অসামগী চীফ মিনিস্তর শ্রী হিমান্ত বিশ্বা শর্মা, মেঘালয়গী চীফ মিনিস্তর কোনরাদ সংমা, ত্রিপুরাগী চীফ মিনিস্তর মনিক সাহ, সিক্কিমগী চীফ মিনিস্তর প্রেম সিংহ তমাং, কেন্দ্রগী মন্ত্রীমন্দলগী ঐগী মরুপ জয়তিরাদিত্যা সিন্দিয়া, সুকান্ত মজুমদার, অরুনাচল প্রদেসকী দিপুতি চীফ মিনিস্ত, মিজোরম অমসুং নাগলেন্দ সরকারশিংগী মিনিস্তরশিং, অতোপ্পা মীয়ামগী মীহুৎশিং, অৱাং-নোংপোক্তগী লাকপা ইনাওশিং অমসুং ইচলশিং, ইবেম্মাশিং অমসুং ইবুংঙোশিং ।
মরুপশিং,
ঙসি অসি সংবিধান শেম্লম্বা বাবা সাহেব অম্বেদকারগী মহা পরিনির্ভনা নুমিৎনি। বাবা সাহেবনা শেম্লম্বা সংবিধান চহি ৭৫ মপুংফারকপা অসি লৈবাক অসিগী মীওই খুদিংমক্কী অচৌবা ইথিল অমনি। লৈবাক অসিগী মীয়ামগী মহুৎশীন্দুনা ঐনা বাবা সাহেবকী মফমদা ইকায়খুম্নবা উৎচরি, মহাক্কী মফমদা কোক নোঞ্জরি।
মরুপশিং,
হৌখিবা চহি ২ অসিদা ভারত মন্দাপমদা জাতি অমসুং ইন্তরনেসনেলগী থৌরম কয়া পাংথোকখ্রে। মফম অসিদা জি-২০ মাইপাক্না পাংথোকখিবা ঐখোয়না উখ্রে। ঙসিগী থৌরম অসিনা অমুক্কা হেন্না মরুওই। ঙসি দিল্লি অৱাং-নোংপোক ওইরে। অৱাং-নোংপোক্কী তোঙান-তোঙানবা মচুশিংনা ঙসি কোনুং অসিদা ফজরবা চুমথাং অমা শেম্লে। ঙসি মফম অসিদা অহানবা অষ্টলক্ষ্মী মহোৎসব পাংথোক্নবা ঐখোয় পুল্লে। মথং নুমিৎ হুম্নিদা, কুহ্মৈ অসিনা ঐখোয়গী অৱাং-নোংপোক্কী মপাঙ্গল অদু মালেম শীনবা থুংবদা উৎকনি। ললোন-তিক্কী য়ানচেশিং খুৎয়েক পীনগনি, অৱাং-নোংপোক্কী পোৎথোকশিং মালেমদা মশক তাক্কনি, অৱাং-নোংপোক্কী নাত, ইন্সাং মথেল মীয়াম্না পাম্নগনি। অৱাং-নোংপোক লমদমগী পদ্ম এৱার্দ ফংলবশিং মফমদা অসিদা পুল্লে, মখোয়না ইথিল পীগনি। মসি অৱাং-নোংপোক্ত শেন থাদনবা থোংশিং হাংদোক্লবা অচৌবা অতাংবা খুদোংচাবা অমনি। মসি অৱাং-নোংপোক্কী লৌমীশিং, খুৎহৈবশিং, অমসুং মালেম শীনবা থুংবগী ইনভেস্তরশিংগী অচৌবা খুদোংচাবা অমনি। অষ্টলক্ষ্মী মহোৎসব শীল্লিবশিং, অৱাং-নোংপোক্কী মীওইশিং, মফম অসিদা শরুক য়ারিবা ইনভেস্তরশিং, মফম অসিদা শরুক য়ারিবা গেস্তশিং, ঐনা য়াইফ-পাউজেল পীজরি।
মরুপশিং,
হৌখিবা চহি ১০০ নত্ত্রগা ২০০ হঙ্গৎনা য়েংবা মতমদা, মতম অদুদা ঐখোয়না নোংচুপলোমগী লৈবাকশিং চাউখৎলকপা উবা ফংখি। হিরম খুদিংমক্ত, শেন্মিৎলোন্দা, খুন্নাই অমসুং রাজনিতিগী লমদা নোংচুপলোমগী লৈবাকশিংনা মালেমদা ইথিল অমা পীখি। মসিগা মপা চান্ননা, ভারতকী ওইনা, নোংচুপলোমগী লৈবাকশিংনা ভারত চাউখৎপগী ৱারিদা অচৌবা থৌদাং অমা লৌখিবা ঐখোয়না উখ্রে। নোংচুপলোমদা মরুওইনা য়েংবা মতম অসিগী মতুংদা, হৌজিক্কী মতম ২১শুবা চহিচা অসি নোংপোক্কী ওইরে, এসিয়াগী ওইরে, ভারতকী ওইরে। মতৌ অসুম্না, ভারতকী মতম অসি নোংপোক ভারতকী মতম ওইরে, ঐখোয়গী অৱাং-নোংপোক্কী মতম ওইরে। হৌখিবা চহি কয়াদা মুম্বাই, অহমেদবাদ, দিল্লি, চেন্নাই, বেঙ্গালোর, হায়দ্রবাদগুম্বা অচৌবা সহরশিং চাউখৎলকপা ঐখোয়না উরে… লাক্লিবা চহিশিংদা গুৱাহাতি, অগরতালা, ইম্ফাল, ইতানগর, গেংতোক, কোহিমা, শিল্লোং অমসুং আইজোলগুম্বা সহরশিংগী অনৌবা শক্তিশিং ঐখোয়না উবা ফংলগনি। মসিদা অষ্টলক্ষ্মী মহোৎসবগুম্বা থৌরমশিংনা অচৌবা থৌদাং অমা লৌগনি।
মরুপশিং,
ঐখোয়গী চৎনবীদা মা লক্ষ্মী অসি হরাওবা, হকচাং ফবা অমসুং নুংঙাই-য়াইফবগী লাইরেম্বী ওইনা খঙনৈ। লক্ষী ইরাৎ-থৌনিবা মতমদা, ঐখোয়না মহাক্কী শাইওন নিপাল ইরাৎলি। অদিলক্ষ্মী, ধনালক্ষ্মী, ধনয়ালক্ষ্মী, গাজালক্ষ্ম, সান্থানালক্ষ্মী, বিরালক্ষ্মী, বিজয়ালক্ষ্মী অমসুং বিদ্যালক্ষ্মী অসি অৱাং-নোংপোক ভারতকী রাজ্য নিপাল… অসাম, অরুনাচল প্রদেস, মনিপুর, মেঘালয়, মিজোরম, নাগালেন্দ, ত্রিপুরা অমসুং সিক্কিমগী অষ্টলক্ষ্মীনি। অৱাং-নোংপোক্কী রাজ্য নিপাল অসি অষ্টলক্ষ্মীগী শাইওন নিপাল অদুনি।
মরুপশিং,
ঐখোয়গী চৎনবীদা মা লক্ষ্মী অসি হরাওবা, হকচাং ফবা অমসুং নুংঙাই-য়াইফবগী লাইরেম্বী ওইনা খঙনৈ। লক্ষী ইরাৎ-থৌনিবা মতমদা, ঐখোয়না মহাক্কী শাইওন নিপাল ইরাৎলি। অদিলক্ষ্মী, ধনালক্ষ্মী, ধনয়ালক্ষ্মী, গাজালক্ষ্ম, সান্থানালক্ষ্মী, বিরালক্ষ্মী, বিজয়ালক্ষ্মী অমসুং বিদ্যালক্ষ্মী অসি অৱাং-নোংপোক ভারতকী রাজ্য নিপাল… অসাম, অরুনাচল প্রদেস, মনিপুর, মেঘালয়, মিজোরম, নাগালেন্দ, ত্রিপুরা অমসুং সিক্কিমগী অষ্টলক্ষ্মীনি। অৱাং-নোংপোক্কী রাজ্য নিপাল অসি অষ্টলক্ষ্মীগী শাইওন নিপাল অদুনি। অহানবা শক্তম অসি অদি লক্ষ্মীনি। ঐখোয়গী অৱাং-নোংপোক্কী রাজ্য খুদিংমক্ত অকনবা অদি কলচর অমা লৈরি। অৱাং-নোংপোক্কী রাজ্য খুদিংমক্ত, মসিগী চৎনবী, মসিগী কলচর হরাও-তয়াম্না নুংঙাইবা ফোঙদোক্লি। মেঘালয়গী চেরি ব্লোজম ফেস্তিবেল, নাগালেন্দগী হোর্নবিল ফেস্তিবেল, অরুনাচল প্রদেসকী ওরেঞ্জ ফেস্তিবেল, মিজোরমগী চাপচার কুত ফেস্তিবেল, অসামগী বিহু, মনিপুরগী জগোয়… মখোয় অৱাং-নোংপোক্কী ফজরবা খেন্নবশিংনি।
মরুপশিং,
লক্ষ্মীগী অনিশুবা শক্তম অসি ধনলক্ষ্মীনি। অৱাং-নোংপোক্ত মহৌশাগী লন-থুম কয়া মরাংকাইনা ফংলি। অদোমশু খঙলে… অৱাং-নোংপোক্ত মিনরেলশিং, থাউ, চা অমসুং মখল কয়াগী থৱায় পানবশিংগী অচৌবা মফম অমনি। রিন্যুএবল ইনর্জিগী অচৌবা খুদোংচাবা অমা লৈরি। “ধন লক্ষ্মী”গী থৌজাল অসি অৱাং-নোংপোক শীনবা থুংবগী অচৌবা বর অমনি।
মরুপশিং,
লক্ষ্মীগী অহুমশুবা শক্তম ধন্যা লক্ষ্মীনা অৱাং-নোংপোক্ত থৌজাল য়াম্না পীরে। ঐখোয়গী অৱাং-নোংপোক অসি মহৌশাগী লৌউ, ওর্গনাইক লৌউ, মিল্লেতশিংগী মমিং চৎলি। সিক্কিমনা ভারতকী অহানবা মপুংফাবা ওর্গানিক রাজ্য ওইবদা ঐখোয় চাউথোকচৈ। অৱাং-নোংপোক্ত ফৌ, ৱা, স্পাইসশিং অমসুং হিদাক ওইনা শীজিন্নবা য়াবা পাম্বীশিং হৌদুনা লমদম অসিগী লৌউ-শিংউগী শক্তি অদু উবা ফংলে। হকচাং ফবা পুন্সি মহিংশিং অমসুং মচি ওইবা চীঞ্জাকশিংগী মতাংদা ঙসি ভারতনা মালেমদা পাম্বৈশিং ফংহনবা পাম্লিবা অসিদা অৱাং-নোংপোক্না মরুওইবা থৌদাং অমা লৌগনি।
মরুপশিং,
লক্ষ্মীগী মরিশুবা শক্তম অসি গাজা লক্ষ্মীনি। গাজা লক্ষ্মীনা থম্বাল অমগী মথক্ত ফমখি অমসুং শামুশিংনা কোইশিনখি। ঐখোয়গী অৱাং-নোংপোক্ত পাক-চাউরবা উমংশিং, নেসনেল পার্কশিং অমসুং কাজিরঙ্গা, মনাস-মেহাওগুম্বা ৱাইল্দলাইফ সেঙ্কচুরিশিং, অঙকপা শুরুংশিং, ফজরবা পাৎশিং লৈরি। গাজা লক্ষ্মীগী থৌজালদগী অৱাং-নোংপোক অসি মালেমদা খ্বাইদগী ফজরবা লমকোয়ফম অমা ওইনা শেমগৎনবগী শক্তি লৈরে।
মরুপশিং,
লক্ষ্মীগী মঙাশুবা শক্তম অসি শন্তান লক্ষ্মনি, মহাক পোৎথোক পুথোকপা অমসুং হৈথোই-শিংথোইবগী খুদম অমনি। অৱাং-নোংপোক অসি খুৎ-শা হৈবগী মমিং চৎলি। একজিবিসন য়েংবা লাকপা মীওইশিং, কৈথেল য়েংগদবনি… মখোয়না অৱাং-নোংপোক্কী অনৌবা পোৎথোকশিং উবা ফংগনি। হেন্দলুমশিং, হেন্দিক্রাফশিংগী হৈথোই-শিংথোইবা অসিনা মীওই খুদিংমক্কী থম্মোয় হুরি। অসামগী মুগা সিল্ক, মনিপুরগী মোইরাং ফি, ৱাংখৈ ফি, নাগালেন্দগী চাখেসাং ফি… জি.আই তেগ ফংলবা পোৎথোক কয়ানা অৱাং-নোংপোক্কী ক্রাফ অমসুং হৈশিংবা উৎলি।
মরুপশিং,
অষ্টলক্ষ্মীগী তরুকশুবা শক্তম অসি বীরলক্ষ্মীনি। বীরলক্ষ্মী অসি থৌনা অমসুং পাঙ্গলগী অপুনবনি। অৱাং-নোংপোক্না নুপীশিংগী থৌনাগী খুদম ওইরি। মনিপুরগী নুপী লাল অসি নুপীশিংগী থৌনাগী খুদম অমনি। কমদৌনা অৱাং-নোংপোক্কী নুপীশিংনা মীনাই নাইথাংগী থবক মায়োক্নখিবগে হায়বা অসি ভারতকী পুৱারিদা সনাগী ময়েকশিংনা ইদুনা লৈহৌরগনি। ফুঙ্গা ৱারিশিংদগী হৌরগা নিংতম ইহৌ ফাওবগী থৌনা ফরবী নুপীশিং হায়বদি রানি গাইদিনলিয়ু, কান্তালাতা বরুৱা, রানি ইন্দিরা দেবী, লালানু রোপিলিয়ানিগুম্বী অৱাং-নোংপোক্কী নুপীশিংনা লৈবাক শীনবা থুংনা ইথিল পীরে। ঙসি ফাওবা ঐখোয়গী অৱাং-নোংপোক্কী ইচানুপীশিংনা মসিগী চৎনবী অসি ঙাক্লি। মফম অসিদা লাক্ত্রিঙৈদা ঐনা য়েংলুবা স্তোলশিং অদু অয়াম্বনা নুপীশিংনি। নুপীশিংগী অসিগুম্বা শুবা-নোম্বা কনবা অসিনা অৱাং-নোংপোক্কী লাম্বা লৈত্রবা থৌনা অমা ওইরে।
মরুপশিং,
অষ্টলক্ষ্মীগী তরেৎশুবা শক্তম অসি জয় লক্ষ্মীনি। মহাক মাইপাকপা অমসুং মিংচৎ পীবা অমনি। ঙসি, মালেম শীনবা থুংনা মরুওইবা থৌদাং অমা লৌনবা ভারতকী থাজবা অসিদা ঐখোয়গী অৱাং-নোংপোক্না মরুওইবা থৌদাং অমা লৌরে। ঙসি ভারতনা লৈবাক অসিগী নাত অমসুং ললোন-ইতিক মালেমগী ওইনা শম্ননবা মীৎয়েং চঙলিবা মতম অসিদা, অৱাং-নোংপোক্না ভারত অসি মপান নাইদ্রবা খুদোংচাবশিং লৈরিবা খা এসিয়া অমসুং নোংপোক এসিয়াগা শম্নহল্লে।
মরুপশিং,
অষ্টলক্ষ্মীগী নিপালশুবা শক্তম অসি বিদ্যা লক্ষ্মীনি হায়বদি লৌশিং অমসুং লাইরিক-লাইশুগী লক্ষ্মী। অনৌবা ভারত অমা শেমগৎনবা মরুওইবা লাইরিক তমফম কয়া অৱাং-নোংপোক্ত লৈরি। আই.আই.তি গুৱাহাতি, এন.আই.তি সিলচর, এন.আই.তি মেঘালয়, এন.আই.তি অগরতালা অমসুং আই.আই.এম শিল্লোং… অচৌবা লাইরিক তম্ফম কয়া অৱাং-নোংপোক্ত লৈরি। অৱাং-নোংপোক্কী অহানবা এ.আই.আই.এম.এস লৈরে। লৈবাক অসিগী অহানবা নেসনেল স্পোর্তস য়ুনিভর্সিতিশু মনিপুরদা শেমগৎলি। মেরি কোম, বাইচুং ভুতিয়া, মিরাবাই চনু, লভলিনা, সরিতা দেবী… অৱাং-নোংপোক্না শান্নরোয় কয়া লৈবাক অসিগীদমক পুথোক্লি। ঙসি অৱাং-নোংপোক অসি তেক্নোলোজিগা মরী লৈনবা স্তার্দ-অপশিং, সর্বিস সেন্তরশিং অমসুং সেমিকন্দক্তরগুম্বা ইন্দস্ত্রিশিংদা খুমাঙচাউশিল্লে। ইন্দস্ত্রিশিং অসিদা নহারোল লিশিং কয়া থবক ফংলে। অতোপ্পা ৱাহৈ অমদা, লমদম অসি, বিদ্যালক্ষ্মী ওইনা, নহারোলশিংগী লাইরিক-লাইশু অমসুং স্কিলশিংগী অচৌবা মফম অমা ওইরক্লে।
মরুপশিং,
অষ্টলক্ষ্মী মহোৎসব অসি অৱাং-নোংপোক্কী অফবা তুংলমচৎগী কুহ্মৈ অমনি। মসি বিকসিত ভারত অমগী পান্দম য়াংশিনহন্নবা চাউখৎপগী অনৌবা নুমিৎ থোক্লকপগী কুহ্মৈ অমনি। ঙসিদি অৱাং-নোংপোক্ত শেন থাদনবা অপাম্বা লৈরে। হৌখিবা চহি ১০ দা, ঐখোয়না অৱাং-নোংপোক লমদমদা চাউখৎপগী অঙকপা খোঙচৎ অমা ঐখোয়না উরে। অদুবু মফম অসি চৎপা অসি অরাইবা অমা ওইদে। ভারতকী চাউখৎপগী ৱারিগা অৱাং-নোংপোক্কী রাজ্যশিংগা শম্ননবা ঐখোয়না পায়খৎপা য়াবা থবক খুদিংমক পায়খৎলে। ভোৎ মশিং য়েংলগা কমদৌনা চাউখৎ-থৌরাংগী থবকশিং পায়খৎপগে হায়বা মতম কয়াগী মমাঙদগী ঐখোয়না উদুনা লাক্লি। অৱাং-নোংপোক লমদম ভোৎ য়াম্না লৈতে, সিত য়ামদে। মরম অদুনা, মমাঙগী সরকারশিংনা চাউখৎ-থৌরাংগী থবকশিং মীরাইখি। অতল জিগী সরকারনা অহানবা ওইনা অৱাং-নোংপোক চাউখৎনবা তোখায়বা মিনিস্ত্রি অমা লিংখৎখি।
মরুপশিং,
হৌখিবা চহি ১০ দা, দিল্লি অমসুং দিল (থম্মোয়) গী মরক্ত লৈনরিবা অরাপ্পা হন্থহন্নবা ঐখোয়গী থম্মোয় শেংনা হোৎনদুনা লাক্লি। কেন্দ্র সরকারগী মিনিস্তরশিং অৱাং-নোংপোক রাজ্যশিংদা ৭০০ রক হেন্না চৎতুনা লমদম অসিগী মীয়ামগা মতম শাংনা লোয়নরে। মসিনা অৱাং-নোংপোক্কী মীয়ামগা সরকারগা থম্মোয়গী ওইবা মরী অমা শেমগৎলে। মসিনা লমদম অসিদা চাউখৎপা অঙকপা ফংনা য়াংখৎলে। অৱাং-নোংপোক চাউখৎপা য়াংখৎনবা ৯০ গী মতমদা থৌশিল অমা শেমখি। থৌশিল অসিগী মখাদা, কেন্দ্র সরকারগী মিনিস্ত্রি ৫০ হেনবনা মখোয়গী বজেতকী চাদা ১০ অৱাং-নোংপোক লমদমদা থাদখি। থৌশিল অসি শেম্বদগী হৌরগা ২০১৪ ফাওবা অৱাং-নোংপোক্না ফংখিবা বজেতকী শেনফম অসি হৌখিবা চহি ১০দা ঐখোয়না পীখিবা শেনফম্না হেল্লে। হৌখিবা চহি ১০ দা, স্কিম অমা খক্তগী মখাদা, অৱাং-নোংপোক খক্তগী লুপা করোর লাখ ৫ হেন্না চাদিং তৌখ্রে। হৌজিক পাল্লিবা সরকার অসিনা অৱাং-নোংপোক লুম্না লৌই হায়বা মসিনা উৎলে।
মরুপশিং,
স্কিম অসিগী মথক্ত, ঐখোয়না অৱাং-নোংপোক লমদমগী অচৌবা অখন্নবা স্কিম কয়া হৌদোক্লে। পি.এম-দিভাইন, স্পিসিএল ইনফ্রাস্ত্রকচর দিবলপমেন্ত স্কিম অমসুং নোর্থ ইস্ত ভেঞ্চর ফন্দ… হায়রিবা স্কিমশিং অসিনা অনৌবা থবকশিং ফংনবা খুদোংচাবা কয়া পীরে। অৱাং-নোংপোক্কী উদ্যোগ চাউখৎনবা ঐখোয়না উন্নাতি স্কিম হৌদোক্লে। অনৌবা উদ্যোগশিংগী করিগুম্বা হেন্না ফবা ফিবমশিং লৈরবদি, অনৌবা থবকশিং ফংগনি। হৌজিক ভারত্ত সেমিকন্দক্তর সেক্তর অসি অনৌবনি। অনৌবা সেক্তর অসি য়াংনা চাউখৎনবা ঐখোয়না অৱাং-নোংপোক্কী অসাম খল্লে। অৱাং-নোংপোক্ত অসিগুম্বা মখলগী অনৌবা উদ্যোগ লিংখৎপা মতমদা, ভারত অমসুং মালেমগী ইনভেস্তরশিংনা মফম অসিদা অনৌবা খুদোংচাবশিং থিরক্কনি।
মরুপশিং,
ঐখোয়না অৱাং-নোংপোক অসি থম্মোয়গী মরী, শেন্মিৎলোন অমসুং মহৌশাগী অকোয়বা ফিবম অহুম অসিগা শম্নহল্লে। অৱাং-নোংপোক লমমদা, ঐখোয়না ইনফ্রাস্ত্রকচর খক শেমগৎপা নত্তে, তুংগী অকনবা য়ুম্ফম অমা শেমগৎলি। হৌখিবা চহি কয়াদা থেংনখিবা অৱাং-নোংপোক্কী খ্বাইদগী চাউবা খুদোংচাদবা অসি লম্বী-থোংনি। অরাপ্পা সহরশিং য়ৌবদা নুমিৎ কয়ানি অমসুং চয়োল কয়া চঙখি। রাজ্য অয়াম্বদা ত্রেনগী খুদোংচাবশিং লাইনা ফংখিদে। মরম অদুনা,২০১৪ গী মতুংদা, ঐখোয়গী সরকারনা ফিজিকেল ইনফ্রাস্ত্রকচর অমসুং সোসিএল ইনফ্রাস্ত্রকচরগী অকনবা মীৎয়েং অমা থম্লে। মসিগী মথক্ত, ঐখোয়না মতম শাংনা পন্দুনা লাক্লবা প্রোজেকশিং য়াংনা লোইশিনখ্রে। বোগি-বিল থোং অসি মসিগী খুদম অমনি। মসি লোইশিন্দ্রিঙৈ মমাঙদা, চহি কয়া থেংথখি- ধেমাজিদগী দিব্রুগর ফাওবা চৎপদা নোংমা চঙখি। ঙসিদি খোঙচৎ অসি পুং ১ দগী পুং ২ ফাওবা চঙলে। অসিগুম্বা অওনবা কয়া খুদম ওইনা পীবা য়াই।
মরুপশিং,
হৌখিবা চহি ১০ দা, অৱাং-নোংপোক শীনবা থুংনা কিমি ৫,০০০ রোমগী নেসনেল হায়ৱে প্রোজেকশিং মপুংফানা লোইশিনখ্রে। মরুওইবা প্রোজেকশিংগী মনুংদা অরুনাচল প্রদেসতা সেলা তন্নেল, ইন্দো-ম্যান্মার-থাইলেন্দ ত্রাইলেতরেল হায়ৱে অমসুং নাগালেন্দ, মনিপুর অমসুং মিজোরমগী ঙমখৈগী লম্বীশিংনা লমদম অসিদা শিংথাবা য়ানা চৎথোক-চৎশিনগী থবক ফগৎহল্লে। হৌখিবা চহিদা, জি-২০ মীফম মনুংদা, ভারতনা মসিগী আই-মেককী পান্দম পুথোকখ্রে, আই-মেক- ইন্দিয়া-মিদল ইস্ত য়ুরোপ কোরিদোর অসিনা মালেমগা অৱাং-নোংপোক্কা শম্নহনগনি।
মরুপশিং,
অৱাং-নোংপোক্ত রেল কন্নেক্তিবিতি শেমগৎপা য়াংখৎলে। রেলনা রাজ্যগী কোনুংশিং শম্নবগী থবক লোইশিল্লক্লে। অৱাং-নোংপোক্ত অহানবা ওইনা বন্দে ভারত ত্রেন চেনবা হৌখ্রে, মসি পুৱারি ওইরবা মাইপাকপা অমনি। হৌখিবা চহি ১০ দা, অৱাং-নোংপোক লমদমদা এয়রপোর্তশিং অমসুং ফ্লাইতশিংগী মশিং শরুক অনি হেনগৎলে। ঐখোয়না ঈশিং লম্বীশু ফগৎহল্লে অমসুং ব্রাহ্মপুত্রা অমসুং বারাক তুরেলশিংদা প্রোজেকশিং পায়খৎলি। মসিগী মথক্ত, সব্রুম লেন্দপোর্ত ফাওরগা পাংথোকপা ঈশিংগী লম্বী ফিবম ফগৎলে।
মরুপশিং,
অৱাং-নোংপোক্ত মোবাইল অমসুং গ্যাস কন্নেক্তিবিতিগী থবক য়াংনা পায়খৎলি। লমদম অসিগী রাজ্য খুদিংমক নোর্থ ইস্ত গ্যাস গ্রিদকী খুৎথাংদা শম্নরে। কিমি ১,৬০০ রোমগী গ্যাস পাইপলাইন ফুম্লে। ইন্তরনেতকী খুদোংচাবা হেনগৎহন্নবা ঐখোয়না মীৎয়েং চঙলে। অৱাং-নোংপোক শীনবা থুংনা মোবাইল তৱার ২,৬০০ হেন্না খিল্লে অমসুং কিমি ১৩,০০০ হেনবগী ও.এফ.সি ফুমখ্রে। হৌজিক অৱাং-নোংপোক শীনবা থুংনা ৫-জি ফংবদা ঐ হরাওই।
মরুপশিং,
অৱাং-নোংপোক শীনবা থুংনা সোসিএল ইনফ্রাস্ত্রকর শিংথাবা য়ানা চাউখৎলে। লমদম অসিদা মেদিকেল কলেজশিং শিংথাবা য়ানা ফগৎলে অমসুং কেন্সরগুম্বা লায়নাশিং লায়েংনবা মতমগা চুনবা খুদোংচাবশিং শেমগৎলে। অয়ুস্মান ভারত য়োজনাগী মখাদা, অৱাং-নোংপোক্কী অনাবা লাখ কয়া লেম্না লায়েংলে। মীখল মনুংদা, চহি ৭০ হেল্লবা অহলশিং লেম্না লায়েংগনি হায়না ঐনা থাজবা পীখি। অয়ুস্মান বায়া বন্দানা কার্দ হৌদোক্তুনা মসিগী ৱাশক অসি ঐখোয়না ঙাক্লে।
মরুপশিং,
লম্বী-থোং ফগৎহনবগী মথক্ত, অৱাং-নোংপোক লমদমগী চৎনবীশিং, তেক্সতাইলশিং অমসুং তুরিজম চাউখৎনবা ঐখোয়না অকনবা থবক পায়খৎলে। মসিনা লৈবাক শীনবা থুংবগী মীওইশিংনা লমদম অসি মশক খঙদোক্নবা পুক্নিং থৌগৎলে। হৌখিবা চহি ১০ দা, অৱাং-নোংপোক লমদম কোয়বা লাকপা মীওই মশিং শরুক অনি হেনগৎলে। শেন থাদবা অমসুং তুরিজম হেনগৎলকপা অসিনা অনৌবা থবক অমসুং ললোন-ইতিক্কী খুদোংচাবা কয়া পীরে। হায়রিবা থবকশিং অসিনা অৱাং-নোংপোক-ঐখোয়গী অষ্টলক্ষ্মী-মমাঙদা অমুক্ত ওইখিদ্রিবা মওংদা চাউখৎলে।
মরুপশিং,
অষ্টলক্ষ্মীগী নহারোলশিং ভারত সরকারনা মরুওইনা লৌরি। মখোয়গী লমদম চাউখৎপা উনবা অষ্টলক্ষ্মীগী নহারোলশিং মতম পুম্নমক্ত পুক্নিং থৌগৎলি। হৌখিবা চহি ১০ দা, মখোয়না মতেং পাংবদগী অৱাং-নোংপোক্কী রাজ্য খুদিংমক শান্তি লৈরে। কেন্দ্র সরকার অমসুং রাজ্য সরকারশিং অনিমক্কী অপুনবা থবকশিংনা, নহারোল লিশিং কয়া হিংশাগী থবক থাদোক্লে অমসুং চাউখৎপগী অনৌবা লম্বীদা লাক্লে। হৌখিবা চহি ১০দা অৱাং-নোংপোক্তা পুৱারি ওইরবা শান্তিগী য়ানচে কয়া খুৎয়েক পীনখ্রে অমসুং রাজ্যশিংগী মরক্ত লৈনবা ঙমখৈগী মুক্নবশিং মরুপ-মপাং ওইনা য়ানবা পুরকখ্রে। লমদম অসিদা হিংশাগী থবকশিং হন্থরে অমসুং জিলা কয়াদগী অফস্পা লৌথোক্লে। অপুনবা ওইনা, ঐখোয়না অৱাং-নোংপোক্কী অফবা তুংলমচৎ অমা শেম্লি অমসুং মসি ফংনবা সরকারনা দরকার ওইবা থবক খুদিংমক পাংথোক্লে।
মরুপশিং,
অৱাং-নোংপোক লমদমগী অঙকপা পোৎথোকশি মালেমগী কৈথেলশিং য়ৌহন্নবা ঐখোয়না হোৎনরি। মসি ফংনবা, জিলা খুদিংমক্কী মশক থোকপা পোৎথোকশিং য়োকখৎনবা ‘ৱান দিস্ত্রিক ৱান প্রদক’ থৌরাং থবক ওইনা পায়খৎলে। হায়রিবা পোৎলমশিং অসি একজিবিসনশিং অমসুং গ্রামিন হত বাজারশিংদা উবা ফংগনি। অৱাং-নোংপোক্কী পোৎথোকশিংগী ওইনা ‘ভোকেল ফোর লোকেল’গী লাইৱা অসি ঐখোয়না লাউরি। ঐনা য়াম্না তোইনা হায়রিবা পোৎথোকশিং অসি ঐগী ফোরেনগী গেস্তশিংদা পীখি অমসুং লমদম অসিগী অঙকপা কলা অমসুং ক্রাফমেনশিপ মালেমদা মশক তাক্লে। ঐগী লৈবাক অসিগী মীয়াম, মরুওইনা দিল্লিগী মীয়াম, মখোয়গী নোংমগী পুন্সিদা অৱাং-নোংপোক লমদমগী পোৎথোক অমা শীজিন্ননবা ঐনা হায়জরি।
মরুপশিং,
হৌখিবা চহি খরদা, অৱাং-নোংপোক লমদমগী মীওইশিং গুজরাত্ত পাংথোকপা নাতকী থৌরম অমা শরুক য়াখ্রে। গুজরাতকী পোর্বন্দর ময়াদা মধাবপুর কৌবা অচৌবা মেলা অমা পাংথোকই অমসুং মসিদা শরুক য়ানবা ঐনা অদোমগী মফমদা মাঙজৌননা চেবাউ পীজরি। মাধাবপুর মেলা অসি ভগবান কৃষ্ণ অমসুং লাইরেম্বী রুকমিনি লুহোংবগী কুহ্মৈ অমনি, রুকমিনি অসি অৱাং-নোংপোক লমদমগী নিঙোল অমা ওইনা লৌনরি।
রাম নবমীগা মপা চান্না চহি খুদিংগী মার্চ-এপ্রিল থাদা পাংথোকপা মেলা অসিদা অৱাং-নোংপোক্কী মীওইশিং শরুক য়ানবা ঐনা হায়জরি। হায়রিবা মতম অসিদা গুজরাত্ত মসিগা মান্নবা মেলা অমা পাংথোক্নবা ঐনা থৌরাং তৌরি অমসুং অৱাং-নোংপোক্কী মীয়ামগী পোৎথোকশিং উৎনবা অফবা মফম অমা পীগনি। ভগবান কৃষ্ণ অমসুং অষ্টলক্ষীগী থৌজালদগী ২১শুবা চহিচা অসিদা অৱাং-নোংপোক লমদমগী চাউখৎপগী অনৌবা থাক অমা য়ৌগনি হায়না ঐনা চেৎনা থাজৈ। মসিগী থাজবাফ অসিগা লোয়ননা, ঐগী ৱারোল লোইশিঞ্জরে, থৌরম অসি অমসুং লমদম অসি মাইপাক্না য়াইফ-পাউজেল পীজরি।
অদোম থাগৎচরি।
