খুরুমজরি !
হন্দক্কী নেসকোমগী তেক্নোলোজী অমসুং লীদর্সিপ ফোরম অসি ঐগী মীৎয়েংদদি য়াম্না মরু ওই হায়না লৌই। মতম অসি মালেম পুম্বনা ভারতকী মায়কৈদা হান্নদগী হেন্না থাজবগা লোয়ননা য়েংনরকপা মতম্নি।
ঐখোয়গী মফমসিদা হায়নবা ৱাফম অমা লৈ – না দৈন্যম, না পলায়নম! মসিনা হায়বদি শিংনবনা ফনা চাউদুনসু ঐখোয় ইশাবু কৈদৌনুংদসু হন্থনা খল্লোইদবনি অমদি শিংনববু কিদুনা মনিং হন্দুনা চেল্লোইদবনি। কোরোনাগী মতমদা ভারতকী লৌশিং-সাইন্স, ঐখোয়গী তেক্নোলোজীনা ইশাবু শক্তাকচবতা নত্তনা ইশাবু অওনবসু পুরক্লি। ঐখোয়না স্মোল পোক্সকী তিকা থানবগীদমক অতোপ্পা লৈবাক্তা তাংলম্বা মতম অমা লৈরম্মি। ঐখোয়না মালেমগী লৈবাক কয়াদা ভারত্তা শাবা কোরোনা ভেক্সিন পীবা মতম অমসু লৈরে। কোরোনাগী মতমদা ভারতনা পুথোক্লিবা পাম্বৈ অসিনা ঙসিদি মালেম পুম্ববু পুক্নিং থৌগৎলি। অদুগা ৱাফম অমা হৌজিক ময়ামগী মফমদা তাহন্নবা তাঞ্জা ফংলি অমদি সি.ই.ও. খরনা হায়রকপদা মসিদা ভারতকী আই.তি. ইন্দস্ত্রীনা অঙকপা মওংদা থবক পায়খৎখি হায়বসিনি। চিপশিংনা মথৌ লেপখ্রবদা অদোমগী কোদনা পোৎশকশিংবা লেপহনখিদে। লৈবাক পুম্বা য়ুমগী ফক্লাং মরিগী মনুংদা লৈখ্রবদা অদোম্না য়ুমদগী ইন্দস্ত্রীশিং অপনবা লৈতনা মথৌ তৌহনখি। হৌখিবা চহীগী ফীভম্না মালেমবু ঙকহল্লবসু অদোম্না হোৎনরিবশিং য়েংলগা ভারতকী মীয়াম্না য়াম্না পেনখি।
মরূপশিং,
ফীভম অসিদা সেক্তর খুদিংমক কোরোনানা শোকহনখিবা মতমদা অদোম্না চাউরাক্না চাদা ২গী গ্রোথ পুরকখি। দি-গ্রোথকী চিংনবা ৱাফম ফোংদোক্নখিবা মতমদা ভারতকী আই.তি. ইন্দস্ত্রীনা মখোয়গী রিভিন্যু বিলিয়ন ৪ হেনগৎহনখিবা তশেংনমক পেন্নিংঙাইনি, অমদি অদোমগী কাঙবু পুম্নমক থাগৎপদা মতিক চাই। মতমসিদা অনৌবা থবক লাখ কয়া পীদুনা আই.তি. ইন্দস্ত্রীনা মখোয়সি ভারতকী চাউখৎপগী মপাঙ্গল কল্লবা য়ুম্বীনি হায়বা তাক্লে। ঙসিদি দেতা পুম্নমক, ইন্দিকেতর পুম্নমক্না আই.তি. ইন্দস্ত্রীগী লৈরিবা গ্রোথ খোঙজেল অসি মতৌ অসুম্না অনৌবা পন্দোলশিং লোমখিগনি হায়বা উৎলি।
মরূপশিং,
অনৌবা ভারত, ভারত মচা পুম্নমক চাউখৎ মায়কৈদা চঙশিল্লি। ঐখোয়গী লৈঙাক্না অনৌবা ভারতকী, ভারতকী নহাশিংগী ৱাখল্লোন অসিবু খঙনা চৎলি। ভারত মচা করোর ১৩০গী মঙলানশিংনা ঐখোয়বু থুনা খোঙজেল য়াঙনা চেনখৎহন্নবা পুক্নিং থৌগৎলি। অনৌবা ভারতকা মরী লৈননা লৈঙাক্তা লৈরিবা থাজবা অসিমক অদোমগসু মফমদসু লৈ, লৈবাকসিগী প্রাইভেত সেক্তরদসু লৈরি।
মরূপশিং,
ভারতকী আই.তি. ইন্দস্ত্রীনা মখোয়গী খোঙফম, মালেমগী ফম্পাক্তা চহী কয়াগী মমাঙদগী থমখ্রে। মালেম পুম্বদা ভারতকী এক্সপর্তশিংনা সর্ভিস অমসুং পাম্বৈ পীবদা লমজিংদুনা চৎলি, থৌদাং য়ারি। অদুবু ভারতকী চাউরবা দোমেস্তিক মার্কেতকী কান্নবা আই.তি. ইন্দস্ত্রীনা লৌবা ঙমদবা ফীভম খরা লৈরি। মায়কৈ অমদা ঐখোয়না হায়বা য়াবদি – থাউমৈগী মখাদা লৈরম্বা অমম্বা ঐখোয়গী মাঙদা লৈরম্মি। কমদৌনা ঐখোয়গী লৈঙাক্না ৱাখল্লোন অসিবু হৌখিবা চহী খরসিদা হোংদোকখিবগে হায়বসি ঐখোয়গী লৈঙাক্কী থৌওং অমসুং ফীরেপ্না তাক্লি।
মরূপশিং,
অফা অপুনগী মরক্তা তুংগী লুচিংবশিং থোরকপা ঙম্লোই হায়বসি ঐখোয়গী লৈঙাক্না য়াম্না নীংথিনা খঙই। মরম অসিনা লৈঙাক্কী খুত্থাঙদা তেক ইন্দস্ত্রীবু কান্নদবা চৎন-পথাকশিংদগী, অফা অপুনশিংদগী পুথোরক্নবা হোৎনরি। নেসনেল দিজিতেল কম্ম্যুনিকেসন পো,ইসী অসি অসিগুম্বা পোলিসী অমনি। ভারতপু মালেমগী সোফ্তৱেয়র প্রদক্ত হব ওইহন্নবা লৈবাক্কী পোলিসীসু শেম্লে। অহোংবা পুরকপগী থবক কোরোনাগী মতমদসু মখা চত্থরি। হৌজিক ময়াম্না হায়নখিবা “অদর সর্ভিস প্রোভাইদর” (ও.এস.পি.) চৎন-পথাপসু কোরোনাগী মতমদা চৎনবা হৌখ্রে। অনৌবা ফীভম অসিদা অদোমগী থবক তৌবদা লায়হল্লে, অদোমগী থবক্তা অপনবা য়াম্না হন্থহল্লে। ঙসিসু, ময়ামগী মরক্তগী মরূপ খরনা হায়খিবদা মীওই চাদা ৯০দি য়ুমদগী থবক তৌখি, মসিদসু নত্তনা মীওই খরদি মখোয়গী হৌরকফম খুঙ্গঙদগী থবক তৌখি। য়েংবিয়ু অদোমগী মফমদা অচৌবা থৌনা লৈরিবনো হায়বদু। চেম্পিয়ন সর্ভিস সেক্তর ১২দা ইনফোর্মেসন তেক্নোলোগী পুশিল্লকপগী কান্নবসু অদোম্না ফংবা হৌরি।
মরূপশিং,
নুমিৎ নিনিগী মমাঙদা অদোম পুম্নমক্নসু তরাম্না ওক্নখিবা মরুওইবা পোলিসী রিফোর্ম অমা পুরকখি। মেপ অমসুং জিও-স্পেসিএল দেতাবু কন্ত্রোলদগী নান্থোকহন্দুনা মসিবু ইন্দস্ত্রীগীদমক ফংহনদুনা য়াম্না মরুওইবা খোঙথাং অমা লৌখৎখি। খোঙথাং অসি ঐনা খনবদা ফোরম অসিগী থিম ‘হেন্না ফবা পুন্সি মহিং অমগী মায়কৈদা তুংগী লম্বী শেমবা’ হায়বা অমসুং অদোমগী মীফম অসিগী থবক লৈঙাক অসিনা মপুং ফাহনবা অমদি ঐখোয়গী তেক স্তার্তঅপ ইকোসিস্তেমবু মপাঙ্গল কনখৎহনবা খোঙথাংনি। খোঙথাং অসি আই.তি. ইন্দস্ত্রী খক্তা নত্তনা আত্মনিরভর ভারতকী মরুওইবা মিসনবুসু মপাঙ্গল কনখৎহনগদবা খোঙথাং অমনি। ময়ামগী মরক্তগী ওন্ত্রপ্রিন্যুরশিংনা মেপ অমসুং জিও-স্পেসিএল দেতাদা লৈরিবা অথিংবশিং অমসুং রেদ তেপকা মরী লৈনবা ৱাফমশিং তোঙান তোঙানবা ফোরমশিংদা ফোঙদোকখিবা ঐ নীংশিংলি।
হৌজিক থম্নিংলিবা ৱাফম অমদি হায়রিবা হীরম কয়াসিগী মনুংদা খ্বাইদগী য়াম্না রেদ লাইত উৎলিবা ৱাফমদি সিক্যুরিতীগা মরী লৈনৈ, ৱাফম অসি হাংদোরক্লবদি সিক্যুরিতীদা অরুবা ফীভম লাক্কনি হায়বা ৱাফমসি হঞ্জিন হঞ্জিন থোরকখি, অদুবু সিক্যুরিতীগী ৱাফমশিংবুসু হেন্দল তৌননবা ইশানা ইশাবু থাজজবা হায়বসি য়াম্না চাউবা পাঙ্গল অমনি। ঙসিদি ভারত মশানা মশাদা মপুং ফানা থাজবা থম্লি, ৱাফমসি ঙমখৈদা ঐখোয়না উবা ফংলি। লৌরিবা ফিরেপ অসিদগী খঙবা ঙম্বদি ফিরেপ অসি তেক্নোলোজীগী লমখক্তদা নত্তনা ফিরেপ অসি এদমিনিস্ত্রেতিব রিফোর্মগীসুনি, ফিরেপ অসি লৈঙাক্না চৎন-কাঙলোন খরা লৌথোকপখক্কী ৱাফম নত্তে, ফিরেপ অসি ভারতকী মপাঙ্গল উৎপখক্কী নত্তে। ফিরেপ অসি লৌরবা মতুংদা ঐখোয়না লৈবাকসিবু শাফনা থম্বসু ঙমগনি অমদি লৈবাক্কী নহাশিংবু মালেমসিদা মখোয়গী মফম কঞ্জনবা তাঞ্জাসু পীবা ঙমগনি হায়না লৈঙাক অসিনা থাজবা থম্লি। অদোমগুম্বা মরূপশিংগা ৱারী ৱাতায় শানবা মতমদা হায়রিবা ৱাফম অসি হেক হেক ঐঙোন্দা ফাউরকই। ঐখোয়গী নহা ওইরিবা ওন্ত্রপ্রিন্যুরশিংদা, ঐখোয়গী স্তার্তঅপশিংদা মালেমসিদা নৌনা থোরক্লিবা খুদোংচাবশিংগী কান্নবা ফংহনবা মথৌ তাই, মপুং ফানা মনীং তমহনবা মথৌ তাই, হায়বা ৱাখল্লোনসিদা ৱারেপ অসি লৌখিবনি। লৈঙাক্না লৈবাকসিগী মীওইশিংদা, ঐখোয়গী স্তার্তঅপশিংদা অমদি ইনোভেতরশিংদা মপুং ফানা থাজবা থম্লি। থাজবা অসিগী পরিংদা ঐখোয়গী সেল্ফ-সর্তিফিকেসনবু য়োকখৎলি।
মরূপশিং,
হৌখিবা চহী ৬সিদা আই.তি. ইন্দস্ত্রীনা পুথোকখিবা পোত্থোকশিং, পাম্বৈশিংবু ঐখোয়না লৈঙাক্লোনগী মরুওইবা শরুক অমা ওইহনখি। মরুওইনা দিজিতেল ইন্দিয়ানা, দিজিতেল তেক্নোলোজীনা ভারত মচা মীচম মীয়ামবু মপাঙ্গল কনখৎহল্লি, লৈঙাক্কা শম্নহল্লি। ঙসিদি দেতাবুসু দেমোক্রেতাইজ তৌরে অমদি লাস্ত মাইল সর্ভিস দেলিভরীদসু মীৎয়েং থম্লি। ঙসিদি লৈঙাক্কী সর্ভিস চা কয়া ওনলাইন দেলিভরী তৌরি। লৈঙাক্লোনদা তেক্নোলোজী মরুওইনা শীজিন্নবনা লায়রবা অমসুং ময়ায় ওইবা থাক্কী মীওইশিংনা কান্নবা কয়া ফংবতা নত্তনা শেঞ্জা থুমজাদগীসু নান্থোকপা খরা ঙম্লি। ঐখোয়গী ফিনতেক প্রদক্ত অমসুং য়ু.পি.আই.গুম্বা দিজিতেল প্লেতফোর্মশিংগী মতাঙদা মালেম পুম্বনা ঙাঙনরি। ৱর্ল্দ বেঙ্কনসু মসিবু থাগৎলি। চহী ৩-৪গী মনুংদা হেভিলী কেস দিপেন্দেন্ত সোসাইতী অমদগী লেস কেস সোসাইতীগী মায়কৈদা কমদৌনা খোঙ থাংজিল্লক্লি হায়বসি মাঙদা তাদুনা লৈরে। দিজিতেল ত্রাঞ্জেক্সন হেক য়াম্না তৌরিবমখৈ অরোৎপা লনথুম পৈশিনবগী চাংসু হন্থরক্লি। জে.এ.এম. ত্রিনিতী অমসুং দি.বি.তি.না মরম ওইরগা ঙসি লায়রবশিংগী রাইতশিং মখোয়দা চিত্থ-নান্থবা তৌদনা য়ৌরি।
মরূপশিং,
ত্রান্সপেরেন্সী হায়বদি মনুং মপান ফাওনা উবা ঙম্বা হায়বসি অফবা লৈঙাক্লোনগী খ্বাইদগী মরুওইবা ৱাফম্নি। হায়রিবা অহোংবা অসি ঙসিদি লৈবাক্কী লৈঙাক্লোন্দা উবা ফংলক্লি। মসিগী মরম্ননি সর্ভে খুদিংমক্তা ভারত লৈঙাক্না মীয়ামগী থাজবা হেন্না হেন্না চেৎশিনহল্লিবসি। হৌজিক্তি লৈঙাক্কী থবক থৌরমশিং লৈঙাক্কী রেজিস্তরশিংদগী পুথোরক্লগা দেসবোর্দতা থম্লি। লৈঙাক অমসুং লৈঙাক্কী লোয়শঙশিংগী থবক থৌরম পুম্নমক মীচম মীয়াম্না মখোয়গী ফোন্দা য়েংবা ফংহন্নবা, তৌরিবা থবক খুদিংমক লৈবাক মীয়াম মাঙদা থম্নবা হোৎনরি।
মরূপশিং,
লৈঙাক্কী প্রোকরমেন্তকী মতাঙদা মমাঙদা ৱাহং কয়া হংনরম্মি হায়বসি ঐখোয়গী মরক্তা খঙদবা কনাবু লৈরিবগে, ঐখোয়সু খন্ন-নৈনবদা ৱাফমসিদা ৱা ঙাঙলকখি, তারকখি, ঐখোয়সু নুংনাংবা ফোঙদোকখি। ঙসিদি দিজিতেল তেক্নোলোজী শীজিন্নদুনা লৌথুপ লৌকোই লৈতনা গভর্নমেন্ত ই-মার্কেতপ্লেস হায়বদি জি.ই.এম.গী খুত্থাঙদা লৈবগী থবক তৌরি। ঙসিদি লৈঙাক্কী তেন্দর অয়াম্বা ওন্লাইন্দা থাজিলহল্লি। ঐখোয়গী ইনফ্রাস্ত্রকচরগা মরী লৈনবা প্রোজেক্তশিং ওইরবসু লায়রবশিংগী য়ুম ওইরবসু প্রোজেক্ত খুদিংমক মতম চানা লোইশিনবা ঙম্নবগীদমক জিও তেগ্গিং তৌরি। ঙসি খুঙ্গঙশিংগী য়ুমশিংসু দ্রোন্না মেপিং তৌরি, খাজনাগা মরী লৈনবা ৱাফমশিংদসু হ্যুমেন ইন্তরফেস হন্থহল্লি, ফেসলেস ফেসিলিতী ফংহল্লি। তেক্নোলোজী শীজিন্নদুনা মীয়ামদা খোঙজেল য়াঙবা, অচুম্বা অমদি লৌথুপ লৌকোই লৈতবা ফীভম ফংহনববু ঐগী ইফমদদি মিনিমম গভর্নমেন্ত, মেক্সিমক গভর্নেন্স হায়বসিনি।
মরূপশিং,
ঙসি ভারতকী তেক্নোলোজী মতাঙদা মালেমদা তারিবা মমি, মসিবু শকখঙলিবা অসি য়েংলগা লৈবাকসিনা অদোমগী মফমদা থাজবা কয়া থম্লি। ঐখোয়গী তেক্নোলোজী হেক য়ারিবমখৈ মেদ ইন ইন্দিয়া ওইহন্নবা অদোম্না হোৎনরি। অদোমগী পাম্বৈশিংদা হৌজিক্তি মেক ফোর ইন্দিয়াগী মমি তাহনবা মতম ওইরে হায়না ঐনা অদোমগী মফমদা হায়জনিংই। করিগুম্বা ঐখোয়না দোমেন কয়াদা ইন্দিয়ন তেক্নোলোজী লীদর্সিবপু মাঙদা পুখৎকে হায়রবদি, খোঙজেল অসি কায়হন্দনা থমগে হায়রবদি ঐখোয়গী হেন্দান্নবগী ক্রাইতেরিয়া শেম্বা মথৌ তাই। ঐখোয়না ঐখোয় ইশাগা হেন্দান্নবা মথৌ তাই। মালেমগী তেক্নোলোজীগী লুচিংবা ওইনবগীদমক ইনোভেসন অমসুং এন্তরপ্রাইজকা লোয়ননা ভারতকী আই.তি. ইন্দস্ত্রীবু কলচর ওফ এক্সেলেন্স অমসুং ইন্সতিত্যুসু বিল্দিংদসু মপুং ফানা মীৎয়েঙ থম্বা মথৌ তাই। মতাঙসিদা ঐখোয়গী স্তার্ত-অপ ফাউন্দরশিংগী মফমদা ঐগী মরুওইবা পাউজেল অমখক্তি। ইশাবু ভেলুএসন অমসুং একজিত স্ত্রেতেজী ফাওবখক্তগী মীৎয়েং থম্বিগনু। অদোমনা কমদৌনা চহীচা অসি লান্থোক্তুনা লৈহৌগদবা ইন্সতিত্যুসনশিং শেমগৎপা ঙমগদগে হায়বদু খনবিয়ু। মালেমগী এক্সেলেন্সকী বেঞ্চ-মার্ক শেমগদবা মালেমগী থাক্কী পোত্থোকশিং অদোম্না কমদৌনা পুথোক্কদগে হায়বদু খনবিয়ু। হায়রিবা পান্দম জুরা অনিসিদা কৈদৌঙৈদসু য়াশিন্নবা পুরক্লোইদবনি মরমদি মখোয় য়াওদনা ঐখোয়না মালেমগী লুচিংবা ওইবা ঙম্লোই তুং ইনবা অদুমক ওইদুনা লৈগনি।
মরূপশিং,
চহী অসিদা ঐখোয়গী নীং তম্বগী ৭৫ শুবা চহীদা ঐখোয়না খোঙ থাংজিল্লি। মসি অনৌবা পান্দম শেম্নবগী, মখোয়বু ফংনবগী থৌনা পুম্বা ফুদোক্নবা চপ চারবা মতম্নি। ঙসিদগী চহী ২৫-২৬গী মতুংদা ভারতনা নীং তম্বগী চহী ১০০ শুবা কুমওন থৌরম পাঙথোকপদা, ঐখোয়না চহীচাগী থৌরম পাঙথোকপা মতমদা ঐখোয়না অনৌবা মালেমগী থাক্কী পোত্থোক কয়া পুথোক্কদগে, মালেমগী লুচিংবা কয়া য়াম্না ঐখোয়না পুথোক্কদগে হায়বা ৱাফমসি খন্দুনা হৌজিক্তগী হৌনা থবক তৌগদবনি। অদোম্না পান্দম শেম্বিয়ু, লৈবাক্না অদোমগীদমক লেপকনি। ভারতকী য়াম্লবা মীশিং অসি অদোমগী চাউরবা থৌনানি। হৌখিবা থা খরসিদা ভারতকী মীয়ামদা তেক সোলুসনগী খৌরাংবা কমদৌনা হেনগৎলকখিবগে হায়বসি ঐখোয়না উখ্রে। মীয়াম্না অনৌবা তেক সোলুসনবু খৌরাংনা ঙাইনরি। মীয়ামনা অনৌবা পোৎলমশিং চাংয়েং তৌবা পাম্মি অমদি মরুওইনা ভারতকী এপ্লিকেসনশিংগীদমক্তদি মখোয়দা খৌরাংনা ঙাইরি। লৈবাকসিনা পুক্নিং চপ য়ুংনা লেপখ্রে। অদোমসু পুক্নিং চপ য়ুংনা লেপ্পিয়ু।
মরূপশিং,
২১শুবা চহীচাদা ভারতকী শিংনবশিংগী ৱারোইশিন পুরক্নবগীদমক ইচঙ থৌবা তেক্নোলোজীগী পাম্বৈ পীবদা আই.তি. ইন্দস্ত্রী, তেক ইন্দস্ত্রী, ইনোভেতরশিং, থিজিল্লোয়শিং, নহা ওইণিবা ৱাখলশিংগী থৌদাং য়াম্না চাউই। হৌজিক ঐখোয়গী লৌবুক্তা ঈশিংগী অমসুং হার কা হেন্না শীজিন্নখিবগী অচৌবা খুদোংচাদবা ফীভম মায়োক্নরি। আর্তিফিসিএল ইন্তলিজেন্স শীজিন্নদুনা লৌমী খুদিংদা মহৈ মরোং মখল খুদিংমক্কী মথৌ তাবা ঈশিং অমসুং হারগী চাং তাকপা ঙম্বা স্মার্ত তেক্নোলোজী অমা ইন্দস্ত্রী অসিনা শেম্বা ঙম্লোইদবরা? তেক্নোলোজী শেম্বখক্তনা কান্নবা পুরক্লোই, মদুবু ভারতকী মীপুম খুদিংনা শীজিন্নহনবা য়াগদবা পাম্বৈশিং ঐখোয়না থিবা মথৌ তাই। মতৌ অসুম্না হকশেল অমসুং তিঞ্জঙ কায়জঙদবগী দেতাগী পাঙ্গলনা খ্বাইদগী লায়রবশিংদা ফাওবা কান্নবা কমদৌনা ফংহনগদগে হায়বসিগী মতাঙদসু ভারতনা ঙসি অদোমগী মায়কৈ য়েংলি। তেলিমেদিসিনবু মীয়াম্না পাম্নহন্নবগীদমক অদোমগী মফমদগী হেন্না ফবা পাম্বৈশিং পুথোরক্কনি হায়না লৈবাকসিনা থাজবা থম্লি।
মরূপশিং,
মহৈ মশিং অমসুং স্কিল দেভেলপমেন্তকী মতাঙদা লৈবাকসিগী য়াম্লবা মীয়ামদা কান্নবা পীগদবা পাম্বৈ অমা তেক ইন্দস্ত্রীনা লৈবাকসিদা পীবা মথৌ তাই। ঙসি লৈবাকসিদা অতল তিঙ্করিং লেবতগী হৌরগা অতল ইনক্যুবেসন সেন্তর ফাওবনা স্কুল-কলেজশিংদা তেক্নোলোজীগী ফীভম অমা শেমগৎলি। অনৌবা নেসনেল এজুকেসন পোলিসীদা মহৈ মশিংগা লোয়ন-লোয়ননা স্কিলিংদসু চপ মান্ননা মীৎয়েঙ চঙলি। হোৎনরিবা অসি ইন্দস্ত্রীগী মতেং য়াওদনা মায় পাকপা ঙম্লোই। অদোম্না অদোমগী সি.এস.আর. থৌরমশিংগী ফংলিবা মহৈশিংদসু পুক্নিং খরা চঙবিয়ু হায়না ঐনা হায়নিংই। করিগুম্বা অদোমগী সি.এস.আর. থৌরমশিংনা লৈবাক্কী শোত্থহৌরবা কাঙলুপশিংগী অঙাঙশিংদা মীৎয়েঙ চঙলবদি, অদোম্না মখোয়বু দিজিতেল এজুকেসনগা হেন্না মরী নকশিন্নহনগনি, মখোয়দা এনালাইতিকেল থিঙ্কিং, লেতরেল থিংঙ্কিং শেমগৎকনি, অদু ওইরবদি মসি অচৌবা গেম চেঞ্জর অমা ওইগদৌরিবনি। লৈঙাক্না মসিগী মতাঙদা হোৎনরি অদুম ওইনমক মসিদা অদোমগী মতেং ফংলবদি পান্দমসি কয়া য়াম্না ফংবা ঙমগনি। ভারত্তা ৱাখল্লোন ৱাত্তে। মফমসিদা ৱাখল্লোনশিংবু মঙফাওনহন্নবা লমজিংলোইশিং মথৌ তাই।
মরূপশিং,
আত্মনিরভর ভারতকী মকোন ঙসি তিয়র-২, তিয়র-৩ ময়োল্লমশিংদা ওইরি। হায়রিবা অপীকপা ময়োল্লমশিং অসিদা লৈরিবা আই.তি.দা য়ুম্ফম ওইবা তেক্নোলোজীগী দিমান্দ অমসুং গ্রোথকীসু অচৌবা মকোন ওইরক্লি। লৈবাক্কী হায়রিবা অপীকপা ময়োল্লমশিংগী নহাশিংনা মতিং লৈবা ইনোভেতরশিং ওইনা চোংথোরক্লি। লৈঙাক্কী মীৎয়েঙসু হায়রিবা অপীকপা ময়োল্লমশিংসিদা হেন্না ফবা ইনফ্রাস্ত্রকচর শেমগৎপদা লৈরি মরমদি মফমদুদা লৈরিবা লৈবাক মীয়ামগা লোয়ন-লোয়ননা অদোমগুম্বা ওন্ত্রপ্রিন্যুরশিংগীসু মাঙজবা লৈহন্দনবনি। অদোম্না হায়রিবা অপীকপা ময়োল্লমশিং অসিদা নকশিল্লিবমখৈ মখোয়দা হেন্না হেন্না চাউখৎপা পুরক্কদৌরিবনি।
মরূপশিং,
মথঙগী নুমিৎ ৩নিসিদা অদোম্না হৌজিক্কী অমদি তুংগী ৱাফমশিংগী পাম্বৈশিংগী মতাঙদা কুপ্না খন্ন-নৈনগনি হায়না ঐনা থাজৈ। লৈঙাক্না হান্নগুম অদোমগী ৱাফমশিং খন্নগনি। ঐনা শোয়দনা হায়নিংবা ৱাফম অমদি মমাঙদা ওগস্ত ১৫দা ঐনা লাল কিলাদগী ৱা ঙাঙবা মতমদা অদোম্না তারমগনি ঐনা লৈবাক মীয়াম মাঙদা পান্দম অমা থমখি, মদুদি নুমিৎ লিশিং অমগী মনুংদা ভারতকী খুঙ্গঙ লাখ ৬দা ওপ্তিকেল ফাইবর নেতৱর্ক তিংবগী থবক লোইশিনগনি হায়না, হৌজিক ওপ্তিকেল ফাইবর নেতৱর্ক অসি স্কেলেতন অমা ওইরগনি অমদি ঐনা হোৎনরবদি ঐখোয় পাঙথোকপসু ঙমগনি, স্তেতশিংসু ঐখোয়গা লোয়ননা চৎমিন্নগনি, অদুবু মদুগী মতুংদা লেমহৌরিবা থবকশিং অদুদি অদোমগী ৱাখলগা মরী লৈনবা ৱাফম্নি। ওপ্তিকেল ফাইবর নেতৱর্ক্কী ইনফ্রাস্ত্রকচর হিন্দুস্তানগী লায়রবদগী লায়রবশিংনা কমদৌনা শীজিন্নহনগদগে, অনৌ অনৌবা য়ুজর ফ্রেন্দলী প্রদক্তশিং কমদৌনা পুথোক্কনি, খুঙ্গঙগী মীওইশিংবু লৈঙাক্কা, কৈথেলগা, মহৈ মশিংগা, লায়না চেন্দবা ফীভমগা কমদৌনা শমজিন্নগদগে, হায়রিবা স্কেলেতন অসিবু মখোয়গী পুন্সিদা অহোংবা পুরক্নবগী অচৌবা লম্বী অমা কমদৌনা ওইহনগদগে হায়বা থবকসিদা হৌজিক্তগী হৌনা অদোমগী মফমদা য়াওরিবা অপীক অপীকপা স্তার্তঅপশিংনা খুঙ্গঙশিংদা ওপ্তিকেল ফাইবর য়ৌরকপা মতমদা খুঙ্গঙশিংগী মথৌ তাবা ৱাফম ১০সি ফংবা ঙম্লগনি, খুঙ্গঙদা ওপ্তিকেল ফাইবর য়ৌরকপা মতমদা খুঙ্গঙগী অঙাঙশিংগী পুন্সিদা অহোংবা অসি পুরক্নবা শেম শাদুনা লৈরে হায়গদবা পোত্থোকশিং পুথোক্নবা হোৎনবিয়ু।
অদোমসু য়েংবিয়ু, কয়াদা ফজখ্রবা তাঞ্জানো, কয়াদা ফজখ্রবা তাঞ্জানো, অমদি মসিগীদমক ঐনা অদোমগী মফমদা পাউজেঞ্জরি, লৈঙাক্না থবক অসি পায়খৎলি, ঐখোয় লীদর্সিপপু মতম শাংনা পুদুনা চৎকনি, হীরম খুদিংদা পুগনি, অচেৎপা ফিরেপকা লোয়ননা চৎকনি, অমদি হায়রিবা লীদর্সপ অসিবু নৈনদুনা পুথোরকপা অমৃত অদুনা লৈবাক পুম্বদা কান্নবা পুরক্কনি হায়বা ফিরেপ লৌবিয়ু।
হায়রিবা থাজবসিগা লোয়ননা অমুক্কা হন্না ময়াম পুম্নমক্কী মফমদা য়াইফ-পাউজেল পীজরি।
হন্না হন্না থাগৎচরি!!
