ভারত মাতা কী জয়!
ভারত মাতা কী জয়!
ভারত মাতা কী জয়!
নখোয় পুম্নমক্না ফীভম অসি য়াম্না নুংঙাইহল্লি!
গুজরাতকী রাজ্যপাল শ্রী আচার্য় দেবব্রতজী, মফম অসিগী মীয়াম্না পাম্নরবা মুখ্য মন্ত্রী ভুপেন্দ্র ভাই পতেল, কেন্দ্রগী মন্ত্রী-মন্দলগী ঐগী মরুপ সি.আর. পাতিল, গুজরাত সরকারগী মন্ত্রী পুম্নমক, অহমদাবাদকী মেয়র প্রতিভাজী, অতোপ্পা মশক নাইবা মীওইশি অমসুং অহমদাবাদকী ঐগী নুংশিরবা ইচিল-ইনাওশিং!
ঙসি ময়াম পুম্নমক্না অসিগুম্বা ফীভম অমা শেমগৎলে। কয়ারক ঐহাক্না খল্লি মদুদি মীওই লাখ কয়াগী নুংশিবা অমসুং য়াইফ-মঙ্গোল ফংজবা অসি ঐহাক্কী য়াম্না চাউথোকচনীংঙাইনি। ঐনা ময়ামবু ফনা থাগৎলবসু মদুনা মপুং ফাহনবদি ঙমলরোই। য়েংবীয়ু, অপীকপা নরেন্দ্র খরা মফম অসিদা লেপ্লি।
মরুপশিং,
হৌজিক লৈবাক শীনবা থুংনা গনেশোতসবকী নুংঙাইরবা থৌরম অমা পাংথোক্লি। গনপতি বাপ্পাগী য়াইফ-মঙ্গোলগা লোয়ননা, গুজরাতকী চাউখৎ-থৌরাংগা মরী লৈনবা প্রোজেক্ত কয়া অমসু ঙসি শঙ্গাখ্রে। ঙসি ঐহাক্না চাউখৎ-থৌরাংগী প্রোজেক্ত কয়া অমা লৈবাক অসিগী মীয়াম পুম্নমক্কী মফমদা কত্থোকপগী খুদোংচাবা ফংজবা অসি ঐহাক্কী লাইবক ফবা অমনি। চাউখৎ-থৌরাংগী থবকশিং অসিগীদমক্তা ঐনা ময়াম পুম্নমক্তা নুংঙাইবা ফোংদোকচরি।
মরুপশিং,
হন্দক্কী নোংজু পন্থা অসিদা, গুজরাতকী মফম কয়াদা নোং য়াম্না চুই। লৈবাক অসিদা ক্লাউদব্রস্তশিং মথং-মথং থোক্লি অমসুং ঐখোয়না তিভিদা মাং-তাক্নিংঙাই ওইবা থৌদোকশিং উবা মতমদা, ঐখোয় ইশাবু লাকশিনবদা অৱাবা ওইরকই। শোকহল্লবা ইমুং মনুং পুম্নমক্তা ঐহাক্না ঐহাক্কী অৱাবা ফোংদোকচরি। মহৌশাগী অকিবা অসি মীওইবা খুন্নাই, মালেম অমসুং লৈবাক পুম্বগীদমক শীংনবা ওইরক্লি। কেন্দ্র সরকারনা রাজ্য সরকার পুম্নমক্কা লোয়ননা রিলিফ অমসুং রেস্ক্যুগী থবকশিংদা য়াওরি।
মরুপশিং,
গুজরাতকী লম অসি মোহন অনিগী লমনি। সুদর্শন-চক্রধারী মোহান অমা হায়বদি ঐখোয়গী দ্বারকাদিশ শ্রী কৃষ্ণ অদুগা অতোপ্পা চরখাধারী মোহান হায়বদি সবরমতীগী সেন্ত, পুজ্যা বাপু। মখোয় অনিমক্না তাকপীবা লম্বীদা চৎতুনা ভারত অসি লেপ্পা লৈতনা মপাঙ্গল কনখৎলক্লি। সুদর্শন-চক্রধারি মোহন্না ঐখোয়দা লৈবাক অমসুং খুন্নাই অসি করম্না ঙাকথোক্কদগে হায়বদু তাকপীখি। মহাক্না সুদর্শন চক্রবু জস্তিস অমসুং সেক্যুরিতীগী ঙাক্লৌ অমা ওইহনখি, মসিনা মপান্দা লৈবা য়েক্নববুসু থেংনৈ অমসুং মখোয়বু চৈরাক পী। অমসুং মসিগী ৱাখল্লোন অসি ঙসি ভারতকী ৱারেপশিংদা লৈবাক অসিনা ফাওরি। লৈবাক অসি খক্তনা নত্তনা মালেম অসিনা ফাওরি। ঐখোয়গী গুজরাত অমসুং অহমদাবাদনা অৱাবা মতমশিং উবা ফংখি। পুন্সি অসি কর্ফিয়ুগী মখাদা চত্থখি। অহমদাবাদকী লম অসি কুহ্মৈশিংদা ঈখেং তাখি। তেরোরিস্তশিংনা ঐখোয়গী ঈখেং তাহনখি অমসুং দিল্লীদা লৈরম্বা কংগ্রেস সরকারনা করিসু তৌখিদে। অদুবু ঙসিদি ঐখোয়না তেরোরিস্তশিং অমসুং মখোয়গী মাস্তরশিংবু, মখোয়না মফম অমা হেক্তদা লোৎলবসু কনবা ঙম্লোই। মালেমনা ভারতনা পাহলগামগীদমক করম্না লৌশিনবগে হায়বদু উখ্রে। ওপরেসন সিন্দুর অসি ঐখোয়গী লান্মীগী থৌনা অমসুং সুদর্শন চক্রধারী মোহনগী ভারতকী ইথিলগী খুদম অমা ওইরক্লি।
মরুপশিং,
ঐখোয়গী ইকাই খুম্নরবা বাপু, চরখাধারী মোহন্না স্বদেশীগী খুত্থাংদা ভারতকী চাউখৎপগী লম্বী তাকখি। মসিদা ঐখোয়না সবরমতী আশ্রম ফংলি। আশ্রম অসি মহাক্কী মিংদা চহি তরাগী খুজিং কয়া লৈঙাক পায়দুনা লাকখিবা পার্তী অদুনা বাপুগী থম্মোয়বু কায়থহনখিবা, বাপুগী স্বদেশীগী মন্ত্রদা করি তৌখিবগে হায়বগী খুদম্নি। ঙসিদি, হৌখিবা চহি কয়া অসিদা গান্ধীগী মিংদা গারীশিং নুমিৎ চুপ্পা থৌরিবা মীওইশিংগী থম্মোয়দগী স্বচ্ছতা নৎত্রগা স্বদেশী হায়বা ৱাহৈ অসি অদোম্না তাবা ফংলরোই। লৈবাক অসিনা মখোয়গী ৱাখল্লোনশিং অসি করি তৌরবনো হায়বা খঙবা ঙমদে? চহি ৬৫ লৈবাক অসিবু লৈঙাক্লম্বা কংগ্রেসনা ভারতপু অতোপ্পা লৈবাকশিংদা মখা পোলহন্দুনা থমখি। মসিনা মরম ওইদুনা মখোয়না সরকারদা লৈরিঙৈদা ইম্পোর্তশিংদা মেনিপ্যুলেৎ তৌবা অমসুং স্কেম তৌবা ঙমখি। অদুবু ঙসিদি ভারতনা চাউখৎলবা ভারত অমা শেম্নবগীদমক মশা-মরোমদোম লেপচবা অসি য়ুম্ফম ওইরে। মহাক্কী লৌমীশিং, মহাক্কী ঙামীশিং, মহাক্কী শা-ষন য়োকপা মীওইশিং, মহাক্কী ওন্তপ্রিন্যুওরশিং অসিগী শক্তিনা ভারত অসি চাউখৎপগী লম্বীদা খোঙজেল য়াংনা চংশিল্লি, মশা-মরোমদোম লেপচবগী লম্বীদা মাংলোমদা চংশিল্লি। গুজরাত্তা শা-ষন য়োকপা মীওই কয়াম লৈবগে অমসুং ঐখোয়গী দাইরী সেক্তরগী শক্তি অদু য়েংসি। ঐহাক্না হন্দক্তা ফিজীগী প্রধান মন্ত্রীগা উন্নদুনা হল্লকখি। মহাক্নাসু মখোয়গী দাইরী সেক্তর, মখোয়গী কোওপরেতিব মুভমেন্ত অসি য়াম্না ইকায় খুম্নবা উৎতুনা শন্দোক্না তাকখি অমসুং অসিগুম্বা অমা ঐখোয়গী লৈবাক অসিদা তৌগদবনি হায়খি। মরুপশিং, ঐখোয়গী শা-ষন য়োকপা মীওইশিং অমসুং ইচল-ইচেশিংনা শা-ষন য়োকপদা খ্বাইদগী চাউনা মতেং পাংলি। শা-ষন য়োকপীদুনা, ইচে-ইচলশিংনা ঐখোয়গী দাইরী সেক্তরবু মপাঙ্গল কনখৎহনখি, মশা-মরোমদোম লেপচবা ঙমহনখি অমসুং ঙসিদি মফম পুম্বদা মসিগী থাগৎপা ফোংদোক্লি।
অদুবু মরুপশিং,
ময়াম পুম্নমক্না ঙসি মালেমদা লৈরিবা ইকনোমিক ইন্তরেস্ত পোলিতিক্স অসি য়াম্না ফজনা উরি, মী খুদিংমক্না মখোয়গী মশাগী থবকশিং তৌবদা থৱায় য়াওরি। অহমদাবাদকী লমদম অসিদগী ঐহাক্না ঐহাক্কী অপীকপা ওন্তপ্রিন্যুওরশিং, ঐহাক্কী অপীকপা দুকান ফম্লিবা ইচিল-ইনাওশিং, ঐহাক্কী লৌমী ইচিল-ইনাওশিং, ঐহাক্কী শা-ষন য়োকপা ইচিল-ইনাওশিং অমসুং ঐহাক্না গান্ধীগী লমদম অসিদগী ঐহাক্কী লৈবাক অসিগী মীওই খুদিংমক্কীদমক, অপীকপা ওন্তপ্রিন্যুওরশিং, লৌমীশিং, শা-ষন য়োকপা ইচিল-ইনাওশিং, ঐহাক্না অমুক হন্না অদোমদা হায়জরি মদুদি মোদীগীদমক অদোমগী অপাম্বনা খ্বাইদগী মরু ওই। ঐহাক্কী সরকারনা অপীকপা ওন্তপ্রিন্যুওরশিং, লৌমীশিং, শা-ষন য়োকপা মীওইশিংদা অমত্তা শোকহল্লোই। প্রেসর কয়া লাকপা তারবসু, ঐখোয়না থেংনবা ঙম্নবা ঐখোয়গী পাঙ্গল হেনগৎহনখিগনি।
মরুপশিং,
ঙসি, আত্মনির্ভর ভারত অভিয়ান অসি গুজরাত্তগী ইনর্জী য়াম্না ফংলি অমসুং মসি চহি তরাগী খুজিং অনিগী কন্না হোৎনবগী মহৈনি। ঙসিগী নহা ওইরিবা জেনরেসন অসিনা নুমিৎ খুদিংগী কর্ফিয়ু থমখিবা মতম অদু উবা ফংদ্রে। মফম অসিদা ললোন-ইতিক তৌবদা খুদোংচাদবা ওইখি, তম্বা ঙমদবা ফিভম অমদা লৈখি। অদুবু ঙসিদি অহমদাবাদ অসি লৈবাক অসিগী খ্বাইদগী শাফবা ওইবা শহরশিংগী মনুংদা অমা ওইরে অমসুং ময়াম পুম্নমক্না মসি উৎখ্রে।
মরুপশিং,
গুজরাত্তা শেমখিবা শান্তি অমসুং সেক্যুরিতীগী নুংঙাইরবা মহৈ ঐখোয়না উরি। ঙসিদি গুজরাতকী লমদম অসিদা মখল খুদিংমক্কী ইন্দস্ত্রীশিং চাউখৎলক্লি। ঐখোয়গী রাজ্য অসি মেনুফেকচরিং হব অমা ওইরকপা উবদা গুজরাত পুম্নমক চাউথোকচরি। ময়ামগী মরক্তা লৈরিবা মীওইশিং, অহল ওইরবা ইচিল-ইনাওশিং, ময়াম্না গুজরাতপু খায়দোক্নবা খোংজং চংশিল্লকপা মতম, মহা গুজরাত মুভমেন্তকী মতাংদা খঙলমগনি। মতম অদুদা মীওই কয়ানা ঐখোয়দা হায়খি মদুদি গুজরাতপু খায়দোক্লগা নখোয়না করি তৌবা পাম্বগে, নখোয়না চারা হেন্দুনা শীগনি, মখোয়না হায়রম্মি মদুদি, নখোয়দা করি লৈবগে, মিনরেল লৈতে, পেরিনিএল রিভর লৈতে, চহি তরাগী মনুংদা চহি তরেৎ ইকং থোক্লি, মাইন লৈতে, অসিগুম্বা ইন্দস্ত্রী লৈতে, লৌউ-শিংউ লৈতে, মসিগী মথক্তা থংননা মরুভুমি লৈরি অমসুং অতোপ্পা নাকল অমদদি পাকিস্তান লৈ, নখোয়না করি তৌগনি, থুমগী নত্তনা নখোয়না করি লৈবগে হায়না মখোয়না হায়রম্মি, মখোয়না ঐখোয়বু করেম্নখি, অদুবু গুজরাতকী থৌদাং অদু লাকপা মতমদা হৌজিক ঐখোয়না মরোমদোম লেপচবা তাই, মদুদগী গুজরাতকী মীয়াম্না তুং হনখিদে অমসুং ঙসিদি নখোয়দা করি লৈবগে, হায়রিবা মীওইশিংনা হায়রি ইনাও ঐখোয়দা দাইমন্দ লৈতে, দাইমন্দ মাইন অমা ফাওবা লৈতে অদুবু মালেম অসিগী দাইমন্দ তরাগী মনুংদা মাপনদি ঐখোয়গী গুজরাতকী লমদম অসিদগী ওইরি।
মরুপশিং,
থা খরগী মমাংদা ঐহাক দহোদতা লাকখি। মফম অদুগী রেলৱে ফেক্তরীদা পাৱরফুল ইলেক্ত্রিক লোকোমোতিব ইঞ্জিনশিং শেমগৎলি। ঙসিদি গুজরাত্তা শাবা মেত্রো কোচশিং অতোপ্পা লৈবাকশিংদা থাদোক্লি। মসিদা নত্তনা, মোতোরসাইকল নৎত্রগা কার ওইরবসু, মদুগী অয়াম্বা শরুক গুজরাত্তা পুথোক্লি। লৈবাক অসিগী অমসুং মালেমগী অচৌবা কম্পনীশিংনা মফম অসিদা ফেক্তরীশিং লিংখৎলি। গুজরাত্তা এয়রপ্লানশিংগী তোঙান তোঙানবা পার্তশিং শেম্বা অমসুং মখোয়গী এক্সপোর্ত তৌবগী থবক চত্থরি। হৌজিক ভদোদারাদা ত্রান্সপোর্ত এয়রক্রাফ্ত শেমগৎপগী থবকসু হৌরে। ঐখোয়গী গুজরাত্তা এয়রপ্লানশিং শাবা হৌরে, অদুনা অদোম্না নুংঙাইবা ফাওবরা নৎত্রগা ফাওদবরা? হৌজিক গুজরাতসু ইলেক্ত্রিক ভেহিকল পুথোকপগী য়াম্না চাউবা সেন্তর অমা ওইরক্লি। ঐহাক হয়েং ২৬তা হনসালপুরদা চৎকনি। ইলেক্ত্রিক ভেহিকল পুথোকপগা মরী লৈননা য়াম্না চাউবা থৌরাং অমা মফম অদুদা লৌখৎলি। ঙসি শেম্লিবা মোদর্ন ইলেক্ত্রোনিক দিভাইস খুদিংমক সেমিকন্দক্তরশিং য়াওদনা শেম্বা ঙম্লোই। গুজরাতনা হৌজিক সেমিকন্দক্তর সেক্তরদসু অচৌবা মমিং অমা শেমগদৌরি। তেক্সতাইল ওইগেরা নৎত্রগা রত্ন অমসুং জুয়েলরী ওইগেরা, গুজরাত অসি মসিগী পোত্থোকশিংগীদমক্তা মমিং চৎলি। হিদাক-লাংথক ওইগেরা নত্ত্রগা ভেক্সিন ওইগেরা, ফার্মা পুথোকপদা লৈবাক অসিগী এক্সপোর্তকী শরুক অহুম থোকপগী অমা গুজরাত্তগী লাকই।
মরুপশিং,
ঙসিদি ভারতনা সোলর, ৱিন্দ অমসুং ন্যুক্লিয়র ইনর্জীগী লমদা খোঙজেল য়াংনা খুমাং চাউশিল্লি। মসিদা গুজরাতনা খ্বাইদগী য়াম্না শরুক য়াখি। ঐহাক এয়রপোর্ত্তগী লাকপগা নখোয়না অচৌবা রোদ শো অমা পাংথোকখি! অদোম্না অচৌবা থবক অমা পাংথোকখি, রোদ শো অসি য়াম্না চাউনা পাংথোকখি অদুবু মীশিং অদু য়ুমথক্তা লেপমখি, বেলকোনীদা লেপমখি, ঐনা মখোয়দা ইকোক নোন্দুনা ইকায়খুম্নবা উৎখি, অদুবু ঐগী মীৎনা কোইনা য়েংগী, অমসুং য়ুমথক্কী সোলার পৱার প্লান্তশিং অদু য়ুম অয়াম্বগী য়ুমথক্তা উবা ফংখি। গুজরাত অসি গ্রীন ইনর্জী অমসুং পেত্রো কেমিকেলশিংগী অচৌবা মফম অমা ওইরক্লি। লৈবাক অসিগী পেত্রো কেমিকেলগী মথৌ তাবশিং মপুং ফাহন্নবগীদমক গুজরাতনা অচৌবা থৌদাং অমা লৌরি। ঐখোয়গী প্লাস্তিক ইন্দস্ত্রী, সিন্থেতিক ফাইবর, ফর্তিলাইজর, হিদাক-লাংথক, পেন্ত ইন্দস্ত্রী, কোসমেতিক্সকী খ্বাইদগী চাউবা য়ুম্ফম অসি পেত্রোকেমিকেল সেক্তরনি। গুজরাত্তা অরিবা ইন্দস্ত্রীশিং অসি পাকথোক চাউথোক্লি। ঐহাক্না নীংশিংলি মদুদি ঐখোয়না মতম কুইনা ঐখোয়গী ইকোক্তা খুৎ থমদুনা কপখি। চহি ৩০গী মমাংগী নুমিৎ অদু নীংশিংলিবা মীওইশিংনা, করিগীদমক কপখিবনো, “মিলশিং অসি থিংখ্রে, মিলশিং অসি থিংখ্রে, মিলশিং অসি থিংখ্রে”। নুমিৎ খুদিংগী চপ মান্নবা স্তোরী ওইখি। করিগুম্বা লুচিংবা অমা লাক্লবদি, পাউমীশিংনা ৱাহং অমা খক্তমক হংখি মদুদি, মিলশিং থিংজিনখ্রে, অদোম্না করি তৌগনি? মতম অদুদা লৈরিবা অদু কংগ্রেস ওইরম্মি। ঙসিদি গুজরাত্তা হায়রিবা সাইরেনশিং অসি লেপখ্রবসু চাউখৎপগী ফিরাল অসি মফম খুদিংদা ৱাংনা পাইরি। অনৌবা ইন্দস্ত্রীশিংগী য়ুম্ফম থোল্লি অমসুং মসিগী হোৎনবা পুম্নমক অসিনা আত্মনির্ভর ভারতপু মপাঙ্গল কনখৎহল্লি। মসিনা মরম ওইদুনা গুজরাতকী নহারোলশিংগীদমক্তা লেপ্পা লৈতনা থবক ফংহন্নবগী খুদোংচাবা লৈরি।
মরুপশিং,
ইন্দস্ত্রী, লৌউ-শিংউ নত্রগা তুরিজম ওইগেরা, অফবা কন্নেক্তিবিতী অসি মখোয়গীদমক য়াম্না মরু ওই। হৌখিবা চহি ২০-২৫ অসিদা গুজরাতকী কন্নেক্তিবিতী অসি অহোংবা পুরক্লে। ঙসিসু মফম অসিদা লম্বী অমসুং রেলগা মরী লৈনবা প্রোজেক্ত কয়াগী উরেপ উয়ুং তমখ্রে অমসুং শঙ্গাখ্রে। সর্ক্যুলর রোদ হায়বদি সরদার পতেল রিং রোদ অসি হৌজিক পাকথোক চাউথোক্লে। হৌজিক্তি মসি লেন তরুক্কী লম্বী অমা ওইরক্লি। মসিনা শহরগী খ্বাইদগী মী কুংনা চৎপা মফমশিংদা ত্রাফিক জামগী প্রোব্লেম হন্থহল্লগনি। মসিগা মান্ননা, বীরামগাম-খুদাদ-রামপুরা লম্বী পাকথোকহনবনা মফম অসিগী লৌমীশিং অমসুং ইন্দস্ত্রীশিংদা খুদোংচাবশিং ফংহল্লগনি। অনৌবা অন্দরপাসশিং, রেলৱে ওভরব্রিজশিং অসিনা শহরগী কন্নেক্তিবিতী হেন্না ফগৎহল্লগনি।
মরুপশিং,
মতম অমদা, অরিবা রেদ বস খক্তমক চেল্লম্মি। রেদ বস, অদোম্না মফম অমা হেক্তদা চৎপা মতমদা রেদ বস অমদা চৎপা য়াই, অদুবু ঙসিদি বি.আর.তি.এস. জনমার্গ অমসুং এ.সি.-ইলেক্ত্রিক বসশিংনা মফম অসিদা অনৌবা খুদোংচাবশিং ফংহল্লে। মেত্রো রেলসু খোঙজেল য়াংনা পাকথোক চাউথোক্লি অমসুং মসিনা অহমেদাবাদীদা চৎথোক-চৎশিন তৌবদা লাইথোকহল্লি।
মরুপশিং,
গুজরাতকী শহর খুদিংমক্কী অকোইবদা ইন্দস্ত্রীএল কোরিদোর অমা লৈ। অদুবু চহি ১০গী মমাংদা, পোর্তশিং অমসুং অসিগুম্বা ইন্দস্ত্রীএল ক্লস্তরশিংগী মরক্তা হেন্না ফবা রেলগী কন্নেক্তিবিতী লৈরমদে। অদোম্না ঐহাকপু ২০১৪দা দিল্লীদা থারকপা মতমদা, ঐহাক্না গুজরাতকী সমস্যা অসি কোকহন্নবা থবক পায়খৎপা হৌখি। চহি ১১গী মনুংদা, গুজরাত্তা অনৌবা রেল ত্রেক কিলোমিতর লিশিং অহুম শাখ্রে। গুজরাতকী অপুনবা রেলৱে নেৎৱার্ক অসি ১০০% ইলেক্ত্রিফাইদ তৌখ্রে। ঙসিসু গুজরাতনা ফংলিবা রেলৱে প্রোজেক্তশিং অসিনা লৌমীশিং, ইন্দস্ত্রীশিং অমসুং ভক্তশিংদা কান্নবা ফংহল্লগনি।
মরুপশিং,
ঐখোয়গী সরকারনা শহরদা লৈরিবা লায়রবশিংদা ইকাই খুম্নবা পুন্সি অমা ফংহন্নবা হোৎনরি। মসিগী অচেৎপা খুদম অমা হায়রগদি ঐখোয়গী রামাপির নো তেকারো, ঐখোয়গী রামাপির মুনদ, এয়রপোর্ত্তগী লাকপা মতমদা রামাপির মুনদ অসিনি। পুজ্যা বাপুনা লায়রবশিংগী ইকাই খুম্নবদা য়াম্না মরুওইনা লৌরম্মি। ঙসি, সবরমতী আশ্রমগী চংফমদা লায়রবশিংগীদমক্তা শাবা অনৌবা য়ুমশিং অসি মসিগী অশেংবা খুদম্নি। লায়রবশিংদা কংক্রিৎকী য়ুম ১৫০০ ফংহনবা হায়বসিনা মশীং থীঙমদ্রবা অনৌবা মঙলানশিংগী য়ুম্ফম থোনবনি। নবরত্রিদা, দিৱালীদা, হায়রিবা য়ুমশিং অসিদা লৈরিবা মীওইশিংগী মায়কৈদা নুংঙাইবা অসি অমুক্কা হেন্না হেনগৎহনগনি। মসিগা লোয়ননা, পুজ্যা বাপুদা অশেংবা ইকায় খুম্নবা ওইনা, বাপুগী সবরমতী আশ্রমসু নৌনা শেমগৎলি। ঐখোয়না ঐখোয়গী অথোইবা মীওই অনি, সরদার সাহেবকী মীতমগী থবক লোইশিনখ্রে। মতম অদুদা ঐহাক্না সবরমতী আশ্রমদা থবক তৌবা পাম্লম্মি, অদুবু মতম অদুদা কেন্দ্র সরকারনা ঐহাক্কী মায়কৈদা লেপ্পীখিদে, গান্ধীজীগী মায়কৈদসু থবক তৌখিদে অমসুং মরম অদুনা ঐহাক্না থবক অদু মাংলোমদা পুখৎপা ঙমখিদে। অদুম ওইনমক, স্তেচু ওফ য়ুনিতীগুম্না, সরদার বল্লভভাই পতেলগী চাউরবা মেমোরিয়েল অসি লৈবাক অসিগী অমসুং মালেম অসিগী ইথিল পীবা মফম অমা ওইরকপগুম্না, সবরমতী আশ্রমগী নৌহৌননা শেমগৎ-শাগৎপগী থবক লোইরবা মতুংদা, ঐহাক্কী ৱাহৈশিং অসি ইদুনা থম্বীয়ু, মরুপশিং, ঐখোয়গী সবরমতী আশ্রম অসি মালেমগী ওইনা শান্তিগী খ্বাইদগী চাউবা ইথিল পীবা লমদম অমা ওইরগনি।
মরুপশিং,
ঐখোয়গী থবক শুরিবা ইমুংশিংদা হেন্না ফবা পুন্সি অমা ফংহনবা অসি ঐখোয়গী মিসন ওইরি। মরম অসিনা, চহি কয়াগী মমাংদা, ঐখোয়না গুজরাত্তা স্লমদা লৈরিবশিংগীদমক গেৎ সোসাইতীশিং শেম্নবা খোংথাং লৌখৎখি। হৌখিবা চহিশিংদা, গুজরাত্তা অসিগুম্বা প্রোজেক্ত কয়া অমা স্লমশিংদগী য়ুমশিং শেমগৎনবা লোইশিনখ্রে অমসুং মসিগী খোঙজং অসি মখা তানা চত্থরি।
মরুপশিং,
মোদীনা কনাগুম্বা অমত্তনা থওইবীদ্রবা মীওই অদুবু ইকায় খুম্নবা উৎলি। হন্দক্তি ঐহাক্না লাল কিল্লাদগী হায়জখি মদুদি শোত্থরবা কাংলুপশিংবু মরুওইবা পীরি। শহরগী লায়রবশিংগী পুন্সি লায়থোকহনবা অসি ঐখোয়গী মরুওইবা অমনি। মমাংদা, লম্বীদা থবক তৌরিবা মীওইশিংগী মরমদা কনানসু হংখিদে। ঐখোয়গী সরকারনা মখোয়গীদমক্তা পি.এম. স্বানিধি য়োজনা হৌদোকখি। ঙসিদি, স্কিম অসিনা মরম ওইদুনা, লম্বীদা পোৎ য়োনবা মীওই লাখ তরেৎ অমসুং থেল্লা ইনবা মীওইশিংনা বেঙ্কশিংদগী লোন ফংলি, পুম্নমক ওইথোকপা ঙম্লে, গুজরাতকী মীওই লাখ কয়ানা মসিগী কান্নবা ফংলে।
মরুপশিং,
হৌখিবা চহি ১১ অসিদা, মীওই করোর ২৫ লায়রবা মায়থিবা পীবা ঙমখ্রে অমসুং লায়রবা কোকহনখ্রে। অসিগুম্বা অচৌবা মশিং অসি মালেমগী ওইনা অঙকপা অমনি। মীওই করোর ২৫না লায়রবদগী থোরকপা ঙমখ্রে। মালেমগী ইকোনোমিস্ত পুম্নমক্না মসি ঙসি খন্নরি।
মরুপশিং,
লায়রবা মীওইশিং অসি লায়রবদগী কোক্লকপা মতমদা, মখোয় অসি নিও মিদ্দল ক্লাসকী মওংদা অনৌবা পাঙ্গল অমা ওইরকই। ঙসিদি, নিও মিদ্দল ক্লাস অমসুং ঐখোয়গী অরিবা মিদ্দল ক্লাস অনিমক অসি লৈবাক অসিগী য়াম্না চাউরবা ফোর্স অমা ওইরক্লি। নিও মিদ্দল ক্লাস অমসুং মিদ্দল ক্লাস অনিমকপু মপাঙ্গল কনখৎহন্নবা ঐখোয়না লেপ্পা লৈতনা হোৎনরি। অহমদাবাদকী ঐখোয়গী ইচিল-ইনাওশিংগীদমক্তা নুংঙাইবা পাউ অমা লৈরি, বজেত্তা লুপা লাখ ১২গী ইনকমদা ইনকম তেক্স লৌথোকখিবা নুমিত্তা, ওপোজিসন্না মসি করম্না ওইরকখিবনো হায়বদু লৌশিনবা ঙমখিদে।
মরুপশিং,
ঐখোয়গী সরকারনা জি.এস.তি.দসু রিফোর্ম তৌরি। দিৱালীগী মমাংদা অদোমগীদমক অচৌবা খুদোংচাবা অমা শেম শারে। জি.এস.তি.গী রিফোর্মগী মতুং ইন্না ঐখোয়গী অপীকপা ওন্তপ্রিন্যুওরশিংনা মতেং ফংলগনি অমসুং পোৎলম কয়াগী তেক্স হন্থরগনি। হায়রিবা মতম অসিদা দিৱালীদা, বিজিনেস ক্লাস ওইগেরা নত্রগা ঐখোয়গী ইমুং মনুংগী মীহুৎ ওইগেরা, মীপুম খুদিংমক্না নুংঙাইবা অনি থোক্না ফংলগনি।
মরুপশিং,
হৌজিক ঐহাক্না পি.এম. সুর্য় ঘরগী মতাংদা ঙাংখি। হৌজিক পি.এম. সুর্য় ঘর মুফ বিজলী য়োজনাগী খুত্থাংদা ঐখোয়না ইলেক্ত্রিসিতী বিল অসি জিরো ওইহল্লে। হৌজিক ফাওবদা গুজরাতকী ইমুং লাখ তরুক্না স্কিম অসিদা য়াওখ্রে। গুজরাত খক্তদা লৈঙাক্না ইমুংশিং অসিদা লুপা করোর লিশিং অহুম হেন্না পীখ্রে। মসিনা মরম ওইদুনা, মখোয়না হৌজিক থা খুদিংগী ইলেক্ত্রিসিতী বিলদা অচৌবা সেভিং অমা ফংলি।
মরুপশিং,
ঙসি, অহমদাবাদ শহর অসি মঙলান অমসুং ৱারেপশিংগী শহর অমা ওইরক্লি। অদুবু মতম অমদা অহমদাবাদপু গর্দাবাদ হায়না কৌদুনা মীশিংনা নোক্নরমখি। মফম পুম্নমক্তা উফুল, ৱাইফুল অমসুং অমোৎপা মপৈ-মপৈ লৈরমখি, মসি শহর অসিগী লাইবক থীবা ওইরকখি। ঙসি অহমদাবাদনা লৈবাক অসিদা লুনানবগী লমদা মমিং লৈরক্লিবা অসিদা ঐহাক নুংঙাইবা ফাওই। মসি অহমদাবাদী খুদিংমক্না মতেং পাংবদগী ওইথোকপা ঙমখি।
অদুবু মরুপশিং,
হায়রিবা ক্লিননেস দ্রাইব অসি নুমিৎ অমখক্তগী থবক নত্তে, মসি নুমিৎ খুদিংগী, চারোন-শুরোনগী মতুং ইন্না পাংথোক্কদবা থবক অমনি। লুনানবা হায়বসি নহাক্কী হৈনবী ওইহল্লু, মদু খক্তনা নহাক্না পাম্লিবা মহৈ অদু ফংবা ঙমগনি।
মরুপশিং,
ঐখোয়গী সবরমতী তুরেল অসি করম্বা ফীভমদা লৈরমখিবগে? মসি অকংবা ঈচেল অমা ওইরম্মি, সর্কসশিং মসিদা পাংথোক্লম্মি, অঙাংশিংনা ক্রিকেৎ শান্নরম্মি। অহমদাবাদকী মীয়াম্না ফীভম অসি হোংদোক্নবা ৱাশক লৌখি। হৌজিক মফম অসিদা লৈবা সবরমতী তুরেলনা শহর অসিগী চাউথোকচবা হেনগৎহল্লে।
মরুপশিং,
কানকারিয়া পাৎকী ঈশিং অসি অমোৎ-অকাইনা মরম ওইদুনা মচু অসি শংলমখি অমসুং নমথিবা মনম চেলমখি। মসিদা চত্থোক চৎশিন তৌবদসু অৱাবা ওইরম্মি অমসুং মসি এন্তি-সোসিএল ইলিমেন্তশিংগী খ্বাইদগী পাম্নবা মফম অমা ওইরম্মি, মফম অসিদগী কনা অমত্তনা থোরকপা ঙমদে। ঙসিদি মসি চৎনবা খ্বাইদগী ফবা মফম অমা ওইরে। পাৎ অসিদা বোতিং তৌবা ওইরো নত্রগা কিদস সিতীদা অঙাংশিংগীদমক্তা নুংঙাইবা অমসুং লৌশিং তানশিন্নবগী থৌরম অমা ওইরো, মসি পুম্নমক্না অহমদাবাদকী অহোংবা মওং উৎলি। কানকারিয়া কার্নিভাল অসি অহমদাবাদকী অচৌবা খুদোল অমা ওইরে, মসিনা অহমদাবাদতা অনৌবা মশক অমা পীরে।
মরুপশিং,
ঙসি অহমদাবাদ অসি তুরিজমগী য়াম্না পাম্নবা মফম অমা ওইরক্লি। অহমদাবাদ অসি য়ুনেস্কোগী ৱার্ল্দ হেরিতেজ সিতি অমনি। অরিবা গেৎশিং, সবরমতী আশ্রম নৎত্রগা মফম অসিগী হেরিতেজশিং ওইরো, ঙসি ঐখোয়গী শহর অসি মালেমগী মেপতা মঙাল লৈরে। হৌজিক্তি অনৌবা অমসুং মোদর্ন ওইবা তুরিজমগী পাম্বৈশিংসু মফম অসিদা য়াম্না থুনা চাউখৎলক্লি অমসুং ঐখোয়না তুরিজমগী মতাংদা ৱারী শানবদা, গুজরাতকী দাসাদা ওফিসতা মসিগী মমিং অসি পনখিদে। তুরিজমগী মতাংদদি, গুজরাতকী মীয়াম্না হায়নৈ মদুদি, ঐখোয় আবুদা চৎকনি। অমসুং খা গুজরাতকী মীয়াম্না দিউ দামান্দা চৎকনি। ঐখোয়গী কোইফম অসি মসিগী অরোইবা অনি অসিদা লৈ। অমসুং ধর্মগী ওইবা মরমশিংগীদমক চৎপা মীওইশিংনা সোমনাথ নৎত্রগা দ্বারকা নৎত্রগা অম্বাজীদা চৎনরম্মি। মসি মফম মরি নৎত্রগা মঙা খক্তনি। ঙসি গুজরাত অসি তুরিজমগী মরু ওইবা মফম অমা ওইরক্লি। মালেম অসিনা কুচ্ছকী রনদা ৱাইত রন উবদা অঙকপা ফাওই। মীয়াম্না স্তেচু ওফ য়ুনিতী উবা পাম্মি, মীয়াম্না বেৎ দ্বারকাগী থোং য়েংনবা লাকই, মখোয়না কারদগী কুমথদুনা খোংনা চৎলি। মরুপশিং, করিগুম্বা অদোম্না ৱারেপ লৌখ্রবদি, ফল অদু শোইদনা ফংগনি। ঙসি অহমদাবাদ অসি কন্সর্ত ইকোনোমীগী অচৌবা মফম অমা ওইরক্লি। থা খরগী মমাংদা মফম অসিদা পাংথোকখিবা কোল্দপ্লেগী কন্সর্ত অসি মালেম শীনবা থুংনা ঙাংনরি। মী লাখ অমা য়েংনবা কেপাসিতী লৈবা অহমদাবাদকী স্তেদিয়ম অসি মীপুম খুদিংমক্কী পুক্নিং চিংশিনবগী মফম অমা ওইরি। মসিনা উৎলি মদুদি অহমদাবাদনা অচৌবা কন্সর্তশিং পাংথোকপা ঙম্মি অমসুং অচৌবা শান্ন-খোৎনবগী থৌরমশিং পাংথোক্নবা শেম-শারি।
মরুপশিং,
হৌরকপদা ঐহাক্না অদোমদা কুহ্মৈশিংগী মতাংদা পনখি। হৌজিক কুহ্মৈগী মতমনি। হৌজিক নবরত্রি, বিজয়া দশমী, ধনতেরস, দীপাৱলি, হায়রিবা কুমহৈ পুম্নমক লাক্কদৌরি। মসি ঐখোয়গী চৎনবীগী কুমহৈশিং খক্তা নত্তে, মসি মশা-মরোমদোম লেপচবগী কুমহৈসু ওইগদবনি অমসুং মরম অসিনা ঐহাক্না অমুক হন্না অদোমদা হায়জরি অমসুং ঙসি পুজিয়া বাপুগী লমদম অসিদগী লৈবাক মীয়ামদা ঐহাক্না হায়জরি, ঐখোয়না ঐখোয়গী পুন্সিদা মন্ত্র অমা শেমগদবনি, ঐখোয়না করিগুম্বা খল্লবসু, মদু মেদ ইন ইন্দিয়া ওইগনি, স্বদেশী ওইগনি। য়ুমগী লৈতেংগীদমক করিগুম্বা লৈরবসু, মদু মেদ ইন ইন্দিয়া ওইগদবনি। করিগুম্বা নহাক্না মরূপশিংদা করিগুম্বা খুদোংচাবা অমা পীবা পাম্লবদি, খুদোংচাবা অদু ভারত্তা শাবা, ভারতকী মীয়াম্না শাবা ওইগদবনি। অমসুং ঐহাক্না মরু ওইনা দুকান ফম্লিবা ইচিল-ইনাওশিংদা হায়জনীংবদি, লৈবাক অসিবু মাংলোমদা পুখৎপদা অদোম্না অচৌবা থৌদাং লৌবিয়ু। অদোম্না মপানগী পোৎলমশিং য়োল্লোই হায়না ৱারেপ লৌরসি, অমসুং ঐহাক্না স্বদেশী ওইবা পোৎলমশিং খক্তমক ঐগী মফমদা য়োল্লি হায়না চাউথোক্না বোর্দ থেৎপীয়ু। ঐখোয়গী অপীকপা হোৎনবশিং অসিগা লোইননা, হায়রিবা কুমহৈশিং অসি ভারতকী চাউখৎপগী কুমহৈশিং ওইরগনি।
মরুপশিং,
হৌরকপদা য়াম্না তোইনা, মীয়াম্না হেন্না নুংঙাইতবা উবা ফংই, অসুম্না ঐহাক্না নীংশিংলি, ঐহাক্না অহানবা ওইনা রিভর ফ্রন্তকী মতাংদা ফোঙদোকপা মতমদা, মীপুম খুদিংমক্না মসি ফাগী অমনি হায়না খল্লম্মি। রিভর ফ্রন্ত অসি শাখ্রবরা নৎত্রগা শাদ্রিবরা? মসি শাখ্রবরা নৎত্রগা শাদ্রিবরা? ঐহাক্না স্তেচু ওফ য়ুনিতীগী প্রেস কনফরেন্স অমা পাংথোকখি। মীপুম খুদিংমক্না ঐহাক্কী মফমদা শাওনিংবা উৎখি। মীপুম খুদিংমক্না হায়খি মদুদি মীখল লাক্কদৌরি, মরম অদুনা মোদী সাহেবনা মসি পুরক্লি। স্তেচু ওফ য়ুনিতী অসি শাখ্রবরা নৎত্রগা শাখিদ্রবরা? মালেমনা মসি উরবা মতুংদা অঙকপা পোকখিবরা? কচ্ছকী রনউসব, মীয়াম্না হায়নরম্মি মদুদি সর কচ্ছতা কনানা চৎকনি? কনাগুম্বা অমনা রন্দা চৎকদ্রা? ঙসিদি ক্যু লৈরে। মীয়াম্না থা ৬-৬গী মমাংদা বুক তৌই। মসি থোক্তবরা নৎত্রগা থোকপরা? গুজরাত্তা এয়রক্রাফ্ট ফেক্তরী অমা লিংখৎলি, কনাগুম্বা অমনা মসি খল্লমগদ্রা? ঐহাক্না মতম অমদা গিফ্ট সিতীগী মতাংদা খল্লম্বদু ঐহাক্না নীংশিংলি। মতম অদুদা মীপুম খুদিংমক্না মসিবু ইকায় খুম্নখি। মসি পুম্নমক অসি মতৌ করম্না ওইগনি, অসিগুম্বা বিলদিং অমদা মসি পুম্নমক অসি মতৌ করম্না ওইগনি? মসি করম্না মফম অসিদা থোক্কনি? ঙসিদি গিফ্ট সিতীনা লৈবাক অসিগী খ্বাইদগী চাউবা শক্নাইবগী ৱারী ইরি। অমসুং ঐহাক্না অদোম পুম্নমকপু ৱাফমশিং অসি নিংশিংহল্লি মরমদি অদোম্না লৈবাক অসিগী মপাঙ্গল অদু কুপ্না য়েংগদবনি, অদোম্না মদুবু ইকাই খুম্নবা উৎলবদি লৈবাক মীয়াম্না অদোমগী ৱারেপ অদু মাংহল্লোই। লৈবাক মীয়াম্না মখোয়গী ঈ অমসুং থৌনা কৎকনি, তেরোরিস্ত এতেক কয়া থোকখ্রে, মখোয়না য়েক্নবশিংদা করিসু তৌবা ঙমলোই হায়না থাজৈ। সর্জিকেল স্ত্রাইকশিং পাংথোকখি, মখোয়গী লোঞ্চিং পেদশিংবু থুগাইখি। এয়র স্ত্রাইকশিং পাঙথোকখি, মখোয়গী ত্রেনিং সেন্তরশিং থুগাইখি। ওপরেসন সিন্দুর পাংথোকখ্রে, ঐখোয়না মখোয়গী নেভেলশিংদা লান্দাখি। চন্দ্রয়ান, শিৱ শক্তি পোইন্ত, কনাগুম্বা অমত্তা চঙখিদ্রিবা মফম অদুদা ভারতকী মচু অহুমগী ফিরাল য়ৌখি। শুভাংশু শুক্লানা ইন্তর্নেস্নেল স্পেস সেন্তরদা চৎখি। অমসুং হৌজিক গগনযানগী শেম-শাবা পাইহনখি। ঐখোয়গী স্পেস স্তেসন শেমগৎনবা থবক পায়খৎলি। মরূপশিং, থৌদোক খুদিংমক্না তাক্লি মদুদি করিগুম্বা ঐখোয়না ৱারেপ অমা লৌরবদি, ৱারেপ অদুদা থাজবা লৈগদবনি, থৌনা লৈগদবনি, ঐখোয়না ঈশ্বরগী মওং ওইরিবা মীয়ামগী য়াইফ-পাউজেল ফংলি, ঐখোয়না মখোয়গী মতেংসু ফংই। অমসুং মসিগী থাজবা অসিগা লোইননা, ঐহাক্না হায়জরি, লৈবাক অসিনা মশানা মরোমদোম লেপচবা ঙমগনি। লৈবাক অসিগী মীপুম খুদিংমক ভোকেল ফোর লোকেলগী খোলাউ লাওগনি। লৈবাক অসিগী মীপুম খুদিংমক্না স্বদেশীগী মন্ত্র অসিগা লোয়ননা হিংগনি অমসুং তুংলমচৎতা ঐখোয়না কনাগুম্বা অমদা মখা পোনবগী খুদোংচাবা পীরোই।
মরুপশিং,
কোবিদকী ফীভম অমা লৈরিঙৈদা, মফম অমদা ভেক্সিন অমা পুথোকপা মতমদা, ঐখোয়গী লৈবাক অসিদা য়ৌরকপদা চহি ৪০ চঙই, কোবিদকী মতমদা করি ওইরক্কনি হায়বগী মতাংদা মীয়াম্না হায়নরম্মি, লৈবাক অসিনা মশাগী ভেক্সিন অমা শেমদুনা অমসুং লৈবাক অসিগী মীওই করোর ১৪০দা ভেক্সিন অসি ফংহনখি। লৈবাক অসিনা তৌবা ঙম্বগী মতিক লৈরি, মসিগী মতিক অদুদা থাজবা লৈবগা লোয়ননা, ঐহাক্না গুজরাতকী ঐহাক্কী মরূপশিংদা হায়জরি মদুদি অদোম্না ঐঙোন্দা পীখিবা এজুকেসন, অদোম্না ঐঙোন্দা তাকপীরম্বা পাউতাকশিং, অদোম্না ঐঙোন্দা পীরম্বা থৌনা, অদোম্না ঐঙোন্দা পীরম্বা ইনর্জী অসিনা ২০৪৭তা লৈবাক অসিনা নীংখা তম্বগী চহি ১০০ মপুং ফারকপা মতমদা, লৈবাক অসিনা চাউখৎলবা ভারত অমা ওইগনি।
অদুনা মরুপশিং,
চাউখৎলবা ভারত অমা ওইহন্নবগী মরুওইবা লম্বীদি স্বদেশীনি, মরুওইবা লম্বীদি আত্মনির্ভর ভারতনি অমসুং পোৎথোক পুথোক্লিবা, পোৎ-চৈ পুথোক্লিবা মীওইশিংদা ঐহাক্না হায়জরি মদুদি তপ্না-তপ্না মখোয়গী মগুন হেনগৎহনবা, মখোয়গী মমল হন্থহনবা মতমদা, ভারতকী মীওই অমনা মপান্দগী করিগুম্বা অমত্তা লৈরোই। ঐখোয়না ৱাখল্লোন অসি পুক্নিং থৌগৎকদবনি অমসুং মালেমগী মমাংদা মসিগী খুদম অসি থমগদবনি অমসুং মালেম অসিদা লৈবাক কয়া অমা লৈরি, মরূপশিং, খুদোংচাদবা লাকপদা মখোয়না মখোয়গী খোংফম চেৎনা লেপ্পি অমসুং মখোয়না মহৈ ফংবা ঙমহল্লি। ঐখোয়গীদমক্তা খুদোংচাবা অমা লাক্লে, ঐখোয়না ঐখোয়গী ৱারেপ অদু মপুং ফাহন্নবা চপচানা থাজবা থম্বা মথৌ তাই। গুজরাতনা ঐঙোন্দা মতম পুম্নমক্তা মতেং পাংবগুম্না লৈবাক অসিনসু ঐঙোন্দা মতেং পাংগনি অমসুং লৈবাক অসি চাউখৎলবা ভারত অমা ওইগনি হায়না ঐহাক্না থাজবা থম্লি। চাউখৎ-থৌরাংগী মমল য়াম্লবা খুদোলশিং অসিগীদমক ঐহাক্না অদোম পুম্নমকপু য়াইফ-পাউজেল পীজরি! গুজরাতনা য়াম্না চাউখৎকদবনি, অনৌবা অৱাংবা থাক্তা য়ৌগদবনি, গুজরাতকী শক্তি লৈ, মসি মশক থোক্না উৎকদবনি। ঐহাক অদোম পুম্নমকপু থাগৎচরি! ঐহাক্কা লোইননা মপুং ফানা হায়বিয়ু, ভারত মাতা কী জয়! ভারত মাতা কী জয়! ভারত মাতা কী জয়!
খুরুমজরি!
