নেতাজি সুভাস চন্দ্র বোসনা আই.এন.এ ত্রষ্ট, ব্রিগেদিয়ার(পোথারবা) আর.এস চিকারা জি; ভারতকী নিংতম ইহৌদা শরুক য়াখিবা অমসুং মুৎপা নাইদ্রবা আই.এন.এগী লেপ্তনেন্ত আর. মধাবন জি,
জনুৱারি ২৩ অসি নেতাজি সুভাস চন্দ্র বোসগী মপোক নুমিৎনি। মহাক ইকায়খুম্নবগা লোয়ননা নেতাজি সুভাস চন্দ্র বোসগী থৌনানা ঐখোয়দা ইথিল পীরি।
মরুপশিং,
চহি খর অসিদা, লৈবাক্কী ৱাখল্লোন্দা পরাক্রম দিবস লৈবাক অসিগী থাদোক্নবা য়াদ্রবা কুহ্মৈ অমা ওইরে। জনুৱারি ২৩ না পরাক্রম দিবস, জনুৱারি ২৫ না নেসনেল ভোত্তরস দে, জনুৱারি ২৬ না গনতন্ত্র দিবস, জনুৱারি ২৯ না বিত্তিং রিত্রিৎ অমসুং জনুৱারি ৩০ না শেংলবা বাপু লৈখিদবগী নুমিৎ থোকপা অসি য়াম্না হরাওবা অমনি। লৈবাক অসিগী অচৌবা কুহ্মৈ পাংথোক্নবা চৎনবী অমা শেম্লে। পরাক্রম দিবসতা লৈবাক অসিগী মীয়ামদা অমসুং অদোমগী মফমদা ঐনা য়াইফ পাউজেল পীজরি।
ইনাওশিং অমসুং ইচলশিং,
২০২৬ দা পরাক্রম দিবসকী মরুওইবা থৌরম অন্দমান অমসুং নিকোবরদা পাংথোক্লে। অন্দমান অমসুং নিকোবরগী পুৱারি থৌনা ফবা, কৎথোকপা অমসুং লিংজেলনা থল্লে, সেল্লুার জেলদা বীর সবারকারগুম্বা মরৈবাক নিংবশিংগী ৱারিশিং অমসুং লমদম অসিগা নেতাজি সুভাস চন্দ্র বোসগা মরী লৈনবা অসিনা থৌরম অসি অমুক্ক হেন্না অখন্নবা ওইরে। নিংতম্বগী ৱাখল্লোন কৈদৌঙৈদা লোইবা নাইদে হায়বগী থাজবা অন্দমানগী লমদমনা খুদম ওইরে। মফম অসিদা য়াওল্লোয় কয়া ওৎ-নৈখি অমসুং নিংতম লান্মী কয়া মখোয়গী থৱায় কৎখি, অদুবু মুৎপগী মহুত্ত, নিংতম ইহৌগী মৈরি হেন্না কনগৎলকখি। মদুগী ফল অমা ওইনা, অন্দমান অমসুং নিকোবরগী লমদমনা নিংতম্বা ভারতকী অহানবা নুমিৎ থোকপা উবা ফংখি। ১৯৪৭ গী মমাংদা, দিশেম্বর ৩০, ১৯৪৩ দা সমুদ্রগী ইথকশিংনা শাখি ওইনা মফম অসিদা মচু অহুমগী ফিরাল পাইহনখি। ২০১৮ দা অচৌবা থৌরম অসিগী চহি ৭৫ মপুংফারকপা থৌরম পাংথোকপদা, ঐনা হায়রিবা মফম অদুদা দিশেম্বর ৩০ দা মচু অহুমগী ফিরাল পাইহনখি। সমুদ্র খোঙবালনা নেসনেল এন্থেম খোঙদুনা, নিংতম লান্মীশিংগী মশিং থিঙমদ্রবা মঙলানশিং মঙফাওনবা ঙম্নবগী মওংদা অকনবা নুংশিত্ত মচু অহুমগী ফিরাল পাইখি।
ইনাওশিং অমসুং ইচলশিং,
নিংতম্লবা মতুংদা, অন্দমান অমসুং নিকোবরগী ফজরবা পুৱারি লিদুনা থমগদবনি। অদুবু মতম অদুদা সরকার পায়খিবশিংনা সেকুরিতি ৱাৎপগী ৱাখল অমা চেনখি। নিংতম্বগী মনা মখোয়না ইমুং অমা খক্তদা পীবা পামখি অমসুং মসিগী রাজনিতিগী মশাগী ওইজবা থিবা অসিনা, লৈবাক অসিগী পুৱারি মীরাইখি। অন্দমান অমসুং নিকোবর লোয়লম লৈঙাক্কী শক্তম ওইনা থমখি, নিংতম্লবা চহি ৭০ গী মতুংদা ফাওবা মফম অসিগী ইথৎশিং হৌজিক ফাওবা বৃতিস ওফিসারশিংগী মমিংশিং ওইনা খঙনখি। পুৱারিগী অরানবা অসি মহাক্কী সরকারনা লোইশিল্লে অমসুং মরম অদুনা হৌজিক পোর্ত ব্লেয়ার ‘শ্রী বিজয়পুরম’ হায়না খঙনরে, মিং অসিনা ঐখোয়দা নেতাজিগী মাইপাকপা নিংশিংহল্লে। অতোপ্পা ইথৎশিং শ্বারাজ দ্বিপ, সহিদ দ্বিপ অমসুং সুভাস দ্বিপ হায়না মমিং থোল্লে। ২০৩১ দা, অন্দমানগী ইথৎ ২১ থৌনা ফরবা ভারত লান্মীগী পারম বির চক্র মনা ফংলবা লান্মী ২১ গী মমিংদা থোল্লে। ঙসি অন্দমান অমসুং নিকোবরদা মীনাই ওইরিঙৈ মতমগা মরী লৈনবা মমিংশিং মুৎথৎলে অমসুং নিংতম্লবা ভারতকী মমিংশিংনা মখোয়গী মশক তাক্লে।
মরুপশিং,
নেতাজি সুভাস চন্দ্র বোস নিংতম ইহৌগী শক্নাইরবা অথৌবা অমা ওইবতা নত্তনা নিংতম্লবা ভারতকী তুংগী খনবা মীওই অমসুনি, ভারতকী অরিবা ৱাখল্লোনশিংদা য়ুম্ফম ওইবা অনৌবা মতমগী লৈবাক অমা মহাক্না মঙ মঙখি। ঙসিগী মীরোলদা নেতাজিগী ৱাখল্লোন খঙহনবা ঐখোয়গী থৌদাংনি অমসুং মহাক্কী সরকারনা মসিগী থৌদাং পাংথোকপদা হরাওই। দিল্লিগী লাল কিলাদা নেতাজিদা কৎথোক্লবা ম্যুজিয়ম অমা ঐখোয়না শেমগৎলে। ইন্দিয়া গেত ময়াদা নেতাজিগী অচৌবা মীতম অমা খিল্লে। গনতন্ত্র দিবসকী পেরেত্ত আই.এন.এন্না পাংথোকখিবা থবক শিংলে। নেতাজি সুভাস চন্দ্র বোস দিজাষ্টার মেনেজমেন্ত এৱার্দস লিংখৎলে। হায়রিবা থবকশিং অসিনা নেতাজি সুভাস চন্দ্র বোস ইকায়খুম্নবা উৎপা খক নত্তনা ঐখোয়গী নহারোলশিং অমসুং তুংগী মীরোলশিংগী লোম্বা নাইদ্রবা ইথিলগী হৌরকফম অমসু ওইরে। অচুম্বা ফিদমশিং ইকায়খুম্নবা অমসুং মখোয়দগী ইথিল লৌবা অসিনা থৌনা অমসুং থাজবগা লোয়ননা বিকসিত ভারত অমগী ঐখোয়গী ৱাশক ঙাকপা ঙমহনগনি।
মরুপশিং,
মপাঙ্গল শোনবা লৈবাক অমনা মসিগী পান্দমশিং ফংবদা খুদোংচাদে। মরম অদুনা নেতাজি সুভাস চন্দ্র বোসনা মতম পুম্নমক্ত মপাঙ্গল কনবা লৈবাক অমগী মঙ মঙখি। ২১শুবা চহিচাদা, ভারতসু শক্তি লৈবা লৈবাক অমা ওইনা শেমগৎলে। ওপরেসন সিন্দুর মনুংদা, লৈবাক অসিগী অকায়বা থোকহনবা মীওইশিংগী য়ুমদা চঙদুনা লান্দাখি অমসুং মখোয় মাঙহনখি। ঙসি, কমদৌনা মপাঙ্গল কনহলগনি হায়বা, কমদৌনা মসি শেন্নগনি অমসুং কমদৌনা মসি শীজিন্নগনি হায়বা ভারতনা খঙলে। মপাঙ্গল কনবা ভারত অমগী নেতাজি সুভাস চন্দ্র বোসকী পান্দম মতুংইন্না, দিফেন্স সেক্তর মশা মরোমদোম লেপচবা ঙম্নবা লৈবাক অসিনা থবক পায়খৎলি। মমাংদা ভারতনা মপান লৈবাকশিংদগী পুশিল্লকপা খুৎলায়শিংগী মখা পোনখি, অদুবু ঙসিদি ভারতনা দিফেন্সকী মপান্দা থাদোকপা লুপা করোর ২৩,০০০ হেল্লে। লৈবাক অসিনা শাবা ব্রাহ্মোস অমসুং অতোপ্পা মিসাইলশিং মালেমগী পুক্নিং চিংশিল্লে। ভারতনা লৈবাক অসিগী আর্মদ ফোর্সশিং মশা মরোমদোম লেপচবগী শক্তিগা লোয়ননা মতমগা চুন্না শেমগৎলে।
ইনাওশিং অমসুং ইচলশিং,
ঙসি, বিকসিত ভারত অমগী পান্দমগী মাইকৈদা ঙসি মীওই করোর ১৪০ অমতা ওইনা থবক পায়খৎলি, অত্মনির্ভর ভারত কেম্পন অমসুং শ্বাদেসিগী লাইৱানা মপাঙ্গল কনখৎহল্লবা লম্বী অমনি। বিকসিত ভারত অমগী খোঙচৎ অসি মপাঙ্গল কনখৎনবা পরাক্রম দিবসনা মখা তানা ইথিল পীগনি হায়না ঐনা থাজৈ। নেতাজি সুভাসকী মপোক নুমিৎ অসিনা মীয়ামদা ঐনা অমুক হন্না হরাওবা ফোঙদোকচরি।
ভারত মাতা কি জয়!
বন্দে মাতারম!
বন্দে মাতারম!
বন্দে মাতারম!
