ৱেস্ত বেঙ্গলগী রাজ্যপাল, শ্রী সি.ভি. অনন্দ বোজকী, ঐহাক্কী কেন্দ্রগী মন্ত্রীমন্দলগী মরুপশিং, শ্রী সর্বানন্দ সোনোৱালজী, শ্রী সুকান্তা মজুমদারজী, শ্রী শান্তনু থাকুরজী, ঐহাক্কী পার্লিয়ামেন্তকী মরুপশিং, শ্রী সৌমিক ভত্তাচার্য়জী, শ্রী সৌমিত্রা খানজী, ৱেস্ত বেঙ্গল লেজিস্লেতিব এসেমব্লীদা ওপোজিসনগী লুচিংবা, শ্রী সুভেন্দু আধিকারিজী, অতোপ্পা মীয়ামগী মীহুৎশিং, নুপী অমসুং নুপাশিং!
ঙরাং ঐহাক মালদাদা লৈরম্মি, অমসুং ঙসি ঐহাক্না হুগলীদা, ময়াম পুম্নমক্কী মরক্তা লৈবগী খুদোংচাবা ফংজরে। কেন্দ্র সরকারনা চাউখৎলবা ভারতকী পান্দমগা লোয়ননা নোংপোক থংবা ভারতকী চাউখৎ থৌরাংগী মায়কৈদা লেপ্পা লৈতনা থবক তৌরি। ঙরাং অমসুং ঙসি পাংথোকখিবা প্রোগ্রামশিংনা মসিগী ৱারেপ অসি হেন্না মপাঙ্গল কনখৎহল্লি। মতম অসিগী মনুংদা, ঐহাক্না ৱেস্ত বেঙ্গলগা মরী লৈনবা চাউখৎ-থৌরাংগী প্রোজেক্ত করোর চাম্মরোমগী শেনফমগী উরেপ-উয়ুং তম্বগী অমসুং শঙ্গাবগী খুদোংচাবা ফংখি। ঙরাং লৈবাক অসিগী অহানবা বন্দে ভারত স্লিপর ত্রেন ৱেস্ত বেঙ্গলদগী লমথাখি। বেঙ্গলদা অনৌবা অমৃত ভারত এক্সপ্রেস ত্রেন তরুক ফংখ্রে। ঙসি অমৃত ভারত এক্সপ্রেস ত্রেন অহুম অমুক হৌদোকখ্রে। অসিগুম্বা ত্রেন অমনা ঐহাক্কী পার্লিয়ামেন্তরী কন্সতিত্যুসন কাশী (বারানসী) অমসুং বেঙ্গলগী মরক্তা মরী হেন্না চেৎশিলহল্লগনি। মসিগী মথক্তা অমৃত ভারত এক্সপ্রেস ত্রেনশিং দিল্লী অমসুং তামিল নাদুগীদমকসু হৌদোকখ্রে। অতেনবা মওংদা হায়রবদা, হৌখিবা পুং ২৪ অসি নোংচুপ বেঙ্গলগী রেল কনেক্তিবিতীগীদমক্তা অমুক্তা ওইখিদ্রি। হৌখিবা চহি ১০০দা পুং ২৪দা অসিগুম্বা থবক অসি পাংথোকপা ঙমখিদ্রি।
মরুপশিং,
ৱেস্ত বেঙ্গলদা ঈশিং লম্বীগী অচৌবা পোতেন্সিএল লৈরি, অমসুং কেন্দ্র সরকারনসু মসিদা থবক তৌরি। পোর্ত-লিদ দিবেলপমেন্তকীদমক মথৌ তাবা ইনফ্রাস্ত্রকচর শেমগৎনবা মতেং পীরি। মতম খরগী মমাংদা, য়ুম্ফম থোং থম্বগী থৌরম পাংথোকখ্রে অমসুং পোর্তশিং অমসুং ইনলেন্ত ৱাতরৱেজগা মরী লৈনবা প্রোজেক্ত কয়া শঙ্গাখ্রে। মখোয়শিং অসি ৱেস্ত বেঙ্গল অমসুং ভারতকী চাউখৎপগীদমক য়াম্না মরু ওই। মসি নোংচুপ বেঙ্গলবু মেন্যুফেকচরিং, ললোন-ইতিক অমসুং লোজিস্তিক্সকী মরুওইবা মফম অমা ওইহন্নবগী য়ুম্বীনি। ঐহাক্না ময়াম পুম্নমকপু প্রোজেক্তশিং অসিগীদমক নুংঙাইবা ফোংদোকচরি।
মরুপশিং,
পোর্ত অমসুং মসিগা মরী লৈনবা ইকোসিস্তেমদা ঐখোয়না অহেনবা মীৎয়েং চংলক্লিবমখৈ মফম অসিদা থবক হেন্না ফংহল্লগনি। কেন্দ্র সরকারনা হৌখিবা চহি ১১ অসিদা শ্যামা প্রসাদ মুখর্জী পোর্তকী কেপাসিতী পাকথোক চাউথোকহনবদা চাউনা শেল থাদরক্লি। পোর্ত অসিগী কনেক্তিবিতী ফগৎহন্নবা সাগরমালা স্কিমগী মখাদা লম্বীশিংসু শেমখ্রে। ঙসি ঐখোয়না মহৈ অদু উবা ফংলে। হৌখিবা চহিদা, কোলকতা পোর্তনা কার্গো হন্দলিংদা অনৌবা রেকোর্দশিং থমখি।
মরুপশিং
বালাগরদা শাবা এক্সতেন্দেদ পোর্ত গেৎ সিস্তেম অসিনা হুগলী অমসুং অকোয়বদা লৈরিবা মফমশিংদা অনৌবা খুদোংচাবশিং ফংহল্লগনি। মসিনা কোলকতা শহরদা ত্রাফিক অমসুং লোজিতিক্কী অৱাবা হন্থহল্লগনি। গঙ্গা তুরেলদা শেমগৎলিবা ঈশিংগী লম্বীগী খুত্থাংদা কার্গো চত্থোক চৎশিন হেনগৎলগনি। হায়রিবা ইনফ্রাস্ত্রকচর পুম্নমক অসিনা হুগলীবু গুদাইজিং অমসুং ত্রেদকী হাব অমা ওইহনবদা মতেং পাংগনি। মসিনা লুপা করোর চাম্মরোমগী অনৌবা ইনভেস্তমেন্ত লাকহল্লগনি, নহারোল লিশিং কয়াদা থবক ফংহল্লগনি, অপীকপা ত্রেদরশিং অমসুং ত্রান্সপোর্তেসনগা মরী লৈনবা মীওইশিংদা কান্নবা ফংহল্লগনি, অমসুং লৌমীশিং অমসুং পোত্থোক পুথোক্লিবশিংদা অনৌবা কৈথেলশিং ফংহল্লগনি।
মরুপশিং,
ঙসি ভারত্তা, ঐখোয়না মল্তি-মোদেল কনেক্তিবিতী অমসুং গ্রীন মোবিলিতীদা চাউনা মীৎয়েং থম্লি। পোর্তশিং, ইন্তরলেন্দ ৱাতরৱেজশিং, হাইৱেশিং, অমসুং এয়রপোর্তশিং পুম্নমক অসি অমগা অমগগী মরক্তা শম্নদুনা ত্রান্সপোর্তেসনগী খুদোংচাবা লৈহল্লগনি। মসিনা লোজিস্তিক্সকী শেনফম অমসুং ত্রান্সপোর্তেসনগী মতম হন্থহল্লি।
মরুপশিং,
ঐখোয়গী ত্রান্সপোর্তকী মওংশিং অসি অকোইবগী ফিভমদা শোকহন্দনবা হায়বসিদসু ঐখোয়না থাজবা থম্লি। হাইব্রিদ ইলেক্ত্রিক বোটশিংনা রিভর ত্রান্সপোর্ত অমসুং গ্রীন মোবিলিতী অনিমক হেনগৎহনগনি। মসিনা হুগলি তুরেলদা চৎথোক-চৎশিন তৌবা লাইথোকহল্লগনি, পোলুসন হন্থহল্লগনি অমসুং তুরেলদা য়ুম্ফম ওইবা তুরিজম হেনগৎহল্লগনি।
মরুপশিং,
ভারতনা ঙা য়োকপা অমসুং সীফুদ পুথোক-পুশিন তৌবদা খোংজেল য়াংনা খুমাং চাউশিল্লি। ঐহাক্কী মঙলানদি ৱেস্ত বেঙ্গলনা সেক্তর অসিদা লৈবাক অসিদা মকোক ওইহনবনি। কেন্দ্র সরকারনা বেঙ্গলদা ইনলেন্দ ৱাতরৱেজগীদমক মহাক্কী ভিজনদা অখন্নবা মতেং পীরি। মসিনা রাজ্য অসিগী লৌমীশিং অমসুং ঐখোয়গী ঙামীশিংদা কান্নবা ফংহল্লে।
মরুপশিং,
কেন্দ্র সরকারনা হৌদোক্লিবা প্রোজেক্ত পুম্নমক অসিনা ৱেস্ত বেঙ্গলগী চাউখৎ-থৌরাংগী খোঙচৎ অসি খুমাং চাউশিলহল্লগনি। ঐহাক্না অমুক্কা হন্না, প্রোজেক্তশিং অসিগীদমক ময়াম পুম্নমকপু য়াইফ-পাউজেল পীজরি। মীওই লিশিং কয়া অমা মনাক নকপদা ঙাইদুনা লৈরি, অমসুং ঐহাক্না মখোয়দা হায়গদবা কয়া অমসু লৈরি, অমসুং মখোয়না ঐহাক্কী ৱারোলশিং অসি হেন্না খৌরাংনা ঙাইরি। মফম অদুদা ঐহাক্না হেন্না ময়েক শেংনা ৱা ঙাংগনি অমসুং মরম অদুনা, ঐহাক্না মফম অসিদা ঐহাক্কী ৱারোল লোইশিনজরি। অদোমগী অয়াবা য়াওরগা, ঐহাক্না হৌজিক মথংগী মীফম অদুদা চৎকনি। ময়ামবু হন্না-হন্না থাগৎচরি।
