হর হর মহাদেব!
উত্তর প্রদেশকী ইকাই খুম্নরবা মুখ্য মন্ত্রী য়োগী আদিত্যনাথজী, উপ-মুখ্য মন্ত্রী ব্রজেস পাথকজী, য়ু.পি. সরকারগী মন্ত্রীশিং ব্রোথর রবীন্দ্র জয়সৱালজী, দয়াশঙ্করজী, গিরিশ য়াদবজী, বনারসকী মেয়র ইনাও অশোক তিৱারীজী, অতোপ্পা মীয়ামগী মীহুৎশিং, ভোলীবোল এসোসিয়েসনগী থৌ পুবা পুম্নমক, লৈবাক শিনবা থুংবদগী লাকখিবা শান্নরোইশিং অমসুং কাশীগী ঐহাক্কী ইমুং-মনুংগী মীওইশিং - খুরুমজরি।
কাশীদগী পার্লিয়ামেন্তকী মেম্বর অমা ওইনা, শান্নরোই পুম্নমকপু তরাম্না ওকপা অমসুং থাগৎপা ফংজবা অসিদা ঐহাক য়াম্না নুংঙাইবা ফাওই। ঙসি কাশীদা নেস্নেল ভোলীবোল চেম্পিয়নশিপ হৌদোকখ্রে। অদোম খুদিংমক্না য়াম্না কন্না হোৎনরবা মতুংদা নেস্নেল তর্নামেন্ত অসিদা য়ৌরে। লাক্কদৌরিবা নুমিৎশিংদা, অদোমগী হোৎনরিবশিং অসি কাশীগী লমদা চাংয়েং তৌরগনি। লৈবাক অসিগী রাজ্য 28দগী তীমশিং মফম অসিদা লাক্লে হায়না ঐহাক্না খঙহনখ্রে। মসিনা এক ভারত, শ্রেস্ত ভারতগী ফজরবা মশক অমা উৎলি। চেম্পিয়নশিপ অসিদা শরুক য়ারিবা শান্নরোই পুম্নমক্তা ঐহাক্না য়াইফ-পাউজেল পীজরি।
মরুপশিং,
বরানাসতা, মসি তোয়না হায়নৈ: "অদোম্না তশেংনা বরানাসপু খঙবা পাম্লবদি, অদোম্না বরানাসতা লাক্কদবনি।" ময়াম পুম্নমক মফমসিদা লাক্লে, অমসুং হৌজিক অদোম্না বানারসী খঙবা ফংলগনি। ঐখোয়গী বানারসী শান্ন-খোৎনববু পামজবশিংগী শহর অমনি। রেস্তলিং, রেস্তলিং এরেনাশিং, বোক্সিং, বোৎ রেস, কাবাদ্দি... অসিগুম্বা স্পোর্তস কয়া মফম অসিদা মীয়াম্না পাম্নৈ। বনারসতা নেস্নেল লেভেলগী শান্নরোয় কয়া অমা পুথোকখ্রে। বনারস হিন্দু য়ুনিভর্সিতী, য়ু.পি. কোলেজ অমসুং কাশী বিদ্যাপিথকী শান্নরোইশিংনা রাজ্য অমসুং নেস্নেলগী থাক্তা মায় পাকখ্রে। চহি লিশিং কয়াদগী কাশীনা লৌশিং অমসুং আর্তকীদমক মফম অসিদা লাক্লিবা মীওই খুদিংমকপু তরাম্না ওক্লি। মসিনা মরম ওইদুনা ঐহাক্না থাজবা থম্লি মদুদি নেস্নেল ভোলীবোল চেম্পিয়নশিপকী মনুংদা, বানারসীগী থৌনা অসি অৱাংবা থাক্তা লৈহৌরগনি। অদোম্না অদোমবু থৌগৎলিবা ভাবোকশিং উবা ফংলগনি, অমসুং অদোম্না কাশীগী মীয়োক মীচান ফবগী চৎনবীশিংসু থেংনগনি।
মরুপশিং,
ভোলীবোল অসি অচম্বা মশান্না নত্তে। নেৎকী নাকল অনিমক্তা, মসি বেলেন্সকী মশান্ননি, কোওপরেসনগী মশান্ননি, অমসুং মসিনা হোৎনবা কনবা উৎলি। ভোলিবোলগী মরুওইবা ৱাফমদি, ওইনীংবা ওইরবসু বোল অসি মতম পুম্নমক্তা তাহল্লোইদবনি। ভোল্লিবোলনা ঐখোয়বু তীম স্পিরিতকা শম্নহল্লি। ভোলিবোল শান্নরোয় খুদিংমক্কী মন্ত্রদি তীম ফার্স্তনি। শান্নরোই খুদিংমক্না তোঙানবা হৈশিংবা লৈরবসু, মখোয় পুম্নমক্না মখোয়গী তীমগী মায় পাক্নবগীদমক শান্নৈ। ভারতকী চাউখৎ থৌরাংগী ৱারী অমসুং ভোলীবোলগী শান্নবগী মরক্তা মান্নবা কয়া অমা ঐনা উরি। ভোল্লিবোলনা ঐখোয়দা তাকপদি মায় পাকপা অমত্তা ইথন্তনা খক্তা ফংদে। ঐখোয়গী মায় পাকপা অসি ঐখোয়গী কোওর্দিনেসন, ঐখোয়গী থাজবা অমসুং ঐখোয়গী তীমগী শেম-শাবা অদুদা মখা পোল্লি। মী খুদিংমক্কী মশাগী থৌদাং, মশাগী মথৌ লৈ। অমসুং মীওই খুদিংমক্না মখোয়গী থৌদাংবু অচেৎপা মওংদা অমসুং থাজবগা লোয়ননা পাংথোকপা মতমদা ঐখোয়না মায় পাকপা ঙমগনি।
ঐখোয়গী লৈবাক অসিসু চপ মান্নবা মওংদা খুমাং চাউশিল্লি। স্বচ্ছতগী হৌরগা দিজিতেল পেমেন্ত ফাওবা, এক পের মাগী নামগী মখাদা উ থাবদগী হৌরগা চাউখৎলবা ভারত অমগীদমক কেম্পেন ফাওবা ঐখোয়না মাংলোমদা চংশিল্লি মরমদি নাগরিক খুদিংমক, খুন্নাই খুদিংমক, রাজ্য খুদিংমক্না অপুনবা ফিরেপ অমগা লোয়ননা, ইন্দিয়া ফার্ষ্টকী স্পিরিৎ অমগা লোয়ননা লৈবাক অসিগীদমক থবক তৌরি।
মরুপশিং,
ঙসি ভারতকী চাউখৎপা অমসুং ঐখোয়গী শেন্মিৎলোন অসি মালেম পুম্বনা থাগৎলি। অদুবু লৈবাক অমনা চাউখৎলকপা মতমদা, খোংজেল অসি শেন্মিৎলোনগী মায়কৈ খক্তদা হেন্দোক্তে। হায়রিবা থাজবা অসি শান্ন-খোৎনবগী লমদসু উবা ফংই। মসিদি ঐখোয়না হৌখিবা চহিশিংদা স্পোর্ত খুদিংমক্তা উবা ফংলি। 2014দগী হৌরগা তোঙান তোঙানবা দিসিপ্লিনশিংদা ভারতকী পর্ফোমেন্স লেপ্তনা ফগৎলক্লি। জেনরেসন-জেদকী শান্নরোইশিংনা শান্নবুংদা তিরঙ্গা পাইদুনা শান্নবা উবদা ঐখোয়না চাউথোকচবা ফাওই।
মরুপশিং,
সরকার অমসুং খুন্নাই অনিমক্না শান্ন-খোৎনবগী মায়কৈদা পুক্নিং চিংশিনখিদবা মতম অমা লৈরম্মি। মসিনা মরম ওইদুনা, শান্নরোয়শিংনা মখোয়গী তুংলমচৎকী মতাংদা অকিবা কয়া লৈখি, অমসুং নহা খরা খক্তনা শান্ন-খোৎনববু মখোয়গী কেরিয়র ওইনা খনখি। অদুবু হৌখিবা চহি তরা অসিদা, ঐখোয়না সরকার অমসুং খুন্নাই অনিমক্কী ৱাখল্লোনদা অহোংবা অমা উবা ফংলে। সরকারনা স্পোর্তসকী বজেৎ য়াম্না হেনগৎহনখ্রে। ঙসিদি, ভারতকী শান্ন-খোৎনবগী মোদেল অসি এথেলিৎ-সেন্ত্রিক ওইরে। তেলেন্ত মশক খঙদোকপা, সাইন্তিফিক ত্রেনিং, ন্যুত্রিসন, ত্রান্সপরেন্ত সেলেক্সন ফাওবা, থাক খুদিংমক্তা, শান্নরোইশিংগী অপাম্বশিংবু খ্বাইদগী মরুওইনা থম্লি।
মরুপশিং,
ঙসিদি, লৈবাক অসিনা রিফোর্ম এক্সপ্রেসতা চংশিল্লি। সেক্তর খুদিংমক, দিবেলপমেন্তকী পান্দম খুদিংমক রিফোর্ম এক্সপ্রেস অসিগা শম্নরি, অমসুং স্পোর্তস অসি মসিগী মনুংদা অমনি। স্পোর্তস সেক্তরদসু অচৌবা রিফোর্মশিং পুরকখ্রে। নেস্নেল স্পোর্তস গবর্নান্স এক্ত অমসুং খেলো ভারত পোলিসী 2025গুম্বা প্রোভিজনশিং অসিনা অশেংবা তেলেন্তশিংদা খুদোংচাবা ফংহনগনি, স্পোর্তস ওর্গনাইজেসনশিংদা ত্রান্সপরেন্সী হেনগৎহল্লগনি অমসুং লৈবাক অসিগী নহারোলশিংনা স্পোর্তস অমসুং এজুকেসন অনিমক্তা মতম অমত্তদা খুমাং চাউশিলহল্লগনি।
মরুপশিং,
TOPS (তের্গেৎ ওলিম্পিক পোদিয়ম স্কিম) গুম্বা ইনিসিয়েতিবশিংগী খুত্থাংদা, ভারতকী স্পোর্তস ইকোসিস্তেম অসি ত্রান্সফোর্ম তৌরি। নাকল অমরোমদা, ঐখোয়না মপাঙ্গল কনবা ইনফ্রাস্ত্রকচর অমসুং ফন্দিং মেকানিজমশিং শেমগৎলি, অমসুং অতোপ্পা নাকল অমরোমদা, ঐখোয়না ঐখোয়গী নহারোলশিংদা মালেমগী থাক্কী এক্সপোজর ফংহন্নবা হোৎনরি। হৌখিবা চহি তরা অসিদা ভারতনা ফিফা অন্দর-17 ৱার্ল্দ কপ, হোকী ৱার্ল্দ কপ অমসুং মেজর চেজ তোর্নামেন্তশিংগুম্বা মরুওইবা ইন্তর্নেস্নেল ইভেন্ত 20 হেন্না পাংথোকখ্রে হায়বসি অদোম্না উবা ফংলবা ওইগনি। 2030গী কম্মনৱেল্থ গেম্সসু ভারত্তা পাংথোক্কদৌরি অমসুং লৈবাক অসিনা 2036কী ওলিম্পিক্স পাংথোক্নবা মপুং ফানা শেম-শাদুনা লৈরি। মসিগী পুম্নমক্কী মখাদা লৈরিবা হোৎনরিবশিং অসি শান্নরোই কয়া অমা শান্নবগী খুদোংচাবা কয়া অমা ফংহন্নবা হোৎনবনি।
মরুপশিং,
ঐখোয়না স্কুলগী থাক্কী শান্নরোইশিংদা ওলিম্পিক স্পোর্তশিং খঙহন্নবা হোৎনরি। খেলো ইন্দিয়া ইনিসিয়েতিবকী মতেংনা নহা কয়া অমা নেস্নেল স্তেজতা পুখৎলকপগী খুদোংচাবা ফংলে। নুমিৎ খরনিগী মমাংদা, সন্সদ খেল মহোৎসব লোইশিনখি। মসিদা নহা করোর অমা মশাগী হৈশিংবা উৎখি। কাশীদগী পার্লিয়ামেন্তকী মেম্বর অমা ওইনা, ঐহাক্না চাউথোকচবা ফাওই মদুদি মহোৎসব অসিগী মনুংদা, ঐহাক্কী কাশীদগী নহা লাখ 3 রোম্না মখোয়গী শক্তি অমসুং হৈশিংবশিং লমদম অসিদা উৎখি।
মরুপশিং,
স্পোর্তস ইনফ্রাস্ত্রকচরদা অহোংবা পুরকপা অসিনা কাশীদসু কান্নবা ফংহল্লে। মফম অসিদা মোদর্ন স্পোর্তস ফেসিলিতীশিং শেমগৎলি, তোঙান তোঙানবা স্পোর্তশিংগী স্তেদিয়মশিং শেমগৎলি, অমসুং অনৌবা স্পোর্তস কমপ্লেক্সশিংনা মনাক নকপদা লৈবা জিলাশিংগী শান্নরোইশিংদা ত্রেনিংগী খুদোংচাবা পীরি। ঙসি নখোয়না লেপ্লিবা সিগ্রা স্তেদিয়ম অসি হৌজিক অনৌবা ফেসিলিতী কয়াগা লোয়ননা খুদোংচাবা ফংহল্লে।
মরুপশিং,
কাশীনা মরুওইবা থৌরমশিং পাংথোক্নবা শেম-শারিবা অসিদা ঐহাক নুংঙাইবা ফাওই। নেস্নেল ভোলীবোল চেম্পিয়নশিপকী খুত্থাংদা ভারতকী স্পোর্তস মেপতা মফম অমা ফংলকপা অসি কাশীগীদমক্তা য়াম্না মরু ওই। মসিগী মমাংদসু, মফম অসিদা থৌরম কয়া অমা পাংথোকখ্রে, মসিনা মফম অদুগী মীয়াম অমসুং মফম অদুগী ইকোনোমীদা থবক তৌবগী অচৌবা খুদোংচাবা পীরি। খুদম ওইনা, বনারসতা G-20গী মরু ওইবা মীফমশিং, কাশী তামিল সঙ্গমম অমসুং কাশী তেলুগু সঙ্গমমগুম্বা কলচরেল ফেস্তিবেলশিং, ইন্দিয়ন দাইস্পোরাগী কনফরেন্সশিং পাংথোকখি। কাশী অসি সাংহাই কোওপরেসন ওর্গনাইজেসনগী কলচরেল কেপিতেল ওইনাসু শকখঙখি। ঙসিদি, চেম্পিয়নশিপ অসিনা মসিগী এচিবমেন্তশিংদা অতোপ্পা মনী অমা ওইনা হাপচিল্লে। অসিগুম্বা থৌরম পুম্নমক্কী খুত্থাংদা কাশী অসি অসিগুম্বা অচৌবা প্লেৎফোর্মশিংগী মরুওইবা মফম অমা ওইরক্লি।
মরুপশিং,
বনারসতা হৌজিক নুংঙাইবা মতম অমা লাক্লে। অমসুং মাগী সিজন অসিদা, নহাক্না খ্বাইদগী হাওবা চিঞ্জাক খরা ফংলগনি। করিগুম্বা মতমনা য়াহল্লবদি, মালাইয়ো চাবীয়ু। বাবা বিশ্বনাথকী য়াইফ-মঙ্গোল লৌবীয়ু, গঙ্গাদা হী তোংবীয়ু, মসিগী এক্সপরিয়েন্সশিং অসি পুদুনা চৎপিখো। অমসুং পুম্নমক্কী মথক্তা, তোর্নামেন্ত অসিদা অদোমগী খ্বাইদগী ফবা শান্নরোই ওইবীয়ু। কাশীগী লৈহাওদগী, স্পাইক খুদিংমক, ব্লোক খুদিংমক, অমসুং পোইন্ত খুদিংমক্না ভারতকী শান্ন-খোৎনবগী অপাম্বশিংবু হেন্না ৱাংখৎহনবিয়ু। অসিগুম্লবা আশা অসিগা লোয়ননা, ঐহাক্না অমুক্কা হন্না ময়াম পুম্নমক্তা য়াইফ-পাউজেল পীজরি।
থাগৎচরি! ভন্দে মাতরম!
