুদম্নি। সিখ ফুরূপ্না মীয়ামগীদমক খনবগুম চপ মান্ননা অকোয়বগী ফীভম অমসুং মালেম লৈকোয়পুংসিগীদমক্তসু খল্লি। ঈশিং নুংশিৎ মোৎশিলহনবগী মায়োক্তা থবক পায়খৎপদা ওইরবসু, মচি ওইবা চীঞ্জাক ফংদবগী মায়োক্তা ইহৌ হৌববদা ওইরবসু, নৎত্রগা মখোয়গী নাৎকী শক্তম ঙাকপদা ওইরবসু অদোম্না হীরম খুদিংমক্তা পুক্নিং চঙনা হোৎনবগী মমি তাই। মতাঙ অসিদা ঐনা অদোমগী মফমদা হায়জনিংবা ৱাফম অমদি লৈবাকসিনা অমৃৎ মহোৎসবসিদা লৈবাকসিগী দিস্ত্রিক্ত খুদিংমক্তা অমৃৎ সরোবর ৭৫গী থৌরাং অমা পায়খৎলিবা অদোমসু খঙবিরমগনি। অদোমসু অদোমগী মফমশিংদা অমৃৎ সরোবরগী থৌরাং পায়খৎপিয়ু হায়বসিনি।
মরূপশিং,
ঐখোয়গী গুরুশিংনা ঐখোয় ইশাবু ইকায়খুম্নজবা অমদি মীওইবা খুন্নাইবু চাওখৎহন্নবা তাক্লমবা লম্বীগী ইথিল ঐখোয়না সিখ খুদিংদা উবা ফংই। নীং-তমবগী অমৃৎকালসিদা ৱাফমসিমক লৈবাকসিগী পান্দম অমা ওইরবনি। ঐখোয় ইরোমদোম লেপচবা ঙমগদবনি, লায়রবদগী লায়রবা মীওইগী পুন্সিবু ফগৎহন্নবা থৌরাংশিংদা অদোম পুম্নমক্না মরুওইবা থৌঔদাং লৌবিবা অমদি অদোমগী কত্থোকপা য়াম্না মমল য়ামই অমদি মথৌ তাই। গুরুশিংগী থৌজালদগী ঐখোয় মায় পাক্কনি অমদি থুনা অনৌবা ভারতকী পান্দম ফংবা ঙমগনি হায়না ঐনা মপুং ফানা থাজৈ। হায়রিবা পান্দমসিগা লোয়ননা ময়াম পুম্নমকপু ঐনা হন্না হন্না থাগৎচরি। অদোম্না মফমসিদা লেঙবিরকপা ঐগীদমক্তা য়াম্না লাইবক ফবনি অমদি অদোমগী থৌজাল অদুমক ফংজগে। অদুগা ঐনা মতম পুম্নমক্তা হায়জনিংবা ৱাফমদি প্রধানমন্ত্রী নিৱাস অসি মোদীগী য়ুম নত্তে। মফমসি অদোমগী হক চাউনা লৈবা মফমনি, মফমসি অদোমগীনি। অসিগুম্বা ৱাখল্লোন অমসুং অসিগুম্বা অমত্তা ওইবগী মরীসিগা লোয়ননা মতম পুম্নমক্তা ইমা ভারতকীদমক্তা, লৈবাকসিগী লায়রবশিংগীদমক্তা, লৈবাকসিগী ফুরূপ পুম্বগী চাওখৎনবগীদমক্তা ঐখোয়না ঐখোয়গী থবক তৌরি। গুরুশিংগী থৌজাল ফংদুনা লৈজগে হায়বা ৱাখল্লোনসিগা লোয়ননা ঐনা অমুক্কা হন্না ময়াম পুম্নমকপু থাগৎচরি। ৱাহে গুরু কা খালসা, ৱাহে গুরু কী ফতহ।
