ওরিশানা ভারতকী সব্যাতা, ঐখোয়গী নাৎপু চহি চা কয়াদগী মপাঙ্গল কনখৎহন্দুনা লাকখি: পি.এম.
ঙসি চাউখৎ থৌরাং অমসুং হেরিতেজকী মন্ত্রনা ভারতকী চাউখৎ খোঙচৎকী য়ুম্ফম ওইরকপা মতম অসিদা ওরিশাগী থৌদাং অসি হেন্না মরু ওইরক্লি: পি.এম.
হৌখিবা চহিশিংদা ঐখোয়না ত্রাইবেল খুন্নাইবা হিংসাদগী লৌথোক্নবা অমসুং চাউখৎপগী অনৌবা লম্বীদা পুরক্নবা থবক পায়খৎখি: পি.এম.
21শুবা চহিচাগী ভারতকী চাউখৎ থৌরাংনা নোংপোক থংবা ভারত্তগী শাহৌ ফংলগনি: পি.এম.
জয় জগনাথ!
জয় জগনাথ!
জয় বাবা লিঙ্গরাজ!
ঐগী নুংশিরবা ওরিসাগী মীয়াম খুরুমজরি!
ওরিসাগী রাজ্যপাল হরি বাবু জি, ওরিসাগী চীফ মিনিস্তর মোহন চরন মাঝি জি, কেন্দ্রগী মন্ত্রীমন্দলগী ঐগী মরুপশিং, জুৱাল ওরাম জি, ধর্মেন্দ্র প্রধান জি, অশ্বিনি বৈষ্ণব জি, ওরিসাগী দিপুতি চীফ মিনিস্তর কনাক বর্ভন সিংহ দিও জি, প্রভাতি পরিদা জি, রাজ্য সরকারগী অতোপ্পা মিনিস্তরশিং, এম.পিশিং অমসুং এম.এল.এশিং অমসুং ওরিসাগী ঐগী ইনাওশিং অমসুং ইচলশিং!
ঙসি, জুন ২০ অসি অখন্নবা নুমিৎ অমনি। ঙসি, ওরিসাগী অহানবা বি.জে.পি সরকার মাইপাক্না চহি অমা মপুংফারে। চহি অমা মপুংফারকপা অসি শুপ্নগী সরকার খক নত্তে, মসি অফবা লৈঙাক অমা লৈরকপা চহি অমা মপুংফারকপনি। অহানবা চহি অসি মীয়ামগী থবক অমসুং মীয়ামগী থাজবদা কৎথোক্লে। মসি ওরিসাগী ভোত্তর করোর কয়াগী থাজবা লৈহন্নবা পুকচেল শেংনা থবকশিং পাংথোকপা অচৌবা চহি অমনি। ঐনা থম্মোয় শেংনা উরিসাগী মীয়াম থাগৎপা ফোঙদোকচরি। ঐনা চীফ মিনিস্তর মোহন মাঝি জি অমসুং মহাক্কী কাংবুশু থাগৎচরি। শিংথানিংঙাই ওইবা থবক পাংথোক্তুনা উরিসা চাউখৎনবা অদোম ময়াম্না অনৌবা ইথিল অমা পীরে।
মরুপশিং,
ওরিসা রাজ্য অমা খক নত্তে, ওরিসা অসি ভারতকী নাৎকী থৱান্মিচাক অমনি। চহি চা কয়া ওরিসানা ভারতকী সভেত্য অমসুং ঐখোয়গী নাৎ য়োকখৎতুনা লাক্লি। মরম অদুনা, ঙসিদি চাউখৎপা অমসুং নাৎকী লাইৱানা ভারতকী চাউখৎপগী য়ুম্ফম ওইরকপা মতমদা, ওরিসাগী থৌদাং অমুক্কা হেন্না চাউরে। হৌখিবা চহিদা, ওরিসানা চাউখৎপা অমসুং নাৎকী লাইৱা শীজিন্নবা উবা ফংখ্রে অমসুং লাইৱা অসি য়াংনা মাঙলোমদা পুখৎলে।
মরুপশিং,
ওরিসাগী বি.জে.পি সরকার চহি অমা মপুংফারকপগা লোয়ননা, মীয়াম্না ভগবান জগনাথ জিগী রথ যাত্রগী শেম-শাবগী থবক চিনবা অসিগা মপা চানবা অসি হরাওবা অমনি। মহাপ্রভু অসি ঐখোয়গী ফিদম্নি অমসুং ঐখোয়গী ইথিলনি। মহাপ্রভুগী থৌজলদগী, শ্রীমন্দিরগা মরী লৈনবা ৱাফমশিং য়ানবা পুরক্লে। ভক্ত করোর কয়াগী হায়জবা ইকায়খুম্নবা উৎপগীদমক ঐনা মোহন জি অমসুং মহাক্কী সরকার থাগৎপা ফোঙদোকচরি। রাজ্য অসিদা সরকার হেক শেম্বগা, শ্রীমন্দিরগী থোং মরি মক হাংদোক্লে, শ্রীমন্দিরগী রত্ন ভান্দারশু হাংদোক্লে। মসি রাজনিতিগী মাইপাকপা নত্ত্রগা মাইথিবগী ৱাফম অমা নত্তে। মসি ভক্ত করোর কয়াগী থাজবা ইকায়খুম্নবগী থবক অমনি।
মরুপশিং,
জি-৭ মীফমগীদমক নুমিৎ ২ গী মমাঙদা ঐ কনাদাদা লৈখি অমসুং য়ু.এসগী রাষ্ট্রপতি দোনাল্ড ত্রম্পনা ঐ কৌরকখি। মহাক্না হায়খি মদুদি অদোম কনাদাদা লৈরিঙৈদা, অদোম ৱাশিংতন ফাওরগা চৎপীখো, ঐখোয়না অদোমগা লোয়ননা চাক্লেন অমা চামিন্নসি অমসুং ৱারি শানখিসি। মহাক্না ঐঙোন্দা য়াম্না কন্না হায়রকখি। ঐনা য়ু.এসকী রাষ্ট্রপতিদা হায়খি মদুদি অদোমগী চেবাউ অমগীদমক থাগৎচরি। ভগবান লমদম অসিদা চৎপা অসি ঐগীদমক য়াম্না মরুওইবনি। মরম অদুনা ঐনা মহাক্না চেবাউ অদু য়াখিদে। ভগবান্দা লৈরিবা অদোমগী নুংশিবা অমসুং কৎথোকপা অদুনা মরম ওইদুনা লমদম অসিদা ঐ পুরকখিবনি।
মরুপশিং,
নিংতম্লবা চহি কয়াগী মতুংদা, মীয়াম্না কংগ্রেস মোদেল উরে। কংগ্রেস মোদেলদা, অফবা লৈঙাক নত্ত্রগা মীয়ামগী পুন্সি লাইনা হিংবা উদে। চপ লেপ্পা, য়ান্দুনা লৈবা অমসুং প্রোজেকশিং থেংবা, শেঞ্জা-থুমজা অসি চাউখৎপগী কংগেস মোদেলনি। হৌখিবা চহি খর অসিদা, লৈবাক শীনবা থুংনা চাউখৎপগী বি.জে.পি মোদেল উরে। হৌখিবা চহি ১০ অসিদা, লৈবাক অসিগী রাজ্য কয়াদা অহানবা ওইনা বি.জে.পি সরকারশিং শেম্লে। হায়রিবা রাজ্যশিং অসিদা সরকারশিং অহোংবা লাকপা খক নত্তনা, খুন্নাই অমসুং শেন-থুমগী অহোংবগী অনৌবা যুগ অমা হৌরে। নোংপোক ভারতকী খুদমশিং পীদুনা ঐনা অদোমদা শন্দোক্না তাক্কে। ঐনা অদোমদা অসামগী খুদম অমা পীগনি, চহি ১০ গী মমাঙদা অসামগী ফিবম য়াম্না ফৎলমদে। অসামদা তংদু-লৈতাদবা, তোখাই তাবা অমসুং হিংশা উবা ফংখি। ঙসিদি অসাম চাউখৎপগী অনৌবা লম্বী অমদা চৎলি। চহি কয়া চৎথরম্বা কা হেনবা থবকশিং লেপখ্রে। ঙসিদি হিরম কয়াদা অসাম্না লৈবাক অসিগী অতোপ্পা রাজ্যশিংগী মকোক্ত লৈরে। ঐনা অতোপ্পা রাজ্য ত্রিপুরাগী মরমদা পনগনি। ত্রিপুরাদা চহি কয়া লেপ্না লৈবাক ঙাক্লবা মতুংদা, অহানবা ওইনা মীয়াম্না বি.জে.পিদা খুদোংচাবা অমা পীখি। ত্রিপুরাশু চাউখৎপগী লমদা মনিংদা লৈখি। ইনফ্রাস্ত্রকচরগী ফিবম য়াম্না ফৎখিদে। মীওই খুদিংমক হিংশা অমসুং শেঞ্জা-থুমগী অৱাবা মায়োক্নখি। মীয়ামগী থবক তৌনবা বি.জে.পিনা খুদোংচাবা ফংবদগী, ঙসিদি ত্রিপুরা শান্তি অমসুং চাউখৎপগী খুদম অমা ওইরক্লে।
মরুপশিং,
ঐখোয়গী ওরিসাশু চহি কয়া খুদোংচাদবা কয়া মায়োক্নখি। লায়রবা অমসুং লৌমীশিং মখোয়গী হকশিং মপুংফানা ফংখিদে। শেঞ্জা-থুমজা অমসুং ৱাচৎ-ৱানোম্না পীক থনখি। ওরিসাগী ইনফ্রাস্ত্রকচরগী ফিবম য়াম্না ফৎখিদে। ওরিসাগী হিরম কয়া চাউখৎপগী মনিংদা লৈখি। অসিগুম্বা খুদোংচাদবশিং অসি ওরিসাগী লাইবক থিবা অমা ওইখি। হৌখিবা চহিদা, হায়রিবা খুদোংচাদবশিং অসি কোকহন্নবা বি.জে.পি সরকারনা মপুংফানা থবক পায়খৎলে।
মরুপশিং,
চাউখৎপগী দবল ইঞ্জিন মফম অসিদা চেল্লে, মসিগী কান্নবশিং উবা ফংলে। ঙসি, লুপা করোর কয়াগী প্রোজেকশিং উরেপ-উয়ুং তম্লিবা অমসুং শঙ্গারিবা অসিদা দবল ইঞ্জিন য়াওরে। ওরিসাদা, দবল ইঞ্জিন্না মীয়ামদা কান্নবা দবল ফংহল্লে। ঐনা খুদম অমা পীগে। ওরিসাগী লায়রবা ইমুং লাখ কয়া চহি কয়া অয়ুস্মান য়োজনা শরুক য়াবা ফংখিদে। ঙসিদি, অয়ুস্মান ভারত জন অরোগ্যা য়োজনা অমসুং গোপবন্ধু জন অরোগ্যা য়োজনা অনিমক রাজ্য অসিদা পায়খৎলে। মসিনা ওরিসাগী মীওই করোর লেম্না লায়েংবগী খুদোংচাবা ফংলগনি। ওরিসাগী হোস্পিতালশিং খক্ত নত্তনা, রাজ্য অসিগী মীওই অমা লৈবাক অসিগী অতোপ্পা রাজ্যশিংদা চৎপা মতমদা, মফম অদুদা মহাক দরকারগী মতুংইন্না লেম্না লায়েংবগী খুদোংচাবা ফংলগনি। ঐ গুজরাত্ত পোকপনি অমসুং সুরত্ত, ঐনা খোঙকাপ অনি থাংদোকপা মতমদা, ওরিসাগী মীওই খর থেংনগনি, সুরত্ত ওরিসাগী মীওই কয়া লৈরি। হৌজিক সুরত্ত লৈরিবা ওরিসাগী ঐগী ইনাওশিং অমসুং ইচলশিংনা স্কিম অসিগী কান্নবা ফংলগনি। হৌজিক ফাওবদা, ওরিসাগী মীওই লাখ ২ স্কিম অসিগী মখাদা লায়য়েংলে অমসুং লৈবাক অসিগী রাজ্য ১২ হেন্না মীয়াম্না লেম্না লায়য়েংবগী খুদোংচাবা ফংলে। চহি অমা ফাওবগী মমাঙদা, অসিগুম্বা লেম্না লায়য়েংবগী খুদোংচাবা অসি মীয়াম্না ফংলমদে। দবল ইঞ্জিন সরকার অসি লাকপদগী, মসি কান্নবা হেন্না ফংলে।
ওরিসাদা চহি ৭০ গী মথক্ত লৈবা অহল লাখ ২৩ হেন্না লৈরি। মখোয় প্রধান মন্ত্রী বায়া বন্দন য়োজনাগী মখাদা লুপা লাখ ৫ ফাওবগী লেম্না লায়য়েংবগী খুদোংচাবা ফংলগনি। লায়রবা ইমুংশিংগী অৱাবা কোকহন্নবা ঐখোয়গী সরকারনা থবক পায়খৎলে। মমাঙদা, ওরিসাগী লৌমীশিং কিষান সম্মান নিধিগী কান্নবা মপুংফানা ফংবা ঙমখিদে। হৌজিক ওরিসাগী লৌমীশিং কেন্দ্র অমসুং রাজ্যগী স্কিমশিং অনিমক্কী কান্নবা শরুক অনি ফংলে। লৌমীশিংদা ফৌগী মমল ৱাংনা ফংহনবা অসিনা ফৌ থাবা লৌমী লাখ কয়া কান্নবা ফংলে।
মরুপশিং,
মমাংদা ওরিসাদা কান্নবশিং মপুংফানা ফংদবা কেন্দ্রগী স্কিম কয়া লৈরি। ঙসিদি কেন্দ্র অমসুং রাজ্য সরকারগী স্কিমশিংগী কান্নবশিং মীয়াম্না ফংলে। মসি খক নত্তনা, মীখল মনুংদা ঐখোয়না ইমাশিং, ইচলশিং, লৌমীশিং অমসুং নহারোলশিংদা থাজবা পীখীবা খুদিংমক য়াম্না য়াংনা থবক ওইনা পাংথোক্লে।
মরুপশিং,
ঐখোয়গী সরকারগী খ্বাইদগী চাউনা মাইপাকপা অমদি লায়রবশিংগী ফিবম ফগৎহনবা অসিনি। ওরিসাদা মশিং য়াম্লবা ত্রাইবেল খুন্নাই অমা লৈরি। লাইবক থিবদি, মমাংদা ত্রাইবেল খুন্নাই অসি মীরাইখি অমসুং মখোয় চাউখৎতনা, লায়রনা অমসুং অৱাৎপা কয়াগা লোয়ননা হিংখি। লৈবাক অসি মতম শাংনা পানখিবা দল অসিনা রাজনিতিগীদমক ত্রাইবেলশিং শীজিন্নখি। মীওইশিং অসিনা ত্রাইবেল মীয়ামদা চাউখৎপা নত্ত্রগা শরুক য়াবা ফংহনখিদে। মীওইশিং অসিনা লৈবাক অসিগী অয়াম্বা শরুক নেক্সালিজম, হিংশা অমসুং মীওৎ-মীনৈগী মৈদা লংশিনখি।
মরুপশিং,
২০১৪ গী মমাঙদা, লৈবাক অসিদা ত্রাইবেলশিংনা মশিং য়াম্না তাবা জিলা ১২৫ নেক্সালগী হিংশা মায়োক্নখি। রেদ কোরিদোরগী মিংদা ত্রাইবেলগী লমশিং মিংচৎ থিহনখি। হায়রিবা জিলাশিং অয়াম্বা চাউখৎতবনি হায়না লাউথোকখি অমসুং লৌফম থোকপা থৌদাং অমতা লৌখিদে।
মরুপশিং,
হৌখিবা চহিশিংদা, ত্রাইবেল মীয়াম হিংশাদগী কন্নবা অমসুং চাউখৎপগী অনৌবা লম্বীদা লাক্নবা ঐখোয়না থবক পায়খৎলে। অমরোমদা, ত্রাইবেলশিংগী লমদা চাউখৎপগী অনৌবা ইহৌ অমা পুরক্লে। মসিগী ফল ওইনা ঙসিদি লৈবাক অসিগী জিলা ২০ হেনবদা নেক্সালাইতকী হিংশা হন্থরে। খোঙজেল য়াংনা থবক পায়খৎপদগী, য়াম্না থুনা ত্রাইবেল মীয়াম হিংশা কোক্লগনি। লৈবাক অসিদা নেক্সালিজম লোইশিনগনি, মসি মোদীগী ৱাশক্নি।
মরুপশিং,
ত্রাইবেলশিংগী মঙলানশিং মঙফাওনহন্দুনা মখোয়দা অনৌবা খুদোংচাবশিং পীরে অমসুং মখোয়গী পুন্সিদা অৱাবশিং হন্থহনবা হায়বসি ঐখোয়গী সরকারগী মরুওইবনি। মরম অদুনা অহানবা ওইনা ত্রাইবেল চাউখৎনবা মরুওইবা জাতি থাক্কী স্কিম অনি হৌদোক্লে। স্কিম অনি অসিগীদমক লুপা করোর লাখ ১ হেন্না চাদিং তৌখ্রে। অহানবা স্কিম অসি বিরসা মুন্দা জিগী মমিং লৌদুনা ধরতি আবা জনজাতিয়া গ্রাম উতকার্স অভিয়ান হায়না থোল্লে। স্কিম অসিগী মখাদা লৈবাক অসিগী ত্রাইবেল খুঙ্গং ৬০,০০০ হেনবদা চাউখৎ থৌরাংগী থবক পায়খৎলে। ওরিসাদশু ত্রাইবেল ইমুংশিংগী য়ুমশিং শারে, লম্বীশিং শেম্লে অমসুং মৈ অমসুং অফবা থক্নবা ঈশিং ফংহল্লে। ওরিসাগী জিলা ১১ দা লৈফম য়াওবা স্কুল ৪০ শাগৎলি। থবক অসিগীদমক কেন্দ্র সরকারনা লুপা করোর কয়া থাদরি।
মরুপশিং,
অনিশুবা স্কিম অসিনা পি.এম-জনমন য়োজনানি। স্কিম অসিগী ইথিল ওরিসাদগী লাকপনি। লৈবাক অসিগী অহানবা ত্রাইবেল নুপী রাষ্ট্রপতি অসি ওরিসা নিংঙোলনি, ইকায়খুম্নরবী দ্রৌপতি মুর্মু জিনা লমজিংদুনা থবক অসি পায়খৎখিবনি। স্কিম অসিগী মখাদা, খ্বাইদগী ফিবম চাদনা লৈরিবা ত্রাইবেল মীয়াম ফিবম ফগৎনবা থবকশিং পায়খৎলে। অপীকপা ত্রাইবেলশিংগী খুঙ্গংশিং লুপা করোর চা কয়া চঙনা চাউখৎ থৌরাংগী থবকশিং পায়খৎলে।
মরুপশিং,
ওরিসাদা মশিং য়াম্লবা ঙামীশিং লৈরি। মখোয়গীদমক, অহানবা ওইনা লৈবাক্কী ওইবা অচৌবা স্কিম অমা- পি.এম মতস্যা সম্পদা য়োজনা হৌদোক্লে। অহানবা ওইনা ঙামীশিংদা কিষান ক্রেদিৎ কার্দ ফংহল্লে। কেন্দ্র সরকারনা লুপা করোর ২৫,০০০ গী অখন্নবা ফন্দ অমা শেম্নবা থৌরাং তৌরি। মসিনা ঐখোয়গী ওরিসাদা সমুদ্র মপান্দা লৈরিবা মীওইশিং অমসুং নহারোলশিংদা য়াম্না চাউনা কান্নবা পীগনি।
মরুপশিং,
২১শুবা চহিচাগী ভারতকী চাউখৎপনা নোংপোক ভারত্তগী ইথিল পীগনি। পুর্বোদয়াগী য়ুগ অসিদা নোংপোক্কী ফিবম ফগৎলক্লে। মসিগী ৱাখল অসিগা লোয়ননা, ওরিসা অমসুং লৈবাক অসিগী নোংপোক থংবা শরুক চাউখৎনবা ঐখোয়না কৎথোক্লে। চহি অমগী মমাঙদা ওরিসাদা বি.জে.পি সরকার শেমখিবা অসিনা পান্দম অসি মখা তানা য়াংখৎহল্লে। পারাদিপতগী ঝারসুগুদা ফাওবদা উদ্যোগকী মফমদশিং পাকথোক চাউথোক্লে। মসিনা ওরিসাগী মিনরেল অমসুং হিথাংফম্না লুচিংবা শেন্মিৎলোন মপাঙ্গল কনখৎহল্লে। রাজ্য অসিগী লম্বী, রেল অমসুং নোংথক্কী লম্বীগীদমক কেন্দ্র সরকারনা লুপা করোর লিশিং কয়া থাদরে। পারাদিপতা মেগা দুয়েল-ফিদ ক্রেকর অমসুং দাউস্ত্রিম য়ুনিতশিং, চান্দিখোলদা ক্রুদ ওইল স্তোরেজ ফেসিলিতি, গোপালপুরদা এল.এন.জি তর্মিনেল অমা লিংখৎলে, হায়রিবা থবকশিং অসি পায়খৎপনা ওরিসা অচৌবা উদ্যোগকী রাজ্য অমা ওইরগনি। পেত্রোলিয়ম, পেত্রোকেমিকেলশিং, তেক্সতাইলশিং অমসুং প্লাস্তিক্সশিংগা মরী লৈনবা উদ্যোগশিংনা রাজ্য অসি চাউখৎহনগনি। মসিনা এম.এস.এম.ই কয়া পুথোক্কনি অমসুং নহারোলশিংদা অনৌবা থবক লাখ কয়া ফংহনগনি। হন্দক, ওরিসা খক্তদা পেত্রোলিয়ম অমসুং পেত্রোকেমিকেল সেক্তরশিংদা লুপা করোর লাখ ১.৫ রোম থাদরে। ভারতকী পেত্রোকেমিকেলগী মফম অমা ওইনবা ওরিসা য়াংনা চাউখৎলক্লি।
মরুপশিং,
অচৌবা পান্দমশিং ফংনবা, ঐখোয়না মাঙলোমদা য়েংগদবনি-ঐখোয়গী পান্দম দরকার ওই। ঐখোয়গী বি.জে.পি সরকার অসিনা চহি অমগী মাইপাকপশিং হরাওবা ফোঙদোকপা খক নত্তনা, চহি মঙাগী ৱাখল খল্লি। সরকার অসিনা লাক্লিবা চহিশিংদা ওরিসাগী চাউখৎপগী লম্বী অমা শেম্নবা থবক পায়খৎলি। ২০৩৬ গী অখন্নবা থৌরাং অমা শেম্নবা ওরিসা সরকারনা থৌরাং তৌরে, মতম অসিদা ঐখোয়না রাজ্য অসি শেমখিবগী চহি ১০০শুবা থৌরম পাংথোক্কনি। ওরিসা লৈরিবা বি.জে.পি সরকারগীশু ভারতনা নিংতম্বা চহি ১০০ শুবগী ২০৪৭ গী পান্দম লৈরি। ঐনা ওরিসা ভিজন ২০৩৬ হন্না য়েংলে অমসুং মসিদা অফবা পান্দম কয়া য়াওরি। ওরিসাগী নহারোলশিংগী থবক শুবা কনবা অমসুং হৈথোই শিংথোইবনা অদোমগী পান্দম খুদিংমক ফংবা ঙমগনি। অমতা ওইনা, ঐখোয়না ওরিসা চাউখৎপগী অনৌবা থাকশিংদা পুখৎকনি। মসিগী ৱাশক অসিগা লোয়ননা, ঐনা অমুক হন্না মীয়াম থাগৎপা ফোঙদোকচরি অমসুং য়াইফ পাউজেল পীজরি।
অমুক হন্না মীয়ামদা য়াইফ পাউজেল পীজরি! জোহারি!
জয় জগনাথ!
জয় জগনাথ!
জয় জগনাথ!
