কেন্দ্রগী মন্ত্রীমন্দলগী ঐগী মরুপশিং কিসন রেদ্দি জি, অর্জুন রাম মেঘৱাল জি, মিনাক্সি লেখি জি, অজয় বত্ত জি, ব্রিগেদিয়ার আর.এস চিকারা জি, আই.এন.এগী লান্মী লেপ্তনেন্ত আর মধাবন জি অমসুং ঐগী নুংশিরবা ইরৈচাশিং।
নেতাজি সুভাস চন্দ্র বোসকী মপোক নুমিৎ পরাক্রম দিবস লাকপদা মীয়ামগী মফমদা য়াইফ-পাউজেল পীজরি। ঙসি লাল কিলাদা অজাদ হিন্দ ফৌজগী লান্মীশিংগী থৌনা উবগা লোয়ননা ঙসি অনৌবা থৌনাগা লোয়ননা অমুক হন্না ঙাল্লরে। অমৃত কালগী হৌরকপা চহিশিংদা মমাঙদা অমুক্তা ওইখিদ্রিবা মওং অমদা লৈবাক শীনবা থুংনা অচেৎপা ফিরেপ অমসুং মাইপাকপা উবা ফংলে। ঙরাং মালেম শীনবা থুংনা ভারতকী নাৎ-চৎনবীগী ৱাখল মপুংফারকপগী পুৱারি ওইরবা মাইপাকপা অমা উবা ফংলে।
মালেম শীনবা থুংনা, মীওইবা খুন্নাই শীনবা থুংনা অচৌবা রাম মন্দিরদা প্রান প্রাতিস্থাগী শক্তি উবা ফংলে। ঙসি ঐখোয়না নেতাজি সুভাস চন্দ্র বোসকী মপোক কুমওন থৌরম পাংথোক্লি। হৌখিবা চহি খরদগী, জনুৱারি ২৩ অসি পরাক্রম দিবস হায়না লাউথোকপদগী, গনতন্ত্র দিবসকী অচৌবা কুহ্মৈ অসি জনুৱারি ২৩ দগী বাপু লৈখিবদা নুমিৎ জনুৱারি ৩০ ফাওবা মখা তানা পাংথোক্লে। গনতন্ত্র দিবসকী অচৌবা কুহ্মৈ অসিদা জনুৱারি ২২গী লাইনিংগী অচৌবা কুহ্মৈ অসিসু হাপচিল্লে। জনুৱারি থাগী অরোইবা নুমিৎ খর অসি ঐখোয়গী লাইনিং, ঐখোয়গী কলচরগী ৱাখল তামিন্নবা, ঐখোয়গী গনতন্ত্র অমসুং ঐখোয়গী মরৈবাক নুংশিবগী ইথিল ওইরে। ঐনা মীয়াম পুম্নমক নুংঙাইবা ফোঙদোকচরি।
মরুপশিং,
ঙসি নেতাজিগী পুন্সি উৎপা একজিবিসন অমা পাংথোক্লি। কলাকারশিংনশু কেনভাসতা নেতাজিগী পুন্সি উৎলে। থবক অসি পাংথোক্লিবা কলাকার খুদিংমক ঐনা থাগৎপা ফোঙদোকচরি। ঙাইহাক্কী মমাংদা ঐনা বাল পুরুস্কার ফংলবা অঙাংশিংগা ৱারি শানখ্রে। মখোয়গী চহি মতাং অসিদা লৈরিবা থৌনা অমসুং হৈশিংবা অসি অঙকপনি। ঐনা ভারতকী নহারোলশিং উনবগী খুদোংচাবা ফংবা মতম খুদিংমক্তা, চাউখৎলবা ভারত অমা ওইরক্নবা ঐগী থাজবশিং হেনগৎলকই। লৈবাক অসিগী নহারোলশিংদা নেতাজি সুভাস চন্দ্র বোসনা অচৌবা ফিদম অমা ওইরে।
মরুপশিং,
ঙসি পরাক্রম দিবস অসিদা লাল কিলাদা ভারত পর্বশু হৌদোক্লে। ভারত পর্বদা নুমিৎ ৯ নি চুপ্না রিপব্লিক দে তেব্লো অমসুং নাৎকী থৌরমশিংগী খুৎথাংদা ভারতকী খেন্নবশিং উৎকনি। ভারত পর্ব অসি সুভাস চন্দ্র বোসকী অচুম্বা ফিদমশিংগী মমি অমনি। মসি ভোকেল ফোর লোকেল থবক ওইনা পাংথোক্নবা কুহ্মৈ অমনি। কুহ্মৈ অসি তুরিজম চাউখৎহন্নবা পাংথোকপনি। মসি লৈবাক অসিগী খেন্নবশিং ইকায়খুম্নবা উৎনবা কুহ্মৈ অমনি। কুহ্মৈ অসিনা এক ভারত শ্রেস্থা ভারত্তা অনৌবা থৌনাশিং হাপকনি। কুহ্মৈ অসি শরুক য়াদুনা লৈবাক অসিগী খেন্নবশিং হরাওবা ফোঙদোক্নবা মীওই খুদিংমক্তা ঐনা হায়জরি।
ঐগী ইমুং-মনুংগী মীওইশিং,
অজাদ হিন্দ ফৌজগী ৭৫শুবা মপোক কুমওন্দা লাল কিলাদা ঐনা মচু অহুমগী ফিরাল পাইহনখিবা নুমিৎ অদু ঐ কৈদৌঙৈদা কাউবা ঙম্লোই। নেতাজিগী পুন্সি অসি থবক শুবা-নোম্বা কনবা খক নত্তনা থৌনা ফবা অমশুনি। ভারত নিংতম্বা ফংনবা নেতাজিনা মহাক্কী মঙলানশিং অমসুং অনিংবশিং কৎথোকখি। করিগুম্বা মখোয়না পাম্লবদি, মখোয় মশামক্কী হেন্না নুংঙাইবা পুন্সি অমা খল্লমগনি। অদুবু মহাক্না মহাক্কী মঙলানশিং ভারতকী য়াইফনবা ৱারেপশিংগা শম্নহনখি। নেতাজি মপান লৈবাক্কী লৈঙাক্কী মায়োক্তা লৈখিবতা নত্তনা ভারতকী সভেত্যতা ৱাহং হংখিবশিংগী পাউখুম পীখিবা লৈবাক অসিগী অথোইবা মপারি অমনি। নেতাজিনা অকনবা শক্তিগা লোয়ননা, ভারত অসি গনতন্ত্রগী মমানি হায়না মালেমদা মশক তাকখি। মালেমদা মীওই খরনা ভারতকী গনতন্ত্রগী মরমদা চিংনবা লৈরকপা মতমদা, নেতাজিনা মখোয়দা ভারতকী গনতন্ত্র অমসুং মসিগী পুৱারিগী মতাংদা মখোয়দা খঙহনখি। গনতন্ত্র অসি মীওইবা খুন্নাইগী লোয়শঙ অমনি হায়না নেতাজিনা হায়খি। মসিগী থবক অসি ভারতকী তোঙান-তোঙানবা মফমশিংদা চহি চা কয়া চৎনখি। ঙসিদি, ভারত গনতন্ত্রগী মমা ওইবগী শক্তমদা লৈবাক অসিগী চাউথোকচবা লৈরে, মসিনা নেতাজিগী অচুম্বা ফিদমশিংশু মপাঙ্গল কনখৎহল্লে।
মরুপশিং,
মীনাই ওইবা হায়বসি লৈবাক ঙাকপা খক নত্তে, ৱাখল্লোনশিং অমসুং লমচৎ-শাজৎশিংশুনি হায়বা নেতাজিনা খঙখি। মরম অদুনা, মসিগী অখন্নবা ৱাখল্লোন অসি মতম অদুগী নহারোলশিংদা ৱাখল তাহন্নবা মহাক্না হোৎনখি। করিগুম্বা ঙসিগী ভারত্তা নেতাজি হিংলম্লবদি, ভারত্তা লৈরিবা অনৌবা ৱাখল্লোনশিং অসি উবদা মহাক কয়া য়াম্না নুংঙাইরমগনি। ঙসি ভারতকী নহারোলশিংনা মখোয়গী নাৎ, মখোয়গী গুনশিং অমসুং মখোয় ভারতমচা ওইবগী চাউথোকচবা ফাওরিবা অসি মমাঙদা অমুক্তা উখিদ্রি। ঐখোয় কনাগুম্বদগী তাবা নত্তে, ঐখোয়গী তৌবা ঙম্বা অসি কনাগুম্বদগী তাবা নত্তে, ঙসি মসিগী থাজবা অসি ভারতকী নহারোল খুদিংমক্তা লৈরে। কনা অমতা চৎপা ঙমদ্রিবা থাগী শরুক্তা ঐখোয়না ফিরাল পাইহল্লে। কিলোমিতর লাখ ১৫ পাইদুনা ঐখোয় মফম অদুদা য়ৌবা ঙম্লে, মসি ভারতমচা খুদিংমক্কী চাউথোকচবনি। নুমিৎ নত্ত্রগা সমুদ্রগী মনুংদা ওইগেরা, অঙকপা মফম অমা হেক্তা য়ৌবদা ঐখোয়গী ওইনা অরুবা ওইদ্রে। ঐখোয় মালেমদা মকোক থোংবা ইকোনোমি অহুমগী মনুংদা য়াওবা ঙম্লে। ঐখোয়না মালেমগী অৱাবশিং কোকহন্নবা পাম্বৈশিং পুথোকপা ঙম্লে। মসিগী থাজবা অসি ঙসি ভারতকী নহারোল খুদিংমক্তা উবা ফংলে। ভারতকী নহারোলশিংগী মরক্তা লৈরিবা মসিগী মিকপ থোকপা অসি চাউখৎলবা ভারত অমা শেমগৎনবগী থৌনা ওইরে। মরম অদুনা ঙসি ভারতকী নহারোলশিংনা অচুম্বা ৱাখল্লোন মঙা ঙাক্না চৎলে। মরম অদুনা ঙসি ভারতকী নহারোলশিং মীনাই ওইবগী ৱাখল্লোন্দগী মনিং তম্লে।
ঐগী ইমুং-মনুংগী মীওইশিং,
নেতাজিগী পুন্সি অমসুং পাংথোক্লম্বা থবকশিংনা নহা ওইরিবা ভারতকী ইথিল অমা ওইরে। মসিগী ইথিল অসি খোঙথাং খুদিংমক্তা ঐখোয়গা লোয়ননা লৈমিন্ননবা হৌখিবা চহি ১০ অসিদা ঐখোয় লেপ্তনা হোৎনদুনা লাক্লি। নেতাজিগী মীতম খিন্নবা চুনবা মফম অমা ঐখোয়না পীরে। ঐখোয়গী পান্দমদি মশাগী মথৌ পাংথোক্লিবা মীওই খুদিংমক মশাগী মথৌ পাংথোক্নবা নেতাজিনা কৎথোকখিবা অদু নিংশিংহনবনি। অজাদ হিন্দ ফৌজ সরকারনা অহানবা ওইনা মচু অহুমগী ফিরাল পাইহনখিবা অন্দমান অমসুং নিকোরগী ইথৎশিং ঐখোয়না নেতাজিগী মমিং থোল্লে। অন্দমান্দা নেতাজিদা কৎথোকপা মেমোরিএল অমসু কৎথোক্লে। লাল কিলাদা নেতাজি অমসুং অজাদ হিন্দ ফৌজগী থবকশিংদা কৎথোক্লবা মিউজম অমা ঐখোয়না শেমগৎলে। নেতাজিগী মিংদা দিজাস্তর মেনেজমেন্তগী মনা অমা অহানবা ওইনা নেসনেল এৱার্দ ওইনা লাউথোক্লে। ঐখোয়গী সরকারনা পাংথোক্লিবা অসিগুম্না নিংতম্বা ফংলবা ভারতকী সরকার অমতনা অজাদ হিন্দ ফৌজদা কৎথোক্লবা থবক অমা পাংথোক্ত্রি। মসি ঐগী সরকারগী লাইবক ফবনি হায়না ঐনা খল্লি।
মরুপশিং,
লৈবাক অসিনা থেংনরিবা খুদোংচাদবশিং নেতাজিনা মমুৎ তানা খঙখি অমসুং মখোয়গী মরমদা মীওই খুদিংমক্তা চেকশিনৱা থমখি। মহাক্না হায়খি করিগুম্বা ঐখোয়না অচৌবা ভারত শেমগৎপা পাম্লবদি, গনতন্ত্রিক ওইবা খুন্নাইগী য়ূম্ফমদা মতম অদুগী রাজনিতিগী গনতন্ত্র মপাঙ্গল কনখৎহনগদবনি। অদুবু, লাইবক থিবদি, নিংতম্বা ফংলবা মতুংদা, মহাক্কী ৱাখল্লোন শাথিনা নৈহৎখি। নিংতম্বা ফংলবা মতুংদা, ভারতকী গনতন্ত্রদা মীচং-মীখাই নাইবগুম্বা ফত্তবা কয়া মখা তানা লৈখি। মসিনা অচৌবা মরম ওইদুনা খোঙজেল য়াংনা ভারত চাউখৎপা ঙমখিদে। খুন্নাইগী মশিং য়াম্লবা কাংলুপ খুদোংচাবশিং ফংখিদে। মীয়াম খুন্নাইগী শেন-থুমগী খুদোংচাবশিংদগী লাপ্না লৈখি। ইমুং খর খক্তনা রাজনিতি অমসুং শেন-থুমগী ৱারেপশিং লৌখি অমসুং থৌশিল শেমখি। ফিবম অসিদা খ্বাইদগী মাঙজরিবদি লৈবাক অসিগী নহারোলশিংগী শক্তি অমসুং লৈবাক অসিগী নুপীশিংগী শক্তিনি। খোঙথাং খুদিংমক্তা নহারোলশিং তাথি-তাওইনা তৌবগী অৱাবা মায়োক্নখি। মখোয়গী খ্বাইদগী পীকপা দরকার ওইবা খর খক্তগী নুপীশিং মতম শাংনা ঙাইখি। অসিগুম্বা ফিবম অসিদা লৈবাক অমতা চাউখৎপা ঙম্লোই অমসুং মসি ভারত্তা থোকখি। মরম অদুনা, ২০১৪ দা সরকার পায়বদগী, সবকা সাথ, সবকা বিকাসকী ৱাখল্লোনগা লোয়ননা ঐখোয় মাঙলোমদা চঙশিনখি। চহি ১০দা কমদৌনা অহোংবশিং লাকখিবগে হায়বা ঙসি লৈবাক অসিনা উরে। নিংতম্বা ভারত অমগী নেতাজিগী মঙলান হৌজিক মঙফাওনরে। ঙসিদা লায়রবা ইমুংশিংগী খ্বাইদগী লায়রবশিংগী মচানুপা অমসুং মচানুপী ফাওবা মখোয় মাঙলোমদা চঙশিন্নবা খুদোংচাবা ৱাৎপা অমতা লৈত্রে। ঙসিদি লৈবাক অসিগী নুপীশিংগী থৌনাদা থাজবা লৈদুনা মখোয়গী খ্বাইদগী পীকপা দরকার ওইবশিং সরকারনা ফংহল্লে। চহি কয়া ঙাইরক্লবা মতুংদা, নারী শক্তি বন্দন এক্ত শেম্লে, অমৃত কালনা অদোমগী থৌনা উৎনবা খুদোংচাবা অমা অদোমদা পীরে হায়না লৈবাক অসিগী নহারোল খুদিংমক, ইচল খুদিংমক অমসুং ইচানুপী খুদিংমক্তা ঐনা হায়নিংই। লৈবাক অসিগী রাজনিতিগী তুংলমচৎ অমুক হন্না শেমদোক্নবা অদোমগী চাউরবা খুদোংচাবা অমা লৈরে। চাউখৎলবা ভারত অমগী রাজনিতিদা অহোংবা পুরকপদা অদোম্না অচৌবা থৌদাং অমা লৌবা ঙমগনি। ঐখোয়গী নহারোলশিং শক্তি অমসুং নুপীশিংগী শক্তি খক্তনা লৈবাক অসিগী রাজনিতি অসি মীচং-মীখাই নাইবা অমসুং শেঞ্জা-থুমজগী ফত্তবশিংদগী মনিংতম্বা ঙমগনি। রাজনিতিগী খুৎথাংদা হায়রিবা ফত্তবশিং লোইশিন্নবা ঐখোয়না থৌনা উৎকদবনি, ঐখোয়না মখোয় মাইথিবা পীবা ঙমগনি।
ঐগী ইমুং-মনুংগী মীওইশিং,
মতম অসি রামগী থবক লৈবাক্কী থবক ওইহনবা মতমনি হায়না ঐনা ঙরাং অযোধ্যাদা হায়খ্রে। মতম অসিদা রামদা চঙজদুনা লৈবাক নিংবগী ৱাখল্লোন মপাঙ্গল কনখৎহনগদবনি। ঙসিদি, মালেমনা ভারতকী খোঙথাং খুদিং অমসুং থবক খুদিং য়েংলি। ঙসি ঐখোয়না করি তৌখ্রে, ঐখোয় করি মাইপাকপা পুরকখ্রবগে খঙনবা মালেম্না খৌরাংনা ঙাইরি। ঐখোয়গী পান্দমদি ২০১৪৭দা ভারত চাউখৎলবা লৈবাক অমা ওইহনবনি। ঐখোয়গী পান্দমদি শেন-থুম চাউখৎপা, নাৎ-চৎনবী মপাঙ্গল কনবা অমসুং লাল্লোং হৈবা ভারত অমা শেমগৎপনি। মসিগীদমক, চহি ৫গী মনুংদা, ঐখোয় মালেমদা অহুমশুবা খ্বাইদগী চাউবা ইকোনোমি অমা ওইবা য়াম্না মরুওই। মসিগী পান্দম অসি ঐখোয়না ফংগদবা য়াম্না লাপত্রে। হৌখিবা চহি ১০, ঐখোয় ইকোনোমি পৱার ১০শুবদা লৈরম্বদগী ৫শুবদা হাইগৎলকখি। হৌখিবা চহি ১০দা, লৈবাক শীনবা থুংনা হোৎনবদগী, ভারতমচা করোর ২৫ লায়রবা কোক্লে। মমাঙদা ফংগনি হায়না খল্লমদবা পান্দমশিং ঙসিদি ভারতনা ফংবা ঙম্লে।
ঐগী ইমুং-মনুংগী মীওইশিং,
হৌখিবা চহি ১০দা, লৈবাক অসিগী লাল্লোং মপাঙ্গল কনখৎহন্নবা ভারতনা অনৌবা লম্বী অমা খল্লে। মতম কয়াগী মমাঙদগী, লৈবাক অসিগী ঙাক-শেন অমসুং সেকুরিতিগী দরকার ওইবশিং ভারতনা মপান লৈবাকশিংগী মখা পোন্দুনা লাকখি। ভারতকী ফোর্সশিং মশাগী ওক্নবা পুথোকচনবা ঐখোয়না থবক পায়খৎলে। লৈবাক অসিগী লান্মীনা অসিগুম্বা খুৎলায় চা কয়া মপান লৈবাকশিংদগী লৈবা মপুংফানা তোক্লে। ঙসি লৈবাক শীনবা থুংনা অফবা দিফেন্স ইন্দস্ত্রি অমা শেমগৎলে। মতম অমদা মালেমদা খ্বাইদগী চাউবা দিফেন্স ইমপোর্তর ওইরম্বা ভারত,হৌজিক মালেমদা খ্বাইদগী চাউবা দিফেন্স এক্সপোর্তর ওইরে।
মরুপশিং,
ঙসিগী ভারত, মালেমগী মরুপ অমা ওইনা, মালেম শীনবা থুংনা শম্ননবা থবক চিল্লে। ঙসি ঐখোয় মালেমগী অৱাবশিংগী পাম্বৈশিং পুথোক্নবা থবক পায়খৎলে। অতোপ্পা অমদা, মালেম অসি লালদগী শান্তিদা লাক্নবা ঐখৌয়না হোৎনরি। অতোপ্পা অমদা, ঐখোয়গী লৈবাক ঙাক্নবা ঐখোয় মপুংফানা শেম-শারে।
মরুপশিং,
মথং চহি ২৫ অসি ভারতকীদমক, ভারতকী মীয়ামগীদমক য়াম্না মরুওই। ঐখোয়না অমৃত কালগী মিকুপ খুদিং লৈবাক্কী য়াইফনবা শীজিন্নগদবনি। ঐখোয় থবক কন্না শুগদবনি, ঐখোয় থৌনা উৎকদবনি। মসি চাউখৎলবা ভারত অমা শেমগৎনবা য়াম্না মরুওই। পরাক্রম দিবসনা মসিগী ৱাশক অসি চহি খুদিংগী ঐখোয়দা নিংশিংহনগনি। পরাক্রম দিবস অসিদা, ঐনা অমুক হন্না লৈবাক শীনবা থুংনা থাগৎপা ফোঙদোকচরি। নেতাজি সুভাস চন্দ্র বোসকী গুনশিং নিংশিংদুনা, ঐনা মহাক্কী মফমদা ইকায়খুম্নবা উৎচরি। ঐগা লোয়ননা হায়মিন্নসি-
ভারত ইমানা য়াইফরে!
ভারত ইমানা য়াইফরে!
ভারত ইমানা য়াইফরে!
অদোম থাগৎচরি।
