ୱଣକ୍କମ !
ତାମିଲନାଡ଼ୁର ରାଜ୍ୟପାଳ ଆର୍. ଏନ୍. ରବି ଜୀ, ମନ୍ତ୍ରିମଣ୍ଡଳରେସହଯୋଗୀ କିଞ୍ଜରାପୁ ରାମମୋହନ ନାଇଡୁ ଜୀ, ଡ. ଏଲ୍. ମୁରୁଗାନ ଜୀ, ତାମିଲନାଡ଼ୁର ମନ୍ତ୍ରୀ ଥଙ୍ଗମ ତେନ୍ନାରସୁ ଜୀ, ଡକ୍ଟର ଟି. ଆର୍. ବି. ରାଜା ଜୀ, ପି. ଗୀତା ଜୀବନ ଜୀ, ଅନିତା ଆର୍. ରାଧାକ୍ରିଷ୍ଣନ ଜୀ, ସାଂସଦ କାନିମୋଝିଜୀ, ତାମିଲନାଡ଼ୁ ଭାରତୀୟ ଜନତା ପାର୍ଟିର ଅଧ୍ୟକ୍ଷ ତଥା ଆମର ବିଧାୟକ ନୟନାର ନାଗେନ୍ଦ୍ରନ ଜୀ ଏବଂ ତାମିଲନାଡ଼ୁର ମୋର ଭାଇ ଓ ଭଉଣୀମାନେ!
ଆଜି ହେଉଛି କାର୍ଗିଲ ବିଜୟ ଦିବସ। ସର୍ବପ୍ରଥମେ ମୁଁ କାରଗିଲର ବୀରମାନଙ୍କୁ ଅଭିବାଦନ ଜଣାଉଛି ଏବଂ ଶହୀଦମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରୁଛି।
ବନ୍ଧୁଗଣ,
ଏହା ମୋର ସୌଭାଗ୍ୟ ଯେ ଚାରି ଦିନ ବିଦେଶରେ ରହିବା ପରେ ମୋତେ ସିଧାସଳଖ ଭଗବାନ ରାମେଶ୍ୱରଙ୍କ ଏହି ପବିତ୍ର ଭୂମିକୁ ଆସିବାର ସୁଯୋଗ ମିଳିଲା। ମୋର ବିଦେଶ ଗସ୍ତ ସମୟରେ ଭାରତ ଏବଂ ଇଂଲଣ୍ଡ ମଧ୍ୟରେ ଏକ ଐତିହାସିକ ମୁକ୍ତ ବାଣିଜ୍ୟ ରାଜିନାମା ସ୍ୱାକ୍ଷରିତ ହୋଇଛି। ଏହା ଭାରତ ପ୍ରତି ବିଶ୍ୱର ବୃଦ୍ଧି ପାଉଥିବା ବିଶ୍ୱାସ ଏବଂ ଭାରତର ନୂତନ ଆତ୍ମବିଶ୍ୱାସର ପ୍ରତୀକ। ଏହି ଆତ୍ମବିଶ୍ୱାସ ସହିତ ଆମେ ଏକ ବିକଶିତ ଭାରତ, ଏକ ବିକଶିତ ତାମିଲନାଡ଼ୁ ନିର୍ମାଣ କରିବୁ। ଆଜି ମଧ୍ୟ ଭଗବାନ ରାମେଶ୍ୱର ଏବଂ ଭଗବାନ ତିରୁଚେନ୍ଦୁର ମୁରୁଗାନଙ୍କ ଆଶୀର୍ବାଦରେ ତୁତ-କୁଡ଼ିରେ ବିକାଶର ଏକ ନୂତନ ଅଧ୍ୟାୟ ଲେଖାଯାଉଛି। ତାମିଲନାଡ଼ୁକୁ ବିକାଶର ଶିଖରକୁ ନେବା ପାଇଁ 2014 ରେ ଆରମ୍ଭ ହୋଇଥିବା ମିଶନକୁ ଥୁଥୁକୁଡି କ୍ରମାଗତ ଭାବରେ ସାକ୍ଷୀ କରୁଛି।
ବନ୍ଧୁଗଣ,
ଗତ ବର୍ଷ ଫେବୃଆରୀରେ ମୁଁ ଏଠାରେ ଭି. ଓ. ଚିଦମ୍ବରନାର ବନ୍ଦର ପାଇଁ ‘ଆଉଟର ହାର୍ବର କଣ୍ଟେନର ଟର୍ମିନାଲ’ ର ଭିତ୍ତିପ୍ରସ୍ତର ସ୍ଥାପନ କରିଥିଲି। ସେହି ସମୟରେ ଶହ ଶହ କୋଟି ଟଙ୍କାର ପ୍ରକଳ୍ପର ମଧ୍ୟ ଉଦଘାଟନ କରାଯାଇଥିଲା। ସେପ୍ଟେମ୍ବର ମାସରେ ମୁଁ ନୂତନ ଥୁଥୁକୁଡି ଅନ୍ତର୍ଜାତୀୟ କଣ୍ଟେନର ଟର୍ମିନାଲର ଉଦଘାଟନ କରିଥିଲି। ଆଜି ପୁଣି ଥରେ 48 ଶହ କୋଟି ଟଙ୍କାର ପ୍ରକଳ୍ପଗୁଡ଼ିକର ଉଦଘାଟନ କରାଯାଇଛି, ଭିତ୍ତିପ୍ରସ୍ତର ସ୍ଥାପନ କରାଯାଇଛି। ଏଥିରେ ବିମାନ ବନ୍ଦର, ରାଜପଥ, ବନ୍ଦର ଓ ରେଳପଥ ପ୍ରକଳ୍ପ ଏବଂ ଶକ୍ତି କ୍ଷେତ୍ର ସହ ଜଡ଼ିତ ଗୁରୁତ୍ୱପୂର୍ଣ୍ଣ ପଦକ୍ଷେପ ମଧ୍ୟ ସାମିଲ ରହିଛି। ଏଥିପାଇଁ ମୁଁ ଆପଣ ସମସ୍ତଙ୍କୁ, ତାମିଲନାଡ଼ୁର ଜନସାଧାରଣଙ୍କୁ ଅଭିନନ୍ଦନ ଜଣାଉଛି।
ବନ୍ଧୁଗଣ,
ଭିତ୍ତିଭୂମି ଏବଂ ଶକ୍ତି ହେଉଛି ଯେକୌଣସି ରାଜ୍ୟର ବିକାଶର ମେରୁଦଣ୍ଡ। ଏହି 11 ବର୍ଷ ମଧ୍ୟରେ ଭିତ୍ତିଭୂମି ଏବଂ ଶକ୍ତି ଉପରେ ଆମର ଧ୍ୟାନ ଏହା ଦର୍ଶାଉଛି ଯେ ତାମିଲନାଡ଼ୁର ବିକାଶ ଆମ ପାଇଁ କେତେ ବଡ଼ ପ୍ରାଥମିକତା। ଆଜିର ସମସ୍ତ ପ୍ରକଳ୍ପ ତୁତ-କୁଡ଼ି ଏବଂ ତାମିଲନାଡ଼ୁକୁ ସଂଯୋଗ, ସ୍ୱଚ୍ଛ ଶକ୍ତି ଏବଂ ନୂତନ ସୁଯୋଗର ହବ୍ ରେ ପରିଣତ କରିବ।
ବନ୍ଧୁଗଣ,
ତାମିଲନାଡ଼ୁ, ତୁତ-କୁଡ଼ି ଏବଂ ଏହାର ଲୋକମାନେ ଶତାବ୍ଦୀ ଶତାବ୍ଦୀ ଧରି ଏକ ସମୃଦ୍ଧ ଏବଂ ଶକ୍ତିଶାଳୀ ଭାରତରେ ଯୋଗଦାନ ଦେଇଛନ୍ତି। ଏହା ହେଉଛି ସେହି ଭୂମି ଯେଉଁଠାରେ ଭି. ଓ. ଚିଦାମ୍ବରମ ପିଲେଙ୍କ ଭଳି ଦୂରଦୃଷ୍ଟି ସମ୍ପନ୍ନ ବ୍ୟକ୍ତି ଜନ୍ମ ହୋଇଥିଲେ। ସେ ଦାସତ୍ୱ ସମୟରେ ମଧ୍ୟ ସମୁଦ୍ର ମାଧ୍ୟମରେ ବାଣିଜ୍ୟର ଶକ୍ତିକୁ ବୁଝିଥିଲେ। ସେ ସମୁଦ୍ରରେ ସ୍ୱଦେଶୀ ଜାହାଜ ଚଳାଇ ବ୍ରିଟିଶମାନଙ୍କୁ ଆହ୍ୱାନ କରିଥିଲେ। ଏହି ମାଟିରେ ବୀର-ପାଣ୍ଡ୍ୟ କଟ୍ଟା-ବୋମନ୍ ଏବଂ ଆଲାଗୁ-ମୁଥୁ କୋନଙ୍କ ଭଳି ମହାନ ବ୍ୟକ୍ତିମାନେ ଏକ ସ୍ୱାଧୀନ ଏବଂ ଶକ୍ତିଶାଳୀ ଭାରତର ସ୍ୱପ୍ନ ବୁଣିଥିଲେ। ସୁବ୍ରମଣ୍ୟମ ଭାରତୀଙ୍କ ଭଳି ଜାତୀୟ କବି ମଧ୍ୟ ନିକଟରେ ଜନ୍ମଗ୍ରହଣ କରିଥିଲେ। ଆପଣମାନେ ସମସ୍ତେ ଜାଣନ୍ତି, ସୁବ୍ରମଣ୍ୟମ ଭାରତୀ ଜୀଙ୍କର ତୁତ-କୁଡ଼ି ସହିତ ଦୃଢ଼ ସମ୍ପର୍କ ଥିଲା ଏବଂ ମୋର ସଂସଦୀୟ କ୍ଷେତ୍ର କାଶୀ ସହିତ ମଧ୍ୟ ତାଙ୍କର ସମାନ ଭାବେ ଦୃଢ଼ ସମ୍ପର୍କ ରହିଛି। କାଶୀ-ତାମିଲ ସଙ୍ଗମ ଭଳି କାର୍ଯ୍ୟକ୍ରମ ଜରିଆରେ ଆମେ ଆମର ସାଂସ୍କୃତିକ ଐତିହ୍ୟକୁ ନିରନ୍ତର ଭାବେ ସୁଦୃଢ଼ କରୁଛୁ।
ବନ୍ଧୁଗଣ,
ମୋର ମନେ ଅଛି, ଗତ ବର୍ଷ ହିଁ ମୁଁ ବିଲ ଗେଟସଙ୍କୁ ତୁତ-କୁଡ଼ିର ପ୍ରସିଦ୍ଧ ମୋତି ଉପହାର ଦେଇଥିଲି। ସେ ସେହି ମୁକ୍ତାଗୁଡ଼ିକୁ ତାଙ୍କୁ ବହୁତ ଭଲ ଲାଗିଲା । ଏଠାକାର ପାଣ୍ଡ୍ୟ ମୁକ୍ତା ଏକଦା ସମଗ୍ର ବିଶ୍ୱରେ ଭାରତର ଆର୍ଥିକ ଶକ୍ତିର ପ୍ରତୀକ ଥିଲା।
ବନ୍ଧୁଗଣ,
ଆଜି ଆମର ପ୍ରୟାସ ଦ୍ୱାରା ଆମେ ଏକ ବିକଶିତ ତାମିଲନାଡ଼ୁ ଏବଂ ଏକ ବିକଶିତ ଭାରତର ପରିକଳ୍ପନାକୁ ଆଗକୁ ବଢ଼ାଉଛୁ। ବ୍ରିଟେନ ଏବଂ ଭାରତ ମଧ୍ୟରେ ଏକ ମୁକ୍ତ ବାଣିଜ୍ୟ ରାଜିନାମା ସ୍ୱାକ୍ଷରିତ ହୋଇଛି। ଏଫ୍. ଟି. ଏ. ମଧ୍ୟ ଏହି ଲକ୍ଷ୍ୟକୁ ଗତି ପ୍ରଦାନ କରିଥାଏ। ଆଜି ଭାରତର ଅଭିବୃଦ୍ଧିରେ, ବିଶ୍ଵ ନିଜର ଏହାର ଅଭିବୃଦ୍ଧି ଦେଖୁଛି। ଏହି ରାଜିନାମା ଭାରତର ଅର୍ଥବ୍ୟବସ୍ଥାକୁ ମଧ୍ୟ ନୂତନ ଶକ୍ତି ପ୍ରଦାନ କରିବ। ଏହା ଦ୍ଵାରା ବିଶ୍ୱର ତୃତୀୟ ସର୍ବବୃହତ୍ ଅର୍ଥବ୍ୟବସ୍ଥା ହେବାର ଗତି ଆହୁରି ତ୍ୱରାନ୍ୱିତ କରିବ।
ବନ୍ଧୁଗଣ,
ଏହି ଏଫ୍. ଟି. ଏ. ବୁଝାମଣା ପରେ ବ୍ରିଟେନରେ ବିକ୍ରି ହେଉଥିବା 99 ପ୍ରତିଶତ ଭାରତୀୟ ଉତ୍ପାଦ ଉପରେ କୌଣସି ଟିକସ ଲାଗିବ ନାହିଁ। ଯଦି ବ୍ରିଟେନରେ ଭାରତୀୟ ଉତ୍ପାଦ ଶସ୍ତା ହୁଏ, ତେବେ ସେଠାରେ ଚାହିଦା ବୃଦ୍ଧି ପାଇବ ଏବଂ ଭାରତରେ ସେହି ଉତ୍ପାଦଗୁଡ଼ିକର ଉତ୍ପାଦନ ପାଇଁ ଅଧିକ ସୁଯୋଗ ମିଳିବ।
ବନ୍ଧୁଗଣ,
ତାମିଲନାଡ଼ୁର ଯୁବପିଢ଼ି, ଆମର କ୍ଷୁଦ୍ର ଉଦ୍ୟୋଗ, ଏମ୍. ଏସ୍. ଏମ୍. ଇ. ଏବଂ ଷ୍ଟାର୍ଟଅପ୍ଗୁଡ଼ିକ ଭାରତ-ବ୍ରିଟେନ୍ ଏଫ୍. ଟି. ଏ. ଦ୍ୱାରା ସର୍ବାଧିକ ଲାଭାନ୍ୱିତ ହେବେ। ଶିଳ୍ପ ହେଉ, ଆମର ମତ୍ସ୍ୟଜୀବୀ ଭାଇ ଓ ଭଉଣୀମାନେ ହୁଅନ୍ତୁ, ଗବେଷଣା ଏବଂ ନବସୃଜନ ହେଉ, ଏହା ସମସ୍ତଙ୍କ ପାଇଁ ଲାଭଦାୟକ ହେବ।
ବନ୍ଧୁଗଣ,
ଆଜି ଭାରତ ସରକାର ମେକ୍ ଇନ୍ ଇଣ୍ଡିଆ ଏବଂ ମିଶନ ମାନୁଫାକ୍ଚରିଂ ଉପରେ ବହୁତ ଗୁରୁତ୍ୱ ଦେଉଛନ୍ତି। ଆପଣମାନେ ସମସ୍ତେ ଏବେ ଅପରେସନ୍ ସିନ୍ଦୁର ସମୟରେ ମେକ୍ ଇନ୍ ଇଣ୍ଡିଆର ଶକ୍ତି ଦେଖିଛନ୍ତି। ଭାରତରେ ନିର୍ମିତ ଅସ୍ତ୍ରଶସ୍ତ୍ର ଆତଙ୍କବାଦର ଗୁପ୍ତ ସ୍ଥାନକୁ ଧ୍ୱଂସ କରିବାରେ ଏକ ବଡ଼ ଭୂମିକା ଗ୍ରହଣ କରିଛି। ଭାରତରେ ନିର୍ମିତ ଅସ୍ତ୍ରଶସ୍ତ୍ର ଏବେ ବି ଆତଙ୍କବାଦର ମୁଖ୍ୟମାନଙ୍କର ନିଦ ହଜେଇ ଦେବ।
ବନ୍ଧୁଗଣ,
ତାମିଲନାଡ଼ୁର ସାମର୍ଥ୍ୟକୁ ସମ୍ପୂର୍ଣ୍ଣ ଭାବେ ଉପଯୋଗ କରିବା ପାଇଁ ଭାରତ ସରକାର ତାମିଲନାଡ଼ୁର ଭିତ୍ତିଭୂମିର ଆଧୁନିକୀକରଣ ପାଇଁ ପ୍ରୟାସ କରୁଛନ୍ତି। ତାମିଲନାଡ଼ୁରେ, ଆମେ ବନ୍ଦର ଭିତ୍ତିଭୂମିକୁ ହାଇ-ଟେକ୍ ପ୍ରସ୍ତୁତ କରୁଛୁ। ଏହା ବ୍ୟତୀତ ବିମାନ ବନ୍ଦର, ରାଜପଥ ଏବଂ ରେଳପଥକୁ ମଧ୍ୟ ପରସ୍ପର ସହ ଯୋଡ଼ାଯାଉଛି। ଆଜି ତୁତ-କୁଡ଼ି ବିମାନ ବନ୍ଦରର ନୂତନ ଉନ୍ନତ ଟର୍ମିନାଲର ଉଦଘାଟନ ଏହି ଦିଗରେ ଆଉ ଏକ ବଡ଼ ପଦକ୍ଷେପ। 450 କୋଟି ଟଙ୍କା ବ୍ୟୟରେ ନିର୍ମିତ ଏହି ଟର୍ମିନାଲରେ ଏବେ ପ୍ରତିବର୍ଷ 20 ଲକ୍ଷରୁ ଅଧିକ ଯାତ୍ରୀ ରହିବେ। ପୂର୍ବରୁ ଏହାର ବାର୍ଷିକ କ୍ଷମତା ମାତ୍ର 3 ଲକ୍ଷ ଯାତ୍ରୀ ଥିଲା।
ବନ୍ଧୁଗଣ,
ଏହି ନୂତନ ଟର୍ମିନାଲ ଦ୍ୱାରା ଦେଶର ଆହୁରି ଅନେକ ମାର୍ଗକୁ ତୁତ-କୁଡ଼ି ସଂଯୋଗ ବୃଦ୍ଧି ପାଇବ। ଏହାଦ୍ୱାରା ତାମିଲନାଡ଼ୁର କର୍ପୋରେଟ ଯାତ୍ରା, ଶିକ୍ଷା କେନ୍ଦ୍ର, ସ୍ୱାସ୍ଥ୍ୟ ଭିତ୍ତିଭୂମି ଅଧିକ ଲାଭାନ୍ୱିତ ହେବ। ଏହା ସହିତ ଏହି କ୍ଷେତ୍ରର ପର୍ଯ୍ୟଟନ ସମ୍ଭାବନାକୁ ମଧ୍ୟ ନୂତନ ଶକ୍ତି ମିଳିବ।
ବନ୍ଧୁଗଣ,
ଆଜି ଆମେ ତାମିଲନାଡ଼ୁର ଦୁଇଟି ପ୍ରମୁଖ ସଡ଼କ ପ୍ରକଳ୍ପକୁ ମଧ୍ୟ ଜନସାଧାରଣଙ୍କ ଉଦ୍ଦେଶ୍ୟରେ ସମର୍ପିତ କରିଛୁ। ପାଖାପାଖି 2500 କୋଟି ଟଙ୍କା ବ୍ୟୟରେ ନିର୍ମିତ ଏହି ସଡ଼କଗୁଡ଼ିକ ଚେନ୍ନାଇର ଦୁଇଟି ପ୍ରମୁଖ ବିକାଶ କ୍ଷେତ୍ରକୁ ଯୋଡ଼ିବାକୁ ଯାଉଛି। ଏହି ସଡ଼କଗୁଡ଼ିକ କାରଣରୁ, ଚେନ୍ନାଇର ତ୍ରିକୋଣଭୂମି ଜିଲ୍ଲା ସହିତ ସଂଯୋଗ ଆହୁରି ଉନ୍ନତ ହୋଇଛି।
ବନ୍ଧୁଗଣ,
ଏହି ପ୍ରକଳ୍ପଗୁଡ଼ିକର ସହାୟତାରେ ତୁତ-କୁଡ଼ି ବନ୍ଦରର ସଂଯୋଗୀକରଣରେ ମଧ୍ୟ ବହୁତ ଉନ୍ନତି ଆସିଛି। ଏହି ସଡ଼କଗୁଡ଼ିକ ସମଗ୍ର ଅଞ୍ଚଳ ପାଇଁ ଜୀବନଧାରଣର ସହଜତାକୁ ମଧ୍ୟ ବୃଦ୍ଧି କରିବ ଏବଂ ବାଣିଜ୍ୟ ଓ ନିଯୁକ୍ତିର ନୂତନ ମାର୍ଗ ଉନ୍ମୁକ୍ତ କରିବ।
ବନ୍ଧୁଗଣ,
ଆମ ସରକାର ଦେଶର ରେଳବାଇକୁ ଶିଳ୍ପ ବିକାଶ ଏବଂ ଆତ୍ମନିର୍ଭରଶୀଳ ଭାରତର ଜୀବନରେଖା ଭାବେ ବିବେଚନା କରନ୍ତି। ସେଥି ପାଇଁ, ବିଗତ ଏଗାର ବର୍ଷ ମଧ୍ୟରେ ଦେଶର ରେଳ ଭିତ୍ତିଭୂମିର ଆଧୁନିକୀକରଣର ଏକ ନୂତନ ପର୍ଯ୍ୟାୟ ଦେଖିବାକୁ ମିଳିଛି। ତାମିଲନାଡ଼ୁ ହେଉଛି ରେଳ ଭିତ୍ତିଭୂମିର ଆଧୁନିକୀକରଣ ଅଭିଯାନର ଏକ ପ୍ରମୁଖ କେନ୍ଦ୍ର। ଆମ ସରକାର ଅମୃତ ଭାରତ ଷ୍ଟେସନ ଯୋଜନା ଅଧୀନରେ ତାମିଲନାଡ଼ୁର 77ଟି ଷ୍ଟେସନର ପୁନଃ ବିକାଶ କରୁଛନ୍ତି। ତାମିଲନାଡ଼ୁର ଲୋକମାନେ ଆଧୁନିକ ବନ୍ଦେ ଭାରତ ଟ୍ରେନ୍ ମାଧ୍ୟମରେ ଏକ ନୂତନ ଅନୁଭୂତି ପାଉଛନ୍ତି। ଦେଶର ପ୍ରଥମ ଏବଂ ଅନନ୍ୟ ଭର୍ଟିକାଲ ଲିଫ୍ଟ ରେଲ୍ ସେତୁ, ପମ୍ବନ ବ୍ରିଜ୍ ମଧ୍ୟ ତାମିଲନାଡ଼ୁରେ ନିର୍ମିତ ହୋଇଛି। ପମ୍ବନ ସେତୁ ଦ୍ୱାରା ବ୍ୟବସାୟିକ ସୁଗମତା ଏବଂ ଭ୍ରମଣର ସୁଗମତା ଉଭୟ ବୃଦ୍ଧି ପାଇଛି।
ବନ୍ଧୁଗଣ,
ଆଜି ଦେଶରେ ବୃହତ୍ ଏବଂ ଆଧୁନିକ ଭିତ୍ତିଭୂମିର ବିକାଶ ପାଇଁ ଏକ ବୃହତ୍ ଅଭିଯାନ ଚାଲିଛି। କିଛି ଦିନ ପୂର୍ବରୁ ଉଦଘାଟିତ ହୋଇଥିବା ଜାମ୍ମୁ-କାଶ୍ମୀରର ଚେନାବ ସେତୁ ହେଉଛି ଏକ ଇଞ୍ଜିନିୟରିଂ ଚମତ୍କାର। ଏହି ସେତୁ ଜାମ୍ମୁରୁ ଶ୍ରୀନଗରକୁ ପ୍ରଥମ ଥର ପାଇଁ ରେଳପଥ ଜରିଆରେ ଯୋଡା ଯାଇଛି। ଏହା ବ୍ୟତୀତ ଦେଶର ଦୀର୍ଘତମ ସାମୁଦ୍ରିକ ସେତୁ ଅଟଳ ସେତୁ ନିର୍ମାଣ କରାଯାଇଛି, ଆସାମରେ ବୋଗୀବୀଲ ସେତୁ ନିର୍ମାଣ କରାଯାଇଛି, 6 କିଲୋମିଟରରୁ ଅଧିକ ଲମ୍ବ ବିଶିଷ୍ଟ ସୋନାମାର୍ଗ ସୁଡ଼ଙ୍ଗ ନିର୍ମାଣ କରାଯାଇଛି, ଭାରତ ସରକାର, ଏନ୍. ଡି. ଏ. ସରକାର ଏଭଳି ଅନେକ ପ୍ରକଳ୍ପ ସମ୍ପୂର୍ଣ୍ଣ କରିଛନ୍ତି। ଏସବୁ ହଜାର ହଜାର ସଂଖ୍ୟାରେ ନିଯୁକ୍ତି ସୁଯୋଗ ସୃଷ୍ଟି କରିଛି।
ବନ୍ଧୁଗଣ,
ଆଜି ମଧ୍ୟ ତାମିଲନାଡ଼ୁରେ ଆମେ ଯେଉଁ ରେଳ ପ୍ରକଳ୍ପଗୁଡ଼ିକୁ ସମର୍ପିତ କରିଛୁ, ସେଥିରୁ ଦକ୍ଷିଣ ତାମିଲନାଡ଼ୁର ଲକ୍ଷ ଲକ୍ଷ ଲୋକ ଉପକୃତ ହେବେ। ମଦୁରାଇରୁ ବୋଡି-ନାୟକ୍କନୁର ପର୍ଯ୍ୟନ୍ତ ରେଳ ଲାଇନର ବିଦ୍ୟୁତକରଣ ଏବେ ବନ୍ଦେ ଭାରତ ଭଳି ଟ୍ରେନ୍ ଚଳାଇବା ପାଇଁ ରାସ୍ତା ଖୋଲି ଦେଇଛି। ଏହି ରେଳ ପ୍ରକଳ୍ପଗୁଡ଼ିକ ତାମିଲନାଡ଼ୁର ଗତି ଏବଂ ଏହାର ବିକାଶ ସ୍ତର ଉଭୟକୁ ଏକ ନୂତନ ଗତି ପ୍ରଦାନ କରିବାକୁ ଯାଉଛି।
ବନ୍ଧୁଗଣ,
ଆଜି ଏଠାରେ 2000 ମେଗାୱାଟ କ୍ଷମତାସମ୍ପନ୍ନ କୁଡାନକୁଲମ ଆଣବିକ ଶକ୍ତି ପ୍ରକଳ୍ପ ସହ ଜଡ଼ିତ ପ୍ରସାରଣ ପ୍ରକଳ୍ପର ମଧ୍ୟ ଭିତ୍ତିପ୍ରସ୍ତର ସ୍ଥାପନ କରାଯାଇଛି। ପ୍ରାୟ 550 କୋଟି ଟଙ୍କା ବ୍ୟୟରେ ନିର୍ମାଣ ହେବାକୁ ଥିବା ଏହି ବ୍ୟବସ୍ଥା, ଆଗାମୀ ବର୍ଷଗୁଡ଼ିକରେ ଦେଶକୁ ସ୍ୱଚ୍ଛ ଶକ୍ତି ପ୍ରଦାନ କରିବାରେ ଏକ ବଡ଼ ଭୂମିକା ଗ୍ରହଣ କରିବାକୁ ଯାଉଛି। ଏହି ଶକ୍ତି ପ୍ରକଳ୍ପ ଭାରତର ବୈଶ୍ୱିକ ଶକ୍ତି ଲକ୍ଷ୍ୟ ଏବଂ ପରିବେଶ ପ୍ରତିବଦ୍ଧତା ପୂରଣ କରିବାର ଏକ ମାଧ୍ୟମ ଭାବେ କାର୍ଯ୍ୟ କରିବ। ଯେତେବେଳେ ବିଦ୍ୟୁତ ଉତ୍ପାଦନ ବୃଦ୍ଧି ପାଇବ, ତାମିଲନାଡ଼ୁର ଶିଳ୍ପ ଏବଂ ଘରୋଇ ବ୍ୟବହାରକାରୀମାନେ ମଧ୍ୟ ଏଥିରୁ ବହୁତ ଉପକୃତ ହେବେ।
ବନ୍ଧୁଗଣ,
ମୁଁ ଖୁସି ଯେ ତାମିଲନାଡ଼ୁରେ ପ୍ରଧାନମନ୍ତ୍ରୀ ସୂର୍ଯ୍ୟ ଘର ମାଗଣା ବିଦ୍ୟୁତ ଯୋଜନା ମଧ୍ୟ ଦ୍ରୁତ ଗତିରେ ଚାଲୁଛି। ଏପର୍ଯ୍ୟନ୍ତ, ସରକାର ପ୍ରାୟ 1 ଲକ୍ଷ ଆବେଦନ ଗ୍ରହଣ କରିଛନ୍ତି ଏବଂ 40000 ସୌର ଛାତ ସ୍ଥାପନ ସମାପ୍ତ ହୋଇଛି। ଏହି ଯୋଜନା କେବଳ ମାଗଣା ଏବଂ ସ୍ୱଚ୍ଛ ବିଦ୍ୟୁତ ପ୍ରଦାନ କରୁନାହିଁ, ବରଂ ହଜାର ହଜାର ସବୁଜ ନିଯୁକ୍ତି ମଧ୍ୟ ସୃଷ୍ଟି କରୁଛି।
ବନ୍ଧୁଗଣ,
ତାମିଲନାଡ଼ୁର ବିକାଶ, ବିକଶିତ ତାମିଲନାଡ଼ୁର ସ୍ୱପ୍ନ ହେଉଛି ଆମର ମୂଳ ପ୍ରତିବଦ୍ଧତା। ତାମିଲନାଡ଼ୁର ବିକାଶ ସମ୍ବନ୍ଧୀୟ ନୀତିକୁ ଆମେ ନିରନ୍ତର ପ୍ରାଥମିକତା ଦେଇଛୁ। ଗତ ଦଶନ୍ଧିରେ କେନ୍ଦ୍ର ସରକାର ତାମିଲନାଡ଼ୁକୁ ତିନି ଲକ୍ଷ କୋଟି ଟଙ୍କା ହସ୍ତାନ୍ତର ମାଧ୍ୟମରେ ପଠାଇଛନ୍ତି। ପୂର୍ବ ୟୁପିଏ ସରକାର ପଠାଇଥିବା ଅର୍ଥରାଶି ତୁଳନାରେ ଏହା ତିନି ଗୁଣ ଅଧିକ। ଏହି ଏଗାର ବର୍ଷ ମଧ୍ୟରେ ତାମିଲନାଡ଼ୁକୁ ଏଗାରଟି ନୂଆ ମେଡ଼ିକାଲ କଲେଜ ମିଳିଛି। ପ୍ରଥମ ଥର ପାଇଁ କୌଣସି ସରକାର ଉପକୂଳବର୍ତ୍ତୀ ଅଞ୍ଚଳରେ ମତ୍ସ୍ୟଚାଷ କ୍ଷେତ୍ର ସହିତ ଜଡିତ ସମ୍ପ୍ରଦାୟ ପ୍ରତି ଏତେ ଚିନ୍ତା ପ୍ରକଟ କରିଛନ୍ତି। ନୀଳ ବିପ୍ଳବ ଜରିଆରେ ଆମେ ଉପକୂଳ ଅର୍ଥବ୍ୟବସ୍ଥାର ସମ୍ପ୍ରସାରଣ କରୁଛୁ।
ବନ୍ଧୁଗଣ,
ଆଜି ତୁତ-କୁଡ଼ି ର ଏହି ଭୂମି, ବିକାଶର ଏକ ନୂତନ ଅଧ୍ୟାୟର ସାକ୍ଷୀ ହେଉଛି। ସଂଯୋଗୀକରଣ, ବିଦ୍ୟୁତ ପ୍ରସାରଣ, ଭିତ୍ତିଭୂମିର ଏହି ସମସ୍ତ ପ୍ରକଳ୍ପ ବିକଶିତ ତାମିଲନାଡ଼ୁ ଏବଂ ବିକଶିତ ଭାରତ ପାଇଁ ଏକ ସୁଦୃଢ଼ ମୂଳଦୁଆ ସୃଷ୍ଟି କରିବାକୁ ଯାଉଛି। ମୁଁ ପୁଣିଥରେ ତାମିଲନାଡ଼ୁର ମୋର ସମସ୍ତ ପରିବାର ସଦସ୍ୟଙ୍କୁ ଏହି ସମସ୍ତ ପ୍ରକଳ୍ପ ପାଇଁ ବହୁତ-ବହୁତ ଅଭିନନ୍ଦନ ଜଣାଉଛି। ଆପଣଙ୍କୁ ବହୁତ-ବହୁତ ଧନ୍ୟବାଦ। ମୋର ଆଉ ଏକ ଅନୁରୋଧ ଅଛି, ଆଜି ମୁଁ ଦେଖୁଛି ଯେ ଆପଣ ସମସ୍ତେ ବହୁତ ଉତ୍ସାହିତ ଅଛନ୍ତି, ଗୋଟିଏ କାମ କରନ୍ତୁ, ନିଜ ମୋବାଇଲ୍ ଫୋନ୍ ବାହାର କରନ୍ତୁ ଏବଂ ନିଜ ମୋବାଇଲ୍ ଫୋନର ଫ୍ଲାସ୍ ଲାଇଟ୍ ସହିତ ଏହି ନୂତନ ବିମାନ ବନ୍ଦରର ଗୌରବକୁ ବୃଦ୍ଧି କରନ୍ତୁ।
ଭାରତ ମାତା କି -ଜୟ।
ଭାରତ ମାତା କି -ଜୟ।
ଭାରତ ମାତା କି -ଜୟ।
ଆପଣଙ୍କୁ ବହୁତ ବହୁତ ଧନ୍ୟବାଦ।
ୱଣକ୍କମ !
