“জি.-২০ লোগোদা মালেম পুম্বা নুংশি চান্নবগী ৱাখল্লোনগী মমি তারি”
“জি.২০ লোগোদা য়াওরিবা থম্বালনা হৌজিক্কী অরুবা মতমসিদা থাজবা অমা লৈরি হায়বা তাক্লি”“জি.২০ প্রসিদেন্সী অসি ভারতকী ওইনদি শুপ্নগী মীফম অমা নত্তে, মসিদি মালেম্না ভারত্তা থম্লিবা থাজবা অমসুং ভারতকী অনৌবা থৌদাংগী মমিনি”“ঐখোয়না ইশাগী চাউখৎনবা হোৎনবদা মালেমগী চাউখৎপা পুরকপসু মনুং চল্লি”“ঐখোয়গী ইফমদা ইনভাইরনমেন্ত অসিনা মালেমগী পুক্নিং চঙফম ওইবতা নত্তনা ইশাগী থৌদাং অমসু ওইরি”“ফর্স্ত নত্ত্রগা থর্দ ৱর্ল্দ হায়বা অমত্তা লৈতে, শুপ্নগী ৱর্ল্দ হায়বখক লৈগদবনি হায়বসিগীদমক্তা ঐখোয়না হোৎনরি”“ঐখোয়গী জি.২০গী মন্ত্রদি – পৃথিবী অমা, ইমুং অমা, তুংগী মতম অমা হায়বসিনি”“জি.২০না দিল্লী নত্ত্রগা মফম খরখক্তদা অকক্নদুনা লৈরোই। মীয়াম, রাজ্য সরকার অমসুং রাজনিতী দল খুদিংমক্না মসিগী শরুক ওইগদবনি”খুরুমজরি,
ঐহাক্কী নুংশিরবা ইরৈবাকচাশিং অমসুং মালেমগী ফুরুপকী ইমুং মনুংগী মীওইশিং, নুমিৎ খরনিগী মতুংদা দিসেম্বর ১দগী ভারতনা জি-২০গী প্রসিদেন্সীগী থৌদাং পুবা হৌরগনি। মসি ভারতকী ইতিহাসিক ওইবা থৌরম অমনি। ঙসি থৌরম অসিদা সম্মিৎ অসিগী ৱেবসাইৎ, থিম অমসুং লোগো লোঞ্চ তৌখ্রে। ঐহাক্না থৌরম অসিদা ইরৈবাকচা পুম্নমকপু থাগৎচরি।
মরুপশিং,
জি-২০ অসি মালেমগী জি.দি.পি.গী চাদা ৮৫ শরুক তম্বগী ইকনোমিক পোতেন্সিএল লৈবা লৈবাকশিংগী কাংলুপ অমনি। জি-২০ অসি মালেমগী ললোন-ইতিক্কী চাদা ৭৫ শরুক তম্লিবা লৈবাক কুনগী কাংলুপনি। জি-২০ অসি মালেমগী মীশিংগী শরুক অহুম থোকপগী অনি ওইরিবা লৈবাক ২০গী কাংলুপ অমনি। অমসুং ভারতনা হৌজিক জি-২০গী কাংলুপ অসিবু লুচিংদুনা মসিগী প্রসিদেন্সীগী থৌদাং লৌগনি।
আজাদী কা অমৃত কালগী মনুংদা লৈবাক্কী মমাংদা কয়াদা চাউরবা খুদোংচাবা অমা লৈবগে অদোম্না খন্থদুনা লৈবীয়ু। মসি ভারত মচা খুদিংমক্কী চাউথোকচনবগী মীকুপ অমনি, মসি চাউথোকচবা হেনগৎহন্নবগী ৱাফমনি। অমসুং ভারত্তা পাঙথোক্কদৌরিবা জি-২০ সম্মিৎকী, থৌরমশিংগী মরমদা খঙনীংবা অমসুং থৱায় য়াওবা লেপ্পা লৈতনা হেনগৎলক্লিবা অসিদা ঐহাক্না নুংঙাইবা পোকই। ইরৈবাকচাশোংনা ঙসি লোঞ্চ তৌখিবা লোগো অসি শেম্বদা অচৌবা থৌদাং অমা লৌখি। ঐখোয়না ইরৈবাকশিংদা লোগো অসিগীদমক মখোয়গী মমল য়াম্লবা সজেসনশিং লৌখি। অমসুং মীওই লিশিং কয়ানা মখোয়গী ক্রিএতিব আইদিয়াশিং সরকারদা থারকখি খংবদা ঐহাক্না য়াম্না হরাওবা পোকখি। আইদিয়াশিং অদু, সজেসনশিং অদু ঙসিদি অচৌবা মালেমগী থৌরম অমগী শক্তম ওইরক্লি। খোঙথাং অসিগীদমক ঐহাক্না মীপুম খুদিংমক্তা থাগৎপা ফোঙদোকচরি।
মরুপশিং,
জি-২০গী লোগো অসি শুপ্নগী লোগো অমা খক্তা নত্তে। মসি পাউজেল অমনি। মসি ঐখোয়গী ঈদা চেল্লিবা ইহুল অদুনি। মসি ঐখোয়গী ৱাখলদা য়াওদুনা লৈরিবা ফিরেপ অমনি। ‘বসুধৈব কুতুম্বকম’গী মন্ত্রগী খুত্থাংদা য়ুনিভর্সেল ব্রদরহুদকী ৱাখল্লোন অসিদা ঐখোয়না হিংলি, আইদিয়া অসি লোগো অমসুং থিমদা মমি তাই। লোগো অসিদা থম্বালনা ভারতকী অরিবা হৈরিতেজ, ঐখোয়গী লাইনীং অমসুং ঐখোয়গী ৱাখল্লোন অদু তাক্লি।
অদ্বৈতাগী ৱাখল্লোন অসিনা মীওইবা জাতিগী অমত্তা ওইবগী ৱাখল্লোন অদু তাক্লি। মসিগী ফিলোসোফী অসিনা লোগো অমসুং থিম অসিগী খুত্থাংদা ঙসিগী মালেমগী শীংনবা অমসুং অৱাবশিং অসি কোকহন্নবগী পাম্বৈ অমা ওইরিনা ঐখোয়না পাউজেল পীখি। বুদ্ধগী লানদগী নীংতম্বা ফংনবগী পাউজেক, মহাত্মা গান্ধীগী হিংসা তৌদনবা সোল্যুসন, ভারতনা জি-২০গী খুত্থাংদা গ্লোবেল রিপ্যুতেসনদা অনৌবা শক্তি পীরি।
মরুপশিং,
ভারতকী জি-২০ প্রসিদেন্সী অসি মালেমদা খুদোংথিবা অমসুং চরাংনবা থোকপা মতমদা তারি। চহি চাম্মদা অমুক্তা থোকপা লাইচৎ অমা, চরাংনবা অমসুং শেন্মীৎলোনগী তংদু লৈতাদবা ফিভম কয়া মালেম্না মাইয়োক্নরি। মসিগুম্বা অৱাবা মতমসিদা থম্বালগী খুদম অসিনা মীয়ামদা থাজবা অমা পীরি। মালেম্না অরুবা খুদোংচাদবা কয়া থেংনজরবসু, ঐখোয়না মসিবু হেন্না ফবা মফম অমা ওইহন্নবা থবক পাঙথোকপা য়ারি।
ভারতকী চৎনবীদা লৌশিং অমসুং নুংঙাই য়াইফবগী লাইরেম্বীনা থম্বাল মথক্তা ফম্মি। মসি ঙসি মালেম্না খ্বাইদগী মথৌ তারিবা অদুনি; ঐখোয়গী অৱাবশিং মায়োক্নবদা মতেং পাংলিবা অপুনবগী লৌশিং অমসুং অপুনবগী নুংঙাই য়াইফবনা ঐখোয়দা লাস্ত মাইল য়ৌহনবা ঙমহল্লি।
মরম অসিনা জি-২০গী লোগোদা থম্বাল অসি পৃথিবীগী মথক্তা থম্মি। লোগোদা য়াওরিবা থম্বালগী মনা ৭ অসিবু ৱাহন্থোক লৈ। মখোয়না মহাদেশ তরেৎকী শক্তম লৌরি। তরেৎ অসি ঈশৈগী য়ুনিভর্সেল লেংগ্বেজকী সুর তরেৎ অদুনি। ঈশৈদা সুর তরেৎ পুনশিনবা মতমদা মখোয়না ফজবা তান্থা অমা শেম্মি। অদুবু সুর অমমমগগী তোপ তোপ্পা মগুন লৈজৈ মতৌ অসুম্না জি.২০না মালেমগী তোঙানবা মতৌশিংবু ইকায় খুম্নবগা লোয়ননা মালেমদা নুংঙাই য়াইফবগী ফিভম অমা পুরক্নবা পান্দম থম্লি।
মরুপশিং,
মালেমদা জি-২০গুম্বা অচৌবা ফম্পাকশিংদা কনফরেন্স অমা পাঙথোকপা মতমদা মাগী মশাগী দিপ্লোমেতিক অমসুং জিও-পোলিতিকেলগী ৱাহন্থোকশিং লৈজৈ হায়বা অসি অচুম্বনি। মসি মহৌশানি। অদুবু ভারতকী ওইনদি সম্মিৎ অসি সুপ্নগী দিপ্লোমেতিক ওইবা মীফম অমা খক্তা নত্তে। ভারতনা মসি মশাগী অনৌবা থৌদাং ওইনা উই। ভারতনা মসিবু মালেমগী কনফিদেন্স ওইনা উই। ঙসি মালেমদা ভারতপু খঙনীংবগী অমুক্তা উখিদ্রিবা মওংদা খঙনীংবা পোক্নরি। ঙসি ভারত অসি অনৌবা মঙাল অমা ওইনা লৌনরি। ঐখোয়গী হৌজিক্কী মাইপাকপশিং অসি এসেস তৌরি। ঐখোয়গী তুংলমচৎকীদমক অমুক্তা থমখিদ্রিবা থাজবশিং থম্লি।
অসিগুম্বা ফীভম অসিদা থাজবশিং অমসুং আশাশিং অসিদগী হেন্না ফগৎনবা হোৎনবা অসি ইরৈবাকচা ঐখোয়গী থৌদাংনি। ভারতকী ৱাখল্লোনশিং অমসুং মতিক-ময়াইশিংগী মরমদা, ভারতকী কলচর অমসুং সোসিএল পাৱরগী মতাংদা মালেমদা খঙহনবা অসি ঐখোয়গী থৌদাংনি। মসিদা য়াওরিবা চহি লিশিং কয়া শুরবা কলচর অমসুং মোদর্নিতীগী লৌশিংগা লোয়ননা মালেমগী লৌশিং হেনগৎহনবা অসি ঐখোয়গী থৌদাংনি।
চহিচা কয়াদগী ‘জয়-জগত’কী ৱাখল্লোনগা লোয়ননা ঐখোয়না হিংলিবা অসিদা ঙসি ঐখোয়না মসিবু হিংগহন্দুনা অনৌবা মালেমদা খুদোল তম্বা তাই। ঐখোয়না মীপুম খুদিংমকপু শম্নহনবা তাই। মীপুম খুদিংমক্তা মালেমগী থৌদাংশিংগী মতাংদা খঙহনবা তাই। মখোয়বু মীকপ থোকহনবা তাই, মখোয়না মালেমগী তুংলমচৎতা শরুক য়ানবা ইথিল পীবা তাই।
মরুপশিং,
ঙসি ভারতনা জি-২০দা প্রিসাইদ তৌগদৌরিবা মতমদা থৌরম অসিনা ঐখোয়গী ভারত মচা করোর ১৩০গী শক্তি অমসুং মতিক-ময়াই অদু তাক্লি। ঙসি ভারতনা তানফম অদু য়ৌবা ঙম্লে। অদুবু মসিদা ঐখোয়গী চহি লিশিং কয়াগী খোঙচৎ য়াওরি, মসিগা লোয়ননা মশিং লাকঙমদ্রবা এক্সপরিয়েন্সশিং য়াওরি। ঐখোয়না মাইপাকপগী চহি লিশিং কয়া উবা ফংখ্রে। মালেমগী খ্বাইদগী অমম্বা মতম উবা ফংখ্রে। ঐখোয়না মীখা পোন্দুনা অমমমবা মরক্তা চহি লিশিং কয়া হিংলকখি। লোইলম শন্দোকপা অমসুং মীওৎ মীনৈ কয়া মায়োক্নদুনা ভারতনা ঙসি মফম অসি য়ৌবা ঙমখি।
ঙসিগী ভারতকী চাউখৎ খোঙচৎতা মসিগী এক্সপরিয়েন্সশিং অসিনা খ্বাইদগী চাউবা শক্তি ওইরি। নীংখা তম্বা ফংলবা মতুংদা ঐখোয়না জিরোদগী হৌদুনা মকোক য়ৌনবগী পান্দমগা লোয়ননা অচৌবা খোঙচৎ অমা হৌখি। মসিদা হৌখিবা চহি ৭৫দা সরকার পুম্নমক্না লৌখৎখিবা খোঙথাংশিং য়াওখি। সরকার অমসুং প্রজা পুম্নমক্না মখোয়গী ওইবা মশাগী মওংদা ভারতপু খুমাং চাউশিনহন্নবা হোৎনখি। ঐখোয়না ঙসি মসিগী ৱাখল্লোন অসিগা লোয়ননা মাংদা চংশিল্লি, মালেম পুম্বগা লোয়ননা অনৌবা শক্তিগা লোয়ননা চংশিল্লি।
মরুপশিং,
ভারতকী চহি লিশিং কয়া শুরবা নাৎ অসিনা ঐখোয়দা ৱাফম অমগা তাকপীখি। ঐখোয়গী খূমাং চাউশিন্নবা হোৎনবা মতমদা ঐখোয়না গ্লোবেল প্রোগ্রেস উবা ফংখি। ঙসি ভারত অসি মালেমগী অচৌবা অমসুং হিংদুনা লৈরিবা দেমোক্রেসী অমনি। ঐখোয়দা দেমোক্রেসীগী থৌওংশিং ঙাক্না চৎলি অমসুং মোদর ওফ দেমোক্রেসী ওইনা অরিবা চৎনবী লৈজৈ। ভারত্তা মাগী দাইভর্সিতীগী তোপ-তোপ্পা মগুন য়াওজৈ। মসিগী দেমোক্রেসী, দাইভর্সিতী, ইন্দিজিনস এপ্রোচ, ইনক্লুসিব থিঙ্কিং, লোকেল লাইফস্তাইল, গ্লোবেল থোৎশিং অসিদা ঙসি মালেমনা শীংনবশিংগী সোল্যুসন ওইনা উরি।
অমসুং জি-২০ অসিনা মসিগী অচৌবা খুদোংচাবা অমা ওইনা উবা য়াই। ঐখোয়না মালেমদা দেমোক্রেসীনা সিস্তেমগা লোয়ননা থৌদাং অমসুং নাৎ ওইরকপা মতমদা কনফ্লিক্তশিংগী স্কোপ অসি লোইরকপগে উৎবা য়াগনি।
মালেমদা লৈরিবা মীওইবা খুদিংমক্তা ঐখোয়না থাজবা পীবা ঙমগনি মদুদি চাউখৎপা অমসুং মহৌশা অনিমক্কা লোয়ননা ঐখোয়না পুন্না চৎপা য়াগনি। ঐখোয়না সরকারশিংগী সিস্তেমশিংগী মহুৎ ইন্দিভিজুএল লাইফকী সস্তেনেবল দিবেলপমেন্তগী শরুক অমা ওইহন্দুনা পাকথোক চাউথোকহনবসু য়াগনি। এনভাইর্নমেন্ত হায়বা অসি গ্লোবেল কোজ অমা ওইহনবগা লোয়ননা ঐখোয়গী লনাইগী থৌদাং ওইগদবনি।
মরুপশিং,
ঙসি মালেমনা লায়েংগী মহুৎ হকশেলদা মীৎয়েং চংনরক্লি। ঐখোয়গী আয়ুর্বেদ, ঐখোয়গী য়োগ, মসিদা মালেমনা অনৌবা থাজবা অমা থম্লি, ঐখোয়না মসি পাকথোক চাউথোক্নবা গ্লোবেল সিস্তেম অমা শেমগৎপা য়াগনি। মথং চহিদা মালেমনা ইন্তর্নেস্নেল ইয়র ওফ মিল্লেৎ পাঙথোক্কনি অদুবু চহিচা কয়া ঐখোয়গী য়ুমদা লৈরিবা চাকশঙদা ঐখোয়না কোর্স গ্রেনশিংগী মফম কয়া পীখি।
মরুপশিং,
ভারতনা অসিগুম্বা লম কয়াদা মাইপাকপশিং পুরকপা ঙমখ্রে, মসিনা মালেমগী অতোপ্পা লৈবাকশিংদা কান্নবা ফংহনখি। খুদম ওইনা ভারতনা চাউখৎ-থৌরাংগীদমক, ইনক্লুজনগীদমক, শেঞ্জা-থুমজা মুত্থৎনবগীদমক, ইজ ওফ দুইং বিজিনেসকীদমক অমসুং ইজ ওফ লিবিংগীদক দিজিতেল তেক্নোলোজী শীজিন্নবগী মওং অসনি। মোদেলশিং লৈ, তেম্প্লেৎশিং লৈ।
মতৌ অসুম্না ঙসি ভারতনা নুপীদা শক্তি পীবদা খুমাং চাউশিল্লি, নুপীনা লমজিংবা চাউখৎ থৌরাং হেনগৎলক্লি। ঐখোয়গী জন ধন একাউন্তশিং অমসুধং মুদ্রাগুম্বা স্কিমশিংনা নুপীশংগী ফাইনান্সিএল ইনক্লুজন ফংহনখি। অসিগুম্বা তোঙান-তোঙানবা লমশিংদগী ফংখিবা ঐখোয়গী এক্সপরিয়েন্সশিংনা মালেমদা চাউনা মতেং পাংলি। অমসুং জি-২০গী ভারতকী প্রসিদেন্সী অসিনা মালেমদা মাইপাক্লবা কেম্পনশিং অসি য়ৌহন্নবগী মরু ওইবা পাম্বৈ অমা ওইরি।
মরুপশিং,
ঙসি মালেমনা অপুনবা লীদরশিপতা চাউনা থাজবা থম্লি। জি-৭, জি-৭৭ নত্ত্রগা য়ু.এন.জি.এ. ওইরবসু এনভাইর্নমেন্ত অসিদা ভারতনা জি-২০গী প্রসিদেন্ত ওইনা য়াম্না মরু ওইবা থৌদাং লৌরি। ভারতনা চাউখৎলবা লৈবাকশিংগা লোয়ননা অচেৎপা মরী অমা লৈনরি নাকল অমদা চাউখৎলক্লিবা লৈবাকশিংগী ৱাখল্লোনশিংসু খঙই। মসিগী মখা পোন্না ঐখোয়না পুন্না জি-২০ প্রসিদেন্সী শেমগৎকনি লোয়ননা দিকেদ কয়া অসিদা চাউখৎ খোঙচৎতা ভারতকী কো-ত্রেবর ওইনা ‘গ্লোবেল সাউথ’না মরু ওইদুনা লাককি।
মালেমদা ফর্স্ত ৱর্ল্দ নত্ত্রগা থর্দ ৱর্ল্দ হায়বা অমা লৈতনা ৱর্ল্দ হায়বা অসি খক্তা লৈহন্নবা ঐখোয়না হোৎনগদবনি। ভারতনা অপুনবা পান্দম অমগীদমক, অফবা তুংলমচৎ অমগীদমক মালেম পুম্ববু অমত্তা ওইনা পুনশিন্নবগী পান্দমদা থবক তৌরি। ভারতনা ৱন সন, ৱন ৱর্ল্দ, ৱন গ্রীদকী মন্ত্রগা লোয়ননা মালেমদা রিন্যুএবল ইনর্জী রিভোল্যুসন পুরক্নবা থবক পাইখৎখি। ভারতনা ৱন আর্থ, ৱন হেল্থ হায়বা মন্ত্রগা লোয়ননা গ্লোবেল হেল্থ মপাঙ্গল কনখৎহন্নবগী কেম্পেন অমসু হৌখি। হৌজিক জি-২০দা – ৱন আর্থ, ৱন ফেমিলী, ৱন ফ্যুচর হায়বা মন্ত্র অসি শীজিন্নরি। ভারতকী ৱাখল্লোনশিং, মমল য়াম্লবা লৌশিং অসিনা মালেমগী য়াইফনবগী লম্বী য়াৎলি।
মরুপশিং,
ঙসি ঐহাক্না লৈবাক্কী রাজ্য সরকারশিং, রাজনিতী দল পুম্নমক্তা ৱাফম অমা থমজগে। থৌরম অসি কেন্দ্র সরকার খক্তগী নত্তে। থৌরম অসি ভারতমচানা শিনবনি। জি-২০ অসি ঐখোয়গী ‘অতিথি দেবো ভব’কী চৎনবী অদু উৎনবগী খুদোংচাবা অমসুনি। জি-২০গা মরী লৈনবা থৌরমশিং দিল্লী খক্তা নত্তনা অতোপ্পা মফমশিংদসু পাঙথোক্কনি। মসিগী মখাদা লৈবাক শিনবা থুংবদা প্রোগ্রামশিং পাঙথোক্কনি। ঐখোয়গী রাজ্য অমমগী মশাগী মওং-মতৌ, মশাগী হেরিতেজ লৈজৈ। রাজ্য খুদিংমক্কী মশাগী নাৎ, মশাগী ফজবা, মশাগী মতিক-মগুন, মশাগী হোস্পিতেলিতী লৈজৈ।
রাজস্থানগী হোস্পিতালিতী অসি চেবাও অমনি – পধারো মহারে দেশ! গুজরাতকী নুংশিবনা থল্লবা থৌগল্লোন – তমারু স্বাগত ছে! চপ মান্নবা মীনুংশি অসি কেরালাগী মলয়ালমদাসু উবা ফংই – এল্লাবর্ক্কুম স্বাগতম! ‘হর্ত ওফ ইনক্রেদিবল ইন্দিয়া’ মধ্য প্রদেশনা হায় – আপকা স্বাগত হৈ! নোংচুপ বেঙ্গোলগী খোইথুম্নরবা বাঙ্গলাদা তরাম্না ওকপদা হায় - অপনা কে স্বাগত জানাই! তমিলনাদু, কদইগল মুদি-বদিলয়েনা হায় – থঙ্গল বরব নল-বর বাহুহা! য়ু.পি.না হায় – য়ুপী উদ্রবদি ভারত উদ্রবনি। হিমাচল প্রদেশন, এ দেস্তিনেসন ফোর ওল সিজন্স এন্দ ওল রিজন্স হায়বদি ‘পন্থ খুদিংমক, মরম খুদিংমক্কীদমক’ ঐখোয়বু কৌরি। উত্তরাখন্দ অসি ‘সিম্প্লী হেবন’নি। মসিগী হোস্পিতেলিতী, দাইভর্সিতী অসিনা মালেমদা অঙকপা পোকহল্লি। জি-২০গী খুত্থাংদা ঐখোয়না মসিগী ঐখোয়গী নুংশিবা অসি মালেমদা য়োহনগনি।
মরুপশিং,
মথংগী চয়োলদা ঐহাক ইন্দোনেসিয়াদা চৎকনি। জি-২০গী প্রসিদেন্সী ভারতনা ওইরগনি হায়না লাউথোক্কনি। ঐহাক্না লৈবাক অসিগী রাজ্য পুম্নমক্তা, রাজ্য সরকারশিংদা মখোয়গী রাজ্যশিংগী থৌদাং অদু য়ারিবা মখৈ হেনগৎহন্নবা হায়জরি। নখোয়গী রাজ্যগীদমক খুদোংচাবা অসি লৌবীহৌ। লৈবাক অসিগী প্রজা পুম্নমক, ইন্তেলেকচুএলশিংনা থৌরম অসিদা শরুক য়াবীয়ু। হৌজিক্তা লোঞ্চ তৌখিবা ৱেবসাইৎ অদুদা নখোয়গী সজেসনশিং থাবীরকপা য়াগনি, নখোয়গী ৱাখল্লোনশিং ফোঙদোকপীরকপা য়াগনি।
মাইকৈ অসিদা পীরকপা নখোয়গী সজেসনশিং অমসুং পার্তিসিপেসন অদুনা ভারতনা মালেমগী য়াইফনবা লৌবা থৌদাং হেনগৎহনবা ঙমগনি। জি-২০গুম্বা থৌরম মাইপাকহন্দুনা অনৌবা পনখৈ তম্না পুগনি। ঐহাক্না থাজৈ মদুদি থৌরম অসি ভারতকী ওইনা নীংশিংদুনা লৈহৌরগদবা অমা ওইবতা নত্তনা তুংলমচৎতা মসিনা মালেমগী পুৱারীদা অচৌবা থৌরম অমা ওইনা লৌনরগনি।
থাজবা অসিগা লোয়ননা ময়াম পুম্নমকপু অমুক্কা হন্না থাগৎচরি!
হন্না-হন্না থাগৎচরি!
