বনক্কম! তামিল নাদুগী রাজ্যপাল আর. এন. রবি জী, ঐহাক্কী মন্ত্রীমন্দলগী মরুপশিং, কিঞ্জরাপু রামমোহন নাইদুজী, দোক্তর এল. মুরুগান জী, তামিল নাদুগী মন্ত্রীশিং তঙ্গম তেন্নরসু জী, দাক্তর. তি.আর.বি. রাজা জী, পি. গীতা জিবন জী, অনীতা আর. রাধাকৃষ্ণন জী, এম.পি. কনিমোথী জী, তামিল নাদুগী ভারতীয় জনতা পার্তীগী প্রসিদেন্ত অমসুং ঐখোয়গী এম.এল.এ. নয়নার নাগেন্দ্রন জী, অমসুং তামিল নাদুগী ঐহাক্কী ইচিল-ইনাওশিং!
ঙসি অসি কারগিল বিজয় দিবসনি। ঐহাক্না অহানবদা কারগিলগী থৌনা ফারবশিংদা ইকায় খুম্নবা উৎচরি।
মরুপশিং,
নুমিৎ মরিনি মপান্দা লৈরুরবা মতুংদা ভগৱান রামেশ্বরগী মফম অসিদা লাকপগী খুদোংচাবা ফংজবা অসি ঐহাক্কী নুংঙাইবা অমনি। ঐহাক মপান লমদা লৈরিঙৈ মনুংদা, ভারত অমসুং ইংলেন্দগী মরক্তা পুৱারী ওইরবা ফ্রী ত্রেদ এগ্রীমেন্ত অমা খুৎয়েক পীনখি। মসি মালেমনা ভারতকীদমক থাজবা হেনগৎলক্লিবা অমসুং ভারতকী অনৌবা মশা-মরোমদোম থাজবগী খুদম অমনি। অসিগুম্বা মশাগী থাজবগা লোয়ননা, ঐখোয়না চাউখৎলবা ভারত অমা, চাউখৎলবা তামিল নাদু অমা শেমগৎলগনি। ঙসিসু, ভগৱান রামেশ্বর অমসুং ভগৱান তিরুচেন্দুর মুরুগানগী য়াইফ-মঙ্গোলগা লোয়ননা, তুতিকোরিনদা চাউখৎপগী অনৌবা পন্দুপ অমা ইরি। তামিল নাদুবু চাউখৎপগী অৱাংবা থাক্তা পুখৎনবা 2014দা হৌখিবা মিসন অদু তুতিকোরিন্না লেপ্পা লৈতনা উবা ফংলি।
মরুপশিং,
হৌখিবা চহিগী ফেব্রুৱারীদা, ঐহাক্না মফম অসিদা ভি.ও. চিদনবরানর পোর্তকীদমক আউতর হার্বর কন্তেনর তর্মিনেলগী উরেপ-উয়ুং তমখি। মতম অদুদা লুপা করোর চাম্মরোমগী প্রোজেক্তশিংসু শঙ্গাখি। সেপ্তেম্বর থাদা, ঐহাক্না অনৌবা তুতুকুদি ইন্তর্নেস্নেল কন্তেনর তর্মিনেল শঙ্গাখি। ঙসিসু মফম অসিদা লুপা করোর 4800গী প্রোজেক্তশিং শঙ্গাখ্রে অমসুং উরেপ উয়ুংসু তমখ্রে। মসিগী মনুংদা এয়রপোর্তশিং, হাইৱেজশিং, পোর্তশিং অমসুং রেলৱেজশিংগী প্রোজেক্তশিং, অমসুং পাৱর সেক্তরগা মরী লৈনবা মরুওইবা ইনিসিয়েতিবশিং য়াওরি। মসিগীদমক্তা ঐনা অদোম পুম্নমকপু, তামিল নাদুগী মীয়াম্বু থাগৎচরি।
মরুপশিং,
ইনফ্রাস্ত্রকচর অমসুং ইনর্জী অসি রাজ্য অমহেক্তগী চাউখৎপগীদমক য়াংলেন শরূ ওই। চহি 11 অসিদা ইনফ্রাস্ত্রকচর অমসুং ইনর্জীদা ঐখোয়না মীৎয়েং চংবা অসিনা তামিল নাদুগী চাউখৎ থৌরাং অসি ঐখোয়গীদমক কয়া য়াম্না মরুওইবগে হায়বদু উৎলি। ঙসিগী প্রোজেক্ত পুম্নমক্না তুতিকোরিন অমসুং তামিল নাদুবু কন্নেক্তিবিতী, ক্লিন ইনর্জী অমসুং অনৌবা খুদোংচাবশিংগী হব অমা ওইহল্লগনি।
মরুপশিং,
তামিল নাদু অমসুং তুতিকোরিনগী লম অমসুং মসিগী মীয়ামনা চহি চা কয়াদগী চাউখৎপা অমসুং মপাঙ্গল লৈবা ভারত অমা ওইহনবদা মতেং পাংদুনা লাক্লি। ভি.ও. চিদমবরম পিল্লাই গুম্বা ভিজনরীশিং অসি লমদম অসিদা পোকখি। মহাক্না মপান লমগী ললোন-ইতিক্কী শক্তি অসি সমুদ্রগী খুত্থাংদা ওই হায়বা অসি মীখা পোল্লিঙৈ মতমদা খঙলম্মি। মহাক্না সমুদ্রদা লমদমসিগী জহাজশিং লমজিংদুনা ব্রিতিশশিংবু শিংনখি। লমদম অসিদা, বীর-পন্দিয়া কত্ত বোম্মান অমসুং অলাগু-মুতু কোনগুম্বা শক্নাইরবা মীওইশিংনা নীংতম্বা অমসুং মপাঙ্গল কনবা ভারত অমগী মঙলান শাগৎখি। সুব্রামনিয়ম ভারতীগুম্বা জাতিগী থাক্কী কবি অমসু মফম অসিদা পোকখি। সুব্রামনিয়ম ভারতীজীনা তুতিকোরিনগা য়াম্না নক্নবা মরী লৈনরম্মি অমসুং মহাক্কী পার্লিয়ামেন্তরী কন্সতিত্যুএন্সী কাশীগাসু নক্নবা মরী লৈনরম্মি হায়বসি অদোম্না খংই। কাশী-তামিল সঙ্গমমগুম্বা থৌরমশিংগী খুত্থাংদা ঐখোয়না ঐখোয়গী কলচরেল হেরিতেজ অসিবু লেপ্পা লৈতনা মপাঙ্গল কনখৎহল্লি।
মরুপশিং,
ঐহাক্না নীংশিংলি, মমাং চহিদা বিল গেৎসতা তুতুকুদিগী মমিং চৎলবা মোতিশিং ঐহাক্না খুদোল ওইনা পীখি। মহাক্না মোতিশিং অদু য়াম্না পামখি। মফমসিদগী পান্দ্যা পর্লশিং অসি মালেম পুম্বদা ভারতকী শেন্মিৎলোনগী শক্তিগী খুদম অমা ওইরম্মি।
মরুপশিং,
ঙসিদি, ঐখোয়না চাউখৎলবা তামিল নাদু অমসুং চাউখৎলবা ভারতকী মঙলান অসি ঐখোয়গী হোৎনবশিংগী খুত্থাংদা মাংলোমদা চংশিল্লি। বৃতিশ অমসুং ভারতকী মরক্তা ফ্রী ত্রেদ এগ্রীমেন্ত অমা খুৎয়েক পীনখ্রে। FTAনসু মীৎয়েং অসি মপাঙ্গল কনখৎহল্লি। ঙসিদি, মালেম অসিনা ভারতকী চাউখৎপগী মওং অসিদা মশানা চাউখৎপা উবা ফংলি। মসিগী এগ্রীমেন্ত অসিনা ভারতকী শেন্মিৎলোনদা অনৌবা পাঙ্গলসু পীরগনি। মসিনা ঐখোয়গী মালেমগী খ্বাইদগী চাউবা ইকনোমীগী অহুমশুবা মফমদা য়ৌরকপগী খোঙজেল অসি হেন্না য়াংশিলহল্লগনি।
মরুপশিং,
মসিগী FTA এগ্রীমেন্ত অসিগী মতুংদা, ব্রিতেন্দা য়োনবা ভারতকী পোৎথোকশিংগী 99%দা তেক্স অমত্তা লৌরোই। ভারতকী পোত্থোকশিং অসি ব্রিতেন্দা মমল হন্থরক্লবদি, মফম অদুদা দিমান্দ হেনগৎলগনি অমসুং হায়রিবা পোত্থোকশিং অসি ভারত্তা পুথোকপগী খুদোংচাবসু হেনগৎলগনি।
মরুপশিং,
তামিল নাদুগী নহারোল, ঐখোয়গী অপীকপা ইন্দস্ত্রীশিং, MSMEশিং অমসুং স্তার্ত-অপশিংনা ভারত-য়ু.কে. FTAদগী খ্বাইদগী কান্নবা ফংল্লগনি। ইন্দস্ত্রী ওইগেরা, ঐখোয়গী ঙামীগী মচা-মশু ওইগেরা নৎত্রগা রিসর্চ অমসুং ইন্নোবেসন ওইগেরা, মসি মীপুম খুদিংমক্তা চপ মান্ননা কান্নৈ।
মরুপশিং,
ঙসি ভারত সরকারনা মেক ইন ইন্দিয়া অমসুং মিসন মেনুফেকচরিংদা অহেনবা মীৎয়েং থম্লি। অদোম পুম্নমক্না ওপরেসন সিন্দুরগী মতমদা মেক ইন ইন্দিয়াগী শক্তি অদু উবা ফংলে। ভারত্তা শাবা খুৎলাইশিংনা তেরোরিস্তশিংগী মফমশিংবু থুগাইবদা অচৌবা থৌদাং অমা লৌখি। ভারত্তা শাবা খুৎলাইশিংনা হৌজিক ফাওবা তেররগী মাস্তরশিংদা অহিং কয়া তুম্বা য়াহন্দ্রি।
মরুপশিং,
তামিল নাদুগী ওইথোকপা য়াবশিং মপুং ফানা শীজিন্ননবা, ভারত সরকারনা তামিল নাদুগী ইনফ্রাস্ত্রকচর মোদর্নাইজ তৌনবা হোৎনরি। তামিল নাদুদা, ঐখোয়না পোর্ত ইনফ্রাস্ত্রকচর হাই-তেক ওইহল্লে। মসিগা লোয়ননা ঐখোয়না এয়রপোর্তশিং, হায়ৱেশিং অমসুং রেলৱেজশিংসু ইন্তিগ্রেৎ তৌনবা হোৎনরি। ঙসি, তুতিকোরিন এয়রপোর্তকী অনৌবা এদভান্স তর্মিনেল শঙ্গাবা অসি মসিগী মাইকৈ অসিদা অতোপ্পা অচৌবা খোংথাং অমনি। লুপা করোর 450গী শেনফম্না শাবা তর্মিনেল অসিনা হৌজিক চহি খুদিংগী পেসেঞ্জর লাখ 20 হেন্না হোস্ত তৌগনি। মমাংদা, চহিগী ওইবা পেসেঞ্জর কেপাসিতী অসি লাখ 3 খক্তমক ওইরম্মি।
মরুপশিং,
অনৌবা তর্মিনেল অসিগী মতুংদা, লৈবাক অসিগী অতোপ্পা লম্বী কয়াগা তুতিকোরিনগা শম্নবা হেনগৎলগনি। কোর্পোরেত ত্রেভেল, এজুকেসন হবশিং, তামিল নাদুদা হেল্থ ইনফ্রাস্ত্রকচর অসিদগী হেন্না কান্নবা ফংগনি। মসিগা লোয়ননা, লমদম অসিগী তুরিজমগী ওইথোকপা য়াবা অসিসু অনৌবা ইনর্জী ফংলগনি।
মরুপশিং,
ঙসি ঐখোয়না তামিল নাদুগী অচৌবা লম্বীগী প্রোজেক্ত অনি মীয়ামদা কত্থোক্লে। চাউরাক্না লুপা করোর 2500 চংনা শাবা লম্বীশিং অসিনা চাউখৎ-থৌরাংগী মরু ওইবা মফম অনিবু চেন্নাইগা শম্নহল্লগনি। লম্বীশিং অসিনা মরম ওইদুনা, চেন্নাইগী কন্নেক্তিবিতী অসি দেলতা দিস্ত্রিক্তশিংগা লোয়ননা হেন্না ফগৎলে।
মরুপশিং,
প্রোজেক্তশিং অসিগী মতেংদগী তুতিকোরিন পোর্তকী কন্নেক্তিবিতীসু য়াম্না ফগৎলে। লম্বীশিং অসিনা লমদম পুম্বগী হিংবদা লাইবা হেনগৎহল্লগনি অমসুং ললোন-ইতিক অমসুং থবক ফংহন্নবা অনৌবা লম্বীশিং হাংদোক্লগনি।
মরুপশিং,
ঐখোয়গী সরকারনা লৈবাক অসিগী রেলৱেজ অসি ইন্দস্ত্রীগী চাউখৎপা অমসুং মশা-মরোমদোম লেপচবা ভারতকী লাইফলাইননি হায়না লৌই। মসিনা মরম ওইদুনা, হৌখিবা চহি তরামাথোই অসিদা, লৈবাক অসিগী রেলৱে ইনফ্রাস্ত্রকচর অসি মোদর্নাইজেসনগী অনৌবা ফেজ অমা উবা ফংলে। তামিল নাদু অসি রেলৱে ইনফ্রাস্ত্রকচর মোদর্নাইজ তৌবা কেম্পেনগী মরু ওইবা মফম অমনি। ঐখোয়গী সরকারনা অমৃত ভারত স্তেসন স্কিমগী মখাদা তামিল নাদুদা স্তেসন 77 অমুক হন্না শেমগৎলি। তামিল নাদুগী মীয়াম্না অনৌবা ভন্দে ভারত ত্রেনগী খুত্থাংদা অনৌবা এক্সপরিয়েন্স অমা ফংলি। লৈবাক অসিগী অহানবা অমসুং অমত্তা ঙাইরবা ভর্তিকল লিফ্ত রেলগী থোং, পাম্বন ব্রিজসু তামিল নাদুদা শাখ্রে। পাম্বন ব্রিজ অসিনা ইজ ওফ দুইং বিজিনেস অমসুং ইজ ওফ ত্রেভেল অনিমক হেনগৎহল্লে।
মরুপশিং,
ঙসি লৈবাক অসিদা অচৌবা অমসুং মোদর্ন ইনফ্রাস্ত্রকচর শেমগৎনবা অচৌবা কেম্পেন অমা চত্থরি। নুমিৎ খরনিগী মমাংদা শঙ্গাখিবা জম্মু অমসুং কাশ্মীরগী চেনাব ব্রিজ অসি ইঞ্জিনীয়রিংগী অঙকপা অমনি। মসিগী থোং অসিনা জম্মুগা শ্রীনগরগা রেলৱেগী খুত্থাংদা অহানবা ওইনা শম্নহল্লে। মসিগী মথক্তা, লৈবাক অসিগী খ্বাইদগী শাংবা সমুদ্রগী থোং অতল সেতু শেমখ্রে, অসামদা বোগিবেল থোং শেমখ্রে, কিলোমীতর 6 হেন্না শাংবা সোনামর্গ তনেল শেমখ্রে, ভারত সরকার, NDA সরকারনা অসিগুম্বা প্রোজেক্ত কয়া অমা লোইশিনখ্রে। হায়রিবা পুম্নমক অসিনা থবক লিশিং কয়া ফংহল্লে।
মরুপশিং,
ঙসিসু, তামিল নাদুদা ঐখোয়না কত্থোকখিবা রেলৱে প্রোজেক্তশিং অসিনা খা তামিল নাদুগী মীওই লাখ কয়াদা কান্নবা ফংহল্লগনি। মদুরাইদগী বোদী-নয়াকানুর ফাওবগী লাইন অসি ইলেক্ত্রিফিকেসন তৌরবা মতুংদা, মফম অসিদা ভন্দে ভারতকী মওংদা ত্রেন চৎথোক-চৎশিন তৌনবগী লম্বী হাংদোক্লে। রেলৱে প্রোজেক্তশিং অসিনা তামিল নাদুগী চাউখৎ-থৌরাংগী খোঙজেল অমসুং স্কেল অনিমক্তা অনৌবা শক্তি পীরগনি।
মরুপশিং,
ঙসি, মফম অসিদা মেগাৱাৎ 2000গী কুদানকুলম ন্যুক্লিয়র পাৱর প্রোজেক্তকা মরী লৈনবা ত্রান্সমিসন প্রোজেক্তকী উরেপ উয়ুংসু তমখ্রে। চাউরাক্না লুপা করোর 550 চংনা শাবা সিস্তেম অসিনা লাক্কদৌরিবা চহিশিংদা লৈবাক অসিদা ক্লিন ইনর্জী ফংহনবদা অচৌবা থৌদাং অমা লৌগনি। ইনর্জী প্রোজেক্ত অসিনা ভারতকী মালেমগী ইনর্জীগী পান্দমশিং অমসুং অকোইবগী ফিভমগীদমক লৌরিবা থৌদাংশিং অসি মপুং ফাহনবা পাম্বৈ অমা ওইরগনি। ইলেক্ত্রিসিতী পুথোকপা হেনগৎলকপা মতমদা, তামিল নাদুগী ইন্দস্ত্রী অমসুং দোমেস্তিক য়ুজরশিংসু মসিগী কান্নবা ফংগনি।
মরুপশিং,
পি.এম. সুর্য় গার ফ্রী ইলেক্ত্রিসিতী স্কিমসু তামিল নাদুদা খোঙজেল য়াংনা চৎথরক্লিবা অসিদা ঐহাক নুংঙাইবা ফাওই। হৌজিক ফাওবদা, সরকারনা এপ্লিকেসন লাখ 1 লাকখ্রে অমসুং সোলর রুফতোপ ইনস্তোলেসন 40,000 লোইশিনখ্রে। স্কিম অসিনা লেম্না অমসুং ক্লিন ইলেক্ত্রিসিতী ফংহনবতা নত্তনা গ্রীন জোব লিশিং কয়া অমসু শেমগৎলি।
মরুপশিং,
তামিল নাদুগী চাউখৎ-থৌরাং, চাউখৎলবা তামিল নাদুগী মঙলান অসি ঐখোয়গী মরুওইবা থৌদাংনি। ঐখোয়না তামিল নাদুগী চাউখৎ-থৌরাংগা মরী লৈনবা পোলিসীশিংদা মতম পুম্নমক্তা অখন্নবা মীৎয়েং থম্লি। হৌখিবা চহি তরা অসিদা, কেন্দ্র সরকারনা তামিল নাদুদা দিভোলুসনগী খুত্থাংদা লুপা করোর লাখ অহুম থাদোকখ্রে। হায়রিবা শেনফম অসি মমাংগী UPA সরকারনা থাদরম্বা শেনফম অদুদগী শরুক অহুম হেন্না ওইরি। চহি 11 অসিদা তামিল নাদুদা অনৌবা মেদিকেল কোলেজ 11 লৈরে। ইহান হানবা ওইনা, সরকার অমত্তনা সমুদ্র তোর্বানগী মফমশিংদা লৈবা ফিশরিজ সেক্তরগা মরী লৈনবা কম্ম্যুনিতীশিংগীদমক অসিগুম্না চাউনা মীৎয়েং চংবা উবা ফংখি। ঐখোয়না ব্লু রিভোলুসনগী খুত্থাংদা কোস্তেল ইকনোমী পাকথোক চাউথোকহল্লি।
মরুপশিং,
ঙসি তুতুকুদিগী লমদম অসি চাউখৎপগী অনৌবা তাঙ্কক অমা উবা ফংলি। কন্নেক্তিবিতী, পাৱর ত্রান্সমিসন, ইনফ্রাস্ত্রকচরগী প্রোজেক্ত পুম্নমক অসিনা চাউখৎলবা তামিল নাদু - চাউখৎলবা ভারতকী মপাঙ্গল কনবা য়ুম্ফম অমা শেমগনি। মসিগী প্রোজেক্তশিং অসিগীদমক ঐহাক্না তামিল নাদুগী ঐহাক্কী ইমুং মনুংগী মীওই পুম্নমকপু হন্না হন্না নুংঙাইবা ফোংদোকচরি। অদোমবু হন্না-হন্না থাগৎচরি। ঐহাক্না অদোমদা ৱাফম অমগা হায়জনীংই, ঙসি ঐহাক্না ময়াম্না থৱায় য়াওবা উবা ফংলে, থবক অমা তৌবীয়ু, অদোমগী মোবাইল ফোন লৌথোকউ অমসুং অদোমগী মোবাইল ফোনগী ফ্লাশ লাইৎনা অনৌবা এয়রপোর্ত অসিগী মতিক-ময়াই অদু হেনগৎহল্লু।
ভারত মাতাকী – জয়।
ভারত মাতাকী – জয়।
ভারত মাতাকী – জয়।
হন্না-হন্না থাগৎচরি।
বনক্কম।
